Read Southern Kisi Kɔ̄li̍ŋtīāŋ Tāso̍o̍ 12 Bible Online

Kɔ̄li̍ŋtīāŋ Tāso̍o̍ 12 - Southern Kisi bible

Kɔ̄li̍ŋtīāŋ Tāso̍o̍ 12

¹O̍ ko̍ŋ kɔ̍ɔ̍lī, sīlāa̍ cho̍ ho̍ō a̍ nyɛ̄m Nyi̍na̍ Kāsi̍ Mɛ̄lɛ̄ka̍a̍ ō kē wa̍nāā lāāla᷄ŋnda̍ wo̍ŋ ni̍. Chāa̍ŋāā nīāā wa̍nāā lāāla᷄ŋnda̍, I̍ hɛ̍na̍ŋ mī lā sīna̍ pɛ̄ŋgu̍ nyɛ̍ kɛ̄ndɛ̍ī a̍ nyɔ̄ɔ̍ŋ mu᷅ŋ o̍kɔ̄ɔ̄.

²Nya̍ pi̍la̍ lā sīnā māā bōōndi̍i̍ nya̍ a̍a̍ ve̍ wɔ̍ wa̍nāā lāāla᷄ŋ o̍ Ki̍li̍tī ni̍ŋ te̍ ve̍, ma̍ hūī nya̍ o̍ nɛ̄īla̍ fa̍ŋgā ni᷄ŋ le̍ mī lā sōōlu̍u̍ mɛ̄lɛ̄ka̍a̍ nɔ̍ ka̍ŋ yo̍o̍mū le̍ wa̍.

³Le̍la̍ŋ, I̍ hɛ̍na̍ŋ nya̍ mī lā sīna̍ pɛ̍ŋgu̍ māā tē ō wa̍ pɛ̍ Nyi̍na̍ Kāsi̍ Mɛ̄lɛ̄ka̍a̍ cho̍ wāŋndo̍ kɔ̄ɔ̄lī ni̍, wānā ko̍ŋ ō nɔ̍lā pe̍sīŋ mbō yēi̍ Chi̍i̍su̍ le̍. Ndu̍yɛ̍, wāŋndo̍ ō nɔ̍lā mbō sɔ̄lɔ̍la̍ŋ māā Chi̍i̍sū kpe̍e̍kpe̍i̍ le̍ cho̍ Māsānɔ̄ɔ̍ le̍, mɛ̄ɛ̍ mī Nyi̍na̍ Mɛ̄lɛ̄ka̍a̍ ō wa̍ ndu̍ kɔ̄ɔ̄lī.

⁴Nyɛ̄m Nyi̍na̍ Kāsi̍ Mɛ̄lɛ̄ka̍a̍ ō kē wa᷅ŋnda̍ wo̍ŋ, ŋ̄ chō su̍u̍la̍ŋ yɛ̍ yɛ̍, kɛ̍, Nyi̍na̍ Kāsi̍ Mɛ̄lɛ̄ka̍ pīlɛ̍ kōŋ ko̍ni̍ yɔ̍ŋgū mu̍ŋ kpo̍u̍ ni̍.

⁵Nɛ̄īla̍ŋ lā chō ta̍u̍ le̍ Māsānɔ̄ɔ̍ Mɛ̄lɛ̄ka̍ sāāŋgīāllo̍, kɛ̍ ndu̍yɛ̍, Māsānɔ̄ pi᷅lɛ̍ kōŋ kpe̍ ko̍ni̍ na̍a̍ ŋ̄ chō sāāŋgīāllo̍ ni̍.

⁶Wa̍lta̍ wāŋnda̍ tōsā le̍ Mɛ̄lɛ̄ka̍ la̍ŋ lā chō yɛ̍ yɛ̍, kɛ̍ ndu̍yɛ̍, Mɛ̄lɛ̄ka̍ pīlɔ̍ɔ̍ kpe̍, ndu̍ ko̍ni̍ ke᷅ wa̍nā o̍ wānā kpa̍a̍yāa̍ le̍ wa̍li̍ o̍ nɔ̍ le̍ tōsāa̍ wo̍ ni̍.

⁷Nyi̍na̍ Kāsi̍ Mɛ̄lɛ̄ka̍a̍ chɔ᷄m kpāāya̍ ndɔ̄ɔ̍ o̍ wānā o̍ wānā ni̍ŋ le̍ wāŋnda̍ kpo̍u̍ ma̍lāa̍.

⁸Wāŋndo̍ ō pūm, mī Nyi̍na̍ Kāsi̍ Mɛ̄lɛ̄ka̍a̍ ke̍ ndu̍ kpāāyāa̍ le̍ sɔ̄ɔ̍ŋ kɔ̄l kālo̍ŋ dīmīo̍o̍. Nyi̍na̍ Kāsi̍ Mɛ̄lɛ̄ka̍ pīlɛ̍ kōŋ kpe̍, mbō ke̍ wāŋndo̍ ō pūm kpāāyāa̍ le̍ sɔ̄ɔ̍ŋ dɛ̍nɛ̍ si̍na᷄ŋ dīmīo̍o̍.

⁹Wāŋndo̍ ō pūm mī Nyi̍na̍ Kāsi̍ Mɛ̄lɛ̄ka̍ pīlɛ̍ kōŋ ō tōsa̍ mbō nɔ̄ lāāla᷄ŋ te̍ŋge̍le̍ŋndo̍ o̍ Mɛ̄lɛ̄ka̍ ni᷄ŋ le̍ sūɛ̍i̍ ī pūm tōsāa̍. Ō pūm mbō ke̍ ndu̍ kpāāyāa̍ le̍ wānāā lānāāwa̍ sīŋgīo̍o̍.

¹⁰Ndu̍yɛ̍, ndu̍ Nyi̍na̍ Kāsi̍ Mɛ̄lɛ̄ka̍ kōŋ, ō ke̍ pɛ̍ wa᷅ŋndo̍ ho̍ō kpāāyāa̍ le̍ sɔ̄ɔ̍ŋ kɔ̄ndɔ̄fi̍llo̍ŋ tōsāa̍, ō ke̍ ho̍ō kpāāyāa̍ le̍ wāŋnda̍ yōōŋgu̍ Mɛ̄lɛ̄ka̍a̍ dīmūllo̍. Mbo̍ ke̍ ō pīlɔ̍ɔ̄ kpāāyāa̍ le̍ yɛ̍ yi̍ɔ̍ɔ̍ sīnāa̍ nyɛ̄m o̍ ke᷅ wa᷅ŋnda̍ wo̍ŋ tɛ̄ɛ̄ŋ, a̍ ŋ̍ cho̍ nyɛ᷅m Nyi̍na̍ Kāsi̍ Mɛ̄lɛ̄ka̍ le̍ wo̍ŋ. Mbo̍ ke̍ ho̍ō kpāāyāa̍ le̍ sūɛ̍i̍ o̍ sɔ̄ɔ̍ŋ ma̍ŋgālāŋ chēle̍ŋndo̍ŋ ni᷄ŋ. Mbō ke̍ wāŋndo̍ ō pīlɔ̍ɔ̄ kpāāyāa̍ le̍ nyɛ̄ wāŋndo̍ sūāā o̍ sɔ̄ɔ̍ŋ ma̍ŋgālāŋ chēle̍ŋndo̍ŋ ni᷄ŋ ndo̍ hīvīo̍o̍ wāŋnda̍ o̍ lānī.

¹¹Kɛ̍ ndu̍yɛ̍, Nyi̍na̍ Kāsi̍ Mɛ̄lɛ̄ka̍ kōŋ ndu̍ pīlɛ̍ kpe̍ to̍sā sɔ̍ɔ̍ŋ mu̍ŋ kpo̍u̍ ni̍. Mɛ̄ɛ̍ o̍ ye̍e̍mā yɛ̍, le̍nde̍ o̍ ke᷅ wa̍nā o̍ wānā nyɛ᷅m yɛ̍ yɔ̍ŋ ni̍.

¹²Dīāllūŋ wāna̍ chi̍o̍o̍ nyɔ̄ɔ̍ ō pīlɛ̍ kpe̍ ŋ̍ cho̍ ni̍, kɛ̍, ŋ̄ nɔ̄ nyɛ̄m yɛ̍ yɔ̍ŋ ta̍u̍. Kɛ̍ ndu̍yɛ̍, nyɛ̄m mu᷅ŋ ki̍nɛ̍i̍ o̍ dīāllūŋ wāna̍ chi̍e̍e̍ pi᷅lɔ̍ŋ ni᷄ŋ kpe̍ ŋ̄ cho̍ ni̍. Mɛ̄ɛ̍ le̍nde̍ dīāllu᷄ŋ Ki̍li̍tīo̍ŋ ŋ̄ chō ni̍. Dīāllūŋ pīlɔ̍ŋ kpe̍ ŋ̍ cho̍ ni̍, kɛ̍ ŋ̄ nɔ̄ nyɔ̄ɔ̍ŋ yɛ̍ yɛ̍.

¹³Na̍a̍ wānāā lāāla᷄ŋnda̍ kpo̍u̍ ŋ̄ fūla̍ o̍ ku̍ndālā yɛ̍ yɛ̍la̍ŋ chōo̍. Chu̍ūwa̍ chō, wānāa̍ cho̍ a̍ Chu̍ū le̍ wa̍ chō. Ā pūm ā chō chīa̍a̍ wāŋnda̍ o̍ bā bɛ̄ŋgu̍. Ā pūm yɛ̍ ā cho̍ la̍chɛ̍ le̍. Kɛ̍ ndu̍yɛ̍, na̍a̍ kpo̍u̍ tē ō wa̍ māā īsɔ̄ɔ̍ pɛ̍, mɛ̄ɛ̍ pūlɔ̄ɔ̄ pīlɔ̍ɔ̍ kpe̍ na̍a̍ ŋ̄ sɔ̄la̍ a̍ Nyi̍na̍ Kāsi̍ Mɛ̄lɛ̄ka̍a̍ ni̍. Le̍ he̍ī ŋ̄ chō māchūāā dīāllūŋ pīlɔ̍ŋ kpe̍. Na̍a̍ kpo̍u̍ Nyi̍nā Kāsī pīlɔ̍ɔ̍ kpe̍ Mɛ̄lɛ̄ka̍ tōsa̍ mbo̍ tūāl na̍a̍ kɔ̄ɔ̄lī ni̍.

¹⁴Wāna̍ chi̍o̍o̍ ō nɔ̍ nyɛ̍ pīlɛ̍ o̍ dīāllūŋ ndɔ̄ŋ ni᷄ŋ te̍. Dīāllūŋ ndɔ᷄ŋ ŋ̄ nɔ̄ nyɛ̄m yɛ̍ yɔ̍ŋ ta̍u̍.

¹⁵Tē pēlēi̍ ī dīmi̍ yɛ̄ āā, “Ya̍ I̍ cho̍ ba̍ le̍. Le̍la̍ŋ, I̍ cho̍ o̍ dīāllo̍ŋ chōo̍ le̍.” Dīmī kōŋ ō ku̍u̍nā ndi̍ wāa̍ o̍ dīāllo̍ŋ te̍.

¹⁶Ndu̍yɛ̍, tē nīle̍ŋ lē dīmi̍ yɛ̄ āā, “Ya̍ I̍ cho̍ le̍hɔ̍l te̍. Le̍la̍ŋ, I̍ cho̍ o̍ dīāllo̍ŋ chōo̍ le̍.” Dīmī kōŋ ku̍u̍nā le̍ŋ wāa̍ o̍ dīāllo̍ŋ te̍.

¹⁷Kāni̍ fo̍ndōle̍, tē ndu̍ o̍o̍ wa̍ pɛ̍ mī dīāllo̍ŋ kpo̍u̍ mu̍ŋ wa̍ hɔ̄lte̍ŋ kpo̍so̍ŋ, vɛ̄ɛ̍nɛ̍ wāŋndo̍ ndu̍ o̍o̍ lo̍o̍kū yɛ̍ tūēīyɔ̄ɔ̄? Ndu̍yɛ̍, tē ndu̍ o̍o̍ wa̍ pɛ̍ mī dīāllo̍ŋ kpo̍u̍ mu̍ŋ wa̍ nīle̍ŋ kpo̍so̍ŋ, vɛ̄ɛ̍nɛ̍ wāŋndo̍ ndu̍ o̍o̍ lo̍o̍kū yɛ̍ nyɔ̄ɔ̍ chūŋ tūēīyɔ̄ɔ̄?

¹⁸Kɛ̍ ndu̍yɛ̍, mi̍ ī bɛ̄ndā mi̍ Mɛ̄lɛ̄ka̍ tōōsīāā dīāllo̍ŋ a̍ nyɔ̄ɔ̍ŋ yɛ̍ yɛ̍ le̍nde̍ mɛ̄ɛ̍ ndu̍ pi̍la̍ hɛ̍na̍ŋ yɛ̍.

¹⁹Tē dīāllo̍ŋ mu̍ŋ wa̍ nyɔ̄ɔ̍ ō pīlɛ̍ pɛ̍ kpe̍, nyɛ̄ pīlɛ̍ kōŋ ndu̍ o̍o̍ si̍mnūŋ ŋ̍di̍a̍l te̍.

²⁰Kɛ̍ mi̍ ī bɛ̄ndā nyɔ̄ɔ̍ŋ yɛ̍ yɛ̍ mu̍ŋ si̍mnūŋ di̍āllo̍ŋ ni̍, kɛ̍ ndu̍yɛ̍, dīāllūŋ pīlɔ̍ŋ.

²¹Le̍la̍ŋ, hɔ̄lte̍ŋ lē nɔ̍lā mī lē dīmu̍l bāa̍ āā, “I̍ he̍u̍ ba̍ a̍ nūm te̍,” le̍. Kɛ̄lɛ̄ŋgāā, bōlle̍ŋ lē nɔ̍lā mī lē dīmūl pe̍lo᷄ŋ āā, “I̍ he̍u̍ ba̍ a̍ nūm te̍,” le̍.

²²Ī yɔ̍nūŋ le̍nde̍ le̍. Nyɛ̄m na̍a̍ ŋ̄ yīyāŋ o̍ dīāllo̍ŋ māā ŋ̄ kīndu̍ le̍ wo̍ŋ, nyɛ̄m mu᷅ŋ ŋ̄ nɔ̄ kpe̍ku̍ kpe̍e̍kpe̍i̍ le̍ tōsāa̍ o̍ dīāllo̍ŋ ni᷄ŋ.

²³Nyɛ̄m na̍a̍ ŋ̄ chu̍e̍ bɛ̍ɛ̍ māā ŋ̄ chō bɛ̍ɛ̍ nyɛ᷅m kpe̍e̍kpe̍i̍ le̍ wo̍ŋ, mu̍ŋ bɛ̍ɛ̍ na̍a̍ ŋ̄ hīāū le̍bɛ̍ɛ̍ kē. Ndu̍yɛ̍, nyɛ̄m na̍a̍ ŋ̄ yīyāŋ māā ŋ̄ ni᷄ŋ bɛ̍ɛ̍ le̍ wo̍ŋ, mu̍ŋ kpɔ̍ na̍a̍ ŋ̄ kūmbū nyɛ̍ kɛ̄ndɛ̍ī ni̍.

²⁴Nyɛ᷄m bɛ̍ndā mī wāŋnda̍ chē wo̍ŋ, mī ŋ̄ mɛ̄i̍ mu̍ŋ, ŋ̄ ku̍mbū mu̍ŋ te̍. Mɛ̄lɛ̄ka̍ tōōsi̍a̍a̍ dīāllūŋ wāna̍ chi̍o̍o̍ tōōsīāā pūm, nyɛ᷄m cho̍ o̍ mu̍ŋ ŋ̄ chu̍e̍ mu̍ŋ bɛ̍ɛ̍ māā ŋ̄ chō nyɛ̄m kpe̍e̍kpe̍i̍ le̍ wo̍ŋ, mu̍ŋ bɛ̍ɛ̍ na̍a̍ ŋ̄ hīāū le̍bɛ̍ɛ̍ kē.

²⁵Le̍la̍ŋ, nyɛ̄m yɛ̍ yɔ̍ŋ ki̍nɛ̍i̍ o̍ dīāllo̍ŋ ni᷄ŋ ŋ̄ pi̍ɔ̍ūvi̍āŋ ve᷅llāa̍ vēllē le̍. Nyɛ̄m yɛ̍ yi̍ɔ̍ɔ̍ŋ kpo̍u̍ o̍ dīāllo̍ŋ ni᷄ŋ, māāndi̍āŋndo̍ ŋ̍ ma̍āndi̍āŋ kpe̍ŋ kpe̍ŋ vēllāa̍ vēllē ni̍.

²⁶Ndu̍yɛ̍, nyɛ̄m mu᷅ŋ ki̍nɛ̍i̍ ō pīlɛ̍ bɛ̍ɛ̍ ō yɔ̄nu̍ŋ nyɛ̍ pɛ̍, mu᷅ŋ bɛ̍ɛ̍ kpo̍u̍ ŋ̄ bīī mɔ̍nɛ̍i̍. Tē ō pīlɛ̍ sɔ̄la̍ bɛ̄ɛ̄le̍ŋ pɛ̍, mu᷅ŋ kpo̍u̍ ŋ̄ na᷄ŋ kɔ̄l vēllāa̍ vēllē.

²⁷Le̍nde̍ ko̍ni̍, mɛ̄ɛ̍ nya̍ chō kpo̍u̍, nya̍ cho̍ dīāllu᷄ŋ Ki̍li̍tīo̍ŋ ni̍. Nya̍ pi̍lɛ̍ŋ pi̍lɛ̍ŋnda̍ fa̍ū, nya̍ cho̍ nyɛ̄m yɛ̍ yi̍ɔ̍ɔ̍ŋ o̍ dīāllo̍ŋ mu᷅ŋ ni᷄ŋ ni̍.

²⁸Mi̍ Mɛ̄lɛ̄ka̍ hɛ̄lī wāŋnda̍ o̍ ku̍ndā wānāā lāāla᷄ŋnda̍ tɛ̄ɛ̄ŋ, le̍ wāa̍ o̍ fo̍ndāŋnda̍ŋ yɛ̍ yɛ̍. Ku̍ndā tāso̍o̍ ndu̍ cho̍ wānāā Chi̍i̍sū ve᷅m hɔ̄ltē ndɔ̄ wa̍ ni̍. Ku̍ndāa̍ dīi̍ŋ ndɔ̄ɔ̍, ndu̍ cho̍ wānāa̍ su̍a̍ā le̍ Mɛ̄lɛ̄ka̍ wa̍ ni̍. Ŋgāa̍ ndɔ̄ɔ̍, ndu̍ cho̍ wānāa̍ pɛ̍ɛ̍kū wa᷅ŋnda̍ sūɛ̍i̍ Mɛ̄lɛ̄kɛ̍i̍ ya̍ ni̍. O̍ ko̍ŋ kɔ̍ɔ̍lī, mbo̍ hɛ̄lī wānāa̍ to̍sā wa̍lta̍ kɔ̄ndɔ̄fi̍lta̍ŋ nda̍, a̍ wānāa̍ nɔ̍ kpāāyāa̍ le̍ wānāā lānāāwa̍ sīŋgīo̍o̍ wa̍, a̍ wānāa̍ ma̍lā wa᷅ŋnda̍ wa̍, a̍ wānāa̍ wa᷅ wa̍lta̍ yɛ̍ yɛ̍la̍ŋ lāchī wa̍, a̍ wānāa̍ su̍a̍ā o̍ sɔ̄ɔ̍ŋ ma̍ŋgālāŋ chēle̍ŋndo̍ŋ ni᷄ŋ nda̍.

²⁹Le̍la̍ŋ, ō cho̍ wa᷅ŋnda̍ fa̍ū le̍ a̍ wa᷅ wa̍nāā Chi̍i̍sū ve᷅m hɔ̄ltē ndɔ̄ le̍, kɛ̄lɛ̄ŋgāā mā wa̍ wānāa̍ su̍a̍ā le̍ Mɛ̄lɛ̄ka̍ wa̍, kɛ̄lɛ̄ŋgāā mā wa̍ wānāa̍ pɛ̍ɛ̍kū wa᷅ŋnda̍ sūɛ̍i̍ Mɛ̄lɛ̄kɛ̍i̍ ya̍ le̍. Ndu̍yɛ̍, ō cho̍ wa᷅ŋnda̍ fa̍ū le̍ a̍ to̍sā kɔ̄ndɔ̄fi̍lta̍ŋ te̍.

³⁰Ō cho̍ wa᷅ŋnda̍ fa̍ū le̍ a̍ nɔ᷅ kpa̍a̍yāa̍ mā sīŋgi̍ wānāā lānāāwa̍ le̍. Ō cho̍ wa᷅ŋnda̍ fa̍ū le̍ a̍ su̍a̍ā o̍ sɔ̄ɔ̍ŋ ma̍ŋgālāŋ chēle̍ŋndo̍ŋ ni᷄ŋ te̍. Ndu̍yɛ̍, ō cho̍ wa᷅ŋnda̍ fa̍ū le̍ a̍ nɔ̍lā mā tɛ̄ɛ̄si̍a̍l wāŋnda̍ sɔ̄ɔ̍ŋ ma̍ŋgālāŋ chēle̍ŋ wāŋnda̍ sūāā wo̍ŋ te̍.

³¹Kɛ̍ ndu̍yɛ̍, lā lāndu̍ŋ kɔ̍l le̍ sɔ̄ɔ̍ŋ cho̍ sɔ̄ɔ̍ŋ le̍bo̍llo̍ŋ ndo̍ŋ. Ndu̍yɛ̍, sūɛ̍i̍ le̍bo᷅lle̍ kpo̍u̍ ndi̍ ya̍ I̍ cho̍ he̍ī hūnɔ̄ɔ̄ nya̍ chɔ̄m ni̍.