Read Southern Kisi Wa̍lta̍ Wānāa̍ Chi̍i̍sūa̍a̍ 1 Bible Online

Wa̍lta̍ Wānāa̍ Chi̍i̍sūa̍a̍ 1 - Southern Kisi bible

Wa̍lta̍ Wānāa̍ Chi̍i̍sūa̍a̍ 1

¹Yāu̍wo̍ ho̍ō chō ō pōōnyīa̍ŋ le̍ Tīōōfi̍lɔ̄ɔ̄. O̍ yāu̍ ni̍ tāso̍o̍ ni᷄ŋ, mi̍ po̍o̍nyīāā a̍ wa̍li̍ o̍ wa̍li̍ Chi̍i̍sū to̍sa̍, a̍ nyɛ̄ o̍ nyɛ̄ o̍ pɛ̍ɛ̍ku̍ wāŋnda̍ chɔ̍ŋ o̍ te̍le̍ŋ o̍ ka̍ndu̍ wa̍li̍ ndɔ̄ɔ̍ wo̍,

²ha̍a̍a̍ mbo̍ fūūlūū a̍ pāa̍le̍ Mɛ̄lɛ̄ka̍ chu̍a̍ ndu̍ mbo̍ kūā a̍ ndu̍ o̍ fo̍ndāŋ ndɔ̄ɔ̍ le̍ŋ. Kɛ̍, lɔ̍ɔ̍ pa̍ Mɛ̄lɛ̄ka̍ kūā a̍ ndu̍, mi̍ Chi̍i̍sū hɛ̍lī wānāā o̍ ve᷅m hɔ̄ltē ndɔ̄ wa̍. Mbo̍ chɔ̄m nda̍ nyɛ̄ nda̍ a̍a̍ nɔ̍ le̍ tōsāa̍ wo̍. Ō tōsa̍ he̍ī sa̍na̍a̍ o̍ kpāāya̍ Nyi̍nā Kāsīo̍o̍ ni᷄ŋ.

³Mɛ̄ɛ̍ Chi̍i̍sū bi̍ī mɔ̍nɛ̍i̍, mbo̍ wū. O̍ ko̍ŋ kɔ̍ɔ̍lī, mbo̍ chɔ̄mnu᷄ŋ pu̍a̍a̍ ha̍ā le̍ te̍le̍ŋnda̍ fa̍ŋgā le̍ pālɛ̍i̍ be̍le̍-hi̍ɔ̍ɔ̍lu̍. Mbo̍ chɔ̄m kpe̍nde̍ke̍le̍ māā ō mīīŋgu̍ yōōmū. Ndu̍yɛ̍, mbo̍ sūāā nāa̍ nda̍ chūā a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄.

⁴Te̍le̍ŋ pi᷅lɛ̍ mɛ̄ɛ̍ o̍ wa̍ hɔ̄lāā tūlu̍ a̍ nda̍, mbo̍ dīmūl nda̍ ō kālā ka̍lā āā, “Lā fa̍ŋa᷄ŋ Chūlu̍sɛ̄lɛ̄m te̍. Lā chu᷄m lo̍ŋ le̍ nyɛ̄ Fi̍nyā nūu̍ dīmi̍ le̍ nya̍ kīo̍o̍ wo̍. I̍ di̍mu̍l nya̍ ni᷅ŋ a̍ ndu̍ o̍kɔ̄ɔ̄

⁵māā Chɔ᷄ŋ ndu̍ pu̍lū wāŋnda̍ pūlɔ̄ɔ̍ Mɛ̄lɛ̄ka̍a̍ a̍ mɛ̄ŋnda̍ŋ, kɛ̍, māā o̍ pālɛ̍i̍ bi̍ŋgī bɛ̄ŋgu̍ lā chō yīŋɔ̄ɔ̍ sɔ̄lā a̍ Nyi̍nā Kāsīo̍o̍.”

⁶Mɛ̄ɛ̍ nda̍ chūūŋgi̍āŋ, Chi̍i̍sū wa̍ lo̍ŋ. Mi̍ wānāā o̍ ve᷅m hɔ̄ltē ndɔ̄ wa̍ lō o̍ ko̍ŋ ma̍ nyūnā ndu̍ āā, “Māsānɔ̄ɔ̍, bāā te̍le̍ŋndo̍ ho̍ō ŋ̄ chō lɛ̄ŋndē I̍sɔ̄lūɛ̄īle̍ŋ kpāāyāa̍ mīŋgī o̍ bā le̍ wāa̍ Māsāa̍ ni̍?”

⁷Mbo̍ mūlūl nda̍ āā, “Lā nɔ̍ mī lā sīna̍ te̍le̍ŋnda̍ la̍ŋ te̍ kɛ̄lɛ̄ŋgāā bōōndu̍ŋ mu᷅ŋ. Fi̍nyā nūu̍ ndu̍ pīlɛ̍ kpe̍ nɔ̍ kpāāyāa̍ le̍ ŋ̄ wāā le̍nde̍ kɛ̍ɛ̍sīa̍a̍ ni̍.

⁸Kɛ̍ ndu̍yɛ̍, tē Nyi̍na̍ Mɛ̄lɛ̄ka̍a̍ tōl nya̍ kɔ̄ɔ̄lī pɛ̍, lā chō kpāāyāa̍ sɔ̄lā le̍ se̍īle̍ŋ tɛ̄ndāa̍. Lā dīmūl ni̍ŋ wa᷅ŋnda̍ nyɛ̄ nya̍ sīnā a̍ ya̍ o̍kɔ̄ɔ̄ wo̍, Chūlu̍sɛ̄lɛ̄m chi̍e̍e̍ ni̍, a̍ lɛ̄ŋndē Chūdi̍a̍āle̍ŋ kpe̍de̍, a̍ lɛ̄ŋndē Sāme̍e̍līāāle̍ŋ, a̍ bā o̍ bā fe̍e̍ o̍ chi̍e̍ēŋndo̍ chōo̍.”

⁹Mɛ̄ɛ̍ o̍ chi̍i̍ sūɛ̍i̍ he̍ī dīmī nāa̍ nda̍ chūā, mi̍ Mɛ̄lɛ̄ka̍ chūā ndu̍. Ā lo̍ ndu̍ nūa̍a̍, mi̍ yu̍mbu̍ yu̍mbo̍o̍ kūmbū ndu̍ kpu̍, ā chi̍ lɛ̍ ndu̍ le̍.

¹⁰Ā lo̍ nūa̍a̍ chōo̍ cho̍o̍ le̍nde̍ chi̍kɛ̍ŋ ndu̍ a̍ mākɔ̄ɔ̄, lē pīlɛ̍ kpe̍ ma̍ chā pūa̍a̍ ā ŋīɔ̍ɔ̍ŋ īsīsi̍ nda̍ īkɛ̄i̍. Ā wa̍ ā dōvīa̍ŋ o̍ nyɛ̄lā hūmbūla̍ŋ ni᷄ŋ.

¹¹Mi̍ pūa̍a̍ ha̍ā nyūnā nda̍ āā, “Nya̍ pūa̍a̍ fu̍la̍ Kāli̍lī wa̍, vɛ᷅ mi̍ lā wā īsīsi̍ na̍nu᷄ŋ mi̍ lā wā nūa̍a̍ nu̍a̍ā o̍ ha̍la̍? Chi̍i̍sū wo̍ ho̍ō, ō Mɛ̄lɛ̄ka̍ chu̍a̍ ho̍ō nya̍ tɛ̄ɛ̄ŋ mbo̍ kūā a̍ ndu̍ ɛ̄chɛ̍nɛ̄ wo̍, ō chō vɛ̄lɛ̄ hūnɔ̄ɔ̄ mɛ̄ɛ̍ nya̍ chē ndu̍ o̍ kɔ̄la̍ŋ ɛ̄chɛ̍nɛ̄ yɛ̍.”

¹²O̍ ko̍ŋ kɔ̍ɔ̍lī, ma̍ fāŋa᷄ŋ o̍ Pēmbīī Yɔ̄mīī Ɔ̄li̍fīi̍ve̍ ve̍ chōo̍. Ma̍ mīīŋgū Chūlu̍sɛ̄lɛ̄m. Chūlu̍sɛ̄lɛ̄m chi̍e̍e̍ i̍kɛ̍i̍ kpɛ̍ɛ̍lūŋ pēmbēi̍ he̍ī ī chō ni̍.

¹³Mɛ̄ɛ̍ nda̍ fūūlu̍u̍ Chūlu̍sɛ̄lɛ̄m, ma̍ hēl o̍ chīɛ̄ī chōo̍ cho̍o̍ wo̍ ni᷄ŋ o̍ hēlɔ̄ɔ̄ lēdīi̍ŋndo̍, nāa̍ nda̍ wa̍ o̍ yīya̍a̍ wa̍. Wānāa̍ wa̍ lo̍ŋ nda̍ cho̍ ha̍ā ni̍ Pītɛ̍, a̍ Chɔ᷄ŋ, a̍ Chēmi̍si̍, a̍ A̍ndūlū, a̍ Fi̍li̍pī nda̍ Tɔ̄mɔ̍si̍, a̍ Bātɔ̄lɔ̍mīū nda̍ Māa̍ti̍u̍, a̍ Chēmi̍si̍, po̍ A̍fi̍ɔ̍ɔ̄ wō, a̍ Sa̍i̍mɔ̄ŋ wāna̍ sɔ̍ŋgā le̍ lɛ̄ŋndē ndɔ̄la̍ bāŋāa̍ wo̍, a̍ Chu̍dā, po̍ Chēmi̍si̍ wo̍.

¹⁴Ha̍ā ni̍, a̍ wāŋ lāāndūa̍a̍ ā pūm, a̍ Mēēle̍, kālāa̍ Chi̍i̍sū, a̍ Chi̍i̍sū pɔ̄mbūāā ndūa̍a̍, nda̍ kpe̍de̍ nda̍ a̍a̍ chu̍ūŋgi̍āŋ lɔ̍ɔ̍ lɔ̍ɔ̍ le̍ Mɛ̄lɛ̄ka̍ pīɛ̄īyo̍ ni̍.

¹⁵Mɛ̄ɛ̍ pālɛ̍i̍ ī ti᷄ŋ hīōū, mi̍ Pītɛ̍ cha᷄ŋ mbo̍ sīm wānāā lāāla᷄ŋnda̍ tɛ̄ɛ̄ŋ. Ā wa̍ kɛ̄mɔ̄ɔ̍ lē pīlɛ̍ a̍ ŋ̄wāŋ bi̍di̍i̍ŋ.

¹⁶Mbo̍ dīmī āā, “Chāāŋāā nīa̍a̍, mɛ̄ɛ̍ mī nyɛ̄ dīo̍m Mɛ̄lɛ̄ka̍a̍ dīmi̍ wo̍ ndu̍ o̍o̍ yɔ̍nu̍ŋ. Mi̍ Nyi̍na̍ Mɛ̄lɛ̄ka̍a̍ sūāā o̍ Dēēve̍ ni̍ŋ si̍ndɛ̄ pa̍, a̍ Chu̍dā o̍kɔ̄ɔ̄. Chu̍dā ko̍ŋ ndu̍ chɔ̍m wānāa̍ bi̍ī Chi̍i̍sū wa̍ nɛ̄īyo̍ ni̍.

¹⁷Ō wa̍ wānā pi᷅lɛ̍ o̍ ku̍ndā nāa̍ chōo̍. Ndu̍yɛ̍, mi̍ ŋ̄ tōsā wa̍llo̍ le̍ Mɛ̄lɛ̄ka̍ lātūlu̍ na̍a̍ nda̍ā.”

¹⁸Pītɛ̍ di̍mi̍ le̍nde̍ fo̍ndōle̍, kāni̍, mi̍ Chu̍dā pi̍a̍ndū lɛ̄ŋnde̍ŋ a̍ nyɛ̄ sɔ̄lāā yɔ̄ŋ wɔ̄ɔ̍ŋ o̍ sɔ̍la̍ wo̍. Mbo̍ kɔ̍ de᷅l lo̍ŋ a̍ lēbōl. Mi̍ dēmbōo̍ būlī. Mi̍ nyɛ̄ o̍ nyɛ̍ wa̍ ndu̍ ni̍ŋ o̍ hu̍lu᷄ŋ.

¹⁹O̍ ko̍ŋ kɔ̍ɔ̍lī, mi̍ wāŋnda̍ Chūlu̍sɛ̄lɛ̄m chi̍e̍e̍ a̍ tu̍ɛ̍ī a̍ ndi̍ o̍kɔ̄ɔ̄. Le̍ he̍ī, ma̍ kē fo̍ndāŋ kōŋ dīōla̍ŋ o̍ sūɛ̍i̍ ndɛ̄i̍ ma̍ŋgālɛ̄i̍ ni᷄ŋ āā, Ākɛ̍ɛ̍da̍mā. Ko̍ŋ cho̍ ni̍, lɛ̄ŋndē kōo̍wa̍ŋ mā tāla̍ lēchōo̍ le̍ŋ.

²⁰Mi̍ Pītɛ̍ hīāū lāchī a̍ dīmīo̍o̍ āā, “Dīōmndo̍ chō ō pōōnyīāā o̍ Sa᷅m ni᷄ŋ māā, chīɛ̄ī ndɔ̄ɔ̍ ō lo̍ fo̍ndō, wānā o̍ wānā cha᷅l lēni᷄ŋ te̍ fɔ̍. Ī chō vɛ̄lɛ̄ ī pōōnyīāā māā, wānā che᷅le̍ŋ ō chu̍a̍ fo̍ndāŋ ndɔ̍ wa̍llo̍.

²¹“Le̍la̍ŋ, mɛ̄ɛ̍ mī ŋ̄ hɛ̄li̍ wānā pi᷅lɛ̍ le̍ wāa̍ na̍a̍ nda̍ā le̍ wāŋnda̍ īsɔ̄ɔ̍ di̍mūl a̍ mīīŋgū Māsānɔ̄ɔ̍ Chi̍i̍sū mi̍i̍ŋgu̍ yōōmū wo̍ o̍kɔ̄ɔ̄. Wāŋndo̍ ho̍ō ō nɔ̄ le̍ wāa̍ wānā pi᷅lɛ̍ o̍ wa̍ ni᷅ŋ hɔ̄lāā tūlu̍ a̍ na̍a̍, chɔ̍ŋ ha̍a̍a̍ a̍ lɔ̍ɔ̍ Māsānɔ̄ɔ̍ Chi̍i̍sū wa̍ na̍a̍ tɛ̄ɛ̄ŋ ndo̍. Ō nɔ̄ le̍ wāa̍ lātūlu̍ a̍ na̍a̍ kāndɔ᷄ŋndo̍ a̍ lɔ̍ɔ̍ Chɔ᷄ŋ wa̍ wāŋnda̍ yīŋɔ̄ɔ̍ wo̍, ha̍a̍a̍ mbo̍ fūūlūū a̍ te̍le̍ŋ Mɛ̄lɛ̄ka̍ chu̍a̍ Chi̍i̍su̍ na̍a̍ tɛ̄ɛ̄ŋ mbo̍ hēl a̍ ndu̍ ɛ̄chɛ̍nɛ̄ wo̍.”

²²

²³O̍ ko̍ŋ kɔ̍ɔ̍lī, mī wānāā lāāla᷄ŋnda̍ yūlū wānāā ŋīɔ̍ɔ̍ŋ, Chōo̍sɛ̍ ō nda̍ a̍a̍ ve̍e̍lū āā, Bāāsa̍ba̍sī wo̍ mī nda̍ a̍a̍ ve̍e̍lū ndu̍ vɛ̄lɛ̄ āā, Chɔ̍si̍tɔ̄ɔ̄, nda̍ Māta̍yā.

²⁴Ma̍ pīɛ̄ī Mɛ̄lɛ̄ka̍ nu̍a̍ā āā, “Māsānɔ̄ɔ̍ Mɛ̄lɛ̄ka̍, nūm ā sīnā yi̍ya᷄ŋnda̍ cho̍ o̍ kɔ̄ltā wāŋndā chīe̍e̍ya̍ ni᷄ŋ nda̍ŋ. Chɔ̍m na̍a̍ wāna̍ ŋ̄ hɛ̄li̍ wānāā ŋīɔ̍ɔ̍ŋnda̍ ha̍ā tɛ̍ɛ̄ŋ

²⁵le̍ wa̍llo̍ tōsāa̍ māā wāna̍ ŋ̄ vēm hɔ̄ltē nūm o̍ fo̍nda᷄ŋ Chu̍dā wo̍. Wa̍li̍ o̍ mɛ̄ī mbo̍ kūā nāa̍ o̍ bɛ̍nda̍ le̍ wāa̍ wa̍, ndu̍ cho̍ ho̍ō ni̍.”

²⁶O̍ ko̍ŋ kɔ̍ɔ̍lī, ma̍ wūū nyɔ̄ɔ̍ mɛ̄ɛ̍ nda̍ wūū ko᷅llo̍ nu̍a̍ā yɛ̍, le̍ sīnāa̍ wāna̍ Mɛ̄lɛ̄ka̍ hɛ̄li̍ wānāā ŋīɔ̍ɔ̍ŋnda̍ ha̍ā tɛ̄ɛ̄ŋ ndo̍. Mi̍ nyɔ̄ɔ̍ ho̍ō chɔ̄m māā Māta̍yā ndu̍ o̍o̍ bɛ̍nda̍ le̍ fo̍ndāŋ kōŋ ni̍. O̍ ko̍ŋ kɔ̍ɔ̍lī, mi̍ Māta̍yā de᷅l ŋ̄wāŋ tɔ̍ a̍ wānā pi᷅li̍a̍a̍ Chi̍i̍sū ve᷅m hɔ̄ltē ndɔ̄ wa̍ chōo̍, ma̍ chīŋā ŋ̄wāŋ tɔ̍ a̍ wānāā ŋīɔ̍ɔ̍ŋ.