Read Southern Kisi Wa̍lta̍ Wānāa̍ Chi̍i̍sūa̍a̍ 27 Bible Online

Wa̍lta̍ Wānāa̍ Chi̍i̍sūa̍a̍ 27 - Southern Kisi bible

Wa̍lta̍ Wānāa̍ Chi̍i̍sūa̍a̍ 27

¹Mɛ̄ɛ̍ nda̍ kɛ̄ɛ̄si̍a̍a̍ māā ŋ̄ nɔ̄ le̍ kɔ̄la̍ŋ o̍ lɛ̄ŋndē I̍ta̍līle̍ŋ ni᷄ŋ, ma̍ yɔ̄ŋgū Pɔ̍ɔ̄ a̍ wāŋnda̍ ā pīli̍a̍ā, a̍ wa̍ o̍ bīyɔ̄ɔ̍ ni᷄ŋ nda̍, o̍ wānā bɛ̍ndū so̍vɛ̄i̍ya̍ ō pūm ndo̍, dīōla̍ŋ āā, Chu̍li̍yɔ̄ɔ̄, le̍ kɔ̄la̍ŋ a̍ nda̍. Ku̍ndā bɛ̄ndū so̍vɛ̄i̍ya̍ ō Chu̍li̍yɔ̄ɔ̄ wa̍ ni᷄ŋ ndo̍ ā vēēlu̍ ndu̍ āā, ku̍nda̍ cho̍ le̍ māsā bɛ̍ndōo̍ wo̍.

²Yɔ̄ŋgōo̍ nda̍ o̍ Chu̍li̍yɔ̄ɔ̄ lo̍, o̍ ko̍ŋ kɔ̍ɔ̍lī, mi̍ ŋ̄ hēl o̍ dɛ̄ndɛ̄ bɛ̍ndu̍ chɛ̍ŋ Ādāmi̍i̍tīɔ̄m chi̍e̍e̍ wo̍ ni᷄ŋ. Ō wa̍ kɔ̄la̍ŋ o̍ chi̍e̍e̍ŋ dɛ̄ndɛ̄la̍ bɛ̍ndūla̍ŋ lā sīm o̍ būŋgɛ̄ī E̍e̍sīāve̍ ni᷄ŋ ndo̍ŋ. Mi̍ dɛ̄ndɔ̄ɔ̍ kāndū kɔ̄la̍ŋ o̍ mɛ̄ŋnda̍ŋ chōo̍. Po̍ pi᷅lɛ̍ wa̍ na̍a̍ tɛ̄ɛ̄ŋ dīōla̍ŋ āā, Ālu̍i̍ta̍kɔ̄ɔ̄, wānā wa̍ā Tɛ̄sālōna̍i̍kā chi̍e̍e̍, o̍ būŋgɛ̄ī Māsīdo̍o̍nīāā ve̍ ni᷄ŋ.

³Dīi̍māndɔ̄ɔ̍, mi̍ ŋ̄ fūūlūū Sa̍i̍dɔ̄ŋ chi̍e̍e̍. Mi̍ Chu̍li̍yɔ̄ɔ̄ to̍sā tōnya̍ mbo̍ māl Pɔ̍ɔ̄ fo̍ndāŋ. Mi̍ Pɔ̍ɔ̄ kūā nāa̍ chāāŋāā ndūa̍a̍ chūā Sa̍i̍dɔ̄ŋ le̍ mā māla̍ ndu̍ mɛ̄ɛ̍ kpɛ̍ nda̍ a̍a̍ nɔ̄ le̍ ndu̍ mālāa̍ yɛ̍.

⁴Mɛ̄ɛ̍ dɛ̄ndɔ̄ɔ̍ chu̍a̍ na̍a̍ lo̍ŋ, mbo̍ kāndū vɛ̄lɛ̄ kɔ̄la̍ŋ a̍ na̍a̍ o̍ mɛ̄ŋnda̍ŋ chōo̍. Mi̍ hūēīye̍ kāndū hɔ̄ŋndo̍ ta̍u̍ chɔ̄nɔ᷄ŋndo̍ o̍ kpēŋgīi̍ na̍a̍ ŋ̍ wa̍ kɔ̄la̍ŋ nde̍. Le̍ he̍ī, mi̍ ŋ̄ ke̍e̍kū o̍ lɛ̄ŋndē ībūŋgāle̍ŋ Sa̍i̍pūlɔ̄ɔ̄ kpēŋgēi̍ pīlɛ̍ī nāa̍ hūēīyīī ve̍ hɔ᷅ŋ te̍ wa̍.

⁵Mɛ̄ɛ̍ na̍a̍ ŋ̄ dēmu̍l kɔ̄ŋgɔ̍ būŋgɛ̄ī Sīli̍i̍sīāāve̍, a̍ būŋgɛ̄ī Pāmfi̍i̍līāāve̍, mi̍ ŋ̄ tāŋ. Mi̍ ŋ̄ fūūlūū Ma̍i̍lūā chi̍e̍e̍ o̍ būŋgɛ̄ī Li̍i̍sīāve̍ ni᷄ŋ.

⁶Lo̍ŋ wānā bɛ̍ndū so̍vɛ̄i̍ya̍ sāālu̍ŋ dɛ̍ndɛ̄ wa̍ā Ālɛ̄kīsa̍ndīlīāā chi̍e̍e̍ ni̍. Ō wa̍ kɔ̄la̍ŋ o̍ lɛ̄ŋndē I̍ta̍līle̍ŋ ni᷄ŋ. Mbo̍ wōū na̍a̍ lēni᷄ŋ.

⁷Mi̍ ŋ̄ māl Ma̍i̍lūā. Kɛ̍ dɛ̄ndɛ̄ bɛ̍ndōo̍ ō ve̍ kɔ᷅la̍ŋ nɔ̄lā le̍, kāni̍ fo̍ndōle̍, hūēīye̍ wa̍ hɔ̄ŋndo̍. Mɛ̄ɛ̍ na̍a̍ ŋ̄ fāfa̍la̍ le̍ pālɛ̍i̍ fa̍ŋgā, mi̍ ŋ̄ fūūlūū ni᷅ŋ Ni̍dɔ̄ɔ̄ i̍kɛ̍i̍ yɔ̍ɔ̍hɛ̍ɛ̍. Hūēīye̍ wa̍ hūnɔ̄ɔ̍ a̍ hɔ̄ŋndo̍ na̍a̍ lāchī. Ŋ̄ nɔ̄la̍ kɔ᷅la̍ŋ lāchī le̍. Le̍ he̍ī, mi̍ ŋ̄ ke̍e̍kū o̍ lɛ̄ŋndē ībūŋgāle̍ŋ Ki̍le̍tī, kpēŋgīi̍ hūēīyīī ve̍ hɔ᷅ŋ te̍ ve̍. Mi̍ ŋ̄ hīāū o̍ fo̍ndāŋ pīlɛ̍ īkɛ̄i̍, mā vēēlū fo̍ndāŋ kōŋ āā, Sāli̍mo̍nɛ̄.

⁸Mi̍ ŋ̄ kīndī kīndī mi̍ ŋ̄ dēmūl kɔ̄ŋgɔ̍ɔ̍. Mi̍ ŋ̄ hūŋ o̍ fo̍ndāŋ dɛ̄ndɛ̄la̍ŋ lā sīm ndo̍ mā vēēlū fo̍ndāŋ kōŋ āā, nāa̍ kɛ̍ndīāā dɛ̄ndɛ̄la̍ŋ lā sīm nda̍. La̍sīāā chi̍e̍e̍ i̍kɛ̍i̍ fo̍ndāa̍ ho̍ō chō ni̍.

⁹Vīōūwɔ̄ɔ̍ pi̍la̍ na̍a̍ ŋ̄ vīōū o̍ ti̍ŋndā lāŋ tɛ̍ɛ̄ŋ ni̍. Pāa̍le̍ wāŋnda̍ nda̍ a̍a̍ bi̍ī bɔ᷅ŋa᷅ŋndo̍, le̍ mī Mɛ̄lɛ̄ka̍ ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ nde̍ŋ, le̍ le̍e̍ hi̍o̍ū ni᷅ŋ. Ndu̍ o̍o̍ ve̍ lɛ̍ te̍le̍ŋ kɛ̍ndɛ̄ le̍ dɛ̄ndɛ̄la̍ ku̍ā o̍ mɛ̄ŋnda̍ŋ chōo̍ la̍ŋ te̍. Kāni̍ fo̍ndōle̍, te̍le̍ŋndo̍ ho̍ō kpūndɛ̍la̍ŋ lā nɔ̄ dɛ̄ndɛ̄la̍ŋ kōmāllo̍ o̍ mɛ̄ŋnda̍ŋ chōo̍ ni̍. Le̍ sa̍bū kōŋ, mi̍ Pɔ̍ɔ̄ si̍lā nda̍ āā,

¹⁰“Chāāŋāā nīa̍a̍, I̍ sa̍a̍lu̍ŋ māā nyɛ̄ pālāa̍ chō na̍a̍ lāchī ta̍u̍ o̍ kɔ̄la̍ŋ nda᷅ŋ ni᷄ŋ. Dɛ̄ndɔ̄ɔ̍ chō ītāmu̍. Ndu̍yɛ̍, wōlɔ̄ɔ̄la̍ŋ a̍ yōōmūlā wāŋndā chīe̍e̍ya̍ bɛ̍ɛ̍ lā tāmbū ni̍ŋ.”

¹¹Kɛ̍, wānā bɛ̍ndu̍ so̍vɛ̄i̍ya̍ ō ye᷄ŋ nyɛ᷅ Pɔ̍ɔ̄ di̍mi̍ wo̍ lānī le̍. Wāna̍ wa̍ kɔ̄la̍ŋ a̍ dɛ̄ndɔ̄ɔ̍ wo̍ a̍ wāna̍ nɔ̍ dɛ̄ndɔ̄ɔ̍ wo̍, nyɛ̄ nda̍ dīmi̍ wo̍, ndu̍ ko̍ni̍ o̍ ya̍ŋ lānī ni̍.

¹²Nāa̍ dɛ̄ndɛ̄la̍ŋ lā sīm ka̍ŋ nda̍, nda̍ a̍a̍ ni̍ŋ le̍ mī dɛ̄ndɔ̄ɔ̍ ndu̍ o̍o̍ chu̍m lo̍ŋ mī bōōndi̍i̍ wɔ̍ɔ̍ŋnde̍ he̍ī ndi̍ i̍i̍ hi̍o̍ū le̍. Le̍ he̍ī, mi̍ wāŋnda̍ ā ka̍ ka̍ di̍mī māā ŋ̄ mālnu᷄ŋ, mī ŋ̄ kūɛ̄nūŋ. Nda̍ a̍a̍ nɔ̍ o̍ kɔ̄l le̍ fūūlūūwo̍ Fōni̍i̍sīā, le̍ mī dɛ̄ndɔ̄ɔ̍ ndu̍ o̍o̍ chu̍m ndo̍ŋ mī ndu̍ o̍o̍ lo̍ o̍ ko̍ŋ mī bōōndi̍i̍ wɔ̍ɔ̍ŋnde̍ ndi̍ i̍i̍ hīōū. Fōni̍i̍sīā ndu̍ wa̍ māwāā fo̍ndāŋ dɛ̄ndɛ̄la̍ŋ lā sīm o̍ lɛ̄ŋndē ībūŋgāle̍ŋ Ki̍le̍tī wo̍. Nāa̍ pāa̍le̍ŋ lē dēl la̍ o̍ bā mīāllo̍ chōo̍ a̍ o̍ bā kɛ̄ndɔ̄ɔ̍ chōo̍ lo̍ŋ Fōni̍i̍sīā mu̍lī hɔ̄lla̍ ni̍.

¹³Mɛ̄ɛ̍ hūēīyīī fɛ̍ fɛ̍i̍ ī chɛ᷄ŋ ba᷅ tōū wo̍, ma̍ kāndū yīya᷄ŋndo̍ māā ā fūūlūū ni̍ŋ o̍ fo̍ndāŋ nda̍ wa̍ kɔ̄llo̍. Le̍ he̍ī, ma̍ hēēlū nyɛ̍ si̍mī dɛ̍ndɛ̄ bɛ̍ndōo̍ wō o̍ dɛ̄ndɔ̄ɔ̍ ni᷄ŋ. Mi̍ dɛ̄ndɔ̄ɔ̍ kāndū kɔ̄la̍ŋ a̍ kɔ̄ŋgɔ̍ lɛ̄ŋndē ībūŋgāle̍ŋ Ki̍le̍ti̍ dēmūllo̍.

¹⁴Kɛ̍, ō bēndu̍ bɛ̍ɛ̍ fo̍ndāŋ te̍, mi̍ hūēīyīī bɛ̄ndū bɛ̍ndūe̍i̍ kāndū hɔ̄ŋndo̍ chɔ̄nɔ᷄ŋndo̍ bā pāa̍le̍ŋ lē chāŋ ndo̍ o̍ bā mīāllo̍ chōo̍ ba᷅ lɛ̄ŋndē ībūŋgāle̍ŋ. Ā vēēlū hu̍e̍i̍yīī kēŋ āā, hūēīyīi̍ cha᷅ŋ o̍ bā mīāllo̍ chōo̍ bā pāa̍le̍ŋ lē chāŋ ndo̍ ve̍.

¹⁵Mi̍ hūēīye̍ he̍ī bēndāl dɛ̄ndɔ̄ɔ̍. Mbɔ̄ kɛ̍ nūm. Mi̍ ī kāndū ndu̍ hīīlūū bɛ̄ndū bɛ̍ndōo̍. Ŋ̄ nɔ̄la̍ dɛ̄ndɔ̄ɔ̍ bōlle̍ŋ sīmī bā hūēīye̍ ī wa̍ chɔ̄nɔ᷄ŋndo̍ wo̍ le̍. Mɛ̄ɛ̍ na̍a̍ ŋ̄ būmba̍ le̍ ndu̍ bōlle̍ŋ sīmīo̍o̍, mi̍ ŋ̄ fāŋā bā. Mi̍ hūēīye̍ kāndū ni̍ko̍ kɔ᷅la̍ŋ a̍ na̍a̍ nyīndɔ̄ɔ̍.

¹⁶Mɛ̄ɛ̍ na̍a̍ ŋ̄ fūūlu̍u̍ o̍ lɛ̄ŋndē ībūŋgāle̍ŋ Ka̍u̍dā, o̍ kūmbūī hūēīyīī ve̍ hɔ᷅ŋ te̍ ve̍, mi̍ ŋ̄ kīndī kīndī, mi̍ ŋ̄ māndā dɛ̄ndɛ̄ pɔ̍mbɔ̍ wa̍ ō yīyāā dɛ̄ndɛ̄ bɛ̍ndōo̍ a̍ mākɔ̄ɔ̄ wo̍ yɔ̄ŋi̍ ndu̍ o̍o̍ ta̍mbu̍.

¹⁷Mi̍ pūa̍a̍ hēēlū ndu̍ o̍ dɛ̄ndɛ̄ bɛ̍ndōo̍ ni᷄ŋ. Ma̍ kēēkū yūe̍i̍ o̍ dɛ̄ndɛ̄ bɛ̍ndōo̍ bɛ̄ŋgu̍, ma̍ yīī ndu̍ po᷅ŋ, yɔ̍ŋi̍ ndu̍ o̍o̍ ta̍mbu̍. Ma̍ mūli᷄ŋ ma̍ tūsī kōlā bɛ̍ndu̍ wa̍ o̍ dɛ̄ndɔ̄ɔ̍ ō tūāndāā wo̍. Kōlāa̍ ho̍ō ndu̍ ma̍lā dɛ̍ndɛ̄ bɛ̍ndōo̍ le̍ kɔ̄la̍ŋ chɔ̍ chɔ̍ ni̍, tē hūēīye̍ ī hɔ᷄ŋ lēni᷄ŋ pɛ̍. Ma̍ tūsī kōlā ko̍ŋ. Kāni̍ fo̍ndōle̍, ā wa̍ sīōōŋnde̍ yɔ̍ŋi̍ dɛ̄ndɛ̄ bɛ̍ndōo̍ ndu̍ o̍o̍ kɔ̍ cha᷅l o̍ si̍o̍o̍ŋīī ku̍ndɛ̄i̍ chōo̍ o̍ mɛ̄ŋnda̍ŋ bɛ̄ŋgu̍ o̍ kɔ̄ŋgɔ̍ lɛ̄ŋndē Si̍i̍tīle̍ŋ īkɛ̄i̍. Mi̍ hūēīye̍ hīāū lāchī a̍ dɛ̄ndɔ̄ɔ̍ nyīndɔ̄ɔ̍.

¹⁸Mɛ̄ɛ̍ hūēīyīī bɛ̄ndūe̍i̍ he̍ī kōŋ dɛ̄ndɔ̄ɔ̍ te̍i̍, mɛ̄ɛ̍ i̍ ko᷅ŋ ndu̍ te̍i̍, dīi̍mā ndɔ̄ɔ̍, ma̍ kāndū wōlɔ̄ɔ̄la̍ wa̍ lēni᷄ŋ nda̍ŋ sōlīo̍o̍ mā vīāū o̍ pēēlo̍.

¹⁹O̍ pālɛ̍i̍ yāa̍ ndɔ̄ɔ̍, mi̍ nda̍ pi̍la̍ vīāū nyɛ̄m dɛ̄ndɔ̄ɔ̍ ŋ̄ ti᷄ŋ o̍ pēēlo̍.

²⁰Le̍ pālɛ̍i̍ fa̍ŋgā na̍a̍ ŋ̍ chi᷅ pa̍a̍le̍ŋ a̍ lēhɔ̄l pu̍e̍e̍ŋ bɛ̍ɛ̍ le̍, kɛ̄lɛ̄ŋgāā ni᷅ŋ te̍ mī ŋ̄ chē lōo̍ŋ īchɔ̄l. Ho̍ō kpe̍de̍ hūēīye̍ chō hɔ̄ŋ bɛ̄ndū bɛ̍ndōo̍. Kɔ̄l bɛ̍ɛ̍ ve̍ lɛ̍ na̍a̍ māā ŋ̄ chō chīndā le̍.

²¹Le̍ pālɛ̍i̍ fa̍ŋgā pūa̍a̍ ha̍ā di᷅ nyɛ᷅ o̍ nyɛ̄ dīāā le̍. O̍ ko̍ŋ, mi̍ Pɔ̍ɔ̄ si᷅m nda̍ tɛ̄ɛ̄ŋ. Mbo̍ dīmūl nda̍ āā, “Chāāŋāā nīa̍a̍, tē nya̍ a̍a̍ ya̍ŋ ya̍ lānī pɛ̍, mī na̍a̍ ŋ̍ fēŋa̍ŋ na̍a̍ dɛ̄ndɛ̄la̍ŋ lā sīm Ki̍le̍tī wa̍ le̍, nyɛ̄ o̍ nyɛ̍ ta̍mbu̍ kpo̍u̍ ndu̍ o̍o̍ te̍mbū ni̍ŋ te̍.

²²Kɛ̍ o̍ ke̍ŋ ni̍ŋ kpe̍de̍, lā ta̍mbū kɔ̄l te̍. Kāni̍ fo̍ndōle̍, wānā pi᷅lɛ̍ bɛ̍ɛ̍ cho̍ nyɛ̍ yɔ̄nɔ᷄ŋ te̍. Dɛ̄ndɔ̄ɔ̍ ko̍ni̍ cho̍ ītāmu̍ ni̍.

²³Kāni̍ fo̍ndōle̍, chɔ̍chɔ̄l Mɛ̄lɛ̄ka̍ ya̍ cho̍ le̍ ndu̍, ndu̍yɛ̍, mi̍ wa᷅ ndu̍ pīɛ̄īyo̍ wo̍, mi̍ ki̍i̍la̍nɔ̍ ndɔ̄ɔ̍ hūŋ nāa̍ ya̍ chu̍a̍.

²⁴Mbo̍ dīmūl la̍ āā, ‘Yɔ᷅ŋ īsīōōŋ te̍, Pɔ̍ɔ̄. Ā chō īsīsi̍ ma̍sā bɛ̍ndōo̍ o̍ hɔ̄l, le̍ mā kɔ̍ɔ̍sa̍ le̍ nūm pi̍la̍. O̍ ko̍ŋ kɔ̍ɔ̍lī, Mɛ̄lɛ̄ka̍ tōsa̍l nu̍m tōnya̍a̍. Ō chō tōsā wānā o̍ wāna̍ nya̍ chō kɔ̄la̍ŋ lātūlu̍ o̍ dɛ̄ndɔ̄ɔ̍ ho̍ō ni᷄ŋ, ō pīlɛ̍ bɛ̍ɛ̍ yɔ̍nūŋ nyɛ̍ le̍.’

²⁵Le̍la̍ŋ, chāāŋāā nīa̍a̍, lā ta̍mbū kɔ̄l te̍. Kāni̍ fo̍ndōle̍, I̍ la̍a̍la̍ŋ a̍ Mɛ̄lɛ̄ka̍ māā nyɛ̄ o̍ di̍mu̍l la̍ wo̍ chō yɔ̄nɔ᷄ŋ.

²⁶Kɛ̍ ndu̍yɛ̍, hūēīye̍ chō na̍a̍ nyīndɔ̄ɔ̄ o̍ lɛ̄ŋndē ībūŋgālē pūm.”

²⁷Mi̍ hūēīye̍ hīāū lāchī a̍ na̍a̍ nyīndɔ̄ɔ̍ o̍ pēe̍ mɛ̄ŋmā īhɛ᷄llo̍ Mɛ̄dītālu̍e̍nīāā chōo̍. O̍ mālɔ̄ tɔ̍ a̍ lē hīɔ̍ɔ̍lu̍a̍ŋ īchɔ̄llo̍ a̍ te̍le̍ŋ dītɛ̍ɛ̄ŋndo̍, mi̍ wānāa̍ ku̍ā a̍ dɛ̄ndɔ̄ɔ̍ wa̍ yīya᷄ŋ māā ŋ̄ chō ni᷅ŋ le̍ fūūlūūwo̍ ō kɔ̄ŋgɔ̍ɔ̍ ō pūm.

²⁸O̍ ko̍ŋ, ma̍ chūā yōōlē vīlɛ̄īle̍ŋ a̍ nyɛ̄ lūsu̍lɛ̍i̍yo̍ ō bāā. Ma̍ tūū mɛ̄ɛ̍ mɛ̄ŋnda̍ŋ mā chō yīŋgīlāa̍ yɛ̍. Ma̍ sāālu᷄ŋ māā mɛ̄ŋnda̍ŋ o̍ fo̍ndāŋ kōŋ mā chō yīŋgīlāa̍ le̍ nɛ̄īyo̍ kɛ̄mɔ̄ɔ̍ lē pīlɛ̍ a̍ bi̍di̍i̍ŋ. Kɔ̄la̍ŋ vɛ̄lɛ̄ kpɛ̍ɛ̍, ma̍ tūū. Mā sāālu᷄ŋ māā mā chō ni᷅ŋ yīŋgīlāa̍ le̍ nɛ̄īyo̍ be̍le̍-ŋɔ̍ma̍hīɔ̍ɔ̍lu̍.

²⁹O̍ ko̍ŋ, ma̍ tūsī nyɛ᷄m si̍mī dɛ̍ndɔ̄ɔ̍ wo̍ŋ ŋ̄ hīɔ̍ɔ̍lu̍ dɛ̍ndɔ̄ɔ̍ a̍ mākɔ̄ɔ̄. Kāni̍ fo̍ndōle̍, sīōōŋnde̍ wa̍ nda̍ yɔ̍ŋi̍ hūēīye̍ ī kɔ̍ lɔ̍ɔ̄ dɛ̄ndɔ̄ɔ̍ o̍ pōūta̍ŋ. Ā wa̍ ni᷅ŋ Mɛ̄lɛ̄ka̍ pīɛ̄īyo̍ māā pāa̍le̍ŋ lē kēle̍ŋa̍ ni᷅ŋ ko̍ si̍ɔ̄.

³⁰Pūa̍a̍ ku̍ā a̍ dɛ̄ndɔ̄ɔ̍ wa̍ ā ti᷄ŋ, nda̍ a̍a̍ hɛ̍na̍ŋ mī nda̍ a̍a̍ ve̍ŋnu᷄ŋ, mī nda̍ a̍a̍ lu̍ɛ̍ī o̍ dɛ̄ndɛ̄ pɔ̍mbɔ̄ɔ̍ ni᷄ŋ mā tāŋnu̍ŋ le̍e̍lōo̍. Ma̍ kāndū dɛ̄ndɛ̄ pɔ̍mbɔ̄ɔ̍ tūsīo̍o̍ o̍ mɛ̄ŋnda̍ŋ chōo̍. Wānā a̍a̍ cha᷅ ko̍ āā nyɛ᷄m si̍mī dɛ̍ndɔ̄ɔ̍ wo̍ŋ nda̍ chō tūsīo̍o̍ dɛ̄ndɛ̄ bɛ̍ndōo̍ lāchī ni̍.

³¹Mi̍ Pɔ̍ɔ̄ di̍mūl wānā bɛ̍ndū so̍vɛ̄i̍ya̍ a̍ so̍vɛ̄i̍ya̍ āā, “Tē pūa̍a̍ ha̍ā tāŋnu̍ŋ pɛ̍, nya̍ fa̍ū lā chō lō o̍ pēēlo̍.”

³²O̍ ko̍ŋ, mi̍ so̍vɛ̄i̍ya̍ kīālū yōōle̍ŋ o̍ dɛ̄ndɛ̄ pɔ̍mbɔ̄ɔ̍. Mbo̍ hīāū a̍ mɛ̄ŋnda̍ŋ.

³³A̍ te̍le̍ŋ pāa̍le̍ si̍a̍āle̍ŋ, mi̍ Pɔ̍ɔ̄ nyɔ̍ɔ̍lū nda̍ kpe̍de̍ le̍ mā dē nyɛ̄ dīa̍a̍. Mbo̍ dīmī āā, “Le̍ pālɛ̍i̍ tɔ̍ a̍ ī hīɔ̍ɔ̍lu̍ lā chō a̍ kɔ̄ltā lānda᷄ŋnda̍ŋ. Ndu̍yɛ̍, te̍le̍ŋndo̍ ho̍ō fa̍ū lā chō a̍ yīa̍a̍ŋ. Nyɛ̄ o̍ nyɛ̄ lā wōūnu̍ŋ ndɔ̍ o̍ sōndō le̍.

³⁴Le̍la̍ŋ, lā yāndi̍i̍ lā di̍o̍ nyɛ̍ dīa̍a̍. Ō bɛ̄nda̍ mī lā dē nyɛ̄ dīa̍a̍ mī yōōmōo̍ mīīŋgu̍ nya̍ o̍ mīli̍ŋ. Wānā pi᷅lɛ̍ bɛ̍ɛ̍ ō cho̍ nyɛ̍ yɔ̄nɔ᷄ŋ te̍.”

³⁵Mɛ̄ɛ̍ Pɔ̍ɔ̄ chi̍i̍ sūɛ̍i̍, mbo̍ chūā bēe̍dīi̍yo̍. Mbo̍ mēl Mɛ̄lɛ̄ka̍ ba̍li̍ka̍ nda̍ kpe̍de̍ o̍ hɔ̄l. Mbo̍ sɛ̄mbā. Mbo̍ kāndū dīo̍o̍.

³⁶Mi̍ kɔ̄lta̍ŋ lā sīmūl nda̍ kpo̍u̍. Nda̍ bɛ̍ɛ̍ ma̍ dīā nyɛ̄ dīa̍a̍.

³⁷Na̍a̍ ŋ̍ wa̍ o̍ dɛ̄ndɛ̄ bɛ̍ndōo̍ ho̍ō ni᷄ŋ nda̍ ŋ̄ wa̍ fa̍ū fa̍ū kɛ̄mɔ̄ɔ̍ lē dīi̍ŋ a̍ ŋ̄wāŋ be̍le̍-ŋɔ̍mmɛ̍ū a̍ wānāā ŋɔ᷄mpu᷅m.

³⁸Mɛ̄ɛ̍ nda̍ dē nyɛ̄ dīa̍a̍ ma̍ pu᷄m, ma̍ sōlī wi̍tīi̍yo̍ŋ o̍ dɛ̄ndɔ̄ɔ̍ ni᷄ŋ ma̍ vīāū o̍ pēēlo̍ le̍ mī dɛ̄ndɔ̄ɔ̍ chɔ̄ɔ̄lu̍ yɔ̍nɔ᷄ŋ ti̍ŋ fe̍fe̍le̍.

³⁹Mɛ̄ɛ̍ pāa̍le̍ŋ lē sɛ̄, mi̍ pūa̍a̍ ku̍ā a̍ dɛ̄ndɔ̄ɔ̍ wa̍ chā yōndōo̍. Kɛ̍, ā sīna̍ fo̍ndāŋ kālāa̍ le̍. Kɛ̍ ndu̍yɛ̍, ma̍ chā nāa̍ mɛ̄ŋnda̍ŋ mā kēlū kɔ̄ŋgɔ̍ɔ̍ mi̍ mā lūēī sɔ̍ŋgi̍le̍ŋ nda̍. Si̍o̍ōŋnde̍ ī wa̍ o̍ kɔ̄ŋgɔ̍ ko̍ŋ. Ma̍ kɛ̄ɛ̄sīāā māā tē ā nɔ̄la̍ pɛ̍, ā sīmi̍ dɛ̄ndɔ̄ɔ̍ o̍ si̍o̍ōŋnde̍ chōo̍ o̍ kɔ̄ŋgɔ̍ ko̍ŋ bɛ̄ŋgu̍.

⁴⁰Ma̍ kīlī yūe̍i̍ ma̍ mɛ̄ī nyɛ᷄m si̍mī dɛ̍ndɔ̄ɔ̍ wo̍ŋ o̍ mɛ̄ŋnda̍ŋ bɛ̄ŋgu̍. Ma̍ tīīmbūū yūēī nda̍ yīi̍ pɛ̄ŋgɔ̍ŋ bɛ̍ndu᷄ŋ wa̍ o̍ dɛ̄ndɔ̄ɔ̍ a̍ mākɔ̄ɔ̄ le̍ dɛ̄ndɔ̄ɔ̍ bōlle̍ŋ mūlīo̍o̍ wo̍ŋ. Ma̍ tūāndū kōla̍ bɛ̍ndu̍ ma̍lā dɛ̍ndɔ̄ɔ̍ le̍ kɔ̄la̍ŋ ndo̍ dɛ̄ndɔ̄ɔ̍ lāchī le̍ mī hūēīye̍ kūɛ̄ a̍ dɛ̄ndɔ̄ɔ̍ lāchī. O̍ ko̍ŋ kɔ̍ɔ̍lī, mi̍ dɛ̄ndɔ̄ɔ̍ kāndū kɔ̄la̍ŋ bā kɔ̄ŋgɔ̍ɔ̍.

⁴¹Kɛ̍ tōsāa̍ dɔ̍ɔ̍, mbo̍ kūndū bōlle̍ŋ o̍ si̍o̍o̍ŋīī ku̍ndɛ̄i̍ o̍ mɛ̄ŋnda̍ŋ bɛ̄ŋgu̍. Mbo̍ chālnu᷄ŋ o̍ si̍o̍ōŋnde̍ chōo̍. Mbo̍ hāū lāchī. Wānā ndu̍ o̍o̍ nɔ̍lā ndu̍ sōlī le̍. Mi̍ mɛ̄ŋma̍ wa̍ lɔ̄ɔ̄nɔ᷄ŋndo̍ o̍ dɛ̄ndɔ̄ɔ̍ tūmndo̍ wa̍ŋ mā tɛ̄ɛ̄mbūū dɛ̄ndɔ̄ɔ̍.

⁴²So̍vɛ̄i̍ya̍ nda̍ a̍a̍ hɛ̍na̍ŋ mī wānāa̍ wa̍ o̍ bīyɔ̄ɔ̍ ni᷄ŋ nda̍ nda̍ a̍a̍ tāŋnu̍ŋ a̍ sāānāa̍ mī nda̍ a̍a̍ nya̍a̍nu̍ŋ te̍. Le̍ he̍ī, ma̍ kɛ̄ɛ̄sīāā le̍ nda̍ dīūwo̍ fa̍ū.

⁴³Kɛ̍ ndu̍yɛ̍, wānā bɛ̍ndū so̍vɛ̄i̍ya̍ ndu̍ o̍o̍ hɛ̍na̍ŋ mī nda̍ a̍a̍ di̍ī Pɔ̍ɔ̄ le̍. Le̍ he̍ī, mbo̍ kūūnā nda̍ māā ā di̍ī nda̍ le̍. Mbo̍ lō o̍ ko̍ŋ mbo̍ dīmūl wānāa̍ cha̍ā sa̍a̍nāa̍ wa̍ āā, “Nya̍ de᷄l fɛ̍lɛ̍ŋ a̍ sāānāa̍ mī lā ta᷄ŋ.”

⁴⁴Mbo̍ dīmūl ā tūa̍a̍ āā, “Wāŋnda̍ ā ti᷄ŋ ā ta᷄ŋ o̍ pɛ̄ŋgɔ̍ŋ chōo̍ mī ha̍ā ta᷄ŋ o̍ nyɛ̄m dɛ̄ndɔ̄ɔ̍ chōo̍.” Mɛ̄ɛ̍ nu̍a̍ā wāŋnda̍ kpo̍u̍ a̍ lo̍o̍ku̍ tāŋɔ̄ɔ̄ ni̍, ō pīlɛ̍ bɛ̍ɛ̍ yɔ̍nu̍ŋ nyɛ̍ le̍.