Read Southern Kisi Kɔ̄li̍ŋtīāŋ Tāso̍o̍ 6 Bible Online

Kɔ̄li̍ŋtīāŋ Tāso̍o̍ 6 - Southern Kisi bible

Kɔ̄li̍ŋtīāŋ Tāso̍o̍ 6

¹Vɛ᷅ nya̍ wānāā lāāla᷄ŋnda̍ tē sūɛ̍i̍ ī kēēka᷅ŋ nya̍ tɛ̄ɛ̄ŋ nya̍ chāa̍ŋ nyā wa̍nā la̍a̍la᷄ŋndo̍ pɛ̍, lā kūɛ̄ se̍ī ndɔ̄ɔ̍ bīyɔ̄ɔ̄ o̍ māsāa̍ lo̍, ndu̍yɛ̍, mī wānāa̍ cho̍ wānāā pīɛ̄īyāā Mɛ̄lɛ̄ka̍ le̍ wa̍ ā chāl kɔ̍ɔ̍sɔ̍la̍ la̍ŋ bɔ̄ŋāa̍ nya̍ tɛ̄ɛ̄ŋ? Tē sūɛ̍i̍ ī kēēka᷅ŋ nya̍ tɛ̄ɛ̄ŋ pɛ̍, nya̍ pi̍la̍ wānāā lāāla᷄ŋnda̍ lā cha᷄l lā tōōsi̍āŋ tɛ̍ɛ̄ŋ.

²Nya̍ pi̍la̍ lā sīnā cha̍la̍ŋ māā wānāa̍ Mɛ̄lɛ̄ka̍a̍ nda̍ cho̍ hūnɔ̄ɔ̄ kɔ̍ɔ̍sɔ̍ a̍ wāŋnda̍ o̍ chi̍e̍ēŋndo̍ ho̍ō ni᷄ŋ ni̍. Tē ī wa̍ yɛ̄ le̍nde̍ pɛ̍, mɛ̄ɛ̍ lā nɔ̄lā mī lā yɛ̄ɛ̄mbu̍u̍ sɔ̄ɔ̍ŋ pɔ᷅m pɔ̍mbɔ̄ŋ wāā le̍nde̍.

³Ndu̍yɛ̍, lā sīnā māā na̍a̍ ŋ̍ cho̍ hūnɔ̄ɔ̄ kɔ̍ɔ̍sɔ̍ a̍ ki̍i̍la̍a̍ Mɛ̄lɛ̄ka̍a̍ ni̍. Tē ī wa̍ yɛ̄ le̍nde̍ pɛ̍, mɛ̄ɛ̍ ŋ̄ nɔ̄lā kpe̍e̍kpe̍i̍ mī ŋ̄ dīmi̍ sɔ̄ɔ̍ŋ wa̍ā chi̍e̍ēŋ na̍ŋ mī ŋ̄ hīni̍.

⁴Bāā tē sɔ̄ɔ̍ŋ wa̍ā le̍nde̍ ŋ̍ wa̍ wānāā lāāla᷄ŋnda̍ tɛ̄ɛ̄ŋ pɛ̍, kɔ̄la̍ŋ nya̍ kūā a̍ mu̍ŋ nāa̍ wānāa̍ nɔ̍ bɛ̍ɛ̍ na̍a̍ si̍māā o̍ ku̍ndā wānāā lāāla᷄ŋnda̍ tɛ̄ɛ̄ŋ te̍ wa̍ chūā ni̍ le̍ mā dīmi̍ mu̍ŋ?

⁵He̍ī chō sūɛ̍i̍ lāsi̍ɔ̍mbu̍i̍ bɛ̍ndū. Lā hɛ̄na̍ŋ mī lā dīmi̍ mādīmīāā māā, wāna̍ kɔ̄l kālo̍o̍ ō pīlɛ̍ bɛ̍ɛ̍ cho̍ nya̍ tɛ̄ɛ̄ŋ o̍ nɔ̍lā mbō dīmi̍ sɔ̄ɔ̍ŋ wānāā lāāla᷄ŋnda̍ tɛ̄ɛ̄ŋ te̍?

⁶Ko̍ŋ nya̍ mɛ̄i̍ tōsāa̍ ni̍, wāna̍ cha᷅ŋ ko̍ tē sūɛ̍i̍ ī kēēka᷅ŋ nda̍ tɛ̄ɛ̄ŋ nda̍ chāa̍ŋ ndɔ̄ wa̍nā la̍a̍la᷄ŋndo̍ pɛ̍, ō kɔ̍ bi̍ī se̍ī ndɔ̄ɔ̍, tāāma̍ o̍ wānāa̍ cho̍ wa̍nāā lāāla᷄ŋ te̍ wa̍ lo̍, mā bɔ̄ŋa̍ nda̍ kɔ̍ɔ̍sɔ̍ ko̍ŋ tɛ̄ɛ̄ŋ.

⁷Nya̍ wānāā lāāla᷄ŋnda̍, kɔ̄lā kālālā nya̍ kūā a̍ sɔ̄ɔ̍ŋ nya᷄ŋ o̍ ko̍tīi̍la̍ŋ ni᷄ŋ nda̍ŋ bɛ̍ɛ̍ su̍e̍e̍, lā chɔ᷄m māā lā fāŋa̍ŋ o̍ pɛ̄ɛ̄kū īwāna̍ Mɛ̄lɛ̄ka̍ya̍a̍ chōo̍. Tē chāa̍ŋ nūm to̍sa̍l nu̍m sūɛ̍i̍ wɔ̍ɔ̍ŋnde̍ pɛ̍, ō bɛ̄ndā bɛ̍ɛ̍ mī ī lōnu̍ŋ nu̍m le̍nde̍. Ndu̍yɛ̍, tē chāa̍ŋ nūm o̍ chi̍i̍mbu̍u̍ nu̍m pɛ̍, ō bɛ̄ndā bɛ̍ɛ̍ mī ī lōnu̍ŋ nu̍m le̍nde̍.

⁸Ko̍ŋ nya̍ mɛ̄i̍ tōsāa̍ ni̍, mī nya̍ pi̍la̍ kālāa̍ mī lā tōsa̍la᷅ŋ sɔ̍ɔ̍ŋ wɔ̍ɔ̍ŋndo̍ŋ, ndu̍yɛ̍, mī lā yɔ̄ŋna᷅ŋ vīīle̍ŋ. A̍ chāāŋāā nyāā wa̍nāā lāāla᷄ŋnda̍ bɛ̍ɛ̍ mī lā tōsā le̍nde̍.

⁹Nya̍ pi̍la̍ lā sīnā ndi̍ wa̍la̍ŋ māā, wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ ā lu̍e̍ī ni̍ŋ o̍ māsāle̍ Mɛ̄lɛ̄ka̍le̍ŋ ni᷄ŋ te̍. Wānā o̍ wānā hu̍ī nūm pi̍la̍ a̍ ke̍ŋ te̍. Wānā o̍ wāna̍ cho̍ wānā su̍u̍ndɛ̍i̍, a̍ wānāa̍ so̍o̍lūū nyɛ᷅m chēle̍ŋndo̍ŋ nda̍, a̍ wānāa̍ ke̍ī su̍u̍ndāa̍ nda̍ wānāā nda̍ cho̍ o̍ nɔ̄ ni̍ŋ te̍ wa̍, a̍ wāŋ pīāāndūa̍a̍ hi̍nī a̍ chāāŋāā ndāā wa᷅ŋ pīāāndūa̍a̍ wa̍,

¹⁰a̍ vīīya̍, a̍ wānāa̍ lu̍ɛ̍ī hɔ᷅lte̍ŋ o̍ nyɛ̄m pi̍la̍ŋ nda̍, a̍ wānāā kōlāa̍, a̍ wānāa̍ tɛ̍ɛ̍mbūū cha̍a̍ŋāā ndāā wa᷅ŋnda̍ chīe̍e̍ya̍ tɔ̍ɔ̍ wa̍, a̍ wānāa̍ chu̍ā nyɛ᷅m pi̍la̍ŋ a̍ lēdīɔ̄ɔ̄mū wa̍, nda̍ kpo̍u̍, ō pīlɛ̍ bɛ̍ɛ̍ lu̍e̍ī o̍ māsāle̍ Mɛ̄lɛ̄ka̍le̍ŋ ni᷄ŋ te̍.

¹¹O̍ pāāndōo̍ ni᷄ŋ sɔ̄ɔ̍ŋ wɔ̍ɔ̍ŋ wāā le̍ndo̍ŋ mu̍ŋ nya̍ a̍a̍ nɔ̍ tōsāa̍ ni̍. Kɛ̍, mi̍ lā sɔ̄lā yīŋɔ̄ɔ̍, mi̍ yɔ̄ŋndā nyāla̍ wɔ̍ɔ̍ŋnda̍ŋ lā fāŋa᷄ŋ nya̍. Ndu̍yɛ̍, mi̍ lā sīmnu᷄ŋ wa̍nāa̍ cho̍ le̍ Mɛ̄lɛ̄ka̍. Ndu̍yɛ̍, mbo̍ tōsā mi̍ la̍ sīmnu᷄ŋ wa̍nāā sa̍kpō ndu̍ o̍ hɔ̄l sa̍na̍a̍ o̍ sa̍bu̍ Māsānɔ̄ɔ̍ Chi̍i̍sū Ki̍li̍tīo̍o̍ ni᷄ŋ, a̍ Mɛ̄lɛ̄ka̍ nāa̍ Nyi̍nā ndɔ̍ Kāsīo̍o̍.

¹²Mī wānā pu̍m nya̍ tɛ̄ɛ̄ŋ ō dīmi̍ dɔ̍ɔ̍ māā, ō nɔ̄ di̍ mbō tōsa̍ nyɛ̄ o̍ nyɛ̄ fe̍e̍. Ī chō tōnya̍ le̍nde̍. Kɛ̍ ndu̍yɛ̍, ō cho̍ nyɔ̍ɔ̍ŋ fa̍ū le̍ wānā sɔ̍lā ma̍lāa̍ lēni᷄ŋ te̍. Mɛ̄ɛ̍ ya̍ I̍ cho̍ bɛ̍ɛ̍ nu̍a̍ā yɛ̍, I̍ chɛ̍l ndi̍ māā I̍ nɔ̍ di̍ mī I̍ to̍sa̍ nyɛ̄ o̍ nyɛ̄ fe̍e̍. Kɛ̍ ndu̍yɛ̍, I̍ chɛ᷅l pe̍si̍ mī yēēmɛ̍i̍ nyɛ̄ o̍ nyɛ̄ ī sīīŋgu̍u̍ ya̍ chɛ̄ le̍.

¹³Mī wānā che᷅le̍ŋ dīmi̍ dɔ̍ɔ̍ vɛ̄lɛ̄ āā, “Nyɛ̄ dīa̍a̍ ndu̍ cho̍ māchūāā le̍ dɔ̄wɔ̄ɔ̍ o̍ dēmbōo̍ ni᷄ŋ, mi̍ dēmbōo̍ ndu̍ wa᷅ le̍ nyɛ̄ dīa̍a̍ dɔ̄wɔ̄ɔ̍ lēni᷄ŋ.” Ke̍ŋ bɛ̍ɛ̍ ī chō tōnya̍. Kɛ̍ ndu̍yɛ̍, nyɛ̄m sālā tīɔ̍ɔ̍ŋ mu᷅ŋ, dēmbōo̍ ni̍, nyɛ̄ dīa̍a̍ ni̍, Mɛ̄lɛ̄ka̍ chō hūnɔ̄ɔ̄ chīī a̍ mu̍ŋ. Dīāllo̍ŋ mu̍ŋ Mɛ̄lɛ̄ka̍ tōōsi̍a̍a̍ mu̍ŋ le̍ wāa̍ o̍ nīīlū sūūndɛ̍i̍ ni̍ŋ te̍. Ō tōsa̍ mu̍ŋ mātōsāā le̍ wa̍li̍ Māsānɔ̄ɔ̍ Mɛ̄lɛ̄ka̍a̍. Ndu̍yɛ̍, ndu̍ Ma̍sānɔ̄ɔ̍ Mɛ̄lɛ̄ka̍ ndu̍ yɔ̍ŋgū nyɛ᷅ dīāllo̍ŋ ŋ̄ nɔ̄ le̍ sɔ̄lāa̍ wo̍ ni̍.

¹⁴Ndu̍yɛ̍, Mɛ̄lɛ̄ka̍ o̍ mi̍ŋgi̍ Māsānɔ̄ɔ̍ yōōmū wo̍, na̍a̍ bɛ̍ɛ̍ ō chō na̍a̍ hūnɔ̄ɔ̄ mi̍ŋgī yōōmū a̍ kpāāya̍ ndɔ̄ɔ̍.

¹⁵Lā sīnā ndi̍ cha̍la̍ŋ māā, nya̍ wānāā lāāla᷄ŋnda̍ māā dīāllūŋ nya᷄ŋ, māā dīāllu᷄ŋ Ki̍li̍tīo̍ŋ ŋ̄ ti᷄ŋ cho̍ mu̍ŋ ni̍. Le̍la̍ŋ ō bɛ̄ndā pa̍, mī wāŋndo̍ tōsa̍ mī dīāllu᷄ŋ Ki̍li̍tīo̍ŋ ŋ̄ ti᷄ŋ ŋ̄ wa̍ ŋ̄ mūūli̍āŋ a̍ dīāllūŋ wānā la̍nɔ̍ su̍u̍ndɛ̍i̍yo̍? Mbɔ̄ Mɛ̄lɛ̄ka̍ tu̍ɛ̍ī bɛ̍ɛ̍ le̍.

¹⁶Lā si̍nā nu̍a̍ā māā tē wāŋndo̍ ō wa̍ nda̍ wānā la̍nɔ̍ ke̍ī su̍u̍ndāa̍ wo̍ pɛ̍, mɛ̄ɛ̍ ō sīmnu᷄ŋ di̍ālle̍ ī pīlɛ̍ nda̍ ndu̍ le̍? Ō chō ko̍ mɛ̄ɛ̍ i̍ cho̍ ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ yɛ̍ āā, “O̍ ko̍ŋ, mī pōo̍ nda̍ wānā la̍nɔ̍ɔ̍ mā sīmnu᷄ŋ di̍ālle̍ ī pīlɛ̍.”

¹⁷Kɛ̍ ndu̍yɛ̍, wānā o̍ wāna̍ yɔ̍ŋgu̍ŋ ndu̍ pi̍la̍ mbō wa̍ ō mɔ̄ɔ̄sa᷅ŋ a̍ Māsānɔ̄ɔ̍ Mɛ̄lɛ̄ka̍ pɛ̍, mɛ̄ɛ̍ wānā ko̍ŋ nda̍ Māsānɔ̄ɔ̍, nyi̍nā ndāa̍ sīmnu᷄ŋ o̍ pi᷅lɛ̍.

¹⁸Lā wo̍ū bā o̍ nīīlū sūūndɛ̍i̍ ni̍ŋ kpo̍so̍ŋ te̍. Kāni̍ fo̍ndōle̍, yɔ̄ŋndā wɔ̄ɔ̍ŋndā wāŋndo̍ ō tōsā la̍ŋ, lā tɔ̄la̍ŋ ki̍nɛ̍i̍ ō cho̍ di̍a̍llūŋ ndɔ᷄ŋ te̍ la̍ nɔ̍ɔ̍lā le̍. Kɛ̍, wāna̍ wo̍ū ba̍a̍ o̍ nīīlū sūūndɛ̍i̍yo̍ ni᷄ŋ ndo̍, ndu̍ ndu̍, dīāllūŋ ndɔ᷄ŋ mu̍ŋ o̍ wa᷅ mu̍ŋ nɔ̍ɔ̍lāa̍ ni̍.

¹⁹Ndu̍yɛ̍, lā si̍nā nu̍a̍ā māā dīāllūŋ nya᷄ŋ te̍ ŋ̍ cho̍ chīɛ̄īyo̍ le̍ Nyi̍na̍ Kāsi̍ Mɛ̄lɛ̄ka̍a̍ le̍? Nyi̍nā kōŋ, ndu̍ cho̍ nya̍ kɔ̄ɔ̄lī ni̍. Ndu̍ Mɛ̄lɛ̄ka̍ to̍sa̍ ni̍ mbo̍ wā nya̍ kɔ̄ɔ̄lī. Lā cho̍ a̍ bā nyā le̍. Mīa̍l Mɛ̄lɛ̄ka̍a̍ nya̍ chō ni̍.

²⁰Kāni̍, Mɛ̄lɛ̄ka̍ pēndū māpīāndāā nya̍ kpa̍li̍ a̍ nyɛ̄. Le̍la̍ŋ, lā yɔ̄ŋgu̍ di̍a̍llūŋ nya᷄ŋ le̍ Mɛ̄lɛ̄ka̍ bɛ̄ɛ̄le̍ŋ kīo̍o̍.