Read Southern Kisi Chɔ᷄ŋ 7 Bible Online

Chɔ᷄ŋ 7 - Southern Kisi bible

Chɔ᷄ŋ 7

¹O̍ ko̍ŋ kɔ̍ɔ̍lī, Mi̍ Chi̍i̍sū ba̍lū wāŋnda̍ chōo̍ o̍ būŋgɛ̄ī Kāli̍līve̍ ni᷄ŋ. Kɛ̍, ndu̍ o̍o̍ ku̍ē o̍ būŋgɛ̄ī Chūdi̍a̍āve̍ ni᷄ŋ te̍. Kāni̍ fo̍ndōle̍, wānāā bɛ̄ndūāā Chu̍ūwa̍ ā wa̍ nɛ̄īla̍ŋ nūūvīa̍a̍ le̍ ndu̍ dīyɔ̄ɔ̍.

²A̍ bōōndi̍i̍ ke̍ŋ, bɔ̄ŋa᷅ŋ lābāfɛ̄i̍yo̍ wa̍ ni᷅ŋ le̍ fūūlūūwo̍.

³Le̍ he̍ī, mi̍ Chi̍i̍sū pɔ̄mbūāā ndūa̍a̍ dīmūl ndu̍ āā, “Ma̍l na̍nu᷄ŋ mā kūɛ̄ Chūdi̍a̍ā, le̍ mī bu̍ɛ̍i̍yāā nūmnda̍ lo̍ŋ a̍ che᷅ ka̍a̍ma̍ālā ŋ̄ chō tōsāa̍ la̍ŋ.

⁴Kāni̍, wānā o̍ wānā tē a̍ hɛ̍na̍ŋ mā he̍l tɔ̍ɔ̍ pɛ̍, a̍ to̍sā i̍sɔ̍ɔ̍ o̍ īsɔ̄ɔ̍ o̍ vīōŋnɔ᷄ŋ ni̍ŋ te̍. Le̍la̍ŋ, tē a̍ wa̍ ka̍a̍ma̍āla̍ŋ nda᷅ŋ tōsāa̍ pɛ̍, to̍sa̍ mī wāŋnda̍ kpo̍u̍ a̍ che᷅ nu̍m o̍ la̍ŋ tōsāa̍.”

⁵Kɛ̍ ndu̍yɛ̍, pɔ̄mbūāā ndūāā kālāa̍ bɛ̍ɛ̍, nda̍ a̍a̍ do̍u̍ ti̍i̍nda᷄ŋ o̍ ndu̍ ni̍ŋ te̍.

⁶Mi̍ Chi̍i̍sū di̍mūl pɔ̄mbūāā ndūa̍a̍ āā, “Bōōndi̍i̍ nīi̍ ī fūūlu̍u̍ wɔ̍ le̍ he̍ī tōsā le̍. Le̍ nya̍ nya̍, te̍le̍ŋ o̍ te̍le̍ŋ wa᷅ o̍ bɛ̍ndāā.

⁷Ya̍ I̍ cho̍ wāŋnda̍ dīmūllo̍ māā ka̍ālā ndāla̍ŋ lā ni᷄ŋ te̍. Le̍ he̍ī ya̍ nda̍ tūl le̍yɛ̍ ni̍. Nya̍ nya̍ sa̍bū o̍ sa̍bū cho̍ mā tu᷄l nya̍ lēyɛ̄ le̍ ndu̍ le̍.

⁸Nya̍ kɔ̍. Ya̍ I̍ cho̍ la̍kɔ̍ o̍ bɔ̄ŋa᷅ŋndo̍ ho̍ō le̍, kāni̍, te̍le̍ŋ nī kpe̍e̍kpe̍i̍yo̍ ō fūūlu̍u̍ wɔ̍ le̍.”

⁹Mɛ̄ɛ̍ o̍ so̍ō dīōmnda̍ŋ nda᷅ŋ, mbo̍ lōnu᷄ŋ Kāli̍lī.

¹⁰Mɛ̄ɛ̍ pɔ̄mbūa̍a̍ Chi̍i̍sūa̍a̍ kūɛ̄ Chūlu̍sɛ̄lɛ̄m le̍ bɔ̄ŋa᷅ŋ lābāfɛ̄i̍yo̍, o̍ ko̍ŋ kɔ̍ɔ̍lī, mi̍ Chi̍i̍sū bɛ̍ɛ̍ cha̍ŋ mbo̍ kūā lo̍ŋ. Kɛ̍, ō ku̍e̍ kpe̍nde̍ke̍le̍ le̍. Mbo̍ kūā sɔ̍ɔ̍ sɔ̍ɔ̍ yɔ̍ŋi̍ wāŋnda̍ nda̍ a̍a̍ si̍na̍.

¹¹Wānāā bɛ̄ndūāā Chu̍ūwa̍ ā wa̍ ndu̍ nūūvīa̍a̍ o̍ bɔ̄ŋa᷅ŋ kōŋ ni᷄ŋ. Ma̍ sa̍āŋ nyu̍u̍nīa̍a̍ āā, “Ɔ̍ɔ̄ lāŋu̍nɔ̄ɔ̍ ho̍ō?”

¹²Wāŋnda̍ ka̍ ka̍, ā wa̍ sɔ̄ɔ̍ŋ to̍o̍lo᷄ŋ a̍ Chi̍i̍sū o̍kɔ̄ɔ̄. Mi̍ ā pūm ā wā dīmīo̍o̍ āā, “Wānā kɛ̍ndɔ̄ɔ̍ po̍ ko̍ŋ chō ni̍.” Kɛ̍, mi̍ ā pūm ā dīmī āā, “Hūīyo̍ o̍ cho̍ wāŋnda̍ ni̍.”

¹³Kɛ̍, wānā o̍ wānā ndu̍ o̍o̍ su̍ū kpe̍nde̍ke̍le̍ a̍ Chi̍i̍sū o̍kɔ̄ɔ̄ le̍. Kāni̍, ā wa̍ wānāā bɛ̄ndūāā Chu̍ūwa̍ wōo̍.

¹⁴Pālɛ̍i̍ bɔ̄ŋa᷅ŋnde̍ ndi̍ i̍i̍ pi̍ɔ̍u̍ ni᷅ŋ tɛ̄ɛ̄ŋ. O̍ ko̍ŋ, mi̍ Chi̍i̍sū ku̍ā o̍ chīɛ̍i̍ Mɛ̄lɛ̄ka̍a̍ mbo̍ kāndū wāŋnda̍ pɛ̄ɛ̄kōo̍.

¹⁵Mi̍ kɔ̄ndɔ̄fi̍llo̍ bīī wānāā bɛ̄ndūāā Chu̍ūwa̍ a̍ mɛ̄ɛ̍ o̍ pɛ̍ɛ̍ku̍ yɛ̍. Ma̍ dīmī āā, “Vɛ̄ɛ̍nɛ̍ po̍o̍ ho̍ō lōōku̍ yɛ̄ dɛ̍nɛ̍ si̍nāa̍ ho̍ō sɔ̄lā, ō ku̍e̍ yɛ̍ o̍ pɛ̄ɛ̄kū bɛ̄ŋgu̍ ti̍chɛ̄i̍ya̍a̍ nāa̍ o̍ bā bɛ̄ŋgu̍ le̍?”

¹⁶Mi̍ Chi̍i̍sū mu̍lī āā, “Mɛ̄lɛ̄ka̍ o̍ ve᷅m ya̍ wo̍, o̍ ndu̍ lo̍ pɛ̄ɛ̄kū ya̍ I̍ pɛ̍ɛ̍kū wa᷅ŋnda̍ wo̍ ō chɛ᷄ŋ ni̍. Ō cho̍ pɛ̍ɛ̍kū ni̍ ya̍ pi̍la̍ le̍.

¹⁷Wānā o̍ wāna̍ nɔ̍ yēēmɛ̍i̍ le̍ nyɛ̄ Mɛ̄lɛ̄ka̍ hɛ̄na̍ŋ ndo̍ tōsāa̍ pɛ̍, ō nɔ̄lā mbō sīna̍ tē o̍ Mɛ̄lɛ̄ka̍ lo̍ pɛ̄ɛ̄kū ya̍ I̍ pɛ̍ɛ̍kū wa᷅ŋnda̍ wo̍ chɛ᷄ŋ ni̍, ɔ̄ɔ̄ tē kɛ̄ɛ̄sīāā ni̍ ya̍ pi̍la̍a̍ ko̍ni̍.

¹⁸Wāna̍ hu᷅ŋ ho̍ō mbō pɛ̄ɛ̄ku̍ wāŋnda̍ nyɛ̄ ndu̍ pi̍la̍ o̍ kɛ̍ɛ̍si̍a̍a̍ wo̍ wo̍, mɛ̄ɛ̍ wānā ko̍ŋ, ndu̍ pi̍la̍ le̍ tɔ̍ɔ̍ ndɔ̄ kɛ̍ndɔ̄ɔ̍ o̍ wa᷅ ki̍ndīo̍o̍ ni̍. Kɛ̍, wāna̍ ki̍ndī ho̍ō le̍ mī wāna̍ ve᷅m ndu̍ wo̍ ō sɔ̄la̍ tɔ̍ɔ̍ kɛ̍ndɔ̄ɔ̍ wo̍, mɛ̄ɛ̍ ndu̍ cho̍ wāna̍ di̍mī to᷅nya̍a̍ wo̍ ni̍. Ndu̍yɛ̍, wānā ko̍ŋ cho̍ wa᷅na̍ lāchōōwā le̍.

¹⁹Lā sīnā māā Mūu̍sē ndu̍ chɔ̍m nya̍ sāwāla̍ŋ le̍ mī lā chu̍a̍ ni̍. Kɛ̍ ndu̍yɛ̍, nya̍ fa̍ū wānā pi᷅lɛ̍ bɛ̍ɛ̍ chɛ᷅l le̍ sāwāla̍ la̍ŋ chūa̍a̍ le̍. Vɛ᷅ ni᷅ŋ mi̍ lā wā kīndīo̍o̍ le̍ ya̍ dīyɔ̄ɔ̍?”

²⁰Mi̍ wāŋnda̍ o̍ fāŋgā ko̍ŋ tɛ̄ɛ̄ŋ a̍ mu̍lūl Chi̍i̍sū āā, “Mbɔ̄ nyi̍nā wɔ̄ɔ̍ŋndo̍ cho̍ nu̍m kɔ̄ɔ̄lī ni̍. Nɛ̄ɛ̍ni̍a̍ā cho̍ yɛ̄ kīndīo̍o̍ le̍ nu̍m dīyɔ̄ɔ̍?”

²¹Mi̍ Chi̍i̍sū di̍mī āā, “Wa̍li̍ ka̍a̍ma̍a̍ ō pīlɛ̍ ko̍ni̍ ya̍ to̍sa̍ ni̍, mi̍ kɔ̄ndɔ̄fi̍llo̍ bīī nya̍.

²²Ō ve̍ Mūu̍sē le̍ wa̍ wāna̍ tāse̍ le̍ nya̍ dīmūllo̍ le̍ chūāā nyāa̍ hīvīo̍o̍ o̍ chīɛ̄ī kɔ̄ɔ̄lī le̍. Fi̍nyāā nyāā ma̍māa̍ fɛ̍lɛ̍ŋ di̍mu̍l nya̍ le̍nde̍. Kɛ̍ ndu̍yɛ̍, le̍ sāwa̍ Mūu̍sē do̍u̍ nya̍ ko̍ŋ ndo̍, lā hīvī māhīvīāā wāŋndo̍ o̍ pāa̍le̍ nāāle̍ pɛ̍ŋgīāāle̍ŋ chōo̍.

²³Tē ō wa̍ pɛ̍ mī lā hīvi̍ wāŋndo̍ o̍ pāa̍le̍ŋ nde᷅ŋ chōo̍, yɔ̄ŋi̍ nya̍ tɛ̄ɛ̄mbu̍u̍ sa᷅wa̍ Mūu̍sē do̍u̍ nya̍ ko̍ŋ ndo̍ pɛ̍, mɛ̄ɛ̍ vɛ᷅ ni᷅ŋ tē I̍ si̍ŋgi̍ wāna̍ dīālīī nāa̍ lēchōo̍ pɛ̍, lā dɔ̄ɔ̄nu᷄ŋ tu̍mbe̍?

²⁴Lā pɛ̄ŋgi̍ wa᷅ŋnda̍ yāma̍ŋ kīlūllo̍ le̍ kīōlɔ̄ɔ̍ le̍ŋ. Lā wa̍ wāŋndo̍ yāmɛ̍i̍ kīlūllo̍ pɛ̍, lā tōsa̍ ndi̍ o̍ nɛ̄ī sa̍kpo̍.”

²⁵Mi̍ wāŋnda̍ Chūlu̍sɛ̄lɛ̄m ā pūm ā nyūnā āā, “Ō cho̍ po̍o̍ ho̍ō le̍ nda̍ chō kīndīo̍o̍ le̍ dīyɔ̄ɔ̍ le̍?”

²⁶Ma̍ dīmī āā, “Mi̍ lā che᷄ŋ ndu̍ sūɛ̍i̍ kpe̍nde̍ke̍le̍, ā ku̍u̍nā bɛ̍ɛ̍ ndu̍ le̍. Bāā mbō wa̍ sīnāa̍ nda̍ sīna̍ kpe̍e̍kpe̍i̍ ni̍ māā ndu̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍?

²⁷Kɛ̍ ndu̍yɛ̍, pōo̍ ho̍ō ndu̍ ndu̍ na̍a̍ kpo̍u̍ ŋ̄ sīnā chi̍e̍e̍ ndɔ̄ɔ̍. Ki̍li̍tī, ō Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ wo̍, ndu̍ ndu̍ āā, tē ō hīŋ pɛ̍, wānā si̍nā ni̍ŋ na̍a̍ o̍ fu̍lā ni̍ŋ nda̍ le̍.”

²⁸O̍ ko̍ŋ, mɛ̄ɛ̍ Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ, mbo̍ nyūnā chōo̍ cho̍o̍ āā, “Lē kɛ̍ndɛ̄, lā sīnā ya̍ a̍ nāa̍ ya̍ I̍ fu̍la̍ wa̍? I̍ hi̍ŋ o̍ kpāāya̍ ni̍ ya̍ pi̍la̍ ni̍ŋ te̍. Wāna̍ ve᷅m ya̍ wo̍, ndu̍ cho̍ sa̍kpō. Ndu̍yɛ̍, lā si̍nā ndu̍ le̍.

²⁹Kɛ̍, ya̍ ya̍ I̍ si̍nā ndu̍. Kāni̍ fu̍u̍le̍, nāa̍ ndu̍ chu̍a̍ ya̍ I̍ chɛ̍ŋ ni̍. Ndu̍ ve᷅m ya̍ ni̍.”

³⁰O̍ ko̍ŋ kɔ̍ɔ̍lī, ma̍ kīndī le̍ ndu̍ bīyɔ̄ɔ̍. Kɛ̍ ndu̍yɛ̍, ā nɔ̄la̍ mā bīī ndu̍ le̍, kāni̍, bōōnde̍i̍ ndi̍ i̍i̍ fu̍u̍lu̍u̍ wɔ̍ le̍.

³¹Kɛ̍ o̍ ko̍ŋ ni̍ŋ kpo̍u̍, mi̍ wānāā fāŋgā ā dūāū tīīnda᷄ŋ ndāa̍ o̍ ndu̍ ni̍ŋ. Ma̍ dīmī āā, “Tē Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō hīŋ pɛ̍, ō tōsā ni̍ŋ pa̍ wa̍lta̍ ka̍a̍ma̍ālā chēle̍ŋ mī lā hīōū lā pōo̍ ho̍ō tōsa̍ la̍ŋ?”

³²O̍ ko̍ŋ kɔ̍ɔ̍lī, mi̍ sɔ̄ɔ̍ŋ to̍o̍lōŋ wāŋnda̍ ā wa̍ dīmīo̍o̍ a̍ Chi̍i̍sū o̍kɔ̄ɔ̄ wo̍ŋ, ŋ̄ dēl ku̍ndā Fālīsi̍īya̍ o̍ lānī. Nda̍ ni̍, a̍ wānāā bɛ̄ndūāā sōlīāā lāsa̍lāa̍, ma̍ chāl nāa̍ pi᷅lɛ̍ ma̍ vīām pōli̍sīi̍yāa̍ ma̍ndā chīɛ̍i̍ Mɛ̄lɛ̄ka̍a̍ wa̍, le̍ ndu̍ bīyɔ̄ɔ̍.

³³O̍ ko̍ŋ, mi̍ Chi̍i̍sū di̍mī āā, “I̍ cho̍ wɔ̍ wā lātūlu̍ a̍ nya̍ le̍ te̍le̍ŋ ti̍ŋ. O̍ ko̍ŋ kɔ̍ɔ̍lī, mī mi̍i̍ŋgu̍ nāa̍ wāna̍ ve᷅m ya̍ wo̍ chūā.

³⁴Lā nūūvīāā ni̍ŋ ya̍, kɛ̍ ndu̍yɛ̍, lā se̍e̍lūŋ ni̍ŋ ya̍ le̍. Kāni̍ fu̍u̍le̍, nāa̍ ya̍ I̍ cho̍ wā wa̍ lā nɔ̍lā mī lā kūɛ̄ lo̍ŋ te̍.”

³⁵O̍ ko̍ŋ kɔ̍ɔ̍lī, mi̍ wānāā bɛ̄ndūāā Chu̍ūwa̍ ha̍ā, ā sa̍āŋ nyu̍ūni̍āŋndo̍ āā, “Kūɛ̍ɛ̍nɛ̍ pōo̍ ho̍ō ō chō yɛ̄ dīmīo̍o̍ le̍ kɔ̄la̍ŋ wānā nɔ̍lā mā sa̍a̍lu̍ŋ ndu̍ le̍ nɛ̍? Bāā mbō wa̍ o̍ chi̍e̍e̍ŋ Kīli̍kīi̍ya̍ nāa̍ Chu̍ūwa̍ ā chō wa̍, lo̍ŋ o̍ cho̍ kɔ̄la̍ŋ ni̍ le̍ mbō kɔ̍ pɛ̍ɛ̍kū Kīli̍kīi̍ya̍?

³⁶Ō dīmi̍ māā ŋ̄ chō ndu̍ nūūvīāā, kɛ̍ ŋ̄ se̍e̍lūŋ ni̍ŋ ndu̍ le̍. Ndu̍yɛ̍, māā ŋ̄ nɔ̍lā mī ŋ̄ kūɛ̄ nāa̍ o̍ cho̍ wā wa̍ le̍. Yɛ̄ɛ̍nɛ̍ o̍ di̍mi̍ yɛ̄ ko̍ŋ?”

³⁷Mi̍ pāa̍le̍ bɔ̄ŋa᷅ŋ lābāfɛ̄i̍yo̍ lē mɛ̄ɛ̄lū le̍ŋ lē fūūlūū. Ndu̍yɛ̍, le̍ŋ le̍ wa̍ pāa̍le̍ bɛ̍ndūlē kpe̍e̍kpe̍i̍le̍ŋ le̍ bɔ̄ŋa᷅ŋndo̍ ho̍ō ni̍. O̍ pāa̍le̍ mɛ̍ɛ̍lāālē lēŋ chōo̍, mi̍ Chi̍i̍sū si᷅m mbo̍ dīmī chōo̍ cho̍o̍ āā, “Wānā o̍ wāna̍ kōlɔ̄ɔ̍ chō ō bīyāā, lā hu᷄ŋ nāa̍ ya̍ chu̍a̍ mī lā ko᷄l.

³⁸Le̍nde̍ i̍ cho̍ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ ni̍ māā wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ ya̍ ni̍ŋ pɛ̍, wānā ko̍ŋ, pēēla̍ mɛ̄ŋma̍ ke᷅ wa̍nā yo̍o̍mū kpe̍e̍kpe̍i̍yo̍ la̍ŋ, lā wā ni̍ŋ chɔ̍nɔ᷄ŋndo̍ o̍ ndu̍ ni̍ŋ mī lā hīāū wo᷅lu̍ wo᷅lu̍.”

³⁹Chi̍i̍sū wa̍ māwāā dīōmnda̍ŋ nda᷅ŋ dīmīo̍o̍ a̍ Nyi̍na̍ Mɛ̄lɛ̄ka̍a̍ o̍kɔ̄ɔ̄ ō ndu̍ o̍o̍ nɔ̍ le̍ hūnɔ̄ɔ̄ wānāa̍ du̍a̍ū ti̍i̍nda᷄ŋ ndāa̍ o̍ ndu̍ Chi̍i̍sū ni̍ŋ nda̍ tōlɔ̄ɔ̄ kɔ̄ɔ̄lī wo̍. Bōōndi̍i̍ ke̍ŋ, Mɛ̄lɛ̄ka̍ ndu̍ o̍o̍ to̍sa̍ wɔ̍ mī Nyi̍nā ndɔ̄ɔ̍ ndu̍ o̍o̍ to᷅l wāŋnda̍ kɔ̄ɔ̄lī le̍, kāni̍ fo̍ndōle̍, ndu̍ o̍o̍ to̍sa̍ wɔ̍ mī Chi̍i̍sū lu̍ɛ̍ī o̍ nāŋɔ̄ɔ̄ ndɔ̄ɔ̍ ni᷄ŋ te̍.

⁴⁰Mi̍ wānāā fāŋgā a̍ wa̍ o̍ fāŋgāa̍ ho̍ō tɛ̄ɛ̄ŋ nda̍ ā tūɛ̄ī dīōmndā Chi̍i̍sū di̍mi̍ la᷅ŋ nda̍ŋ. Ma̍ dīmu̍la᷅ŋ āā, “Wāna̍ su̍a̍ā le̍ Mɛ̄lɛ̄ka̍ wo̍ ō na̍a̍ ŋ̄ chō lēhɔ̄l o̍ nɛ̄ī le̍ ndu̍ wo̍ ndu̍ kpe̍e̍kpe̍i̍ cho̍ pōo̍ ho̍ō ni̍.”

⁴¹Mi̍ wāŋnda̍ ā pīli̍a̍ā dīmī āā, “Ndu̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍.” Kɛ̍ ndu̍yɛ̍, mi̍ ā pūm ā dīmī āā, “Ō cho̍ Kāli̍lī le̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍, ō nɔ̄ le̍ fūlāa̍ le̍.

⁴²Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ, māā o̍ pūlāle̍ Māsāa̍ Dēēve̍le̍ŋ chōo̍ o̍ nɔ̍ le̍ fūlāa̍ ni̍, ndu̍yɛ̍, māā Bɛ̍ti̍lɛ̍hɛ̄m chi̍e̍e̍ nāa̍ Māsāa̍ Dēēve̍ wa̍ īchāli̍, wa̍ lo̍ŋ o̍ nɔ̍ ni̍ mbō vēlu᷄ŋ.”

⁴³Le̍ he̍ī, mi̍ wāŋnda̍ ā pīɔ̄ūva᷅ŋ tɛ̍ɛ̄ŋ o̍ Chi̍i̍sū cho̍o̍.

⁴⁴Wāŋnda̍ ā pūm nda̍ a̍a̍ hɛ̍na̍ŋ mī nda̍ a̍a̍ bi̍ī ndu̍. Kɛ̍ ndu̍yɛ̍, ā nɔ̄la̍ le̍.

⁴⁵O̍ ko̍ŋ kɔ̍ɔ̍lī, mi̍ pōli̍sīi̍yāā nda̍ vēm le̍ mī nda̍ a̍a̍ kɔ̍ bi̍ī Chi̍i̍sū wa̍, ā mīīŋgū. Mɛ̄ɛ̍ nda̍ mīīŋgu̍, mi̍ wānāā bɛ̄ndūāā sōlīāā lāsa̍lāa̍, a̍ ku̍ndā Fālīsi̍īya̍ ā nyūnā nda̍ āā, “Vɛ᷅ lā hi᷄ŋ a̍ ndu̍ le̍?”

⁴⁶Mi̍ pōli̍si̍i̍ya̍ mūlī āā, “Dīōmnda̍ fu̍lā po̍ ko̍ŋ o̍ sōndō la̍ŋ, kāni̍ bɛ̍ɛ̍ ŋ̄ tūi̍i̍ yɔ̍ la̍ŋ wānā o̍ wānā che᷅le̍ŋ o̍ sōndō le̍.”

⁴⁷Mi̍ ku̍ndā Fālīsi̍īya̍ lō o̍ ko̍ŋ ma̍ nyūnā pōli̍si̍i̍ya̍ āā, “Nya̍ bɛ̍ɛ̍, pōo̍ ho̍ō ō nɔ̄la̍ nya̍ bōlle̍ hi᷄ŋ?

⁴⁸Lā chē ni᷅ŋ wānāā bɛ̄ndūa̍a̍ ni̍ a̍ na̍a̍ ku̍ndā Fālīsi̍īya̍ mī ō pīlɛ̍ bɛ̍ɛ̍ o̍ dɔ̍ū tīīnda᷄ŋndo̍ o̍ ndu̍ ni̍ŋ?

⁴⁹Wānāā kāŋ nda̍ nda̍ ā si̍nā nyɛ᷅ sāwāla̍ Mɛ̄lɛ̄ka̍ ke̍ Mūu̍sē le̍ na̍a̍ la̍ŋ lā dīmi̍ wo̍ le̍. Le̍ he̍ī, Mɛ̄lɛ̄ka̍ chō nda̍ hūnɔ̄ɔ̄ nyɛ̄ pālāa̍ tūsī chōo̍.”

⁵⁰Nīkōdi̍mɔ̄ɔ̄, ō ndu̍ o̍o̍ ku̍ɛ̄ nāa̍ Chi̍i̍sū chu̍a̍ te̍le̍ŋ pi᷅lɛ̍ wo̍, nda̍ wa̍ Fālīsi̍īya̍ ni̍. Mbo̍ lō o̍ ko̍ŋ mbo̍ dīmūl nda̍ āā,

⁵¹“Sāwā na̍a̍ dīmi̍ māā wānā ki̍lūl wa᷅ŋndo̍ yāmɛ̍i̍ ndu̍ yōndō kɔ̄ɔ̄lī le̍, mɛ̄ɛ̍ mī lā tōsa̍ mbō kɔ̄ɔ̄sa̍ mī lā sīna̍ nyɛ̄ o̍ to̍sa̍ wo̍.”

⁵²Mɛ̄ɛ̍ Nīkōdi̍mɔ̄ɔ̄ so̍ō le̍nde̍, ma̍ nyūnā ndu̍ āā, “Nya̍ fa̍u̍ fu̍la̍ Kāli̍lī ni̍?” Ma̍ dīmī āā, “Mɛ̍ɛ̍ndi̍a̍ŋ bɛ̍ɛ̍ o̍ Yāu̍ Mɛ̄lɛ̄ka̍a̍ ni᷄ŋ fa̍ū, a̍ se̍e̍lūŋ na̍a̍ i̍ cho̍ ī pōōnyīāā māā wānāa̍ su̍a̍ā le̍ Mɛ̄lɛ̄ka̍ wa̍, ō pīlɛ̍ bɛ̍ɛ̍ nɔ̍ mbō fūla̍ o̍ lɛ̄ŋndē Kāli̍līle̍ŋ ni᷄ŋ te̍.” [

⁵³O̍ ko̍ŋ kɔ̍ɔ̍lī, mi̍ wāŋnda̍ kpo̍u̍ a̍ ku̍a̍nu᷄ŋ o̍ chīɛ̄īlā ndāla̍ŋ.