Read Southern Kisi Kɔ̄li̍ŋtīāŋ Tāso̍o̍ 16 Bible Online

Kɔ̄li̍ŋtīāŋ Tāso̍o̍ 16 - Southern Kisi bible

Kɔ̄li̍ŋtīāŋ Tāso̍o̍ 16

¹O̍ ko̍ŋ kɔ̍ɔ̍lī, he̍ī ya̍ nɔ̍ ni̍ mī di̍mu̍l nya̍ a̍ nyūnā nya̍ nyūna̍ a̍ chūūŋgīāā na̍a̍ ŋ̄ nɔ̄ le̍ yɔ̄ŋgōo̍ le̍ chāāŋāā nāā wa̍nāā lāāla᷄ŋnda̍ Chūlu̍sɛ̄lɛ̄m mālāa̍ o̍kɔ̄ɔ̄ wo̍ ni̍. Nyɛ̄ ya̍ I̍ di̍mu̍l ku̍ndā wānāā lāāla᷄ŋnda̍ Kāle̍e̍sīā wo̍, ndu̍ ko̍ni̍ ya̍ cho̍ nya̍ Kɔ̄li̍ŋtīāŋnda̍ dīmūl māā lā tōsa̍ ni̍.

²I̍ hɛ̍na̍ŋ nya̍ o̍ pāa̍le̍ o̍ pāa̍le̍ kpu̍yā chōo̍ mī wānā o̍ wānā kɛ̍si̍ nyɛ̄ sɔ̄lāa̍ pɔ̄mbɔ̄. Mɛ̄ɛ̍ kpɛ̍ wāŋndo̍ sɔ̄lā nyɛ̍ sɔ̄lāa̍ yɛ̍ le̍nde̍ kpɛ̍ o̍ nɔ̍ ni̍ mbō wa̍ kɛ̄sīo̍o̍. Wānā o̍ wānā hi̍o̍u̍ la̍chi̍ a̍ nyɛ̄ sɔ̄lāa̍ o̍ ndɔ̍ɔ̍ chūūŋgīa̍a̍ le̍nde̍. Ko̍ŋ to̍sā ni̍ tē I̍ hi᷅ŋ pɛ̍, ŋ̄ tu᷅l lɛ̍ chūūŋgīāā chēle̍ŋ te̍.

³Tē I̍ hi᷅ŋ pɛ̍, yāu̍wo̍ ko̍ni̍ ya̍ I̍ po̍o̍nyīāā ni᷅ŋ ni̍ mī ŋ̄ ke̍ wānāā nya̍ chō hɛ̄lī wa̍, a̍ nyɛ̄ sɔ̄lāā kōŋ lātūlu̍ mā kūɛ̄ a̍ ndu̍ Chūlu̍sɛ̄lɛ̄m.

⁴Kɛ̍ ndu̍yɛ̍, tē ō wa̍ pɛ̍ māā ō bɛ̄ndā mī ya̍ pi̍la̍ ku̍ɛ̄, mɛ̄ɛ̍ wānāā nya̍ chō ka̍ŋ hɛ̍lī wa̍ ā līīla̍ ya̍ ŋ̄ kūɛ̄.

⁵I̍ cho̍ hūnɔ̄ɔ̄ mī I̍ hu̍ŋ yi᷅l nya̍. Kɛ̍, I̍ cho̍ fɛ̍lɛ̍ŋ ke̍ī o̍ būŋgɛ̄ī Māsīdo̍o̍nīāā ve̍ ni᷄ŋ. Tē I̍ chɛ̍ŋ lo̍ŋ pɛ̍, I̍ hi᷅ŋ nya̍ yīlɔ̄ɔ̄.

⁶Tē I̍ hi᷅ŋ pɛ̍, ŋ̄ kɛ̍ɛ̄ ni̍ŋ vi̍o̍u̍wɔ̄ɔ̄ kpɛ̍ɛ̍ na̍a̍ nya̍ā le̍. Kɛ̄lɛ̄ŋgāā dɔ̍ɔ̍, ŋ̄ lō ni̍ŋ la̍tu̍lu̍ mī wɔ̄ɔ̄le̍ŋ lē chūū. O̍ ko̍ŋ kɔ̍ɔ̍lī, tē te̍le̍ŋ nī ku̍a̍a̍ fūūlu̍u̍ pɛ̍, lā māla̍ ya̍ a̍ nyɛ̄ pɔ̄mbɔ̄, I̍ hi̍o̍ū nāa̍ kɔ̄la̍ŋ lā bīīlū ya̍ ni̍ŋ nda̍.

⁷Hūnɔ̄ɔ̄ ya̍ I̍ cho̍ wo̍, ō cho̍ hu̍nɔ̄ɔ̄ wāā le̍ nya̍ yīlɔ̄ɔ̄ cho̍kōbi̍ nu̍a̍ā mī hi̍o̍ū le̍. I̍ nɔ̍ o̍ kɔ̄l mī ŋ̄ vīōū ti᷄ŋ na̍a̍ nya̍ā kpɛ̍ɛ̍, tē Māsānɔ̄ɔ̍ Mɛ̄lɛ̄ka̍ chɛ᷄l pɛ̍.

⁸Kɛ̍, I̍ cho̍ wɔ̄ wā Ɛ̍fi̍sīā chi̍e̍e̍ na̍nu᷄ŋ mbō lo̍ o̍ ko̍ŋ mī bɔ̄ŋa᷅ŋ Pɛ̍ŋti̍kɔ̍ɔ̍sīo̍o̍ ō fūūlu̍u̍.

⁹Kāni̍ fu̍u̍le̍, le̍ wa̍li̍ kɛ̍ndɛ̄ kɛ̍ndɔ̄ɔ̍ ho̍ō tōsāa̍, mi̍ chē bɛ̍ɛ̍ mi̍ wānāa̍ si̍mu̍l na̍a̍ wa̍ ā wā ta̍u̍ ni̍.

¹⁰Tē Ti̍mo̍tī ko̍ma̍l nya̍ pɛ̍, lā bīi̍ ndu̍ ō kɛ̄ndɛ̄ mbō sīna̍ māā ō nɔ̍ mbō wa̍ a̍ kīīsa᷄ŋ nya̍ tɛ̄ɛ̄ŋ te̍. Kāni̍ fu̍u̍le̍, wa̍li̍ ya̍ I̍ cho̍ ho̍ō tōsāa̍ le̍ Māsānɔ̄ɔ̍ Mɛ̄lɛ̄ka̍ wo̍, wa̍li̍ ko̍ŋ ko̍ni̍ o̍ cho̍ tōsāa̍ ni̍.

¹¹Lā chɛ᷅l mī wānā o̍ wānā o̍ nu̍a̍ ndu̍ o̍ nɛ̄i̍ īchūāāmbɔ̄ya̍ ni᷄ŋ te̍. Ndu̍yɛ̍, lā māla̍ ndu̍ mbō hīōū nāa̍ o̍ cho̍ la̍ŋ nda̍ a̍ kɔ̄l nyūlū le̍ mbō kōma̍l la̍. Kāni̍ fo̍ndōle̍, I̍ cho̍ lēhɔ̄l o̍ nɛ̄ī le̍ mbō mīīŋgu̍ ya̍ o̍ ībūŋ nda̍ chāāŋāā nāā wa̍nāā lāāla᷄ŋnda̍ ā pīli̍a̍ā.

¹²Kɛ̍ chāa̍ŋ nāa̍ A̍pɔ̍lɔ̄ɔ̄ ndu̍ ndu̍, mi̍ ki̍ndī mɛ̄ɛ̍ o̍ mɛ̄ɛ̍ le̍ mbō hīŋ mbō hu᷄ŋ yi᷅l nya̍ nda̍ chāāŋāā nāa̍ ā pīli̍a̍ā. Kɛ̍ ō dīmi̍ māā ō bɛ̄nda̍ mbō hīŋ nya̍ yīlɔ̄ɔ̄ pɛ̄ŋgo̍o̍ ho̍ō le̍. Bōōndi̍i̍ o̍ cho̍ fo̍ndāŋndo̍ sɔ̄lā ve̍, ō hīŋ.

¹³Lā wa᷅ ā pūɛ̄ya᷄ŋ te̍. Lā hīo̍u̍ la̍chi̍ a̍ wāa̍ o̍ lāāla᷄ŋndo̍ cho̍o̍ nyɛ̍ kɛ̄ndɛ̍ī. Ndu̍yɛ̍, kɔ̄ltā nyāla̍ŋ lā wa̍ la̍ si̍mūlāā nyɛ̄ kɛ̄ndɛ̄ yi̍. Ndu̍yɛ̍, lā wa̍ a̍ dīāllūŋ kālā o̍ lāāla᷄ŋ nyāa̍ ni᷄ŋ.

¹⁴Wa̍li̍ o̍ wa̍li̍ nya̍ chō tōsā, lā tōsa̍ ndu̍ a̍ kāālāa̍ o̍ kɔ̄l.

¹⁵O̍ ko̍ŋ kɔ̍ɔ̍lī, chāāŋāā nīa̍a̍, nya̍ pi̍la̍ lā sīnā māā Sɛ̄tīfa̍nāā ni̍ nda̍ yu̍ŋgu̍ ndɔ̄ɔ̍, māā nda̍ fɛ̍lɛ̍ŋ si̍mnu̍ŋ wa̍nāā lāāla᷄ŋnda̍ o̍ lɛ̄ŋndē Āke̍yāle̍ŋ ni᷄ŋ. Ndu̍yɛ̍, ndu̍ ni̍ nda̍ yu̍ŋgu̍ ndɔ̄ɔ̍, ma̍ yɔ̄ŋgu᷄ŋ le̍ wa̍llo̍ tōsāa̍ kpe̍e̍kpe̍i̍ le̍ wānāa̍ Mɛ̄lɛ̄ka̍a̍.

¹⁶Lā yāndi̍i̍, lā tūe̍i̍ wānāā wāā nu̍a̍ā dīōm a̍ wānā o̍ wāna̍ nda̍ chō wa̍llo̍ nda̍ nda̍ā.

¹⁷Nya̍ cho̍ ya̍ īkɛ̄i̍ le̍. Kɛ̍ I̍ na̍ŋ kɔ̄l ta̍u̍ mi̍ Sɛ̄tīfa̍nāā nda̍ Fɔ̄tūna̍tɔ̍ɔ̍sī a̍ Āka̍i̍kɔ̄ɔ̄, ma̍ hūŋ ya̍ īkɛ̄i̍. Kāni̍ fu̍u̍le̍, mālā nya̍ a̍a̍ ma̍lā ya̍ ni̍ŋ ndo̍, mālā kōŋ ko̍ni̍ nda̍ chō ya̍ ho̍ō ni̍.

¹⁸Mɛ̄ɛ̍ nda̍ tōsa̍ nya̍ fa̍ū mi̍ lā nāŋ lākɔ̄l lɛ̍, le̍nde̍ ko̍ni̍ nda̍ tōsa̍ mi̍ I̍ na᷅ŋ kɔ̄l ni̍. Lā lōōnu̍ŋ le̍ wānāā wāā nu̍a̍ā bɛ̄ɛ̄le̍ŋ kīo̍o̍.

¹⁹Ku̍ndālā wānāā lāāla᷄ŋnda̍ E̍e̍sīā na̍nu᷄ŋ a̍ yi̍l nya̍ lāpi̍. Āku̍i̍lā nda̍ Pīsi̍i̍lā a̍ ku̍ndā wānāā lāāla᷄ŋnda̍ a̍ bi̍ī bɔ᷅ŋa᷅ŋndo̍ o̍ nda̍ lo̍ chi̍ɛ̍ī ni̍ŋ nda̍, nda̍ bɛ̍ɛ̍ ā yi᷄l nya̍ ta̍u̍ o̍ dīōla̍ Māsānɔ̄ɔ̍ Mɛ̄lɛ̄ka̍la̍ŋ ni᷄ŋ.

²⁰Chāāŋāā nāā wa̍nāā lāāla᷄ŋnda̍ kpo̍u̍ ā yi᷄l nya̍ lāpi̍. Lā wa̍ yi᷅la᷅ŋndo̍ o̍ kāālāa̍ ni᷄ŋ māā wānāā lāāla᷄ŋ o̍ Chi̍i̍sū ni̍ŋ.

²¹Ya̍ Pɔ̍ɔ̄ pi̍la̍ cho̍ ni᷅ŋ yīlɔ̄ɔ̍ ho̍ō pōōnyīa̍a̍ ni̍. I̍ yi̍l nya̍ lāpi̍.

²²O̍ ko̍ŋ kɔ̍ɔ̍lī, wānā o̍ wāna̍ wa̍ pɛ̍ mbō kāāla̍ Ma̍sānɔ̄ɔ̍ Mɛ̄lɛ̄ka̍ le̍, wānā ko̍ŋ Mɛ̄lɛ̄ka̍ hāndu̍ ndu̍ nyɛ̄ pālāa̍ chōo̍ fɔ̍. Māsānɔ̄ɔ̍ Chi̍i̍sū o̍ hu̍ŋ ni̍ko̍ fɔ̍.

²³Mbɔ̄ Ma̍sānɔ̄ɔ̍ Chi̍i̍sū ō yīya̍ŋ nya̍ chōo̍ fɔ̍.

²⁴Nya̍ cho̍ ha̍ā o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī wa̍ ki̍nɛ̍i̍, I̍ yi̍l nya̍ yīlɔ̄ɔ̄ kāālāa̍ lāpi̍.