Read Southern Kisi Chɔ᷄ŋ 8 Bible Online

Chɔ᷄ŋ 8 - Southern Kisi bible

Chɔ᷄ŋ 8

¹O̍ ko̍ŋ kɔ̍ɔ̍lī, mi̍ Chi̍i̍sū ndu̍ cha̍ŋ mbo̍ kūānu᷄ŋ o̍ Pēmbīī Yɔ̄mīī Ɔ̄li̍fīi̍ve̍ chōo̍.

²Mɛ̄ɛ̍ pāa̍le̍ŋ lē sɛ̄ īdīi̍yo̍, mbo̍ mīīŋgū o̍ chīɛ̍i̍ Mɛ̄lɛ̄ka̍a̍ ni᷄ŋ. Mɛ̄ɛ̍ o̍ mi̍i̍ŋgu̍, mi̍ wāŋnda̍ kpo̍u̍ a̍ chu̍ūŋgi̍āŋ fa̍ŋgā bɛ̍ndōo̍ ma̍ bālū ndu̍ si̍lɔ̍. Mbo̍ chāl. Mbo̍ kāndū nda̍ pɛ̄ɛ̄kōo̍.

³O̍ ko̍ŋ, mi̍ wānāa̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ nda̍, a̍ ku̍ndā Fālīsi̍īya̍ ā hūŋ a̍ chūā pīlɛ̍. Nda̍ a̍a̍ bi̍ī chūa̍a̍ ho̍ō o̍ sūūndāa̍. Hūnɔ̄ɔ̍ a̍ ndu̍, ma̍ sīmī ndu̍ wāŋnda̍ kpo̍u̍ la̍chī.

⁴Ma̍ dīmūl Chi̍i̍su̍ āā, “Ŋ̄ bīī chūa̍a̍ ho̍ō tɔ̍ɔ̍sɛ̍ɛ̍ o̍ sūūndāa̍.

⁵Ndu̍yɛ̍, sāwāla̍ Mɛ̄lɛ̄ka̍ ke̍ Mūu̍sē le̍ na̍a̍ la̍ŋ, lā dīmi̍ māā ŋ̄ nɔ̄ mī ŋ̄ lo̍ wānā wa̍ā nu̍a̍ā vīī vīīyo̍ a̍ pōūta̍ŋ mbō vī. Le̍la̍ŋ, ō fūūlu̍u̍ o̍ nūmndo̍.”

⁶Ndu̍yɛ̍, yāŋɔ̄ɔ̄le̍ŋ wāŋnda̍ ha̍ā nda̍ a̍a̍ ye̍ŋ Chi̍i̍su̍ ni̍, le̍ nɛ̄i̍ nda̍ hōl ndu̍ sūɛ̍i̍ yo̍. Kɛ̍, mi̍ Chi̍i̍sū tu̍ndu᷄ŋ mbo̍ sāā pōōnyīa̍a̍ lɛ̄ŋ a̍ īsū.

⁷Mi̍ wāŋnda̍ ha̍ā nda̍ nda̍ wā hīōūwɔ̄ɔ̍ lāchī a̍ ndu̍ nyūūnīāā. O̍ ko̍ŋ kɔ̍ɔ̍lī, mbo̍ cha᷄ŋ mbo̍ sīm. Mbo̍ dīmūl nda̍ āā, “Bālā tīɔ̍ɔ̍ŋ. Kɛ̍ ndu̍yɛ̍, wāna̍ cho̍ na̍nu᷄ŋ ō tōsa̍ wɔ̍ yɔ᷅ŋ wɔ̄ɔ̍ŋ lēpīlɛ̍ bɛ̍ɛ̍ le̍ wo̍, ndu̍ wa᷅ wa᷅na̍ tāso̍o̍ le̍ pōūwo̍ chūa̍a̍ mbō vɛ̄ ndu̍ ni̍.”

⁸Mi̍ Chi̍i̍sū tu̍ndu᷄ŋ vɛ̍lɛ̄ mbo̍ sāā pōōnyīa̍a̍ lɛ̄ŋ.

⁹Mɛ̄ɛ̍ wāŋnda̍ ha̍ā tūēī nyɛ̄ Chi̍i̍sū di̍mi̍ wo̍, ma̍ kāndū kɔ᷄ŋnda̍ŋ ā pīlɛ̍ŋ pi̍lɛ̍ŋnda̍. Wāŋ bānāa̍ fɛ̍lɛ̍ŋ a̍ ku̍ɛ̍nu᷄ŋ. Ma̍ kūānu᷄ŋ ma̍ mɛ̄ī Chi̍i̍sū ndu̍ pīlɛ̍ kpe̍. Chūa̍a̍ ndu̍ wa̍ īsīsi̍.

¹⁰Mi̍ Chi̍i̍sū cha̍ŋ i̍si̍si̍ mbo̍ nyūnā ndu̍ āā, “Chūa̍a̍, wāŋnda̍ ha̍ā yɛ̍? Nda̍ ki̍nɛ̍i̍ wānā pi᷅lɛ̍ bɛ̍ɛ̍ cho̍ lɛ̍ mbō tūsi̍ nu̍m nyɛ̄ pālāa̍ chōo̍ le̍ yɔ̄ŋ nūm wɔ̍ɔ̍ŋndo̍ le̍?”

¹¹Mi̍ chūa̍a̍ mūlī āā, “Wānā bɛ̍ɛ̍, fāllo̍.” Mi̍ Chi̍i̍sū di̍mūl ndu̍ āā, “Mɛ̄ɛ̍ kɔ̍nu̍ŋ. Ya̍ bɛ̍ɛ̍ I̍ cho̍ nu̍m nyɛ̄ pālāā tūsī chōo̍ le̍ yɔ̄ŋ nūm wɔ̍ɔ̍ŋndo̍ le̍. Kɛ̍ ndu̍yɛ̍, kɔ̍ hi̍o̍ū lɛ̄ lāchī a̍ nīīlū yɔ̄ŋ wɔ̄ɔ̍ŋ ŋ̄ wa̍ lēni᷄ŋ ndo̍ le̍.”]

¹²Mi̍ Chi̍i̍sū di̍mūl vɛ̄lɛ̄ wāŋnda̍ āā, “Ya̍ cho̍ nyɛ̄ wa̍wo̍ŋndo̍ le̍ ŋ̄wāŋnda̍ chīe̍e̍ ni̍. Wānā o̍ wāna̍ si̍mnu᷄ŋ bu̍ɛ̍ī nī pɛ̍, ō sɔ̄la̍ nyɛ̄ wa̍wo̍ŋ ke᷅ wa᷅ŋnda̍ yōōmū kpe̍e̍kpe̍i̍yo̍ wo̍. Ndu̍yɛ̍, wānā ko̍ŋ ō ke̍lā lɛ̍ o̍ mānyūm ni᷄ŋ te̍.”

¹³Mi̍ ku̍ndā Fālīsi̍īya̍ dīmūl ndu̍ āā, “Ŋ̄ nɔ̍lā mī ŋ̄ chu̍a̍ nyɛ̄ ŋ̄ chō ho̍ō dīmīo̍o̍ a̍ nūm pi̍la̍ o̍kɔ̄ɔ̄ wo̍, māā ō chō tōnya̍ le̍. Le̍ yɛ̄ɛ̍nɛ̍, ko̍na̍ nūm pi̍la̍a̍ cho̍ ho̍ō ni̍, se̍ī chēle̍ŋ cho̍ o̍ to̍sā mī ŋ̄ lāāla̍ŋ a̍ nyɛ̄ ŋ̄ dīmi̍ wo̍ le̍.”

¹⁴Mi̍ Chi̍i̍sū di̍mī āā, “Ā yɔ᷄ŋ bɛ̍ɛ̍ mī I̍ chɔ̍m a̍ ya̍ pi̍la̍ o̍kɔ̄ɔ̄, tōnya̍a̍ nyɛ̄ ya̍ I̍ di̍mī wo̍ ō wā ni̍. Kāni̍ fu̍u̍le̍, ya̍ pi̍la̍ I̍ si̍nā nāa̍ ya̍ I̍ chɛ̍ŋ nda̍. Ndu̍yɛ̍, I̍ si̍nā na̍a̍ ya̍ I̍ cho̍ kɔ̄la̍ŋ nda̍. Nya̍ si̍nā na̍a̍ ya̍ I̍ chɛ̍ŋ nda̍ le̍, ndu̍yɛ̍, lā si̍nā na̍a̍ ya̍ I̍ cho̍ kɔ̄la̍ŋ nda̍ le̍.

¹⁵Nya̍ nya̍ o̍ nɛ̄i̍ īwāna̍ chi̍e̍e̍ya̍a̍ ni᷄ŋ ko̍ni̍, nya̍ kīlūl wa᷅ŋnda̍ yāma̍ŋ ni̍. Kɛ̍, ya̍ I̍ cho̍ wa̍nā i̍ya᷅ma̍ kīlūl te̍.

¹⁶Kɛ̍, ā yɔ᷄ŋ bɛ̍ɛ̍ mī ya̍ i̍i̍ ki̍lu̍l wānā i̍ya᷅ma̍, tōnya̍a̍ ko̍ni̍ yāmɛ̍ī ya̍ I̍ ki̍a̍lū ve̍ ī wā ni̍. Kāni̍ fo̍ndōle̍, ō cho̍ ya̍ pīlɛ̍ le̍ ki̍a̍lū ndi̍ le̍. Fi̍nyā nūu̍ o̍ ve᷅m ya̍ wo̍ na̍a̍ ndu̍ dīōm pīlɛ̍ na̍a̍ ŋ̄ wā o̍ ndi̍ kīōlɔ̄ɔ̍ ni᷄ŋ ni̍.

¹⁷Dīōmnda̍ŋ lā chō lā pōōnyīāā o̍ yāu̍la̍ nyāla̍ lāsāwāla̍ŋ ni᷄ŋ māā tē wāŋnda̍ ā ŋīɔ̍ɔ̍ŋ ā chɔ᷄m a̍ īsɔ̄ɔ̍ o̍ īsɔ̄ɔ̍ o̍kɔ̄ɔ̄ pɛ̍, ndu̍yɛ̍, mī nyɛ̄ nda̍ dīmi̍ wo̍ ō wa̍ nyɛ̄ pīlɛ̍ kpe̍ pɛ̍, mɛ̄ɛ̍ tōnya̍a̍ sūɛ̍i̍ ke̍ŋ ī wā ni̍.

¹⁸I̍ chɔ̍m a̍ ya̍ pi̍la̍ o̍kɔ̄ɔ̄. O̍ ko̍ŋ kɔ̍ɔ̍lī, mi̍ Fi̍nyā nūu̍ o̍ ve᷅m ya̍ wo̍, ndu̍ bɛ̍ɛ̍ mbo̍ chɔ̄m nyɛ̄ pīlɔ̍ɔ̍ kpe̍ a̍ ya̍ o̍kɔ̄ɔ̄.”

¹⁹Ma̍ nyūnā ndu̍ āā, “Kūɛ̍ɛ̍nɛ̍ Fi̍nyā nūm o̍ cho̍ yɛ̄?” Mi̍ Chi̍i̍sū mu̍lī āā, “Lā si̍nā wa᷅na̍ ya̍ I̍ cho̍ kpe̍e̍kpe̍i̍ yo̍ le̍. Ndu̍yɛ̍, lā si̍nā Fi̍nyā nūu̍ le̍. Tē nya̍ a̍a̍ si̍nā kpe̍e̍kpe̍i̍ wa᷅na̍ ya̍ I̍ cho̍ wo̍ pɛ̍, Fi̍nyā nūu̍ bɛ̍ɛ̍ lā wa̍ sīnā wāna̍ o̍ cho̍ wo̍.”

²⁰Bōōndi̍i̍ Chi̍i̍sū wa̍ wāŋnda̍ pɛ̄ɛ̄kōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ nde̍ o̍ so̍ō dīōmnda̍ŋ nda᷅ŋ ni̍. Ō wa̍ o̍ fo̍ndāŋ nda̍ kɛ̄si̍ kɔ̍fūlā nda̍ dūāū ka̍ni̍ŋ wāŋnda̍ kē Mɛ̍lɛ̄ka̍ wo̍ŋ ndo̍. Ndu̍yɛ̍, wānā o̍ wānā bi̍i̍ ndu̍ le̍. Kāni̍ fo̍ndōle̍, bōōnde̍i̍ ndi̍ i̍i̍ fu̍u̍lu̍u̍ wɔ̍ le̍.

²¹Mi̍ Chi̍i̍sū di̍mūl nda̍ vɛ̄lɛ̄ āā, “I̍ cho̍ lākɔ̄nɔ᷄ŋ. O̍ ko̍ŋ, lā chō ya̍ nūūvīāā, ndu̍yɛ̍ o̍ ko̍ŋ kɔ̍ɔ̍lī, lā chō lō o̍ yɔ̄ŋndā nyāla̍ wɔ̍ɔ̍ŋnda̍ŋ ni᷄ŋ mī lā vī. Lā nɔ̍lā mī lā kūɛ̄ nāa̍ ya̍ I̍ cho̍ kɔ̄la̍ŋ nda̍ le̍.”

²²O̍ ko̍ŋ, mi̍ wānāā bɛ̄ndūāā Chu̍ūwa̍ dīmī āā, “Ō dīmi̍ māā ŋ̄ nɔ̍lā mī ŋ̄ kūɛ̄ nāa̍ o̍ cho̍ kɔ̄la̍ŋ nda̍ le̍. Bāā ō hɛ̄na̍ŋ ma̍hɛ̍na᷄ŋ mbō dīīnu᷄ŋ?”

²³Mi̍ Chi̍i̍sū mu̍lūl nda̍ āā, “Chi̍e̍ēŋ na̍nu᷄ŋ nya̍ nya̍ fūla̍ ni̍. Kɛ̍, ya̍ yā, Ɛ̄chɛ̍nɛ̄ ya̍ I̍ fu̍la̍ ni̍. Wānāā wāā chi̍e̍ēŋ na̍nu᷄ŋ nya̍ nya̍ chō ni̍. Kɛ̍, ya̍ ya̍ wānā wa̍ā Ɛ̄chɛ̍nɛ̄ I̍ cho̍ ni̍.

²⁴Le̍la̍ŋ ya̍ I̍ di̍mu̍l nya̍ ni̍ māā, lā chō lō o̍ yɔ̄ŋndā nyāla̍ wɔ̍ɔ̍ŋnda̍ŋ ni᷄ŋ mī lā vī. Tē lā lāāla̍ŋ māā ya̍ le̍ cho̍ wāna̍ cho̍ kāni̍ ma̍si̍ndɛ̄ wo̍ le̍, mɛ̄ɛ̍ lā chō lō o̍ yɔ̄ŋndā nyāla̍ wɔ̍ɔ̍ŋnda̍ŋ ni᷄ŋ mī lā vī pɛ̍.”

²⁵Ma̍ nyūnā ndu̍ āā, “Wāna̍ māā vɛ̄ɛ̍nɛ̍ ŋ̄ chō yɛ̄ nɛ̍?” Mi̍ Chi̍i̍sū mu̍lī āā, “Chɔ̍ŋ o̍ kāndɔ᷄ŋndo̍ pe̍kēkē wāna̍ ya̍ I̍ di̍mu̍l nya̍ māā ndu̍ ya̍ I̍ cho̍ ni̍ wo̍, wānā ko̍ŋ, ndu̍ kpe̍e̍kpe̍i̍ ya̍ I̍ cho̍ ni̍.

²⁶Sɔ̄ɔ̍ŋ ka̍ ka̍ ŋ̍ cho̍, ŋ̄ ya̍ I̍ nɔ̍lā mī di̍mi̍ mu̍ŋ a̍ nya̍ o̍kɔ̄ɔ̄, ndu̍yɛ̍, mī I̍ kɔ̍ɔ̍sa̍ a̍ nya̍ a̍ mu̍ŋ ndo̍ŋ. Kɛ̍, Fi̍nyā nūu̍ o̍ ve᷅m ya̍ wo̍ ō chō wānā sa̍na̍a̍. Ndu̍yɛ̍, nyɛ̄ o̍ chɔ᷅m ya̍ wo̍, ndu̍ ko̍ni̍ ya̍ I̍ di̍mūl wa᷅ŋnda̍ o̍ chi̍e̍ēŋndo̍ ni᷄ŋ ni̍.”

²⁷Kɛ̍, ā sīna̍ pɛ̍ŋgu̍ māā a̍ Mɛ̄lɛ̄ka̍ Fi̍nyāa̍ o̍kɔ̄ɔ̄ le̍ o̍ wa̍ sūɛ̍i̍ nāa̍ nda̍ chūā le̍.

²⁸Le̍ he̍ī, mi̍ Chi̍i̍sū di̍mūl nda̍ āā, “Tē lā hēēlu̍ wāna̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ o̍ yɔ̄m sīŋgāfīlāa̍ chōo̍ pɛ̍, lā chō sīnā māā ya̍ cho̍ wāna̍ cho̍ kāni̍ ma̍si̍ndɛ̄ wo̍ ni̍. O̍ ko̍ŋ, lā chō sīnā māā I̍ to̍sā nyɛ᷅ o̍ nyɛ̄ o̍ kpāāya̍ ni̍ ya̍ pi̍la̍ ni̍ŋ te̍. Kɛ̍ o̍ ko̍ŋ kɔ̍ɔ̍lī, lā chō sīnā māā nyɛ̄ Mɛ̄lɛ̄ka̍ Fi̍nyāa̍ ō pɛ̄ɛ̄ku̍ ya̍ wo̍, māā ndu̍ ko̍ni̍ ya̍ I̍ di̍mi̍ ni̍.

²⁹Ndu̍yɛ̍, Mɛ̄lɛ̄ka̍ Fi̍nyāa̍ o̍ ve᷅m ya̍ wo̍, ō chō lātūlu̍ a̍ ya̍ lɔ̍ɔ̍ lɔ̍ɔ̍. Ō me᷅l la̍ mī wa̍ ya̍ pīlɛ̍ kpe̍ le̍. Kāni̍ fo̍ndōle̍, nyɛ̄ o̍ hɛ̍na̍ŋ ndo̍, ndu̍ ya̍ I̍ to̍sā lɔ̍ɔ̍ lɔ̍ɔ̍ ni̍.”

³⁰Ndu̍yɛ̍, mi̍ wāŋnda̍ ta̍u̍ a̍ tu̍e̍ī dīōmndā Chi̍i̍sū di̍mi̍ la᷅ŋ nda̍ŋ nda̍, ā dūāū tīīnda᷄ŋ ndāa̍ o̍ ndu̍ ni̍ŋ.

³¹Mi̍ Chi̍i̍sū di̍mūl Chu̍ūwa̍ a̍ dɔ̍ū tīīnda᷄ŋndo̍ o̍ ndu̍ ni̍ŋ nda̍ āā, “Tē lā hīōū lāchī a̍ nyɛ̄ ya̍ I̍ pɛ̍ɛ̍ku̍ nya̍ wo̍ tōsāa̍ pɛ̍, mɛ̄ɛ̍ bu̍ɛ̍i̍yāā nīa̍a̍ nya̍ chō lēkɛ̍ndɛ̍ī ni̍.

³²Lā chō tōnya̍ cho̍ a̍ Mɛ̄lɛ̄ka̍ o̍kɔ̄ɔ̄ wo̍ sīnā, ndu̍yɛ̍, mī tōnya̍ ko̍ŋ ō bāŋa̍ nya̍.”

³³Ma̍ mūlī āā, “O̍ pūlāle̍ E̍bīlāha᷅mnde̍ŋ chōo̍ na̍a̍ ŋ̄ fūla̍ ni̍. Ndu̍yɛ̍, lēpīlɛ̍ bɛ̍ɛ̍ ŋ̄ ve̍ wɔ̍ o̍ lēchɛ̄ ni᷄ŋ wa̍nā o̍ bā bɛ̄ŋgu̍ le̍. Dīmī yɛ̄ɛ̍nɛ̍ ŋ̄ dīmi̍ yɛ̄ ni᷅ŋ māā ŋ̄ chō bāŋa᷄ŋndo̍ sɔ̄lā?”

³⁴Mi̍ Chi̍i̍sū di̍mūl nda̍ āā, “Mī di̍mu̍l nya̍ tōnya̍a̍ wa̍la̍ŋ, wānā o̍ wāna̍ to̍sa̍ yɔ̄ŋ wɔ̄ɔ̍ŋndo̍ pɛ̍, mɛ̄ɛ̍ chīɔ̍ɔ̍ o̍ cho̍ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍ ni̍.

³⁵Chīɔ̍ɔ̍ ndu̍ cho̍ wa̍nā wa̍ā o̍ yu̍ŋgo̍o̍ chōo̍ le̍ lɔ̍ɔ̍ lɔ̍ɔ̍ le̍. Kɛ̍, po̍ ve̍lu᷄ŋ yɛ̍ ho̍ō o̍ yu̍ŋgu̍ wāŋndo̍ chōo̍ wo̍, ndu̍ ndu̍ cho̍ o̍ yu̍ŋgu̍ fi̍nyā ndɔ̄ɔ̍ chōo̍ le̍ lɔ̍ɔ̍ lɔ̍ɔ̍.

³⁶Le̍la̍ŋ, tē Po̍ Mɛ̄lɛ̄ka̍a̍ bāŋa̍ nu̍m pɛ̍, mɛ̄ɛ̍ a̍ sɔ̍la̍ bāŋa᷄ŋndo̍ lēkɛ̍ndɛ̍ī.

³⁷I̍ si̍nā māā o̍ pūlāle̍ E̍bīlāha᷅mnde̍ŋ chōo̍ nya̍ fūla̍ ni̍. Kɛ̍ ndu̍yɛ̍, mi̍ lā wā kīndīo̍o̍ le̍ ya̍ dīyɔ̄ɔ̍, kāni̍ fo̍ndōle̍, lā chu̍ē nyɛ᷅ ya̍ I̍ pɛ̍ɛ̍kū nya̍ wo̍ le̍.

³⁸Ya̍ ya̍, nyɛ̄ ya̍ I̍ che᷅ a̍ Fi̍nyā nūu̍ o̍kɔ̄ɔ̄ wo̍, a̍ ndu̍ o̍kɔ̄ɔ̄ ya̍ I̍ di̍mī ni̍. Nya̍ bɛ̍ɛ̍ nyɛ̄ fi̍nyā nyā di̍mūl nya̍ wo̍, ndu̍ nya̍ tōsā ni̍.”

³⁹Ma̍ mūlī āā, “E̍bīlāha᷅m, ndu̍ cho̍ fi̍nyā nāā ma̍māa̍ ni̍.” Mi̍ Chi̍i̍sū di̍mī āā, “Tē nya̍ a̍a̍ wa̍ chūāūwāā māmāa̍ E̍bīlāha᷅mnda̍ lēkɛ̍ndɛ̍ī pɛ̍, lā wa̍ nyɛ̄ E̍bīlāha᷅m to̍sa̍ wo̍ tōsā.

⁴⁰E̍bīlāha᷅m ndu̍ to̍sa̍ mɛ̄ɛ̍ nya̍ chō nu̍a̍ā tōsāa̍ yɛ̍ le̍. Kāni̍, sɔ̄ɔ̍ŋ tōnya᷅ŋ Fi̍nyā nūu̍ chɔ᷄m ya̍ wo̍ŋ, mu̍ŋ ko̍ni̍ ya̍ I̍ cho̍ nya̍ dīmūllo̍ ni̍. Kɛ̍ ndu̍yɛ̍, o̍ ko̍ŋ ni̍ŋ kpo̍u̍, mi̍ lā wā kīndīo̍o̍ le̍ ya̍ dīyɔ̄ɔ̍. E̍bīlāha᷅m ndu̍ to̍sa̍ le̍nde̍ le̍.

⁴¹Nyɛ̄ fi̍nyā nyā o̍ to̍sā wo̍, ndu̍ ko̍ni̍ nya̍ chō tōsāa̍ ni̍.” Ma̍ dīmī āā, “Na̍a̍ na̍a̍ ŋ̄ cho̍ chu̍a̍u̍wāā sa̍ma̍ le̍. Mɛ̄lɛ̄ka̍ pi̍la̍, ndu̍ ko̍ni̍ cho̍ fi̍nyā nāa̍ ni̍.”

⁴²Mi̍ Chi̍i̍sū di̍mūl nda̍ āā, “Tē Mɛ̄lɛ̄ka̍ ndu̍ o̍o̍ wa̍ fi̍nyā nyā pɛ̍, lā wa̍ hɛ̄na᷄ŋ a̍ sūɛ̍i̍ nīi̍. Kāni̍, o̍ Mɛ̄lɛ̄ka̍ lo̍ ya̍ I̍ chɛ̍ŋ ni̍. Lo̍ŋ ya̍ chɛ̍ŋ ni̍ mi̍ hu᷅ŋ na̍nu᷄ŋ. Ō cho̍ o̍ kpāāya̍ ni̍ ya̍ pi̍la̍ ni̍ŋ te̍ ya̍ I̍ hi᷅ŋ na̍nu᷄ŋ te̍. Ndu̍ ve᷅m ya̍ ni̍.

⁴³Lā sīnā pa̍ le̍ sa̍bū nya̍ si̍nā nyɛ᷅ ya̍ I̍ di̍mūl nya̍ wo̍ pɛ̄ŋgu̍ le̍ wo̍? Ō cho̍ fo̍ndōle̍, lā tu̍i̍ī nyɛ᷅ ya̍ I̍ di̍mī wo̍ le̍.

⁴⁴Māsa̍ nyi̍nāā wɔ̄ɔ̍ŋnda̍, ndu̍ cho̍ fi̍nyā nyā ni̍. Ndu̍yɛ̍, sɔ̄ɔ̍ŋ hi̍nī fi̍nyā nya̍ kɔ̄llo̍ wo̍ŋ, mu̍ŋ nya̍ hɛ̍na̍ŋ to̍sāa̍ ni̍. O̍ kāndɔ᷄ŋndo̍ bɛ̍ɛ̍ ō wa̍ wānā dīūwāā ŋ̄wāŋndā chīe̍e̍. Ō cho̍ wa᷅na̍ si̍m o̍ tōnya̍ chōo̍ le̍, kāni̍ fo̍ndōle̍, tōnya̍ o̍ tōnya̍ cho̍ o̍ ndu̍ ni̍ŋ te̍. Ō dīmi̍ bɛ̍ɛ̍ cho̍ōla̍ŋ ō bāāla̍ŋ te̍. Kāni̍ fu̍u̍le̍, wāna̍ lāchōōwāa̍ o̍ cho̍ ni̍. Ndu̍yɛ̍, ndu̍ vi̍ām wa᷅ŋnda̍ chōōla̍ŋ dīmīo̍o̍ ni̍.

⁴⁵Kɛ̍, ya̍ ya̍, tōnya̍a̍ ya̍ I̍ di̍mūl nya̍ ni̍. Le̍ sa̍bōo̍ ho̍ō nya̍ lāāla̍ŋ a̍ ya̍ le̍ ni̍.

⁴⁶Nya̍ ki̍nɛ̍i̍, wānā pi᷅lɛ̍ bɛ̍ɛ̍ cho̍ o̍ chɔ᷅m māā I̍ to̍sa̍ ni᷅ŋ yɔ̄ŋ wɔ̄ɔ̍ŋndo̍ lēpīlɛ̍ bɛ̍ɛ̍ wo̍? Wānā bɛ̍ɛ̍. Kɛ̍, o̍ ko̍ŋ kɔ̍ɔ̍lī, tē ō wa̍ tōnya̍a̍ pɛ̍ ya̍ I̍ cho̍ nya̍ dīmūllo̍ ni̍, mɛ̄ɛ̍ vɛ᷅ ni᷅ŋ lā la̍a̍lāŋ a̍ ya̍ le̍?

⁴⁷Wānā o̍ wāna̍ cho̍ chu̍a̍ Mɛ̄lɛ̄ka̍ pɛ̍, yāŋɔ̄ɔ̍ o̍ ya᷅ŋ ni᷅la̍ŋ o̍ dīōmnda̍ Mɛ̄lɛ̄ka̍la̍ŋ ni̍. Ndu̍yɛ̍, sa̍bū nya̍ ye᷅ŋ dīōmnda̍ Mɛ̄lɛ̄ka̍la̍ŋ lānī lē wo̍ cho̍ ni̍ māā lā cho̍ chu̍a̍u̍wāā ndɔ̄ le̍.”

⁴⁸Mi̍ Chu̍ūwa̍ mūlūl Chi̍i̍sū āā, “Nyɛ̄ na̍a̍ ŋ̄ dīmi̍ māā Sāme̍e̍līāānɔ̄ɔ̍ ŋ̄ chō ni̍ wo̍, ndu̍yɛ̍, māā nyi̍nā wɔ̄ɔ̍ŋndo̍ ndu̍ cho̍ nu̍m kɔ̄ɔ̄lī ni̍ wo̍, tōnya̍ kpe̍e̍kpe̍i̍ na̍a̍ ŋ̄ dīmi̍ ni̍.”

⁴⁹Mi̍ Chi̍i̍sū mu̍lī āā, “Nyi̍nā wɔ̄ɔ̍ŋ o̍ nyi̍nā wɔ̄ɔ̍ŋ ō cho̍ ya̍ kɔ̄ɔ̄lī le̍. Fi̍nyā nūu̍, ndu̍ ya̍ ya̍ I̍ cho̍ bɛ̄ɛ̄le̍ŋ kīo̍o̍ ni̍. Kɛ̍, mi̍ nya̍ nya̍ wā ya̍ lābɛ̄ɛ̄ tɛ̍ɛ̍mbūū.

⁵⁰Ndu̍yɛ̍, I̍ cho̍ sa̍ŋgālā nūūvīāā ŋ̄wāŋndā chīe̍e̍ o̍ bā le̍. Wānā cho̍, o̍ cho̍ kīndīo̍o̍ māā I̍ sɔ̍la̍ sa̍ŋgālāa̍ wo̍. Ndu̍ su̍a̍ā le̍ ya̍ ni̍.

⁵¹Mī di̍mu̍l nya̍ tōnya̍a̍ wa̍la̍ŋ, wānā o̍ wāna̍ chu̍a̍ nyɛ̄ ya̍ I̍ di̍mi̍ wo̍ pɛ̍, ō vi᷅ lɛ̍ le̍.”

⁵²O̍ ko̍ŋ, mi̍ Chu̍ūwa̍ dīmī āā, “Ŋ̄ sīna̍ ni᷅ŋ lēkɛ̍ndɛ̍ī māā nyi̍nā wɔ̄ɔ̍ŋndo̍ cho̍ nu̍m kɔ̄ɔ̄lī ni̍. E̍bīlāha᷅m vi᷅. Wānāa̍ su̍a̍ā le̍ Mɛ̄lɛ̄ka̍ wa̍ bɛ̍ɛ̍ ā vī. Ndu̍ ŋ̄ dīmī ni̍ māā wānā o̍ wāna̍ chu̍a̍ nyɛ̄ ŋ̄ dīmi̍ wo̍ pɛ̍, ō vi᷅ le̍?

⁵³Nāa̍ fi̍nyā nāā ma̍māa̍ E̍bīlāha᷅m ndu̍ vi᷅ wɔ̄, bāā dīmīo̍o̍ ŋ̄ chō ni̍ māā nu᷄m hi̍o̍ū a̍ E̍bīlāha᷅m? Wānāa̍ su̍a̍ā le̍ Mɛ̄lɛ̄ka̍ wa̍ nda̍ vī. A̍ la̍a̍la̍ŋ, wāna̍ māāvɛ̄ɛ̍nɛ̍ ŋ̄ chō yɛ̄?”

⁵⁴Mi̍ Chi̍i̍sū mu̍lī nda̍ dīōm āā, “Tē ndu̍ o̍o̍ wa̍ pɛ̍ ya̍ pi̍la̍ cho̍ sāŋgāla᷄ŋndo̍ ni̍, sāŋgālā kōŋ ndu̍ o̍o̍ ve᷅ nyɛ᷅ o̍ nyɛ̄ le̍. Wāna̍ sa̍ŋgālā ya̍ wo̍, ndu̍ cho̍ Fi̍nyā nūu̍ ni̍, Mɛ̄lɛ̄ka̍ nya̍ dīmi̍ māā ndu̍ nya̍ chō pīɛ̄īyo̍ ni̍ wo̍, ndu̍ kpe̍e̍kpe̍i̍.

⁵⁵Nya̍ nya̍ si̍nā ndu̍ le̍. Kɛ̍, ya̍ ya̍ I̍ si̍nā ndu̍. Tē I̍ di̍mi̍ pɛ̍ māā I̍ si̍nā ndu̍ le̍, mɛ̄ɛ̍ I̍ si̍mnu᷄ŋ wa᷅na̍ lāchōōwā mɛ̄ɛ̍ nya̍ chō yɛ̍. Kɛ̍ ndu̍yɛ̍, I̍ si̍nā ndu̍. Ndu̍yɛ̍, I̍ chu̍ā nyɛ᷅ o̍ di̍mī wo̍.

⁵⁶Mi̍ E̍bīlāha᷅m fi̍nyā nyā ma̍mā o̍ na᷅ŋ kɔ̄l, kāni̍ fo̍ndōle̍, ndu̍ o̍o̍ nɔ̍ le̍ te̍le̍ŋ nī hu̍nāa̍ chɔ̄ɔ̍. Ndu̍yɛ̍, mbo̍ chā te̍le̍ŋ nī hu̍nāa̍ mbo̍ nāŋ kɔ̄l.”

⁵⁷Mi̍ Chu̍ūwa̍ dīmūl ndu̍ āā, “A̍ cho̍ wɔ̍ bɛ̍ɛ̍ wɔ̍sīlā be̍le̍-ŋu̍ɛ̍ɛ̍nu̍ le̍, vɛ̄ɛ̍nɛ̍ ŋ̄ lōōku̍ yɛ̄ E̍bīlāha᷅m chɔ̄?”

⁵⁸Mi̍ Chi̍i̍sū mu̍lī āā, “Mī di̍mu̍l nya̍ tōnya̍a̍ wa̍la̍ŋ, lɔ̍ɔ̍pa̍ E̍bīlāha᷅m vi̍a̍lūŋ, I̍ wa̍ ni᷅ŋ.”

⁵⁹Mɛ̄ɛ̍ Chi̍i̍sū so̍ō le̍nde̍, ma̍ chɔ̄ɔ̄vīāā pōūta̍ŋ le̍ ndu̍ vīī vīīyo̍. Kɛ̍, mi̍ Chi̍i̍sū vi̍a̍ŋnu᷄ŋ mbo̍ māl chīɛ̍i̍ Mɛ̄lɛ̄ka̍a̍ mbo̍ kūānu᷄ŋ.