Read Southern Kisi Lu̍o̍māŋnda̍ 6 Bible Online

Lu̍o̍māŋnda̍ 6 - Southern Kisi bible

Lu̍o̍māŋnda̍ 6

¹Mɛ̄ɛ̍ ɔ̍ɔ̄ nyɛ̄ na̍a̍ ŋ̄ nɔ̄ mī ŋ̄ dīmi̍ o̍ sūɛ̍i̍ he̍ī ni᷄ŋ a̍ yɔ̄ŋ wɔ̄ɔ̍ŋndo̍ o̍kɔ̄ɔ̄ wo̍? Bāā dīmīo̍o̍ na̍a̍ ŋ̄ dīmi̍ ni̍ māā ŋ̄ hīōūnu᷅ŋ lāchī a̍ yɔ̄ŋ wɔ̄ɔ̍ŋndo̍, le̍ mī Mɛ̄lɛ̄ka̍ chɔ̄ɔ̄lu̍ na̍a̍ kɛ̄ndɛ̄i̍ ndūɛ̍i̍ tōsāl ta̍u̍? Sāko̍.

²Ŋ̄ nɔ̍ mī ŋ̄ hīōū lɛ̄ lāchī a̍ yɔ̄ŋ wɔ̄ɔ̍ŋndo̍ tōsāa̍ kpo̍so̍ŋ te̍. Kāni̍ fu̍u̍le̍, a̍ yɔ̄ŋ wɔ̄ɔ̍ŋndo̍ ndu̍ ndu̍ o̍kɔ̄ɔ̄, ŋ̄ chō ni᷅ŋ māchūāā māā wānāa̍ vi᷅ ni᷅ŋ. Ŋ̄ nɔ̍ lɛ̍ mī ŋ̄ hīōū lāchī a̍ yɔ̄ŋ wɔ̄ɔ̍ŋndo̍ tōsāa̍ kpo̍so̍ŋ te̍.

³Nya̍ pi̍la̍ lā sīnā wa̍la̍ŋ māā na̍a̍ fa̍ū mɛ̄ɛ̍ nda̍ pūlū na̍a̍ pūlɔ̄ɔ̍ Mɛ̄lɛ̄ka̍a̍ mi̍ ŋ̄ sīmnu᷄ŋ di̍ōmndo̍ ō pīlɛ̍ na̍a̍ Chi̍i̍sū Ki̍li̍tī wa̍ā. Ndu̍yɛ̍, ha̍a̍a̍ ma̍ yīŋ na̍a̍ yīŋɔ̄ɔ̄ kōŋ, mɛ̄ɛ̍ pīɔ̍m o̍ vi᷅ wo̍, mɛ̄ɛ̍ na̍a̍ nda̍a̍ ŋ̍ vi᷅ wu̍ ko̍ŋ ni̍.

⁴Le̍la̍ŋ, ha̍a̍a̍ mi̍ yīŋɔ̄ɔ̄ na̍a̍ ŋ̄ sɔ̄la̍ wo̍ tōsā mi̍ ŋ̄ wā wānāā wūāā na̍a̍ nda̍ā, mɛ̄ɛ̍ chɔ̄ nda̍ chɔ̍ ndu̍ wo̍ mɛ̄ɛ̍ na̍a̍ nda̍ā nda̍ chɔ̍ chɔ̄ kōŋ ni̍. Ndu̍yɛ̍ he̍ī yɔ̄nu̍ŋ le̍ mī ŋ̄ wa̍ o̍ yōōmū sɛ̄nɛ̄ī ni᷄ŋ mɛ̄ɛ̍ Mɛ̄lɛ̄ka̍ fi̍nyā nāa̍ ō mīŋgi̍ Ki̍li̍ti̍ yōōmū a̍ kpāāya̍ ndɔ̄ bɛ̍ndōo̍ yɛ̍.

⁵Tē ŋ̄ wa̍ yɛ̄ wānāā wūāā na̍a̍ nda̍ā pɛ̍, mɛ̄ɛ̍ mīŋgī Mɛ̄lɛ̄ka̍ mīŋgi̍ ndu̍ yōōmū wo̍, mɛ̄ɛ̍ na̍a̍ bɛ̍ɛ̍ ō chō na̍a̍ mīŋgī yōōmū kpe̍e̍kpe̍i̍ mɛ̄ɛ̍ o̍ mi̍ŋgi̍ ndu̍ yōōmū yɛ̍.

⁶Ndu̍yɛ̍ mɛ̄ɛ̍ na̍a̍ ŋ̄ sīnā ndi̍ yɛ̍, bōōndi̍i̍ nda̍ dīī Chi̍i̍sū Ki̍li̍tī o̍ yɔ̄m sīŋgāfīlāa̍ chōo̍ ve̍, tē ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ o̍ ko̍ŋ wāna̍ chi̍e̍e̍yɛ̍ī nɛ̄ī pa̍a̍ndūe̍i̍ bɛ̍ɛ̍ i̍ sɔ̍la̍ pīɔ̍mndo̍ a̍ ndu̍ la̍tu̍lu̍ ni̍. He̍ī yɔ̄nu̍ŋ le̍ mī Mɛ̄lɛ̄ka̍ dīī wāna̍ chi̍e̍e̍yɛ̍ī nɛ̄ī pa̍a̍ndūe̍i̍, i̍ cho̍ he̍ī o̍ kpāāya̍ yɔ̄ŋ wɔ̄ɔ̍ŋndo̍ bɛ̄ŋgu̍ ve̍ kɔ̍sɔ̄ kɔ̍sɔ̄. Ndu̍yɛ̍ ī yɔ̄nu̍ŋ māā hāli̍ kpe̍ŋ ŋ̄ ve᷅ lɛ̍ o̍ kpāāya̍ yɔ̄ŋ wɔ̄ɔ̍ŋndo̍ bɛ̄ŋgu̍ māā lāchɛ̄ le̍.

⁷Kāni̍ fo̍ndōle̍, tē wāŋndo̍ ō vī ni᷅ŋ pɛ̍, mɛ̄ɛ̍ ō fūla̍ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍, yɔ̄ŋ wɔ̄ɔ̍ŋndo̍ ō nɔ᷅ lɛ̍ ndu̍ kpāāyā o̍ kpāāyā cho̍o̍ le̍.

⁸Ndu̍yɛ̍ ha̍a̍a̍ mi̍ ŋ̄ wū lātūlu̍ na̍a̍ Ki̍li̍tī wa̍ā, mɛ̄ɛ̍ ŋ̄ nɔ̄ tīīnda᷄ŋndo̍ māā na̍a̍ nda̍ā ŋ̄ chō hūnɔ̄ɔ̄ vɛ̄lɛ̄ wā yōōmū.

⁹Kāni̍ fo̍ndōle̍, ŋ̄ sīnā māā Mɛ̄lɛ̄ka̍ mīŋgi̍ Ki̍li̍ti̍ yōōmū, ndu̍yɛ̍ māā ō vi᷅ lɛ̍ kpo̍so̍ŋ te̍. Kpāāyā o̍ kpāāyā pīɔ̍mndo̍ ō nɔ̍ lɛ̍ ndu̍ chōo̍ le̍.

¹⁰Pīɔ̍m Ki̍li̍tī vi᷅ wo̍, ō tōsa̍ le̍ fɛ̍ɛ̍ŋ a̍ fɛ̍ɛ̍ŋ yɔ̄ŋ wɔ̄ɔ̍ŋndo̍ ō nɔ̍ lɛ̍ ndu̍ kpāāyā o̍ kpāāyā cho̍o̍ le̍. Ndu̍yɛ̍ yōōmū o̍ nɔ̍ ni᷅ŋ ndo̍, o̍ ba̍ Mɛ̄lɛ̄ka̍a̍ bɛ̄ŋgu̍ yōōmū kōŋ chō ni̍.

¹¹Mɛ̄ɛ̍ le̍nde̍ ko̍ni̍ nya̍ bɛ̍ɛ̍ nya̍ nɔ̄ mī lā chu̍a̍ nya̍ pi̍la̍ ni̍. Ha̍a̍a̍ mi̍ lā wā dīōmndo̍ ō pīlɛ̍ a̍ Chi̍i̍sū Ki̍li̍tī, yɔ̄ŋ wɔ̄ɔ̍ŋndo̍ ō nɔ̍ lɛ̍ nya̍ kpāāyā o̍ kpāāyā cho̍o̍ le̍. Ndu̍yɛ̍ yōōmūlā nyāla̍ŋ lā nɔ̄ ni᷅ŋ mānūāā mī lā wa̍ o̍ ba̍ Mɛ̄lɛ̄ka̍a̍ bɛ̄ŋgu̍.

¹²Lā chɛ᷅l lɛ̄ mī lā wa̍ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍ le̍, o̍ ko̍ŋ mī lā tōsa̍ sɔ̄ɔ̍ŋ yēēmɛ̍i̍ wāna̍ chi̍e̍e̍yɛ̍ī nyɛ̄ī pa̍a̍ndūe̍i̍ ī dīmūl nya̍ le̍ tōsāa̍ wo̍ŋ te̍.

¹³Ndu̍yɛ̍ o̍ ko̍ŋ kɔ̍ɔ̍lī, lā chɛ᷅l lɛ̄ mī dīāllūŋ nya᷄ŋ ī pīlɛ̍ bɛ̍ɛ̍ i̍ wa̍ lɛ̄ le̍ yɔ̄ŋ wɔ̄ɔ̍ŋ tōsā le̍. Lā nɔ̄ ni᷅ŋ mānūāā mī lā yɔ̄ŋgu̍ŋ nya̍ pi̍la̍ nāa̍ Mɛ̄lɛ̄ka̍ chūā, māā wānāa̍ vi᷅ ni᷅ŋ pāāndū, kɛ̍ ndu̍yɛ̍ mi̍ Mɛ̄lɛ̄ka̍ mīŋgī nda̍ yōōmū. Ndu̍yɛ̍ lā yɔ̄ŋgu̍ di̍a̍llūŋ nya᷄ŋ kpo̍u̍ nāa̍ ndu̍ chu̍a̍ le̍ mbō sōli̍ŋ kpe̍ku̍ a̍ mu̍ŋ le̍ nyɛ̍ cho̍ sa̍kpō wo̍ tōsāa̍.

¹⁴Lā chɛ᷅l mī yɔ̄ŋ wɔ̄ɔ̍ŋndo̍ ō nɔ̄ lɛ̄ nya̍ kpāāyāa̍ chōo̍ le̍. Kāni̍ fu̍u̍le̍, ō cho̍ o̍ sāwāla̍ Mɛ̄lɛ̄ka̍ ke̍ Mūu̍sē la̍ŋ bā bɛ̄ŋgu̍ le̍ na̍a̍ ŋ̄ chō le̍. O̍ kɛ̄ndɛ̄i̍ Mɛ̄lɛ̄kɛ̍i̍ bā bɛ̄ŋgu̍ na̍a̍ ŋ̄ chō ni̍.

¹⁵Ō yɛ̄ɛ̍nɛ̍ na̍a̍ ŋ̄ dīmi̍ yɛ̍ o̍ he̍ī ni᷄ŋ? Bāā mɛ̄ɛ̍ na̍a̍ ŋ̄ chō ni᷅ŋ o̍ kɛ̄ndɛ̄i̍ Mɛ̄lɛ̄kɛ̍i̍ bā bɛ̄ŋgu̍ yɛ̍, ŋ̄ cho̍ lɛ̍ sāwāla̍ŋ o̍ bā bɛ̄ŋgu̍ le̍ yɛ̍, bāā dīmīo̍o̍ na̍a̍ ŋ̄ dīmi̍ ni̍ māā ŋ̄ hīōūnu᷅ŋ lāchī a̍ yɔ̄ŋ wɔ̄ɔ̍ŋndo̍ tōsāa̍? Sāko̍. Ŋ̄ nɔ̍ mī ŋ̄ hīōū lāchī a̍ yɔ̄ŋ wɔ̄ɔ̍ŋndo̍ tōsāa̍ kpo̍so̍ŋ te̍.

¹⁶Kāni̍ fu̍u̍le̍, lā sīnā wa̍la̍ŋ māā tē ō wa̍ pɛ̍ mā yɔ̍ŋgu̍ŋ wa᷅ŋndo̍ o̍ bā bɛ̄ŋgu̍, ndu̍yɛ̍ nyɛ̄ o̍ di̍mūl nu̍m ndo̍ ndu̍ ko̍ni̍ ŋ̄ tōsā ni̍, mɛ̄ɛ̍ wāna̍ ŋ̄ tōsā ko̍ŋ nyɛ᷅ o̍ di̍mūl nu̍m ndo̍ wo̍, chīɔ̍ɔ̍ ŋ̄ chō ndu̍ o̍ bā bɛ̄ŋgu̍ ni̍. Le̍nde̍ ko̍ni̍, tē a̍ wa̍ nyɛ̄ yɔ̄ŋ wɔ̄ɔ̍ŋndo̍ ō dīmūl nu̍m ndo̍ tōsāa̍ pɛ̍, mɛ̄ɛ̍ pīɔ̍mndo̍ ŋ̄ sɔ̄lā o̍ ko̍ŋ kɔ̍ɔ̍lī ni̍. Kɛ̍ tē a̍ to̍sa̍ nyɛ̄ Mɛ̄lɛ̄ka̍ dīmūl nu̍m ndo̍ pɛ̍, sīīŋgūūwo̍ Mɛ̄lɛ̄ka̍ sīīŋgūū nu̍m wānā sa̍kpo̍ ndu̍ pi̍la̍ o̍ hɔ̄l o̍ ko̍ŋ kɔ̍ɔ̍lī ni̍.

¹⁷O̍ tāse̍la̍ ndɔ̄ɔ̍, māā lāchɛ̄ nya̍ wa̍ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍ ni̍. Kɛ̍ ndu̍yɛ̍ ŋ̄ me᷄l Mɛ̄lɛ̄ka̍ ba̍li̍ka̍, kāni̍ fu̍u̍le̍, pɛ̄ɛ̄kū tōnya̍ nya̍ sɔ̄la̍ a̍ Mɛ̄lɛ̄ka̍ o̍kɔ̄ɔ̄ wo̍ mi̍ lā chūā pɛ̄ɛ̄kū kōŋ a̍ kɔ̄l kpo̍u̍.

¹⁸O̍ ko̍ŋ, mi̍ Mɛ̄lɛ̄ka̍ bāŋā nya̍ mbo̍ sōlī nya̍ nāa̍ nya̍ wa̍ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍ wa̍. O̍ ko̍ŋ kɔ̍ɔ̍lī, mi̍ lā sīmnu᷄ŋ ni᷅ŋ chīa̍a̍ Mɛ̄lɛ̄ka̍ le̍ mī lā tōsa̍ nyɛ̍ cho̍ sa̍kpō Mɛ̄lɛ̄ka̍ o̍ hɔ̄l lo̍.

¹⁹Kɛ̍ ndu̍yɛ̍ mɛ̄ɛ̍ nya̍ nɔ̍ wɔ̍ si̍nā pɛ̄ŋgu̍ bɔ̍ɔ̍ le̍ yɛ̍, I̍ chɔ᷅m ndɔ̍ nya̍ sūɛ̍i̍ ka̍lɛ̄i̍ o̍ nɛ̄i̍ īwāna̍ chi̍e̍e̍ya̍a̍ chōo̍. Ko̍ŋ cho̍ ni̍ māā o̍ tāse̍la̍ ndɔ̄ɔ̍ mi̍ nya̍ a̍a̍ yɔ̄ŋgu᷄ŋ kpo̍u̍ māā lāchɛ̄ o̍ sɔ̄ɔ̍ŋ nɔ̍ɔ̍lɛ̍i̍yo̍ŋ tōsāa̍ ni᷄ŋ, o̍ ko̍ŋ kɔ̍ɔ̍lī, mi̍ lā wā hīōūwɔ̄ɔ̍ lāchī a̍ sɔ̄ɔ̍ŋ wɔ̍ɔ̍ŋ bɛ̄ndo᷄ŋ tōsāa̍. Kɛ̍ pɛ̄ŋgo̍o̍ ho̍ō ni᷅ŋ, lā yɔ̄ŋgu̍ŋ nya̍ pi̍la̍ kpo̍u̍ māā chīa̍a̍ Mɛ̄lɛ̄ka̍ le̍, mī lā tōsa̍ o̍ cho̍ Mɛ̄lɛ̄ka̍ o̍ hɔ̄l sa̍kpō wo̍, ndu̍yɛ̍ mī lā sīmnu᷄ŋ wa̍nāa̍ cho̍ ā yɔ̄ŋga᷄ŋ o̍ ndu̍ lo̍.

²⁰Bōōndi̍i̍ nya̍ wa̍ ke̍ŋ yɔ᷅ŋ wɔ̄ɔ̍ŋndo̍ o̍ bā bɛ̄ŋgu̍ māā lāchɛ̄ ve̍, bōōndi̍i̍ ke̍ŋ sɔ̄ɔ̍ŋ cho̍ sa̍kpō Mɛ̄lɛ̄ka̍ o̍ hɔ̄l lo̍ŋ, ŋ̄ ve̍ nya̍ kūēē le̍ tōsā le̍.

²¹Ndu̍yɛ̍ sɔ̄ɔ̍ŋ nya̍ a̍a̍ to̍sā mu̍ŋ, kɛ̍ mi̍ lā chūā ni᷅ŋ mu̍ŋ hāū māā sɔ̄ɔ̍ŋ lāsi̍ɔ̍mbu̍ wo̍ŋ, tɔ̄nɔ̄ o̍ tɔ̄nɔ̄ bɛ̍ɛ̍ sɔ̄ɔ̍ŋ mu̍ŋ ŋ̄ chūu̍ nya̍ le̍. Pīɔ̍mndo̍ ko̍ni̍ sɔ̄ɔ̍ŋ wa̍ā le̍ndo̍ŋ tōsāa̍ ŋ̄ chūū wa̍nā ni̍.

²²Kɛ̍, pɛ̄ŋgo̍o̍ ho̍ō ni᷅ŋ Mɛ̄lɛ̄ka̍ bāŋa̍ nya̍ mbo̍ sōlī nya̍ nāa̍ nya̍ wa̍ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍ wa̍. Ndu̍yɛ̍ lā sīmnu᷄ŋ ni᷅ŋ chīa̍a̍ Mɛ̄lɛ̄ka̍. O̍ ko̍ŋ, tɔ̄nɔ̍ nya̍ sɔ̄la̍ lēkɔ̍ɔ̍lī wo̍ ō tōsa̍ mi̍ lā sīmnu᷄ŋ wa̍nāa̍ cho̍ ā yɔ̄ŋga᷄ŋ o̍ Mɛ̄lɛ̄ka̍ lo̍. O̍ he̍ī ni᷄ŋ, mi̍ lā wā hūnɔ̄ɔ̄ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ sɔ̄lā.

²³Pāāwā wānā sɔ̍lā le̍ yɔ̄ŋ wɔ̄ɔ̍ŋndo̍ wo̍ ndu̍ cho̍ pīɔ̍mndo̍ ni̍. Kɛ̍, Mɛ̄lɛ̄ka̍ ndu̍ nyɛ̄ o̍ ke᷅ ŋ̍wa᷅ŋndā chīe̍e̍ o̍ sa̍bu̍ Māsānɔ̍ nāa̍ Chi̍i̍sū Ki̍li̍tīo̍o̍ ni᷄ŋ ndo̍, ndu̍ cho̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ ni̍.