Read Southern Kisi Wa̍lta̍ Wānāa̍ Chi̍i̍sūa̍a̍ 5 Bible Online

Wa̍lta̍ Wānāa̍ Chi̍i̍sūa̍a̍ 5 - Southern Kisi bible

Wa̍lta̍ Wānāa̍ Chi̍i̍sūa̍a̍ 5

¹Kɛ̍ ndu̍yɛ̍, po̍ pi᷅lɛ̍ wa̍ nda̍ tɛ̄ɛ̄ŋ dīōla̍ŋ āā, Ānāna̍a̍yā, la̍a̍ ndɔ̍ dīōla̍ŋ āā, Sāfi̍lūā. Nda̍ bɛ̍ɛ̍ ma̍ pīsī kpe̍le̍ ndāa̍.

²Kɛ̍ mɛ̄ɛ̍ o̍ pi̍si̍, mbo̍ fāŋā ka̍ni̍o̍ŋ ŋ̄ ti᷄ŋ lēchōo̍. Mbo̍ hūŋ a̍ ŋ̄ ti᷄ŋ nāa̍ wānāā Chi̍i̍sū ve᷅m hɔ̄ltē ndɔ̄ wa̍ chūā. La̍a̍ ndɔ̄ ndu̍ o̍o̍ si̍nā a̍ ndi̍ o̍kɔ̄ɔ̄.

³O̍ ko̍ŋ kɔ̍ɔ̍lī, mi̍ Pītɛ̍ nyu̍nā ndu̍ āā, “Ānāna̍a̍yā, vɛ᷅ ma̍ chɛ̄l mi̍ Māsa̍ Nyi̍nāā Wɔ̄ɔ̍ŋnda̍ tūāl nu̍m kɔ̄ɔ̄lī mbo̍ tōsā ma̍ dīmūl Nyi̍nā Kāsīo̍o̍ chōōla̍ŋ? Vɛ᷅ ma̍ fāŋā ka̍ni̍ŋ ŋ̄ pīsi̍ kpe̍lo̍o̍ wo̍ŋ lēchōo̍?

⁴Lɔ̍ɔ̍ pa̍ ŋ̄ pīsī kpe̍le̍ ko̍ŋ nūm ko̍ni̍ nūm o̍o̍ nɔ̍ ndu̍ ni̍. Pīsī ŋ̄ pīsi̍ ndu̍ wo̍ bɛ̍ɛ̍, nūm ko̍ni̍ nūm o̍o̍ nɔ̍ ka̍ni̍ŋ mu̍ŋ ni̍. Kɛ̍, vɛ᷅ ma̍ kɛ̄ɛ̄sīāā o̍ kɔ̄l nūmndo̍ ni᷄ŋ le̍ sūɛ̍i̍ wa̍ā nu̍a̍ā tōsāa̍? Ō cho̍ wa᷅na̍ chi̍e̍e̍ le̍ ŋ̄ dīmu̍l chōōla̍ŋ te̍. Mɛ̄lɛ̄ka̍ ŋ̄ dīmu̍l chōōla̍ŋ ni̍.”

⁵Mɛ̄ɛ̍ Ānāna̍a̍yā tu̍e̍ī sūɛ̍i̍ he̍ī, mbo̍ dēl. Mbo̍ wū. Mi̍ sīōōŋnde̍ bīī wānā o̍ wāna̍ tu̍e̍ī nyɛ̍ yɔ̍nu̍ŋ ndo̍.

⁶Mi̍ chūāā pīāāndūa̍a̍ lūɛ̄ī ma̍ mɔ̄ɔ̄sīāā ndu̍. Ma̍ kɔ̍ chɔ᷅ ndu̍.

⁷Mɛ̄ɛ̍ te̍le̍ŋ ti̍ŋ hīōū, mi̍ la̍a̍ ndɔ̄ hu᷅ŋ nāa̍ Pītɛ̍ wa̍ wa̍. Kɛ̍ ndu̍ o̍o̍ si̍na̍ wɔ̍ nyɛ̍ yɔ̍nu̍ŋ a̍ pɔ̍nɔ̍ ndɔ̄ wo̍ le̍.

⁸Mi̍ Pītɛ̍ nyu̍nā ndu̍ āā, “Kpe̍le̍ nya̍ pīsi̍ nya̍ pɔ̍nɔ̍ nu̍m ndo̍, nyɛ̄ sɔ̄lāā kōŋ kpe̍de̍ cho̍ ho̍ō ni̍?” Mbo̍ chɛ̄l āā, “M̍m̄, kpe̍de̍ cho̍ ko̍ŋ ni̍.”

⁹Mi̍ Pītɛ̍ nyu̍nā ndu̍ āā, “Vɛ᷅ nūm ni̍, pɔ̍nɔ̍ nu̍m ni̍, mi̍ lā chɛ̄la᷅ŋ le̍ Nyi̍na̍ Māsānɔ̄ɔ̍ Mɛ̄lɛ̄ka̍a̍ tɔ̄ɔ̄nda᷄ŋndo̍?” Mbo̍ dīmūl ndu̍ āā, “Pūa̍a̍ chɔ̍ pɔ̍nɔ̍ nu̍m nda̍ ā lāŋga̍ hu᷅ŋ. Ā chō o̍ dīō. Ndu̍yɛ̍, nūm bɛ̍ɛ̍ ā chō lākɔ̄ a̍ nūm.”

¹⁰O̍ lē pīlɛ̍ ni᷄ŋ kpe̍ mbo̍ dēl lɛ̄ŋ ndu̍ o̍ hɔ̄l. Mbo̍ wū. Mɛ̄ɛ̍ pūa̍a̍ lūɛ̄ī, ma̍ chā māā ō vī. Ndu̍ bɛ̍ɛ̍ ma̍ chūā ndu̍. Ma̍ kɔ̍ chɔ᷅ ndu̍ pɔ̍nɔ̍ ndɔ̍ īkɛ̄i̍.

¹¹Mi̍ sīōōŋīī bɛ̄ndūe̍i̍ bīī ku̍ndā wānāā lāāla᷄ŋnda̍ kpe̍de̍ a̍ wānā o̍ wāna̍ tu̍e̍ī nyɛ̍ yɔ̍nu̍ŋ ndo̍.

¹²Mi̍ wānāā Chi̍i̍sū ve᷅m hɔ̄ltē ndɔ̄ wa̍ ā tōsā wa̍lta̍ kɔ̄ndɔ̄fi̍lta̍ŋ, a̍ ka̍a̍ma̍āla̍ŋ ta̍u̍ wa᷅ŋnda̍ tɛ̄ɛ̄ŋ. O̍ tōŋgo̍ nda̍ a̍a̍ ve̍e̍lū āā, Tōŋgo̍ Sɔ̍lɔ̍mɔ̄ŋndo̍ wo̍ lo̍ŋ wānāā lāāla᷄ŋnda̍ kpe̍de̍ nda̍ a̍a̍ chu̍ūŋgi̍āŋ ni̍.

¹³Wānā o̍ wāna̍ ndu̍ o̍o̍ ve̍ wa̍nā la̍a̍la᷄ŋ kpe̍e̍kpe̍i̍ le̍, ndu̍ o̍o̍ chɛ᷅l mī ndu̍ o̍o̍ lu̍ɛ̍ī nda̍ tɛ̄ɛ̄ŋ te̍. Kɛ̍, wāŋnda̍ kpe̍de̍ a̍a̍ di̍mī sɔ̍ɔ̍ŋ kɛ̍ndɔ᷄ŋ ta̍u̍ a̍ nda̍ o̍kɔ̄ɔ̄.

¹⁴O̍ ko̍ŋ kɔ̍ɔ̍lī, mi̍ wāŋ pīāāndūa̍a̍, a̍ wāŋ lāāndūa̍a̍ chɔ̄ɔ̄lū lāāla᷄ŋ a̍ Māsānɔ̄ɔ̍ Mɛ̄lɛ̄ka̍. Ma̍ dēl o̍ ku̍ndā wānāā lāāla᷄ŋnda̍ chōo̍.

¹⁵Le̍ kɔ̄ndɔ̄fi̍ltā wānāā Chi̍i̍sū ve᷅m hɔ̄ltē ndɔ̄ wa̍ ā wa̍ tōsāa̍ la̍ŋ, mi̍ wāŋnda̍ hūŋ a̍ wānāā lānāāwa̍ ma̍ yɛ̄ɛ̄mbūū nda̍ o̍ nɛ̄īla̍ŋ o̍ kpēlēla̍ŋ chōo̍, ā pūm o̍ wāla̍la̍ŋ chōo̍ le̍ mī wūndu̍le̍ Pītɛ̍le̍ŋ, lē pīla̍ŋ bɛ̍ɛ̍ a̍ ti̍ŋ lɔ̍ɔ̍ o̍ wa᷅ hi̍o̍u̍wɔ̄ɔ̍ wo̍.

¹⁶Mi̍ wāŋnda̍ fūlā ta̍u̍ ta̍u̍ o̍ chi̍e̍e̍ŋ ba̍lu̍ Chūlu̍sɛ̄lɛ̄m ndo̍ŋ. Ma̍ hūŋ a̍ wānāā lānāā ndāa̍ a̍ wānāā nyi̍nāā wɔ̄ɔ̍ŋnda̍ wa̍ kɔ̄ɔ̄lī wa̍. Nda̍ kpe̍de̍ ma̍ sīāŋgū.

¹⁷Mi̍ māsa̍ wānāā sōlīāā lāsa̍lāa̍, nda̍ wānāa̍ wa̍ ndu̍ kɔ̄ɔ̄lī wa̍, a̍ wa̍ o̍ ku̍ndā Sādūsi̍īya̍ chōo̍ wa̍, ma̍ chūā nɛ̄īyɔ᷄ŋ wānāā Chi̍i̍sū ve᷅m hɔ̄ltē ndɔ̄ wa̍. Ma̍ kɛ̄ɛ̄sīāā le̍ īsɔ̄ɔ̍ to̍sā a̍ ndi̍ o̍kɔ̄ɔ̄.

¹⁸Ma̍ bīī wānāā Chi̍i̍sū ve᷅m hɔ̄ltē ndɔ̄ wa̍. Ma̍ dūāū nda̍ o̍ chīɛ̄ī mānyūmndo̍ ni᷄ŋ wa᷅ŋnda̍ o̍ hɔ̄l.

¹⁹Kɛ̍, nyūmmā māŋ mi̍ ki̍i̍la̍nɔ̍ Māsānɔ̄ɔ̍ Mɛ̄lɛ̄ka̍a̍ kūmbī dīōla̍ŋ o̍ chīɛ̄ī mānyūmndo̍. Mbo̍ sōlī nda̍. Mbo̍ dīmūl nda̍ āā,

²⁰“Lā kɔ̍ si᷅m o̍ bɛ̍ɛ̄ chīɛ̍i̍ Mɛ̄lɛ̄ka̍a̍, mī lā kɔ̍ di̍mūl wāŋnda̍ nyɛ̄ o̍ nyɛ̄ cho̍ a̍ yōōmū sɛ̄nɛ̄īyo̍ ho̍ō o̍kɔ̄ɔ̄.”

²¹Mi̍ wānāā Chi̍i̍sū ve᷅m hɔ̄ltē ndɔ̄ wa̍ tōsā nyɛ̄ ki̍i̍la̍nɔ̍ Mɛ̄lɛ̄ka̍a̍ dīmi̍ wo̍. Ma̍ kɔ̍ lu̍ɛ̍ī o̍ bɛ̍ɛ̄ chīɛ̍i̍ Mɛ̄lɛ̄ka̍a̍ a̍ pāa̍le̍ si̍a̍āle̍ŋ. Ma̍ kāndū wāŋnda̍ pɛ̄ɛ̄kōo̍. Mi̍ māsa̍ wānāā sōlīāā lāsa̍lāa̍, nda̍ wānāa̍ wa̍ ndu̍ kɔ̄ɔ̄lī wa̍ vēēlū lāŋgba̍ā kālāa̍ ki̍a̍lū ya᷅ma̍ŋnda̍ fa̍ū. Ma̍ bīī bɔ̄ŋa᷅ŋ bɛ̄ndōo̍. O̍ ko̍ŋ kɔ̍ɔ̍lī, ma̍ vīām wāŋnda̍ o̍ chīɛ̄ī mānyūmndo̍ le̍ mā kɔ̍ hu᷅ŋ a̍ wānāā Chi̍i̍sū ve᷅m hɔ̄ltē ndɔ̄ wa̍.

²²Kɛ̍, mɛ̄ɛ̍ so̍vɛ̄i̍ya̍ fūūlu̍u̍, ā kōma̍l nda̍ o̍ chīɛ̄ī mānyūmndo̍ ni᷄ŋ te̍. Ma̍ mīīŋgū. Ma̍ kɔ̍ do̍u̍nu᷄ŋ wa̍nāā bɛ̄ndūa̍a̍ ko̍na̍ āā,

²³“Mɛ̄ɛ̍ na̍a̍ ŋ̄ fūūlu̍u̍ o̍ chīɛ̄ī mānyūmndo̍, mi̍ ŋ̄ sāālu᷄ŋ di̍ōla̍ŋ kpe̍de̍ la̍ be̍ŋīāā kpa̍ŋ kpa̍ŋ. So̍vɛ̄i̍ya̍ wā mɛ̄ŋgɛ̄lāa̍ o̍ dīōla̍ŋ kpe̍de̍. Kɛ̍ mɛ̄ɛ̍ na̍a̍ ŋ̄ kūmbi̍ dīōla̍ŋ, ŋ̄ sēēlu̍ŋ wa᷅nā o̍ wānā le̍ni̍ŋ te̍.”

²⁴Wānāa̍ ma̍ndā chīɛ̍i̍ Mɛ̄lɛ̄ka̍a̍ wa̍, bōllē ndāle̍ŋ ni̍, a̍ wānāā bɛ̄ndūa̍a̍ le̍ wānāā sōlīāā lāsa̍lāa̍, mɛ̄ɛ̍ nda̍ tūēī nyɛ̍ yɔ̍nu̍ŋ ndo̍, ma̍ dīmī āā, “I̍ māā vɛ̄ɛ̍nɛ̍ cho̍ yɛ̄ he̍ī?”

²⁵Mi̍ wānā pi᷅lɛ̍ lūɛ̄ī nāa̍ wānāā bɛ̄ndūa̍a̍ ha̍ā ā wa̍ wa̍. Mbo̍ dīmūl nda̍ āā, “Pūa̍a̍ nya̍ dɔ̄ū o̍ chīɛ̄ī mānyūmndo̍ ni᷄ŋ nda̍, ā chō wāŋnda̍ pɛ̄ɛ̄kōo̍ o̍ bɛ̍ɛ̄ chīɛ̍i̍ Mɛ̄lɛ̄ka̍a̍, mɛ̄ɛ̍ na̍a̍ ŋ̄ sūāā nu̍a̍ā yɛ̍.”

²⁶Mi̍ wānā bɛ̍ndu̍ wa̍ ko̍ŋ po̍li̍si̍i̍ya̍ ha̍ā bōlle̍ŋ ndo̍, ō chūā pōli̍sīi̍yāā ndūa̍a̍ ma̍ kɔ̍ hu᷅ŋ a̍ wānāā Chi̍i̍sū vēm hɔ̄ltē ndɔ̄ wa̍. Kɛ̍ ā yɔ᷄ŋ nda̍ nyɛ̄ o̍ nyɛ̄ le̍, kāni̍ fo̍ndōle̍, ā wa̍ sīōōŋnde̍ le̍ wāŋnda̍, yɔ̍ŋi̍ nda̍ vīi̍ nda̍ a̍ pōūta̍ŋ.

²⁷Ma̍ lūɛ̄ī a̍ wānāā Chi̍i̍sū ve᷅m hɔ̄ltē ndɔ̄ a̍. Ma̍ sīmī nda̍ lāŋgba̍ā kālāa̍ ki̍a̍lū ya᷅ma᷅ŋ nda̍ lāchi̍. Mi̍ māsa̍ wānāā sōlīāā lāsa̍lāa̍ nyūnā nda̍ āā,

²⁸“Ŋ̄ dōu̍ nya̍ sāwāa̍ ō kālā ka̍lā māā lā pɛ̍ɛ̍kū lɛ̄ wāŋndā sɔ̄ɔ̍ŋ Chi̍i̍sū wa̍ pɛ̄ɛ̄kōo̍ wo̍ŋ te̍ le̍? Kɛ̍, lā tōfa̍ nyɛ᷅ nya̍ tōsa̍ wo̍. Lā tōsa̍ mi̍ wāŋnda̍ kpo̍u̍ Chūlu̍sɛ̄lɛ̄m a̍ tu̍ɛ̍ī a̍ pɛ̄ɛ̄ku̍ nyāa̍ ho̍ō o̍kɔ̄ɔ̄. Ndu̍yɛ̍, lā hɛ̄na̍ŋ mī lā hēēlu̍ na̍a̍ pīɔ̍m ndɔ̄ɔ̍ o̍ lēbōl.”

²⁹Mi̍ Pītɛ̍ a̍ wānāā Chi̍i̍sū ve᷅m hɔ̄ltē ndɔ̄ wa̍ ā pīli̍a̍ā mūlūl nda̍ āā, “Nyɛ̄ Mɛ̄lɛ̄ka̍ dīmūl na̍a̍ wo̍, ndu̍ na̍a̍ ŋ̄ nɔ̄ ni̍ mī ŋ̄ tōsa̍, ō cho̍ nyɛ᷅ wāŋndā chīe̍e̍ya̍ dīmī wo̍ le̍.

³⁰Mɛ̄ɛ̍ nya̍ ba᷄ŋ Chi̍i̍su̍ o̍ yɔ̄m sīŋgāfīlāa̍ chōo̍, mi̍ lā dīī ndu̍. Kɛ̍ ndu̍yɛ̍, mi̍ Mɛ̄lɛ̄ka̍ fi̍nyāā nāā ma̍māa̍ nda̍ a̍a̍ pi̍ɛ̍ī yo̍ mīŋgī ndu̍ yōōmū.

³¹O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ kē ndu̍ nāa̍ si̍māā bɛ̄ndūa̍a̍ ndu̍ pi̍la̍ īkɛ̄i̍. Mbo̍ sīīŋgūū ndu̍ Māsāa̍. Mbo̍ sīīŋgūū ndu̍ vɛ̄lɛ̄ Wānā Pi̍ŋīa̍a̍ le̍ mī wāŋnda̍ I̍sɔ̄lūɛ̄ī a̍ sɔ̄la̍ nɛ̄i̍ nda̍ māl yɔ᷅ŋndā ndāla̍ wɔ̍ɔ̍ŋnda̍ŋ ndo̍ le̍ mī Mɛ̄lɛ̄ka̍ ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ.

³²Na̍a̍ ni̍, a̍ Nyi̍na̍ Kāsīo̍o̍ ō Mɛ̄lɛ̄ka̍ kē wa̍nāa̍ tu̍ɛ̍ī ndu̍ dīōm nda̍, ŋ̄ chō se̍īya̍ a̍ nyɛ̍ yɔ̍nu̍ŋ ndo̍.”

³³Mɛ̄ɛ̍ wānāā bɛ̄ndūa̍a̍ tūēī dīōmnda̍ŋ nda᷅ŋ, ma̍ tūūlū kɔ̄l. Ma̍ yēēmā le̍ nda̍ dīyɔ̄ɔ̍.

³⁴Kɛ̍, wānā pi᷅lɛ̍ wa̍ lāŋgba̍ā kālāa̍ ki̍a̍lū ya᷅ma̍ŋ nda̍ tɛ̄ɛ̄ŋ dīōla̍ŋ āā, Kāme̍līāl. O̍ ku̍ndā Fālīsi̍īya̍ chōo̍ ndu̍ o̍o̍ fu̍la̍ ni̍. Ndu̍yɛ̍, wāna̍ pɛ̍ɛ̍kū wa᷅ŋnda̍ sāwāla̍ Mɛ̄lɛ̄ka̍la̍ŋ ndo̍ o̍ wa̍ ni̍. Wāŋnda̍ kpe̍de̍ nda̍ a̍a̍ nɔ̍ bɛ̄ɛ̄le̍ŋ le̍ ndu̍. Mbo̍ sīm mbo̍ dīmī māā ā fūla̍ a̍ wānāā Chi̍i̍sū ve᷅m hɔ̄ltē ndɔ̄ wa̍ o̍ bɛ̍ɛ̄.

³⁵Mbo̍ dīmūl lāŋgba̍ā kālla̍ āā, “Chāa̍ŋāā nīāā Chu̍ūwa̍, lā mānda̍ŋ a̍ nyɛ̄ nya̍ hɛ̄na̍ŋ le̍ tōsāa̍ a̍ pūa̍a̍ ha̍ā wo̍.

³⁶Wɔ̄sīlā ti᷄ŋ ko̍ni̍ la̍ hi̍o̍ū wɔ̄ ni̍, mi̍ po̍ pi᷅lɛ̍ dīōla̍ŋ āā, Ti̍o̍o̍dɔ̄ɔ̄, mbo̍ si̍i̍ŋgūū ndu̍ pi̍la̍ wānā bɛ̍ndū. Mi̍ wāŋnda̍ kɛ̄mɔ̄ɔ̍ lē hīɔ̍ɔ̍lu̍ a̍ tu̍āl ndu̍ kɔ̄ɔ̄lī. Kɛ̍ o̍ ko̍ŋ kɔ̍ɔ̍lī, ma̍ dīī ndu̍. Dīyɔ̄ɔ̍ ndu̍, mi̍ wānāa̍ wa̍ ndu̍ kɔ̄ɔ̄lī wa̍ ā sāŋnu᷄ŋ. Mi̍ sūɛ̍i̍ ke̍ŋ tāmbū.

³⁷O̍ ndu̍ kɔ̍ɔ̍lī, a̍ te̍le̍ŋ nda̍ wa̍ wāŋnda̍ chɔ̄mndo̍ wo̍, mi̍ po̍ pi᷅lɛ̍ dīōla̍ŋ āā, Chu̍dā, ō ndu̍ o̍o̍ fu̍la̍ o̍ būŋgɛ̄ī Kāli̍līve̍ ni᷄ŋ ndo̍, mbo̍ chūā wāŋnda̍ le̍ ndu̍ tōlɔ̄ɔ̍ kɔ̄ɔ̄lī. Ndu̍ bɛ̄ɛ̄, ma̍ dīī ndu̍. Mi̍ wānāa̍ wa̍ ndu̍ kɔ̄ɔ̄lī wa̍ sāŋnu᷄ŋ.

³⁸Le̍la̍ŋ, I̍ cho̍ nya̍ sīlā o̍ sūɛ̍i̍ he̍ī ni᷄ŋ. Lā ma᷄l pu̍a̍a̍ ha̍ā o̍ bā ndāa̍ chōo̍. Lā ma᷄l nda̍ ā kɔ̄nu̍ŋ. Kāni̍ fo̍ndōle̍, tē ō wa̍ wāna̍ chi̍e̍e̍ pɛ̍ si̍i̍ kɛ̍ɛ̍si̍a̍a̍ sɔ̄ɔ̍ŋ mu᷅ŋ a̍ wa̍lta̍ŋ nda᷅ŋ ni̍, mɛ̄ɛ̍ ā chō dēmā.

³⁹Kɛ̍, tē ō wa̍ pɛ̍ Mɛ̄lɛ̄ka̍ kɛ̍ɛ̍si̍a̍a̍ wa̍lta̍ nda̍ chō la᷅ŋ nda̍ŋ ni̍, mɛ̄ɛ̍ lā nɔ̍lā nda̍ kpāā le̍. Ndu̍yɛ̍ o̍ ko̍ŋ kɔ̍ɔ̍lī, nya̍ pi̍la̍ chō sīmnɔ᷄ŋ wa̍nāā sɔ̄ŋgāā a̍ Mɛ̄lɛ̄ka̍.” Ma̍ yāŋ nyɛ̄ Kāme̍līāl di̍mi̍ wo̍ nīla̍ŋ.

⁴⁰O̍ ko̍ŋ kɔ̍ɔ̍lī, ma̍ ve̍e̍lū wānāā Chi̍i̍sū ve᷅m hɔ̄ltē ndɔ̄ wa̍. Ma̍ lūɛ̄ī. Mɛ̄ɛ̍ nda̍ lūɛ̄ī, mi̍ wānāā bɛ̄ndūa̍a̍ tōsā ma̍ lūāā nda̍. O̍ ko̍ŋ kɔ̍ɔ̍lī, ma̍ sīlā nda̍ māā ā di̍mūl lɛ̄ wāŋnda̍ a̍ dīōla̍ Chi̍i̍sūla̍ŋ o̍kɔ̄ɔ̄ le̍. Ma̍ māl nda̍. Ma̍ kūānu᷄ŋ.

⁴¹Mi̍ wānāā Chi̍i̍sū ve᷅m hɔ̄ltē ndɔ̄ wa̍ māl fo̍ndāŋ lāŋgba̍ā kālla̍ wa̍ wo̍, a̍ kɔ̄l kɛ̍ndɛ̄ kāni̍ fo̍ndōle̍, le̍ mɛ̄ɛ̍ Mɛ̄lɛ̄ka̍ chu̍a̍ nda̍ māā ā bɛ̄nda̍ le̍ mā sɔ̄la̍ nyɛ̄ pālāa̍ le̍ Chi̍i̍sū yɛ̍.

⁴²Ma̍ hīāū lāchī a̍ bālɔ̄ɔ̍ o̍ chīɛ̄īla̍ŋ a̍ o̍ bɛ̍ɛ̄ chīɛ̍i̍ Mɛ̄lɛ̄ka̍a̍, lēpāa̍ o̍ lēpāa̍ a̍ wāŋnda̍ pɛ̄ɛ̄kōo̍ a̍ nda̍ yōōŋgū kɛ̄ndɔ̄ɔ̍ chɔ̄mndo̍ māā Chi̍i̍su̍ ndu̍ cho̍ Ki̍li̍tī, wāna̍ Mɛ̄lɛ̄ka̍ chu̍a̍ būŋgɛ̄i̍ māā ō chō vīōmɔ̄ɔ̄ le̍ wāŋnda̍ pīŋīo̍o̍ wo̍ ni̍.