Read Southern Kisi Lu̍o̍māŋnda̍ 2 Bible Online

Lu̍o̍māŋnda̍ 2 - Southern Kisi bible

Lu̍o̍māŋnda̍ 2

¹Le̍la̍ŋ chāa̍ŋ nūu̍, nūm o̍ nu᷄m ki̍lu̍l chāa̍ŋ nu᷄m yāmɛ̍i̍ pɛ̍, mɛ̄ɛ̍ nūm bɛ̍ɛ̍ a̍ he̍lūŋ o̍ sūɛ̍i̍ ka̍lɛ̄i̍ ni᷄ŋ kpo̍so̍ŋ te̍. Kāni̍ fo̍ndōle̍, tē a̍ ki̍lu̍l wāŋndo̍ yāmɛ̍i̍ le̍ sūɛ̍i̍ wɔ̍ɔ̍ŋ o̍ cho̍ tōsāa̍ ve̍ pɛ̍, kɛ̍ ndu̍yɛ̍ nūm bɛ̍ɛ̍ mā tōsā su̍ɛ̍i̍ wa̍ā le̍nde̍i̍ pɛ̍, mɛ̄ɛ̍ nūm pi̍la̍ chi̍i̍ yāmɛ̍i̍ kīlūlɔ᷄ŋ.

²Ndu̍yɛ̍ ŋ̄ sīnā māā tē ō wa̍ pɛ̍ mī wāŋndā chīe̍e̍ya̍ ā tōsa̍ sɔ̄ɔ̍ŋ wɔ̍ɔ̍ŋ wāā le̍ndo̍ŋ pɛ̍, ndu̍yɛ̍ mī Mɛ̄lɛ̄ka̍ kīlu̍l nda̍ yāmɛ̍i̍ le̍ mu̍ŋ pɛ̍, mɛ̄ɛ̍ o̍ nɛ̄ī o̍ ke̍lū ndi̍ ni̍.

³Chāa̍ŋ nūu̍, sɔ̄ɔ̍ŋ wāŋndo̍ tōsa̍ ma̍ kīlūl ndu̍ yāmɛ̍i̍ le̍ mu̍ŋ ndo̍ŋ, tē ō wa̍ pɛ̍ mī nūm pi̍la̍ bɛ̍ɛ̍ mā mu̍li̍ŋ mu̍ŋ vɛ̄lɛ̄ tōsāa̍, mɛ̄ɛ̍ nūm bɛ̍ɛ̍ a̍ he̍lūŋ kpo̍so̍ŋ te̍. Nūm bɛ̍ɛ̍ kīlūllo̍ Mɛ̄lɛ̄ka̍ kīlūl nu̍m yāmɛ̍i̍ ni̍.

⁴Le̍ mɛ̄ɛ̍ Mɛ̄lɛ̄ka̍ chō wāna̍ īkɛ̄ndɛ̄ bɛ̄ndū, ndu̍yɛ̍ mbō kɛ̄sī kɔ᷅l ndɔ̄ɔ̍, ndu̍yɛ̍ mbō bīūnūŋ nya̍ yɛ̍, mɛ̄ɛ̍ mu̍ŋ nya̍ chu̍a̍ ni̍ māā sɔ̄ɔ̍ŋ fo̍ndo̍? Lā sīna̍ pɛ̍ŋgu̍ māā le̍ sa̍bū Mɛ̄lɛ̄ka̍ tōsāl na̍a̍ kɛ̄ndɛ̄i̍ yo̍ cho̍ ni̍ māā le̍ mī ŋ̄ ma᷄l yɔ̄ŋndā wɔ̄ɔ̍ŋnda̍ŋ.

⁵Kɛ̍ lā nɔ̄ bɔ̄ɔ̍ bo̍llē kālāle̍ŋ. Lā cho̍ wa̍nāā tūɛ̄īyāā īsɔ̄ɔ̍ le̍. Le̍ he̍ī, tu̍mbe̍ Mɛ̄lɛ̄ka̍ dōōnūŋ ni̍ŋ ŋ̍wa᷅ŋndā chīe̍e̍ mbō tūsi̍ nda̍ nyɛ̄ pālāa̍ chōo̍ wo̍, tu̍mbe̍ ko̍ŋ nya̍ pi̍la̍ chō chūūŋgi̍āŋndo̍ chōo̍ ni̍. Mɛ̄lɛ̄ka̍ o̍ ki̍a̍lū ya᷅mɛ̍i̍ o̍ nɛ̄ī sa̍kpō wo̍, tē pāa̍le̍ o̍ ki̍lūl ni̍ŋ chi̍e̍ēŋndo̍ yāmɛ̍i̍ le̍ŋ lē fūūlu̍u̍ pɛ̍, ō chō nya̍ nyɛ̄ pālāa̍ tūsī chōo̍ ta̍u̍ ta̍u̍.

⁶Kāni̍ fu̍u̍le̍, wānā o̍ wānā, mɛ̄ɛ̍ kūɛ̍i̍la̍ ndɔ̄la̍ŋ lā wā yɛ̍, le̍nde̍ Mɛ̄lɛ̄ka̍ pāāwā ni̍ŋ ndu̍ ni̍.

⁷Wāŋnda̍ ā pūm ā chō hīōūwɔ̄ɔ̄ lāchī a̍ īkɛ̄ndɛ̄i̍ tōsāa̍. Ndu̍yɛ̍ ā chō kīndīo̍o̍ le̍ mī Mɛ̄lɛ̄ka̍ tōsa̍ mā sɔ̄la̍ nāŋɔ̄ɔ̄ ndɔ̄ɔ̍ a̍ bɛ̄ɛ̄le̍ŋ, ndu̍yɛ̍ māā mbō tōsa̍ ā vi᷅ lɛ̍ le̍. Mɛ̄lɛ̄ka̍ chō wānāā kāŋ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ kē.

⁸Kɛ̍ ndu̍yɛ̍, wānāa̍ ki̍ndī ha̍ā le̍ nda̍ pi̍la̍ dɛ̍nɛ̍ ndā kɛ̍ndɔ̄ɔ̍ su̍e̍e̍ wa̍, ndu̍yɛ̍ su̍ɛ̍i̍ cho̍ sa̍kpō le̍ tōsāa̍ ve̍ mā kɛ̄ɛ̄ ndi̍ tōsāa̍ mā tūāl sɔ̍ɔ̍ŋ wɔ̍ɔ̍ŋndo̍ŋ kɔ̄ɔ̄lī wa̍, wānāā kāŋ Mɛ̄lɛ̄ka̍ chō tu̍mbe̍ dɔ̍u̍nɔ᷄ŋ a̍ nda̍ mbō tūsi̍ nda̍ nyɛ̄ pālāa̍ chōo̍.

⁹Wānā o̍ wāna̍ cho̍ dɛ̍nɛ̍ wɔ̍ɔ̍ŋndo̍ tōsāa̍, Mɛ̄lɛ̄ka̍ chō tōsā mā sɔ̄la̍ dɛ̍nɛ̍ pa̍lāa̍ a̍ nyɛ̄ nɛ̄īyāa̍. A̍ Chu̍ūwa̍ fɛ̍lɛ̍ŋ i̍ cho̍ yɔ̄nɔ᷄ŋ, o̍ ko̍ŋ kɔ̍ɔ̍lī, mī ī yɔ̄nu̍ŋ a̍ wānāa̍ cho̍ a̍ chu̍ū le̍ wa̍.

¹⁰Kɛ̍ wānā o̍ wāna̍ to̍sā kɛ̍ndɛ̄i̍, Mɛ̄lɛ̄ka̍ chō tōsā mā sɔ̄la̍ nāŋɔ̄ɔ̄ ndɔ̄ɔ̍, a̍ bɛ̄ɛ̄le̍ŋ, a̍ kɔ̄l nyūlōo̍. A̍ Chu̍ūwa̍ fɛ̍lɛ̍ŋ i̍ cho̍ yɔ̄nɔ᷄ŋ, o̍ ko̍ŋ kɔ̍ɔ̍lī mī ī yɔ̄nu̍ŋ a̍ wānāa̍ cho̍ a̍ Chu̍ū le̍ wa̍.

¹¹Kāni̍ fo̍ndōle̍, Mɛ̄lɛ̄ka̍ ndu̍ ndu̍ bīyɔ̄ɔ̄ pīlɔ̍ɔ̍ kpe̍ o̍ bi̍ī wa᷅ŋndā chīe̍e̍ya̍ fa̍ū ni̍.

¹²Tē ō wa̍ pɛ̍ mī wāŋndo̍ tōsa̍ yɔ̄ŋ wɔ̄ɔ̍ŋndo̍, kɛ̍ ndu̍yɛ̍ mbō ve̍ wa᷅na̍ si̍nā sa̍wāla̍ Mɛ̄lɛ̄ka̍ ke̍ Mūu̍sē la̍ŋ te̍, wānā ko̍ŋ Mɛ̄lɛ̄ka̍ ki̍lūl ndu̍ īyāma̍ mɛ̄ɛ̍ sāwāla̍ la̍ŋ lā dīmi̍ yɛ̍ le̍. Kɛ̍ ndu̍yɛ̍ mbō sɔ̄la̍ pīɔ̍m kpe̍e̍kpe̍i̍yo̍ le̍ yɔ̄ŋ ndɔ̄ wɔ̍ɔ̍ŋ kōŋ. Kɛ̍ tē wāna̍ si̍nā sa̍wāla̍ la̍ŋ ndo̍ ō tōsa̍ yɔ̄ŋ wɔ̄ɔ̍ŋndo̍ pɛ̍, mɛ̄ɛ̍ la̍ di̍mi̍ yɛ̍ Mɛ̄lɛ̄ka̍ kīlūl ndu̍ yāmɛ̍i̍ ni̍.

¹³Kāni̍ fo̍ndōle̍, ō cho̍ le̍ nīla̍ŋ yāŋɔ̄ɔ̍ mī wāŋndo̍ tūēī nyɛ̄ sāwāla̍ŋ lā dīmi̍ wo̍ le̍ Mɛ̄lɛ̄ka̍ tōsā mbō sīmnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l te̍. Tē wāŋndo̍ tōsa̍ nyɛ̄ la̍ di̍mi̍ wo̍ pɛ̍, o̍ ko̍ŋ Mɛ̄lɛ̄ka̍ tōsā ni̍ mbō sīmnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l.

¹⁴Sāwāla̍ Mɛ̄lɛ̄ka̍ ke̍ Mūu̍sē la̍ŋ lā ve̍ la̍ yɔ̍ŋgāā o̍ wānāa̍ cho̍ a̍ Chu̍ū le̍ wa̍ lo̍ le̍. Kɛ̍ ndu̍yɛ̍, tē nda̍ pi̍la̍ kɔ̄ltā ndāla̍ŋ lā dīmu̍l nda̍ pɛ̍ māā ā tōsa̍ nyɛ᷅ sāwāla̍ŋ nda᷅ŋ lā dīmi̍ wo̍, ndu̍yɛ̍ mā tōsa̍ ndu̍ pɛ̍, mɛ̄ɛ̍ ko̍ŋ chɔ᷅m ni̍ māā mi̍ chē bɛ̍ɛ̍ sāwāla̍ ka̍lāla̍ŋ lā ve̍ la̍ yɔ̍ŋgāā le̍ nda̍ le̍ ni̍, kɛ̍ māā ā sīnā nyɛ᷅ wāna̍ chi̍o̍o̍ nɔ̄ mbō tōsa̍ wo̍ a̍ nyɛ̄ o̍ nɔ̍ mbō tōsa̍ le̍ wo̍.

¹⁵Sɔ̄ɔ̍ŋ nda̍ tōsā wo̍ŋ, mu̍ŋ chɔ᷅m ni̍ māā nyɛ̄ sāwāla̍ŋ lā dīmi̍ māā ā tōsa̍ wo̍ ō chō nda̍ o̍ lākɔ̄l. Ndu̍yɛ̍ mī kɔ̄ltā ndāla̍ŋ lā tɛ̄nda̍l nda̍ se̍īle̍ŋ. Te̍le̍ŋnda̍ŋ lā pūm wāŋndo̍ pi̍la̍ mī kɔ̄l ndɔ̄ɔ̍ yāāla̍ ndu̍. Te̍le̍ŋnda̍ŋ lā pūm mbō ke̍ ndu̍ di̍.

¹⁶Mɛ̄ɛ̍ le̍nde̍ i̍ yɔ̍nūŋ ni̍ŋ o̍ pāa̍le̍ kɔ̍ɔ̍sɔ̍le̍ŋ chōo̍ ni̍. O̍ pāa̍le̍ le̍ŋ chōo̍, Mɛ̄lɛ̄ka̍ chō tōsā mī Chi̍i̍sū Ki̍li̍tī ki̍lu̍l wāŋnda̍ yāmɛ̍i̍ a̍ sɔ̄ɔ̍ŋ cho̍ ŋ̄ vīāŋna᷄ŋ o̍ kɔ̄ltā ndāla̍ŋ ni᷄ŋ ndo̍ŋ o̍kɔ̄ɔ̄. Le̍nde̍ i̍ cho̍ ī dīmīa̍ŋ o̍ Yōōŋgū Kɛ̄ndɛ̍ Mɛ̄lɛ̄ka̍ ya̍ I̍ cho̍ wāŋnda̍ dīmūllo̍ wo̍ ni᷄ŋ ni̍.

¹⁷Nya̍ Chu̍ūwa̍, lā vēēlu̍ nya̍ pi̍la̍ māā Chu̍ūwa̍ nya̍ chō ni̍. Lā dīmi̍ māā lā nɔ̄ tīīnda᷄ŋndo̍ o̍ sāwāla̍ Mɛ̄lɛ̄ka̍ ke̍ Mūu̍sē la̍ŋ ni᷄ŋ. Ndu̍yɛ̍ lā chō pɛ̄ɛ̄lɔ᷄ŋndo̍ māā nya̍ cho̍ Mɛ̄lɛ̄ka̍ wānāā ndūa̍a̍ kɔ̄lla̍ ni̍.

¹⁸Ndu̍yɛ̍ māā lā sīnā nyɛ᷅ Mɛ̄lɛ̄ka̍ hɛ̄na̍ŋ nya̍ le̍ mī lā tōsa̍ wo̍. Ō fūla̍ o̍ ko̍ŋ kɔ̍ɔ̍lī, sāwāla̍ Mɛ̄lɛ̄ka̍ ke̍ Mūu̍sē la̍ŋ lā pɛ̄ɛ̄ku̍ nya̍ mi̍ lā sīnā nyɛ̍ bɛ̍nda̍ le̍ tōsāa̍ wo̍.

¹⁹Ndu̍yɛ̍ nya̍ pi̍la̍ lā nɔ̄ yīya᷄ŋndo̍ māā nya̍ cho̍ wānāa̍ chɔ᷅m wa̍nāa̍ chi᷅ le̍ wa̍ nɛ̄īyo̍ wa̍ ni̍, māā nya̍ cho̍ nyɛ̄ wa̍wo̍ŋndo̍ le̍ wānāa̍ cho̍ o̍ nyūmnda̍ŋ ni᷄ŋ nda̍ ni̍.

²⁰Lā nɔ̄ yīya᷄ŋndo̍ māā nya̍ pɛ̍ɛ̍kū wānāa̍ nɔ̍ kpa̍a̍yā o̍ nyi̍nāā ndāa̍ ni᷄ŋ te̍ wa̍ ni̍ a̍ wānāa̍ nɔ̍ wɔ̄ le̍ pɛ̄ɛ̄kōo̍ sɔ̄lāa̍ wa̍. Ndu̍yɛ̍ vɛ̍lɛ̄ mɛ̄ɛ̍ sāwāla̍ Mɛ̄lɛ̄ka̍ ke̍ Mūu̍sē la̍ŋ lā chō ni᷅ŋ nya̍ lā yɔ̄ŋga᷄ŋ yɛ̍, lā nɔ̄ ni᷅ŋ o̍ kɔ̄l māā lā sīnā ni᷅ŋ dɛ̍nɛ̍ o̍ dɛ̍nɛ̍, ndu̍yɛ̍ māā lā sīnā ni᷅ŋ tōnya̍a̍ kpo̍u̍.

²¹Tē ō wa̍ pɛ̍ mī lā nɔ̄la̍ mī lā pɛ̄ɛ̄ku̍ chāāŋnda̍, vɛ᷅ ni᷅ŋ lā pɛ̍ɛ̍kū nya̍ pi̍la̍ le̍? Lā chō wāŋnda̍ dīmūllo̍ māā wānā yɔ᷅ŋ le̍vi̍i̍ le̍, kɛ̍ mī nya̍ yɔ̄ŋ vīīle̍ŋ.

²²Lā chɛ᷄ŋ pɛ̍ lā dīmi̍ māā wānā su̍u̍ndā a̍ la̍nɔ̍ pi̍la̍ le̍, kɛ̍ mī nya̍ sūūndā a̍ lāāndāā pi̍la̍a̍. Lā hɛ̄na̍ŋ a̍ nyɛ̄m chēle̍ŋndo̍ŋ sōōlūūwo̍ kpo̍so̍ŋ te̍, kɛ̍ ndu̍yɛ̍ mī lā chīīmbūū nyɔ̍ɔ̍ŋ o̍ chīɛ̄īlā nda̍ sōōlūū nyɛ᷅m mu᷅ŋ nda̍ŋ ni᷄ŋ.

²³Lā chō pɛ̄ɛ̄lɔ᷄ŋndo̍ le̍ mɛ̄ɛ̍ Mɛ̄lɛ̄ka̍ yɔ̄ŋgu̍ nya̍ sāwāla̍ o̍ ke̍ Mūu̍sē la̍ŋ yɛ̍. Kɛ̍ ndu̍yɛ̍ o̍ ko̍ŋ kɔ̍ɔ̍lī, mī lā tɛ̄ɛ̄mbūū sa̍wāla̍ ka̍lāla̍ŋ. O̍ he̍ī ni᷄ŋ, mɛ̄ɛ̍ nya̍ cho̍ tōsāa̍ ni̍ wāŋnda̍ nɔ̍ le̍bɛ̍ɛ̍ le̍ Mɛ̄lɛ̄ka̍ le̍.

²⁴Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ le̍nde̍ āā, “Sɔ̄ɔ̍ŋ wɔ̍ɔ̍ŋ nya̍ chō tōsāa̍ wo̍ŋ, mu̍ŋ cho̍ tōsāa̍ ni̍ mī wānāa̍ cho̍ a̍ Chu̍ū le̍ wa̍ ā tɛ̄ɛ̄mbūū di̍ōla̍ Mɛ̄lɛ̄ka̍la̍ŋ.”

²⁵Ndu̍yɛ̍ a̍ hīvīo̍o̍ sɔ̄lāa̍ o̍ chīɛ̄ī kɔ̄ɔ̄lī ndu̍, tē ō wa̍ pɛ̍ mā to̍sa̍ nyɛ̄ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ wo̍, mɛ̄ɛ̍ hīvī ŋ̄ sɔ̄la̍ wo̍ ō sīmnu᷄ŋ su̍ɛ̍i̍ tɔ̄nɔ̄ le̍ nūm. Kɛ̍ sɔ̍la̍ bɛ̍ɛ̍ hi̍vīo̍o̍ o̍ chīɛ̄ī kɔ̄ɔ̄lī, tē a̍ wa̍ sāwāla̍ la̍ŋ tɛ̄ɛ̄mbūūwo̍ pɛ̍, mɛ̄ɛ̍ ā sīmnu᷄ŋ māā wāna̍ cho̍ o̍ hi̍vīāā le̍ wo̍.

²⁶Ndu̍yɛ̍ vɛ̍lɛ̄ ō wa̍ bɛ̍ɛ̍ wa᷅na̍ cho̍ o̍ hi̍vīāā o̍ chīɛ̄ī kɔ̄ɔ̄lī le̍ wo̍ ni̍, tē ō tōsa̍ nyɛ̄ sāwāla̍ŋ nda᷅ŋ lā dīmi̍ wo̍ pɛ̍, mɛ̄ɛ̍ Mɛ̄lɛ̄ka̍ nɔ̄lā mbō chu̍a̍ ndu̍ māā wāna̍ cho̍ ō hīvīāā wo̍ o̍ cho̍ ni̍.

²⁷Tē ō wa̍ pɛ̍ mī wāna̍ sɔ̍la̍ hi̍vī yɔ̄ŋāa̍ ho̍ō le̍ wo̍ ō tōsa̍ nyɛ̄ sāwāla̍ŋ nda᷅ŋ lā dīmi̍ wo̍ pɛ̍, mɛ̄ɛ̍ ko̍ŋ cho̍ tōsā mī Mɛ̄lɛ̄ka̍ kīlu̍l nya̍ yāmɛ̍i̍. Kāni̍ fu̍u̍le̍, mi̍ chē bɛ̍ɛ̍ mi̍ lā nɔ̄ sāwāla̍ŋ nda᷅ŋ o̍ bā lā pōōnyīāā, ndu̍yɛ̍ mi̍ lā sɔ̄lā hīvīo̍o̍, kɛ̍ o̍ ko̍ŋ ni̍ŋ fa̍ū, mī lā tɛ̄ɛ̄mbūū la̍ŋ.

²⁸Ō yɛ̄ɛ̍nɛ̍ si̍i̍ŋgūū yɛ̍ wāŋndo̍ Chu̍ūnɔ̄ɔ̍ kpe̍e̍kpe̍i̍? Bāā mɛ̄ɛ̍ wāŋndo̍ wā o̍ kɔ̄ɔ̍le̍ŋ yɛ̍ chɔ᷅m ni̍ māā Chu̍ūnɔ̄ɔ̍ o̍ cho̍ ni̍? Sāko̍. Ndu̍yɛ̍ ō yɛ̄ɛ̍nɛ̍ cho̍ yɛ̄ hīvī kpe̍e̍kpe̍i̍yo̍? Bāā hīvī yɔ̄ŋāa̍ ho̍ō ni̍? Sāko̍.

²⁹Wāna̍ cho̍ Chu̍ūnɔ̄ɔ̍ o̍ kɔ̄llo̍ ni᷄ŋ ndo̍, ndu̍ cho̍ Chu̍ūnɔ̄ kpe̍e̍kpe̍i̍yo̍ ni̍. Ndu̍yɛ̍ nyɛ̍ yɔ̍nūŋ o̍ kɔ̄l wāŋndo̍ ni᷄ŋ ndo̍, ndu̍ cho̍ hīvī kpe̍e̍kpe̍i̍yo̍ ni̍. Ndu̍yɛ̍ Nyi̍na̍ Mɛ̄lɛ̄ka̍a̍ ndu̍ nɔ̍lā mbō tōsa̍ sɔ̄ɔ̍ŋ mu᷅ŋ ni̍. Ō cho̍ sa̍wāla̍ŋ chūa̍a̍ le̍ la̍ nɔ̍lā mu̍ŋ tōsā le̍. Wānā wa̍ā le̍nde̍ Mɛ̄lɛ̄ka̍ cha̍ndū ndu̍ ni̍, ō cho̍ wa᷅na̍ chi̍e̍e̍ le̍.