Read Southern Kisi Kɔ̄li̍ŋtīāŋ Tāso̍o̍ 3 Bible Online

Kɔ̄li̍ŋtīāŋ Tāso̍o̍ 3 - Southern Kisi bible

Kɔ̄li̍ŋtīāŋ Tāso̍o̍ 3

¹Chāa̍ŋāā nīa̍a̍, o̍ sa̍na̍a̍ īsɔ̄ɔ̍ ni᷄ŋ I̍ nɔ̍lā mī so̍ō nāa̍ nya̍ chūā, mɛ̄ɛ̍ ya̍ I̍ su̍a̍ā nāa̍ wānāā Nyi̍na̍ Kāsi̍ Mɛ̄lɛ̄ka̍a̍ chō kɔ̄ɔ̄lī le̍ wa̍ chūā yɛ̍ le̍. Mɛ̄ɛ̍ mī ya̍ i̍i̍ so̍ō nāa̍ nya̍ chūā, mɛ̄ɛ̍ ya̍ I̍ su̍a̍ā nāa̍ wānāa̍ cho̍ le̍ chi̍e̍ēŋndo̍ ho̍ō wa̍ chūā yɛ̍. Mɛ̄ɛ̍ chɛ̄lɛ̄kpi̍a̍a̍ chō yɛ̍, le̍nde̍ nya̍ chō wɔ̄ o̍ sūɛ̍i̍ Chi̍i̍sū Ki̍li̍tīe̍i̍ ni᷄ŋ ni̍.

²Mɛ̄ɛ̍ mɛ̄ɛ̄ya̍ŋ mī ya̍ i̍i̍ ke̍ nya̍. Ya̍ i̍i̍ nɔ̍lā mī I̍ ke̍ nya̍ nyɛ̄ dīāā kālā ka̍lā le̍. Kāni̍ fo̍ndōle̍, nya̍ a̍a̍ fu̍u̍lu̍u̍ wɔ̍ bo̍o̍ndi̍i̍ ke̍ŋ te̍. Ndu̍yɛ̍, pɛ̄ŋgo̍o̍ ho̍ō bɛ̍ɛ̍ lā fūūlu̍u̍ wɔ̍ bo̍o̍ndi̍i̍ nya̍ dē nyɛ̄ dīāā kālā ka̍lā le̍.

³Kāni̍ fo̍ndōle̍, mɛ̄ɛ̍ wānāa̍ cho̍ le̍ chi̍e̍ēŋndo̍ ho̍ō wa̍ ā chō yɛ̍ le̍nde̍ ko̍ni̍ nya̍ chō wɔ̄ ni̍. Lā chō wɔ̄ pāŋa̍li̍āŋnda̍ŋ o̍ nyɔ̄ɔ̍ŋ chōo̍, mi̍ lā wā sɛ̄ɛ̄ŋgi̍āŋnda̍ŋ vēllāa̍ vēllē. He̍ī chɔ᷄m māā lā chō māchūāā māā wānāa̍ cho̍ le̍ chi̍e̍ēŋndo̍ ho̍ō wa̍. Ka̍ālā nyāla̍ŋ lā chō māchūāā mɛ̄ɛ̍ ka̍ālā wānāa̍ cho̍ le̍ chi̍e̍ēŋndo̍ ho̍ō wa̍ lā chō yɛ̍.

⁴Wāŋndo̍ ho̍ō ndu̍ chɛ̍ŋ pɛ̍, ō di̍mi̍ āā, “Ya̍ ya̍ kūmbu̍ Pɔ̍ɔ̄ wo̍ ya̍ cho̍ ni̍.” Ho̍ō chɛ᷄ŋ āā, “Ya̍ kūmbu̍ A̍ A̍pɔ̍lɔ̄ɔ̄ wo̍ ya̍ cho̍ ni̍.” Tē lā wa̍ tōsāa̍ le̍nde̍ pɛ̍, mɛ̄ɛ̍ ka̍ālā nyāla̍ŋ lā chō māchūāā mɛ̄ɛ̍ ka̍ālā wānāa̍ cho̍ le̍ chi̍e̍ēŋndo̍ ho̍ō wa̍ lā chō yɛ̍.

⁵Wānāā māāvɛ̄ɛ̄ A̍pɔ̍lɔ̄ɔ̄ a̍ ya̍ Pɔ̍ɔ̄ na̍a̍ ŋ̄ cho̍ yɛ̄? Ŋ̄ chō māchūāā bu̍ɛ̍i̍yāa̍ Mɛ̄lɛ̄ka̍a̍ a̍ to̍sa̍ a̍ sa̍bū mī lā sīmnu᷄ŋ wa̍nāā lāāla᷄ŋ o̍ Chi̍i̍sū ni̍ŋ nda̍. Na̍a̍ na̍a̍ ŋi̍ɔ̍ɔ̍ŋ fa̍ū, wa̍li̍ Māsānɔ̄ɔ̍ Mɛ̄lɛ̄ka̍ pīɔ̍u̍ na̍a̍ vēllāa̍ vēllē wo̍ ndu̍ na̍a̍ ŋ̄ chō ho̍ō tōsāa̍ ni̍.

⁶Mɛ̄ɛ̍ wāŋndo̍ ō tūāl nu̍a̍ā tɔ̍lɔ̄ɔ̍ ndu̍yɛ̍ mī wāŋndo̍ ō pīlɔ̍ɔ̄ ndu̍ wa̍ mɛ̄ŋnda̍ŋ dɔ̄wɔ̄ɔ̍ o̍ tɔ̄lɔ̄ɔ̄ kōŋ yɛ̍, le̍nde̍ na̍a̍ ŋ̄ chō na̍a̍ A̍pɔ̍lɔ̄ɔ̄ ni̍. Ya̍ I̍ tɔ᷅l mi̍ ndu̍ du̍a̍ū mɛ̄ŋnda̍ŋ o̍ tɔ̄lɔ̄ɔ̄ kālāa̍. Kɛ̍, wāna̍ to̍sa̍ mi̍ tɔ̄lɔ̄ɔ̍ ō hīndū wo̍ ndu̍ cho̍ Mɛ̄lɛ̄ka̍ ni̍.

⁷Wāna̍ tɔ᷅l lo̍ nda̍ wāna̍ dɔ̍ū mɛ̄ŋnda̍ŋ ndo̍, nda̍ nda̍ cho̍ nyɛ᷅ o̍ nyɛ̄ le̍, mɛ̄ɛ̍ Mɛ̄lɛ̄ka̍. Kāni̍ fo̍ndōle̍, ndu̍ pīlɛ̍ kpe̍ to̍sa̍ ni̍ mi̍ tɔ̄lɔ̄ɔ̍ ō hīndū.

⁸Wāna̍ tɔ᷅l lo̍, nda̍ wāna̍ dɔ̍ū mɛ̄ŋnda̍ŋ ndo̍ nda̍ nda̍ ŋi̍ɔ̍ɔ̍ŋ ā hīya᷅ŋ te̍. Ndu̍yɛ̍, nda̍ nda̍ ŋi̍ɔ̍ɔ̍ŋ Mɛ̄lɛ̄ka̍ chō hūnɔ̄ɔ̄ nda̍ pāāwā, wa̍nā o̍ wānā mɛ̄ɛ̍ o̍ to̍sa̍ wa̍llo̍ yɛ̍.

⁹Wānāā wa̍lla̍ na̍a̍ ŋ̄ chō lātūlu̍ le̍ Mɛ̄lɛ̄ka̍ ni̍. Ndu̍yɛ̍, nya̍ nya̍ chō māchūāā chīɛ̍i̍ Mɛ̄lɛ̄kɛ̍i̍. Ndu̍yɛ̍ vɛ̄lɛ̄, nya̍ cho̍ chīɛ̍i̍ Mɛ̄lɛ̄ka̍a̍ ni̍.

¹⁰O̍ kɛ̄ndɛ̄i̍ Mɛ̄lɛ̄ka̍ tōsa̍l la̍ ve̍ ni᷄ŋ, mi̍ I̍ to̍sā wa̍li̍ wāna̍ cha̍ā ta̍ŋgūllo̍ wo̍ ō tōsā wo̍. Mi̍ ki̍la̍ chīīye̍ le̍ chīɛ̍i̍ Mɛ̄lɛ̄ka̍a̍ sīmīo̍o̍ lēchōo̍. Mɛ̄ɛ̍ ya̍ ya̍ I̍ ki̍la̍ chīīye̍, mi̍ wānā che᷅le̍ŋ ndu̍ wa᷅ chīɛ̄ī kālāa̍ sīmīo̍o̍ lēchōo̍. Le̍la̍ŋ, wānā o̍ wānā ma̍nda̍ŋ a̍ mɛ̄ɛ̍ ŋ̄ chō tāŋgūllo̍ o̍ chīyīī kīlɛ̄i̍ he̍ī chōo̍ yɛ̍.

¹¹Kāni̍ fu̍u̍le̍, īchīī o̍ īchīī tāŋgūlāā chēle̍ŋ ī cho̍ mī wānā ki̍la̍ le̍, mɛ̄ɛ̍ chīīyīī tāŋgūlɛ̄i̍ cho̍ ni᷅ŋ ī kīlāā ve̍. Ndi̍ cho̍ yɛ̄ ni̍ māā Chi̍i̍sū Ki̍li̍tī pi̍la̍.

¹²Wānāā pūm ā chō tāŋgūllo̍ o̍ chīīye̍ he̍ī chōo̍, a̍ nyɛ̄m ba̍ā kāla᷄ŋ, mɛ̄ɛ̍ ko̍o̍līi̍yo̍ŋ ɔ̄ɔ̄ ka̍ni̍ŋ hu̍mbo᷄ŋ ɔ̄ɔ̄ pōūtā ba̍ā kālāla̍ŋ lā chō nu̍a̍ā yɛ̍. Ā pūm yɛ̍, ā chō tāŋgūllo̍ lēchōo̍ a̍ nyɛ᷄m nɔ̍ ba̍ā le̍ wo̍ŋ, mɛ̄ɛ̍ yɔ̄mnde̍, ɔ̄ɔ̄ pūi̍yo̍, ɔ̄ɔ̄ tɛ̄ūwo̍ chō nu̍a̍ā yɛ̍.

¹³Wānā o̍ wānā wa̍li̍ su̍u̍ ŋ̄ tōsa̍ wo̍, chō hūnɔ̄ɔ̄ wā ō chɔ̄ɔ̄māā o̍ pāa̍le̍ Mɛ̄lɛ̄ka̍ kɔ̄ɔ̄sā ni̍ŋ a̍ wāŋnda̍ le̍ŋ chōo̍. Kāni̍ fo̍ndōle̍, o̍ pāa̍le̍ le̍ŋ chōo̍ Mɛ̄lɛ̄ka̍ chō hūnɔ̄ɔ̄ wa̍li̍ wānā o̍ wānā to̍sa̍ wo̍ chɔ̄ɔ̄mūū a̍ yīŋnde̍ŋ ni̍. Yīŋnde̍ŋ lē chō hūnɔ̄ɔ̄ wa̍li̍ o̍ wa̍li̍ tɔ̍ɔ̍nda᷄ŋ le̍ chɔ̄mndo̍ wa̍li̍ su̍u̍ o̍ cho̍ wo̍.

¹⁴Wānā o̍ wānā tē Mɛ̄lɛ̄ka̍ hu᷄ŋ tɔ̍ɔ̍nda᷄ŋ tāŋgūl ŋ̄ tāŋgu̍l lo̍ a̍ yīŋnde̍ŋ pɛ̍, ndu̍yɛ̍ mbō ŋu̍e̍ le̍, a̍ hu̍ŋ sɔ̍lā pāāwāa̍ Mɛ̄lɛ̄ka̍ o̍ bā.

¹⁵Kɛ̍, wāna̍ tāŋgūl nūmndo̍ ō ŋūɛ̄ pɛ̍, mɛ̄ɛ̍ wānā ko̍ŋ ā mīī kɔ̄ɔ̄lī. Nūm pi̍la̍ ko̍ni̍ chi̍ndā ni̍, mɛ̄ɛ̍ wāŋndo̍ chīndā nu̍a̍ā o̍ yīŋnde̍ŋ ni᷄ŋ yɛ̍.

¹⁶Lā si̍nā nu̍a̍ā māā nya̍ le̍ cho̍ chīɛ̍i̍ Mɛ̄lɛ̄ka̍a̍ le̍? Lā si̍nā nu̍a̍ā māā nya̍ le̍ Nyi̍na̍ Kāsi̍ Mɛ̄lɛ̄ka̍a̍ chō kɔ̄ɔ̄lī le̍?

¹⁷Wānā o̍ wāna̍ tɛ̍ɛ̍mbu̍u̍ chīɛ̍i̍ Mɛ̄lɛ̄ka̍a̍ pɛ̍, nūm bɛ̍ɛ̍ Mɛ̄lɛ̄ka̍ tɛ̄ɛ̄mbu̍u̍ nu̍m. Kāni̍ fo̍ndōle̍, chīɛ̄ī Mɛ̄lɛ̄ka̍ chu̍a̍ le̍ wāa̍ le̍ ndu̍ wo̍ nya̍ cho̍ ni̍. Ndu̍yɛ̍, nya̍ cho̍ chīɛ̄ī kōŋ ni̍.

¹⁸Wānā o̍ wānā hu̍ī nūm pi̍la̍ le̍. Wāna̍ wa̍ nya̍ tɛ̄ɛ̄ŋ pɛ̍ mbō nɔ̄ o̍ kɔ̄l māā ō nɔ̄ kɔ̄l kālo̍o̍ pɛ̍, ndu̍ yɔ̍nūŋ māā kɔ̄l kālu̍ chi̍e̍ēŋndo̍ ho̍ō ni̍, mɛ̄ɛ̍ wānā ko̍ŋ ō sīmnu̍ŋ dīɔ̄mndo̍ le̍ hāli̍ kpe̍ŋ mbō sɔ̄la̍ kɔ̄l kālu̍ kpe̍e̍kpe̍i̍yo̍.

¹⁹Kāni̍ fo̍ndōle̍, Mɛ̄lɛ̄ka̍ ndu̍ ndu̍ chu̍a̍ kɔ̄l kālu̍ chi̍e̍ēŋndo̍ ho̍ō māā dīɔ̄mīī fo̍ndō fu̍u̍. Mɛ̄ɛ̍ i̍ cho̍ o̍ Yāu̍ Mɛ̄lɛ̄ka̍a̍ ni᷄ŋ yɛ̍ āā, “Mɛ̄lɛ̄ka̍ ō tōsa̍ mi̍ wānāā kɔ̄l kālu̍a̍a̍ kɔ̄l kālu̍ nda̍ pi̍la̍a̍ ō fūla̍ nda̍ mākɔ̄ɔ̄.”

²⁰Mbo̍ dīmī vɛ̄lɛ̄ āā, “Māsānɔ̄ɔ̍ Mɛ̄lɛ̄ka̍ sīnā māā, wānāa̍ nɔ̍ kɔ̄l kālu̍ chi̍e̍ēŋndo̍ ho̍ō wa̍, nyɛ̄ fo̍ndōo̍ fu̍u̍ yīya᷄ŋnda̍ ndāla̍ŋ lā chō ni̍.”

²¹Le̍la̍ŋ, wānā o̍ wānā ki̍a̍lū yōŋgā le̍ wāa̍ kūmbū wāna̍ chi̍e̍e̍ le̍. Ō cho̍ su̍ɛ̍i̍ wa̍ā kūmbū wāna̍ chi̍e̍e̍ le̍. Kāni̍ fu̍u̍le̍, le̍ nya̍ nyɛ̄ o̍ nyɛ̄ fe̍e̍ cho̍ ni̍.

²²Ya̍ Pɔ̍ɔ̄ ni̍, A̍pɔ̍lɔ̄ɔ̄ ni̍, Pītɛ̍ ni̍, chi̍e̍ēŋndo̍ ni̍, yōōmōo̍ ni̍, pīɔ̍mndo̍ ni̍, nyɛ̍ cho̍ pɛ̄ŋgo̍o̍ ho̍ō wo̍ ni̍, a̍ nyɛ̍ cho̍ sīɔ̄dīi̍ yo̍, nya̍ nɔ̍ ni̍.

²³Nya̍ nya̍ yɛ̄, Ki̍li̍ti̍ nɔ̍ nya̍ ni̍, mi̍ Mɛ̄lɛ̄ka̍ ndu̍ nɔ᷅ Ki̍li̍tī.