Read Southern Kisi Lu̍o̍māŋnda̍ 3 Bible Online

Lu̍o̍māŋnda̍ 3 - Southern Kisi bible

Lu̍o̍māŋnda̍ 3

¹Mɛ̄ɛ̍ o̍ he̍ī ni᷄ŋ, bāā Chu̍ūwa̍ chō māchūāā o̍ fo̍ndāŋ mbo̍ hīāū a̍ wānāa̍ cho̍ a̍ Chu̍ū le̍ wa̍? Sāko̍. Ndu̍yɛ̍ vɛ̄ɛ̍nɛ̍ hīvīo̍o̍ o̍ chīɛ̄ī kɔ̄ɔ̄lī o̍ ma̍lā yɛ̍ wāŋndo̍?

²Ō mālā o̍ nɛ̄īla̍ fa̍ŋgā ni᷄ŋ. Ō tāso̍o̍ cho̍ ni̍ māā Chu̍ūwa̍, nda̍ Mɛ̄lɛ̄ka̍ tīīnda̍ŋ le̍ yōōŋgū ndɔ̄ɔ̍ ni̍.

³Kɛ̍ ndu̍yɛ̍ tē ō wa̍ yɛ̄ mī ā pūm ā kɛ̄ɛ̍ le̍ nyɛ̄ yōōŋgū kālāa̍ dīmi̍ wo̍ tōsāa̍, bāā ko̍ŋ to̍sā mī Mɛ̄lɛ̄ka̍ kɛ̄ɛ̍ le̍ nyɛ̄ o̍ di̍mi̍ le̍ tōsāa̍ wo̍ tōsāa̍?

⁴Pe̍sī bɛ̍ɛ̍. Ndu̍yɛ̍ mi̍ chē bɛ̍ɛ̍ mi̍ ŋ̄wāŋndā chīe̍e̍ kpo̍u̍ a̍ wa᷅ wānāā lāchōōwā, ndu̍yɛ̍ ā lo᷅ o̍ lēdīōm te̍ ni̍, kɛ̍ ndu̍yɛ̍ Mɛ̄lɛ̄ka̍ ndu̍ tōnya̍a̍ o̍ di̍mī ni̍, ndu̍yɛ̍ lōo̍ o̍ lo᷅ o̍ dīōm ndɔ̄ɔ̍ chōo̍ ni̍. Dīōmnda̍ŋ lā chō lā pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Tē ā sōō pɛ̍, wāŋnda̍ kpo̍u̍ chɔ̄ɔ̍ nda̍ chā ni̍ māā tōnya̍a̍ ŋ̄ dīmi̍ ni̍. Ndu̍yɛ̍ le̍ pɛ̄ŋgu̍ o̍ pɛ̄ŋgu̍ tē lā kɔ̄ɔ̄sa̍ nya̍ wānāa̍ cho̍ nu̍m kɔ̄ɔ̄lī a̍ sūɛ̍i̍ ya̍ pɛ̍, di̍o̍o̍ ŋ̄ sɔ̄lā nda̍ ni̍.”

⁵Kɛ̍ ndu̍yɛ̍ mī wāŋnda̍ ā pūm ā kɔ̄ɔ̄sa̍ dɔ̍ɔ̍ māā yɔ̄ŋ wɔ̄ɔ̍ŋ wāŋndo̍ tōsā wo̍ ndu̍ to̍sā ni̍ mī wāŋnda̍ chē wa̍la̍ŋ māā Mɛ̄lɛ̄ka̍ ndu̍ sūɛ̍i̍ sa̍kpūe̍i̍ o̍ to̍sā ni̍. O̍ ko̍ŋ kɔ̍ɔ̍lī mā kɔ̄ɔ̄sa̍ māā tē ī wa̍ yɛ̄ le̍nde̍ pɛ̍, mɛ̄ɛ̍ ŋ̄ nɔ̄lā mī ŋ̄ kɔ̄ɔ̄sa̍ māā tē Mɛ̄lɛ̄ka̍ hāndu̍ na̍a̍ nyɛ̄ pālāa̍ chōo̍ le̍ yɔ̄ŋ nāā wɔ̍ɔ̍ŋndo̍ pɛ̍, mɛ̄ɛ̍ ī ve᷅ o̍ nɛ̄ī le̍ wa᷅. I̍ cho̍ ko̍ su̍ɛ̍i̍ o̍ nɛ̄i̍ īwāna̍ chi̍e̍e̍ya̍a̍ ni᷄ŋ pɔ̍. Bāā ō nāŋ mī ŋ̄ kɔ̍ɔ̍sa̍ kɔ̍ɔ̍sɔ̍ wa̍ā nu̍a̍ā?

⁶Sāko̍. Kɔ̍ɔ̍sɔ̍ wa̍ā nu̍a̍ā, ō cho̍ o̍ nɛ̄ī kpo̍so̍ŋ te̍. Kāni̍ fo̍ndōle̍, tē ī yɔ̄nu̍ŋ le̍nde̍ pɛ̍, mɛ̄ɛ̍ vɛ̄ɛ̄ Mɛ̍lɛ̄ka̍ nɔ̄lā yɛ̍ mbō kīlu̍l ŋ̄wāŋndā chīe̍e̍ kpo̍u̍ ya᷅mɛ̍i̍?

⁷Ndu̍yɛ̍ mī wāŋnda̍ ā pūm ā kɔ̄ɔ̄sa̍ dɔ̍ɔ̍ māā yɔ̄ŋ wɔ̄ɔ̍ŋ wāŋndo̍ ō to̍sā wo̍ ō tōsā mī wāŋnda̍ ā sāŋga̍la̍ Mɛ̄lɛ̄ka̍ ta̍u̍, kāni̍ fo̍ndōle̍ māā yɔ̄ŋ ndɔ̄ wɔ̍ɔ̍ŋ kōŋ tōsā mī wāŋnda̍ chē wa̍la̍ŋ māā Mɛ̄lɛ̄ka̍ ndu̍ sūɛ̍i̍ sa̍kpūe̍i̍ o̍ to̍sā ni̍. O̍ ko̍ŋ kɔ̍ɔ̍lī, mā kɔ̄ɔ̄sa̍ māā tē ī wa̍ yɛ̄ le̍nde̍ pɛ̍, mɛ̄ɛ̍ ɔ̍ɔ̄ le̍ sa̍bū Mɛ̄lɛ̄ka̍ kīlūl wa᷅ŋndo̍ yāmɛ̍i̍ māā ō nɔ̄ mbō sɔ̄la̍ nyɛ̄ pālāa̍ le̍ yɔ̄ŋ ndɔ̄ wɔ̍ɔ̍ŋndo̍ wo̍?

⁸Le̍ he̍ī, mī wāŋnda̍ ā pūm ā kɔ̄ɔ̄sa̍ māā ŋ̄ hīōūnu᷅ŋ lāchī a̍ yɔ̄ŋ wɔ̄ɔ̍ŋndo̍ tōsāa̍, le̍ mī dɛ̍nɛ̍ kɛ̍ndɛ̄ fūla̍ lēkɔ̍ɔ̍lī. Wānāā pūm ā chō kēīyo̍ ya̍ dīōla̍ŋ tɛ̄ɛ̄mbūūwo̍ māā le̍nde̍ ya̍ I̍ cho̍ wāŋnda̍ pɛ̄ɛ̄kōo̍ māā ā tōsa̍ ni̍. Kɛ̍ ndu̍yɛ̍ Mɛ̄lɛ̄ka̍ chō nda̍ yāmɛ̍i̍ kīlūl mbō tūsi̍ nda̍ nyɛ̄ pālāa̍ chōo̍ mɛ̄ɛ̍ nda̍ nɔ̄ kūēē mā sɔ̄la̍ yɛ̍.

⁹Mɛ̄ɛ̍ ɔ̍ɔ̄ ni᷅ŋ sūɛ̍i̍ le̍bo᷅lle̍ o̍ sūɛ̍i̍ he̍ī ni᷄ŋ? Bāā dīmīo̍o̍ na̍a̍ ŋ̄ chō ni̍ māā na̍a̍ Chu̍ūwa̍ ŋ̄ chō o̍ fo̍ndāŋ mbo̍ hīāū wānāa̍ cho̍ a̍ Chu̍ū le̍ wa̍? Sāko̍. Ī cho̍ le̍nde̍ kpo̍so̍ŋ te̍. Kāni̍ fu̍u̍le̍, I̍ di̍mi̍ ni᷅ŋ sūɛ̍i̍ he̍ī pāāndū māā wāŋndā chīe̍e̍ya̍ kpo̍u̍, Chu̍ūwa̍ ni̍, wānāa̍ cho̍ a̍ Chu̍ū le̍ wa̍ ni̍, māā nda̍ kpo̍u̍ ā chō yɔ̄ŋ wɔ̄ɔ̍ŋndo̍ o̍ bā bɛ̄ŋgu̍.

¹⁰Ī chō ī pōōnyīāā le̍nde̍ o̍ Yāu̍ Mɛ̄lɛ̄ka̍a̍ ni᷄ŋ āā, “Wānā pi᷅lɛ̍ bɛ̍ɛ̍ cho̍ mbō wa̍ sa̍kpō Mɛ̄lɛ̄ka̍ o̍ hɔ̄l te̍. Wānā wa̍ā le̍ndo̍o̍ ō pīlɛ̍ bɛ̍ɛ̍ cho̍ le̍.

¹¹Wānā o̍ wānā cho̍ mbō nɔ̄ sīnā pɛ̄ŋgo̍o̍ a̍ nɛ̄ī sa̍kpōo̍ o̍kɔ̄ɔ̄ le̍. Wāŋndo̍ ō pīlɛ̍ bɛ̍ɛ̍ cho̍ mbō nɔ̄ kɔ̄l lānda᷄ŋndo̍ le̍ wāa̍ lātūlu̍ a̍ Mɛ̄lɛ̄ka̍ le̍.

¹²Ŋ̄wāŋndā chīe̍e̍ kpo̍u̍ ā ma᷄l nɛ̄i̍ Mɛ̄lɛ̄ka̍a̍. Nda̍ kpo̍u̍ ā sīmnu᷄ŋ wa̍nāā fo̍ndō, tɔ̄nɔ̄ o̍ tɔ̄nɔ̄ bɛ̍ɛ̍ cho̍ o̍ nda̍ ni̍ŋ te̍. Ō pīlɛ̍ bɛ̍ɛ̍ cho̍ mbō tōsa̍ sūɛ̍i̍ kɛ̍ndɛ̄ le̍, wānā pi᷅lɛ̍ bɛ̍ɛ̍.

¹³Dīōmnda̍ fu̍lā nda̍ o̍ sōndō la̍ŋ lā wɔ̄u̍ ko̍ mɛ̄ɛ̍ sɛ̄īyo̍ būlī nu̍a̍ā mī nyɛ̄ wɔ̄ɔ̍ŋndo̍ fūla̍ chūŋ lēni᷄ŋ yɛ̍. Ndu̍yɛ̍ chōōlā wɔ̄ɔ̍ŋ wɔ̄ɔ̍ŋnda̍ŋ kpo̍so̍ŋ nda̍ o̍ sōndō. Dīōmnda̍ fu̍lā nda̍ o̍ sōndō la̍ŋ lā wɔ̄u̍ ko̍ mɛ̄ɛ̍ kīōlɔ̄ɔ̄ kɛ̄ūwo̍ ō wɔ̄u̍ nu̍a̍ā yɛ̍.

¹⁴Le̍ te̍le̍ŋ o̍ te̍le̍ŋ dīōmndā wɔ̄ɔ̍ŋ wɔ̄ɔ̍ŋndā bɛ̄ndūla̍ŋ a̍ dīōmndā kɔ̄l tūūla̍ŋ lā chō nda̍ fūlāa̍ o̍ sōndō.

¹⁵Ā chō bɔ̄ɔ̍ chɔ̍ chɔ̍ bɛ̍ndū le̍ wāna̍ chi̍o̍o̍ dīyɔ̄ɔ̍.

¹⁶Bā o̍ bā nda̍ kɔ̍ dɛ̍nɛ̍la̍ŋ lāāsīa̍a̍, o̍ ko̍ŋ kɔ̍ɔ̍lī, mā lūēī wa᷅ŋnda̍ mɔ̍nɛ̍i̍.

¹⁷Ā to̍sā su̍ɛ̍i̍ hi᷅ŋ a̍ kɔ̄l nyūlū wāŋnda̍ tɛ̄ɛ̄ŋ te̍.

¹⁸Ndu̍yɛ̍ sīōōŋīi̍ Mɛ̄lɛ̄ka̍ bɛ̍ɛ̍ ā nɔ̍ le̍.”

¹⁹O̍ ko̍ŋ kɔ̍ɔ̍lī, ŋ̄ sīnā māā nyɛ̄ o̍ nyɛ̄ sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍, lā dīmi̍ŋ ma̍di̍mīa̍ŋ le̍ wānāa̍ cho̍ o̍ sāwāla̍ la̍ŋ bɛ̄ŋgu̍ wa̍. Sāwāla̍ŋ nda᷅ŋ lā yɔ̄ŋgu̍ŋ ma̍yɔ̍ŋga᷄ŋ le̍ hāli̍ kpe̍ŋ wānā o̍ wānā nɔ᷅ ka᷅fɛ̍ī o̍ kāfɛ̍ī le̍ yɔ̄ŋ ndɔ̄ wɔ̍ɔ̍ŋndo̍ le̍. Lā yɔ̄ŋgu̍ŋ le̍ hāli̍ kpe̍ŋ mī ŋ̄wāŋndā chīe̍e̍ kpo̍u̍ o̍ chi̍e̍ēŋndo̍ chōo̍ mā hu᷄ŋ dɔ̍u̍nu᷄ŋ ko̍na̍ o̍ Mɛ̄lɛ̄ka̍ lo̍ a̍ nyɛ̄ o̍ nyɛ̄ nda̍ chō tōsāa̍ o̍kɔ̄ɔ̄.

²⁰Kāni̍ fo̍ndōle̍, wānā o̍ wānā nɔ̍lā mbō sīmnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l o̍ nyɛ̄ sāwāla̍ŋ nda᷅ŋ lā dīmi̍ wo̍ tōsāa̍ ni᷄ŋ te̍. Sāwāla̍ŋ nda᷅ŋ lā tōsā ma̍to̍sāā mī ŋ̄wāŋndā chīe̍e̍ a̍ sɔ̍la̍ sīnā pɛ̄ŋgo̍o̍ a̍ nyɛ̍ cho̍ yɔ̄ŋ wɔ̄ɔ̍ŋndo̍ wo̍ o̍kɔ̄ɔ̄.

²¹Kɛ̍ ndu̍yɛ̍ pɛ̄ŋgo̍o̍ ho̍ō ni᷅ŋ, Mɛ̄lɛ̄ka̍ chɔ᷄m nɛ̄i̍ o̍ lo̍o̍kū ŋ̍wa᷅ŋndā chīe̍e̍ si̍i̍ŋgūū wānāā sa̍kpō ndu̍ pi̍la̍ o̍ hɔ̄l lo̍. Ndu̍yɛ̍ ō cho̍ su̍ɛ̍i̍ sāwāla̍ chu̍a̍ā le̍. Yāu̍la̍ lāsāwa̍la̍ŋ ni̍ a̍ yāu̍la̍ wānāa̍ su̍a̍ā le̍ Mɛ̄lɛ̄ka̍ wa̍, mi̍ lā chɔ̄m a̍ nɛ̄īyo̍ ho̍ō o̍kɔ̄ɔ̄,

²²nɛ̄i̍ Mɛ̄lɛ̄ka̍ chɔ᷄m ho̍ō le̍ ŋ̄wāŋndā chīe̍e̍ si̍i̍ŋgūūwo̍ wānāā sa̍kpō ndu̍ pi̍la̍ o̍ hɔ̄l lo̍, ndu̍ yɔ̍nūŋ ni̍ māā tīīnda᷄ŋndo̍ dɔ̄wɔ̄ɔ̍ o̍ Chi̍i̍sū Ki̍li̍tī ni̍ŋ. Mɛ̄lɛ̄ka̍ ō tōsa̍ he̍ī le̍ wānā o̍ wāna̍ la̍a̍lāŋ a̍ Ki̍li̍tī. Yɛ̍ yɛ̍ bɛ̍ɛ̍ cho̍ wa᷅ŋndā chīe̍e̍ya̍ tɛ̄ɛ̄ŋ te̍.

²³Kāni̍ fo̍ndōle̍, ŋ̄wāŋndā chīe̍e̍ kpo̍u̍ ā tōsa̍ yɔ̄ŋ wɔ̄ɔ̍ŋndo̍. Ā bīī ma̍ fāŋa᷄ŋ o̍ nāŋɔ̄ɔ̍ Mɛ̄lɛ̄ka̍a̍ ni᷄ŋ ō ndu̍ o̍o̍ hɛ̍na̍ŋ nda̍ mā wa̍ lēni᷄ŋ ndo̍.

²⁴Kɛ̍ ndu̍yɛ̍ Mɛ̄lɛ̄ka̍ chɔ᷄m nɛ̄i̍ o̍ si̍i̍ŋgūū ŋ̍wa᷅ŋndā chīe̍e̍ wa̍nāā sa̍kpō ndu̍ pi̍la̍ o̍ hɔ̄l lo̍. Nyɛ̄ o̍ nyɛ̄ bɛ̍ɛ̍ ā yɔ̄ŋgu̍ le̍ ndu̍ le̍. Īkɛ̄ndɛ̄ ko̍ni̍ o̍ to̍sa̍l nda̍ ni̍. Ndu̍yɛ̍ ō tōsa̍ mātōsāā he̍ī sa̍na̍a̍ a̍ bāŋā Chi̍i̍sū Ki̍li̍tī ba̍ŋa̍ nda̍ wo̍.

²⁵Mi̍ Mɛ̄lɛ̄ka̍ yɔ̄ŋgū Chi̍i̍sū Ki̍li̍tī māā sa̍lā le̍ mā dīī ndu̍ le̍ yɔ̄ŋndā wɔ̄ɔ̍ŋnda̍ wāŋndā chīe̍e̍ya̍. Māā tē ā dɔ̄ū tīīnda᷄ŋ ndāa̍ o̍ ndu̍ ni̍ŋ pɛ̍, Mɛ̄lɛ̄ka̍ ma᷄l nda̍ le̍ yɔ̄ŋndā ndāla̍ wɔ̍ɔ̍ŋnda̍ŋ. Mɛ̄lɛ̄ka̍ tōsa̍ he̍ī le̍ wāŋnda̍ chɔ̄mndo̍ māā o̍ nɛ̄ī sa̍kpō o̍ to̍sā su̍ɛ̍i̍ ni̍. O̍ pāāndōo̍ ni᷄ŋ mi̍ Mɛ̄lɛ̄ka̍ bīūnu̍ŋ wa᷅ŋndā chīe̍e̍ya̍. Mbo̍ fāŋā hɔ̄lla̍ o̍ yɔ̄ŋndā wɔ̄ɔ̍ŋndā nda̍ wa̍ tōsāa̍ la̍ŋ.

²⁶Kɛ̍ pɛ̄ŋgo̍o̍ ho̍ō ni᷅ŋ, Mɛ̄lɛ̄ka̍ bīī mbo̍ tōsā īsɔ̄ɔ̍ a̍ yɔ̄ŋndā wɔ̄ɔ̍ŋndā wāŋndā chīe̍e̍ya̍ o̍kɔ̄ɔ̄, le̍ chɔ̄mndo̍ māā o̍ nɛ̄ī sa̍kpō o̍ to̍sā su̍ɛ̍i̍ ni̍. Ō tōsa̍ mātōsāā he̍ī le̍ chɔ̄mndo̍ māā ō chō sa̍kpō, ndu̍yɛ̍ vɛ̄lɛ̄ mā sīna̍ māā ndu̍ si̍i̍ŋgūū wa̍nāa̍ du̍a̍ū ti̍i̍nda᷄ŋndo̍ o̍ Chi̍i̍sū ni̍ŋ nda̍, wānāā sa̍kpō ndu̍ pi̍la̍ o̍ hɔ̄l ni̍.

²⁷Le̍la̍ŋ, ŋ̄ nɔ̍ mī ŋ̄ kēlū yōŋgā a̍ na̍a̍ pi̍la̍ wa̍lta̍ nāā la̍ to̍sāā o̍kɔ̄ɔ̄ kpo̍so̍ŋ te̍. Ɔ̍ɔ̄ le̍ sa̍bū na̍a̍ ŋ̄ ki̍lū yo̍ŋgā a̍ wa̍lta̍ nāāla̍ o̍kɔ̄ɔ̄ le̍ wo̍? Sa̍bū ko᷄ŋ cho̍ ni̍ māā tē ndu̍ o̍o̍ wa̍ sūɛ̍i̍ chu̍a̍ā lāsāwā pɛ̍, na̍a̍ ŋ̍ ki̍a̍lū yo̍ŋgā. Kɛ̍ ndu̍yɛ̍, sūɛ̍i̍ le̍bo᷅lle̍ ndi̍ cho̍ tīīnda᷄ŋndo̍ ni̍.

²⁸Ŋ̄ sīnā māā o̍ tīīnda᷄ŋndo̍ nɔ̄ɔ̍ ni᷄ŋ Mɛ̄lɛ̄ka̍ sīīŋgūū wa᷅ŋndo̍ wānā sa̍kpō ndu̍ pi̍la̍ o̍ hɔ̄l ni̍, ō cho̍ le̍ mɛ̄ɛ̍ o̍ to̍sā nyɛ᷅ sāwāla̍ŋ lā dīmi̍ wo̍ yɛ̍ le̍.

²⁹Mɛ̄lɛ̄ka̍ chō le̍ wānā o̍ wānā. Ō cho̍ ko̍ le̍ Chu̍ūwa̍ su̍e̍e̍ le̍ o̍ cho̍ le̍. Mɛ̄lɛ̄ka̍, o̍ cho̍ le̍ Chu̍ūwa̍ wo̍, ndu̍ ko̍ni̍ cho̍ le̍ wānāa̍ cho̍ a̍ Chu̍ū le̍ wa̍ ni̍.

³⁰Kāni̍ fu̍u̍le̍, Mɛ̄lɛ̄ka̍ ō pīlɛ̍ kpe̍ o̍ cho̍ ni̍. Mbō sīīŋgu̍u̍ Chu̍ūwa̍ wānāā sa̍kpō ndu̍ pi̍la̍ o̍ hɔ̄l, le̍ tīīnda᷄ŋ nda̍ nɔ̄ wo̍. Ndu̍yɛ̍ mbō sīīŋgu̍u̍ vɛ̄lɛ̄ wānāa̍ cho̍ a̍ Chu̍ū le̍ wa̍ wānāā sa̍kpō, le̍ tīīnda᷄ŋ nda̍ nɔ̄ wo̍.

³¹Mi̍ chē bɛ̍ɛ̍ mi̍ ŋ̄ dīmī māā tīīnda᷄ŋndo̍ nɔ̄ɔ̍ ndu̍ cho̍ sūɛ̍i̍ le̍bo᷅lle̍ ni̍, kɛ̍ ndu̍yɛ̍ ko̍ŋ chɔ᷅m māā sīīŋgūū kpo̍so̍ŋ te̍ na̍a̍ ŋ̄ chō sāwāla̍ Mɛ̄lɛ̄ka̍ ke̍ Mūu̍sē la̍ŋ nyɛ̄ fo̍ndō le̍. Na̍a̍ ŋ̍ cho̍ bɛ̍ɛ̍ to̍sāa̍ ni̍ mī wāŋnda̍ chē māā sāwāla̍ ka̍lāla̍ŋ lā chō sūɛ̍i̍ kpe̍e̍kpe̍i̍.