Read Southern Kisi Lu̍o̍māŋnda̍ 14 Bible Online

Lu̍o̍māŋnda̍ 14 - Southern Kisi bible

Lu̍o̍māŋnda̍ 14

¹Wāna̍ wa̍ nya̍ tɛ̄ɛ̄ŋ pɛ̍ mbō nɔ̍ di̍a̍llūŋ kālā o̍ tīīnda᷄ŋ o̍ nɔ̍ o̍ Chi̍i̍sū ni̍ŋ ndo̍ ni᷄ŋ te̍, lā chu̍a̍ ndu̍ māā wānāā pi᷄lla̍ nya̍ chō ni̍. Ndu̍yɛ̍, lā hi᷅ŋa᷅ŋ la̍di̍o̍m a̍ ndu̍ le̍ mɛ̄ɛ̍ yīya᷄ŋ ndu̍ nɔ̍ a̍ sɔ̄ɔ̍ŋ ŋ̄ pūm o̍kɔ̄ɔ̄ wo̍ chō te̍ŋge̍ŋ a̍ mɛ̄ɛ̍ nya̍ nya̍ yīya̍ŋ a̍ mu̍ŋ o̍kɔ̄ɔ̄ yɛ̍ le̍.

²Kāni̍ fo̍ndōle̍, wāŋndo̍ ō pūm mbō nɔ̄ lāāla᷄ŋndo̍ māā ō nɔ̄ di̍ mbō dē nyɛ̄ o̍ nyɛ̄ fe̍e̍ cho̍ nyɛ̄ dīāā. Kɛ̍, wāna̍ nɔ̍ ho̍ō lāāla᷄ŋ bɔ̍ɔ̍ le̍ wo̍ mbō yēēmi̍a̍a̍ vīsīo̍ŋ, mɛ̄ɛ̍ lām lāpīo̍o̍ mbō dē.

³Kɛ̍ ndu̍yɛ̍ o̍ he̍ī ni᷄ŋ, wāna̍ nɔ̍ ho̍ō lāāla᷄ŋndo̍ māā ō nɔ̄ di̍ mbō dē nyɛ̄ o̍ nyɛ̄ dīāā fe̍e̍ wo̍ ō nɔ̍ mbō chūānu̍ŋ māā ō bɛ̄nda̍ mbo̍ hīāū a̍ wāna̍ di᷅ ho̍ō ŋ̄vīsī le̍ wo̍, mɛ̄ɛ̍ lām lāpīo̍o̍ wo̍ le̍. Ndu̍yɛ̍, wāna̍ di̍ā ho̍ō lām lāpīo̍o̍ su̍e̍e̍ wo̍ bɛ̍ɛ̍, ō nɔ̍ mbō pɛ̄ɛ̄sa̍ wāna̍ di̍ā ho̍ō nyɛ̄ o̍ nyɛ̄ dīāā fe̍e̍ wo̍ le̍. Kāni̍ fo̍ndōle̍, Mɛ̄lɛ̄ka̍ ndu̍ ndu̍ chɛ̍l ndu̍ le̍ wāa̍ wāna̍ ndɔ̄.

⁴Ndu̍yɛ̍, wānā pɛ̍ɛ̍sā bu̍ɛ̍ī pi̍la̍a̍ kpo̍so̍ŋ te̍. Ō tōsa̍ wa̍li̍ kɛ̍ndɛ̄, ō to̍sā wa̍li̍ kɛ̍ndɛ̄ le̍, Māsānɔ̍ ndɔ̄ɔ̍ pi̍la̍ nɔ̍ mbō kēlū yāmɛ̍ī kēŋ ni̍. Ndu̍yɛ̍, bu̍ɛ̍ī kōŋ nɔ̄lā mbō tōsa̍ wa̍li̍ kɛ̍ndɔ̄ɔ̍, kāni̍ fu̍u̍le̍, Māsānɔ̄ɔ̍ Mɛ̄lɛ̄ka̍ ndu̍ nɔ̍lā mbō tōsa̍ mī bu̍ɛ̍ī ndɔ̄ɔ̍ tōsa̍ wa̍li̍ kɛ̍ndɔ̄ɔ̍.

⁵Wāŋndo̍ ō pūm ō nɔ̄ yīya᷄ŋndo̍ māā pāa̍le̍ŋ lē pūm lē chō lē bɛ̄ndū mi̍ lē hīāū pālɛ̍i̍ ī pīlɛ̍ī fa̍ū. Wāŋndo̍ ō pūm yɛ̍, ndu̍ ndu̍ nɔ̍ yīya᷄ŋndo̍ māā pālɛ̍i̍ kpo̍u̍ nyɔ̄ɔ̍ ō pīlɛ̍ kpe̍ i̍ cho̍ ni̍. Kɛ̍ ndu̍yɛ̍, wānā o̍ wānā sūɛ̍i̍ ŋ̄ yīya̍ŋ o̍ kɔ̄l nūmndo̍ ni᷄ŋ māā ī bɛ̄nda̍ le̍ tōsāa̍ ve̍, ā nɔ̄ mā yi̍ya̍ŋ fɛ̍ɛ̍ŋ a̍ ndi̍ o̍kɔ̄ɔ̄ nyɛ̄ kɛ̄ndɛ̍ī māā lēkɛ̍ndɛ̍ī ī bɛ̄nda̍ le̍ tōsāa̍.

⁶Wāna̍ chu̍ā ho̍ō pāa̍le̍ŋ lē pūm māā lē chō pāa̍le̍ bɛ̍ndū wo̍, le̍ Māsānɔ̄ɔ̍ Mɛ̄lɛ̄ka̍ bɛ̄ɛ̄le̍ŋ kīo̍o̍, o̍ chu̍a̍ pāa̍le̍ le̍ŋ lē bɛ̄ndū ni̍. Wāna̍ di̍ā ho̍ō nyɛ̄ o̍ nyɛ̄ dīāā wo̍ bɛ̍ɛ̍, le̍ Māsānɔ̄ɔ̍ Mɛ̄lɛ̄ka̍ bɛ̄ɛ̄le̍ŋ kīo̍o̍, o̍ di̍ā nyɛ̄ o̍ nyɛ̄ fe̍e̍ ni̍. Kāni̍ fu̍u̍le̍, ō me᷄l Mɛ̍lɛ̄ka̍ ba̍li̍ka̍ le̍ nyɛ̄ dīāā kōŋ. Ndu̍yɛ̍, wāna̍ kɛ̍ɛ̄ le̍ nyɛ̄ dīa̍a̍ ō pūm dīo̍o̍ wo̍ bɛ̍ɛ̍, le̍ Māsānɔ̄ɔ̍ Mɛ̄lɛ̄ka̍ bɛ̄ɛ̄le̍ŋ kīo̍o̍, o̍ kɛ̍ɛ̄ le̍ ndu̍ dīo̍o̍ ni̍. Ndu̍yɛ̍ ndu̍ bɛ̍ɛ̍ ō me᷄l Mɛ̄lɛ̄ka̍ ba̍li̍ka̍.

⁷Kāni̍ fo̍ndōle̍, na̍a̍ fa̍ū wānā o̍ wānā cho̍ mbō wa̍ yōōmū le̍ ndu̍ pi̍la̍ su̍e̍e̍ le̍. Ndu̍yɛ̍, wānā o̍ wānā cho̍ mbō vī le̍ ndu̍ pi̍la̍ su̍e̍e̍ le̍.

⁸Tē ŋ̄ wa̍ yōōmū pɛ̍, mɛ̄ɛ̍ ŋ̄ chō yōōmū le̍ Māsānɔ̄ɔ̍ Mɛ̄lɛ̄ka̍. Ndu̍yɛ̍, tē ŋ̄ vī pɛ̍, mɛ̄ɛ̍ ŋ̄ vī le̍ Māsānɔ̄ɔ̍ Mɛ̄lɛ̄ka̍. Le̍la̍ŋ, ŋ̄ wa̍ yo̍o̍mū, kɛ̄lɛ̄ŋgāā ŋ̄ wu̍, Māsānɔ̄ɔ̍ Mɛ̄lɛ̄ka̍ nɔ̍ na̍a̍ ni̍.

⁹Kāni̍ fo̍ndōle̍, Ki̍li̍tī vi᷅ mbo̍ mīīŋgū vɛ̄lɛ̄ yōōmū le̍ mbō wa̍ Māsānɔ̄ɔ̍ Mɛ̄lɛ̄ka̍ ŋ̄wāŋndā chīe̍e̍ cho̍o̍, a̍ vi᷅ ni᷅ŋ nda̍ ni̍ a̍ wānāa̍ cho̍ yōōmū wa̍.

¹⁰Le̍la̍ŋ, vɛ᷅ mi̍ nya̍ pūm nda̍ wā chāāŋāā nyāā wa̍nāā lāāla᷄ŋnda̍ pɛ̄ɛ̄sāa̍? Vɛ᷅ mi̍ nya̍ pūm nda̍ wā chāāŋāā nyāā wa̍nāā lāāla᷄ŋnda̍ chūa̍a̍ chɔ̍dɔ̄? Lā nɔ̍ mī lā tōsa̍ le̍nde̍ le̍. Kāni̍ fo̍ndōle̍, pāa̍le̍ cho̍ fūūlūū na̍a̍ kpo̍u̍ mī ŋ̄ si᷄m Mɛ̄lɛ̄ka̍ o̍ hɔ̄l mbō kɔ̄ɔ̄sa̍ a̍ na̍a̍.

¹¹Yāu̍ Mɛ̄lɛ̄ka̍a̍ dīmi̍ āā, “Ya̍ Ma̍sānɔ̄ɔ̍ Mɛ̄lɛ̄ka̍ mī di̍mu̍l nya̍, ha̍a̍a̍ mi̍ I̍ wa᷅ Mɛ̄lɛ̄ka̍ cho̍ yōōmū wo̍, wānā o̍ wānā cho̍ wūla̍ŋ bāŋɔ̄ɔ̄ ya̍ o̍ lābɛ̄ŋgu̍ ni̍ŋ. Ndu̍yɛ̍, mɛ̄ɛ̍ mī wānā o̍ wānā di̍mi̍ wāŋnda̍ o̍ hɔ̄l māā ya̍ cho̍ Mɛ̄lɛ̄ka̍ ni̍.”

¹²Le̍la̍ŋ, na̍a̍ pi̍lɛ̍ŋ pi̍lɛ̍ŋnda̍ kpo̍u̍, nyɛ̄ o̍ nyɛ̄ na̍a̍ ŋ̄ tōsa̍ ŋ̄ nɔ̄ le̍ nyūnāa̍ mūlīo̍o̍ o̍ Mɛ̄lɛ̄ka̍ lo̍ a̍ ndu̍ o̍kɔ̄ɔ̄.

¹³Le̍la̍ŋ, wānā o̍ wānā, lā ŋ̄ pɛ̍ɛ̍si̍āŋ ndɛ̄ vēllāa̍ vēllē le̍. Nyɛ̄ na̍a̍ ŋ̄ nɔ̄ lē tōsāa̍ wo̍ ndu̍ cho̍ ni̍, māā ŋ̄ nɔ̄nu᷅ŋ o̍ lākɔ̄l māā sɔ̄ɔ̍ŋ na̍a̍ ŋ̄ tōsā wo̍ŋ ŋ̄ wa᷅ sɔ̄ɔ̍ŋ to̍sa̍ mī chāa̍ŋ nāā wa̍nā la̍a̍la᷄ŋndo̍ tōsa̍ yɔ̄ŋ wɔ̄ɔ̍ŋndo̍ wo̍ŋ te̍.

¹⁴I̍ cho̍ he̍ī dīmīo̍o̍ māā wāna̍ cho̍ o̍ dīōm pīlɛ̍ ni᷄ŋ a̍ Māsānɔ̄ɔ̍ Chi̍i̍sū. Māā I̍ si̍nā wa̍la̍ŋ māā nyɛ̄ o̍ nyɛ̄ dīāā cho̍ mī ndu̍ ndu̍ nɔ̍la̍ tōsā mī wāŋndo̍ sīmnu᷄ŋ o̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l te̍. Kɛ̍ ndu̍yɛ̍, tē wāŋndo̍ pi̍la̍ yi̍ya̍ŋ pɛ̍ māā tē ō dē nyɛ̄ dīa̍a̍ ō pūm pɛ̍ māā ō sīmnu᷄ŋ o̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l, mɛ̄ɛ̍ le̍ wānā ko̍ŋ nyɛ̄ dīāā kōŋ chō nyɛ̄ dīa̍a̍ si̍i̍ŋgu̍u̍ ndu̍ wānā nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l.

¹⁵Tē ō wa̍ pɛ̍, māā nyɛ̄ dīa̍a̍ ō pūm chō tē ā dē ndu̍ cha̍a̍ŋ nūm wa̍nā la̍a̍la᷄ŋndo̍ o̍ hɔ̄l pɛ̍, wānā ko̍ŋ sɔ̄la̍ kɔ̄l tāmbɛ̍i̍yo̍, tē ā dē nyɛ̄ dīāā kōŋ ndu̍ o̍ hɔ̄l pɛ̍, mɛ̄ɛ̍ ō cho̍ ka̍a̍lā le̍ ŋ̄ chɔ᷄m ko̍ŋ cha̍a̍ŋ nūm ko̍ŋ te̍. To̍sā a̍ sa̍bū mī nyɛ̄ dīāā ŋ̄ dīā wo̍ tōsa̍ mī wāna̍ Ki̍li̍tī sɔ̍la̍ ho̍ō pīɔ̍mndo̍ le̍ ndu̍ wo̍ ō hu᷄ŋ wa᷅ ō tɛ̄ɛ̄mbāā le̍.

¹⁶Nyɛ̄ ŋ̄ yīya̍ŋ o̍ kɔ̄l nūmndo̍ ni᷄ŋ māā ō na᷄ŋ ndo̍, wāŋnda̍ ā di̍mī lɛ̄ a̍ ndu̍ o̍kɔ̄ɔ̄ māā ō chō ō wɔ̄ɔ̍ŋ te̍.

¹⁷Kāni̍ fo̍ndōle̍, Mɛ̄lɛ̄ka̍ wāa̍ wāŋnda̍ chōo̍ ma̍sā ō cho̍ su̍ɛ̍i̍ chu̍a̍ā sāwā a̍ nyɛ̄ dīāā wānā di̍ā wo̍ o̍kɔ̄ɔ̄, kɛ̄lɛ̄ŋgāā a̍ nyɛ̄ wānā ko᷅l lo̍ o̍kɔ̄ɔ̄ le̍. Sūɛ̍i̍ Nyi̍na̍ Kāsi̍ Mɛ̍lɛ̄ka̍a̍ tōsā ve̍ i̍ cho̍ ni̍. Ko̍ŋ cho̍ ni̍, wāŋndo̍ sīīŋgūūwo̍ wānā sa̍kpō Mɛ̄lɛ̄ka̍ o̍ hɔ̄l, a̍ wāŋnda̍ kɔ̄l nyūlōo̍ kīo̍o̍ a̍ kɔ̄l kɛ̄ndɔ̄ɔ̍.

¹⁸Ndu̍yɛ̍, tē lā sāāŋgi̍a̍l Ki̍li̍tī o̍ nɛ̄īyo̍ ho̍ō chōo̍ pɛ̍, mɛ̄ɛ̍ lā nɛ̄ŋi̍ ndu̍ kɔ̄l. Ndu̍yɛ̍, wāŋndā chīe̍e̍ya̍ bɛ̍ɛ̍ ā nɔ̄lā mā dīmi̍ māā nyɛ̄ nya̍ tōsa̍ wo̍ na᷄ŋ.

¹⁹Le̍la̍ŋ, sɔ̄ɔ̍ŋ hu᷅ŋ a̍ kɔ̄l nyūlōo̍, ndu̍yɛ̍ mī ŋ̄ lūe̍i̍ chāāŋāā nyāa̍ kpāāyāa̍ wo̍ŋ, mu̍ŋ nya̍ dɔ̄u̍ kɔ᷅llo̍ o̍ tōsāa̍ ni̍.

²⁰Lā tɛ̍ɛ̍mbūū wa̍li̍ Mɛ̄lɛ̄ka̍a̍ le̍ sūɛ̍i̍ nyɛ̄ dīa̍a̍ le̍. Nyɛ̍ o̍ nyɛ̍ cho̍ nyɛ̄ dīāā ō na᷄ŋ le̍ dīo̍o̍. Kɛ̍ ndu̍yɛ̍, ō chō ī wɔ̄ɔ̍ŋ le̍ mī nyɛ̄ dīāā ŋ̄ dīā wo̍ tōsa̍ mī wāŋndo̍ ō tōsa̍ yɔ̄ŋ wɔ̄ɔ̍ŋndo̍.

²¹Tē ō wa̍ le̍nde̍ pɛ̍, mɛ̄ɛ̍ o̍ bɛ̍nda̍ le̍ tōsāa̍ wo̍ cho̍ ni̍, lā di̍ā ŋ̄vīsī le̍, lā ko᷅l māmūɛ̄ī le̍, kɛ̄lɛ̄ŋgāā nyɛ̄ o̍ nyɛ̍ to̍sā mī chāa̍ŋ nyā wa̍nā la̍a̍la᷄ŋndo̍ tōsa̍ yɔ̄ŋ wɔ̄ɔ̍ŋndo̍, lā to̍sā le̍.

²²Le̍la̍ŋ, lāāla᷄ŋ nu̍m ŋ̄ nɔ̍ a̍ sūɛ̍i̍ he̍ī o̍kɔ̄ɔ̄ wo̍, ō wa̍ su̍ɛ̍i̍ wa̍ā nūm pi̍la̍ tɛ̄ɛ̄ŋ nya̍ Mɛ̄lɛ̄ka̍. Tē wāŋndo̍ tōsa̍ pɛ̍ su̍ɛ̍i̍ o̍ yi̍ya̍ŋ o̍ kɔ̄l ndɔ̄ɔ̍ ni᷄ŋ māā ī bɛ̄nda̍ le̍ tōsāa̍ ve̍ pɛ̍, ndu̍yɛ̍, mbō ve̍ su̍ɛ̍i̍ kɔ̄l ndɔ̄ɔ̍ pɛ̄ɛ̄sa̍ ndu̍ le̍ ndi̍ le̍, mɛ̄ɛ̍ ō pɛ̄l tɔ̄nɔ̄ɔ̍.

²³Kɛ̍, tē wāŋndo̍ ō nɔ̄ kīīsa᷄ŋndo̍ le̍ nyɛ̄ dīa̍a̍ ō pūm dīo̍o̍ pɛ̍, kɛ̍ ndu̍yɛ̍, o̍ ko̍ŋ kɔ̍ɔ̍lī, mbō dē nyɛ̄ dīāā kōŋ ka̍ŋga̍la̍ŋ pɛ̍, mɛ̄ɛ̍ Mɛ̄lɛ̄ka̍ nɔ̄lā mbō pɛ̄ɛ̄sa̍ ndu̍. Kāni̍ fu̍u̍le̍, nyɛ̄ o̍ to̍sa̍ wo̍, ō tōsa̍ ndu̍ o̍ lāāla᷄ŋ ni̍ŋ te̍. Ndu̍yɛ̍, nyɛ̄ o̍ nyɛ̄ wāŋndo̍ tōsa̍ pɛ̍, mbō tōsa̍ ndu̍ o̍ lāāla᷄ŋ ni᷄ŋ te̍, mɛ̄ɛ̍ yɔ̄ŋ wɔ̄ɔ̍ŋndo̍ i̍ cho̍ ni̍.