Read Southern Kisi Wa̍lta̍ Wānāa̍ Chi̍i̍sūa̍a̍ 28 Bible Online

Wa̍lta̍ Wānāa̍ Chi̍i̍sūa̍a̍ 28 - Southern Kisi bible

Wa̍lta̍ Wānāa̍ Chi̍i̍sūa̍a̍ 28

¹Mɛ̄ɛ̍ na̍a̍ ŋ̄ ta᷄ŋ, mi̍ ŋ̄ sāālu᷄ŋ māā lɛ̄ŋndē ībūŋgālē le̍ŋ dīōla̍ŋ āā, Ma̍a̍tā.

²Mi̍ wānāā na̍a̍ ŋ̄ kōma̍l lo̍ŋ nda̍ yīyā na̍a̍. Ma̍ bīī na̍a̍ bīyɔ̄ɔ̄ kɛ̄ndɔ̄ɔ̍ pi̍la̍. Ma̍ kīīsūl na̍a̍ yīŋnde̍ŋ, kāni̍ fo̍ndōle̍, pīɔ̍ɔ̍ wa̍ sīa̍a̍, ndu̍yɛ̍ hūēīye̍ wa̍ hūnɔ̄ɔ̍.

³Mi̍ Pɔ̍ɔ̄ ti̍ŋgū yɔ̄mnde̍ kpɔ̄ŋndo̍. Mbo̍ wā ndi̍ dɔ̄wɔ̄ɔ̍ o̍ yīŋ. Mɛ̄ɛ̄māā kɛ̄ūwo̍ wa̍ o̍ yɔ̄mnde̍ bɛ̄ŋgu̍. Mɛ̄ɛ̍ hāŋgu̍l lēyīŋndo̍ tūūlu̍ ndu̍, mbo̍ fūlā. Mbo̍ lāndu᷄ŋ Pɔ̍ɔ̄ o̍ bāa̍. Mi̍ Pɔ̍ɔ̄ fa̍sāŋā bāa̍. Mi̍ kɛ̄ū kālāa̍ dēl o̍ yīŋ. Chɔ̄ wāŋnda̍ o̍ lɛ̄ŋndē lēŋ ni᷄ŋ a̍ che᷅ ko̍ŋ kɛ̍ūwo̍ ō lānda᷄ŋ Pɔ̍ɔ̄ o̍ bāa̍ wo̍, ma̍ dīmu̍la᷅ŋ āā, “Pōo̍ ho̍ō kɛ̄ɛ̄ wa᷅ wānā di̍yāā ŋ̄ wāŋndā chīe̍e̍ le̍. Kāni̍ fo̍ndōle̍, pīɔ̍mndo̍ bēndū ndu̍ o̍ mɛ̄ŋnda̍ŋ chōo̍. Kɛ̍ mɛ̄lɛ̄ka̍ nɔ̍ dīōla̍ŋ āā, ‘Mi̍ŋgi̍ Ma̍a̍’ wo̍, ō chɛ᷄l māā ō wa̍ yo̍o̍mū le̍.” Kɛ̍ nyɛ̄ o̍ nyɛ̄ yɔ̄nu̍ŋ Pɔ̍ɔ̄ le̍.

⁴

⁵

⁶Wāŋnda̍ wa̍ ko̍ kɔ̍l māā bāa̍ chō ndu̍ hīndɔ̄ɔ̄, kɛ̄lɛ̄ŋgāā māā ō chō dēlɔ̄ɔ̄ lēpīlɛ̍ kpe̍ mī ndu̍ o̍o̍ vi᷅. Kɛ̍ mɛ̄ɛ̍ nda̍ chē mi̍ te̍le̍ŋndo̍ bāndū nyɛ̄ o̍ nyɛ̄ yɔ̄nu̍ŋ ndu̍ le̍, ma̍ dīmī vɛ̄lɛ̄ āā, “Mɛ̄lɛ̄ka̍a̍ ō pūm pōo̍ ho̍ō chō ni̍.”

⁷Wāna̍ wa̍ lɛ̄ŋndē ībūŋgālē lēŋ bōlle̍ŋ ndo̍, dīōla̍ŋ āā, Pɔ̍bi̍līɔ̄ɔ̄. Fo̍ndāŋ ndɔ̄ɔ̍ ve̍ le̍vi̍l a̍ fo̍ndāŋ na̍a̍ ŋ̄ wa̍ wo̍ le̍. Mi̍ lāŋu̍nɔ̄ɔ̍ ho̍ō kūā a̍ na̍a̍ o̍ chīɛ̄ī ndɔ̄ɔ̍. Le̍ pālɛ̍i̍ ī yāa̍ ŋ̄ chō ndu̍ o̍ bɛ̄ŋgu̍ cho̍o̍. Mbo̍ bīī na̍a̍ o̍ kɛ̄ndɛ̄ kɛ̍ndɛ̄.

⁸Mi̍ ī yɔ̄nu᷄ŋ mi̍ pōo̍ ho̍ō fi̍nyā ndɔ̄ de᷅l a̍ nāa̍. Ō wa̍ īhīni̍. Dīāllo̍ŋ wa̍ ndu̍ nɛ̄īyo̍ kpe̍e̍kpe̍i̍. Pūli̍i̍ wɔ̍ɔ̍ŋnde̍ bɛ̍ɛ̍ ndi̍ wa̍ vɛ̄lɛ̄ ndu̍. Mi̍ Pɔ̍ɔ̄ ku̍ā ndu̍ yīlɔ̄ɔ̄. Mɛ̄ɛ̍ Pɔ̍ɔ̄ ku̍ɛ̄, mbo̍ pīɛ̄ī Mɛ̄lɛ̄ka̍. Mbo̍ hāndū ndu̍ bāa̍ chōo̍, mbo̍ sīŋgī ndu̍.

⁹Mɛ̄ɛ̍ he̍ī yɔ̄nu̍ŋ, mi̍ wānāā lānāāwa̍ ā tūa̍a̍ fa̍ū o̍ lɛ̄ŋndē ībūŋgālē le̍ŋ ni᷄ŋ a̍ hu᷅ŋ. Ndu̍yɛ̍, ma̍ sɔ̄lā sīōŋgɔ̄ɔ̍.

¹⁰Mi̍ wāŋnda̍ kē na̍a̍ bɛ̄ɛ̄le̍ŋ ta̍u̍ ta̍u̍. Mɛ̄ɛ̍ na̍a̍ ŋ̄ bɛ̄ɛ̄ndi̍a̍ŋ le̍ kɔ᷄ŋnda̍ŋ, ma̍ kē na̍a̍ nyɛ̄ o̍ nyɛ̄ fe̍e̍ na̍a̍ ŋ̍ ha̍u̍ bā le̍ ndu̍ o̍ kɔ̄lā nāāla̍ŋ ni᷄ŋ o̍ mɛ̄ŋnda̍ŋ chōo̍.

¹¹Mɛ̄ɛ̍ na̍a̍ ŋ̄ chīi̍ pāŋgo̍ŋ ŋ̄ ŋgāa̍ Ma̍a̍tā, mi̍ dɛ̄ndɛ̄ bɛ̍ndū wāā Ālɛ̄kīsa̍ndīlīāā o̍ chu̍ā na̍a̍ lo̍ŋ. Ndu̍ bɛ̍ɛ̍ Ma̍a̍tā lo̍ŋ o̍ lo̍ ni̍ mi̍ bōōndi̍i̍ wɔ̍ɔ̍ŋnde̍ hīāū. Dīōla̍ dɛ̄ndɛ̄ bɛ̍ndōo̍ ho̍ō la̍ wa̍ ni̍ āā, Mɛ̄lɛ̄ka̍ā Pɛ̄ndūa̍a̍.

¹²Mi̍ ŋ̄ fūūlūū Si̍lu̍a̍kūū chi̍e̍e̍. Mi̍ ŋ̄ chūā pālɛ̍i̍ ī yāa̍ lo̍ŋ.

¹³Mɛ̄ɛ̍ dɛ̄ndɛ̄ bɛ̍ndōo̍ chu̍a̍ na̍a̍ lo̍ŋ, mi̍ ŋ̄ fūūlūū Lu̍i̍chīɔ̄m chi̍e̍e̍. Dīi̍māndɔ̄ɔ̍, mi̍ hūēīyīi̍ cha᷅ŋ ba᷅ tōūwo̍ ve̍ kāndū hɔ̄ŋndo̍. Mi̍ ŋ̄ fūūlūū Pūti̍o̍o̍lī chi̍e̍e̍ di̍i̍māndɔ̄ɔ̍ pīlɔ̍ɔ̄.

¹⁴Wānāā lāāla᷄ŋnda̍ ā pūm ā wa̍ Pūti̍o̍o̍lī lo̍ŋ. Ma̍ dīmūl na̍a̍ le̍ mī ŋ̄ chīi̍ lɔ̍ɔ̍ ō pīlɛ̍ na̍a̍ nda̍ā. Chɔ̄nɔ᷄ŋndo̍ lo̍ŋ, mi̍ ŋ̄ fūūlūū Lu̍o̍m chi̍e̍e̍. Mɛ̄ɛ̍ nu̍a̍ā na̍a̍ ŋ̄ lōōku̍ fūūlūū Lu̍o̍m chi̍e̍e̍ ni̍.

¹⁵Mɛ̄ɛ̍ wānāā lāāla᷄ŋnda̍ lo̍ŋ a̍ tu̍e̍ī māā ŋ̄ chō hūnɔ̄ɔ̍, ma̍ hūŋ na̍a̍ lāchī. Mi̍ ā ti᷄ŋ fūūlūū di̍ o̍ lɔ̍ɔ̍ A̍pīɔ̄ɔ̄. Mi̍ ha̍ā chūm o̍ fo̍ndāŋ nda̍ vēēlū āā, Yīya̍lā Yāa̍la̍ŋ ndo̍. Mɛ̄ɛ̍ Pɔ̍ɔ̄ che᷅ pūa̍a̍ ha̍ā, mbo̍ mēl Mɛ̄lɛ̄ka̍ ba̍li̍ka̍. Ndu̍yɛ̍, mi̍ kɔ̄l ndɔ̄ɔ̍ sīmūl.

¹⁶Mɛ̄ɛ̍ na̍a̍ ŋ̄ fūūlu̍u̍ Lu̍o̍m chi̍e̍e̍, māsā bɛ̍ndōo̍ Lu̍o̍m chi̍e̍e̍ ō do̍u̍ Pɔ̍ɔ̄ o̍ chīɛ̄ī mānyūmndo̍ ni᷄ŋ te̍. Mbo̍ māl ndu̍ fo̍ndāŋ le̍ mbo̍ wa̍ a̍ bā ndɔ̄. Kɛ̍, ma̍ yɔ̄ŋgū so̍vɛ̄i̍nɔ̍ɔ̍ ō pīlɛ̍ le̍ ndu̍ wāa̍ lēhɔ̄l.

¹⁷Mɛ̄ɛ̍ pālɛ̍i̍ hīōū ī yāa̍, mi̍ Pɔ̍ɔ̄ ve̍e̍lū wānāā bɛ̄ndūāā Chu̍ūwa̍ lo̍ŋ ma̍ chūūŋgi̍āŋ na̍a̍ pi᷅lɛ̍. Mɛ̄ɛ̍ nda̍ chūūŋgi̍āŋ, mbo̍ dīmūl nda̍ āā, “Chāāŋāā nīāā Chu̍ūwa̍, I̍ to̍sa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ a̍ wānāā nāa̍ le̍, kɛ̄lɛ̄ŋgāā ni᷅ŋ te̍, mī to̍sa̍ sūɛ̍i̍ tɛ̍ɛ̍mbūū nɛ̍i̍ fi̍nyāā nāā ma̍māa̍ ā chɔ᷄m na̍a̍ le̍ wāa̍ lēchōo̍ wo̍. Kɛ̍ o̍ ko̍ŋ kɔ̍ɔ̍lī, mi̍ Chu̍ūwa̍ Chūlu̍sɛ̄lɛ̄m a̍ to̍sā ma̍ bīī ya̍ Chūlu̍sɛ̄lɛ̄m. Ma̍ kūā a̍ ya̍ o̍ wānāā bɛ̄ndūāā Lu̍o̍ma᷅ŋnda̍ lo̍.

¹⁸Mɛ̄ɛ̍ wānāā bɛ̄ndūāā Lu̍o̍ma᷅ŋnda̍ nyūūni̍a̍a̍ ya̍, ma̍ sāālu᷄ŋ māā I̍ to̍sa̍ i̍sɔ̍ɔ̍ o̍ īsɔ̄ɔ̍ wɔ̄ɔ̍ŋ i̍ to̍sā mā dīī ya̍ le̍ ndi̍ le̍. Le̍ he̍ī, nda̍ a̍a̍ hɛ̍na̍ŋ le̍ ya̍ mālɔ̄ɔ̍.

¹⁹Kɛ̍, mi̍ Chu̍ūwa̍ dīmī māā ā ma᷅l la̍ le̍. Le̍la̍ŋ, ya̍ I̍ di̍mi̍ ni̍ māā ā yɔ᷄ŋ su̍ɛ̍i̍ nīi̍ o̍ māsā bɛ̍ndōo̍ lo̍. I̍ hi̍ŋ māhūnāā le̍ mī bi̍ī se̍ī ndā le̍.

²⁰Le̍ sa̍bōo̍ ho̍ō ya̍ ve̍e̍lu̍ nya̍ ni̍ le̍ mī so̍ō nāa̍ nya̍ chūā. Le̍ wāna̍ wāŋnda̍ I̍sɔ̄lūɛ̄ī a̍ cho̍ lēhɔ̄l o̍ nɛ̄ī le̍ ndu̍ wo̍, nda̍ dɔ̄ū ya̍ o̍ yɔ̄lɔ᷄ŋ ni̍.”

²¹Mi̍ Chu̍ūwa̍ ha̍ā mūlī āā, “Kɛ̍, yāu̍la̍ che̍ŋ ndɔ̍ o̍ lɛ̄ŋndē Chūdi̍a̍āle̍ŋ ni᷄ŋ mī lā kōma̍l na̍a̍ a̍ nūm o̍kɔ̄ɔ̄ le̍. Ndu̍yɛ̍ vɛ̄lɛ̄, chāāŋāā nāā Chu̍ūwa̍ a̍ hi᷅ŋ nda̍, ō pīlɛ̍ bɛ̍ɛ̍ di̍mu̍l lɔ̍ na̍a̍ vɛ̄lɛ̄ sūɛ̍i̍ nu̍m ī wɔ̄ɔ̍ŋ te̍.

²²Kɛ̍, ŋ̄ hɛ̄na̍ŋ mā chɔ̍m na̍a̍ nyɛ̄ ŋ̄ yīya̍ŋ a̍ ku̍ndā nyā ko̍ŋ o̍kɔ̄ɔ̄ wo̍. Kāni̍ fo̍ndōle̍, ŋ̄ sīnā māā wāŋnda̍ bā o̍ bā fe̍e̍ a̍ cho̍ dīmīo̍o̍ māā ō cho̍ ku̍ndā kɛ̄ndɛ̄ le̍.”

²³O̍ ko̍ŋ kɔ̍ɔ̍lī, ma̍ hɛ̄lī pāa̍le̍ che᷅le̍ŋ le̍ bɔ̄ŋa᷅ŋndo̍ bīyɔ̄ɔ̍ a̍ Pɔ̍ɔ̄. Mɛ̄ɛ̍ pāa̍le̍ le̍ŋ lē fūūlu̍u̍, ma̍ hūŋ ku̍ndā bɛ̄ndōo̍ nāa̍ Pɔ̍ɔ̄ chu̍a̍. Nda̍ a̍a̍ hi̍o̍ū mɛ̄ɛ̍ nda̍ wa̍ o̍ tāse̍la̍ ndɔ̄ɔ̍ yɛ̍. Kāndɔ᷄ŋndo̍ īdīi̍yo̍ ha̍a̍a̍ mi̍ pāa̍le̍ŋ lē dēl do̍o̍ŋ, Pɔ̍ɔ̄ cho̍ nda̍ tɛ̄ɛ̄sīāllo̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄. Mbo̍ tōfā o̍ yāu̍wo̍ ni᷄ŋ. Mbo̍ tōmbōlā sāwāla̍ Mɛ̄lɛ̄ka̍ ke̍ Mūu̍sē le̍ Chu̍ūwa̍ la̍ŋ kpo̍lo̍to̍to̍, a̍ dīōmndā wānāa̍ su̍a̍ā le̍ Mɛ̄lɛ̄ka̍ wa̍ ā pōōnyīa̍a̍ la̍ŋ le̍ mā lāāla̍ŋ māā nyɛ̄ o̍ wa̍ dīmīo̍o̍ a̍ Chi̍i̍sū o̍kɔ̄ɔ̄ wo̍ chō tōnya̍.

²⁴Mi̍ ā pūm ā lāāla᷄ŋ māā nyɛ̄ o̍ di̍mi̍ wo̍ chō tōnya̍. Kɛ̍ ndu̍yɛ̍, ā ti᷄ŋ ā lāāla̍ŋ te̍.

²⁵O̍ ko̍ŋ, ma̍ kāndū dīōmnda̍ŋ hīŋa᷅ŋndo̍ nda̍ pi̍la̍ tɛ̄ɛ̄ŋ. Ma̍ kāndū fūūlīa̍ŋndo̍. Kɛ̍ lɔ̍ɔ̍ pa̍ nda̍ fūlā, mi̍ Pɔ̍ɔ̄ di̍mī dīōmnda̍ŋ nda᷅ŋ o̍ mɛ̄ɛ̄lu̍la̍ŋ āā, “Tōnya̍ kpe̍e̍kpe̍i̍ Nyi̍nā Mɛ̄lɛ̄ka̍a̍ dīmi̍ nāa̍ fi̍nyāā nyāā ma̍māa̍ chūā ni̍. Mi̍ Nyi̍nā Kāsīo̍o̍ tōsā mi̍ wāna̍ su̍a̍ā le̍ Mɛ̄lɛ̄ka̍ wo̍ Āīsa̍yā di̍mī āā,

²⁶‘Kɔ̍ mā kɔ̍ di̍mūl wāŋnda̍ ha̍ā āā, Lā kēndū lēbōl bɔ̄ɔ̍. Lā bāŋu̍l nīlā nyāla̍ŋ mi̍ lā kīndā hɔ̄ltā nyāla̍ŋ kpi̍ŋ. Le̍la̍ŋ, mɛ̄ɛ̍ o̍ mɛ̄ɛ̍ nya̍ ya᷄ŋ ni᷅la̍ŋ, mī lā ya᷄ŋ lā si̍nā pɛ̍ŋgu̍ le̍. Mɛ̄ɛ̍ o̍ mɛ̄ɛ̍ nya̍ tōfa̍, mī lā tōfa̍, lā chi᷅ le̍. Tē nda̍ a̍a̍ to̍sa̍ le̍nde̍ le̍, ā wa̍ chɔ̄ a̍ hɔ̄ltā ndāla̍ŋ, mī nda̍ a̍a̍ tu̍e̍ī a̍ nīlā ndāla̍ŋ. Nda̍ a̍a̍ si̍nā ni̍ŋ pɛ̄ŋgu̍ a̍ hūlmā nda᷄ŋ. Ndu̍yɛ̍, ā wa̍ mūli᷄ŋ nāa̍ ya̍ Mɛ̍lɛ̄ka̍ chūā mī ya̍ i̍i̍ to̍sa̍ mī nda̍ a̍a̍ se̍ŋgū.’ ”

²⁷

²⁸Mi̍ Pɔ̍ɔ̄ di̍mī āā, “Le̍la̍ŋ, I̍ hɛ̍na̍ŋ nya̍ mī lā sīna̍ pɛ̄ŋgu̍ māā Mɛ̄lɛ̄ka̍ yɔ᷄ŋ yōōŋgōo̍ ho̍ō nāa̍ wānāa̍ cho̍ a̍ Chu̍ū le̍ wa̍ chūā a̍ mɛ̄ɛ̍ o̍ pi̍ŋī wa᷅ŋnda̍ yɛ̍ o̍kɔ̄ɔ̄. Ndu̍yɛ̍, nda̍ chō nīla̍ŋ yāŋɔ̄ɔ̄ o̍ yōōŋgū kālāa̍.” [

²⁹Mɛ̄ɛ̍ Pɔ̍ɔ̄ di̍mi̍ dīōmnda̍ŋ nda᷅ŋ mi̍ Chu̍ūwa̍ fūlā a̍ dīōmnda̍ŋ hīŋa᷅ŋndo̍ ō kālā ka̍lā nda̍ pi̍la̍ tɛ̄ɛ̄ŋ.]

³⁰Le̍ wɔ̄sīla̍ŋ lā tīɔ̍ɔ̍ŋ Pɔ̍ɔ̄ cho̍ Lu̍o̍m chi̍e̍e̍ o̍ chīɛ̄ī ndu̍ pi̍la̍ chu̍a̍ mbo̍ wā pāāwāa̍ wo̍ ni᷄ŋ. Ndu̍yɛ̍, ō wa̍ a̍ kɔ̄l kɛ̄ndɛ̄ a̍ wānā o̍ wānā ndu̍ o̍o̍ hu᷅ŋ nāa̍ ndu̍ chu̍a̍.

³¹Mbo̍ dīmūl wāŋnda̍ kpe̍nde̍ke̍le̍ a̍ māsāle̍ Mɛ̄lɛ̄ka̍le̍ŋ o̍kɔ̄ɔ̄. Mbo̍ pɛ̄ɛ̄kū wāŋnda̍ a̍ Māsānɔ̄ɔ̍ Chi̍i̍sū Ki̍li̍tī o̍kɔ̄ɔ̄. Ndu̍yɛ̍, wānā o̍ wānā ku̍u̍na̍ ndu̍ le̍.