Read Southern Kisi Lu̍o̍māŋnda̍ 10 Bible Online

Lu̍o̍māŋnda̍ 10 - Southern Kisi bible

Lu̍o̍māŋnda̍ 10

¹Chāāŋāā nīāā wa̍nāā lāāla᷄ŋnda̍, nyɛ̄ ya̍ I̍ la̍ndu̍ŋ kɔ̍l o̍ ndu̍ kpe̍e̍kpe̍i̍ yo̍ cho̍ ni̍ māā wānāā nīa̍a̍, nda̍ yɔ̍nūŋ māā Chu̍ūwa̍ ni̍, māā ā sɔ̄la̍ ko̍ pi̍o̍ŋɔ̄ɔ̍. Ndu̍yɛ̍ pīɛ̄īlē nīle̍ŋ o̍ Mɛ̄lɛ̄ka̍ lo̍ le̍ cho̍ le᷅ŋ le̍ nda̍ ni̍.

²Tē ō wa̍ māā lēse̍ī pɛ̍, I̍ nɔ̍lā mī tɛ̍nda̍ se̍īle̍ŋ a̍ nda̍ o̍kɔ̄ɔ̄ māā ā nɔ̄ yēēmɛ̍i̍ ta̍u̍ le̍ Mɛ̄lɛ̄ka̍. Kɛ̍ ō cho̍ ma̍chu̍a̍ā mī yēēmɛ̍i̍ nda̍ nɔ̄ ve̍ ī wa̍ yēēmɛ̍i̍ cho̍ o̍ nɛ̄i̍ tōnya̍ chōo̍ le̍.

³Ā nɔ̍ si̍nā pɛ̄ŋgu̍ a̍ mɛ̄ɛ̍ Mɛ̄lɛ̄ka̍ ndu̍ si̍i̍ŋgūū wa᷅ŋndo̍ wānā sa̍kpō ndu̍ pi̍la̍ o̍ hɔ̄l lɛ̍ le̍. Ā bīī ma̍ wā kīndīo̍o̍ le̍ nɛ̄ī nda̍ chēle̍ŋ nūūvīa̍a̍ le̍ mā sīīŋgu̍u̍ nda̍ pi̍la̍ wānāā sa̍kpō Mɛ̄lɛ̄ka̍ o̍ hɔ̄l. Le̍ he̍ī ma̍ kɛ̄ɛ̄ nɛ̄i̍ Mɛ̄lɛ̄ka̍ ndu̍ si̍i̍ŋgūū wa᷅ŋnda̍ wānāā sa̍kpō ndu̍ pi̍la̍ o̍ hɔ̄l lo̍.

⁴Ndu̍yɛ̍ Ki̍li̍tī to̍sa̍ mi̍ sāwāla̍ Mɛ̄lɛ̄ka̍ ke̍ Mūu̍sē la̍ŋ lā mɛ̄ɛ̄lū. Mɛ̄ɛ̍ o̍ he̍ī ni᷄ŋ, māā wānā o̍ wāna̍ dɔ̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ pɛ̍, Mɛ̄lɛ̄ka̍ tōsa̍ wānā ko̍ŋ ō sīmnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l.

⁵Mi̍ Mūu̍sē po̍o̍nyīāā a̍ sāwāla̍ŋ nda᷅ŋ o̍kɔ̄ɔ̄ a̍ mɛ̄ɛ̍ wāŋndo̍ lōōkū si̍mnɔ᷄ŋ wa̍nā sa̍kpō Mɛ̄lɛ̄ka̍ o̍ hɔ̄l o̍ la̍ŋ chūa̍a̍ ni᷄ŋ yɛ̍. Nyɛ̄ o̍ po̍o̍nyi̍a̍a̍ wo̍ cho̍ ho̍ō ni̍ āā, “Tē wāŋndo̍ ō tōsa̍ nyɛ̄ sāwāla̍ŋ lā dīmi̍ wo̍ pɛ̍, sāwāla̍ŋ lā tōsa̍ ō sɔ̄la̍ yōōmū kpe̍e̍kpe̍i̍yo̍.”

⁶Kɛ̍ ndu̍yɛ̍ nyɛ̍ di̍mi̍ŋ a̍ Mɛ̄lɛ̄ka̍ tīīnda᷄ŋndo̍ le̍ sīmnɔ᷄ŋndo̍ wānā sa̍kpō Mɛ̄lɛ̄ka̍ o̍ hɔ̄l lo̍ ndu̍ cho̍ ni̍ āā, “Di̍mī nu̍a̍ā o̍ kɔ̄l nūmndo̍ ni᷄ŋ āā, ‘Ō nɛ̄ɛ̍nɛ̍ he᷅l lɛ̍ ni̍ŋ ɛ̄chɛ̍nɛ̄ le̍?’ ” Dīmīo̍o̍ cho̍ ko̍ŋ ni̍ āā, “Nɛ̄ɛ̍nɛ̍ ku̍ā yɛ̍ ni̍ŋ o̍ ɛ̄chɛ̍nɛ̄ mbō kɔ̍ di̍mūl Ki̍li̍tī mbō tōl chi̍e̍ēŋ na̍ŋ.”

⁷“Ndu̍yɛ̍, di̍mī bɛ̍ɛ̍ nu̍a̍ā āā, ‘Ō nɛ̄ɛ̍nɛ̍ ku̍ā yɛ̍ ni̍ŋ chi̍e̍e̍ pīɔ̍m te̍?’ ” Dīmīo̍o̍ cho̍ ko̍ŋ ni̍ āā, “Ō nɛ̄ɛ̍nɛ̍ ku̍ā yɛ̍ ni̍ŋ chi̍e̍e̍ pīɔ̍m mbō kɔ̍ mi̍ŋgī Ki̍li̍ti̍ yōōmū?”

⁸Nyɛ̍ di̍mi̍ŋ ndo̍ cho̍ ho̍ō ni̍ āā, “Yōōŋgu̍ Mɛ̄lɛ̄ka̍a̍ chō nya̍ īkɛ̄i̍ kpɛ̍ɛ̍lūŋ bɛ̄ndū. Lā chō wāŋnda̍ dīmu̍llo̍ a̍ ndu̍ o̍kɔ̄ɔ̄. Ndu̍yɛ̍ ō chō nya̍ o̍ lākɔ̄l.” Ndu̍ yɔ̍nūŋ ni̍ māā yōōŋgū na̍a̍ ŋ̄ chō ho̍ō wāŋnda̍ dīmūllo̍ māā ā dɔ̄u̍ ti̍i̍nda᷄ŋndo̍ o̍ Mɛ̄lɛ̄ka̍ ni᷄ŋ ndo̍.

⁹Ndu̍yɛ̍ tē lā chɔ̄ɔ̄mu̍u̍ wāŋnda̍ o̍ hɔ̄l pɛ̍, māā Chi̍i̍sū ndu̍ cho̍ Māsānɔ̄ɔ̍ ni̍, ndu̍yɛ̍ mī lā lāāla̍ŋ o̍ kɔ̄ltā nyāla̍ŋ ni᷄ŋ pɛ̍, māā mɛ̄ɛ̍ Chi̍i̍sū vi᷅ mi̍ Mɛ̄lɛ̄ka̍ mīŋgī ndu̍ yōōmū, mɛ̄ɛ̍ Mɛ̄lɛ̄ka̍ pīŋi̍ nya̍.

¹⁰Kāni̍ fo̍ndōle̍, lāāla᷄ŋndo̍ nɔ̄ɔ̍ o̍ kɔ̄llo̍ ni᷄ŋ ndu̍ hu᷅ŋ a̍ Mɛ̄lɛ̄ka̍ nya̍ sīīŋgūūwo̍ wānāā sa̍kpō ndu̍ pi̍la̍ o̍ hɔ̄l ni̍. Ndu̍yɛ̍, chɔ̄ɔ̄mūūwo̍ wāŋnda̍ o̍ hɔ̄l māā Chi̍i̍su̍ cho̍ Māsānɔ̄ɔ̍ ni̍, ndu̍ hu᷅ŋ a̍ Mɛ̄lɛ̄ka̍ nya̍ pīŋīo̍o̍ ni̍.

¹¹Mi̍ Yāu̍ Mɛ̄lɛ̄ka̍a̍ dīmī āā, “Wānā o̍ wāna̍ dɔ̍ū tīīnda᷄ŋndo̍ o̍ wāŋndo̍ ho̍ō ni᷄ŋ pɛ̍, ō tu̍lnūŋ la̍si̍ɔ̍mbu̍ le̍.”

¹²Nyɛ̍ di̍mi̍ŋ ko̍ŋ āā, “wānā o̍ wānā” wo̍ ō chɔ᷄m māā yɛ̍ yɛ̍ bɛ̍ɛ̍ cho̍ wa᷅ŋndā chīe̍e̍ya̍ tɛ̄ɛ̄ŋ te̍, wānā wa̍ Chu̍ūnɔ̄, wa᷅ Chu̍ūnɔ̄ le̍. Ndu̍yɛ̍, Māsānɔ̄ɔ̍ Mɛ̄lɛ̄ka̍ pīlɔ̍ɔ̍ ho̍ō ndu̍ ko̍ cho̍ Māsānɔ̄ɔ̍ le̍ wāŋnda̍ kpo̍u̍ ni̍. Ndu̍yɛ̍ wānā o̍ wāna̍ ve̍e̍lū ndu̍ o̍ pīɛ̄īle̍ŋ ni᷄ŋ, mbō dɔ̄ū nda̍ sa̍lā ta̍u̍ ta̍u̍.

¹³Mi̍ Yāu̍ Mɛ̄lɛ̄ka̍a̍ dīmī āā, “Wānā o̍ wāna̍ ve̍e̍lu̍ Māsānɔ̄ɔ̍ Mɛ̄lɛ̄ka̍ o̍ pīɛ̄īle̍ŋ ni᷄ŋ pɛ̍, ō pīŋi̍ ndu̍.”

¹⁴Kɛ̍ ndu̍yɛ̍ tē wāŋnda̍ nɔ̍ ti̍i̍nda᷄ŋndo̍ o̍ Mɛ̄lɛ̄ka̍ ni᷄ŋ te̍, ā nɔ̍lā mā vēēlu̍ ndu̍ o̍ pīɛ̄īle̍ŋ ni᷄ŋ te̍. Ndu̍yɛ̍ tē wāŋnda̍ tūi̍i̍ yo̍o̍ŋgōo̍ a̍ ndu̍ o̍kɔ̄ɔ̄ le̍, ā do̍ū ti̍i̍nda᷄ŋndo̍ o̍ ndu̍ ni̍ŋ te̍. Ndu̍yɛ̍ tē wānā ve̍ le̍ nda̍ yōōŋgōo̍ dīmūl a̍ ndu̍ o̍kɔ̄ɔ̄ le̍, ā tu̍i̍ī a̍ ndu̍ o̍kɔ̄ɔ̄ le̍.

¹⁵Ndu̍yɛ̍ tē wāŋnda̍ sɔ̄la̍ vi̍o̍mɔ̄ɔ̄ le̍ kɔ̄la̍ŋ a̍ yōōŋgū ndɔ̄ɔ̍ le̍, ā tu̍i̍ī yo̍o̍ŋgū kālāa̍ le̍. Mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍ āā, “Ō chō sūɛ̍i̍ kɛ̍ndɛ̄ī bɛ̄ndū māā wānāa̍ di̍mī yo̍o̍ŋgū kɛ̄ndɔ̄ɔ̍ wa̍ chō hūnɔ̄ɔ̍.”

¹⁶Kɛ̍ ndu̍yɛ̍ ō cho̍ wa᷅ŋnda̍ kpo̍u̍ le̍ a̍ chɛ̍l Yōōŋgū Kɛ̄ndɛ̍ Mɛ̄lɛ̄ka̍a̍ le̍. Kāni̍ fo̍ndōle̍, mi̍ Āīsa̍yā di̍mī āā, “Māsānɔ̄ɔ̍ Mɛ̄lɛ̄ka̍, ō nɛ̄ɛ̍nɛ̍ la̍a̍la̍ŋ yɛ̍ a̍ yōōŋgū na̍a̍ ŋ̄ dīmu̍l nda̍ wo̍?”

¹⁷Le̍la̍ŋ yōōŋgu̍ Mɛ̄lɛ̄ka̍a̍ tūēīyɔ̄ɔ̍ ndu̍ hu᷅ŋ a̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ ni̍. Ndu̍yɛ̍ tē ā dīmu̍l wāŋnda̍ a̍ Ki̍li̍tī o̍kɔ̄ɔ̄ pɛ̍, ā tūēī yōōŋgōo̍ ho̍ō.

¹⁸Kɛ̍ ndu̍yɛ̍ I̍ nyu̍nā wɔ̍ nya̍. Bāā wāŋnda̍ ā tūi̍i̍ ma̍tu̍i̍yāā yōōŋgōo̍ ho̍ō le̍? Ā tūēī tūēīyɔ̄ɔ̄ kālāa̍ kpe̍e̍kpe̍i̍. Mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍ āā, “Wāŋnda̍ bā o̍ bā fe̍e̍ o̍ chi̍e̍ēŋndo̍ chōo̍ ā tūēī dīōmndā ndāla̍ŋ. Dīōmndā ndāla̍ŋ lā fūūlu̍u̍ di̍ o̍ chi̍e̍ēŋndo̍ mɛ̄ɛ̄lu̍la̍ŋ.”

¹⁹I̍ nyu̍nā wɔ̍ vɛ̄lɛ̄ nya̍. Bāā wāŋnda̍ I̍sɔ̄lūɛ̄ī ā sīna̍ māsi̍nāā yōōŋgū kālāa̍ pɛ̄ŋgu̍ le̍? Ā sīna̍ ndu̍ pɛ̄ŋgu̍. Kāni̍ fo̍ndōle̍, Mūu̍sē fɛ̍lɛ̍ŋ so̍ō a̍ ndi̍ o̍kɔ̄ɔ̄ pe̍kēkē. Mbo̍ dīmī āā, “I̍ cho̍ tōsā mī lā pāŋa̍la̍ wānāā nya̍ chu̍a̍ ha̍ā māā ā cho̍ le̍lɛ̍ŋ te̍ wa̍. Ndu̍yɛ̍ I̍ cho̍ tōsā mī lā dɔ̄ūnu᷄ŋ tu̍mbe̍ a̍ wānāa̍ ki̍ndu̍ kɔ̍l te̍ wa̍.”

²⁰O̍ ko̍ŋ kɔ̍ɔ̍lī mi̍ Āīsa̍yā di̍mī kpe̍nde̍ke̍le̍ āā, “Wānāa̍ ve̍ ya̍ nūūwā kpo̍so̍ŋ te̍ wa̍, ā sāālu̍ŋ ya̍. Wānāa̍ nyu̍na̍ ya̍ le̍ nda̍ chɔ̄mnɔ᷄ŋ te̍ wa̍, mi̍ I̍ chɔ̍mnu᷄ŋ nda̍.”

²¹Kɛ̍ ndu̍yɛ̍ mbo̍ dīmī a̍ wāŋnda̍ I̍sɔ̄lūɛ̄ī o̍kɔ̄ɔ̄ āā, “Le̍ pāa̍le̍ŋ kpɛ᷅ŋ bāla̍ŋ lā chō ya̍ lā hāūwāā le̍ wāŋnda̍ ha̍ā, wānāa̍ so̍li̍ ha̍ā dīōm nūu̍ ma̍ sīmūl la̍ wa̍.”