Read Southern Kisi Lu̍o̍māŋnda̍ 4 Bible Online

Lu̍o̍māŋnda̍ 4 - Southern Kisi bible

Lu̍o̍māŋnda̍ 4

¹Ŋ̄ tōfa᷅ŋ ndɔ̄ a̍ fi̍nyā nāā ma̍māa̍ E̍bīlāha᷅m o̍kɔ̄ɔ̄. Vɛ̄ɛ̄ o̍ lo̍o̍ku̍ yɛ̄ sīmnɔ᷄ŋ wa̍nā sa̍kpō Mɛ̄lɛ̄ka̍ o̍ hɔ̄l?

²Tē ndu̍ o̍o̍ wa̍ wa̍li̍ ndɔ̄ kɛ̍ndɛ̄ pɛ̍ ndu̍ o̍o̍ to̍sa̍ ni̍ mbo̍ sīmnu᷄ŋ wa̍nā sa̍kpo̍ Mɛ̄lɛ̄ka̍ o̍ hɔ̄l, mɛ̄ɛ̍ ndu̍ o̍o̍ ki̍a̍lū yo̍ŋgā a̍ ndi̍ o̍kɔ̄ɔ̄. Kɛ̍ ndu̍yɛ̍ ō ve̍ le̍ wa̍li̍ ndɔ̄ kɛ̍ndɛ̄ le̍. Ndu̍ o̍o̍ nɔ̍lā mī ndu̍ o̍o̍ ke̍lū yōŋgā Mɛ̄lɛ̄ka̍ o̍ hɔ̄l a̍ ndi̍ o̍kɔ̄ɔ̄ le̍.

³Sa̍bū ko᷄ŋ cho̍ ni̍ māā Yāu̍ Mɛ̄lɛ̄ka̍a̍ dīmi̍ āā, “Mi̍ E̍bīlāha᷅m du̍a̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ. Le̍ he̍ī, mi̍ Mɛ̄lɛ̄ka̍ chūā ndu̍ māā ō chō wānā sa̍kpō Mɛ̄lɛ̄ka̍ o̍ hɔ̄l.”

⁴Tē ō wa̍ pɛ̍ mī wāŋndo̍ ō tōsa̍ wa̍llo̍ le̍ wāŋndo̍, ndu̍yɛ̍ mā pāāwa̍ ndu̍, mɛ̄ɛ̍ nyɛ̄ nda̍ ke̍ ndu̍ ko̍ŋ le̍ wa̍li̍ o̍ to̍sa̍ wo̍ wo̍ ō cho̍ ke᷅ fo̍ndō le̍.

⁵Kɛ̍ ndu̍yɛ̍ tē wāŋndo̍ ō dōu̍ dɔ̍ɔ̍ tīīnda᷄ŋ ndɔ̄ɔ̍ o̍ ndu̍ pi̍la̍ wa̍lta̍ ndɔ̄la̍ŋ ni᷄ŋ le̍ sīmnɔ᷄ŋndo̍ wānā sa̍kpō Mɛ̄lɛ̄ka̍ o̍ hɔ̄l te̍, o̍ ko̍ŋ kɔ̍ɔ̍lī, mbō tīīnda̍ŋ Mɛ̍lɛ̄ka̍ o̍ si̍i̍ŋgūū ho̍ō wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ wānāā sa̍kpō wo̍, wānā ko̍ŋ, nu̍a̍ā Mɛ̄lɛ̄ka̍ sīīŋgūū ndu̍ wānā sa̍kpō le̍ tīīnda᷄ŋ ndɔ̄ ko̍ŋ.

⁶Māsāa̍ Dēēve̍ bɛ̍ɛ̍ mbo̍ dīmī nyɛ̄ pīlɛ̍ kōŋ kpe̍. Mbo̍ dīmī māā wāna̍ Mɛ̄lɛ̄ka̍ sīīŋgūū ho̍ō wānā sa̍kpō ndu̍ pi̍la̍ o̍ hɔ̄l, kɛ̍ ō ve᷅ le̍ wānā ko̍ŋ wa̍li̍ ndɔ̄ kɛ̍ndɛ̄ le̍ wo̍, wānā ko̍ŋ ō pɛ̄l tɔ̄nɔ̄ɔ̍. Mbo̍ dīmī āā,

⁷“Wānāa̍ to̍sā ha̍ā sɔ̄ɔ̍ŋ wɔ̍ɔ̍ŋndo̍ŋ, kɛ̍, mī Mɛ̄lɛ̄ka̍ ma᷄l nda̍ le̍ mu̍ŋ, ndu̍yɛ̍ mbō fāŋa̍ yɔ̄ŋndā ndāla̍ wɔ̍ɔ̍ŋnda̍ŋ nda̍, wānāā kāŋ ā pɛ̄l tɔ̄nɔ̄ɔ̍.

⁸Wāna̍ Māsānɔ̄ɔ̍ Mɛ̄lɛ̄ka̍ ō chɔ᷅m ho̍ō yɔ̄ŋ ndɔ̄ wɔ̍ɔ̍ŋndo̍ chōo̍ le̍ wo̍, ō pɛ̄l tɔ̄nɔ̄ɔ̍.”

⁹Kɛ̍ ndu̍yɛ̍ bāā tɔ̄nɔ̄ɔ̍ ho̍ō le̍ wānāa̍ chu̍ā ka̍a̍ a̍ hīvīo̍o̍ o̍ chīɛ̄ī kɔ̄ɔ̄lī wa̍ ko̍ni̍ o̍ cho̍ ni̍? Sāko̍. Wānāa̍ hi̍vī o̍ chīɛ̄ī kɔ̄ɔ̄lī le̍ wa̍ bɛ̍ɛ̍ ō chō le̍ nda̍. Mi̍ ŋ̄ dīmī māā le̍ tīīnda᷄ŋ E̍bīlāha᷅m ndu̍ o̍o̍ nɔ̍ wo̍, mi̍ Mɛ̄lɛ̄ka̍ sīīŋgūū ndu̍ wānā sa̍kpō ndu̍ pi̍la̍ Mɛ̍lɛ̄ka̍ o̍ hɔ̄l.

¹⁰Kɛ̍ ndu̍yɛ̍ a̍ bōōndi̍i̍ kūɛ̍ɛ̍nɛ̍ o̍ si̍i̍ŋgu̍u̍ yɛ̄ ndu̍ wānā sa̍kpō? Bāā E̍bīlāha᷅m o̍ sɔ̍la̍ fɛ̍lɛ̍ŋ hi̍vīo̍o̍ o̍ chīɛ̄ī kɔ̄ɔ̄lī, bāā ndu̍ o̍o̍ ve̍ wɔ̍ o̍ hi̍vīāā le̍? Ndu̍ o̍o̍ ve̍ wɔ̍ o̍ hi̍vīāā le̍ mi̍ he̍ī ī yɔ̄nu᷄ŋ.

¹¹Hīvī E̍bīlāha᷅m sɔ̍la̍ o̍ chīɛ̄ī kɔ̄ɔ̄lī wo̍ ō wa̍ māwāā māā tāāmāsi̍ le̍ sīīŋgūū Mɛ̄lɛ̄ka̍ sīīŋgu̍u̍ ndu̍ wānā sa̍kpō ndu̍ pi̍la̍ o̍ hɔ̄l le̍ tīīnda᷄ŋ o̍ dɔ̍ū o̍ Mɛ̄lɛ̄ka̍ ni᷄ŋ, bo̍o̍ndi̍i̍ o̍ ve̍ wɔ̍ bɛ̍ɛ̍ o̍ hi̍vīāā le̍ ve̍. O̍ he̍ī ni᷄ŋ, mɛ̄ɛ̍ E̍bīlāha᷅m cho̍ māchūāā fi̍nyāa̍ le̍ wāŋnda̍ kpo̍u̍, a̍ cho̍ bɛ̍ɛ̍ a̍ hi̍vīāā o̍ chīɛ̄ī kɔ̄ɔ̄lī le̍ wa̍, kɛ̍ ndu̍yɛ̍ ma̍ dūāū tīīnda᷄ŋndo̍ o̍ Mɛ̄lɛ̄ka̍ ni᷄ŋ, mbo̍ sīīŋgūū nda̍ wānāā sa̍kpō ndu̍ pi̍la̍ o̍ hɔ̄l la̍.

¹²Ndu̍yɛ̍ ō chō vɛ̄lɛ̄ māchūāā māā fi̍nyāa̍ le̍ wānāa̍ cho̍ ā hīvīāā o̍ chīɛ̄ī kɔ̄ɔ̄lī wa̍. Kɛ̍ ndu̍yɛ̍ ō cho̍ ko̍ hi̍vīo̍o̍ le̍, kɛ̍ ma̍ hīāū lāchī a̍ Mɛ̄lɛ̄ka̍ tīīnda᷄ŋndo̍ mɛ̄ɛ̍ fi̍nyā nāa̍ E̍bīlāha᷅m hi̍o̍ū lāchī a̍ Mɛ̄lɛ̄ka̍ tīīnda᷄ŋndo̍ bōōndi̍i̍ ndu̍ o̍o̍ sɔ̍la̍ wɔ̍ hīvīo̍o̍ le̍ ve̍ yɛ̍.

¹³Mi̍ Mɛ̄lɛ̄ka̍ chūēl E̍bīlāha᷅m a̍ wānāa̍ fu̍la̍ o̍ pūlālē ndɔ̄le̍ŋ chōo̍ wa̍ būŋgɛ̄i̍ māā nda̍ cho̍ hūnɔ̄ɔ̄ chi̍e̍ēŋndo̍ nɔ̄ ni̍. Mɛ̄lɛ̄ka̍ ō chu̍e̍ bu̍ŋgɛ̄i̍ he̍ī le̍ E̍bīlāha᷅m sāwa̍ ndɔ̄ ma̍ndāā le̍. Ō chu̍a̍ māchūāā ndi̍ le̍ tīīnda᷄ŋ E̍bīlāha᷅m dɔ̍ū o̍ ndu̍ ni̍ŋ, ndu̍yɛ̍ mi̍ Mɛ̄lɛ̄ka̍ ndu̍ si̍i̍ŋgūū ndu̍ wānā sa̍kpō ndu̍ pi̍la̍ Mɛ̍lɛ̄ka̍ o̍ hɔ̄l lo̍.

¹⁴Ŋ̄ dīmi᷅ŋ ndɔ̄ māā wānāa̍ to̍sā nyɛ᷅ sāwāla̍ŋ lā dīmi̍ wo̍ wa̍ māā nda̍ cho̍ nyɛ̄ Mɛ̄lɛ̄ka̍ chu̍a̍ ko̍ŋ bu̍ŋgɛ̄i̍ yo̍ sɔ̄lā ni̍. Tē ndu̍ o̍o̍ wa̍ le̍nde̍ pɛ̍ i̍ cho̍ ni̍, mɛ̄ɛ̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ ndu̍ o̍o̍ nɔ᷅ tɔ̍nɔ̄ o̍ tɔ̍nɔ̄ le̍. Ndu̍yɛ̍ būŋgɛ̄ī Mɛ̄lɛ̄ka̍ chu̍a̍ ve̍ bɛ̍ɛ̍ ī wa̍ sīmnɔ᷄ŋ su̍ɛ̍i̍ fo̍ndō fu̍u̍.

¹⁵Sāwāla̍ Mɛ̄lɛ̄ka̍ ke̍ Mūu̍sē la̍ŋ lā tōsā ma̍to̍sāā mī Mɛ̄lɛ̄ka̍ dɔ̄ūnu᷄ŋ tu̍mbe̍ a̍ ŋ̄wāŋndā chīe̍e̍, ndu̍yɛ̍ mbō tūsi̍ nda̍ dɛ̍nɛ̍ pa̍lāa̍ chōo̍. Kɛ̍ ndu̍yɛ̍ nāa̍ sāwāla̍ cho̍ le̍, wānā tɛ̍ɛ̍mbūū sa̍wā le̍.

¹⁶Le̍la̍ŋ, nyɛ̄ Mɛ̄lɛ̄ka̍ chu̍a̍ ko̍ŋ bu̍ŋgɛ̄i̍ yo̍, o̍ Mɛ̄lɛ̄ka̍ ti̍i̍nda᷄ŋndo̍ ni᷄ŋ sa̍na̍a̍ wānā sɔ̍lā ndu̍ ni̍. Le̍ sa̍bū i̍ cho̍ le̍nde̍ wo̍ cho̍ ni̍ māā le̍ chɔ̄mndo̍ māā kɛ̄ndɛ̄i̍ Mɛ̄lɛ̄kɛ̍i̍ to̍sā ni̍ mī wānā sɔ̍la̍ nyɛ̄ Mɛ̄lɛ̄ka̍ chu̍a̍ bu̍ŋgɛ̄i̍ yo̍. Ndu̍yɛ̍ wānāa̍ fu̍la̍ o̍ pūlāle̍ E̍bīlāha᷅mnde̍ŋ chōo̍ wa̍, nda̍ kpo̍u̍ Mɛ̄lɛ̄ka̍ chō nda̍ ndu̍ kē kpe̍e̍kpe̍i̍. Ndu̍yɛ̍ ō cho̍ ko̍ wa̍nāa̍ chu̍ā sa̍wāla̍ Mɛ̄lɛ̄ka̍ ke̍ Mūu̍sē la̍ŋ nda̍ le̍ o̍ chu̍e̍l būŋgɛ̄i̍ he̍ī le̍. Wānāa̍ du̍a̍ū ti̍i̍nda᷄ŋ ndāa̍ o̍ Mɛ̄lɛ̄ka̍ ni᷄ŋ mɛ̄ɛ̍ E̍bīlāha᷅m dɔ̍ū tīīnda᷄ŋndo̍ o̍ ndu̍ ni̍ŋ yɛ̍ wa̍, nda̍ bɛ̍ɛ̍ būŋgɛ̄i̍ he̍ī ī chūānu̍ŋ le̍ nda̍. Kāni̍ fu̍u̍le̍, na̍a̍ fa̍ū E̍bīlāha᷅m ndu̍ cho̍ fi̍nyā nāa̍ ni̍.

¹⁷Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Ya̍ Mɛ̍lɛ̄ka̍ I̍ to̍sa̍ ma̍ sīmnu᷄ŋ fi̍nyāa̍ le̍ wānāā kāa̍la̍ fa̍ŋgā.” Mɛ̄lɛ̄ka̍ ndu̍ ndu̍ o̍ hɔ̄l fi̍nyā nāa̍ E̍bīlāha᷅m cho̍ ni̍, ndu̍ yɔ̍nūŋ ni̍ māā Mɛ̄lɛ̄ka̍ E̍bīlāha᷅m dɔ̍ū tīīnda᷄ŋndo̍ o̍ ndu̍ ni̍ŋ ndo̍. Ndu̍ cho̍ Mɛ̄lɛ̄ka̍ o̍ mi̍ŋgī wa̍nāa̍ vi᷅ wa̍ yōōmū wo̍ ni̍. Ndu̍yɛ̍ sɔ̄ɔ̍ŋ wa᷅ hu̍nɔ̄ɔ̄ yɔ̄nɔ᷄ŋndo̍ wo̍ŋ, ō wa̍ sūɛ̍i̍ a̍ mu̍ŋ o̍kɔ̄ɔ̄ pɛ̍, māā sɔ̄ɔ̍ŋ chu̍ū ni᷅ŋ yɔ̄nɔ᷄ŋ o̍ su̍a̍ā a̍ mu̍ŋ o̍kɔ̄ɔ̄ ni̍.

¹⁸Mi̍ chē bɛ̍ɛ̍ wānā a̍a̍ che᷅ pɛ̍ āā sūɛ̍i̍ E̍bīlāha᷅m wa̍ lēhɔ̄l o̍ nɛ̄ī le̍ ndi̍ ve̍, māā ī cho̍ su̍ɛ̍i̍ yɔ̍nu̍ŋ te̍ ni̍, kɛ̍ o̍ ko̍ŋ ni̍ŋ fa̍ū, mbo̍ dūāū tīīnda᷄ŋndo̍ o̍ Mɛ̄lɛ̄ka̍ ni᷄ŋ. Ndu̍yɛ̍ hɔ̄lte̍ŋ lē wa̍ ndu̍ o̍ nɛ̄ī māā ī chō yɔ̄nɔ᷄ŋ. Le̍ he̍ī mi̍ E̍bīlāha᷅m si̍mnu᷄ŋ fi̍nyāa̍ le̍ wānāā kāa̍la̍ fa̍ŋgā o̍ chi̍e̍ēŋndo̍ ni᷄ŋ. Mi̍ ī yɔ̄nu᷄ŋ mɛ̄ɛ̍ Mɛ̄lɛ̄ka̍ dīmu̍l ndu̍ yɛ̍ āā, “Le̍nde̍ chūāā nūm a̍ ma̍māa̍ ā wā ni̍ŋ fa̍ŋgā ni̍ māā lōo̍ŋ mu᷅ŋ.”

¹⁹E̍bīlāha᷅m wɔ̄sīlā ndɔ̄la̍ŋ la̍ a̍a̍ wa̍ ni᷅ŋ sɔ̍ŋgɔ̍ kɛ̄mɛ̄. Le̍ he̍ī mbo̍ yīya᷄ŋ māā sɔ̍ŋgɔ̍ wānā vi̍lɛ̍i̍ ko̍ni̍ o̍ cho̍ ni᷅ŋ ni̍. Ndu̍yɛ̍ vɛ̍lɛ̄, Se̍lūā la̍a̍ ndɔ̄ ve̍ wa̍nā vi̍a̍lāā le̍. Kɛ̍ ndu̍yɛ̍ o̍ ko̍ŋ ni̍ŋ fa̍ū, tīīnda᷄ŋ E̍bīlāha᷅m ndu̍ o̍o̍ nɔ̍ o̍ Mɛ̄lɛ̄ka̍ ni᷄ŋ ndo̍, ō pɔ̄mbɔ̄ bɛ̍ɛ̍ fe̍ŋa̍ŋ le̍cho̍o̍ le̍.

²⁰Ō me᷄l ti̍i̍nda᷄ŋ ndu̍ o̍o̍ nɔ̍ wo̍ le̍. Ndu̍yɛ̍ kīīsa᷄ŋ bɛ̍ɛ̍ ō kīīsa̍ŋ a̍ būŋgɛ̄ī Mɛ̄lɛ̄ka̍ chu̍a̍ ve̍ le̍. Kɛ̍ mbo̍ chɔ̄ɔ̄lū bɛ̍ɛ̍ hi̍o̍u̍wɔ̄ɔ̄ lāchī a̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ ni᷄ŋ mbo̍ hīāū māā pāāndū. Ndu̍yɛ̍ mbo̍ līsā Mɛ̄lɛ̄ka̍.

²¹E̍bīlāha᷅m ndu̍ o̍o̍ si̍nā kpe̍e̍kpe̍i̍ māā Mɛ̄lɛ̄ka̍ nɔ̄lā mbō tōsa̍ nyɛ̄ o̍ nyɛ̄ o̍ chu̍a̍ būŋgɛ̄i̍.

²²Le̍la̍ŋ, ī chō ī dīmīa̍ŋ a̍ tīīnda᷄ŋ E̍bīlāha᷅m dɔ̍ū o̍ Mɛ̄lɛ̄ka̍ ni᷄ŋ ndo̍ o̍kɔ̄ɔ̄ āā, “Le̍ he̍ī, mi̍ Mɛ̄lɛ̄ka̍ sīīŋgūū ndu̍ wānā sa̍kpō ndu̍ pi̍la̍ Mɛ̍lɛ̄ka̍ o̍ hɔ̄l.”

²³Dīōmnda̍ po̍o̍nyi̍a̍ŋ la᷅ŋ āā, “Le̍ he̍ī, mi̍ Mɛ̄lɛ̄ka̍ sīīŋgūū ndu̍ wānā sa̍kpō,” la̍ŋ, lā dīmi̍ŋ le̍ E̍bīlāha᷅m su̍e̍e̍ le̍.

²⁴Lā dīmi̍ŋ le̍ na̍a̍ bɛ̍ɛ̍, na̍a̍ Mɛ̄lɛ̄ka̍ chō sīīŋgūū wānāā sa̍kpō ndu̍ pi̍la̍ o̍ hɔ̄l la̍, ndu̍ yɔ̍nūŋ māā na̍a̍ ŋ̍ dɔ̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ o̍ so̍li̍ Māsānɔ̍ nāa̍ Chi̍i̍sū o̍ pīɔ̍mndo̍ ni᷄ŋ mbo̍ mīŋgī ndu̍ yōōmū wa̍ ni̍.

²⁵Mi̍ Mɛ̄lɛ̄ka̍ yɔ̄ŋgū Chi̍i̍sū ma̍ dīī ndu̍ le̍ yɔ̄ŋndā nāāla̍ wɔ̍ɔ̍ŋnda̍ŋ. Ndu̍yɛ̍ mi̍ Mɛ̄lɛ̄ka̍ mīŋgī ndu̍ yōōmū le̍ mī ndu̍ Mɛ̍lɛ̄ka̍ ō sīīŋgu̍u̍ na̍a̍ wānāā sa̍kpō ndu̍ pi̍la̍ Mɛ̍lɛ̄ka̍ o̍ hɔ̄l.