Read Southern Kisi Kɔ̄li̍ŋtīāŋ Tāso̍o̍ 14 Bible Online

Kɔ̄li̍ŋtīāŋ Tāso̍o̍ 14 - Southern Kisi bible

Kɔ̄li̍ŋtīāŋ Tāso̍o̍ 14

¹Le̍la̍ŋ, wāŋnda̍ kāālāa̍ ī wa̍ su̍ɛ̍i̍ tāse̍i̍ ī nya̍ lāndu̍ŋ kɔ̍l le̍ ndi̍ ve̍. Ndu̍yɛ̍, yēēmɛ̍i̍ ī wa̍ nya̍ kpe̍e̍kpe̍i̍ le̍ nyɛ̄m Nyi̍na̍ Kāsi̍ Mɛ̄lɛ̄ka̍a̍ ō kē wa̍nāā lāāla᷄ŋnda̍ wo̍ŋ, tāāma̍ yōōŋgu̍ Mɛ̄lɛ̄ka̍a̍ wāŋnda̍ dīmūllo̍.

²Wāna̍ su̍a̍ā o̍ sɔ̄ɔ̍ŋ ma̍ŋgālāŋ chēle̍ŋ ndo̍ŋ ni᷄ŋ ndo̍, ō cho̍ o̍ ŋ̄wāŋndā chīe̍e̍ lo̍ le̍ o̍ wa᷅ sūɛ̍i̍ le̍. Nāa̍ Mɛ̄lɛ̄ka̍ chūā ko̍ni̍ o̍ wa᷅ su̍ɛ̍i̍ ni̍, kāni̍ fo̍ndōle̍, wānā o̍ wānā si̍nā nyɛ᷅ o̍ wa᷅ di̍mīo̍o̍ wo̍ pɛ̄ŋgu̍ le̍. Sɔ̄ɔ̍ŋ cho̍ ŋ̄ vīāŋna᷄ŋ ndo̍ŋ mu̍ŋ o̍ wa᷅ di̍mīo̍o̍ ni̍. Nyi̍na̍ Mɛ̄lɛ̄ka̍a̍ ndu̍ ke᷅ ndu̍ kpāāyāa̍ le̍ mu̍ŋ dīmīo̍o̍ ni̍.

³Kɛ̍, wāna̍ di̍mūl ho̍ō wāŋnda̍ yōōŋgu̍ Mɛ̄lɛ̄ka̍a̍ wo̍ ndu̍ ndu̍, nāa̍ wāŋnda̍ chūā o̍ wa᷅ sūɛ̍i̍ ni̍. Ndu̍yɛ̍, dīōmndā o̍ su̍a̍ā la̍ŋ lā lūēī ku̍ndā wānāā lāāla᷄ŋnda̍ kpāāyāa̍ le̍ hīōūwɔ̄ɔ̍ lāchī a̍ lāāla᷄ŋndo̍. Lā tōsā mā sɔ̄la̍ kɔ̄ltā sīmūlāāla̍ŋ, ndu̍yɛ̍ vɛ̍lɛ̄, mī lā dɛ̄ɛ̄ni̍a̍a̍ nda̍ kɔ̄lta̍ŋ.

⁴Wāna̍ su̍a̍ā ho̍ō o̍ sɔ̄ɔ̍ŋ ma̍ŋgālāŋ chēle̍ŋ ndo̍ŋ ni᷄ŋ ndo̍ ndu̍ ndu̍, ndu̍ pi̍la̍ ko̍ni̍ wa᷅ ma̍la᷄ŋndo̍ ni̍. Kɛ̍, wāna̍ di̍mūl ho̍ō wāŋnda̍ yōōŋgu̍ Mɛ̄lɛ̄ka̍a̍ wo̍ ndu̍ ndu̍, ku̍ndā wānāā lāāla᷄ŋnda̍ fa̍ū o̍ ma̍lā mbō hīōū lāchī ni̍.

⁵I̍ yēēma̍ māā nya̍ kpo̍u̍ lā sōo̍ ko̍ o̍ sɔ̄ɔ̍ŋ ma̍ŋgālāŋ chēle̍ŋ ndo̍ŋ ni᷄ŋ. Kɛ̍ ndu̍yɛ̍, nyɛ̄ ya̍ I̍ hɛ̍na̍ŋ mī lā hīōū kɔ̄l lāndɔ᷄ŋ o̍ ndu̍ wo̍, ndu̍ cho̍ wāŋnda̍ yōōŋgu̍ Mɛ̄lɛ̄ka̍a̍ dīmūllo̍ ni̍. Wāna̍ di̍mūl ho̍ō wāŋnda̍ yōōŋgu̍ Mɛ̄lɛ̄ka̍a̍ wo̍ ndu̍ hi̍a̍ū ku̍ndā wānāā lāāla᷄ŋnda̍ mālā a̍ wāna̍ su̍a̍ā o̍ sɔ̄ɔ̍ŋ ma̍ŋgālāŋ chēle̍ŋ ndo̍ŋ ni᷄ŋ ndo̍, mɛ̄ɛ̍ ni᷅ŋ dɔ̍ɔ̍ mī wānā wa̍ o̍ nɔ̍lā mbō hīvi̍ dīōmndā lāŋ wāŋnda̍ o̍ lānī, mī ku̍ndā wānāā lāāla᷄ŋnda̍ ō sɔ̄la̍ mālāa̍ o̍ la̍ŋ ni̍ŋ ndo̍.

⁶Chāāŋāā nīa̍a̍, tē ō wa̍ pɛ̍ mī hi᷅ŋ nāa̍ nya̍ chūā, mī I̍ sa̍a̍ sūɛ̍i̍ o̍ sūɛ̍i̍ ma̍ŋgālɛ̄ī chēle̍ŋ ni᷄ŋ, dīōmndā lāŋ lā nɔ̄lā pa̍ mī lā māla̍ nya̍? Lā ma̍lā nya̍ kpo̍so̍ŋ te̍. Sɔ̄ɔ̍ŋ Mɛ̄lɛ̄ka̍ chɔ̄m ya̍ wo̍ŋ nya̍ dīmūllo̍, a̍ sɔ̄ɔ̍ŋ dɛ̍nɛ̍ si̍na᷄ŋ nya̍ chɔ̄mndo̍ a̍ Mɛ̄lɛ̄ka̍ o̍kɔ̄ɔ̄, a̍ nya̍ yōōŋgu̍ Mɛ̄lɛ̄ka̍a̍ chɔ̄mndo̍, a̍ nya̍ sūɛ̍i̍ Mɛ̄lɛ̄kɛ̍i̍ pɛ̄ɛ̄kōo̍, mu̍ŋ ma̍lā nya̍ ni̍.

⁷Ā yɔ᷄ŋ bɛ̍ɛ̍ āā nyɛ̄m chāāŋ yɔ̄ŋa᷄ŋ mɛ̄ɛ̍ sɛ̄ŋnde̍ŋ a̍ tōwāa̍ ŋ̄ chō nu̍a̍ā yɛ̍, mɛ̄ɛ̍ mī wāŋndo̍ hɔ̄ŋ mu̍ŋ kɛ̄lɛ̄ŋgāā mbō lɔ̄ɔ̄ mu̍ŋ mɛ̄ɛ̍ chōnde̍i̍ ī chō yɛ̍, mālāŋ wānā si̍nā cho̍ndi̍i̍ ka̍lɛ̄i̍.

⁸Ndu̍yɛ̍, wāna̍ hu̍āŋ pu̍tɛ̍nɛ̍i̍ so̍vɛ̄i̍ya̍ wo̍ bɛ̍ɛ̍ tē ō cho̍ mbō hɔ̄ŋ ndu̍ mā sīna̍ māā hɔ̄ŋɔ̄ɔ̍ cho̍ le̍ mā bɛ̄ɛ̄ndi̍a̍ŋ le̍ chɔ̄ūwo̍ wo̍ le̍, so̍vɛ̄i̍ya̍ ā bɛ̍ɛ̍ndīāŋ le̍ chɔ̄ūwo̍ le̍.

⁹Ndu̍ yɔ̄nūŋ māā īsɔ̄ɔ̍ ni̍. Tē ō wa̍ pɛ̍ mī lā sōō o̍ sūɛ̍i̍ ma̍ŋgālɛ̄ī chēle̍ŋ ni᷄ŋ ī wānā si̍nā le̍ ve̍, wānā bɛ̍ɛ̍ si̍nā nyɛ᷅ nya̍ wā dīmīo̍o̍ wo̍ pɛ̄ŋgu̍ le̍. Mɛ̄ɛ̍ o̍ he̍ī ni᷄ŋ, dīōmndā nyāla̍ŋ ko̍ni̍ nya̍ wā la̍ŋ tɛ̄ɛ̄mbūūwo̍ ni̍.

¹⁰Mɛ̄ɛ̍ sɔ̄ɔ̍ŋ ma̍ŋgālāŋ wāŋnda̍ dīmī o̍ chi̍e̍ēŋndo̍ ni᷄ŋ ndo̍ŋ ŋ̄ chō nu̍a̍ā yɛ̍ bɛ̍ɛ̍, mi̍ chē bɛ̍ɛ̍ mi̍ ŋ̄ wā ta̍u̍ ta̍u̍, kɛ̍ ndu̍yɛ̍, mɛ̄ɛ̍ ŋ̍ cho̍ kpo̍u̍ ī pīlɛ̍ bɛ̍ɛ̍ cho̍ mī ŋ̄wāŋ ā kɛ̄ɛ̍ ndi̍ tūēīyɔ̄ɔ̄ le̍.

¹¹Kɛ̍, tē wa̍ pɛ̍ mī wāŋndo̍ ō dīmi̍ sūɛ̍i̍ ma̍ŋgālɛ̄ī ya̍ si̍nā pɛ̍ŋgu̍ le̍ ve̍, mɛ̄ɛ̍ wānā ko̍ŋ ō wā ma̍wa̍ā ya̍ o̍ hɔ̄l māā wānā che᷅le̍ŋ. Ya̍ bɛ̍ɛ̍ wānā che᷅le̍ŋ ndo̍ ko̍ni̍ ya̍ wa᷅ ndu̍ o̍ hɔ̄l ni̍.

¹²Le̍nde̍ ko̍ni̍ i̍ cho̍ a̍ nya̍ ni̍. Mɛ̄ɛ̍ nya̍ nɔ̄ nu̍a̍ā yēēmɛ̍i̍ ta̍u̍ le̍ nyɛ̄m Nyi̍na̍ Kāsi̍ Mɛ̄lɛ̄ka̍a̍ ō kē wa̍nāā lāāla᷄ŋnda̍ wo̍ŋ sɔ̄lāa̍ yɛ̍, lā kīndi̍ kpo᷅ke̍, le̍ mī lā tōsa̍ wa̍llo̍ a̍ nyɔ̄ɔ̍ŋ ŋ̍ ma̍lā le̍ ku̍ndā wānāā lāāla᷄ŋnda̍ hīvīo̍o̍ lāchī wo̍ŋ, mbo̍ hīāū ŋ̄ tɔ᷄ŋ kpo̍u̍.

¹³Le̍ he̍ī, wāna̍ su̍a̍ā ho̍ō o̍ sūɛ̍i̍ ma̍ŋgālɛ̄ī chēle̍ŋ nde̍ ni᷄ŋ ndo̍ ō pīɛ̍i̍ ni̍ko̍ Mɛ̍lɛ̄ka̍ le̍ mbō nɔ̄la̍ dīōmndā lāŋ hīvīo̍o̍ wāŋnda̍ o̍ lānī.

¹⁴Kāni̍ fo̍ndōle̍, tē ō wa̍ pɛ̍ mī I̍ wa̍ Mɛ̄lɛ̄ka̍ pīɛ̄īyo̍ o̍ sūɛ̍i̍ ma̍ŋgālɛ̄ī chēle̍ŋnde̍ ni᷄ŋ, bāā mi̍ nyi̍nā nūu̍ ō wa̍ pīɛ̄īle̍ŋ kpe̍e̍kpe̍i̍, kɛ̍ ndu̍yɛ̍, I̍ si̍nā nyɛ᷅ ya̍ I̍ wa᷅ di̍mīo̍o̍ wo̍ pɛ̄ŋgu̍ le̍.

¹⁵Le̍ he̍ī, nyɛ̄ ya̍ I̍ cho̍ tōsā wo̍ ndu̍ cho̍ ho̍ō ni̍. Tē I̍ wa̍ Mɛ̄lɛ̄ka̍ pīɛ̄īyo̍ pɛ̍, Nyi̍nā nūu̍ ō wā pi̍ɛ̍īle̍ŋ, kɛ̍ ndu̍yɛ̍, mī pi̍ɛ̍i̍ vɛ̄lɛ̄ o̍ sūɛ̍i̍ ya̍ I̍ si̍nā pɛ̍ŋgu̍ ve̍ ni᷄ŋ. Chōnde̍i̍ bɛ̍ɛ̍, tē I̍ wa̍ sōlīo̍o̍ pɛ̍, nyi̍nā nūu̍ ō wā cho̍nde̍i̍, kɛ̍ ndu̍yɛ̍ mī I̍ cho̍ndu̍ vɛ̄lɛ̄ o̍ sūɛ̍i̍ ya̍ I̍ si̍nā pɛ̍ŋgu̍ ve̍ ni᷄ŋ.

¹⁶Kāni̍ fo̍ndōle̍, tē ō wa̍ yɛ̄ mā wa̍ Mɛ̄lɛ̄ka̍ līsāa̍, kɛ̍ ndu̍yɛ̍, nyi̍nā nūmndo̍ ko̍ni̍ wa᷅ ndu̍ līsāa̍ ni̍, kɛ̍ a̍ li̍sā ndu̍ o̍ sūɛ̍i̍ ŋ̄ sīnā pɛ̍ŋgu̍ ve̍ ni᷄ŋ te̍. Tē ī yɔ̄nu̍ŋ le̍nde̍ pɛ̍, līsā ŋ̄ wā ko̍ŋ Mɛ̍lɛ̄ka̍ wo̍, wānāa̍ wa᷅ nya̍ tɛ̄ɛ̄ŋ ā si̍nā nyɛ᷅ ŋ̄ chō dīmīo̍o̍ wo̍ pɛ̄ŋgu̍ le̍ wa̍, nda̍ nda̍ di̍mī nu̍a̍ā āā, “Āmi̍i̍nā le̍.”

¹⁷Ō wa̍ bɛ̍ɛ̍ mā wa̍ Mɛ̄lɛ̄ka̍ līsāa̍ o̍ pīɛ̄īle̍ŋ ni᷄ŋ nyɛ̄ kɛ̄ndɛ̄ kpe̍e̍kpe̍i̍ le̍nde̍, wānā ko̍ŋ ndu̍ sɔ̍lā ma̍lā le̍ni᷄ŋ te̍.

¹⁸Ya̍ Pɔ̍ɔ̄, I̍ me̍l Mɛ̄lɛ̄ka̍ ba̍li̍ka̍. Kāni̍ fo̍ndōle̍, I̍ su̍a̍ā o̍ sɔ̄ɔ̍ŋ ma̍ŋgālāŋ chēle̍ŋ ni᷄ŋ I̍ hi̍o̍ū nya̍ kpo̍u̍.

¹⁹Kɛ̍ ndu̍yɛ̍ o̍ ko̍ŋ ni̍ŋ fa̍ū, tē I̍ wa̍ o̍ bɔ̄ŋa᷅ŋ wānāā lāāla᷄ŋnda̍ ni᷄ŋ pɛ̍, I̍ su̍a̍ā ma̍su̍a̍ā dīōmnda̍ŋ lā bīŋgī, kɛ̍ ndu̍yɛ̍ mī wāŋnda̍ ā sīna̍ nyɛ̄ ya̍ I̍ wa᷅ di̍mīo̍o̍ wo̍ pɛ̄ŋgu̍, o̍ ko̍ŋ mī I̍ nɔ̍lā mī pɛ̍ɛ̍ku̍ nda̍ sūɛ̍i̍ Mɛ̄lɛ̄kɛ̍i̍. Ko̍ŋ ya̍ hi̍o̍ū hɛ̄na᷄ŋ a̍ sūɛ̍i̍ ta̍u̍ o̍ sūɛ̍i̍ ma̍ŋgālɛ̄ī chēle̍ŋ nde̍ ni᷄ŋ.

²⁰Chāāŋāā nīāā wa̍nāā lāāla᷄ŋnda̍ o̍ Chi̍i̍sū ni̍ŋ, lā nɔ᷅ yīya᷄ŋnda̍ŋ māā lāchūāāmbɔ̄ le̍. Yīya᷄ŋnda̍ nya̍la̍ŋ lā wa̍ māā lāka̍a̍so̍ŋ. Kɛ̍ ndu̍yɛ̍ vɛ̍lɛ̄, kɔ̄lta̍ŋ lā wa̍ nya̍ ni᷄ŋ wa̍la̍ŋ mɛ̄ɛ̍ kɔ̄ltā chūāāmbūa̍a̍ lā chō yɛ̍.

²¹Ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Ya̍ Ma̍sānɔ̄ɔ̍ Mɛ̍lɛ̄ka̍, I̍ cho̍ tōsā mī wānāa̍ su̍a̍ā sɔ̍ɔ̍ŋ ma̍ŋgālāŋ chēle̍ŋ ndo̍ŋ nda̍ ā sōō nāa̍ wānāā nīa̍a̍ chūā. Wānāā lēkāa̍wa̍ o̍ sōndō ya̍ I̍ du̍a̍ū ni̍ŋ di̍ōmnda̍ŋ ni̍ mā dīmu̍l nda̍. Kɛ̍ o̍ ko̍ŋ ni̍ŋ kpo̍u̍, ā ye᷅ŋ ni̍ŋ ya̍ lānī le̍.”

²²Le̍la̍ŋ mī di̍mu̍l nya̍, sūɛ̍i̍ o̍ sɔ̄ɔ̍ŋ ma̍ŋgālāŋ chēle̍ŋ ni᷄ŋ ŋ̄ cho̍ māchūāā le̍ wāa̍ māā tāāmāsi̍ le̍ wānāa̍ cho̍ wa̍nāā lāāla᷄ŋ o̍ Chi̍i̍sū ni̍ŋ te̍ wa̍. Ō cho̍ le̍ wānāā lāāla᷄ŋnda̍ le̍. Le̍nde̍ ko̍ni̍, wāŋnda̍ yōōŋgu̍ Mɛ̄lɛ̄ka̍a̍ dīmūllo̍ ō chō māchūāā le̍ wāa̍ māā tāāmāsi̍ le̍ wānāā lāāla᷄ŋnda̍ o̍ Chi̍i̍sū ni̍ŋ. Ō cho̍ le̍ wānāa̍ cho̍ wa̍nāā lāāla᷄ŋ te̍ wa̍ le̍.

²³Le̍la̍ŋ, tē ō wa̍ yɛ̄ mī ku̍ndā wānāā lāāla᷄ŋnda̍ kpo̍u̍ ā chūūŋgi̍āŋ, kɛ̍ mī nda̍ kpo̍u̍ a̍ sa̍a̍ sūɛ̍i̍ o̍ sɔ̄ɔ̍ŋ ma̍ŋgālāŋ chēle̍ŋ ni᷄ŋ, ndu̍yɛ̍, mī wāna̍ si̍nā a̍ ke̍ŋ o̍kɔ̄ɔ̄ le̍ wo̍, kɛ̄lɛ̄ŋgāā wāna̍ cho̍ wa̍nā la̍a̍la᷄ŋ te̍ wo̍ mbō wa̍ o̍ bɔ̄ŋa᷅ŋ kōŋ ni᷄ŋ, nu̍a̍ā ko̍ni̍ o̍ di̍mī ni̍ āā, “Sēēmāa̍ wāŋnda̍ ha̍ā chō ni̍.”

²⁴Kɛ̍, tē nda̍ kpo̍u̍ a̍ wa̍ yōōŋgu̍ Mɛ̄lɛ̄ka̍a̍ dīmīo̍o̍ pɛ̍, o̍ ko̍ŋ mī wāna̍ cho̍ wa̍nā la̍a̍la᷄ŋ tē wo̍, kɛ̄lɛ̄ŋgāā wāna̍ si̍nā su̍ɛ̍i̍ wa̍ā le̍nde̍ le̍ wo̍ mbō wa̍ o̍ bɔ̄ŋa᷅ŋ kōŋ ni᷄ŋ pɛ̍, ō chō yōōŋgū kōŋ tūēīyɔ̄ɔ̄. O̍ ko̍ŋ, ō nɔ̄lā mbō sīna̍ yɔ̄ŋ ndɔ̄ wɔ̍ɔ̍ŋndo̍ pɛ̄ŋgu̍. Ndu̍yɛ̍ nyɛ̄ o̍ tu̍ɛ̍ī ko̍ŋ ndo̍ tōsā mī kɔ̄l ndɔ̍ ndu̍ pi̍la̍a̍ kɔ̄ɔ̄sa̍ a̍ ndu̍.

²⁵Ndu̍yɛ̍, tē ī yɔ̄nu̍ŋ le̍nde̍ pɛ̍, ō nɔ̄lā nyɛ̄ o̍ nyɛ̄ wɔ̄ɔ̍ŋ o̍ to̍sa̍ mbo̍ wā ō vīāŋāā o̍ kɔ̄l ndɔ̄ɔ̍ ni᷄ŋ, mbō chɔ̄ɔ̄mu̍u̍ ndu̍ pa̍ku̍ wa᷅ŋnda̍ o̍ hɔ̄l. O̍ ko̍ŋ kɔ̍ɔ̍lī, mbō tūndū bōlle̍ŋ mbō līsa̍ Mɛ̄lɛ̄ka̍. Mɛ̄ɛ̍ o̍ he̍ī ni᷄ŋ wānā wa̍ā le̍nde̍ nɔ̍lā mbō dīmi̍ āā, “Tōnya̍ kpe̍e̍kpe̍i̍, Mɛ̄lɛ̄ka̍ chō nya̍ tɛ̄ɛ̄ŋ.”

²⁶Chāāŋāā nīāā wa̍nāā lāāla᷄ŋnda̍, nyɛ̄ ya̍ I̍ cho̍ dīmīo̍o̍ wo̍ ndu̍ cho̍ ni̍ māā tē lā chūūŋgi̍āŋ le̍ bɔ̄ŋa᷅ŋ Mɛ̄lɛ̄ka̍a̍ pɛ̍, mɛ̄ɛ̍ nya̍ tōsā yɛ̍ cho̍ ho̍ō ni̍. Tē wāŋndo̍ ō pīlɛ̍ yɔ̄ŋgu̍ chōnde̍i̍ ni̍, ō pīlɔ̍ɔ̄ wa̍ le̍ wāŋnda̍ sūɛ̍i̍ Mɛ̄lɛ̄kɛ̍i̍ pɛ̄ɛ̄kōo̍. Ndu̍yɛ̍, wāna̍ Mɛ̄lɛ̄ka̍ chɔ᷄m īsɔ̄ɔ̍ pɛ̍, ndu̍ di̍mu̍l wāŋnda̍. Wāna̍ su̍a̍ā o̍ sūɛ̍i̍ ma̍ŋgālɛ̄ī chēle̍ŋ nde̍ ni᷄ŋ ndo̍, ndu̍ so̍ō. Wāna̍ tu̍ɛ̍ī nyɛ᷅ o̍ di̍mi̍ o̍ sūɛ̍i̍ ma̍ŋgālɛ̄ī kēŋ ni᷄ŋ ndo̍, ndu̍ hi̍vi̍ wāŋnda̍ o̍ lānī. Lā tōsa̍ he̍ī le̍ mī ku̍ndā wānāā lāāla᷄ŋnda̍ ō sɔ̄la̍ mālāa̍, mbō hīōū lāchī.

²⁷Tē ō wa̍ pɛ̍ mī ŋ̄wāŋ ā wa̍ nya̍ tɛ̄ɛ̄ŋ mā nɔ̄ kpāāyāa̍ le̍ sūɛ̍i̍ o̍ sɔ̄ɔ̍ŋ ma̍ŋgālāŋ chēle̍ŋ ndo̍ŋ ni᷄ŋ pɛ̍, mɛ̄ɛ̍ ā sōo̍ a̍ pi̍lɛ̍ŋ pi̍lɛ̍ŋ. Kɛ̍ ā hi̍a̍ū ā ŋīɔ̍ɔ̍ŋ kɛ̄lɛ̄ŋgāā ā yāa̍ o̍ bɔ̄ŋa᷅ŋ o̍ bɔ̄ŋa᷅ŋ ni᷄ŋ te̍. Ndu̍yɛ̍, tē ā sōō pɛ̍, mɛ̄ɛ̍ wāna̍ nɔ̍lā le̍ nyɛ̄ wāŋnda̍ sūāā o̍ sɔ̄ɔ̍ŋ ma̍ŋgālāŋ chēle̍ŋ ni᷄ŋ ndo̍ŋ hīvīo̍o̍ wāŋnda̍ o̍ lānī wo̍, ndu̍ ndu̍ hi̍vi̍ nda̍ o̍ lānī.

²⁸Kɛ̍, tē wānā ve̍ o̍ ku̍ndā wānāā lāāla᷄ŋnda̍ tɛ̄ɛ̄ŋ o̍ nɔ̍ kpāāyāa̍ le̍ dīōmndā lāŋ hīvīo̍o̍ wāŋnda̍ o̍ lānī le̍, mɛ̄ɛ̍ wānāa̍ nɔ̍ kpāāyāa̍ le̍ sūɛ̍i̍ o̍ sɔ̄ɔ̍ŋ ma̍ŋgālāŋ chēle̍ŋ ndo̍ŋ ni᷄ŋ nda̍ ā su̍a̍ā o̍ sɔ̄ɔ̍ŋ mu̍ŋ ni᷄ŋ te̍. Ā wa̍ īsɔ̄ɔ̍ le̍ni̍ŋ pɛ̍ mɛ̄ɛ̍ ā sōo̍ o̍ kɔ̄l ni᷄ŋ nāa̍ nda̍ pi̍la̍ chūā a̍ Mɛ̄lɛ̄ka̍.

²⁹Ndu̍yɛ̍ o̍ ko̍ŋ kɔ̍ɔ̍lī, tē wānāā ŋīɔ̍ɔ̍ŋ kɛ̄lɛ̄ŋgāā ā yāa̍ a̍ sɔ̍lā yōōŋgu̍ Mɛ̄lɛ̄ka̍a̍ le̍ wāŋnda̍ dīmūllo̍ ni̍, ha̍ā nda̍ nda̍ wa̍ le̍ nūa̍a̍ o̍ dīōmndā lāŋ ni᷄ŋ, tē dīōmnda̍ chɛ̍ŋ o̍ Mɛ̄lɛ̄ka̍ lo̍ le̍kɛ̍ndɛ̍ī ni̍.

³⁰Ndu̍yɛ̍, tē ō wa̍ pɛ̍ mī Mɛ̄lɛ̄ka̍ chɔ̄ɔ̄mu̍u̍ īsɔ̄ɔ̍ nāa̍ wānā pi᷅lɛ̍ chūā nya̍ tɛ̄ɛ̄ŋ a̍ bōōndi̍i̍ wāŋndo̍ wā sūɛ̍i̍ ye̍ pɛ̍, mɛ̄ɛ̍ wāna̍ tāse̍ wa᷅ ko̍ŋ su̍ɛ̍i̍ yo̍ ndu̍ me̍i̍ ni̍ko̍.

³¹Ō chō lētūu̍ le̍ mī nya̍ kpo̍u̍ mī lā wa̍ wāŋnda̍ yōōŋgu̍ Mɛ̄lɛ̄ka̍a̍ dīmūllo̍. Kɛ̍ ndu̍yɛ̍, ā pīlɛ̍ŋ pi̍lɛ̍ŋ nya̍ dīmī ni̍. O̍ he̍ī ni᷄ŋ, wāŋnda̍ nɔ̄lā mā sɔ̄la̍ pɛ̄ɛ̄kōo̍, ndu̍yɛ̍, mā sɔ̄la̍ kɔ̄ltā nyɔ̄ɔ̄lāāla̍ŋ.

³²Wānā o̍ wāna̍ di̍mūl wa᷅ŋnda̍ yōōŋgu̍ Mɛ̄lɛ̄ka̍a̍ ō chō kūēē mbō nɔ̄ kpāāyāa̍ dīōmndā o̍ nɔ̍ le̍ dīmīo̍o̍ la̍ŋ chōo̍.

³³Kāni̍ fo̍ndōle̍, Mɛ̄lɛ̄ka̍ hɛ̄na̍ŋ mī bɔ̄ŋa᷅ŋndā ndɔ̄la̍ŋ lā wa̍ la̍a̍sī la̍a̍sī le̍. Ō hɛ̄nāŋ mī nyɛ̄ o̍ nyɛ̄ yɔ̄nu̍ŋ sa̍na̍a̍ a̍ kɔ̄l nyūlū. Mɛ̄ɛ̍ sɔ̄ɔ̍ŋ chō kɔ̄la̍ŋ o̍ ku̍ndālā wānāā lāāla᷄ŋnda̍ kpo̍u̍ tɛ̍ɛ̄ŋ yɛ̍ cho̍ ni̍ māā

³⁴tē nya̍ ku̍ndā wānāā lāāla᷄ŋnda̍ lā wa̍ o̍ bɔ̄ŋa᷅ŋ Mɛ̄lɛ̄ka̍a̍ ni᷄ŋ pɛ̍, wāŋ lāāndūa̍a̍ nɔ̄ mā wa̍ ā mēīyāā. Ā nɔ̍ mā sōō le̍. Kāni̍ fo̍ndōle̍, sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ māā wāŋ lāāndūa̍a̍ nɔ̄ mā wa̍ wāŋ pīāāndūa̍a̍ o̍ bā bɛ̄ŋgu̍.

³⁵Tē ō wa̍ mī wānā la̍nɔ̍ɔ̍ nɔ̄ nyūnā pɛ̍, ō chu᷄m mā mīīŋgu̍ o̍ nda̍ lo̍ chīɛ̄īyo̍. Tē ā mīīŋgu̍ pɛ̍, ō kɔ̍ nyu̍nā pɔ̍nɔ̍ ndɔ̄. Kāni̍ fo̍ndōle̍, ō chō sūɛ̍i̍ lāsi̍ɔ̍mbu̍ le̍ mī wānā la̍nɔ̍ɔ̍ sōō o̍ bɔ̄ŋa᷅ŋ ku̍ndā wānāā lāāla᷄ŋnda̍ ni᷄ŋ.

³⁶Nya̍ wāŋnda̍ Kɔ̍līŋ, bāā lā nɔ̄ mānūāā o̍ kɔ̄l māā nya̍ hi᷅ŋ a̍ sūɛ̍i̍ Mɛ̄lɛ̄kɛ̍i̍ ni̍? Ndu̍yɛ̍, lā nɔ̄ mānūāā o̍ kɔ̄l māā nya̍ su̍e̍e̍ sɔ̍la̍ dīo̍m Mɛ̄lɛ̄ka̍a̍ ni̍?

³⁷Tē wānā o̍ wānā wa̍ nya̍ tɛ̄ɛ̄ŋ pɛ̍ mbō nɔ̄ o̍ kɔ̄l māā wāna̍ di̍mūl wa᷅ŋnda̍ yōōŋgu̍ Mɛ̄lɛ̄ka̍a̍ wo̍ o̍ cho̍ ni̍, kɛ̄lɛ̄ŋgāā mī wānā yi̍ya̍ŋ pɛ̍ māā Nyi̍na̍ Kāsi̍ Mɛ̄lɛ̄ka̍a̍ ō ke̍ ndu̍ kpāāyāa̍ le̍ sɔ̄ɔ̍ŋ tōsāa̍, mɛ̄ɛ̍ wānā ko̍ŋ ō sīna̍ ni̍ko̍ wa̍la̍ŋ māā dīōmndā ya̍ I̍ cho̍ la᷅ŋ pōōnyīa̍a̍ nāa̍ nya̍ chūā lāŋ, māā Māsānɔ̍ɔ̍ Mɛ̄lɛ̄ka̍ di̍mu̍l na̍a̍ wānāā lāāla᷄ŋnda̍ ni̍ māā ŋ̄ tōsa̍ le̍nde̍.

³⁸Wānā o̍ wāna̍ sɛ̍ɛ̍ŋgi̍a̍a̍ yɛ̄ pɛ̍ māā ō cho̍ Ma̍sānɔ̄ɔ̍ le̍ di̍mu̍l na̍a̍ le̍nde̍ le̍, mɛ̄ɛ̍ wānā ko̍ŋ nyɛ̄ o̍ nyɛ̄ o̍ di̍mu̍l nya̍ lā ya᷅ŋ ndu̍ lānī le̍.

³⁹Le̍la̍ŋ chāāŋāā nīa̍a̍, nyɛ̄ nya̍ lāndu̍ŋ kɔ̍l lo̍ ndu̍ cho̍ wāŋnda̍ yōōŋgu̍ Mɛ̄lɛ̄ka̍a̍ dīmūllo̍ ni̍. Kɛ̍ ndu̍yɛ̍, lā ku̍u̍nā vɛ̄lɛ̄ wāŋnda̍ le̍ sūɛ̍i̍ o̍ sɔ̄ɔ̍ŋ ma̍ŋgālāŋ chēle̍ŋ ndo̍ŋ ni᷄ŋ te̍.

⁴⁰Kɛ̍ o̍ ko̍ŋ ni̍ŋ fa̍ū, lā tōsa̍ nyɛ᷅ o̍ nyɛ᷅ o̍ nɛ̄ī bɛ̍nda̍ wo̍ chōo̍ nyɛ̍ kɛ̄ndɛ̄ sa̍na̍a̍.