Read Southern Kisi Kɔ̄li̍ŋtīāŋ Tāso̍o̍ 5 Bible Online

Kɔ̄li̍ŋtīāŋ Tāso̍o̍ 5 - Southern Kisi bible

Kɔ̄li̍ŋtīāŋ Tāso̍o̍ 5

¹Wānā di̍mu̍l la̍ kɛ̍sɛ̍ kɛ̍sɛ̍ māā, sūɛ̍i̍ nīīlū sūūndɛ̍i̍ wɔ̍ɔ̍ŋ bɛ̄ndū bɛ̍ndū ī chō yɔ̄nɔ᷄ŋndo̍ nya̍ wānāā lāāla᷄ŋnda̍ tɛ̄ɛ̄ŋ. Ī chō ī wɔ̄ɔ̍ŋ ha̍a̍a̍, ā yɔ᷄ŋ bɛ̍ɛ̍ āā wānāa̍ pi̍ɛ̍ī Mɛ̍lɛ̄ka̍ le̍ wa̍ ni̍, ā to̍sā i̍ wa̍ā le̍nde̍ le̍. I̍ tu̍e̍ī māā wānā pi᷅lɛ̍ chō nya̍ tɛ̄ɛ̄ŋ mbo̍ chūā la̍nɔ̍ɔ̍ fi̍nyā ndɔ̍ ma̍ wā nda̍ ndu̍.

²Sūɛ̍i̍ wa̍ā le̍nde̍ i̍ wa᷅ yɔ̍nɔ᷄ŋndo̍ nya̍ tɛ̄ɛ̄ŋ ni̍, mī lā kīālū yo̍ŋgāa̍ a̍ nya̍ pi̍la̍ o̍kɔ̄ɔ̍? Nya̍ a̍a̍ nɔ̍ mī nya̍ a̍a̍ wa̍ a̍ kɔ̄l tāmbɛ̍i̍ bɛ̍ndū kpe̍e̍kpe̍i̍ a̍ nyɛ̍ yɔ̍nu̍ŋ ko̍ŋ ndo̍. Ndu̍yɛ̍, wāna̍ to̍sa̍ sūɛ̍i̍ wɔ̍ɔ̍ŋīī wāā le̍nde̍i̍ yo̍ nya̍ a̍a̍ nɔ̍ mī nya̍ a̍a̍ sōli̍ ndu̍ nya̍ tɛ̄ɛ̄ŋ po̍.

³Mi̍ chē bɛ̍ɛ̍ I̍ cho̍ nya̍ tɛ̄ɛ̄ŋ mī ŋ̄ wa̍ chāna᷅ŋndo̍ hɔ̄lla̍ a̍ hɔ̄lla̍ le̍ ni̍, kɛ̍, nyi̍nā nūu̍ chō nya̍ tɛ̄ɛ̄ŋ. Ndu̍yɛ̍, ya̍ i̍i̍ wa̍ bɛ̍ɛ̍ nya̍ tɛ̄ɛ̄ŋ, yāmɛ̍i̍ ya̍ i̍i̍ ki̍lūl ni̍ŋ wa᷅na̍ to̍sa̍ sūɛ̍i̍ wɔ̍ɔ̍ŋīī bɛ̄ndūe̍i̍ he̍ī yo̍, I̍ chi̍i̍ ni᷅ŋ bɛ̍ɛ̍ ndu̍ ndi̍ kīlūl o̍ kpāāya̍ Māsānɔ̄ nāa̍ Chi̍i̍sōo̍ ni᷄ŋ.

⁴Ndu̍yɛ̍, tē lā chūūŋgi̍āŋ pɛ̍, mī nyi̍nā nūu̍ ō wa̍ nya̍ tɛ̄ɛ̄ŋ pɛ̍, ndu̍yɛ̍, o̍ ko̍ŋ kɔ̍ɔ̍lī, tē kpāāya̍ Ma̍sānɔ̄ nāa̍ Chi̍i̍sōo̍ ō wa̍ na̍a̍ chōo̍ pɛ̍,

⁵wānā ko̍ŋ lā ma᷄l ndu̍ Sēta̍nā, o̍ cho̍ māsa̍ nyi̍nāā wɔ̄ɔ̍ŋnda̍ wo̍, o̍ bā le̍ mbō tɛ̍ɛ̍mbu̍u̍ dīāllūŋ ndɔ᷄ŋ. Kɛ̍ ndu̍yɛ̍, mī nyi̍nā ndɔ̄ɔ̍ ndu̍ hu̍ŋ sɔ̍lā fɛ̍ɛ̍ŋ pi̍o̍ŋɔ̄ɔ̍ o̍ pāa̍le̍ Māsānɔ̄ɔ̍ Mɛ̄lɛ̄ka̍ chō hūnɔ̄ɔ̄ le̍ŋ chōo̍.

⁶Ō cho̍ le̍tu̍u̍ mī lā kēlū yōŋgā a̍ nya̍ pi̍la̍ o̍kɔ̄ɔ̄ le̍. Ī chō ko̍ mɛ̄ɛ̍ tālo̍o̍ dīmi̍ yɛ̍ āā, “Yi̍i̍sīi̍yo̍ ō pɔ̄mbu̍ɛ̍i̍ na̍a̍ bɛ̍ɛ̍, ā dɔ̄ū ndu̍ o̍ kōlo̍ nda̍ lūām bēe̍dīi̍yo̍ wo̍ ni᷄ŋ pɛ̍, ō wa̍ bɛ̍ɛ̍ ta̍u̍ mī yi̍i̍sīi̍ pɔ̄mbɔ̄ kōŋ tōsa̍ mbō he᷄l pɔ̍fūū bɛ̄ndū.”

⁷Yɔ̄ŋ wɔ̄ɔ̍ŋndo̍ chō māchūāā mɛ̄ɛ̍ yi̍i̍sīi̍yo̍ ō chō yɛ̍. Ndu̍yɛ̍, lā tōsa̍ mɛ̄ɛ̍ nda̍ a̍a̍ to̍sā pa̍a̍ndū bōōndi̍i̍ nda̍ a̍a̍ bi̍ī bɔ᷅ŋa᷅ŋ lōōna᷄ŋndo̍ a̍ hīōūwɔ̄ɔ̄ chōo̍ wo̍ o̍kɔ̄ɔ̄ yɛ̍. Tē ā wa̍ sāa̍ dīyɔ̄ɔ̍ le̍ bɔ̄ŋa᷅ŋndo̍ ho̍ō pɛ̍, mɛ̄ɛ̍ mā sōli̍ yi̍i̍sīi̍yo̍ fa̍ū o̍ chīɛ̄īla̍ŋ ni᷄ŋ. Nya̍ bɛ̍ɛ̍, yɔ̄ŋ wɔ̄ɔ̍ŋ nya̍ wa̍ pāāndū tōsāa̍ wo̍, lā ma᷄l ndu̍ wa̍ŋ wa̍ŋ. Ō pɔ̄mbɔ̄ bɛ̍ɛ̍ ō lo᷅ nya̍ o̍ bā le̍. Nu̍a̍ā nya̍ a̍a̍ nɔ̍ ni̍ mī lā wa̍. Kāni̍ fu̍u̍le̍, nya̍ a̍a̍ nɔ̄ mī nya̍ a̍a̍ ma̍l nyɛ̄ o̍ nyɛ̄ wɔ̄ɔ̍ŋ cho̍ o̍ ka̍ālā nyāla̍ŋ ni᷄ŋ. Kāni̍ fu̍u̍le̍, na̍a̍ bɛ̍ɛ̍ ā chīi̍ ni᷅ŋ sāa̍ cho̍ le̍ bɔ̄ŋa᷅ŋ nāā lo̍o̍na᷄ŋndo̍ a̍ hīōūwɔ̄ɔ̍ chōo̍ o̍kɔ̄ɔ̄ wo̍ sa̍lāa̍ sōlī, ndu̍ yɔ̍nūŋ ni̍ māā Ki̍li̍tī.

⁸Le̍la̍ŋ, ŋ̄ wa̍nūŋ ndɛ̄ o̍ nīīlū yɔ̄ŋ wɔ̄ɔ̍ŋ ni᷄ŋ, kɛ̄lɛ̄ŋgāā o̍ nīīlū dɛ̍nɛ̍ wɔ̍ɔ̍ŋ ni᷄ŋ te̍. Ŋ̄ nɔ̄ ni᷅ŋ mānūāā mī ŋ̄ wa̍ o̍ nīīlū dīāndāā ni᷄ŋ, a̍ nīīlū sa̍kpōo̍.

⁹Mi̍ I̍ si̍lā nya̍ o̍ yāu̍ ya̍ I̍ po̍o̍nyi̍a̍l nya̍ wo̍ ni᷄ŋ māā, lā ya̍ā nāŋa᷅ŋ nāa̍ wānāā nīīlū sūūndɛ̍i̍ya̍ chūā le̍.

¹⁰Ō cho̍ wa̍nāa̍ pi̍ɛ̍ī Mɛ̍lɛ̄ka̍ le̍ wa̍ le̍ ya̍ I̍ cho̍ dīmī le̍. Wānāa̍ pi̍ɛ̍ī Mɛ̍lɛ̄ka̍ le̍ wa̍ a̍ cho̍ o̍ nīīlū sūūndɛ̍i̍yo̍ ni᷄ŋ nda̍, kɛ̄lɛ̄ŋgāā mā lūɛ̄ī hɔ᷅lte̍ŋ o̍ nyɛ̄m pi̍la̍ŋ nda̍, a̍ vīīya̍, kɛ̄lɛ̄ŋgāā a̍ wānāa̍ so̍o̍lūū nyɛ᷅m chēle̍ŋndo̍ŋ ndā, ō cho̍ ka̍ŋ te̍ ya̍ I̍ cho̍ dīmī le̍. Tē wānā di̍mi̍ pɛ̍ māā lā ve᷅ na̍a̍ pi᷅lɛ̍ a̍ ka̍ŋ te̍, mɛ̄ɛ̍ mā fa̍ŋa̍ŋ dɔ̍ɔ̍ o̍ chi̍e̍ēŋ kālāa̍ chōo̍ ba̍ū.

¹¹Wānāā ya̍ di̍mi̍ māā lā mu̍ūli̍āŋ a̍ nda̍ le̍ wa̍ nda̍ cho̍ ha̍ā ni̍. Wānāa̍ di̍mi̍ māā nda̍ bɛ̍ɛ̍ wānāā lāāla᷄ŋnda̍ o̍ Chi̍i̍sū ni̍ŋ nda̍ chō ni̍ wa̍, kɛ̍ ndu̍yɛ̍, ma̍ wā o̍ nīīlū sūūndɛ̍i̍yo̍ ni᷄ŋ nda̍, kɛ̄lɛ̄ŋgāā mā lūɛ̄ī hɔ᷅lte̍ŋ o̍ nyɛ̄m pi̍la̍ŋ nda̍, kɛ̄lɛ̄ŋgāā mā sōōlūū nyɛ᷅m chēle̍ŋndo̍ŋ nda̍, kɛ̄lɛ̄ŋgāā mā sūāā di̍ōmndā wɔ̄ɔ̍ŋnda̍ŋ a̍ chāāŋāā ndāā wa᷅ŋndā chīe̍e̍ya̍ o̍kɔ̄ɔ̄ wa̍, kɛ̄lɛ̄ŋgāā ma̍ wā wānāā kōlāa̍ wa̍, kɛ̄lɛ̄ŋgāā mā yɔ̄ŋ vīīle̍ŋ nda̍, wānāā kāŋ ya̍ I̍ cho̍ dīmīo̍o̍ ni̍. Wānāā lāāla᷄ŋnda̍ a̍ cho̍ o̍ nīīlūlā wāā nu̍a̍ā ni᷄ŋ nda̍, lā cha᷅l bɛ̍ɛ̍ mī lā dē nyɛ̄ dīa̍a̍ nāa̍ pi᷅lɛ̍ nya̍ nda̍ le̍.

¹²Wānāa̍ cho̍ wa̍nāā lāāla᷄ŋ o̍ Chi̍i̍sū ni̍ŋ te̍ wa̍, ō cho̍ ya̍ le̍ kɔ̍ɔ̍sā a̍ ka̍ŋ te̍. Mɛ̄lɛ̄ka̍ pi̍la̍ ndu̍ cho̍ kɔ̍ɔ̍sɔ̍ a̍ nda̍ ni̍. Kɛ̍ ndu̍yɛ̍, bāā chāāŋāā nyāā wa̍nāā lāāla᷄ŋnda̍ yɛ̄, lā kɔ̍ɔ̍sā a̍ ka̍ŋ bɛ̍ɛ̍ le̍? Lā nɔ̄ mī lā kɔ̄ɔ̄sa̍ a̍ nda̍. Kāni̍ fo̍ndōle̍, Yāu̍ Mɛ̄lɛ̄ka̍a̍ dīmi̍ āā, “Wānāa̍ cho̍ ma̍ wā o̍ nīīlū dɛ̍nɛ̍ wɔ̍ɔ̍ŋndo̍ ni᷄ŋ nda̍ lā sōli̍ nda̍ o̍ ku̍ndā nyāa̍ chōo̍.”