Read Southern Kisi Kɔ̄li̍ŋtīāŋ Tāso̍o̍ 15 Bible Online

Kɔ̄li̍ŋtīāŋ Tāso̍o̍ 15 - Southern Kisi bible

Kɔ̄li̍ŋtīāŋ Tāso̍o̍ 15

¹Chāāŋāā nīāā wa̍nāā lāāla᷄ŋnda̍ o̍ Ki̍li̍tī ni̍ŋ, I̍ hɛ̍na̍ŋ nya̍ mī lā lōōnu̍ŋ Yo̍o̍ŋgū Kɛ̄ndɛ̍ Mɛ̄lɛ̄ka̍ ya̍ I̍ di̍mu̍l nya̍ wo̍. Ndu̍ yɔ̍nūŋ ni̍ māā yōōŋgū nya̍ chɛ᷄l ho̍ō mi̍ lā sīmī lāāla᷄ŋ nyāa̍ lēchōo̍ wo̍.

²Yōōŋgū kɛ̄ndɔ̄ɔ̍ ho̍ō ndu̍ cho̍ nya̍ pīŋīo̍o̍ ni̍, tē ō wa̍ pɛ̍ mī lā hīōū lāchī a̍ ndu̍ bīyɔ̄ɔ̍ nyɛ̄ kɛ̄ndɛ̄ kɛ̍ndɛ̍ī. Kɛ̍, tē lā hīu̍ la̍chi̍ le̍, mɛ̄ɛ̍ lāāla᷄ŋ nyāa̍ sīmnu᷄ŋ su̍ɛ̍i̍ fo̍ndō fu̍u̍.

³Yōōŋgū ya̍ I̍ sɔ̍la̍ wo̍, ndu̍ ya̍ I̍ di̍mu̍l nya̍ ni̍. Ndu̍yɛ̍, ndu̍ cho̍ yōōŋgū lēbōllo̍ ni̍. Yōōŋgū ko᷄ŋ cho̍ ni̍ māā Ki̍li̍tī sɔ̍la̍ pīɔ̍mndo̍ mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍, le̍ hāli̍ kpe̍ŋ mī Mɛ̄lɛ̄ka̍ ma᷄l na̍a̍ le̍ yɔ̄ŋndā nāāla̍ wɔ̍ɔ̍ŋnda̍ŋ.

⁴Mɛ̄ɛ̍ nda̍ chɔ̍ ndu̍, pālɛ̍i̍ hīōūwɔ̄ɔ̍ ī yāa̍ mi̍ Mɛ̄lɛ̄ka̍ mīŋgī ndu̍ yōōmū, mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍.

⁵O̍ ko̍ŋ kɔ̍ɔ̍lī, mbo̍ chɔ̄mnu᷄ŋ Pītɛ̍. Mbo̍ chɔ̄mnu᷄ŋ vɛ̍lɛ̄ bu̍ɛ̍i̍yāā ŋ̄ wāŋ tɔ̍ a̍ wānāā ŋīɔ̍ɔ̍ŋnda̍.

⁶O̍ ko̍ŋ kɔ̍ɔ̍lī, mbo̍ chɔ̄mnu᷄ŋ wa̍nāā lāāla᷄ŋnda̍ ku̍ndā, nda̍ a̍a̍ hi̍o̍ū kɛ̄mɔ̄ɔ̍ lē ŋūɛ̍ɛ̍nu̍. Wānāā kāŋ ā ti᷄ŋ ā vī ni᷅ŋ, kɛ̍, ā ka̍ ka̍ a̍ cho̍ wɔ̄ bɛ̍ɛ̍ yo̍o̍mū mɛ̄ɛ̍ na̍a̍ ŋ̄ sūāā nu̍a̍ā yɛ̍.

⁷Mbo̍ chɔ̄mnu᷄ŋ vɛ̍lɛ̄ Chēmi̍si̍. O̍ ko̍ŋ kɔ̍ɔ̍lī, mbo̍ chɔ̄mnu᷄ŋ wa̍nāā o̍ ve᷅m hɔ̄ltē ndɔ̄ wa̍ kpo̍u̍.

⁸O̍ mɛ̄ɛ̄lu̍la̍ŋ kpɔ̍ŋ mbo̍ chɔ̄mnu᷄ŋ ya̍ Pɔ̍ɔ̄. Kɛ̍ ndu̍yɛ̍, ya̍ ya̍ vīōlɔ᷄ŋ nūu̍ o̍ yu̍ŋgu̍ Mɛ̄lɛ̄ka̍a̍ chōo̍ ō wa̍ sūɛ̍i̍ kɔ̄ndɔ̄fi̍li̍.

⁹Ndu̍yɛ̍, wānāā Chi̍i̍sū ve᷅m māā hɔ̄ltē ndɔ̄ wa̍ ki̍nɛ̍i̍ ya̍ hi̍o̍ū dɔ̄ɔ̄na᷄ŋ kpo̍u̍. I̍ nɔ̍ bɛ̍ɛ̍ mī I̍ wa̍ ō vēēlāā āā, wāna̍ Chi̍i̍sū ve᷅m māā hɔ̄ltē ndɔ̄ kpo̍so̍ŋ te̍. Kāni̍ fu̍u̍le̍, o̍ tāse̍la̍ ndɔ̄ɔ̍ I̍ wa̍ wānāā lāāla᷄ŋa̍a̍ Mɛ̄lɛ̄ka̍a̍ nyɛ̄ pālāa̍ tūsīo̍o̍ chōo̍ ta̍u̍.

¹⁰Kɛ̍ ndu̍yɛ̍, kɛ̄ndɛ̄i̍ Mɛ̄lɛ̄kɛ̍i̍ ndi̍ to̍sa̍ ni̍ mi̍ wa᷅ ni᷅ŋ hāū nu̍a̍ā. Ndu̍yɛ̍, kɛ̄ndɛ̄i̍ Mɛ̄lɛ̄ka̍ tōsa̍l la̍ ke̍ŋ nde̍ ī tēmbu̍ le̍. Mi̍ dɛ̍nɛ̍ kɛ̍ndɛ̄ fūlā lēni᷄ŋ. Kāni̍ fo̍ndōle̍, mi̍ I̍ to̍sā wa̍llo̍ le̍ māsānɔ̄ɔ̍ mbo̍ hīāū wānāā o̍ ve᷅m māā hɔ̄ltē ndɔ̄ wa̍ ā tūa̍a̍. Kɛ̍ ndu̍yɛ̍, ō cho̍ kpa̍āya̍ ni̍ ya̍ pi̍la̍ le̍ to̍sa̍ wa̍li̍ ka̍lāa̍ le̍. Kɛ̄ndɛ̄i̍ Mɛ̄lɛ̄kɛ̍i̍ ndi̍ lu̍e̍i̍ ya̍ kpāāyāa̍ le̍ ndu̍ tōsāa̍ ni̍.

¹¹Le̍la̍ŋ, ō wa̍ ya̍ di̍mu̍l nya̍ yōōŋgu̍ Mɛ̄lɛ̄ka̍a̍ ni̍, kɛ̄lɛ̄ŋgāā ō wa̍ wa̍nāā Chi̍i̍sū ve᷅m hɔ̄ltē ndɔ̄ wa̍ ā pīli̍a̍a̍ ni̍, na̍a̍ fa̍ū yōōŋgū pīlɔ̍ɔ̄ ho̍ō ko̍ni̍ na̍a̍ ŋ̄ chō nya̍ dīmūllo̍ ni̍. Ndu̍yɛ̍, yōōŋgōo̍ ho̍ō ndu̍ nya̍ lāāla̍ŋ ni̍.

¹²Yōōŋgu̍ Mɛ̄lɛ̄ka̍ na̍a̍ ŋ̄ chō wāŋnda̍ dīmūllo̍ wo̍ ndu̍ cho̍ ni̍ māā, Ki̍li̍tī mi̍i̍ŋgu̍ yōōmū. Kɛ̍ vɛ̄ɛ̍nɛ̍ nya̍ pūmnda̍ lōōkū yɛ̍ dīmi̍ māā wānāa̍ wu᷅ wa̍ ā mi̍i̍ŋgū lɛ̍ yōōmū le̍?

¹³Tē ō wa̍ yɛ̄ pɛ̍ le̍nde̍ māā wānāa̍ wu᷅ wa̍ ā mi̍i̍ŋgū lɛ̍ yōōmū le̍, mɛ̄ɛ̍ Ki̍li̍tī pi̍la̍ bɛ̍ɛ̍ ō mīīŋgu̍ yo̍o̍mū le̍ wa᷅.

¹⁴Ndu̍yɛ̍, tē ī wa̍ yɛ̄ dɔ̍ɔ̍ pɛ̍ māā Ki̍li̍tī mi̍i̍ŋgu̍ yo̍o̍mū le̍, mɛ̄ɛ̍ yōōŋgu̍ Mɛ̄lɛ̄ka̍ na̍a̍ ŋ̄ chō wāŋnda̍ dīmūllo̍ wo̍ ni̍, a̍ tīīnda᷄ŋ nya̍ nɔ̄ o̍ Ki̍li̍tī ni̍ŋ ndo̍, mɛ̄ɛ̍ nyɛ̄ fo̍ndōo̍ fu̍u̍ o̍ wa᷅ ni̍ wa᷅.

¹⁵Ndu̍yɛ̍ vɛ̍lɛ̄, tē ō wa̍ yɛ̄ le̍nde̍ pɛ̍, mɛ̄ɛ̍ chōōla̍ŋ kpo̍so̍ŋ ko̍ni̍ na̍a̍ ŋ̄ dīmi̍ a̍ Mɛ̄lɛ̄ka̍ o̍kɔ̄ɔ̄ ni̍ wa᷅, kāni̍ fo̍ndōlē, ŋ̄ dīmi̍ māā Mɛ̄lɛ̄ka̍ ō mīŋgi̍ Ki̍li̍ti̍ yōōmū. Ndu̍yɛ̍, māā lāchōōwā. Tē ō wa̍ yɛ̄ pɛ̍ māā wānāa̍ wu᷅ wa̍ ā mi̍i̍ŋgū lɛ̍ yo̍o̍mū le̍, mɛ̄ɛ̍ Ki̍li̍tī bɛ̍ɛ̍ Mɛ̄lɛ̄ka̍ mīŋgi̍ ndu̍ yōōmū le̍ wa᷅.

¹⁶Tē ā mi̍i̍ŋgū lɛ̍ yo̍o̍mū le̍ mɛ̄ɛ̍ Ki̍li̍tī bɛ̍ɛ̍ ō mīīŋgu̍ yo̍o̍mū le̍.

¹⁷Tē ī yɔ̄nu̍ŋ yɛ̍ pɛ̍ māā Ki̍li̍tī mi̍i̍ŋgu̍ yo̍o̍mū le̍, mɛ̄ɛ̍ tīīnda᷄ŋ nya̍ nɔ̄ o̍ ndu̍ ni̍ŋ ndo̍, mɛ̄ɛ̍ tɔ̄nɔ̄ bɛ̍ɛ̍ lā sɔ̍lā ni̍ŋ le̍ni̍ŋ te̍ wa᷅, ndu̍yɛ̍, yɔ̄ŋndā wɔ̄ɔ̍ŋndā nya̍ tōsa̍ la̍ŋ mɛ̄ɛ̍ Mɛ̄lɛ̄ka̍ me᷄l lɔ̍ nya̍ le̍ la̍ŋ te̍.

¹⁸Wānāa̍ nda̍ a̍a̍ la̍a̍la̍ŋ a̍ Ki̍li̍tī, kɛ̍ ndu̍yɛ̍ ma̍ wū ni᷅ŋ nda̍ bɛ̍ɛ̍ mɛ̄ɛ̍ ā chō ni᷅ŋ o̍ nyɛ̄ nɛ̄īyāa̍ ni᷅ŋ wa᷅.

¹⁹Ndu̍yɛ̍, tē ō wa̍ pɛ̍ māā tīīnda᷄ŋ o̍ tīīnda᷄ŋ na̍a̍ ŋ̄ dɔ̄ū o̍ Ki̍li̍tī ni̍ŋ, māā le̍ chi̍e̍ēŋ na̍ŋ ko̍ni̍, māā nyɛ̄ o̍ nyɛ̄ chēle̍ŋ ō cho̍ lɛ̍ lēkɔ̍ɔ̍lī le̍, mɛ̄ɛ̍ na̍a̍ mɔ̍nɛ̍i̍ nɛ̄i̍ ī hīāū ni̍ŋ wa᷅ŋnda̍ bīyɔ̄ɔ̄ a̍ wānā o̍ wānā o̍ chi̍e̍ēŋndo̍ chōo̍.

²⁰Kɛ̍ ndu̍yɛ̍, ī chō tōnya̍ kpe̍e̍kpe̍i̍ māā mi̍ Mɛ̄lɛ̄ka̍ mīŋgi̍ Ki̍li̍ti̍ yōōmū. Ko̍ŋ kpe̍e̍kpe̍i̍ chɔ̍m ni̍ māā wānāa̍ vi᷅ ni᷅ŋ nda̍ bɛ̍ɛ̍, māā Mɛ̄lɛ̄ka̍ chō nda̍ mīŋgī yōōmū.

²¹Wānā pi᷅lɛ̍ kpe̍ to̍sa̍ ni̍ mi̍ pīɔ̍mndo̍ ō hūŋ le̍ ŋ̄wāŋndā chīe̍e̍ kpo̍u̍ o̍ chi̍e̍ēŋndo̍ ni᷄ŋ. Le̍nde̍ ko̍ni̍, wāŋndo̍ ō pīlɛ̍ kpe̍ to̍sa̍ vɛ̄lɛ̄ a̍ sa̍bū ni̍, mi̍ Mɛ̄lɛ̄ka̍ wā hūnɔ̄ɔ̄ wānāa̍ vi᷅ wa̍ mīŋgī yōōmū.

²²Pīɔ̍mndo̍ hīŋ le̍ ŋ̄wāŋndā chīe̍e̍ kpo̍u̍, kāni̍ fu̍u̍le̍, le̍ mɛ̄ɛ̍ nda̍ wa̍ dīōm pīlɛ̍ nda̍ A̍dām wa̍ā yɛ̍. Le̍nde̍ ko̍ni̍ Mɛ̄lɛ̄ka̍ chō hūnɔ̄ɔ̄ wāŋnda̍ kpo̍u̍ mi̍ŋgī yōōmū le̍ mɛ̄ɛ̍ nda̍ chō dīōm pīlɛ̍ nda̍ Ki̍li̍tī wa̍ā yɛ̍ ni̍.

²³Kɛ̍ ndu̍yɛ̍, mu᷅ŋ kpo̍u̍ a̍ mīīŋgōo̍ yōōmū o̍kɔ̄ɔ̄ ŋ̄ nɔ̄ le̍ yɔ̄nɔ᷄ŋndo̍ ō nɛ̄ī kpɛ̍ kpɛ̍ mɛ̄ɛ̍ ŋ̄ nɔ̍ le̍ yɔ̄nɔ᷄ŋndo̍ yɛ̍. Ki̍li̍tī fɛ̍ɛ̍ŋ mi̍i̍ŋgu̍ yōōmū. O̍ ko̍ŋ kɔ̍ɔ̍lī, lɔ̍ɔ̍ o̍ cho̍ vɛ̄lɛ̄ hūnɔ̄ɔ̄ wo̍, bōōndi̍i̍ ke̍ŋ wānāa̍ la̍a̍la̍ŋ a̍ ndu̍ wa̍, nda̍ bɛ̍ɛ̍ le̍nde̍ Mɛ̄lɛ̄ka̍ mīŋgī ni̍ŋ nda̍ yōōmū ni̍.

²⁴Tē ko̍ŋ hi̍o̍ū ni᷅ŋ pɛ̍, chi̍e̍ēŋndo̍ ndu̍ chu̍ū. O̍ ko̍ŋ kɔ̍ɔ̍lī, Nyi̍nāa̍ kpo̍u̍ a̍ nɔ̍ kpāāyāla̍ŋ a̍ māsāle̍ŋ nda̍, Ki̍li̍tī cho̍ nda̍ pīɔ̄lɔ̄ɔ̄ o̍ lē māsā, mbō pūu̍ nda̍ kpāāyāla̍ la̍ŋ o̍ bā. O̍ ko̍ŋ kɔ̍ɔ̍lī, tē ke̍ŋ ī hi̍o̍ū pɛ̍, Ki̍li̍tī mu̍li̍ŋ ō chu̍a̍ māsāle̍ ndɔ̄le̍ŋ ō ke̍ Mɛ̄lɛ̄ka̍ Fi̍nyā ndɔ̍.

²⁵Kɛ̍ ndu̍yɛ̍, ō chō lō o̍ māsāle̍ŋ chōo̍ ha̍a̍a̍ mī Mɛ̄lɛ̄ka̍ tōsa̍ mī ndu̍ Chi̍i̍sū mbō kūūmbu̍ŋ ya̍a̍mɔ̍ɔ̍wa̍a̍ ndūa̍a̍ kpo̍u̍ cho̍o̍ kpu̍lu̍ bɛ̍ndū.

²⁶Ya̍a̍mɔ̍ɔ̍nɔ̍ Mɛ̄lɛ̄ka̍ mɛ̄ɛ̄lū ni̍ŋ tɛ̍ɛ̍mbūū kpɔ̍ŋ ndo̍, ndu̍ cho̍ pīɔ̍mndo̍ ni̍.

²⁷Kāni̍ fo̍ndōle̍, dīo̍m Mɛ̄lɛ̄ka̍a̍ dīmi̍ āā, “Mɛ̄lɛ̄ka̍ tōsa̍ mi̍ nyɛ̄ o̍ nyɛ̄ wā ndu̍ o̍ bā bɛ̄ŋgu̍.” Kɛ̍ ndu̍yɛ̍, dīōmnda̍ so̍o̍nu᷄ŋ la᷅ŋ māā nyɛ̄ o̍ nyɛ̄ chō wā Ki̍li̍tī o̍ bā bɛ̄ŋgu̍ la̍ŋ, Mɛ̄lɛ̄ka̍ ndu̍ ndu̍ cho̍ le̍cho̍o̍ le̍. Kāni̍ fo̍ndōle̍, ndu̍ cho̍ tōsāa̍ ni̍ mī nyɛ̄ o̍ nyɛ̄ wā Ki̍li̍ti̍ o̍ bā bɛ̄ŋgu̍ ni̍.

²⁸Ndu̍yɛ̍, tē Mɛ̄lɛ̄ka̍ tōsa̍ pɛ̍ mī nyɛ̄ o̍ nyɛ̄ wa̍ ndu̍ o̍ bā bɛ̄ŋgu̍, ndu̍ Ki̍li̍tī pi̍la̍ o̍ cho̍ po̍ Mɛ̄lɛ̄ka̍a̍ wo̍ ō mu̍li̍ŋ ni̍ko̍ vɛ̍lɛ̄, ō yɔ̍ŋgu̍ŋ Mɛ̄lɛ̄ka̍ o̍ bā bɛ̄ŋgu̍ o̍ to̍sa̍ mi̍ nyɛ̄ o̍ nyɛ̄ wā ndu̍ o̍ bā bɛ̄ŋgu̍ wo̍. Bōōndi̍i̍ ke̍ŋ ndu̍ Mɛ̍lɛ̄ka̍ ō wa̍ ni᷅ŋ māsā nyɛ̄ o̍ nyɛ̄ fe̍e̍ cho̍o̍.

²⁹I̍ nyu̍nā wɔ̍ nya̍, ŋ̄ chā tē wāŋndo̍ ō sɔ̄la̍ yīŋɔ̄ɔ̍ le̍ mbō vī pɛ̍, ā yi᷅ŋ wāna̍ cho̍ yōōmū wo̍ sɔ̍ŋgɔ̍ ndɔ̄ɔ̍. Tɔ̄nɔ̍ yɛ̄ɛ̍nɛ̍ wa᷅ yɛ̍ ni᷅ŋ o̍ yīŋɔ̄ɔ̄ kōŋ ni᷄ŋ? Kāni̍ fo̍ndōle̍, lā dīmi̍ māā wānāa̍ wu᷅ wa̍ ā mi̍i̍ŋgū yo̍o̍mū le̍. Ɔ̍ɔ̄ le̍ sa̍bū nda̍ nɔ̄ ni᷅ŋ wāŋndo̍ yīŋɔ̄ɔ̍ sɔ̍ŋgɔ̍ wāna̍ vi᷅ ni᷅ŋ ndo̍ wo̍?

³⁰Tē wānāa̍ wu᷅ wa̍ ā mi̍i̍ŋgū lɛ̍ yōōmū le̍ pɛ̍, mɛ̄ɛ̍ ɔ̍ɔ̄ le̍ sa̍bū na̍a̍ ŋ̄ chɛ̄l ni᷅ŋ mi̍ yōōmūlā nāāla̍ŋ lā wa̍ o̍ kpūndɔ̍ɔ̍ ni᷄ŋ te̍le̍ŋ o̍ te̍le̍ŋ le̍ wa̍llo̍ ho̍ō wo̍?

³¹Mī di̍mu̍l nya̍ chāāŋāā nīa̍a̍, lēpāla̍ o̍ lēpāla̍ pīɔ̍mndo̍ chō na̍a̍ bīndū bīndūūwo̍ le̍ sa̍bū pīlɔ̍ɔ̍ ho̍ō. Ndu̍yɛ̍, I̍ cho̍ a̍ kɔ̄l kɛ̄ndɛ̄ a̍ nya̍ le̍ chō na̍a̍ ŋ̄ chō o̍ dīōm pīlɔ̍ɔ̍ ni᷄ŋ a̍ Māsānɔ̍ nāa̍ Chi̍i̍sū Ki̍li̍tī na̍a̍ nya̍ā wo̍. Le̍ sa̍bū kōŋ ya̍ I̍ cho̍ nya̍ dīōmnda̍ŋ nda᷅ŋ dīmūllo̍ ni̍.

³²Tē wānāa̍ wu᷅ wa̍ ā mi̍i̍ŋgū lɛ̍ yōōmū le̍ pɛ̍, mɛ̄ɛ̍ ɔ̍ɔ̄ tɔ̄nɔ̍ ya̍ I̍ sɔ̍lā le̍ sīsi̍la̍ŋ mī I̍ sɔ̍ŋga̍ a̍ vīsīāā yōndūa̍a̍ mɛ̄ɛ̍ wāŋnda̍ ā pūm Ɛ̍fi̍sīā a̍ cho̍ nu̍a̍ā yɛ̍? Kāni̍ fo̍ndōle̍, tē wānāa̍ wu᷅ wa̍ ā mi̍i̍ŋgū lɛ̍ yōōmū le̍ pɛ̍, mɛ̄ɛ̍ na̍a̍ ŋ̍ to̍sā mɛ̄ɛ̍ wānāā pūm ā dīmi̍ yɛ̍ āā, “Ŋ̄ dīōnu᷅ŋ di̍o̍la̍ nāā, mī ŋ̄ kōlnu᷅ŋ kōlɔ̄ɔ̄ nāā, kāni̍ fo̍ndōle̍, tē ŋ̄ vī yɛ̄ sīɔ̄dīi̍?”

³³Le̍la̍ŋ, lā chɛ᷅l pe̍sīŋ mī wānā o̍ wānā fa̍ŋa̍ nya̍ o̍ nɛ̄i̍ tōnya̍a̍ chōo̍ le̍. Mɛ̄ɛ̍ nda̍ dīmī tālo̍o̍ yɛ̍ āā, “Tē yōū di᷅ ma̍ālo̍ŋ te̍ wo̍ ō kēla̍ yōūwāa̍ di̍ā ma̍ālo̍ŋ nda̍ kɔ̄ɔ̄lī pɛ̍, ndu̍ bɛ̍ɛ̍ ō chō mu̍ŋ di̍o̍.”

³⁴Lā ma᷄l di̍ɔ̍mūŋ nya̍ sāa̍ mu᷅ŋ ndo̍ŋ. Lā ma᷄l yɔ᷅ŋndā wɔ̄ɔ̍ŋnda̍ŋ. Nya̍ pūmnda̍ tɛ̍ɛ̄ŋ cho̍ nya̍ ō bɛ̄ndāā nya̍ Mɛ̄lɛ̄ka̍ wa̍ā le̍. Dīōmndā ya̍ I̍ cho̍ la᷅ŋ sūɛ̍i̍ nāa̍ nya̍ chūā la̍ŋ lā nɔ̄ mī lā bīī nya̍ lāsi̍ɔ̍mbu̍.

³⁵Mī wānā pu̍m nyūna̍ dɔ̍ɔ̍ āā, “Vɛ̄ɛ̍nɛ̍ wānāa̍ vi᷅ wa̍ ā mīīŋgū yɛ̍ yōōmū? Dīāllūŋ māā vɛ̄ɛ̄ nda̍ nɔ̄ yɛ̍ ni̍ŋ?”

³⁶Wāna̍ nyu̍na̍ nyūnā wāā le̍nde̍ pɛ̍ mɛ̄ɛ̍ nyūnā īdīɔ̄mndo̍ wa᷅ ko̍ŋ ni̍. Tāāmāsi̍o̍o̍ ko̍ cho̍ a̍ ku̍lu̍ tɔ̄lɔ̄ɔ̍ o̍kɔ̄ɔ̄ ni̍. Tē wānā tɔ᷅l ku̍lu̍ tɔ̄lɔ̄ɔ̍ pɛ̍, lɔ̍ɔ̍ pa̍ mbō vīl mɛ̄ɛ̍ mbō vī fɛ̍ɛ̍ŋ.

³⁷Tɔ̄lɔ̄ɔ̄la̍ nɔ̍ ku̍lu̍la̍ŋ nda̍ŋ ki̍nɛ̍i̍ tē wānā wa̍ la̍ŋ tɔ̄lɔ̄ɔ̍ pɛ̍, ō cho̍ tɔ̍lɔ̄ɔ̍ pi̍la̍ fɛ̍ɛ̍ŋ te̍ wānā tu̍āl te̍. Ku̍lu̍la̍ŋ fɛ̍ɛ̍ŋ wānā tu̍āl.

³⁸Ndu̍yɛ̍, mɛ̄ɛ̍ Mɛ̄lɛ̄ka̍ hɛ̄nāŋ yɛ̍ le̍nde̍ o̍ to̍sā ni̍ mī ku̍lu̍ o̍ ku̍lu̍ o̍ yɔ̍ŋgu̍ tɔ̄lɔ̄ɔ̍ o̍ ndɔ̍ yɛ̍. Mbo̍ tōsā mī ku̍lu̍ o̍ ku̍lu̍ yɔ̍ŋgū tɔ̄lɔ̄ɔ̍ o̍ ndɔ̍ yɛ̍.

³⁹Nyɛ̄ o̍ nyɛ̍ cho̍ nyɛ̄ yōōmāā dīāllūŋ nda᷄ŋ ŋ̄ cho̍ nyɛ᷅ pīlɛ̍ le̍. Dīāllūŋ wāŋndā chīe̍e̍ya̍ mu̍ŋ cho̍ yɛ̍. Vīsīa̍a̍ nda̍ dīāllo̍ŋ ŋ̍ nda̍ŋ ŋ̄ chō yɛ̍. Yōūwa̍ ŋ̍ nda̍ŋ chō yɛ̍. Sūūwa̍ ŋ̍ nda̍ŋ chō yɛ̍.

⁴⁰Nyɛ᷄m cho̍ o̍ ha̍la̍a̍ ni᷄ŋ ndo̍ŋ ŋ̄ nɔ̄ dīāllo̍ŋ ŋ̍ nda̍, mi̍ nyɛ᷄m cho̍ o̍ chi̍e̍ēŋndo̍ chōo̍ wo̍ŋ mu̍ŋ nɔ᷅ dīāllo̍ŋ ŋ̍ nda̍. Nyɛ᷄m cho̍ o̍ ha̍lāa̍ ni᷄ŋ ndo̍ŋ, ŋ̄ nɔ̄ dīōndɔ̄ɔ̍ o̍ nda̍, mi̍ nyɛ᷄m cho̍ o̍ chi̍e̍ēŋndo̍ chōo̍ wo̍ŋ, ŋ̄ nɔ̄ dīōndɔ̄ɔ̍ o̍ nda̍ yɛ̍.

⁴¹Pāa̍le̍ŋ lē nɔ̄ dīōndɔ̄ɔ̍ o̍ ndɔ̍. Pāŋge̍i̍ nɔ̄ dīōndɔ̄ɔ̍ ndɔ̍ yɛ̍, lōo̍ŋ nɔ̄ dīōndɔ̄ɔ̍ o̍ ndɔ̍ yɛ̍. Ndu̍yɛ̍ īlōō o̍ īlōō ī nɔ̄ dīōndɔ̄ɔ̍ o̍ ndɔ̍ yɛ̍.

⁴²Mɛ̄ɛ̍ le̍nde̍ i̍ yɔ̍nūŋ ni̍ŋ ni̍, tē wānāa̍ vi᷅ wa̍ ā hu᷄ŋ mi̍i̍ŋgū yo̍o̍mū pɛ̍. Dīāllūŋ na̍a̍ ŋ̄ nɔ̄ pɛ̄ŋgo̍o̍ ho̍ō wo̍ŋ, tē ŋ̄ vī pɛ̍ mā chɔ̍ mu̍ŋ, ŋ̄ sɛ̄. Kɛ̍, tē ŋ̄ hu᷄ŋ mi̍i̍ŋgū yōōmū pɛ̍, dīāllūŋ na̍a̍ ŋ̄ nɔ̄ ni̍ŋ ndo̍ŋ mu̍ŋ vi᷅ lɛ̍ le̍.

⁴³Bōōndi̍i̍ wāŋndo̍ wū mā chɔ̍ ndu̍ ve̍, dīāllūŋ ndɔ᷄ŋ ŋ̄ wɔ̄ɔ̍ŋ ŋ̍ wa᷅ ni̍, ndu̍yɛ̍, ŋ̄ nɔ᷅ kpa̍āya̍ le̍. Kɛ̍ ndu̍yɛ̍, tē ō mīīŋgu̍ yōōmū pɛ̍, dīāllūŋ kɛ̄ndɛ̄ kɛ̍ndɔ᷄ŋ, ŋ̍ nɔ᷅ kpa̍a̍yāa̍ wo̍ŋ mu̍ŋ o̍ nɔ᷅ ni̍.

⁴⁴Bōōndi̍i̍ nda̍ chɔ̄ na̍a̍ ve̍, dīāllūŋ ŋ̄wāna̍ chi̍e̍e̍ya̍ŋ dīāllūŋ nāa̍ŋ ŋ̄ wā ni̍. Kɛ̍ tē ŋ̄ hu᷄ŋ mi̍i̍ŋgū yōōmū pɛ̍, dīāllūŋ Nyi̍na̍ Kāsi̍ Mɛ̄lɛ̄ka̍a̍ yɔ̄ŋgū wo̍ŋ, mu̍ŋ na̍a̍ ŋ̄ nɔ̄ ni᷅ŋ ni̍. Ha̍a̍a̍ mi̍ ŋ̄ nɔ̄ dīāllūŋ ŋ̄wāna̍ chi̍e̍e̍ya̍ŋ, ŋ̄ nɔ̄ mī ŋ̄ nɔ̄ vɛ̄lɛ̄ dīāllūŋ Nyi̍na̍ Kāsi̍ Mɛ̄lɛ̄ka̍a̍ yɔ̄ŋgū wo̍ŋ.

⁴⁵Kāni̍ fo̍ndōle̍, yāu̍ Mɛ̄lɛ̄ka̍a̍ dīmi̍ āā, “Mi̍ wānā pɔ̍nɔ̍ tāso̍o̍, A̍dām, mbo̍ sīmnu᷄ŋ wa᷅na̍ chi̍e̍e̍ yo̍o̍māa̍.” Kɛ̍, A̍dām mɛ̍ɛ̍lu̍ ni᷅ŋ ho̍ō hūnɔ̄ɔ̄ wo̍, ndu̍ si̍mnu᷄ŋ Nyi̍nā Kāsi̍ yɔ̍ŋgū yo̍o̍mōo̍ wo̍ ni̍.

⁴⁶Ō cho̍ di̍a̍llūŋ Nyi̍na̍ Kāsi̍ Mɛ̄lɛ̄ka̍a̍ yɔ̄ŋgū wo̍ŋ fɛ̍lɛ̍ŋ te̍ wāna̍ chi̍o̍o̍ sɔ̄lā le̍. Dīāllūŋ ŋ̄wāna̍ chi̍e̍e̍ya̍ŋ fɛ̍lɛ̍ŋ o̍ sɔ̍lā, o̍ ko̍ŋ kɔ̍ɔ̍lī, mbō hu᷄ŋ sɔ̍lā ni᷅ŋ dīāllūŋ Nyi̍na̍ Mɛ̄lɛ̄ka̍a̍ yɔ̄ŋgū wo̍ŋ.

⁴⁷A̍dām tāso̍o̍ ndu̍ a̍ pūūlōo̍ lɛ̄ŋ Mɛ̄lɛ̄ka̍ tōōsi̍a̍a̍ ndu̍ ni̍. Kɛ̍, A̍dām mɛ̍ɛ̍lu̍ hūnɔ̄ɔ̄ wo̍ ndu̍ ndu̍, o̍ fo̍nda᷄ŋ Mɛ̄lɛ̄ka̍a̍ o̍ chɛ̍ŋ ni̍.

⁴⁸Mɛ̄ɛ̍ wāna̍ Mɛ̄lɛ̄ka̍ tōōsi̍a̍a̍ a̍ pūūlōo̍ wo̍ ō wa̍ yɛ̍, le̍nde̍ na̍a̍ ŋ̄ chō chi̍e̍ēŋ na̍ŋ ni̍. Kɛ̍ ndu̍yɛ̍, mɛ̄ɛ̍ wāna̍ chɛ̍ŋ ɛ̄chɛ̍nɛ̄ wo̍ chō yɛ̍, le̍nde̍ na̍a̍ ŋ̄ chō lākɔ̄ wā ɛ̄chɛ̍nɛ̄ ni̍.

⁴⁹Mɛ̄ɛ̍ na̍a̍ ŋ̄ chu̍a̍ dīāllu᷄ŋ wāna̍ Mɛ̄lɛ̄ka̍ tōōsi̍a̍a̍ a̍ pūūlōo̍ wo̍ŋ yɛ̍, le̍nde̍ ko̍ni̍ na̍a̍ ŋ̄ chō dīāllu᷄ŋ wāna̍ chɛ̍ŋ Ɛ̄chɛ̍nɛ̄ wo̍ŋ chūā ni̍.

⁵⁰Chāāŋāā nīa̍a̍, nyɛ̄ ya̍ I̍ hɛ̍na̍ŋ mī di̍mu̍l nya̍ wo̍ ndu̍ cho̍ ni̍ māā dīāllūŋ yɔ̄ŋa᷄ŋ mu᷅ŋ ŋ̄ lu̍e̍ī o̍ māsāle̍ Mɛ̄lɛ̄ka̍le̍ŋ ni᷄ŋ te̍. Ndu̍yɛ̍, nyɛ̄ o̍ nyɛ̍ nɔ̍ mbō vī, mbō tāmbu̍, ō nɔ̍lā mbō sīmnu᷄ŋ nyɛ̍ wa᷅ yo̍o̍mū le̍ fɛ̍ɛ̍ŋ a̍ fɛ̍ɛ̍ŋ te̍.

⁵¹Lā ya᷄ŋ ni᷅la̍ŋ I̍ chɔ᷅m nya̍ sūɛ̍i̍ pu̍m i̍ cho̍ ī vīāŋna᷄ŋ nde̍. Na̍a̍ pūmnda̍ ŋ̄ lō ni̍ŋ yo̍o̍mū mī chi̍e̍ēŋndo̍ fūūlu̍u̍ o̍ mɛ̄ɛ̄lu̍la̍ŋ. A̍ bōōndi̍i̍ ke̍ŋ, bu̍lu̍ nɔ̍ le̍ sūɛ̍i̍ o̍ mɛ̄ɛ̄lu̍la̍ŋ ndo̍ chō īsɔ̄ɔ̍. Tē bu̍lo̍o̍ sōō pɛ̍, wānāa̍ cho̍ wā yōōmū wa̍ ni̍ a̍ wānāa̍ vi᷅ ni᷅ŋ nda̍, na̍a̍ kpo̍u̍ ŋ̄ chō māŋgāla᷄ŋ. O̍ lēpīlɛ̍ ni᷄ŋ kpe̍ i̍ yɔ̍nūŋ ni̍ŋ ni̍, mɛ̄ɛ̍ wāŋndo̍ bīāŋ nu̍a̍ā yɛ̍. Tē bu̍lu̍ ko̍ŋ sōō pɛ̍, wānāa̍ vi᷅ wa̍ ā mīīŋgu̍ yōōmū, ā vi᷅ lɛ̍ le̍. Ndu̍yɛ̍, mī na̍a̍ ŋ̍ wa᷅ ni̍ŋ yo̍o̍mū bōōndi̍i̍ ke̍ŋ nda̍, ŋ̄ māŋga̍la̍ŋ.

⁵²

⁵³Kāni̍ fo̍ndōle̍, mɛ̄ɛ̍ mī dīāllu᷄ŋ nɔ̍ mu᷅ŋ mī ŋ̄ vī, mī ŋ̄ sɛ̄ wo̍ŋ ŋ̄ māŋgāla᷄ŋ mī ŋ̄ sīmnu᷄ŋ di̍a̍llu᷄ŋ vi᷅ lɛ̍ mī ŋ̄ sɛ̄ le̍ wo̍ŋ.

⁵⁴Le̍ he̍ī, tē dīāllu᷄ŋ wu᷅ mī ŋ̄ sɛ̄ wo̍ŋ ŋ̄ sīmnu᷄ŋ di̍a̍llu᷄ŋ vi᷅ mī ŋ̄ sɛ̄ le̍ wo̍ŋ pɛ̍, mɛ̄ɛ̍ nyɛ̄ Yāu̍ Mɛ̄lɛ̄ka̍a̍ dīmi̍ wo̍ ō yɔ̄nu̍ŋ. Mbo̍ dīmī āā, “Ā yēm pīɔ̍mndo̍ ma̍ tɛ̄ɛ̄mbūū ndu̍.”

⁵⁵“Pīɔ̍mndo̍, ā yēm nu̍m. A̍ nɔ̍lā lɛ̍ na̍a̍ nyɛ̄ o̍ nyɛ̄ yɔ̄ŋ te̍.”

⁵⁶Yɔ̄ŋ wɔ̄ɔ̍ŋndo̍ ndu̍ ke̍ pīɔ̍mndo̍ kpāāya̍ o̍ yɔ᷅ŋ wa̍nā nyɛ̍ wo̍ ni̍. Ndu̍yɛ̍, sāwāla̍ Mɛ̄lɛ̄ka̍la̍ŋ la̍ŋ la̍ ke̍ yɔ̄ŋ wɔ̄ɔ̍ŋndo̍ kpāāyāa̍ ni̍.

⁵⁷Kɛ̍ ndu̍yɛ̍, Mɛ̄lɛ̄ka̍ o̍ to̍sa̍ mi̍ ŋ̄ sɔ̄lā kpāāyāa̍ pīɔ̍mndo̍ chōo̍ wo̍, lā ŋ̄ mēlnu᷅ŋ ndu̍ ba̍li̍ka̍. He̍ī yɔ̄nu̍ŋ sa̍na̍a̍ o̍ sa̍bu̍ Ma̍sānɔ̄ nāa̍ Chi̍i̍sū Ki̍li̍tīo̍o̍ ni᷄ŋ.

⁵⁸Le̍la̍ŋ chāāŋāā nīāā wa̍nāā lāāla᷄ŋnda̍, lā hīo̍u̍ la̍chi̍ a̍ wāa̍ o̍ lāāla᷄ŋndo̍ chōo̍ nyɛ̍ kɛ̄ndɛ̄ yi̍. Ndu̍yɛ̍, lā hīo̍u̍ lāchī a̍ dīāllūŋ kāla᷄ŋ nɔ̄ɔ̍ o̍ lāāla᷄ŋ nyāa̍ ni᷄ŋ. Lā hīo̍u̍ la̍chi̍ lɔ̍ɔ̍ lɔ̍ɔ̍ a̍ wa̍llo̍ tōsāa̍ ō kālā ka̍lā, le̍ Māsānɔ̄ɔ̍ Mɛ̄lɛ̄ka̍. Nya̍ pi̍la̍ sīnā māā, nyɛ̄ o̍ nyɛ̄ wānā cho̍ tōsā o̍ wa̍li̍ Māsānɔ̄ɔ̍ Mɛ̄lɛ̄ka̍a̍ ni᷄ŋ, dɛ̍nɛ̍ kɛ̍ndɔ̄ɔ̍ fu̍lā le̍ni̍ŋ lɔ̍ɔ̍ lɔ̍ɔ̍ ni̍.