Read Southern Kisi Wa̍lta̍ Wānāa̍ Chi̍i̍sūa̍a̍ 14 Bible Online

Wa̍lta̍ Wānāa̍ Chi̍i̍sūa̍a̍ 14 - Southern Kisi bible

Wa̍lta̍ Wānāa̍ Chi̍i̍sūa̍a̍ 14

¹Nyɛ̍ yɔ̍nu̍ŋ Pɔ̍ɔ̄ nda̍ Ba̍a̍na̍bāā A̍ŋti̍ɔ̍ɔ̄ o̍ būŋgɛ̄ī Pīsi̍dīāāve̍ ni᷄ŋ ndo̍, ndu̍ ko̍ni̍ yɔ̍nu̍ŋ nda̍ Āko̍o̍nɔ̄m chi̍e̍e̍ ni̍. Mi̍ Pɔ̍ɔ̄ nda̍ Ba̍a̍na̍bāā a̍ ku̍ā o̍ chīɛ̄ī Chu̍ūwa̍ pīɛ̄ī Mɛ̍lɛ̄ka̍ wo̍ ni᷄ŋ māā pāāndū. Ma̍ kɔ̍ di̍mī dīo̍m Mɛ̄lɛ̄ka̍a̍ nyɛ̄ kɛ̄ndɛ̄ kɛ̍ndɛ̄. Ndu̍yɛ̍, mi̍ Chu̍ūwa̍ a̍ wānāa̍ cho̍ a̍ Chu̍ū le̍ wa̍ ā fāŋgā fa̍ŋgā ā lāāla᷄ŋ a̍ Chi̍i̍sū.

²Kɛ̍ ndu̍yɛ̍, mi̍ Chu̍ūwa̍ a̍ kɛ̍ɛ̍ le̍ lāāla᷄ŋndo̍ a̍ Chi̍i̍sū wa̍ hīāū wānāa̍ cho̍ a̍ Chu̍ū le̍ wa̍ kɔ̄ɔ̄lī. Ndu̍yɛ̍, ma̍ tōsā mi̍ wāŋnda̍ ha̍ā chūā nɛ̄īyɔ᷄ŋ wānāā lāāla᷄ŋnda̍.

³Mi̍ Pɔ̍ɔ̄ nda̍ Ba̍a̍na̍bāā a̍ lo᷅ lo̍ŋ le̍ te̍le̍ŋ vi̍lɛ̄ī. Ma̍ sūāā kpe̍nde̍ke̍le̍ a̍ Māsānɔ̄ɔ̍ Mɛ̄lɛ̄ka̍ o̍kɔ̄ɔ̄. Mi̍ Mɛ̄lɛ̄ka̍ kē nda̍ kpāāyāa̍ ma̍ tōsā ka̍a̍ma̍āla̍ŋ a̍ kɔ̄ndɔ̄fi̍lta̍ŋ. He̍ī chɔ̍m ni̍ māā nyɛ̄ nda̍ dīmi̍ a̍ kɛ̄ndɛ̄i̍ Mɛ̄lɛ̄kɛ̍i̍ o̍kɔ̄ɔ̄ wo̍ chō tōnya̍.

⁴O̍ ko̍ŋ kɔ̍ɔ̍lī, mi̍ chi̍o̍o̍ kpe̍de̍ o̍ pi̍ɔ̍ūwa᷅ŋ tɛ̍ɛ̄ŋ. Mi̍ wāŋnda̍ ā pūm hīāū Chu̍ūwa̍ kɔ̄ɔ̄lī. Mi̍ ā pūm ā hīāū wānāā Chi̍i̍sū ve᷅m hɔ̄ltē ndɔ̄ wa̍ kɔ̄ɔ̄lī.

⁵Mi̍ wānāa̍ cho̍ a̍ Chu̍ū le̍ wa̍, a̍ Chu̍ūwa̍, a̍ wānāā ndāā bɛ̍ndūa̍a̍ lātūlu̍, ā kɛ̄ɛ̄sīāā le̍ wānāā Chi̍i̍sū ve᷅m hɔ̄ltē ndɔ̄ wa̍ bōōlūūwo̍, ndu̍yɛ̍, mā vīī vi̍i̍ nda̍ a̍ pōūta̍ŋ mā dīī nda̍.

⁶Mɛ̄ɛ̍ wānāā Chi̍i̍sū ve᷅m nda̍ sīna̍ a̍ ndi̍ o̍kɔ̄ɔ̄, ma̍ nyāānūŋ. Ma̍ kūā o̍ būŋgɛ̄ī Līka̍yo̍nīāāve̍ ni᷄ŋ. Ndu̍yɛ̍, ma̍ chɔ̄m sūɛ̍i̍ Mɛ̄lɛ̄kɛ̍i̍ Li̍stā, a̍ Da̍bē chi̍e̍e̍, a̍ chi̍o̍o̍ŋ o̍ tāndā kōŋ ni᷄ŋ.

⁸Po̍ pi᷅lɛ̍ wa̍ Li̍stā ō bɛ̄vɛ̍i̍. Ō wa̍ ō yōmi̍ɛ̍i̍ chɔ̍ŋ a̍ lɔ̍ɔ̍ nda̍ vēlū ndu̍ wo̍. Ndu̍ o̍o̍ nɔ̍lā kɔ᷅la̍ŋ te̍.

⁹Mi̍ pōo̍ ho̍ō chāl Pɔ̍ɔ̄ nīla̍ŋ yāŋɔ̄ɔ̍ o̍ nyɛ̄ o̍ wa̍ dīmīo̍o̍ wo̍. O̍ ko̍ŋ kɔ̍ɔ̍lī, mi̍ Pɔ̍ɔ̄ to̍fā ndu̍ chi̍ŋ. Ndu̍yɛ̍, mbo̍ sāālu᷄ŋ māā pōo̍ ho̍ō nɔ̄ lāāla᷄ŋndo̍ māā ō chō sīōŋgɔ̄ɔ̍ sɔ̄lā.

¹⁰Mi̍ Pɔ̍ɔ̄ dīmī chōo̍ cho̍o̍ āā, “Chɔ̍ŋ nya̍, mā si̍m o̍ pēlūŋ nūmndo̍ŋ chōo̍.” Mbo̍ cha᷄ŋ nya̍ mbo̍ sīm. Mbo̍ kāndū bālɔ̄ɔ̍.

¹¹Mɛ̄ɛ̍ fāŋgāa̍ chē nyɛ̄ Pɔ̍ɔ̄ to̍sa̍ wo̍, ma̍ dīmī chōo̍ cho̍o̍ o̍ Līka̍yo̍nīāŋnde̍ ni᷄ŋ āā, “Mɛ̄lɛ̄ka̍ā na̍a̍ ŋ̄ sōōlūū wa̍ chɛ᷄ŋ o̍ fo̍ndāŋ ndāa̍ ma̍ hūŋ na̍a̍ tɛ̄ɛ̄ŋ o̍ ŋ̄wāŋndā chīe̍e̍.”

¹²Ma̍ kē nda̍ dīōlā mɛ̄lɛ̄ka̍ā nda̍ sōōlūū wa̍. Ma̍ kē Ba̍a̍na̍bāā dīōla̍ŋ āā, Su̍ū. Ma̍ ke̍ Pɔ̍ɔ̄ dīōla̍ŋ āā, Hɛ̍mɛ̍sī, kāni̍, ndu̍ ndu̍ o̍o̍ su̍a̍ā ni̍.

¹³Chīɛ̄ī nda̍ a̍a̍ so̍lī sa̍lāa̍ le̍ Su̍ū wo̍ ō wa̍ chi̍e̍e̍ le̍kɔ̍ɔ̍. Mi̍ wāna̍ so̍lī sa̍lāa̍ nāa̍ mɛ̄lɛ̄ka̍ ndāa̍ Su̍ū chu̍a̍ wo̍, ō hūŋ a̍ nāūwa̍, a̍ bīl lāpe̍e̍ŋgo̍o̍ o̍ sāāsa̍ wa̍ chi̍o̍o̍ ō bālāā wo̍ sōndōo̍. Ndu̍ ni̍ nda̍ fāŋgāa̍, nda̍ a̍a̍ hɛ̍na̍ŋ mā sōli̍ sa̍lāa̍ o̍ Pɔ̍ɔ̄ lo̍ nda̍ Ba̍a̍na̍bāā.

¹⁴Mɛ̄ɛ̍ Pɔ̍ɔ̄ nda̍ Ba̍a̍na̍bāā a̍ tu̍e̍ī nyɛ̄ wāŋnda̍ nda̍ a̍a̍ ye̍e̍ma̍ le̍ tōsāa̍ wo̍, mi̍ nda̍ pi̍la̍ sɛ̄ɛ̄sīa̍ŋ nyɛ᷅la̍ŋ lēkɔ̄ɔ̍. Ma̍ kūā a̍ kīlta̍ŋ fāŋgāa̍ ho̍ō tɛ̄ɛ̄ŋ a̍ dēŋīo̍o̍ chōo̍ cho̍o̍ mā dīmī āā,

¹⁵“Chāa̍ŋāā nāa̍, lā vɛ᷅ he̍ī ndo̍ō tōsāa̍? Wāŋnda̍ chīe̍e̍ya̍ na̍a̍ ŋ̄ chō ni̍ mɛ̄ɛ̍ nya̍ chō nu̍a̍ā yɛ̍. Ŋ̄ hīŋ māhūnāā mi̍ ŋ̄ chɔ᷄m nya̍ Yōōŋgū Kɛ̄ndɛ̍ Mɛ̄lɛ̄ka̍a̍ a̍ Chi̍i̍sū o̍kɔ̄ɔ̄ le̍ mī ŋ̄ fāŋa̍ nya̍ o̍ nyɛ̄m fo̍ndo᷄ŋ mu᷅ŋ sōōlūūwo̍. Ndu̍yɛ̍, mī ŋ̄ tōsa̍ mī lā pīɛ̍i̍ Mɛ̄lɛ̄ka̍ o̍ cho̍ yōōmū wo̍. Ndu̍ to̍o̍si̍a̍a̍ ha̍la̍a̍, a̍ chi̍e̍ēŋndo̍, a̍ pēe̍ mɛ̄ŋmā īhɛ᷄llo̍ ni̍, a̍ nyɛ̄ o̍ nyɛ̍ cho̍ o̍ nyɔ̄ɔ̍ŋ mu᷅ŋ ni᷄ŋ.

¹⁶O̍ pālɛ̍i̍ pa̍a̍ndūe̍i̍ ni᷄ŋ, mi̍ Mɛ̄lɛ̄ka̍ fāŋā bāla̍ŋ le̍ kāa̍la̍ŋ kpe̍de̍ mī nda̍ pi̍la̍ tōsa̍ nyɛ̄ nda̍ hɛ̄na̍ŋ le̍ tōsāa̍ wo̍.

¹⁷Kɛ̍ o̍ ko̍ŋ ni̍ŋ fa̍ū, mbo̍ tōsā sɔ̄ɔ̍ŋ kɛ̍ndɔ᷄ŋ nāa̍ wāŋnda̍ chūā le̍ mbō chɔ᷄m nda̍ kpe̍nde̍ke̍le̍ wāna̍ o̍ cho̍ wo̍. Mbō tōsa̍ mī pīɔ̍ɔ̍ si̍a̍, chɔ̄nɔ᷄ŋndo̍ o̍ ha̍la̍a̍ ni᷄ŋ. Ndu̍yɛ̍, tē te̍le̍ŋ tɔ̄lɔ̄ɔ̍ kūām ndo̍ fūūlu̍u̍ pɛ̍, ō tōsa̍ tɔ̄lɔ̄ɔ̄lā nyāla̍ŋ lā yɔ̄ŋgu̍ kōmɔ̄ɔ̍. Mbō ke̍ nya̍ nyɛ̄ dīa̍a̍. Mbō tōsa̍ mī lā sɔ̄la̍ kɔ̄l kɛ̄ndɔ̄ɔ̍.”

¹⁸Pɔ̍ɔ̄ wa̍ā dīmi̍ bɛ̍ɛ̍ di̍ōmnda̍ŋ nda᷅ŋ ni̍, kɛ̍ ō ve̍ su̍ɛ̍i̍ bɛ̍ɛ̍ŋ bɛ̍ɛ̍ŋ le̍ wāŋnda̍ nɔ̄lā kūūnāa̍ le̍ yɔ̍ŋi̍ nda̍ sōli̍ sa̍lāa̍ nāa̍ nda̍ chūā le̍.

¹⁹O̍ ko̍ŋ, mi̍ Chu̍ūwa̍ ā pūm cha᷄ŋ A̍ŋti̍ɔ̍ɔ̄ o̍ būŋgɛ̄ī Pīsi̍dīāāve̍ ni᷄ŋ a̍ Āko̍o̍nɔ̄m chi̍e̍e̍. Ma̍ mūlī fāŋgāa̍ kūmbū ndāa̍. O̍ ko̍ŋ kɔ̍ɔ̍lī, ma̍ vīī Pɔ̍ɔ̄ a̍ pōūta̍ŋ. Ma̍ sāsū ndu̍ ma̍ fāŋā ndu̍ chi̍e̍e̍. Nda̍ a̍a̍ wa̍ ko̍ kɔ̍l māā ō vī.

²⁰Kɛ̍, mɛ̄ɛ̍ wānāā lāāla᷄ŋnda̍ hīŋ ma̍ bālū ndu̍, mbo̍ cha᷄ŋ. Ma̍ mīīŋgū chi̍e̍e̍. Dīi̍māndɔ̄ɔ̍, mbo̍ kūā Da̍bē nda̍ Ba̍a̍na̍bāā.

²¹Mi̍ Pɔ̍ɔ̄ nda̍ Ba̍a̍na̍bāā a̍ chɔ᷅m wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ a̍ Chi̍i̍sū o̍kɔ̄ɔ̄ Da̍bē. Ma̍ tōsa̍ mi̍ wānāā ka̍ ka̍ si̍mnu᷄ŋ bu̍ɛ̍īya̍ le̍ Chi̍i̍sū. O̍ ko̍ŋ kɔ̍ɔ̍lī, ma̍ mīīŋgū Li̍stā. Ma̍ cha̍ŋ Li̍stā ma̍ kūā Āko̍o̍nɔ̄m. Ma̍ cha᷄ŋ lo̍ŋ, ma̍ kūā A̍ŋti̍ɔ̍ɔ̄ o̍ būŋgɛ̄ī Pīsi̍dīāāve̍ ni᷄ŋ.

²²Ma̍ tōsā mi̍ wānāā lāāla᷄ŋnda̍ lo̍ŋ a̍ chɔ̍ɔ̍lū dīāllūŋ kāla᷄ŋ sɔ̄lā o̍ lāāla᷄ŋ ndāa̍ ni᷄ŋ. O̍ ko̍ŋ kɔ̍ɔ̍lī, ma̍ sīlā nda̍ le̍ mā hīōū lāchī a̍ lāāla᷄ŋndo̍ a̍ Chi̍i̍sū. Ma̍ dīmūl nda̍ āā, “Lē mī ŋ̄ lūɛ̄ī o̍ māsāle̍ Mɛ̄lɛ̄ka̍le̍ŋ ni᷄ŋ mɛ̄ɛ̍ mī ŋ̄ kēēku̍ o̍ nyɛ̄ pālāā fāŋgā fa̍ŋgā ni᷄ŋ.”

²³Ma̍ kūā a̍ lāŋgba̍ā kālla̍ chūa̍a̍ o̍ ku̍ndālā wānāā lāāla᷄ŋnda̍ tɛ̄ɛ̄ŋ o̍ chi̍e̍e̍ o̍ chi̍e̍e̍ nda̍ kūɛ̄ le̍ wāa̍ wānāā lāāla᷄ŋnda̍ chīla̍ŋ. Ā chu̍a̍ nda̍ pɛ̍, ā pīɛ̍i̍ Mɛ̄lɛ̄ka̍, ā bīī su᷅mndo̍, ā māl nda̍ Māsānɔ̄ɔ̍ Mɛ̄lɛ̄ka̍ o̍ bā, ō wānāā lāāla᷄ŋnda̍ tīīnda̍ŋ ndo̍.

²⁴Mɛ̄ɛ̍ nda̍ kēēku̍ o̍ būŋgɛ̄ī Pīsi̍dīāāve̍ ni᷄ŋ, ma̍ hūŋ o̍ būŋgɛ̄ī Pāmfi̍i̍līāāve̍ ni᷄ŋ.

²⁵Ma̍ chɔ̄m wāŋnda̍ dīo̍m Mɛ̄lɛ̄ka̍a̍ Pa̍kā chi̍e̍e̍. Mɛ̄ɛ̍ nda̍ chɛ᷄ŋ lo̍ŋ, ma̍ kūā Āta̍lūā chi̍e̍e̍.

²⁶Mɛ̄ɛ̍ nda̍ chɛ᷄ŋ lo̍ŋ, ma̍ lūɛ̄ī o̍ dɛ̄ndɛ̄ bɛ̍ndōo̍ ni᷄ŋ ma̍ mi̍i̍ŋgū A̍ŋti̍ɔ̍ɔ̄ chi̍e̍e̍. A̍ŋti̍ɔ̍ɔ̄ lo̍ŋ nda̍ a̍a̍ ma̍l Pɔ̍ɔ̄ nda̍ Ba̍a̍na̍bāā Mɛ̄lɛ̄ka̍ o̍ ba̍ le̍ wa̍li̍ nda̍ chīi̍ ni᷅ŋ ho̍ō wo̍ tōsāa̍ ni̍ le̍ mī Mɛ̄lɛ̄ka̍ ndu̍ o̍o̍ chɔ̍m nda̍ kɛ̄ndɛ̄i̍ ndūɛ̍i̍ lēni᷄ŋ.

²⁷Mɛ̄ɛ̍ nda̍ fūūlu̍u̍ A̍ŋti̍ɔ̍ɔ̄, ma̍ ve̍e̍lū ku̍ndā wānāā lāāla᷄ŋnda̍. Ma̍ dīmūl nda̍ nyɛ̄ o̍ nyɛ̄ Mɛ̄lɛ̄ka̍ tōsa̍ a̍ nda̍. Ma̍ chɔ̄m mɛ̄ɛ̍ Mɛ̄lɛ̄ka̍ kūmbu̍l wānāa̍ cho̍ a̍ Chu̍ū le̍ wa̍ nɛ̄īyo̍ le̍ lāāla᷄ŋndo̍ yɛ̍.

²⁸Ma̍ vīāū lo̍ŋ le̍ te̍le̍ŋ vi̍lɛ̄ī nda̍ wānāā lāāla᷄ŋnda̍.