Read Southern Kisi Kɔ̄li̍ŋtīāŋ Tāso̍o̍ 1 Bible Online

Kɔ̄li̍ŋtīāŋ Tāso̍o̍ 1 - Southern Kisi bible

Kɔ̄li̍ŋtīāŋ Tāso̍o̍ 1

¹Ya̍ Pɔ̍ɔ̄, ya̍ Mɛ̄lɛ̄ka̍ chu̍a̍ ho̍ō māā wāna̍ Chi̍i̍sū Ki̍li̍tī ve᷅m hɔ̄ltē ndɔ̄ o̍ hɛ̄na᷄ŋ ndɔ̄ɔ̍ ni᷄ŋ ndo̍, ya̍ cho̍ yāu̍wo̍ ho̍ō pōōnyīa̍a̍ ni̍ na̍a̍ chāa̍ŋ nāā wa̍nā la̍a̍la᷄ŋndo̍, Sɔ̄si̍ti̍nī.

²I̍ cho̍ ndu̍ pōōnyīa̍a̍ nāa̍ nya̍ ku̍ndā wānāā lāāla᷄ŋa̍a̍ Mɛ̄lɛ̄ka̍a̍ chūā Kɔ̍līŋ chi̍e̍e̍. Ndu̍ yɔ̍nūŋ ni̍ māā nya̍ wānāa̍ cho̍ ā yɔ̄ŋga᷄ŋ o̍ Mɛ̄lɛ̄ka̍ lo̍, sa̍na̍a̍ a̍ chō nya̍ chō o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī wa̍ā wo̍. Ko̍ŋ cho̍ ni̍, nya̍ Mɛ̄lɛ̄ka̍ chu̍a̍ le̍ wāa̍ wānāa̍ cho̍ le̍ ndu̍ wa̍ wa̍. Ndu̍yɛ̍, I̍ cho̍ ndu̍ pōōnyīa̍a̍ le̍ nya̍ a̍ wāŋnda̍ bā o̍ bā fe̍e̍ a̍ cho̍ Māsānɔ̍ nāa̍ Chi̍i̍sū Ki̍li̍tī pīɛ̄īyo̍ wa̍, nda̍ ni̍ a̍ na̍a̍ Māsānɔ̍ nāa̍.

³I̍ cho̍ pīɛ̄īle̍ŋ māā Mɛ̄lɛ̄ka̍ Fi̍nyā nāa̍, a̍ Ma̍sānɔ̄ɔ̍ Chi̍i̍sū Ki̍li̍tī māā ā yīya̍ŋ nya̍ chōo̍, ndu̍yɛ̍ mā ke̍ nya̍ kɔ̄l nyūlōo̍ fɔ̍.

⁴Pɛ̄ŋgu̍ o̍ pɛ̄ŋgu̍ ya̍ I̍ wa̍ Mɛ̍lɛ̄ka̍ pīɛ̄īyo̍, ba̍li̍ka̍a̍ ya̍ I̍ me᷅l ndu̍ le̍ nya̍ ni̍. Kāni̍ fu̍u̍le̍, Mɛ̄lɛ̄ka̍ tōsa̍l nya̍ kɛ̄ndɛ̄ī bɛ̍ndū o̍ sa̍bū Chi̍i̍sū Ki̍li̍tīo̍o̍ ni᷄ŋ.

⁵Le̍ chō nya̍ chō o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī wo̍, Mɛ̄lɛ̄ka̍ bīī mbo̍ sūlī nya̍ a̍ nyɛ̄ o̍ nyɛ̄ fe̍e̍. Ko̍ŋ cho̍ ni̍, ō tōsa̍ mi̍ lā sīmnu᷄ŋ wa̍nāā sīnāā dɛ̍nɛ̍ a̍ yōōŋgū ndɔ̄ɔ̍ o̍kɔ̄ɔ̄, ndu̍yɛ̍, mbo̍ lūēī nya̍ kpāāyāa̍ le̍ wāŋnda̍ yōōŋgū kālāa̍ dīmūllo̍.

⁶Nyɛ̍ yɔ̍nu̍ŋ a̍ nya̍ wo̍ chɔ᷄m kpe̍e̍kpe̍i̍ māā, yōōŋgū kɛ̄ndɛ̍ di̍mi̍ŋ nāa̍ nya̍ chūā a̍ Ki̍li̍tī o̍kɔ̄ɔ̄ wo̍ chō tōnya̍.

⁷Le̍ he̍ī, bōōndi̍i̍ nya̍ chō he̍ī lēhɔ̄l o̍ nɛ̄ī le̍ pāa̍le̍ Mɛ̄lɛ̄ka̍ chɔ̄m ni̍ŋ Ma̍sānɔ̄ɔ̍ Chi̍i̍sū Ki̍li̍tī le̍ŋ ndo̍, Mɛ̄lɛ̄ka̍ tōsa̍ mi̍ lā sɔ̄lā nyɛ̄ o̍ nyɛ̄ Nyi̍na̍ Kāsi̍ Mɛ̄lɛ̄ka̍a̍ ō kē wa᷅ŋnda̍.

⁸Ndu̍yɛ̍, Mɛ̄lɛ̄ka̍ chō hīōūwɔ̄ɔ̄ lāchī a̍ nya̍ kpāāyāa̍ kīo̍o̍ o̍ lāāla᷄ŋ nyāa̍ ni᷄ŋ, mbō lo̍ o̍ ko̍ŋ ha̍a̍a̍ mī mɛ̄ɛ̄lu̍la̍ŋ lā fūūlu̍u̍. Mɛ̄lɛ̄ka̍ chō ke̍ŋ to̍sā le̍ hāli̍ kpe̍ŋ māā, pāa̍le̍ Māsānɔ̍ nāa̍ Chi̍i̍sū Ki̍li̍tī cho̍ hūnɔ̄ɔ̄ le̍ŋ, māā ndu̍ Mɛ̍lɛ̄ka̍ ō se̍e̍lūŋ nyɛ᷅ o̍ nyɛ̄ wɔ̄ɔ̍ŋ a̍ nya̍ o̍kɔ̄ɔ̄ le̍.

⁹Mɛ̄lɛ̄ka̍ o̍ chu̍a̍ nya̍ le̍ mī lā wa̍ o̍ ndi̍a̍a̍mɔ̍ɔ̍le̍ ni᷄ŋ nya̍ Po̍ ndɔ̄ɔ̍, Chi̍i̍sū Ki̍li̍tī wa̍ā wo̍, na̍a̍ na̍a̍ Māsānɔ̍ nāa̍, Mɛ̄lɛ̄ka̍ kōŋ ō chō wāna̍ wānā nɔ̍lā mā ti̍i̍nda̍ŋ.

¹⁰Chāa̍ŋāā nīāā wa̍nāā lāāla᷄ŋnda̍, I̍ cho̍ nya̍ nyɔ̄ɔ̄lōo̍, lā yāndi̍i̍, lā yīya̍ŋ le̍ Māsānɔ̍ nāa̍ Chi̍i̍sū Ki̍li̍tī mī lā wa̍ dīōm pīlɛ̍. Lā pi̍ɔ̍ūvi̍āŋ tɛ̍ɛ̄ŋ te̍. Lā wa̍ a̍ mɔ̍ɔ̄sa᷅ŋ nyɛ̄ kɛ̄ndɛ̄ mɔ̍ɔ̍su̍. Lā wa̍ di̍ōmndo̍ ō pīlɛ̍ kpe̍, o̍ yīya᷄ŋnda̍ nyāla̍ŋ ni᷄ŋ ni̍ a̍ o̍ yēēma̍ŋ nya̍ŋ ni᷄ŋ.

¹¹Le̍ sa̍bū ya̍ I̍ di̍mi̍ he̍ī yo̍ cho̍ ni̍ māā, Ku̍lo̍o̍yē wānāā ndūa̍a̍ ā pūm ā dīmu̍l la̍ māā sɛ̄ɛ̄ŋgi̍āŋnda̍ŋ lā chō nya̍ tɛ̄ɛ̄ŋ.

¹²Ndu̍ yɔ̍nūŋ ni̍ māā wāna̍ cha᷅ŋ ko̍ ō dīmī āā, “Ya̍ ya̍, kūmbu̍ Pɔ̍ɔ̄ wo̍ ya̍ ya̍ I̍ cho̍ ni̍.” Ho̍ō chɛ᷄ŋ āā, “Ya̍ ya̍ kūmbu̍ A̍pɔ̍lɔ̄ɔ̄ wo̍ ya̍ cho̍ ni̍.” Ho̍ō chɛ᷄ŋ āā, “Kūmbu̍ Pīti̍ɔ̍ɔ̍ ya̍ cho̍ ni̍.” Ho̍ō āā, “Ya̍ kūmbu̍ Ki̍li̍tīo̍o̍ ya̍ cho̍ ni̍.”

¹³Bāā mī lā pīɔ̍u̍ māpīɔ̄ūwāā Ki̍li̍tī a̍ ku̍ndāla̍ŋ? Bāā Pɔ̍ɔ̄ nda̍ ba᷄ŋ o̍ yɔ̄m sīŋgāfīlāa̍ chōo̍ ma̍ dīī ndu̍ le̍ nya̍ ni̍? Yīŋɔ̄ɔ̍ Mɛ̄lɛ̄ka̍ nda̍ wa̍ nya̍ wo̍, bāā le̍ sīmnɔ᷄ŋndo̍ bu̍ɛ̍i̍yāa̍ Pɔ̍ɔ̄ wa̍ nda̍ yīŋ nya̍ ni̍?

¹⁴I̍ yi̍l bɛ̍ɛ̍ Mɛ̍lɛ̄ka̍ ba̍li̍ka̍ māā, I̍ yi᷅ŋ wa̍nā o̍ wānā nya̍ tɛ̄ɛ̄ŋ te̍, mɛ̄ɛ̍ Ki̍li̍pɔ̄ɔ̄ nda̍ Ka̍yɔ̄ɔ̄.

¹⁵Le̍ he̍ī, wānā o̍ wānā di̍mī nu̍a̍ā māā le̍ wāa̍ bu̍ɛ̍i̍yāā nī le̍ nya̍ sɔ̄la̍ yīŋɔ̄ɔ̍ le̍.

¹⁶Bɔ̄ɔ̍le̍, mi̍ yi᷅ŋ vɛ̄lɛ̄ Sɛ̄tīfa̍nāā nda̍ wānāā ndūa̍a̍ o̍ ndu̍ lo̍ chi̍ɛ̍ī ni̍ŋ. Ō fūla̍ ni᷅ŋ o̍ ka̍ŋ kɔ̍ɔ̍lī, I̍ lo̍o̍nūŋ ndɛ̍ wānā o̍ wānā che᷅le̍ŋ ō ya̍ I̍ pi̍la̍ yi᷅ŋ te̍.

¹⁷Kāni̍ fu̍u̍le̍, ō cho̍ le̍ ŋ̄wāŋ yīŋɔ̄ɔ̄ le̍ Ki̍li̍tī ve᷅m ya̍ le̍. Ō vēm ya̍ māvīāmāā le̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍. Ndu̍yɛ̍, I̍ nɔ̍ mī di̍mi̍ ndu̍ o̍ kɔ̄l kālu̍ īwāna̍ chi̍e̍e̍ya̍ ni᷄ŋ te̍, yɔ̄ŋi̍ yōōŋgōo̍ ho̍ō a̍ pīɔ̍m Ki̍li̍tī vi᷅ o̍ yɔ̄m sīŋgāfīlāa̍ chōo̍ wo̍, ō fūla̍ yo̍o̍mūa̍ŋ.

¹⁸Yōōŋgōo̍ a̍ pīɔ̍m Ki̍li̍tī vi᷅ o̍ yɔ̄m sīŋgāfīlāa̍ chōo̍ wo̍ o̍kɔ̄ɔ̄, wānāa̍ cho̍ kɔ̄la̍ŋ o̍ nyɛ̄ pālāā fɛ̍ɛ̍ŋ fɛ̍ɛ̍ŋndo̍ ni᷄ŋ nda̍, nda̍ nda̍ chu̍a̍ ndu̍ māā sūɛ̍i̍ īdīɔ̄m. Kɛ̍, na̍a̍ wānāā Mɛ̄lɛ̄ka̍ chō pīŋīo̍o̍ wa̍, na̍a̍ na̍a̍ ŋ̄ sīnā māā yōōŋgōo̍ ho̍ō ndu̍ kpe̍e̍kpe̍i̍ chɔ̍m kpāāya̍ Mɛ̄lɛ̄ka̍ nɔ̄ wo̍ ni̍.

¹⁹Mi̍ Mɛ̄lɛ̄ka̍ dīmī o̍ yāu̍ ndɔ̄ɔ̍ ni᷄ŋ āā, “Kɔ̄l kālu̍ o̍ kɔ̄l kālu̍ īwāna̍ chi̍e̍e̍ya̍ wāŋnda̍ nɔ̄, I̍ cho̍ wāŋnda̍ chɔ̄m māā nyɛ̄ fo̍ndōo̍ fu̍u̍ o̍ cho̍ ni̍. Ndu̍yɛ̍, dɛ̍nɛ̍ si̍nāā o̍ dɛ̍nɛ̍ si̍nāā īwāna̍ chi̍e̍e̍ya̍ wāŋnda̍ nɔ̄, I̍ cho̍ tōsā mbō wa̍ ō pɛ̄ɛ̄sāā.”

²⁰Tē ī wa̍ yɛ̄ le̍nde̍ pɛ̍, mɛ̄ɛ̍ wānāa̍ sɔ̍la̍ pɛ̄ɛ̄kū dɛ̍nɛ̍ si̍nāa̍ wa̍ a̍ wānāa̍ cha̍ā kɔ̍ɔ̍sɔ̍ sōndōo̍ wa̍, kɔ̄l kālu̍la̍ ndāla̍ la̍ŋ kpo̍u̍ mī yɛ̄ɛ̄ kɛ̍ndɛ̄? Mɛ̄lɛ̄ka̍ chɔ᷄m māā kɔ̄l kālu̍ chi̍e̍ēŋndo̍ ho̍ō dīɔ̄mīī fo̍ndūe̍i̍ fu̍u̍ o̍ cho̍ ni̍.

²¹Mɛ̄lɛ̄ka̍ tōsa̍ o̍ kɔ̄l kālu̍ ndɔ̄ɔ̍ ni᷄ŋ māā wānā o̍ wānā nɔ̍lā o̍ kɔ̄l kālu̍ ndɔ̍ īwāna̍ chi̍e̍e̍ya̍a̍ ni᷄ŋ mbō sīna̍ Mɛ̄lɛ̄ka̍ kpe̍e̍kpe̍i̍ le̍. Kɛ̍ ndu̍yɛ̍, yōōŋgu̍ Mɛ̄lɛ̄ka̍ na̍a̍ ŋ̄ chō ho̍ō wāŋnda̍ dīmūllo̍ wo̍, kɛ̍ mi̍ wāŋnda̍ dīmī māā dīɔ̄mnde̍ o̍ cho̍ ni̍ wo̍, yōōŋgū kōŋ a̍ ndu̍ Mɛ̄lɛ̄ka̍ kɛ̄ɛ̄si̍a̍a̍ le̍ wānāā lāāla᷄ŋnda̍ pīŋīo̍o̍ ni̍.

²²Chu̍ūwa̍ nda̍ hɛ̄nāŋ mā chē mī wāŋndo̍ tōsa̍ sɔ̄ɔ̍ŋ kɔ̄ndɔ̄fi̍llo̍ŋ. Wānāa̍ cho̍ a̍ Chu̍ū le̍ wa̍, nda̍ nda̍ kɔ̄l kālo̍o̍ chi̍e̍ēŋ na̍ŋ nda̍ chō kɔ̄ɔ̄lī ni̍.

²³Kɛ̍ na̍a̍ na̍a̍, wāŋnda̍ na̍a̍ ŋ̄ dīmūl a̍ pīɔ̍m Ki̍li̍tī vi᷅ o̍ yɔ̄m sīŋgāfīlāa̍ chōo̍ wo̍ o̍kɔ̄ɔ̄ ni̍. Chu̍ūwa̍ nda̍ nda̍ chu̍a̍ yōōŋgū kōŋ māā sūɛ̍i̍ ndɛ̄i̍ lēya̍a̍mɔ̍ɔ̍. Wānāa̍ cho̍ a̍ Chu̍ū le̍ wa̍, nda̍ nda̍ chu̍a̍ ndu̍ māā sūɛ̍i̍ īdīɔ̄m.

²⁴Kɛ̍ wānāā Mɛ̄lɛ̄ka̍ chu̍a̍ le̍ wāa̍ wānāā ndɔ̄ wa̍, nda̍ nda̍, ā wa̍ lāChu̍ū, ā wa᷅ la̍ Chu̍ū le̍, nda̍ chu̍a̍ Ki̍li̍tī māā ndu̍ chɔ̍m kpāāya̍ Mɛ̄lɛ̄ka̍a̍ ni̍ a̍ kɔ̄l kālu̍ Mɛ̄lɛ̄ka̍a̍.

²⁵Kāni̍ fo̍ndōle̍, yōōŋgu̍ Mɛ̄lɛ̄ka̍ nda̍ dīmi̍ māā dīɔ̄mnde̍ o̍ cho̍ ni̍ wo̍, yōōŋgū kōŋ ndu̍ hi̍o̍ū kɔ̄l kālu̍ a̍ kɔ̄l kālu̍ īwāna̍ chi̍e̍e̍ya̍a̍ po̍lo̍ŋ. Ndu̍yɛ̍, Mɛ̄lɛ̄ka̍ sūɛ̍i̍ ndūɛ̍i̍ nda̍ yīya̍ŋ māā ī nɔ̍ kpa̍a̍yā le̍ ve̍, kpāāya̍ sūɛ̍i̍ ke̍ŋ ndu̍ hi̍o̍ū po̍lo̍ŋ a̍ kpāāya̍ īwāna̍ chi̍e̍e̍ya̍a̍.

²⁶Chāāŋāā nīāā wa̍nāā lāāla᷄ŋnda̍, lā lōōnu̍ŋ ndɔ̍ bo̍o̍ndi̍i̍ Mɛ̄lɛ̄ka̍ chu̍a̍ nya̍ le̍ wāa̍ wānāā ndɔ̄ ve̍ mɛ̄ɛ̍ nya̍ wa̍ yɛ̍. Tē ŋ̄ nu̍a̍ ndi̍ o̍ nɛ̄i̍ īwāna̍ chi̍e̍e̍ya̍a̍ ni᷄ŋ pɛ̍, nya̍ pūm nda̍ ka̍ ka̍ lā ve̍ wa̍nāā kɔ̄l kālu̍ wa᷅ŋnda̍ o̍ hɔ̄l te̍. Lā ve̍ wa̍nāā kpāāyā, kɛ̄lɛ̄ŋgāā mī lā wa̍ lāsa̍la̍ma̍ le̍.

²⁷Mɛ̄lɛ̄ka̍ kɛ̄ɛ̄si̍a̍a̍ mākɛ̄ɛ̄sīāā ndi̍, mbo̍ chūā wānāā ŋ̄wāŋndā chi̍e̍e̍ nda̍ nda̍ yīya̍ŋ māā dīɔ̄mnda̍ nda̍ chō ni̍ wa̍, mbo̍ sōli᷄ŋ kpe̍ku̍ a̍ nda̍ le̍ mī wānāā kɔ̄l kālu̍a̍a̍ chi̍e̍ēŋ na̍ŋ a̍ to̍lnu᷄ŋ la̍si̍ɔ̍mbu̍. Ndu̍yɛ̍, wānāā nda̍ yīya̍ŋ māā ā nɔ̍ kpa̍a̍yā le̍ wa̍ mi̍ Mɛ̄lɛ̄ka̍ chūā nda̍ mbo̍ sōli᷄ŋ kpe̍ku̍ a̍ nda̍, le̍ mī wānāā kpāāyāa̍ chi̍e̍ēŋ na̍ŋ a̍ to̍lnu᷄ŋ la̍si̍ɔ̍mbu̍.

²⁸Wānāā wāŋnda̍ chu̍a̍ māā wānāā fo̍ndō, ndu̍yɛ̍ ma̍ pɛ̄ɛ̄sā nda̍ wa̍, wānāā nda̍ chu̍a̍ māā ā cho̍ nyɛ᷅ o̍ nyɛ̄ le̍ wa̍, nda̍ Mɛ̄lɛ̄ka̍ kɛ̄ɛ̄si̍a̍a̍ mbo̍ chūā ni̍. Mbo̍ sōli᷄ŋ kpe̍ku̍ a̍ nda̍ le̍ chɔ̄mndo̍ māā, wānāā nda̍ nda̍ chu̍a̍ o̍ yīya᷄ŋ īwāna̍ chi̍e̍e̍ya̍a̍ ni᷄ŋ māā ā chō ā bɛ̄ndū wa̍, māā ā cho̍ a̍ bɛ̍ndū kpe̍e̍kpe̍i̍ le̍.

²⁹He̍ī chɔ̍m ni̍ māā wānā o̍ wāna̍ chi̍e̍e̍ a̍ nɔ̍ di̍ mā kēlū yōŋgāa̍ Mɛ̄lɛ̄ka̍ o̍ hɔ̄l te̍.

³⁰Mɛ̄lɛ̄ka̍ pi̍la̍ ndu̍ si̍i̍ŋgu̍u̍ nya̍ wānāa̍ Chi̍i̍sū Ki̍li̍tīa̍a̍ ni̍. Ndu̍yɛ̍, Mɛ̄lɛ̄ka̍ tōsa̍ a̍ sa̍bū mi̍ Ki̍li̍tī si̍mnu᷄ŋ wa᷅na̍ ke᷅ na̍a̍ kɔ̄l kālo̍o̍ wo̍. Ndu̍ Ki̍li̍tī ndu̍ to̍sa̍ ni̍ mi̍ ŋ̄ sīmnu᷄ŋ wa̍nāā sa̍kpō Mɛ̄lɛ̄ka̍ ō hɔ̄l. O̍ ko̍ŋ kɔ̍ɔ̍lī, mbo̍ tōsā mi̍ ŋ̄ sīmnu᷄ŋ wa̍nāa̍ cho̍ le̍ Mɛ̄lɛ̄ka̍. Ndu̍ ba̍ŋa̍ na̍a̍ ni̍.

³¹Le̍ he̍ī Yāu̍ Mɛ̄lɛ̄ka̍a̍ dīmi̍ ni̍ āā, “Wānā o̍ wānā tē a̍ hɛ̍na̍ŋ mā kēlū yōŋgāa̍ pɛ̍, yōŋgā nu̍m kīālāa̍ ō wa̍ a̍ nyɛ̄ Māsānɔ̄ɔ̍ Mɛ̄lɛ̄ka̍ ō tōsa̍ wo̍ o̍kɔ̄ɔ̄.”