Read Southern Kisi Chɔ᷄ŋ 9 Bible Online

Chɔ᷄ŋ 9 - Southern Kisi bible

Chɔ᷄ŋ 9

¹Bōōndi̍i̍ pi᷅lɛ̍ mɛ̄ɛ̍ Chi̍i̍sū wa̍ hīōūwɔ̄ɔ̍, mbo̍ chā wānā su̍mɛ̍i̍yo̍. Pōo̍ ho̍ō yɛ̍, ō sūmɛ̍i̍ nda̍ a̍a̍ ve̍lū ndu̍ ni̍.

²Mi̍ Chi̍i̍sū bu̍ɛ̍i̍yāā ndūa̍a̍ nyūnā ndu̍ āā, “Ti̍chā, yɔ̄ŋ wɔ̄ɔ̍ŋ nɛ̄ɛ̍nɛ̍ to̍sa̍ yɛ̄ ma̍ vīālū pōo̍ ho̍ō ō sūmɛ̍i̍? Yɔ̄ŋ wɔ̄ɔ̍ŋ ndu̍ pi̍la̍a̍ ni̍, ɔ̄ɔ̄ yɔ̄ŋ wɔ̄ɔ̍ŋ wānāa̍ ve̍lū ndu̍ wa̍?”

³Mi̍ Chi̍i̍sū mu̍lī āā, “Ō cho̍ le̍ yɔ̄ŋ wɔ̄ɔ̍ŋ ndɔ̄ le̍, ɔ̄ɔ̄ le̍ yɔ̄ŋ wɔ̄ɔ̍ŋ wānāa̍ ve̍lū ndu̍ wa̍ le̍. Ō sɔ̄la̍ sūmāa̍ ho̍ō le̍ mī Mɛ̄lɛ̄ka̍ chɔ᷄m kpāāya̍ ndɔ̄ɔ̍ o̍ yōōmū pōo̍ ho̍ō ni᷄ŋ mī wāŋnda̍ chē.

⁴Ŋ̄ nɔ̄ mī ŋ̄ tōsa̍ wa̍li̍ wāna̍ ve᷅m ya̍ wo̍ bōōndi̍i̍ pāa̍le̍ŋ lē chō ve̍. Nyūmnda̍ŋ mā chō tōlɔ̄ɔ̄. O̍ ko̍ŋ, wānā to̍sā lɛ̍ wa̍li̍ le̍.

⁵Bōōndi̍i̍ ya̍ I̍ cho̍ he̍ī o̍ chi̍e̍ēŋndo̍ ni᷄ŋ nde̍, ya̍ cho̍ nyɛ̄ wa̍wo̍ŋndo̍ le̍ chi̍e̍ēŋndo̍ ni̍.”

⁶Mɛ̄ɛ̍ Chi̍i̍sū di̍mi̍ dīōmnda̍ŋ nda᷅ŋ, mbo̍ tūfū lɔ̄lūa̍ŋ lɛ̄ŋ. Mbo̍ līndā pūūlōo̍ a̍ ma̍ŋ. Mbo̍ sūū pōo̍ ho̍ō o̍ lāhɔ̄l.

⁷Mbo̍ dīmūl ndu̍ āā, “Kɔ̍ mā kɔ̍ pu̍lū hɔ̄lla̍ o̍ Pīo̍o̍ Sa̍i̍lo̍wām.” Sa̍i̍lo̍wām tɛ̄ɛ̄sīāā ndɔ̄ɔ̍ cho̍ ni̍ āā, vīōmɔ̄ɔ̍. Mi̍ pōo̍ ho̍ō kūā mbo̍ kɔ̍ pu̍lū hɔ̄lla̍. O̍ ko̍ŋ kɔ̍ɔ̍lī, mbo̍ mīīŋgū. Ndu̍yɛ̍, ō wa̍ ni᷅ŋ chɔ̄ɔ̍.

⁸Mɛ̄ɛ̍ wānāā nda̍ chīɛ̄ɛ̄li̍āŋ nda̍, a̍ wānāā nda̍ a̍a̍ cha᷅ ndu̍ pāāndū pīɛ̄īle̍ŋ nda̍ chē ndu̍, ma̍ kāndū nyūūni̍āŋndo̍. Ma̍ dīmī āā, “Ō cho̍ po̍o̍ ho̍ō le̍ ndu̍ o̍o̍ nɔ̍ pāāndū cha᷄lle̍ pīɛ̄īle̍ŋ te̍?”

⁹Mi̍ ā pūm dīmī āā, “Ndu̍ ni̍.” Kɛ̍, mi̍ ha̍ā dīmī āā, “Ō cho̍ ndu̍ le̍. Vēla᷅ŋndo̍ ko̍ni̍ nda̍ vēla᷅ŋ ni̍.” O̍ ko̍ŋ, mi̍ pōo̍ pi̍la̍ di̍mī āā, “Ya̍ ni̍.”

¹⁰Ma̍ nyūnā ndu̍ āā, “Vɛ̄ɛ̍nɛ̍ ŋ̄ lōōku̍ yɛ̄ chɔ̄?”

¹¹Mi̍ pōo̍ mūlī āā, “Po̍ nda̍ vēēlū āā, Chi̍i̍sū wo̍, ndu̍ li̍nda̍ pūūlōo̍ ni̍ mbo̍ sūū ya̍ o̍ lāhɔ̄l. Mbo̍ dīmūl la̍ āā, ‘Kɔ̍ mā kɔ̍ pu̍lū hɔ̄lla̍ o̍ Pīo̍o̍ Sa̍i̍lo̍wām.’ Mi̍ ku̍ā mi̍ kɔ̍ pu̍lū hɔ̄lla̍. Mɛ̄ɛ̍ ya̍ pu̍lū, mi̍ cha᷅.”

¹²Ma̍ nyūnā āā, “Kūɛ̍ɛ̍nɛ̍ po̍ ka̍lāa̍ cho̍ yɛ̄?” Mbo̍ mūlī āā, “I̍ si̍nā bā o̍ cho̍ le̍.”

¹³Ma̍ hūŋ a̍ po̍ ndu̍ o̍o̍ wa̍ ko̍ŋ o̍ su̍mɛ̍i̍ yo̍, nāa̍ ku̍ndā Fālīsi̍īya̍ chūā.

¹⁴Ndu̍yɛ̍, o̍ pāa̍le̍ pɛ̍ŋgīāālē Chu̍ūwa̍ chōo̍ Chi̍i̍sū ndu̍ o̍o̍ li̍nda̍ pūūlōo̍ ni̍ mbo̍ tōsā mi̍ pōo̍ chā.

¹⁵Ku̍ndā Fālīsi̍īya̍ bɛ̍ɛ̍ ma̍ nyūnā pōo̍ a̍ mɛ̄ɛ̍ o̍ lo̍o̍ku̍ chɔ̄ yɛ̍. Mbo̍ dīmūl nda̍ āā, “Mɛ̄ɛ̍ o̍ su̍u̍ pūūlōo̍ ya̍ o̍ lāhɔ̄l, mi̍ kɔ̍ pu̍lū hɔ̄lla̍ mi̍ wa᷅ ni᷅ŋ chɔ̄ɔ̍.”

¹⁶Mi̍ ku̍ndā Fālīsi̍īya̍ ā pūm ā dīmī āā, “Wāna̍ to̍sa̍ ke̍ŋ ndo̍, ō ve᷅ ni̍ŋ Mɛ̍lɛ̄ka̍ le̍ ve᷅m ndu̍ le̍. Kāni̍ fo̍ndōle̍, ō tɛ̄ɛ̄mbu̍u̍ sāwa̍ pāa̍le̍ na̍a̍ lē pɛ̄ŋgīāā le̍ŋ.” Kɛ̍, mi̍ Fālīsi̍īya̍ ā pīli̍a̍ā dīmī āā, “Tē wānā ko̍ŋ ndu̍ o̍o̍ wa̍ wāna̍ yɔ̄ŋ wɔ̄ɔ̍ŋ pɛ̍, vɛ̄ɛ̍nɛ̍ ndu̍ o̍o̍ nɔ̍lā yɛ̍ sɔ̄ɔ̍ŋ kɔ̄ndɔ̄fi̍li̍ ŋ̄ wāā nu̍a̍ā tōsā?” O̍ ko̍ŋ, mi̍ pīɔ̄ūwa᷅ŋndo̍ dēl nda̍ tɛ̍ɛ̄ŋ.

¹⁷Ma̍ hīāū lāchī a̍ po̍ ndu̍ o̍o̍ wa̍ ko̍ŋ o̍ su̍mɛ̍i̍ yo̍ nyūūnīa̍a̍. Ma̍ dīmī āā, “A̍ di̍mi̍ māā po̍ ko̍ŋ to̍sa̍ ni̍ ma̍ chā. Vɛ̄ɛ̍nɛ̍ nu̍m yīya̍ŋ yɛ̍ a̍ ndu̍ o̍kɔ̄ɔ̄?” Mbo̍ mūlī āā, “Wāna̍ su̍a̍ā le̍ Mɛ̄lɛ̄ka̍ wo̍ o̍ cho̍ ni̍.”

¹⁸Kɛ̍, wānāā bɛ̄ndūāā Chu̍ūwa̍ ā lāāla̍ŋ ndi̍ māā pōo̍ ho̍ō ō wa̍ pāāndū ō sūmɛ̍i̍, kɛ̍ mbo̍ wā ni᷅ŋ chɔ̄ɔ̍ le̍, mɛ̄ɛ̍ ma̍ vēēlū fi̍nyā ndɔ̍ a̍ kāla̍ ndɔ̄.

¹⁹Vēēlōo̍ nda̍ ma̍ nyūnā nda̍ āā, “Po̍ nyāa̍ cho̍ ho̍ō ni̍? Ō sūmɛ̍i̍ nya̍ vēlū ndu̍ lē kɛ̍ndɛ̍ī ni̍? Mɛ̄ɛ̍ vɛ̄ɛ̍nɛ̍ o̍ lo̍o̍ku̍ yɛ̄ ni᷅ŋ chɔ̄ pɛ̄ŋgo̍o̍ ho̍ō?”

²⁰Mi̍ fi̍nyā ndɔ̄ a̍ kāla̍ ndɔ̄ a̍ mu̍lī āā, “Ŋ̄ sīnā māā po̍ nāa̍ cho̍ ho̍ō ni̍. Ndu̍yɛ̍, ŋ̄ sīnā māā ō sūmɛ̍i̍yo̍ na̍a̍ ŋ̄ vēlū ndu̍ ni̍.

²¹Kɛ̍, ŋ̄ si̍nā mɛ̄ɛ̍ o̍ lo̍o̍ku̍ chɔ̄ yɛ̍ le̍. Ndu̍yɛ̍, ŋ̄ si̍nā wa᷅na̍ to̍sa̍ mbo̍ chā wo̍ le̍. Wāŋndo̍ chō ni᷅ŋ lāŋu̍nɔ̄ ka̍lā. Lā nyūna̍ ndu̍ mī ndu̍ pi̍la̍ chɔ̍m nya̍.”

²²Wānāa̍ ve̍lū pōo̍ ho̍ō wa̍ ā dīmi̍ fo̍ndō le̍nde̍ le̍. Ā wa̍ wānāā bɛ̄ndūāā Chu̍ūwa̍ wōo̍. Kāni̍, wānāā bɛ̄ndūa̍a̍ ha̍ā, nda̍ a̍a̍ chɛ̍la᷅ŋ ni᷅ŋ māā wānā o̍ wāna̍ nda̍ bīī pɛ̍ o̍ dīmīo̍o̍ māā Chi̍i̍sū ndu̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍, ā sōli̍ ndu̍ o̍ chīɛ̄ī nda̍ pīɛ̄ī Mɛ̍lɛ̄ka̍ wo̍ ni᷄ŋ.

²³Le̍ sa̍bū kōŋ, fi̍nyāa̍ pōo̍ ho̍ō a̍ kālāa̍ ā dīmi̍ ni̍ āā, “Wāŋndo̍ chō ni᷅ŋ lāŋu̍nɔ̄ kālā. Nya̍ pi̍la̍ lā nyūna̍ ndu̍.”

²⁴O̍ ko̍ŋ, ma̍ vēēlū vɛ̄lɛ̄ po̍ nda̍ a̍a̍ ve̍lū ko̍ŋ o̍ su̍mɛ̍i̍ yo̍ dīi̍ŋ ndɔ̄ɔ̍. Ma̍ dīmūl ndu̍ āā, “Ŋ̄ sīnā māā wāna̍ to̍sa̍ ko̍ŋ ma̍ chā wo̍, wāna̍ yɔ̄ŋ wɔ̄ɔ̍ŋndo̍ o̍ cho̍ ni̍. Le̍la̍ŋ, di̍mu̍l lɔ̍ na̍a̍ tōnya̍a̍ le̍ Mɛ̄lɛ̄ka̍.”

²⁵Mi̍ pōo̍ dīmī āā, “Ō wa̍ wa᷅na̍ yɔ̄ŋ wɔ̄ɔ̍ŋ, ō wa᷅ wāna̍ yɔ̄ŋ wɔ̄ɔ̍ŋ te̍, ya̍ ya̍ I̍ si̍nā ke̍ŋ te̍. Ō ya̍ I̍ si̍nā wo̍ ko̍ni̍ cho̍ ni̍, I̍ wa̍ pāāndū ō sūmɛ̍i̍. Kɛ̍, I̍ cho̍ ni᷅ŋ chɔ̄ɔ̍.”

²⁶Ma̍ nyūnā ndu̍ āā, “Ō yɛ̄ɛ̄ o̍ to̍sa̍ yɛ̄ a̍ nūm? Vɛ̄ɛ̍nɛ̍ o̍ lo̍o̍ku̍ yɛ̄ tōsā ma̍ chā?”

²⁷Mbo̍ mūlūl nda̍ āā, “I̍ chɔ̍m nya̍ ni᷅ŋ. Bāā lā tūi̍i̍ le̍? Ɔ̍ɔ̄ le̍ sa̍bū nya̍ hɛ̄na̍ŋ vɛ̍lɛ̄ le̍ ndi̍ tūēīyɔ̄ɔ̍ wo̍? Bāā nya̍ bɛ̍ɛ̍ lā hɛ̄na̍ŋ mī lā sīmnu᷄ŋ bu̍ɛ̍i̍yāā ndɔ̄ nɛ̄ɛ̍?”

²⁸Ma̍ yēī ndu̍. Mā dīmī āā, “Nu᷄m cho̍ bu̍ɛ̍ī ndɔ̄ɔ̍ ni̍. Na̍a̍ na̍a̍ bu̍ɛ̍i̍yāa̍ Mūu̍sē wa̍ na̍a̍ ŋ̄ chō ni̍.

²⁹Ŋ̄ sīnā kpe̍e̍kpe̍i̍ māā Mūu̍sē ndu̍ ndu̍ mi̍ Mɛ̄lɛ̄ka̍ sūāā nāa̍ ndu̍ chu̍a̍. Kɛ̍, lāŋu̍nɔ̄ kōŋ ndu̍, ŋ̄ lōōnu̍ŋ māā Mɛ̄lɛ̄ka̍ le̍ ve᷅m ndu̍ le̍.”

³⁰Mi̍ pōo̍ dīmī āā, “Kpa̍, mɛ̄ɛ̍ he̍ī chō sūɛ̍i̍ bi̍ī wānā kɔ̄ndɔ̄fi̍li̍. Pōo̍ ho̍ō tōsa̍ mi̍ cha᷅. Vɛ̄ɛ̍nɛ̍ nya̍ lōōkū yɛ̍ dīmī māā ō cho̍ Mɛ̍lɛ̄ka̍ le̍ ve᷅m ndu̍ le̍?

³¹Ŋ̄ sīnā kpe̍e̍kpe̍i̍ māā wānāa̍ to̍sā yɔ᷅ŋ wɔ̄ɔ̍ŋndo̍ wa̍, Mɛ̄lɛ̄ka̍ mu̍lī pi̍ɛ̍īlē ndāle̍ŋ te̍. Wānāa̍ pi̍ɛ̍ī ndu̍, o̍ ko̍ŋ kɔ̍ɔ̍lī, mā tōsā nyɛ᷅ ndu̍ Mɛ̄lɛ̄ka̍ ō hɛ̄na̍ŋ ndo̍ wa̍, nda̍ o̍ mu̍lī pi̍ɛ̍īlē ndāle̍ŋ ni̍.

³²Kāni̍ mi̍ chi̍e̍ēŋndo̍ kāndu᷄ŋ, wānā tu̍i̍i̍ yɔ̍ nu̍a̍ā māā wāŋndo̍ tōsa̍ ni᷅ŋ mi̍ wāna̍ nda̍ vēlū ō sūmɛ̍i̍ yo̍ ō chā le̍.

³³Tē ndu̍ o̍o̍ ve̍ Mɛ̍lɛ̄ka̍ le̍ ve᷅m lāŋu̍nɔ̄ɔ̍ ho̍ō le̍, ndu̍ o̍o̍ nɔ̍lā mī ndu̍ o̍o̍ to̍sa̍ sūɛ̍i̍ wa̍ā nu̍a̍ā le̍.”

³⁴Mɛ̄ɛ̍ pōo̍ sōō le̍nde̍, ma̍ dīmūl ndu̍ āā, “Nu᷄m cho̍ ho̍ō chɔ̍ŋ a̍ vīōlɔ᷄ŋ nu̍mndo̍ o̍ yɔ̄ŋ wɔ̄ɔ̍ŋndo̍ ni᷄ŋ ko̍ni̍ ŋ̄ chō ni̍, nu᷄m pɛ̍ɛ̍kū na̍a̍ ni̍?” Ma̍ sōlī ndu̍ o̍ chīɛ̄ī nda̍ pīɛ̄ī Mɛ̍lɛ̄ka̍ wo̍ ni᷄ŋ, māā ō pi̍ɛ̍ī lɛ̄ Mɛ̄lɛ̄ka̍ lo̍ŋ te̍.

³⁵Mi̍ Chi̍i̍sū tu̍ɛ̍ī māā ā sōli̍ pōo̍ ho̍ō o̍ chīɛ̄ī nda̍ pīɛ̄ī Mɛ̍lɛ̄ka̍ wo̍ ni᷄ŋ. O̍ ko̍ŋ, mi̍ Chi̍i̍sū nu̍u̍vīāā ndu̍. Mɛ̄ɛ̍ o̍ sa̍a̍lu̍ŋ ndu̍, mbo̍ nyūnā ndu̍ āā, “Ā nɔ̄ pa̍ ti̍i̍nda᷄ŋndo̍ o̍ wa᷅na̍ nda̍ vēēlū āā, Po̍ Wānā Pɔ̍nɔ̍ɔ̍ wo̍ ni᷄ŋ?”

³⁶Mi̍ pōo̍ mūlī āā, “Fāllo̍, chɔ̍m ya̍ wāna̍ nda̍ vēēlū ko̍ŋ āā, Po̍ Wānā Pɔ̍nɔ̍ɔ̍ wo̍ le̍ mī dɔ̍ū tīīnda᷄ŋndo̍ o̍ ndu̍ ni̍ŋ.”

³⁷Mi̍ Chi̍i̍sū di̍mūl ndu̍ āā, “Ā chē ni᷅ŋ ndu̍. Ya̍ cho̍ ho̍ō sūūki̍āŋndo̍ a̍ nūm ndo̍, ya̍ cho̍ wānā ko̍ŋ ni̍.”

³⁸Mi̍ pōo̍ dīmī āā, “I̍ dɔ̍ū tīīnda᷄ŋ nūu̍ o̍ nūm ni̍ŋ, Māsānɔ̄ɔ̍.” O̍ ko̍ŋ, mbo̍ bēŋ Chi̍i̍su̍ wūla̍ŋ.

³⁹Mi̍ Chi̍i̍sū di̍mī āā, “Le̍ wāŋnda̍ yāmɛ̍i̍ kīlūllo̍, o̍ ko̍ŋ kɔ̍ɔ̍lī, mī I̍ tu̍si̍ nda̍ nyɛ̄ pālāa̍ chōo̍, le̍la̍ŋ, ya̍ I̍ hi᷅ŋ o̍ chi̍e̍ēŋndo̍ ho̍ō ni᷄ŋ ni̍. O̍ ko̍ŋ, wānāa̍ cho̍ ā sūmɛ̍i̍ya̍ cho̍ chɔ̄, ndu̍yɛ̍, mī wānāa̍ chō chɔ̄ɔ̍ wa̍ ā sīmnu᷄ŋ a̍ su̍mɛ̍i̍.”

⁴⁰Mi̍ ku̍ndā Fālīsi̍īya̍ ā pūm, a̍ wa̍ lo̍ŋ nda̍ ā tūɛ̄ī dīōmnda̍ŋ nda᷅ŋ. Ma̍ nyūnā Chi̍i̍sū āā, “Bāā dīmīo̍o̍ ŋ̄ chō ni̍ māā na̍a̍ bɛ̍ɛ̍ ŋ̄ chō ā sūmɛ̍i̍?”

⁴¹Mi̍ Chi̍i̍sū mu̍lī āā, “Tē nya̍ a̍a̍ sɔ̍lɔ̍la̍ŋ pɛ̍ māā lā chō ā sūmɛ̍i̍, lā ve̍ wa᷅ o̍ pɛ̄ɛ̄sā bɛ̄ŋgu̍ le̍ yɔ̄ŋndā nyāla̍ wɔ̄ɔ̍ŋnda̍ŋ te̍. Kɛ̍, lā dīmi̍ māā lā chō chɔ̄ɔ̍. Le̍ he̍ī, lā chō o̍ pɛ̄ɛ̄sāa̍ bɛ̄ŋgu̍ le̍ yɔ̄ŋndā nyāla̍ wɔ̍ɔ̍ŋnda̍ŋ.”