Read Southern Kisi Wa̍lta̍ Wānāa̍ Chi̍i̍sūa̍a̍ 22 Bible Online

Wa̍lta̍ Wānāa̍ Chi̍i̍sūa̍a̍ 22 - Southern Kisi bible

Wa̍lta̍ Wānāa̍ Chi̍i̍sūa̍a̍ 22

¹“Chāa̍ŋāā nīa̍a̍ a̍ wāŋ bānāa̍, lā ya᷄ŋ ya̍ ni᷅la̍ŋ mī I̍ kɔ̍ɔ̍sa̍ le̍ ya̍ pi̍la̍.”

²Mɛ̄ɛ̍ nda̍ tūēī ndu̍ sūɛ̍i̍ nāa̍ nda̍ chūā o̍ Hi̍būlūi̍ye̍ ni᷄ŋ, ma̍ chɔ̄ɔ̄lū mēī do̍ŋ. Mi̍ Pɔ̍ɔ̄ hi̍a̍ū lāchī a̍ sūɛ̍i̍.

³Mbo̍ dīmī āā, “Chu̍ūnɔ̄ɔ̍ ya̍ I̍ cho̍ ni̍. Ndu̍yɛ̍, Ta̍a̍sɔ̄ɔ̄ o̍ būŋgɛ̄ī Sīli̍i̍sīāāve̍ ni᷄ŋ nda̍ vēlū ya̍ ni̍. Kɛ̍ ndu̍yɛ̍, Chūlu̍sɛ̄lɛ̄m chi̍e̍e̍ na̍nu᷄ŋ nda̍ mānda̍ ya̍ ni̍. Mi̍ I̍ sɔ̍lā pɛ̄ɛ̄kōo̍ Kāme̍līāl o̍ bā bɛ̄ŋgu̍. Mi̍ sɔ̍lā pɛ̄ɛ̄kōo̍ ō kālā ka̍lā a̍ mɛ̄ɛ̍ ya̍ I̍ ma̍ndā sa̍wāla̍ nda̍ chɔ᷄m fi̍nyāā nāā ma̍māa̍ sīndɛ̄ la̍ŋ yɛ̍. Ndu̍yɛ̍, mi̍ I̍ chu̍ā wa̍li̍ Mɛ̄lɛ̄ka̍a̍ a̍ bāla̍ŋ lā tīɔ̍ɔ̍ŋ kpe̍e̍kpe̍i̍, mɛ̄ɛ̍ nya̍ chō tōsāa̍ hāū nu̍a̍ā yɛ̍ ko̍ni̍.

⁴O̍ ko̍ŋ kɔ̍ɔ̍lī, mi̍ I̍ tu̍sī wānāa̍ to᷅l pɛ̄ɛ̄ku̍ Chi̍i̍sōo̍ ho̍ō kɔ̄ɔ̄lī wa̍ nyɛ̄ pālāa̍ chōo̍ ta̍u̍. Mi̍ I̍ to̍sā bɛ̍ɛ̍ mi̍ ā pūm ā sɔ̄lā pīɔ̍mndo̍. Mī ya̍ i̍i̍ bi̍ī nda̍, wānā pɔ̍nɔ̍ ni̍, wānā la̍nɔ̍ ni̍, mī du̍a̍ū nda̍ chīɛ̄ī ni̍ŋ.

⁵Māsa̍ wānāā sōlīāā lāsa̍lāa̍, a̍ lāŋgba̍ā kālāa̍ ki̍a̍lū ya᷅ma᷅ŋ nda̍, ā tɛ̄ndā se̍īle̍ŋ māā tōnya̍a̍ ya̍ cho̍ dīmīo̍o̍ ni̍. Kāni̍ fo̍ndōle̍, bōōndi̍i̍ pi᷅lɛ̍ mi̍ sɔ̍lā yāu̍la̍ŋ nda̍ o̍ ba̍ le̍ kɔ̄la̍ŋ a̍ la̍ŋ nāa̍ chāāŋāā nāā Chu̍ūwa̍ chūā Dāma̍si̍kɔ̍ɔ̄. Mi̍ I̍ ku̍ā lo̍ŋ le̍ wānāa̍ to᷅l pɛ̄ɛ̄ku̍ Chi̍i̍sōo̍ ho̍ō kɔ̄ɔ̄lī wa̍ bīyɔ̄ɔ̍, le̍ mī mi̍i̍ŋgu̍ a̍ nda̍ o̍ yɔ̄lɔ᷄ŋ Chūlu̍sɛ̄lɛ̄m, le̍ nda̍ nyɛ̄ pālāa̍ tūsīo̍o̍ chōo̍.”

⁶“O̍ kɔ̄lā nīla̍ŋ ni᷄ŋ, mɛ̄ɛ̍ ya̍ I̍ fūūlūū Dāma̍si̍kɔ̍ɔ̄ chi̍e̍e̍ le̍kɔ̍ɔ̍ a̍ te̍le̍ŋ pāa̍le̍ŋ lē sīm o̍ bōlle̍ŋ chōo̍ wo̍ ki̍nɛ̍i̍, mi̍ pa̍ŋgēle̍ bɛ̄ndōo̍ cha᷄ŋ o̍ ha̍la̍a̍ ni᷄ŋ le̍ pi᷅lɛ̍ kpe̍, mbo̍ tīū si̍lɔ̍ nāa̍ ya̍ I̍ wa̍ wa̍.

⁷Mi̍ de᷅l lɛ̄ŋ. Mi̍ tu̍ɛ̍ī mi̍ dīōmndo̍ dīmūl la̍ āā, ‘Sɔ̍ɔ̄, Sɔ̍ɔ̄, vɛ᷅ ma̍ wā ya̍ nyɛ̄ pālāa̍ tūsīo̍o̍ chōo̍?’

⁸Mi̍ I̍ nyu̍nā a̍a̍, ‘Nūm nɛ̄ɛ̍nɛ̍ Māsānɔ̄ɔ̍?’ Mbo̍ dīmūl la̍ āā, ‘Ya̍ Chi̍i̍sū, o̍ fūlā ho̍ō Na̍a̍sa̍lūɛ̄ī chi̍e̍e̍ wo̍ ni̍. Wāna̍ ŋ̄ chō nyɛ̄ pālāa̍ tūsīo̍o̍ chōo̍ wo̍.

⁹Mi̍ pūa̍a̍ na̍a̍ ŋ̄ wa̍ kɔ̄la̍ŋ nda̍ ā chā pa̍ŋgēlo̍o̍. Kɛ̍ ā tūi̍i̍ nyɛ᷅ wāna̍ wa̍ sūɛ̍i̍ nāa̍ ya̍ chu̍a̍ wo̍ ō dīmi̍ wo̍ le̍.

¹⁰Mi̍ lo᷅ lo̍ŋ mi̍ nyu̍nā ndu̍, ma̍a̍, ō yɛ̄ɛ̍nɛ̍ ya̍ I̍ to̍sa̍ yɛ̍, Māsānɔ̄ɔ̍? Mbo̍ dīmūl la̍ māā, chɔ̍ŋ, mā kūɛ̄ Dāma̍si̍kɔ̍ɔ̄. Wānā cho̍ lākɔ̄ nu̍m chɔ̄m nyɛ̄ o̍ nyɛ̄ Mɛ̄lɛ̄ka̍ kɛ̄ɛ̄si̍a̍a̍ le̍ mā to̍sa̍.’

¹¹Mi̍ pa̍ŋgēle̍ bɛ̄ndū ko̍ŋ tōsā mi̍ su̍mā. Mɛ̄ɛ̍ mi̍ chāāŋāā nīa̍a̍ sāā ya̍ ni᷅ŋ bāa̍, mi̍ ŋ̄ fūūlūū Dāma̍si̍kɔ̍ɔ̄.

¹²“Po̍ pi᷅lɛ̍ wa̍ lo̍ŋ dīōla̍ŋ āā, Ānāna̍a̍yā. Ō wa̍ wānā pi̍ɛ̍i̍yāā Mɛ̄lɛ̄ka̍ sa̍kpō. Ndu̍yɛ̍, ndu̍ o̍o̍ ma̍ndā sa̍wāla̍ nda̍ ke̍ na̍a̍ Chu̍ūwa̍ la̍ŋ. Chu̍ūwa̍ kpe̍de̍ Dāma̍si̍kɔ̍ɔ̄ nda̍ a̍a̍ nɔ̍ bɛ̄ɛ̄le̍ŋ ta̍u̍ le̍ ndu̍.

¹³Mbo̍ hūŋ nāa̍ ya̍ chu̍a̍. Mbo̍ sīm ya̍ īkɛ̄i̍. Mbo̍ dīmī āā, ‘Chāa̍ŋ nūu̍ Sɔ̍ɔ̄, ka̍ndu̍ vɛ̍lɛ̄ chɔ̄ɔ̍ a̍ hɔ̄ltā nūmnda̍ŋ.’ O̍ fōōfō ko̍ŋ chōo̍, mi̍ ka̍ndū chɔ̄ɔ̍. Mi̍ to̍fā ndu̍.

¹⁴Mi̍ Ānāna̍a̍yā di̍mī āā, ‘Mɛ̄lɛ̄ka̍ ō fi̍nyāā nāā ma̍māa̍ nda̍ a̍a̍ pi̍ɛ̍ī yo̍, ō hɛ̄li̍ nu̍m le̍ mā si̍na̍ nyɛ̄ o̍ kɛ̍ɛ̍si̍a̍a̍ le̍ tōsāa̍ wo̍. Ndu̍yɛ̍, ō hɛ̄li̍ nu̍m le̍ mā chē bu̍ɛ̍ī ndɔ̍ to̍sa̍ hɛ̄na᷄ŋ ndɔ̄ɔ̍ wo̍. Ndu̍yɛ̍, mā tūēī ndu̍ o̍ sūɛ̍i̍ nāa̍ nūm chu̍a̍.

¹⁵Ā dīmūl ni̍ŋ wa᷅ŋnda̍ kpo̍u̍ a̍ ndu̍ o̍kɔ̄ɔ̄, nyɛ̄ ŋ̄ tūēī yo̍ a̍ nyɛ̄ ŋ̄ chē wo̍.

¹⁶Le̍la̍ŋ, ō yɛ̄ɛ̍nɛ̍ ŋ̄ chō yɛ̄ chūm? Chɔ̍ŋ ni̍ko̍ mā yīŋ nu̍m bo̍o̍ndi̍i̍ ŋ̄ chō dīōla̍ Māsānɔ̄ɔ̍ Mɛ̄lɛ̄ka̍la̍ŋ pīɔ̄lɔ̄ɔ̍ ve̍, mī Mɛ̄lɛ̄ka̍ tɔ̄ɔ̄ yɔ̄ŋ nūm wɔ̍ɔ̍ŋndo̍.’

¹⁷“Mi̍ I̍ mi̍i̍ŋgū Chūlu̍sɛ̄lɛ̄m. Mɛ̄ɛ̍ ya̍ wa̍ Mɛ̄lɛ̄ka̍ pīɛ̄īyo̍ o̍ chīɛ̍i̍ Mɛ̄lɛ̄ka̍a̍ ni᷄ŋ, mi̍ cha᷅ yi̍lāŋndo̍.

¹⁸O̍ yi̍lāŋndo̍ ho̍ō ni᷄ŋ, mi̍ cha᷅ Ma̍sānɔ̄ɔ̍ Mɛ̄lɛ̄ka̍. Mbo̍ dīmūl la̍ āā, ‘Ke̍le̍ŋa̍ mā fa̍ŋa̍ŋ Chūlu̍sɛ̄lɛ̄m chɔ̍ chɔ̍. Kāni̍ fo̍ndōle̍, wāŋnda̍ na̍nū ā la̍a̍lāŋ ni̍ŋ a̍ nyɛ̄ ŋ̄ dīmūl nda̍ ni̍ŋ a̍ ya̍ o̍kɔ̄ɔ̄ wo̍ le̍.’

¹⁹Mi̍ mu̍lūl ndu̍ a̍a̍, ‘Māsānɔ̄ɔ̍ Mɛ̄lɛ̄ka̍, wāŋnda̍ ha̍ā sīnā māā I̍ wa̍ kɔ̄la̍ŋ o̍ chīɛ̄īlā na̍a̍ ŋ̄ pīɛ̄ī Mɛ̍lɛ̄ka̍ la̍ŋ fa̍ū mī bi̍ū wa̍nāa̍ la̍a̍la̍ŋ a̍ nūm nda̍, mī lu̍a̍ā nda̍.’

²⁰Ndu̍yɛ̍, wāŋnda̍ sīnā māā lɔ̍ɔ̍ nda̍ wa̍ Sti̍i̍vīŋ dīyɔ̄ɔ̍ wo̍, wāna̍ ndu̍ o̍o̍ di̍mūl wa᷅ŋnda̍ a̍ nūm o̍kɔ̄ɔ̄ wo̍, I̍ wa̍ lo̍ŋ. Ī wa̍ ō chɛ̄la᷅ŋ a̍ nda̍ māā ā dīi̍ ndu̍. Mi̍ bi̍i̍lūl wānāa̍ wa̍ ndu̍ dīyɔ̄ɔ̍ wa̍ dōmāla̍ ndāla̍ŋ.

²¹Mi̍ Māsānɔ̄ɔ̍ dīmūl la̍ āā, ‘Kɔ̍, kāni̍ fu̍u̍le̍, I̍ cho̍ nu̍m vīōmɔ̄ɔ̄ la̍nda̍ŋ o̍ wānāa̍ cho̍ a̍ Chu̍ū le̍ wa̍ lo̍.’ ”

²²Mi̍ wāŋnda̍ lō Pɔ̍ɔ̄ nīla̍ŋ yāŋɔ̄ɔ̍ ha̍a̍a̍ mbo̍ lō o̍ ko̍ŋ mbo̍ sūāā a̍ kɔ̄la̍ŋ o̍ wānāa̍ cho̍ a̍ Chu̍ū le̍ wa̍ lo̍ o̍kɔ̄ɔ̄. Dīmīo̍o̍ dɔ̍ɔ̍ le̍nde̍, ma̍ kāndū dēŋīo̍o̍ chōo̍ cho̍o̍ āā, “Lā dīi̍ ndu̍. Lā dīi̍ ndu̍. Ō bɛ̄nda̍ mbō wa̍ yōōmū le̍.”

²³A̍ wa̍ dēŋīo̍o̍ mā sɛ̄ɛ̄sīāŋ nyɛ᷅la̍ŋ nda̍ pi̍la̍ lēkɔ̄ɔ̍, mā kūāndū chu̍ndo̍o̍, mā wūū cho̍o̍ cho̍o̍.

²⁴Mi̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ dīmūl pūa̍a̍ ndūa̍a̍ māā ā kɔ̍ a̍ Pɔ̍ɔ̄ o̍ chīɛ̄ī kālā kālāa̍ ni᷄ŋ. Ndu̍yɛ̍, mbo̍ dīmūl nda̍ o̍ ko̍ŋ kɔ̍ɔ̍lī, māā ā lɔ̄ɔ̍ Pɔ̍ɔ̄ le̍ mbō chɔ᷄m sa̍bū wāŋnda̍ wa̍ bɔ̄ɔ̄lūū bɛ̄ndōo̍ o̍ ndu̍ cho̍o̍ wo̍.

²⁵Kɛ̍, mɛ̄ɛ̍ nda̍ yīi̍ Pɔ̍ɔ̄ le̍ ndu̍ lɔ̄ɔ̍, mi̍ Pɔ̍ɔ̄ nyu̍nā so̍vɛ̄i̍nɔ̍ wa̍ īsīsi̍ wo̍ āā, mɛ̄ɛ̍, “Le̍nde̍ sāwāa̍ dīmi̍ ni̍ māā ā nɔ̄ di̍ mā lɔ̄ɔ̄ Lu̍o̍ma᷅ŋnɔ̄ɔ̍ lā kɔ̍ɔ̍sā fɛ̍lɛ̍ŋ a̍ ndu̍ mī lā sīna̍ nyɛ̄ o̍ tɛ̍ɛ̍mbu̍u̍ wo̍ le̍?”

²⁶Mɛ̄ɛ̍ po̍ so̍vɛ̄i̍nɔ̍ɔ̍ tūēī dīōmndo̍ ho̍ō, mbo̍ kūā nāa̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ chūā. Mbo̍ nyūnā ndu̍ āā, “Ī māā vɛ̄ɛ̍nɛ̍ ŋ̄ chō yɛ̄ he̍ī tōsāa̍? Lu̍o̍ma᷅ŋnɔ̄ɔ̍ po̍ ko̍ŋ chō ni̍.”

²⁷Mi̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ kūā, mbo̍ kɔ̍ nyūnā Pɔ̍ɔ̄ āā, “Di̍mu̍l la̍ tōnya̍a̍. Lu̍o̍ma᷅ŋnɔ̄ɔ̍ ŋ̄ chō ni̍?” Mi̍ Pɔ̍ɔ̄ chɛ᷅l āā, “E̍ī.”

²⁸Mi̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ lō lo̍ŋ mbo̍ dīmūl ndu̍ āā, “Le̍ mī si̍mnu᷄ŋ Lu̍o̍ma᷅ŋnɔ̄ɔ̍, mɛ̄ɛ̍ mi̍ pa̍a̍wā nyɛ̄ sɔ̄lāa̍ ta̍u̍.” Mi̍ Pɔ̍ɔ̄ di̍mūl ndu̍ āā, “Kɛ̍ ya̍ ya̍, wānāa̍ ve̍lū ya̍ wa̍ bɛ̍ɛ̍ Lu̍o̍ma᷅ŋnda̍ nda̍ chō ni̍.”

²⁹Mi̍ pūa̍a̍ nda̍ a̍a̍ nɔ̍ le̍ ndu̍ nyūūnīa̍a̍ wa̍ ā fāŋa᷄ŋ ndu̍ kɔ̄ɔ̄lī o̍ lē pīlɛ̍ ni᷄ŋ kpe̍. Ndu̍yɛ̍, mɛ̄ɛ̍ wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ sāālu̍ŋ māā Lu̍o̍ma᷅ŋnɔ̄ɔ̍ Pɔ̍ɔ̄ cho̍ ni̍, mi̍ sīōōŋnde̍ bīī ndu̍ le̍ dɔ̄wɔ̄ɔ̄ o̍ dɔ̍ū ndu̍ o̍ yɔ̄lɔ᷄ŋ ndo̍.

³⁰Wānā bɛ̍ndu̍ cho̍ so̍vɛ̄i̍ya̍ bōlle̍ŋ ndo̍ ndu̍ o̍o̍ hɛ̍na̍ŋ mī ndu̍ o̍o̍ si̍na̍ kpe̍e̍kpe̍i̍ su̍ɛ̍i̍ Pɔ̍ɔ̄ tɛ̍ɛ̍mbu̍u̍ mi̍ Chu̍ūwa̍ wā ndu̍ kɔ̄ɔ̄lī le̍ ndi̍ ve̍. Le̍ he̍ī, mɛ̄ɛ̍ pāa̍le̍ŋ lē sɛ̄ dīi̍māndɔ̄ɔ̍, mi̍ wānā bɛ̍ndū so̍vɛ̄i̍ya̍ dīmī ma̍ sōlī Pɔ̍ɔ̄ o̍ yɔ̄lɔ᷄ŋ. O̍ ko̍ŋ kɔ̍ɔ̍lī, mbo̍ vēēlū wānāā bɛ̄ndūāā sōlīāā lāsa̍lāa̍, a̍ lāŋgba̍ā kālāa̍ ki̍a̍lū ya᷅ma̍ŋnda̍ kpe̍de̍, le̍ mā bīī bɔ̄ŋa᷅ŋndo̍. Mɛ̄ɛ̍ nda̍ chūūŋgi̍āŋ mbo̍ hūŋ a̍ Pɔ̍ɔ̄ mbo̍ sīmī ndu̍ nda̍ lāchī.