Read Southern Kisi Kɔ̄li̍ŋtīāŋ Tāso̍o̍ 13 Bible Online

Kɔ̄li̍ŋtīāŋ Tāso̍o̍ 13 - Southern Kisi bible

Kɔ̄li̍ŋtīāŋ Tāso̍o̍ 13

¹Ā yɔ᷄ŋ bɛ̍ɛ̍ mī I̍ nɔ̍la̍ mī di̍mi̍ sɔ̄ɔ̍ŋ ma̍ŋgāla᷄ŋ kpo̍u̍ o̍ chi̍e̍ēŋndo̍ chōo̍, a̍ sɔ̄ɔ̍ŋ ki̍i̍la̍a̍ Mɛ̄lɛ̄ka̍a̍ chōo̍ cho̍o̍ a̍ di̍mī bɛ̍ɛ̍ wo̍ŋ, kɛ̍ tē I̍ ka̍a̍la̍ cha̍a̍ŋ nī wa᷅na̍ chi̍o̍o̍ le̍ mɛ̄ɛ̍ nyɛ̄ o̍ nyɛ̄ ya̍ I̍ wa᷅ di̍mīo̍o̍, bɔ̄ɔ̄lūū fo̍ndō fu̍u̍ ko̍ni̍ o̍ wa᷅ ni̍.

²Ndu̍yɛ̍, ā yɔ᷄ŋ bɛ̍ɛ̍ mī I̍ nɔ̍la̍ mī di̍mu̍l wāŋnda̍ yōōŋgu̍ chɛ̍ŋ o̍ Mɛ̄lɛ̄ka̍ lo̍ wo̍, kɛ̄lɛ̄ŋgāā mī I̍ si̍na̍ nyɛ̄ o̍ nyɛ̄ fe̍e̍ cho̍ ō vīāŋna᷄ŋ, mī I̍ nɔ̍ dɛ̍nɛ̍ si̍nāa̍ kpo̍u̍, ndu̍yɛ̍, ō wa̍ bɛ̍ɛ̍ mī I̍ nɔ̍ lāāla᷄ŋndo̍ māā ā yɔ᷄ŋ bɛ̍ɛ̍ āā pēmbēi̍ ni̍, mī nɔ̍la̍ mī di̍mu̍l ndi̍ a̍a̍, Fa̍ŋa̍ŋ, o̍ ko̍ŋ kɔ̍ɔ̍lī, mī ī fāŋa̍ŋ, kɛ̍, tē I̍ ka̍a̍la̍ chāa̍ŋ nī wa᷅na̍ chi̍o̍o̍ le̍ mɛ̄ɛ̍ I̍ cho̍ nyɛ᷅ o̍ nyɛ̄ kpo̍so̍ŋ te̍.

³Ndu̍yɛ̍, ā yɔ᷄ŋ bɛ̍ɛ̍ nyɛ̄m nu᷄ŋ kpo̍u̍ mī I̍ chi̍i̍ wāŋnda̍ mu̍ŋ kē kɛ̄lɛ̄ŋgāā, mī chɛ̍l bɛ̍ɛ̍ mā lōm ya̍ chi̍li̍kɔ̍, kɛ̍ tē I̍ ka̍a̍la̍ cha̍a̍ŋ nī wa᷅na̍ chi̍o̍o̍ le̍, mu̍ŋ fa̍ū ŋ̄ ma̍lā ya̍ kpo̍so̍ŋ te̍.

⁴Kāni̍ fo̍ndōle̍, tē ō wa̍ pɛ̍ mā ka̍a̍la̍ wāŋndo̍, bīūwɔ᷄ŋndo̍ ŋ̄ bīūnūŋ ndu̍ ni̍. Tē ō wa̍ pɛ̍ mā ka̍a̍la̍ wāŋndo̍, kɛ̄ndɛ̄i̍ ŋ̄ tōsāl ndu̍ ni̍. Wāna̍ ka̍a̍la̍ chāa̍ŋ ndɔ̄ wa᷅na̍ chi̍o̍o̍ pɛ̍, ō lu̍e̍ī le̍hɔ̍l o̍ nyɛ̄ chāa̍ŋ ndɔ̄ nɔ̍ wo̍ le̍. Wāna̍ ka̍a̍la̍ wo̍, ō ve᷅ wa᷅na̍ yōŋgā le̍, ō ve᷅ wa᷅na̍ da̍ŋga̍ le̍.

⁵Wāna̍ ka̍a̍lā cha̍a̍ŋ ndɔ̄ wa᷅na̍ chi̍o̍o̍ wo̍, ō nɔ᷅ ma̍ndā wɔ̄ɔ̍ŋ te̍, ndu̍yɛ̍, ō ve᷅ le̍ dɛ̍nɛ̍ ndɔ̄ kɛ̍ndɔ̄ɔ̍ ko̍ni̍ le̍ o̍ la̍ndūŋ kɔ̍l te̍. Wāna̍ ka̍a̍la̍ wo̍, ō cho̍ wa᷅na̍ tu̍u̍lu̍ kɔ̄l chɔ̍ chɔ̍ le̍, ndu̍yɛ̍, ō cho̍ wa᷅na̍ ma̍nda̍ sūɛ̍i̍ nɛ̍i̍ya᷄ŋ o̍ kɔ̄l te̍.

⁶Wāna̍ ka̍a̍lā cha̍a̍ŋ ndɔ̄ wa᷅na̍ chi̍o̍o̍ wo̍, ō ni᷅ŋ kɔ̍l le̍ mɛ̄ɛ̍ chāa̍ŋ ndɔ̄ be̍ndu᷄ŋ mbo̍ tōsā yɔ̄ŋ wɔ̄ɔ̍ŋndo̍ yɛ̍ le̍. Ndu̍yɛ̍, tē wāŋndo̍ tōsa̍ sūɛ̍i̍ cho̍ sa̍kpō le̍ tōsāa̍ ve̍ pɛ̍, kɔ̄llo̍ o̍ na᷅ŋ ni̍.

⁷Wāna̍ ka̍a̍la̍ ho̍ō wo̍, dɛ̍nɛ̍ o̍ dɛ̍nɛ̍ nda̍ tōsa̍l ndu̍, bīūwɔ᷄ŋndo̍ o̍ bi̍u̍nu̍ŋ ni̍. Ndu̍yɛ̍, ō cho̍ wa᷅na̍ ki̍i̍sa̍ŋ a̍ chāa̍ŋ ndɔ̄ le̍. O̍ īsɔ̄ɔ̍ o̍ īsɔ̄ɔ̍ ni̍ŋ tīīnda᷄ŋndo̍ o̍ nɔ᷅ ni̍ māā dɛ̍nɛ̍ kɛ̍ndɛ̄ chō fūlā lēni᷄ŋ. Ndu̍yɛ̍, wānā bīūwɔ᷄ŋndo̍ o̍ cho̍ o̍ īsɔ̄ɔ̍ o̍ īsɔ̄ɔ̍ ni̍ŋ ni̍.

⁸Kāālāa̍ ndu̍ cho̍ nyɛ̍ mɛ̍ɛ̍lu̍ le̍. Kɛ̍, bōōndi̍i̍ cho̍ fūūlūū wānā di̍mūl lɛ̍ ni̍ŋ wa̍nā yo̍ōŋgu̍ chɛ̍ŋ o̍ Mɛ̄lɛ̄ka̍ lo̍ wo̍ le̍. Wānāa̍ su̍a̍ā o̍ sɔ̄ɔ̍ŋ ma̍ŋgālāŋ chēle̍ŋ ni᷄ŋ nda̍, bōōndi̍i̍ cho̍ fūūlūū ā su̍ū lɛ̍ ni̍ŋ o̍ sɔ̄ɔ̍ŋ mu̍ŋ ni᷄ŋ te̍. Chīēī dɛ̍nɛ̍ si̍nāa̍ bɛ̍ɛ̍ ō chō mɛ̄ɛ̄lū.

⁹Kāni̍ fo̍ndōle̍, a̍ dɛ̍nɛ̍ si̍nāā kālāa̍ o̍kɔ̄ɔ̄ bɛ̍ɛ̍, sɔ̄ɔ̍ŋ ŋ̄ ti᷄ŋ ko̍ni̍ na̍a̍ ŋ̄ sīnā wɔ̍ bōōnde̍i̍ he̍ī ni̍. Ndu̍yɛ̍, yōōŋgu̍ cha᷅ŋ o̍ Mɛ̄lɛ̄ka̍ lo̍ mī ŋ̄ dīmūl wa᷅ŋnda̍ ndu̍ wo̍ bɛ̍ɛ̍, ŋ̄ chi̍ī wɔ̍ ndu̍ sɔ̄lā kpo̍u̍ le̍.

¹⁰Kɛ̍, pāa̍le̍ Mɛ̄lɛ̄ka̍ sīōū ni̍ŋ na̍a̍ nyɛ̄ o̍ nyɛ̄ fe̍e̍ chɔ᷅m nde̍ŋ, o̍ pāa̍le̍ le̍ŋ chōo̍ sɔ̄ɔ̍ŋ na̍a̍ ŋ̄ chīi̍ yɔ̍ sɔ̍lā le̍ wo̍ŋ ŋ̄ chō mɛ̄ɛ̄lū ni̍.

¹¹Bōōndi̍i̍ ya̍ I̍ wa̍ chūāāmbɔ̄ pɔ̄mbɔ̄ ve̍ māā chūāāmbɔ̄ ko̍ ya̍ i̍i̍ su̍a̍ā ni̍. Bōōndi̍i̍ ke̍ŋ, o̍ nɛ̄i̍ īchūāāmbɔ̄ya̍a̍ chōo̍ ko̍, ya̍ i̍i̍ cha᷅ nyɛ̄ o̍ nyɛ̄ ni̍. Yīya᷄ŋnda̍ īchūāāmbɔ̄ya̍la̍ŋ ko̍ni̍ ya̍ i̍i̍ yi̍yāŋ ni̍. Kɛ̍, bōōndi̍i̍ ya̍ I̍ cho̍ ni᷅ŋ he̍ī wānā ba̍nā ve̍, I̍ chi̍i̍ ni᷅ŋ a̍ sɔ̄ɔ̍ŋ ŋ̄chūāāmbɔ̄ya̍ŋ.

¹²Mɛ̄ɛ̍ wāŋndo̍ ō wā nu̍a̍nɔ᷄ŋndo̍ nu̍a̍ā o̍ tōfa᷅ŋndo̍ ni̍ŋ ō chi᷅ la̍pi̍ le̍, mbo̍ wa̍ chɔ̄ŋnɔ᷄ŋndo̍ yi̍fīdīī yɛ̍, le̍nde̍ na̍a̍ ŋ̄ chō wɔ̄ nyɛ̄ o̍ nyɛ̄ chɔ̄ɔ̍ te̍le̍ŋndo̍ ho̍ō ni̍. Kɛ̍, pāa̍le̍ cho̍ hūnɔ̄ɔ̄ fūūlūū mī nyɛ̄ o̍ nyɛ̄ ō hu᷄ŋ wa᷅ ō chɔ̄ɔ̄māā nyɛ̄ kɛ̄ndɛ̄ wa̍la̍ŋ nāa̍ na̍a̍ chūā. Sɔ̄ɔ̍ŋ ŋ̄ ti᷄ŋ ko̍ni̍ ya̍ I̍ si̍nā pɛ̍ŋgo̍o̍ ho̍ō ni̍. Kɛ̍, o̍ pāa̍le̍ le̍ŋ chōo̍ I̍ cho̍ hūnɔ̄ɔ̄ nyɛ̄ o̍ nyɛ̄ fe̍e̍ si̍nā kpo̍u̍, mɛ̄ɛ̍ Mɛ̄lɛ̄ka̍ sīnā nu̍a̍ā kpo̍u̍ a̍ ya̍ o̍kɔ̄ɔ̄ yɛ̍.

¹³Sɔ̄ɔ̍ŋ sa̍lā yāa̍ wo̍ŋ mu᷅ŋ, mu̍ŋ cho̍ wā le̍ fɛ̍ɛ̍ŋ a̍ fɛ̍ɛ̍ŋ ni̍. Mu̍ŋ cho̍ ni̍, lāāla᷄ŋndo̍, a̍ hɔ̄lte̍ŋ wāa̍ o̍ nɛ̄ī, a̍ kāālāa̍. Ndu̍yɛ̍, sɔ̄ɔ̍ŋ ŋga̍a̍ wo̍ŋ mu᷅ŋ, kāālāa̍ hi̍o̍ū kpo̍u̍.