Read Southern Kisi Kɔ̄li̍ŋtīāŋ Tāso̍o̍ 10 Bible Online

Kɔ̄li̍ŋtīāŋ Tāso̍o̍ 10 - Southern Kisi bible

Kɔ̄li̍ŋtīāŋ Tāso̍o̍ 10

¹Chāāŋāā nīāā wa̍nāā lāāla᷄ŋnda̍, lā pūɛ̄ɛ̄nu᷄ŋ a̍ nyɛ̍ yɔ̍nu̍ŋ a̍ fi̍nyāā nāā ma̍māa̍, bōōndi̍i̍ nda̍ sōli̍ nda̍ o̍ chɛ̄le̍ŋ ni᷄ŋ o̍ lɛ̄ŋndē I̍chi̍pīle̍ŋ ni᷄ŋ nde̍ le̍. Nda̍ kpo̍u̍ ha̍lā tīŋīo̍o̍ wa̍ kɔ̄la̍ŋ a̍ nda̍ nɛ̄īyo̍ chɔ̄mndo̍ ni̍. Ndu̍yɛ̍, nda̍ kpo̍u̍ ma̍ kēēkū o̍ mɛ̄ŋmā ībūŋga᷄ŋ ni᷄ŋ.

²Nda̍ kpo̍u̍ ma̍ sɔ̄lā pūlɔ̄ɔ̍ Mɛ̄lɛ̄ka̍a̍ o̍ ha̍la̍ kōŋ ni᷄ŋ a̍ o̍ mɛ̄ŋmā ībūŋgāmā māŋ ni᷄ŋ le̍ wāa̍ māā Mūu̍sē bu̍ɛ̍i̍yāa̍ ndɔ̄.

³Ndu̍yɛ̍, nda̍ kpo̍u̍ ma̍ dīā nyɛ̄ dīāā pīlɔ̍ɔ̍ kpe̍ o̍ fu̍la̍ o̍ Mɛ̄lɛ̄ka̍ lo̍ wo̍.

⁴Ndu̍yɛ̍, nda̍ kpo̍u̍ ma̍ kōl mɛ̄ŋmā pīli̍a̍ŋ ma̍ fu̍la̍ o̍ Mɛ̄lɛ̄ka̍ lo̍ wa̍ŋ. Ko̍ŋ cho̍ ni̍, ma̍ kōl mɛ̄ŋma̍ fu̍la̍ o̍ po̍u̍ fu̍la̍ o̍ Mɛ̄lɛ̄ka̍ lo̍ mī ndu̍ o̍o̍ ku̍ā nda̍ nda̍ā wo̍. Pōūwo̍ ho̍ō ndu̍ wa̍ Ki̍li̍tī ni̍.

⁵Kɛ̍ ndu̍yɛ̍, mi̍ chē bɛ̍ɛ̍ mi̍ Mɛ̄lɛ̄ka̍ ō tōsāl nda̍ mu᷅ŋ kpo̍u̍, kɛ̍ o̍ ko̍ŋ ni̍ŋ fa̍ū, wānāā ka̍ ka̍ nda̍ tɛ̄ɛ̄ŋ Mɛ̄lɛ̄ka̍ ndu̍ o̍o̍ hi̍ni̍ kɔ̍l a̍ nda̍ le̍. Le̍ he̍ī, ma̍ sɔ̄lā pīɔ̍mndo̍ o̍ po̍llo̍ ni᷄ŋ.

⁶Sɔ̄ɔ̍ŋ mu᷅ŋ ki̍nɛ̍i̍, ŋ̄ yɔ̄nu̍ŋ le̍ wāa̍ māā tāmāsi̍ le̍ na̍a̍. Ŋ̄ yɔ̄nu̍ŋ le̍ na̍a̍ sīlāa̍ yɔ̄ŋi̍ yēēmɛ̍i̍ to̍sāā yɔ̄ŋ wɔ̄ɔ̍ŋnde̍ ī lūɛ̍i̍ na̍a̍ o̍ lākɔ̄l mɛ̄ɛ̍ i̍ lu̍ɛ̍ī nda̍ ō lākɔ̄l lɛ̍.

⁷Ndu̍yɛ̍, sɔ̄ɔ̍ŋ mu᷅ŋ ŋ̄ yɔ̄nu̍ŋ le̍ na̍a̍ sīlāa̍ yɔ̄ŋi̍ na̍a̍ ŋ̄ lūe̍i̍ ba̍ o̍ nyɛ̄m chēle̍ŋndo̍ŋ sōōlūūwo̍ ni᷄ŋ mɛ̄ɛ̍ fi̍nyāā nāā ma̍māā kāŋ ā pūm ā tōsa̍ yɛ̍. Yāu̍ Mɛ̄lɛ̄ka̍a̍ dīmi̍ āā, “Wāŋnda̍ ha̍ā ā bɔ̄ɔ̄ŋi̍āŋ le̍ nyɛ̄ dīa̍a̍ dīo̍o̍ a̍ mūɛ̄īya̍ŋ kōlɔ̄ɔ̍. Ma̍ mɛ̄ɛ̄la᷅ŋ a̍ sɔ̄ɔ̍ŋ wānāa̍ pi̍ɛ̍ī Mɛ̍lɛ̄ka̍ le̍ wa̍ ā tōsā wo̍ŋ tōsāa̍.”

⁸Na̍a̍ na̍a̍ ŋ̄ wo̍ū la̍ba̍ o̍ nīīlū sūūndɛ̍i̍ ni̍ŋ mɛ̄ɛ̍ nda̍ pūm nda̍ ā tōsa̍, o̍ ko̍ŋ kɔ̍ɔ̍lī, o̍ pāa̍le̍ŋ lē pīlɛ̍ ni᷄ŋ kpe̍ mi̍ wāŋnda̍ sɔ̄lā pīɔ̍mndo̍ nda̍ chōo̍ wa̍a̍la̍ŋ bi̍di̍i̍ŋ a̍ lā yāa̍ yɛ̍ le̍.

⁹Lā ŋ̄ tɔ̍ɔ̍ndāŋ Ma̍sānɔ̄ɔ̍ Mɛ̄lɛ̄ka̍, mɛ̄ɛ̍ nda̍ pūm nda̍ tɔ̄ɔ̄nda̍ŋ ndu̍ mbo̍ lō o̍ ko̍ŋ mi̍ kɛ̄ūwa̍ lɔ̄ɔ̄vīāā nda̍ ma̍ wū yɛ̍ le̍.

¹⁰Ndu̍yɛ̍, ŋ̄ wa̍nūŋ ŋɔ̄ɔ̄chīa̍ŋnda̍ŋ mɛ̄ɛ̍ ā pūm ā lo̍ ŋɔ̄ɔ̄chīa̍ŋnda̍ŋ a̍ Mɛ̄lɛ̄ka̍, mi̍ ki̍i̍la̍nɔ̍ Mɛ̄lɛ̄ka̍ hu᷅ŋ a̍ pīɔ̍mndo̍ wo̍ ō di̍ū nda̍ yɛ̍ le̍.

¹¹Sɔ̄ɔ̍ŋ mu᷅ŋ kpo̍u̍ ŋ̄ yɔ̄nu̍ŋ nda̍ le̍ wāa̍ māā tāāmāsi̍ le̍ wāŋnda̍ ā tūa̍a̍. Ndu̍yɛ̍, wāŋnda̍ pōōnyi̍a̍a̍ mu̍ŋ le̍ wāa̍ māā sīlā le̍ na̍a̍. Kāni̍ fo̍ndōle̍, bōōndi̍i̍ na̍a̍ ŋ̄ chō ni᷅ŋ he̍ī ve̍, ī chō ni᷅ŋ kpɛ̍ɛ̍lūŋ a̍ chi̍e̍ēŋndo̍ chūwɔ̄ɔ̄ ndɔ̄ɔ̍.

¹²Le̍la̍ŋ, wānā o̍ wāna̍ nɔ̍ o̍ kɔ̄l pɛ̍ māā ndu̍ ndu̍ cho̍ a̍ dīāllūŋ kālā mɛ̄ɛ̍ ō mānda̍ŋ, yɔ̄ŋi̍ o̍ de̍l o̍ yɔ̄ŋ wɔ̄ɔ̍ŋndo̍ ni᷄ŋ.

¹³Tɔ̄ɔ̄nda᷄ŋ o̍ tɔ̄ɔ̄nda᷄ŋ cho̍ nya̍ kōmāllo̍ ō cho̍ ko̍ nya̍ le̍ la̍ ko̍ma̍l te̍. Tɔ̄ɔ̄nda᷄ŋnda̍ wa̍ā le̍nde̍ la̍ ko̍ma̍l ni᷅ŋ wāŋnda̍. Kɛ̍ ndu̍yɛ̍, būŋgɛ̄ī Mɛ̄lɛ̄ka̍ chu̍a̍ le̍ tōsāa̍ ve̍ tōsāa̍ o̍ to̍sā ndi̍ ni̍. Ō chɛ᷅l mī tɔ̄ɔ̄nda᷄ŋ nya̍ nɔ̍ kpa̍a̍yā le̍ hīōūwɔ̄ɔ̄ le̍ wo̍ ō kōma̍l nya̍ le̍. Bōōndi̍i̍ tɔ̄ɔ̄nda᷄ŋndo̍ ō kōmāl nya̍ ve̍ Mɛ̄lɛ̄ka̍ nɔ̄lā mbō chɔ᷄m nɛ̄i̍ nya̍ lōōkū mī lā hɛ̄lu᷄ŋ le̍ni̍ŋ ndo̍. Ndu̍ yɔ̍nūŋ ni̍ māā kpāāyāa̍ nya̍ lūēīyo̍ mī lā si᷄m a̍ dīāllūŋ kālā.

¹⁴Le̍la̍ŋ chāāŋāā nīāā wa̍nāā lāāla᷄ŋnda̍, bālā nyāla̍ wa᷅ o̍ sūɛ̍i̍ nyɛ̄m chēle̍ŋ sōōlūū ni᷄ŋ te̍.

¹⁵I̍ cho̍ nya̍ dīōmnda̍ŋ nda᷅ŋ dīmūllo̍ māā wānāa̍ si̍nā i̍sɔ̍ɔ̍ pɛ̍ŋgu̍. Nya̍ pi̍la̍ lā kīōlu̍ di̍ōmndā ya̍ I̍ chō la᷅ŋ dīmīo̍o̍ la̍ŋ īyāma̍ tē lā cho̍ o̍ nɛ̄ī le̍.

¹⁶Tē ŋ̄ cha᷄l nyɛ̄ dīāā wānāā lāāla᷄ŋnda̍ dīo̍o̍ pɛ̍, ŋ̄ chu̍a̍ tāālāa̍ ŋ̄ me᷄l Mɛ̄lɛ̄ka̍ ba̍li̍ka̍ le̍ ndu̍, ŋ̄ pīɛ̍i̍ Mɛ̄lɛ̄ka̍ le̍ mbō dɔ̄ū ndu̍ sa̍lā, ŋ̄ ko᷄l. Lā sīnā māā wānā o̍ wāna̍ ko᷅l le̍ni̍ŋ, mɛ̄ɛ̍ kōo̍ma̍ Ki̍li̍tīa̍ŋ na̍a̍ ŋ̄ chō ma̍ŋ ko̍lɔ̄ɔ̍ vēllāa̍ vēllē ni̍. Ndu̍yɛ̍ o̍ ko̍ŋ kɔ̍ɔ̍lī, mī ŋ̄ chu̍a̍ bēe̍dīi̍yo̍ mī ŋ̄ yīmi̍ mī ŋ̄ pīɔ̄ūvi̍āŋ. Ndu̍yɛ̍, lā sīnā māā wānā o̍ wāna̍ de᷅ bēe̍dīi̍yo̍ ho̍ō pɛ̍, mɛ̄ɛ̍ dīāllu᷄ŋ Ki̍li̍tīo̍ŋ na̍a̍ ŋ̄ chō mu̍ŋ di̍o̍o̍ vēllāa̍ vēllē ni̍.

¹⁷Na̍a̍ wānāā lāāla᷄ŋnda̍ mi̍ chē bɛ̄ɛ̄ ŋ̄ chō ta̍u̍, kɛ̍ ndu̍yɛ̍, dīālle̍ ī pīlɛ̍ kpe̍ na̍a̍ ŋ̄ chō ni̍. Kāni̍ fu̍u̍le̍, ō fūla̍ o̍ bēe̍dīi̍ pi᷅lɛ̍ na̍a̍ ŋ̄ yīmī ho̍ō mī ŋ̄ dīā lātūlu̍ wo̍ ni᷄ŋ.

¹⁸Lā yīya̍ŋ ndɔ̍ a̍ wāŋnda̍ I̍sɔ̄lūɛ̄ī o̍kɔ̄ɔ̄, a̍ mɛ̄ɛ̍ nda̍ tōsā yɛ̍. Wānāa̍ hu᷅ŋ a̍ sa̍lāa̍ le̍ sōlīo̍o̍ o̍ ma̍āŋ Mɛ̄lɛ̄ka̍a̍ chōo̍ wa̍ ā sōli̍ pɛ̍, ō ti᷄ŋ ā dē, ā lōm ho̍ō o̍ ma̍āŋndo̍ chōo̍. Mɛ̄ɛ̍ o̍ nɛ̄īyo̍ ho̍ō ni᷄ŋ wāŋnda̍ ha̍ā sīmnu᷄ŋ nyɛ᷅ pīlɛ̍ a̍ ma̍āŋ Mɛ̄lɛ̄ka̍a̍.

¹⁹Kɛ̍ ndu̍yɛ̍, tē I̍ di̍mi̍ he̍ī pɛ̍, bāā dīmīo̍o̍ ya̍ di̍mi̍ ko̍ŋ ni̍ māā, nyɛ̄m wāŋnda̍ chu̍a̍ māā Mɛ̄lɛ̄ka̍ā ndā mā sōōlūū mu̍ŋ ndo̍ŋ, mɛ̄ɛ̍ Mɛ̄lɛ̄ka̍ nyɛ̄m mu᷅ŋ chō ni̍? Ndu̍yɛ̍, bāā dīmīo̍o̍ cho̍ ko̍ŋ ni̍ māā sa̍lā nda̍ yɔ̄ŋgū ko̍ŋ o̍ nyɛ̄m mu᷅ŋ ndo̍ māā sa̍lā kpe̍e̍kpe̍i̍yo̍ o̍ cho̍ ni̍?

²⁰Ō cho̍ ko̍ŋ kpo̍so̍ŋ te̍. Nyɛ̄ ya̍ I̍ cho̍ dīmīo̍o̍ wo̍ cho̍ ni̍ māā, sa̍lālā nda̍ sōlī o̍ ma̍āŋndā nyɛ̄m nda̍ sōōlūū mu̍ŋ ndo̍ŋ chōo̍ la̍ŋ, sa̍lālā lāŋ, mɛ̄ɛ̍ nyi̍nāā wɔ̄ɔ̍ŋnda̍ nda̍ ke̍ la̍ŋ ni̍. Ō cho̍ Mɛ̍lɛ̄ka̍ le̍ nda̍ ke̍ le̍. Tē nyɛ̄m mu᷅ŋ ŋ̄ wa̍ yɛ̄ le̍ nyi̍nāā wɔ̄ɔ̍ŋnda̍ pɛ̍, mɛ̄ɛ̍ I̍ ye̍e̍ma̍ nya̍ nyi̍nāā wɔ̄ɔ̍ŋnda̍ mī lā sīmnu᷄ŋ wa̍nāā pīlɛ̍ le̍.

²¹Wānā che᷅l mā dē nyɛ̄ dīāā wānāā lāāla᷄ŋnda̍ mā ko̍l a̍ tāālā ko̍ŋ, o̍ ko̍ŋ kɔ̍ɔ̍lī, mā ko̍l vɛ̄lɛ̄ a̍ tāāla̍ nyi̍nāā wɔ̄ɔ̍ŋnda̍ le̍. Wānā di᷅ be̍e̍dīi̍ nyɛ̄ dīāā wānāā lāāla᷄ŋnda̍, ndu̍yɛ̍ mā sɔ̍ɔ̍ŋgu̍u̍ vɛ̄lɛ̄ le̍ nyɛ̄ dīāā nyi̍nāā wɔ̄ɔ̍ŋnda̍ dīo̍o̍ le̍.

²²Tē ŋ̄ tōsa̍ le̍nde̍ pɛ̍, Māsānɔ̄ɔ̍ Mɛ̄lɛ̄ka̍ dɔ̄ūnu᷄ŋ tu̍mbe̍ a̍ na̍a̍. Bāā yīya᷄ŋndo̍ nya̍ yīya̍ŋ yɛ̍ ni̍ māā ŋ̄ nɔ̄ kpāāyāa̍ mbo̍ hīāū a̍ ndu̍?

²³Wāŋnda̍ ā pūm ā dīmi̍ māā, ŋ̄ nɔ̄ di̍ mī ŋ̄ tōsa̍ nyɛ̄ o̍ nyɛ̄ fe̍e̍. Ī chō tōnya̍ le̍nde̍. Kɛ̍ ndu̍yɛ̍, ō cho̍ nyɔ̍ɔ̍ŋ fa̍ū le̍ wānā sɔ̍lā ma̍lāa̍ lēni᷄ŋ te̍. Wāŋnda̍ ā pūm ā dīmi̍ māā, ŋ̄ nɔ̄ di̍ mī ŋ̄ tōsa̍ nyɛ̄ o̍ nyɛ̄ fe̍e̍, kɛ̍ ndu̍yɛ̍, ō cho̍ nyɔ̍ɔ̍ŋ fa̍ū le̍ ŋ̍ nɔ̍lā mī ŋ̄ hīvi̍ wāŋndo̍ lāchī o̍ lāāla᷄ŋ ndɔ̄ɔ̍ ni᷄ŋ te̍.

²⁴Wānā o̍ wānā, ō cho̍ ko̍ su̍ɛ̍i̍ ma̍lā nu̍m nu᷄m pīlɛ̍ kpe̍ ve̍ le̍ ŋ̄ tōsā le̍. Nyɛ᷄ ma̍lā cha̍a̍ŋāā nūmnda̍ wo̍ ndu̍ ŋ̄ tōsā ni̍.

²⁵Lā dīā vi̍sīŋ nda̍ pīsī o̍ lɔ̍ɔ̍la̍ŋ ni᷄ŋ ndo̍ŋ, ō cho̍ ta̍nā le̍. Kɛ̍ ndu̍yɛ̍, lā nɔ̍ mī lā nyūna̍ bā nda̍ chɛ᷄ŋ a̍ mu̍ŋ ndo̍ le̍, yɔ̄ŋi̍ o̍ pa̍la̍ kɔ᷅ltā nyāla̍ŋ.

²⁶Kāni̍ fo̍ndōle̍, Yāu̍ Mɛ̄lɛ̄ka̍a̍ dīmi̍ āā, “Chi̍e̍ēŋndo̍ ni̍, a̍ nyɛ̄ o̍ nyɛ̍ cho̍ lēni᷄ŋ, Māsānɔ̄ɔ̍ Mɛ̄lɛ̄ka̍ nɔ̍ ni̍.”

²⁷Tē ō wa̍ pɛ̍ mī wāna̍ cho̍ wa᷅na̍ Mɛ̄lɛ̄ka̍ le̍ wo̍, ō vēēlu̍ nu̍m le̍ nyɛ̄ dīa̍a̍, ndu̍yɛ̍, mā kɛ̍ɛ̍si̍a̍a̍ le̍ mā dē pɛ̍, mɛ̄ɛ̍ di̍o̍ nyɛ̍ dīāā o̍ ke᷅ nu̍m ndo̍. Kɛ̍ ndu̍yɛ̍, nyu̍nā bā o̍ chɛ᷄ŋ a̍ ndu̍ wo̍ le̍, yɔ̄ŋi̍ i̍ pa̍la̍ kɔ᷅l nūmndo̍.

²⁸Kɛ̍, tē wāŋndo̍ ō dīmu̍l nu̍m pɛ̍ āā, “Nyɛ̄ dīāā sa̍lāa̍ cho̍ ho̍ō ni̍,” mɛ̄ɛ̍ di̍ā lɛ̄ nyɛ̄ dīāā kōŋ te̍, le̍ wāna̍ di̍mu̍l nu̍m ko̍ŋ ndo̍, ndu̍yɛ̍ vɛ̄lɛ̄, yɔ̄ŋi̍ i̍ pa̍la̍ kɔ᷅l ndɔ̄ɔ̍.

²⁹Nūm nūm ō cho̍ ma̍chu̍a̍ā māā yɔ̄ŋi̍ i̍ pa̍la̍ kɔ᷅l nūmndo̍ le̍. Kɛ̍, le̍ yɔ̄ŋi̍ i̍ pa̍la̍ kɔ᷅l wānā ko̍ŋ. Kɛ̄lɛ̄ŋgāā mī lā dīmi̍ dɔ̍ɔ̍ āā, “Bāā le̍ yɔ̄ŋi̍ o̍ pa̍la̍ kɔ᷅l ndɔ̄ɔ̍, mɛ̄ɛ̍ ko̍ŋ ku̍u̍nā ya̍ nyɛ̄ ya̍ I̍ nɔ̍ di̍ le̍ mī I̍ to̍sa̍ wo̍ tōsāa̍ ni̍?

³⁰Nyɛ̄ dīāā ya̍ I̍ me̍l Mɛ̄lɛ̄ka̍ ba̍li̍ka̍ le̍ ndu̍ wō, wānā o̍ wānā nɔ̍ mbō pɛ̄ɛ̄sā ya̍ le̍ ndu̍ di̍o̍o̍ le̍. Kāni̍ fo̍ndōle̍, I̍ me̍l Mɛ̄lɛ̄ka̍ ba̍li̍ka̍ le̍ ndu̍.”

³¹Kɛ̍ ndu̍yɛ̍, ō bɛ̄nda̍ nyɛ̄ o̍ nyɛ̄ nya̍ tōsa̍, ō wa̍ o̍ nyɛ̄ dīāā nya̍ dīā wo̍ ni᷄ŋ ni̍, o̍ nyɛ̄ nya̍ kōl lo̍ ni᷄ŋ ni̍, lā tōsa̍ ndi̍ le̍ hāli̍ kpe̍ŋ mī wāŋnda̍ a̍ ke̍ Mɛ̄lɛ̄ka̍ bɛ̄ɛ̄le̍ŋ ta̍u̍.

³²Lā to̍sā mī ka̍ā nyāa̍ ō tɛ̄ɛ̄mbu̍u̍ wānā o̍ wānā kɔ̍l te̍, ō wa̍ Chu̍ūnɔ̄, ō wa̍ wa̍nāa̍ cho̍ a̍ Chu̍ū le̍ wa̍, ō wa̍ ku̍ndā wānāā lāāla᷄ŋa̍a̍ Mɛ̄lɛ̄ka̍a̍ ni̍.

³³Ka̍ā nyāa̍ ō wa̍ mɛ̄ɛ̍ ka̍ā nūu̍ ō chō nu̍a̍ā yɛ̍. Pɛ̄ŋgu̍ o̍ pɛ̄ŋgu̍ I̍ cho̍ kīndīo̍o̍ le̍ mī wānā o̍ wānā hi̍ni̍ kɔ̄l a̍ ka̍ā nūu̍. Ndu̍yɛ̍, ō cho̍ tɔ᷅nɔ̍ ni̍ ya̍ pi̍la̍ le̍ ya̍ I̍ ki̍ndī le̍ nūūwā le̍. Nyɛ̍ wa᷅ tɔ̍nɔ̄ɔ̍ le̍ wānā o̍ wānā wo̍ ndu̍ ya̍ ki̍ndī le̍ tōsāa̍ ni̍ le̍ hāli̍ kpe̍ŋ mā sɔ̄la̍ pīōŋɔ̄ɔ̍.