Read Southern Kisi Lu̍o̍māŋnda̍ 11 Bible Online

Lu̍o̍māŋnda̍ 11 - Southern Kisi bible

Lu̍o̍māŋnda̍ 11

¹Le̍la̍ŋ I̍ nyu̍nā wɔ̍ nya̍? Bāā Mɛ̄lɛ̄ka̍ kɛ̄ɛ̍ mākɛ̄yāā wānāā ndūa̍a̍? Sāko̍. Ō kɛ̄ɛ̍ nda̍ le̍. Ya̍ Pɔ̍ɔ̄ su̍a̍ā ho̍ō wo̍ bɛ̍ɛ̍, Chu̍ūnɔ̄ɔ̍ ya̍ cho̍ ni̍. O̍ pūlāle̍ E̍bīlāha᷅mnde̍ŋ chōo̍ ya̍ fu̍la̍ ni̍, vīōlɔ᷄ŋndo̍ o̍ yu̍ŋgu̍ Bɛ̍ŋnja̍mīŋndo̍ chōo̍.

²Wānāā ndūa̍a̍ ndu̍ Mɛ̍lɛ̄ka̍ hɛ̄li̍ ha̍ā sīndɛ̄ pa̍ le̍ wāa̍ wānāā ndɔ̄ wa̍, ō kɛ̄ɛ̍ nda̍ le̍. Nya̍ pi̍la̍ lā sīnā nyɛ᷅ Mɛ̄lɛ̄ka̍ dīmi̍ o̍ yāu̍ ndɔ̄ɔ̍ ni᷄ŋ a̍ Īla̍a̍chā o̍kɔ̄ɔ̄ wo̍. Mi̍ Īla̍a̍chā ŋɔ̍ɔ̍cha᷄ŋ Mɛ̍lɛ̄ka̍ o̍ lānī a̍ nyɛ̄ wāŋnda̍ I̍sɔ̄lūɛ̄ī a̍ to̍sa̍ wo̍.

³Mbo̍ dīmūl Mɛ̄lɛ̄ka̍ āā, “Māsānɔ̄ɔ̍ Mɛ̄lɛ̄ka̍, wāŋnda̍ ha̍ā ā dīu̍ wānāa̍ su̍a̍ā le̍ nūm nda̍. Ndu̍yɛ̍ ma̍ pēsī pēsī ma̍āŋndā nūmnda̍ŋ. Wānāa̍ su̍a̍ā le̍ nūm ki̍nɛ̍i̍ ya̍, mɛ̄ɛ̍ ya̍ pīlɛ̍ kpe̍ mi̍ lo᷅. Kɛ̍ ya̍ bɛ̍ɛ̍ ā chō ya̍ kɔ̄ɔ̄lī le̍ ya̍ dīyɔ̄ɔ̍.”

⁴O̍ ko̍ŋ kɔ̍ɔ̍lī, nyɛ̄ Mɛ̄lɛ̄ka̍ mūlu̍l Īla̍a̍chā wo̍ cho̍ ho̍ō ni̍. Mi̍ Mɛ̄lɛ̄ka̍ dīmūl ndu̍ āā, “A̍ cho̍ nu̍m pīlɛ̍ le̍. I̍ nɔ̍ wɔ̄ pūa̍a̍ wāa̍la̍ŋ lā ŋɔ᷄mmɛ̍ū. Nda̍ nda̍ ā be᷄ŋ la̍wu̍ Bāāl o̍ lābɛ̄ŋgu̍ ni̍ŋ mā sōōlu̍u̍ ndu̍ le̍.”

⁵Le̍nde̍ ko̍ni̍ i̍ cho̍ te̍le̍ŋndo̍ ho̍ō ni̍. Mi̍ wāŋnda̍ lō ā tɔ̄ mi̍ Mɛ̄lɛ̄ka̍ hɛ̄lī nda̍ le̍ mɛ̄ɛ̍ o̍ cho̍ wāna̍ īkɛ̄ndɛ̄ yɛ̍.

⁶Kɛ̍ ndu̍yɛ̍ tē ō wa̍ pɛ̍ māā le̍ chō Mɛ̄lɛ̄ka̍ chō wāna̍ īkɛ̄ndɛ̄ wo̍ o̍ hɛ̍lī wa᷅ŋnda̍ le̍ wāa̍ wānāā ndɔ̄ ni̍, mɛ̄ɛ̍ ō cho̍ le̍ sɔ̄ɔ̍ŋ kɛ̍ndɛ̄ŋ nda̍ tōsā wo̍ŋ te̍ o̍ hɛ̍li̍ nda̍ le̍. Kāni̍ fo̍ndōle̍, tē ō wa̍ pɛ̍ māā Mɛ̄lɛ̄ka̍ hɛ̄lī māhɛ̄līāā wāŋndo̍ le̍ sūɛ̍i̍ kɛ̍ndɛ̄ī o̍ to̍sā ve̍ pɛ̍, mɛ̄ɛ̍ ō cho̍ i̍kɛ̍ndɛ̄ le̍ o̍ to̍sa̍l wānā ko̍ŋ te̍.

⁷Le̍la̍ŋ sūɛ̍i̍ le̍bo᷅lle̍ o̍ sūɛ̍i̍ he̍ī ni᷄ŋ ndi̍ cho̍ ni̍ māā mi̍ wāŋnda̍ I̍sɔ̄lūɛ̄ī a̍ bu̍mbā le̍ nyɛ̄ nda̍ wa̍ nūūvīa̍a̍ wo̍ sɔ̄lāa̍. Ā pɔ̄mbūāā Mɛ̄lɛ̄ka̍ hɛ̄li̍ wa̍ ko̍ni̍ a̍ sɔ̍la̍ ni̍. Wāŋnda̍ ā tūa̍a̍ ki̍nɛ̍i̍ mbo̍ kīndī nda̍ bōlle̍.

⁸Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ le̍nde̍ āā, “Mi̍ Mɛ̄lɛ̄ka̍ tōsā nda̍ ā nɔ̍ si̍na᷄ŋ te̍, ndu̍yɛ̍ sīnā pɛ̄ŋgu̍ bɛ̍ɛ̍ ā nɔ̍ le̍. Mbo̍ lō o̍ ko̍ŋ ha̍a̍a̍ mbo̍ fūūla᷅ŋ a̍ bōōnde̍i̍ he̍ī ā nɔ̄ hɔ̄lta̍ŋ, kɛ̍ ā chi᷅ le̍. Ā nɔ̄ nīla̍ŋ, kɛ̍ ā tu̍i̍ī le̍.”

⁹Mi̍ Māsāa̍ Dēēve̍ di̍mi̍ āā, “Mɛ̄lɛ̄ka̍, ye̍ŋ nda̍ yāŋɔ̄ɔ̄le̍ŋ mā hāū a̍ bōōndi̍i̍ nda̍ wā o̍ bɔ̄ŋa᷅ŋndā ndāla̍ nyɛ̄ dīāā la̍ŋ chōo̍ ve̍. To̍sa̍ mā de᷄l, ndu̍yɛ̍ mā tu̍si̍ nda̍ nyɛ̄ nɛ̄īyāa̍ bɛ̄ndōo̍ chōo̍.

¹⁰To̍sa̍ mī hɔ̄lta̍ŋ lā kīnda̍ŋ nda̍, ā cha᷅ le̍. To̍sa̍ mī dɛ̍nɛ̍ pa̍lāa̍ fūūlu̍u̍ nda̍ sōndōo̍ lɛ̄ŋ mɛ̍ɛ̄.”

¹¹Le̍la̍ŋ, I̍ nyu̍nā wɔ̍ nya̍. Dēlɔ̄ɔ̄ Chu̍ūwa̍ de᷄l ho̍ō wo̍, bāā dēlɔ̄ɔ̄ nda̍ lo̍ lēni᷄ŋ ni̍? Sāko̍. Ō cho̍ de̍lɔ̄ɔ̄ nda̍ lo̍ lēni᷄ŋ te̍. Yɔ̄ŋ ndā wɔ̍ɔ̍ŋndo̍ tōsa̍ mātōsāā mi̍ wānāa̍ cho̍ a̍ Chu̍ū le̍ wa̍ ā sɔ̄lā pīōŋɔ̄ɔ̍. Sūɛ̍i̍ he̍ī ī yɔ̄nu̍ŋ le̍ mī Chu̍ūwa̍ ā pāŋa̍la̍ wānāa̍ cho̍ a̍ Chu̍ū le̍ wa̍.

¹²Mɛ̄ɛ̍ Chu̍ūwa̍ tōsa̍ yɔ̄ŋ wɔ̄ɔ̍ŋndo̍, o̍ ko̍ŋ mi̍ dɛ̍nɛ̍ kɛ̍ndɛ̄ bɛ̄ndōo̍ hūŋ le̍ wāŋnda̍ ā tūa̍a̍ o̍ chi̍e̍ēŋndo̍ ni᷄ŋ. Ndu̍yɛ̍ mi̍ būmbā Chu̍ūwa̍ būmba̍ le̍ nyɛ̄ nda̍ wa̍ nūūvīa̍a̍ le̍ sɔ̄lāa̍ wo̍ tōsā, mi̍ wānāa̍ cho̍ a̍ Chu̍ū le̍ wa̍ ā sɔ̄lā dɛ̍nɛ̍ kɛ̍ndɛ̄ bɛ̄ndōo̍. Nāa̍ sūɛ̍i̍ he̍ī chūu̍ wɔ̄ wāŋnda̍ dɛ̍nɛ̍ kɛ̍ndɛ̄ bɛ̄ndōo̍, tē Chu̍ūwa̍ hu᷄ŋ to̍sā ni᷅ŋ sɔ̍ɔ̍ŋ Mɛ̄lɛ̄ka̍ kɛ̄ɛ̄si̍a̍a̍ le̍ nda̍ wo̍ŋ kpo̍u̍ pɛ̍, dɛ̍nɛ̍ kɛ̍ndɛ̄ kōŋ ndu̍ wa᷅ o̍ bɔ̍ɔ̍ bɔ̍ɔ̍.

¹³I̍ su̍a̍ā wɔ̍ ni̍ko̍ nāa̍ nya̍ wānāa̍ cho̍ a̍ Chu̍ū le̍ wa̍ chūā. Ha̍a̍a̍ ya̍ Pɔ̍ɔ̄ mi̍ wa᷅ wāna̍ Chi̍i̍sū ve᷅m māā hɔ̄ltē ndɔ̄ le̍ kɔ̄la̍ŋ nāa̍ nya̍ cho̍ a̍ Chu̍ū le̍ wa̍ chūā, I̍ chu̍a̍ wa̍li̍ ka̍lāa̍ māā wa̍li̍ bɛ̍ndū.

¹⁴O̍ he̍ī ni᷄ŋ, I̍ cho̍ lēhɔ̄l o̍ nɛ̄ī māā o̍ nɛ̄īyo̍ ho̍ō ni᷄ŋ mī I̍ to̍sa̍ mī wānāā nīa̍a̍ ā pāŋa̍la̍ wānāa̍ cho̍ a̍ Chu̍ū le̍ wa̍, o̍ ko̍ŋ, mī I̍ to̍sa̍ ō wa̍ bɛ̍ɛ̍ a̍ ti̍ŋ mā sɔ̄la̍ pīōŋɔ̄ɔ̍.

¹⁵Kāni̍ fo̍ndōle̍, mɛ̄ɛ̍ Mɛ̄lɛ̄ka̍ kɛ̄ɛ̍ Chu̍ūwa̍ mi̍ he̍ī tōsā mi̍ wāŋnda̍ ā tūa̍a̍ o̍ chi̍e̍ēŋndo̍ ni᷄ŋ a̍ mi̍i̍ŋgū dīōm pīlɛ̍ a̍ Mɛ̄lɛ̄ka̍. Nāa̍ kɛ̄ɛ̄ Mɛ̄lɛ̄ka̍ kɛ̄ɛ̍ nda̍ wo̍ tōsa̍ wɔ̄ he̍ī, tē ō mīŋgi̍ nda̍ ni᷅ŋ chɛ̄lɔ̄ɔ̄ pɛ̍, ī wā ni̍ŋ ko̍ mɛ̄ɛ̍ wāŋndo̍ wū nu̍a̍ā pɛ̍, kɛ̍ mbō mīīŋgu̍ yōōmū yɛ̍.

¹⁶Ndu̍yɛ̍ tē wāŋndo̍ ō ke̍ ni᷅ŋ Mɛ̄lɛ̄ka̍ tɛ̄ndū bēe̍dīi̍yo̍ ō tāse̍ ko̍ŋ pɛ̍, mɛ̄ɛ̍ kpūŋgbɛ̄ī bēe̍dīi̍ye̍ ī tūɛ̍i̍ kpo̍u̍ ī wā i̍ yɔ̍ŋga᷄ŋ le̍ ndu̍ Mɛ̄lɛ̄ka̍. Ndu̍yɛ̍ tē wāŋndo̍ yɔ̄ŋgu̍ ni᷅ŋ Mɛ̄lɛ̄ka̍ pūūndu᷅ŋ sa̍a̍ yɔ̄mndo̍ wo̍ŋ pɛ̍ mī ŋ̄ wa̍ le̍ ndu̍, mɛ̄ɛ̍ yɔ̄m kālāa̍ lɛ̄ūwūŋ ndɔ᷄ŋ bɛ̍ɛ̍ kpo̍u̍ ŋ̄ wā ŋ̍ yɔ̍ŋga᷄ŋ le̍ ndu̍ Mɛ̍lɛ̄ka̍.

¹⁷Sūɛ̍i̍ he̍ī ī chō māchūāā mɛ̄ɛ̍ nda̍ kīālū nu̍a̍ā lɛ̄ūwo̍ŋ o̍ yɔ̄m nda̍ vēēlū āā ɔ̄li̍fīi̍ wo̍ yɛ̍. Tē wāŋndo̍ fāŋa̍ pɛ̍ lɛ̍ūwo̍ŋ o̍ ɔ̄li̍fīi̍ tūālāa̍, o̍ ko̍ŋ kɔ̍ɔ̍lī ō kɔ̍ ki̍o̍lū lɛ̄ūwūŋ ɔ̄li̍fīi̍ yōndōo̍, ō hu᷄ŋ ha̍ndū mu̍ŋ o̍ ɔ̄li̍fīi̍ tūālāa̍ nāa̍ o̍ fa̍ŋa̍ lɛ̄ūwo̍ŋ nda̍. O̍ ko̍ŋ, mī lɛ̄ūwūŋ ɔ̄li̍fīi̍ yōndōo̍ ŋ̄ bīīla᷅ŋ o̍ ɔ̄li̍fīi̍ tūālāa̍ mī ŋ̄ sɔ̄la̍ nyɛ̄ dīa̍a̍ chɔ̄nɔ᷄ŋndo̍ o̍ pūūndu᷅ŋ ɔ̄li̍fīi̍ tūālāa̍ mī ī pēŋ. Mɛ̄ɛ̍ le̍nde̍ nya̍ wānāa̍ cho̍ a̍ Chu̍ū le̍ wa̍ chō ni̍. Lā chō māchūāā māā lɛ̄ūwūŋ ɔ̄li̍fīi̍ yōndōo̍ ho̍ō, ŋ̄ nda̍ hāndu̍ o̍ ɔ̄li̍fīi̍ tūālāa̍ wo̍ŋ.

¹⁸Tē ī wa̍ yɛ̄ le̍nde̍ pɛ̍, mɛ̄ɛ̍ nya̍ cho̍ a̍ Chu̍ū le̍ wa̍ lā nɔ̍ mī lā yīya̍ŋ a̍ nya̍ pi̍la̍ māā lā chō ā bɛ̄ndāā mi̍ lā hīāū wānāa̍ cho̍ māā lɛ̄ūwūŋ nda̍ fāŋa̍ wo̍ŋ nda̍ le̍. Lā nɔ̍ mī lā kēlū yōŋgā o̍ yōŋgā kpo̍so̍ŋ te̍, kāni̍ fo̍ndōle̍, lɛ̄ūve̍ ko̍ nya̍ chō ni̍. Ō cho̍ nya̍ cho̍ lɛ̄ūwo̍ŋ nda̍ le̍ yɔ̍ŋgū pu̍ūndo̍ŋ nyɛ̄ dīa̍a̍ le̍. Pūūndo̍ŋ ŋ̍ ke᷅ nya̍ cho̍ lɛ̄ūwo̍ŋ nda̍ nyɛ̄ dīa̍a̍ ni̍.

¹⁹Mī nya̍ pūm nda̍ dīmi̍ dɔ̍ɔ̍ āā, “Kɛ̍, ā fāŋa̍ māfāŋāā lɛ̄ūwūŋ mu᷅ŋ le̍ mī na̍a̍ ŋ̄ mīīŋgu̍ o̍ fo̍ndāŋ nda̍ wa̍ wo̍.”

²⁰Tōnya̍ i̍ cho̍ ni̍. Le̍ mɛ̄ɛ̍ nda̍ dōu̍ ti̍i̍nda᷄ŋ ndāa̍ o̍ Mɛ̄lɛ̄ka̍ ni᷄ŋ te̍ yɛ̍ nda̍ fāŋa̍ nda̍ ni̍. Kɛ̍ nya̍ nya̍, mi̍ lā dūāū tīīnda᷄ŋ nyāa̍ o̍ Mɛ̄lɛ̄ka̍ ni᷄ŋ, o̍ ko̍ŋ mi̍ lā wā hīōūwɔ̄ɔ̍ lāchī a̍ wāa̍ o̍ fo̍ndāŋ nyāa̍. Kɛ̍ ndu̍yɛ̍ lā ki̍a̍lū yōŋgā le̍ he̍ī le̍. Lā nɔ̄ mī lā yɔ᷄ŋ sīōōŋnde̍.

²¹Kāni̍ fo̍ndōle̍, nāa̍ Mɛ̄lɛ̄ka̍ fāŋa̍ wɔ̄ Chu̍ūwa̍ a̍ cho̍ ha̍ā māā lɛ̄ūwūŋ kpe̍e̍kpe̍i̍ yɔ̄m tūālāa̍ wa̍, bāā nya̍ o̍ kɛ̍ɛ̄ fa̍ŋā ni̍?

²²Lā yīya̍ŋ ndɔ̍ a̍ Mɛ̄lɛ̄ka̍ o̍kɔ̄ɔ̄ nyɛ̄ kɛ̄ndɛ̄ kɛ̍ndɛ̍ī. Wāna̍ īkɛ̄ndɔ̄ɔ̍ o̍ cho̍ ni̍. Kɛ̍ ndu̍yɛ̍ ō nɔ̄lā vɛ̍lɛ̄ mbō bīī wāŋndo̍ ō kālā ka̍lā. Wānāa̍ de᷅l o̍ yɔ̄ŋ wɔ̄ɔ̍ŋndo̍ ni᷄ŋ nda̍ ō nɔ̄lā mbō bīī nda̍ ō kālā ka̍lā, kɛ̍ nya̍ nya̍ ō tōsa̍l nya̍ kɛ̄ndɛ̄i̍ ndūɛ̍i̍. Ō nɔ̄lā mbō hīōū lāchī a̍ nya̍ kɛ̄ndɛ̄i̍ ndūɛ̍i̍ tōsāllo̍, tē lā fēŋa̍ŋ dɔ̍ɔ̍ o̍ kɛ̄ndɛ̄i̍ ndūɛ̍i̍ bɛ̄ŋgu̍ le̍. Tē lā tōsa̍ yɛ̄ le̍nde̍ pɛ̍, mɛ̄ɛ̍ nya̍ bɛ̍ɛ̍ ō chō nya̍ fāŋā.

²³Ndu̍yɛ̍ a̍ Chu̍ūwa̍ nda̍ nda̍ o̍kɔ̄ɔ̄, tē ā mūli̍ŋ mā dɔ̄ū tīīnda᷄ŋ ndāa̍ o̍ Mɛ̄lɛ̄ka̍ ni᷄ŋ pɛ̍, ā sɔ̄lā vɛ̍lɛ̄ mīŋgīo̍o̍ o̍ fo̍ndāŋ ndāa̍. Kāni̍ fo̍ndōle̍, Mɛ̄lɛ̄ka̍ nɔ̄lā mbō mīŋgi̍ nda̍ vɛ̄lɛ̄ o̍ fo̍ndāŋ nda̍ nda̍ wa̍ wo̍.

²⁴Mɛ̄ɛ̍ ya̍ I̍ di̍mu̍l nya̍ yɛ̍, māā nya̍ cho̍ a̍ Chu̍ū le̍ wa̍, tē ō wa̍ māā yɔ̄ŋɔ̄ɔ̄ pɛ̍, lā chō māchūāā māā lɛ̄ūwūŋ ɔ̄li̍fīi̍ yōndōo̍. Kīōlɔ̄ɔ̍ nya̍ ma̍ hāndū nya̍ o̍ ɔ̄li̍fīi̍ tūālāa̍. Le̍ ī wāā nu̍a̍ā yɔ̄nɔ᷄ŋndo̍, ī chō sūɛ̍i̍ kɔ̄ndɔ̄fi̍li̍. Nāa̍ Mɛ̄lɛ̄ka̍ tōsa̍ wɔ̄ ke̍ŋ, ī wā su̍ɛ̍i̍ bɛ̍ɛ̍ŋ bɛ̍ɛ̍ŋ bɛ̍ndū le̍ Chu̍ūwa̍ a̍ cho̍ ha̍ā māā lɛ̄ūwūŋ ɔ̄li̍fīi̍ tūālāa̍ wa̍ mīŋgīo̍o̍ o̍ yɔ̄m ɔ̄li̍fīi̍ nda̍ wa̍ wo̍.

²⁵Chāāŋāā nīāā wa̍nāā lāāla᷄ŋnda̍, sūɛ̍i̍ pu̍m chō mi̍ ndi̍ i̍i̍ wa᷅ ī vīāŋna᷄ŋ nde̍, I̍ hɛ̍na̍ŋ nya̍ mī lā sīna̍ ndi̍ pɛ̄ŋgu̍, yɔ̄ŋi̍ nya̍ hēēlu̍ŋ māā lā chō wānāā kɔ̄l kālu̍. Sūɛ̍i̍ ke̍ŋ cho̍ ni̍ māā mi̍ chē bɛ̍ɛ̍ mi̍ wāŋnda̍ I̍sɔ̄lūɛ̄ī a̍ wa᷅ wānāā nīlā kālu̍a̍a̍ bɛ̍ndū ni̍, kɛ̍ ndu̍yɛ̍ ā lo᷅ ni̍ŋ o̍ nīlā kālu̍la̍ la̍ŋ ni᷄ŋ le̍ fɛ̍ɛ̍ŋ a̍ fɛ̍ɛ̍ŋ te̍. Le̍ mbō lo̍ o̍ ko̍ŋ, mī wānāa̍ cho̍ a̍ Chu̍ū le̍ wa̍, a̍ cho̍ ā yūlāā le̍ sīmnɔ᷄ŋndo̍ wānāa̍ Mɛ̄lɛ̄ka̍ wa̍ mā chīŋa̍ ko̍ni̍.

²⁶Tē he̍ī yɔ̄nu̍ŋ pɛ̍, o̍ ko̍ŋ kɔ̍ɔ̍lī wāŋnda̍ I̍sɔ̄lūɛ̄ī kpo̍u̍ ā sɔ̄la̍ pīōŋɔ̄ɔ̍. Ī chō ī pōōnyīāā le̍nde̍ o̍ Yāu̍ Mɛ̄lɛ̄ka̍a̍ ni᷄ŋ āā, “Wāna̍ ba̍ŋā wa᷅ŋnda̍ wo̍ chō chɔ̄nɔ᷄ŋ Sa̍a̍yɔ̄ŋ chi̍e̍e̍ mbō hīŋ. Ō hīŋ pɛ̍, ō chō yɔ̄ŋ wɔ̄ɔ̍ŋndo̍ sōlī o̍ pūlāle̍ Che̍kɔ̍pūle̍ŋ chōo̍ po̍.

²⁷Mɛ̄ɛ̍ kpe̍ma̍ ya̍ I̍ yi̍ī ni̍ŋ a̍ nda̍ wo̍ cho̍ ko̍ŋ ni̍, fāŋā ya̍ I̍ fa̍ŋā ni̍ŋ yɔ᷅ŋndā ndāla̍ wɔ̍ɔ̍ŋnda̍ŋ ndo̍.”

²⁸Kāni̍ fo̍ndōle̍, le̍ kɛ̄ɛ̄ Chu̍ūwa̍ ā kɛ̄ɛ̍ lāāla᷄ŋndo̍ a̍ Yōōŋgū Kɛ̄ndɛ̍ Mɛ̄lɛ̄ka̍a̍ wo̍, le̍la̍ŋ nda̍ sīmnu᷄ŋ ya̍a̍mɔ̍ɔ̍wa̍a̍ Mɛ̄lɛ̄ka̍ ni̍. He̍ī yɔ̄nu̍ŋ le̍ mbō lo̍ o̍ ko̍ŋ mī nya̍ cho̍ a̍ Chu̍ū le̍ wa̍ mī lā sɔ̄la̍ dɛ̍nɛ̍ kɛ̍ndɔ̄ɔ̍. Kɛ̍ ndu̍yɛ̍ Chu̍ūwa̍ nda̍ nda̍, Mɛ̄lɛ̄ka̍ hɛ̄li̍ māhɛ̄līāā nda̍ le̍ kāālā o̍ ka̍a̍la̍ nda̍ wo̍. Ndu̍yɛ̍ le̍ būŋgɛ̄ī Mɛ̄lɛ̄ka̍ chūe̍l fi̍nyāā ndāā ma̍māa̍ ve̍ he̍ī yɔ̄nu̍ŋ ni̍.

²⁹Kāni̍ fo̍ndōle̍, nyɛ̄ Mɛ̄lɛ̄ka̍ ke̍ pɛ̍ wa᷅ŋndo̍, ō pu̍ū lɛ̍ le̍. Ndu̍yɛ̍ wānāā o̍ hɛ̍li̍ ni᷅ŋ nda̍, ō fe̍ŋāŋ ndɛ̍ o̍ hɛ̄lī o̍ hɛ̍li̍ nda̍ ko̍ŋ ndo̍ chōo̍ le̍.

³⁰Nya̍ nya̍ wānāa̍ cho̍ a̍ Chu̍ū le̍ wa̍, o̍ pāāndōo̍ ni᷄ŋ mi̍ nya̍ a̍a̍ kɛ̍ɛ̄ Mɛ̄lɛ̄ka̍ dīōm. Kɛ̍ ndu̍yɛ̍ pɛ̄ŋgo̍o̍ ho̍ō ni᷅ŋ, mi̍ Mɛ̄lɛ̄ka̍ tūīīnu᷄ŋ nya̍ īnyīɛ̍ɛ̍ le̍ kɛ̄ɛ̄ Chu̍ūwa̍ ā kɛ̄ɛ̍ ndu̍ dīōm ndo̍.

³¹Le̍nde̍ ko̍ni̍ i̍ cho̍ ni᷅ŋ pɛ̄ŋgo̍o̍ ho̍ō ni̍ mi̍ Chu̍ūwa̍ kɛ̄ɛ̄ Mɛ̄lɛ̄ka̍ dīōm le̍ nyīɛ̍ɛ̍yīī o̍ tūīīnu̍ŋ nya̍ cho̍ a̍ Chu̍ū le̍ wa̍ wo̍. Ndu̍yɛ̍ he̍ī yɔ̄nu̍ŋ le̍ mbō lo̍ o̍ ko̍ŋ mī Mɛ̄lɛ̄ka̍ tūīīnu̍ŋ nda̍ īnyīɛ̍ɛ̍.

³²Mi̍ Mɛ̄lɛ̄ka̍ bīū wāŋnda̍ kpo̍u̍ mɛ̄ɛ̍ nda̍ dūāū nu̍a̍ā wāŋnda̍ o̍ chīɛ̄ī mānyūmndo̍ ni᷄ŋ yɛ̍. Ō tōsa̍ he̍ī le̍ mī wāŋnda̍ kɛ̄ɛ̍ ndu̍ dīōm, le̍ mbō lo̍ o̍ ko̍ŋ mbō tūīīnu̍ŋ nda̍ kpo̍u̍ i̍nyi̍ɛ̍ɛ̍.

³³Lēkɛ̍ndɛ̍ī Mɛ̄lɛ̄ka̍ chō wāna̍ īnyīɛ̍ɛ̍ nāa̍ wāŋnda̍ kpo̍u̍ chu̍a̍. Ndu̍yɛ̍ ō chō wāna̍ kɔ̄l kālu̍ bɛ̍ndu̍ bɛ̄ndū. Ndu̍yɛ̍ nyɛ̄ o̍ nyɛ̄ fe̍e̍ ō sīnā. Wānā o̍ wānā sɔ̍lā si̍nā pɛ̄ŋgu̍ a̍ mɛ̄ɛ̍ o̍ to̍sā sɔ̍ɔ̍ŋ ndɔ᷄ŋ yɛ̍ le̍. Ndu̍yɛ̍ wānā o̍ wānā si̍nā le̍ sa̍bū o̍ to̍sā mu̍ŋ le̍nde̍ wo̍ le̍.

³⁴Le̍nde̍ Yāu̍ Mɛ̄lɛ̄ka̍a̍ dīmi̍ ni̍ āā, “Wānā o̍ wānā si̍nā nyɛ̍ cho̍ Māsānɔ̄ɔ̍ Mɛ̄lɛ̄ka̍ o̍ kɔ̄l lo̍ le̍. Wānā o̍ wānā si̍lā ndu̍ le̍.

³⁵Wānā o̍ wānā a̍ nɔ̍lā mā ke̍ Mɛ̄lɛ̄ka̍ nyɛ̄ o̍ nyɛ̄ mbō wa̍ ndu̍ chōo̍ māā kūēē le̍.”

³⁶Kāni̍ fo̍ndōle̍, ndu̍ Mɛ̍lɛ̄ka̍ ndu̍ to̍o̍si̍a̍a̍ nyɛ̄ o̍ nyɛ̄ fe̍e̍ ni̍. Nyɛ̄ o̍ nyɛ̄ fe̍e̍ mɛ̄ɛ̍ o̍ di̍mī māā ŋ̄ wa̍ yɛ̍, le̍nde̍ ŋ̍ hi̍a̍ū la̍chi̍ a̍ wāa̍ o̍ sa̍bū ndɔ̄ɔ̍ ni᷄ŋ ni̍. Ndu̍yɛ̍ le̍ ndu̍ nyɛ̄ o̍ nyɛ̄ fe̍e̍ cho̍ ni̍. Lā ŋ̄ sāŋga̍la᷅ŋ ndu̍ le̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.