Read Southern Kisi Lu̍o̍māŋnda̍ 12 Bible Online

Lu̍o̍māŋnda̍ 12 - Southern Kisi bible

Lu̍o̍māŋnda̍ 12

¹Le̍la̍ŋ chāa̍ŋāā nīāā wa̍nāā lāāla᷄ŋnda̍, ha̍a̍a̍ mi̍ Mɛ̄lɛ̄ka̍ tūīīnu᷄ŋ na̍a̍ īnyīɛ̍ɛ̍ nu̍a̍ā ta̍u̍, I̍ cho̍ nya̍ nyɔ̄ɔ̄lōo̍ a̍ yāndi̍i̍, lā yɔ̄ŋgu̍ nya̍ pi̍la̍ o̍ Mɛ̄lɛ̄ka̍ lo̍ māā nyɛ̄ sa̍lāa̍ o̍ cho̍ yōōmū wo̍. Lā wa̍ a̍ yɔ̍ŋga᷄ŋ kpo̍u̍ o̍ Mɛ̄lɛ̄ka̍ lo̍, ndu̍yɛ̍ mī lā yɔ̄ŋgu̍ŋ o̍ nyɛ̍ nɛ̍ŋī ndu̍ kɔ̄l lo̍ tōsāa̍ ni᷄ŋ. Nɛ̄ī kpe̍e̍kpe̍i̍yo̍ cho̍ ho̍ō le̍ Mɛ̄lɛ̄ka̍ sōōlūūwo̍ ni̍.

²Lā hi̍a̍ū lɛ̄ lāchī a̍ ka̍ālā wāŋnda̍ o̍ chi̍e̍ēŋndo̍ ho̍ō ni᷄ŋ a̍ to̍sā la̍ŋ te̍. Lā ke̍ Mɛ̍lɛ̄ka̍ fo̍ndāa̍ mbō māŋga̍la̍ nya̍, o̍ he̍ī ni᷄ŋ, mbō tōsa̍ mī kɔ̄ltā nyāla̍ŋ lā sīmnu᷄ŋ la̍ sɛ̍nɛ̄ī. Tē he̍ī yɔ̄nu̍ŋ pɛ̍, lā nɔ̄lā mī lā sīna̍ nyɛ̄ Mɛ̄lɛ̄ka̍ hɛ̄na̍ŋ ndo̍, ko̍ŋ cho̍ ni̍ mī lā sīna̍ sūɛ̍i̍ cho̍ sūɛ̍i̍ kɛ̍ndɛ̄i̍ ndu̍ o̍ hɔ̄l le̍ tōsāa̍ ve̍. O̍ ko̍ŋ kɔ̍ɔ̍lī, mī lā sīna̍ sūɛ̍i̍ nɛ̍ŋī ndu̍ kɔ̄l le̍, ndu̍yɛ̍ mī lā sīna̍ nyɛ̍ cho̍ sa̍na̍a̍ le̍ tōsāa̍ wo̍.

³Le̍ kɛ̄ndɛ̄i̍ Mɛ̄lɛ̄ka̍ tōsa̍l la̍ mbo̍ kē ya̍ nāa̍ si̍māa̍ ha̍ā wo̍, I̍ hɛ̍na̍ŋ mī I̍ so̍ō dīōmnda̍ŋ nda᷅ŋ nāa̍ nya̍ chūā. La̍ŋ la̍ yɔ̍nūŋ ni̍ māā wānā o̍ wānā chu̍a̍nu᷄ŋ o̍ bɛ̍ndū mbō hīōū mɛ̄ɛ̍ ŋ̄ chō kpe̍e̍kpe̍i̍ yɛ̍ le̍. Wānā o̍ wānā chu̍a̍ nu᷅m pi̍la̍ mɛ̄ɛ̍ ŋ̄ chō lēkɛ̍ndɛ̍ī yɛ̍. Ko̍ŋ cho̍ ni̍ wānā o̍ wānā mɛ̄ɛ̍ kpɛ̍ tīīnda᷄ŋ Mɛ̄lɛ̄ka̍ ke̍ nu̍m ndo̍ chō yɛ̍, le̍nde̍ ŋ̄ chu̍a̍ nu᷅m pi̍la̍ ni̍.

⁴Na̍a̍ ŋ̄wāŋndā chīe̍e̍ nyɔ̄ɔ̍ ō pīlɛ̍ kpe̍ dīāllūŋ na᷄ŋ ŋ̄ chō ni̍. Kɛ̍ ndu̍yɛ̍ dīāllo̍ŋ mu᷅ŋ ŋ̄ nɔ̄ nyɛ̄m yɛ̍ yɔ̍ŋ ta̍u̍. Ndu̍yɛ̍ mu̍ŋ ki̍nɛ̍i̍ wa̍lta̍ ŋ̍ to̍sā la̍ŋ lā cho̍ nyɛ̍ pīlɛ̍ le̍.

⁵Le̍nde̍ ko̍ni̍ na̍a̍ wānāā lāāla᷄ŋnda̍ ŋ̄ chō ni̍. Mi̍ chē bɛ̍ɛ̍ mi̍ ŋ̄ wā cha̍po̍o̍li̍ ni̍, kɛ̍ ndu̍yɛ̍ dīāllo̍ŋ ŋ̄ pīlɛ̍ kpe̍ na̍a̍ ŋ̄ chō ni̍, kāni̍ fu̍u̍le̍, le̍ chō na̍a̍ ŋ̄ chō dīōm pīlɛ̍ na̍a̍ Ki̍li̍tī wa̍ā wo̍. Mɛ̄ɛ̍ nyɛ̄m yɛ̍ yi̍ɔ̍ɔ̍ŋ o̍ dīāllūŋ wāna̍ chi̍o̍o̍ ŋ̄ chō ŋ̄ chīīŋīāā yɛ̍, le̍nde̍ na̍a̍ wānāā lāāla᷄ŋnda̍ chō ā chīīŋīāā vēllāa̍ vēllē o̍ dīāllūŋ pīlɔ̍ŋ ni̍.

⁶Mɛ̄lɛ̄ka̍ tōsa̍l na̍a̍ kɛ̄ndɛ̄i̍ ndūɛ̍i̍. O̍ kɛ̄ndɛ̄i̍ he̍ī ni᷄ŋ mbo̍ kē na̍a̍ pi̍lɛ̍ŋ pi̍lɛ̍ŋnda̍ nyɛ̄m yɛ̍ yi̍ɔ̍ɔ̍ŋ. Le̍la̍ŋ, tē le̍ wāŋnda̍ yōōŋgu̍ Mɛ̄lɛ̄ka̍a̍ dīmūllo̍ Mɛ̄lɛ̄ka̍ ke̍ nu̍m kpāāyāa̍ ni̍, mɛ̄ɛ̍ di̍mi̍ ndu̍ mɛ̄ɛ̍ kpɛ̍ ŋ̄ nɔ̄ tīīnda᷄ŋndo̍ o̍ Mɛ̄lɛ̄ka̍ ni᷄ŋ yɛ̍.

⁷Tē nyɛ̄ o̍ ke̍ nu̍m ndo̍ ō wa̍ le̍ wānāā lāāla᷄ŋnda̍ mālāa̍ pɛ̍, ma̍la̍ nda̍. Tē nyɛ̄ o̍ ke̍ nu̍m ndo̍ ō wa̍ le̍ wāŋnda̍ sūɛ̍i̍ Mɛ̄lɛ̄kɛ̍i̍ pɛ̄ɛ̄kōo̍ pɛ̍, mɛ̄ɛ̍ pɛ̍ɛ̍ku̍ nda̍.

⁸Ndu̍yɛ̍ tē nyɛ̄ o̍ ke̍ nu̍m ndo̍ ō wa̍ le̍ wāŋnda̍ kɔ̄lta̍ŋ dɛ̄ɛ̄nīa̍a̍ ni᷄ŋ pɛ̍, dɛ̄ɛ̄nīa̍a̍ nda̍ kɔ̄lta̍ŋ ni᷄ŋ. Tē nyɛ̄ Mɛ̄lɛ̄ka̍ ke̍ nu̍m ndo̍ ō wa̍ le̍ wānāa̍ cho̍ o̍ bā hāvɛ̍i̍yo̍ ni᷄ŋ nda̍ nyɔ̄ɔ̍ŋ kīo̍o̍ pɛ̍, mɛ̄ɛ̍ ke̍ nda̍ a̍ kɔ̄l nūmndo̍ kpo̍u̍. Ndu̍yɛ̍, tē nyɛ̄ o̍ ke̍ nu̍m ndo̍ ō wa̍ le̍ wāa̍ wāŋnda̍ lāchī pɛ̍, mɛ̄ɛ̍ to̍sa̍ ndi̍ o̍ nɛ̄ī kɛ̍ndɛ̄ kɛ̍ndɛ̄ ni᷄ŋ. Tē nyɛ̄ o̍ ke̍ nu̍m ndo̍ ō wa̍ le̍ wāŋnda̍ nyīɛ̍ɛ̍ye̍ tūīīnɔ᷄ŋndo̍ pɛ̍, mɛ̄ɛ̍ to̍sa̍ ndi̍ a̍ kɔ̄l kɛ̄ndɛ̄.

⁹Kāālā nya̍ nɔ̄ le̍ wāŋnda̍ wo̍, ō wa̍ ka̍a̍lā kpe̍e̍kpe̍i̍. Nyɛ̄ o̍ nyɛ̍ cho̍ sūɛ̍i̍ wɔ̄ɔ̍ŋ lā tu᷄l ndu̍ lēyɛ̄, ndu̍yɛ̍ mī lā bīī o̍ cho̍ ō kɛ̄ndɔ̄ɔ̍ wo̍ nyɛ̄ kɛ̄ndɛ̄ kpi̍ŋ.

¹⁰Lā kāāli̍āŋ ve̍llāa̍ vēllē māā wānāā lāāla᷄ŋ. Ndu̍yɛ̍ wānā o̍ wānā lā ke̍ cha̍a̍ŋāā nyāa̍ bɛ̄ɛ̄le̍ŋ mbō hīōū bɛ̍ɛ̍ mɛ̄ɛ̍ nda̍ nda̍ kē nya̍ yɛ̍.

¹¹Kɔ̄l nya̍ nɔ̄ ni᷄ŋ le̍ wa̍llo̍ wo̍ ō wa᷅ sūɛ̍i̍ to᷅l tōōlō le̍. Lā dɔ̄u̍ kɔ᷅lta̍ŋ nyɛ̄ kɛ̄ndɛ̄ kɛ̄ndɛ̍ī o̍ wa̍llo̍ tōsāa̍ le̍ Māsānɔ̄ɔ̍ Mɛ̄lɛ̄ka̍.

¹²Mɛ̄ɛ̍ nya̍ chō hɔ̄lte̍ŋ o̍ nɛ̄ī le̍ Mɛ̄lɛ̄ka̍ yɛ̍, mɛ̄ɛ̍ lā hīo̍u̍ ni̍ko̍ la̍chi̍ a̍ wāa̍ a̍ kɔ̄l kɛ̄ndɛ̄. Ndu̍yɛ̍ tē nyɛ̄ pālāa̍ hīŋ nya̍ chōo̍ pɛ̍, lā nɔ̍ kɔ᷅ltā bīūwa᷄ŋnda̍ŋ. Lā hīo̍u̍ la̍chi̍ a̍ Mɛ̍lɛ̄ka̍ pīɛ̄īyo̍ le̍ te̍le̍ŋ o̍ te̍le̍ŋ.

¹³Tē chāa̍ŋāā nyāā wa̍nāā lāāla᷄ŋnda̍ ā wa̍ a̍ bā hāvɛ̍i̍yo̍ pɛ̍, ndu̍yɛ̍ mī lā nɔ̄ nyɛ̄ nda̍ nɔ̄ ko̍ŋ ba̍ hāvɛ̍i̍ ndɔ̄ɔ̍ wo̍ pɛ̍, lā ke̍ nda̍ ō ti᷄ŋ. Ndu̍yɛ̍ lā wa̍ lɔ̍ɔ̍ lɔ̍ɔ̍ a̍ kɔ̄ltā chɛ̄lāā le̍ mīālla̍ yīyāa̍ o̍ lā nya̍ lo̍ chi̍ɛ̍ī ni̍ŋ.

¹⁴O̍ ko̍ŋ kɔ̍ɔ̍lī, wānāa̍ tu̍sī nya̍ nyɛ̄ pālāa̍ chōo̍ wa̍, lā pīɛ̍i̍ Mɛ̍lɛ̄ka̍ le̍ nda̍ mī Mɛ̄lɛ̄ka̍ dɔ̄ū nda̍ sa̍lā. Pīɛ̄īle̍ŋ nya̍ nɔ̄ ni̍ mī lā pīɛ̍i̍ le̍ nda̍, mī Mɛ̄lɛ̄ka̍ dɔ̄ū nda̍ sa̍lā. Lā me̍nā nda̍ le̍.

¹⁵Lā tōsa̍ kɔ᷅l kɛ̄ndɔ̄ɔ̍ lātūlu̍ a̍ wānāa̍ cho̍ a̍ kɔ̄ltā kɛ̄ndɛ̄la̍ŋ nda̍. Ndu̍yɛ̍ wānāa̍ cho̍ cha᷄ŋndo̍ wa̍, lā cha᷄ŋ a̍ nda̍ la̍tu̍lu̍.

¹⁶Lā nɔ̍ kɔ᷅ltā nyūlūla̍ŋ nya̍ pi̍la̍ tɛ̄ɛ̄ŋ vēllāa̍ vēllē. Ndu̍yɛ̍ lā wa᷅ wānāā yōŋgā le̍. Lā yɔ̄ɔ̍ na᷅ŋa᷅ŋndo̍ a̍ wānāā tāmbɛ̍i̍ ya̍. Lā chu̍ā nya̍ pi̍la̍ māā, lā chō bɔ̄ɔ̍ wa̍nāā kɔ̄l kālu̍ le̍.

¹⁷Ndu̍yɛ̍ ā yɔ᷄ŋ bɛ̍ɛ̍ mī wāŋndo̍ tōsa̍ ī wɔ̄ɔ̍ŋnde̍ a̍ nya̍, lā mi̍ŋgūl ndu̍ a̍ ī wɔ̄ɔ̍ŋ te̍. I̍ cho̍ sūɛ̍i̍ sa̍kpūe̍i̍ wāŋnda̍ o̍ hɔ̄l le̍, ndi̍ nya̍ kīndī ni̍ mī lā tōsa̍.

¹⁸Lā kīndi̍ o̍ nɛ̄ī o̍ nɛ̄ī ni̍ŋ ku̍mbū nyāa̍ mī kɔ̄l nyūlōo̍ ō wa̍ nya̍ tɛ̄ɛ̄ŋ a̍ wānā o̍ wānā.

¹⁹Chāāŋāā nīa̍a̍, lā wa᷅ wānāā mīŋgīāā māa̍ le̍. Lā chu᷄m Mɛ̄lɛ̄ka̍ mī ndu̍ dɔ̍ɔ̍ŋ tu̍mbe̍ a̍ nda̍ mbō tūsi̍ nda̍ nyɛ̄ pālāa̍ chōo̍. Kāni̍ fo̍ndōle̍, Māsānɔ̄ɔ̍ Mɛ̄lɛ̄ka̍ dīmi̍ o̍ yāu̍ ndɔ̄ɔ̍ ni᷄ŋ āā, “Ya̍ Mɛ̍lɛ̄ka̍ ya̍ cho̍ wānā mi̍ŋgīāā māa̍ ni̍. I̍ cho̍ wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ māa̍ mīŋgūl.”

²⁰Tē wāŋndo̍ tōsa̍l nya̍ sūɛ̍i̍ wɔ̍ɔ̍ŋnde̍ pɛ̍, lā mi̍ŋgūl ndu̍ a̍ ī wɔ̄ɔ̍ŋ te̍. Kāni̍ fo̍ndōle̍, Yāu̍ Mɛ̄lɛ̄ka̍a̍ dīmi̍ āā, “Tē yīa̍a̍ŋ mā wa̍ ya̍a̍mɔ̍ɔ̍ nu̍mndo̍ nɛ̄īyo̍ pɛ̍, ke̍ ndu̍ nyɛ̄ dīa̍a̍ mbō dē. Tē ō wa̍ a̍ bo̍lōlā ve̍sɛ̍i̍la̍ŋ pɛ̍, ke̍ ndu̍ ō ko᷄l. Tē a̍ to̍sa̍ le̍nde̍ pɛ̍, si̍ɔ̍mbu̍la̍ŋ lā bīī ndu̍ ta̍u̍.”

²¹Lā chɛ᷅l mī yɔ̄ŋ wɔ̄ɔ̍ŋndo̍ yēm nya̍ le̍. Lā tōsa̍ dɛ̍nɛ̍ kɛ̍ndɔ̄ɔ̍ le̍ dɛ̍nɛ̍ wɔ̄ɔ̍ŋndo̍ yōmɔ̄ɔ̍.