Read Southern Kisi Kɔ̄li̍ŋtīāŋ Tāso̍o̍ 7 Bible Online

Kɔ̄li̍ŋtīāŋ Tāso̍o̍ 7 - Southern Kisi bible

Kɔ̄li̍ŋtīāŋ Tāso̍o̍ 7

¹I̍ mu̍lūl lɔ̍ nya̍ ni̍ko̍ a̍ sɔ̄ɔ̍ŋ nya̍ pōōnyi̍a̍l la̍ yāu̍wo̍ wo̍ŋ o̍kɔ̄ɔ̄. Ō chō sūɛ̍i̍ kɛ̍ndɛ̄ tē ō wa̍ pɛ̍ mī wāŋndo̍ ō chu̍e̍ la̍nɔ̍ le̍.

²Kɛ̍ ndu̍yɛ̍, yɔ̄ŋi̍ wānā wo̍u̍ ba̍ o̍ nīīlū sūūndɛ̍i̍yo̍ ni᷄ŋ yɛ̍, ō bɛ̄ndā mī wānā o̍ wānā pɔ̍nɔ̍ nɔ̍ la̍nɔ̍ɔ̍ o̍ ndɔ̍ɔ̍, ndu̍yɛ̍, mī wānā o̍ wānā la̍nɔ̍ nɔ̍ pɔ̍nɔ̍ɔ̍ o̍ ndɔ̍ɔ̍.

³Wānā pɔ̍nɔ̍ɔ̍ nɔ̄ mbō tōsa̍ nyɛ̄ pɔ̍nɔ̍ɔ̍ nɔ̄ kūēē mbō tōsa̍l la̍nɔ̍ɔ̍ chīɛ̄ī ni̍ŋ ndo̍. Le̍nde̍ ko̍ni̍, wānā la̍nɔ̍ɔ̍ bɛ̍ɛ̍ ō nɔ̄ mbō tōsa̍ nyɛ̄ la̍nɔ̍ɔ̍ nɔ̄ kūēē mbō tōsa̍l pɔ̍nɔ̍ɔ̍ chīɛ̄ī ni̍ŋ ndo̍.

⁴Wānā la̍nɔ̍ɔ̍ ō nɔ̍ kpa̍a̍yā dīāllūŋ ndɔ᷄ŋ ndu̍ pi̍la̍ŋ chōo̍ le̍. Pɔ̍nɔ̍ ndɔ̍ nɔ̍ kpāāyāa̍ dīāllūŋ ndɔ᷄ŋ chōo̍ ni̍. Le̍nde̍ ko̍ni̍, pōo̍ bɛ̍ɛ̍ ō nɔ̍ kpa̍a̍yā dīāllūŋ ndɔ᷄ŋ ndu̍ pi̍la̍ŋ chōo̍ le̍. La̍a̍ ndɔ̍ nɔ̍ kpāāyāa̍ dīāllūŋ ndɔ᷄ŋ chōo̍ ni̍.

⁵Pɔ̍nɔ̍ɔ̍ a̍ la̍nɔ̍ɔ̍ vēllāa̍ vēllē, lā nɔ̍ mī lā kɛ̄ya᷅ŋ chi̍ɛ̍ī ni̍ŋ te̍ mɛ̄ɛ̍ dɔ̍ɔ̍ mbō wa̍ chɛ̄la᷅ŋ nyāa̍ le̍ te̍le̍ŋndo̍ chūa̍a̍, le̍ Mɛ̄lɛ̄ka̍ pīɛ̄īyo̍. Kɛ̍ ndu̍yɛ̍, tē bōōndi̍i̍ ke̍ŋ ī chūū dɔ̍ɔ̍ pɛ̍, lā mīīŋgu̍ vɛ̄lɛ̄ dīōm pīlɛ̍, kāni̍ fu̍u̍le̍, lā ti̍ū ni̍ŋ kɔ᷅ltā nyāla̍ŋ bā le̍. Yɔ̄ŋi̍ o̍ lo̍ o̍ ko̍ŋ mī Sēta̍nā, māsa̍ nyi̍nāā wɔ̄ɔ̍ŋnda̍, ō dɛ̄ɛ̄ni̍a̍a̍ nya̍ mī lā tōsa̍ yɔ̄ŋ wɔ̄ɔ̍ŋndo̍.

⁶Ō ya̍ cho̍ ho̍ō dīmīo̍o̍ wo̍ ō cho̍ mī I̍ wa̍ dīmī māā mɛ̄ɛ̍ mī wānā o̍ wānā chu̍a̍ la̍nɔ̍ɔ̍ kɛ̄lɛ̄ŋgāā pɔ̍nɔ̍ɔ̍ le̍. I̍ cho̍ māchūāā nya̍ chɔ̄mndo̍ māā wāŋndo̍ nɔ̄ di̍ mbō chu̍a̍ la̍nɔ̍ɔ̍ kɛ̄lɛ̄ŋgāā pɔ̍nɔ̍ɔ̍.

⁷I̍ hɛ̍nāŋ kpe̍e̍kpe̍i̍ māā, nya̍ fa̍ū māā lā wa̍ ko̍ mɛ̄ɛ̍ ya̍ cho̍ nu̍a̍ā, I̍ chu̍e̍ la̍nɔ̍ le̍ yɛ̍. Kɛ̍ ndu̍yɛ̍, Mɛ̄lɛ̄ka̍ ō ke̍ wāŋnda̍ kpāāyāla̍ŋ yɛ̍ yɛ̍. Mbō ke̍ wāŋndo̍ ho̍ō kpāāyāa̍ le̍ he̍ī ndo̍ō tōsāa̍. Mbō mūli̍ŋ mbō ke̍ ō pīlɔ̍ɔ̄ kpāāyāa̍ le̍ sūɛ̍i̍ che᷅le̍ŋ tōsāa̍ te̍ŋge̍ŋ.

⁸Wānāa̍ cho̍ ā nɔ̍ ŋ̍la̍a̍ndū kɛ̄lɛ̄ŋgāā ŋ̄pīāāndū le̍ wa̍, a̍ wānāā pīāāndāā ndāa̍ vī wa̍, nyɛ̄ ya̍ I̍ nɔ̍ le̍ nya̍ dīmūllo̍ wo̍, ndu̍ cho̍ ho̍ō ni̍. Ō bɛ̄nda̍ mī lā wānu̍ŋ le̍nde̍ lā chu̍ē ŋ̍la̍a̍ndū kɛ̄lɛ̄ŋgāā ŋ̄pīāāndū le̍. Mī lā wa̍ mɛ̄ɛ̍ ya̍ I̍ cho̍nu᷄ŋ nu̍a̍ā ya̍ pīlɛ̍ yɛ̍.

⁹Kɛ̍ ndu̍yɛ̍, nu᷄m nɔ̍lā mā ti̍u̍ kɔ̄l nūmndo̍ bā le̍ wāa̍ le̍nde̍ ye̍mbū le̍, mɛ̄ɛ̍ chu̍a̍ la̍nɔ̍ɔ̍ kɛ̄lɛ̄ŋgāā pɔ̍nɔ̍ɔ̍. Ko̍ŋ hi̍o̍ū nāŋɔ̄ɔ̄ a̍ wāa̍ a̍ yēēmɛ̍i̍ bɛ̍ndu̍i̍ kēŋ o̍ kɔ̄l nūmndo̍ ni᷄ŋ.

¹⁰Wānāa̍ nɔ̍ lāāndūa̍a̍ kɛ̄lɛ̄ŋgāā pīāāndūa̍a̍ wa̍, sīlāa̍ o̍ nda̍a̍ cho̍ ho̍ō ni̍. Ndu̍yɛ̍, ō cho̍ ya̍ pi̍la̍ le̍ cho̍ nya̍ sīlāa̍ ho̍ō kīo̍o̍ le̍. Māsānɔ̄ɔ̍ Mɛ̄lɛ̄ka̍ cho̍ nya̍ sīlāa̍ ho̍ō ni̍. Wānā la̍nɔ̍ɔ̍ a̍ nɔ̍ mā kɛ̍ɛ̍ pɔ̍nɔ̍ nu̍m te̍.

¹¹Kɛ̍ ndu̍yɛ̍, tē ō wa̍ pɛ̍ mā kɛ̍ɛ̍ pɔ̍nɔ̍ nu̍m ka̍ŋga̍la̍ŋ, mɛ̄ɛ̍ chu̍ā lɛ̄ wānā pɔ̍nɔ̍ che᷅le̍ŋ te̍. Tē ko̍ŋ te̍, mɛ̄ɛ̍ mi̍i̍ŋgu̍ ni̍ko̍ pɔ̍nɔ̍ nu̍m ŋ̄ kɛ̄ɛ̍ ko̍ŋ ndo̍ o̍ bā. Ndu̍yɛ̍, wānā pɔ̍nɔ̍ɔ̍ nūm bɛ̍ɛ̍ a̍ nɔ̍ mā kɛ̍ɛ̍ la̍a̍ nu̍m te̍.

¹²Le̍ nya̍ wāŋnda̍ ā tūa̍a̍ nya̍ nya̍, I̍ nɔ̍ si̍lā o̍ fu̍la̍ o̍ Māsānɔ̄ɔ̍ Mɛ̄lɛ̄ka̍ lo̍ le̍ nya̍ le̍. Nya̍ nya̍, nyɛ̄ ya̍ I̍ nɔ̍ mī I̍ di̍mu̍l nya̍ wo̍, ndu̍ cho̍ ho̍ō ni̍. Tē wānā la̍a̍la᷄ŋndo̍ nɔ̄ la̍nɔ̍ɔ̍ pɛ̍, kɛ̍ mī chūā kōŋ ō ve̍ wa̍nā la̍a̍la᷄ŋ o̍ Chi̍i̍sū nīŋ te̍, kɛ̍ ndu̍yɛ̍, mbō chɛ᷄l le̍ hīōūwɔ̄ɔ̍ lāchī a̍ cha᷄lle̍ nda̍ pɔ̍nɔ̍ wa̍nā la̍a̍la᷄ŋndo̍ pɛ̍, mɛ̄ɛ̍ pɔ̍nɔ̍ la̍a̍la᷄ŋ kōŋ ō kɛ̍ɛ̄ ndu̍ le̍.

¹³Ndu̍yɛ̍, tē wānā la̍nɔ̍ la̍a̍la᷄ŋndo̍ wa̍ pɔ̍nɔ̍ cho̍ wa̍nā la̍a̍la᷄ŋ te̍ wo̍ o̍ bā pɛ̍, kɛ̍ ndu̍yɛ̍, mī pɔ̍nɔ̍ ko̍ŋ chɛ᷄l le̍ hīōūwɔ̄ɔ̍ lāchī a̍ cha᷄lle̍ nda̍ la̍nɔ̍ wa̍nā la̍a̍la᷄ŋ ko̍ŋ pɛ̍, mɛ̄ɛ̍ nūm chūā kōŋ kɛ̍ɛ̄ ndu̍ le̍.

¹⁴Kāni̍ fo̍ndōle̍, pɔ̍nɔ̍ cho̍ ho̍ō wānā la̍a̍la᷄ŋ te̍ wo̍, Mɛ̄lɛ̄ka̍ tōsa̍ mbo̍ wā ō yɔ̄ŋga᷄ŋ o̍ Mɛ̄lɛ̄ka̍ lo̍ o̍ sa̍bū la̍nɔ̍ wa̍nā la̍a̍la᷄ŋndo̍ ho̍ō ni᷄ŋ. Ndu̍yɛ̍, wānā la̍nɔ̍ cho̍ ho̍ō wānā la̍a̍la᷄ŋ te̍ wo̍, kɛ̍ ndu̍yɛ̍, mbo̍ wā pɔ̍nɔ̍ wa̍nā la̍a̍la᷄ŋndo̍ o̍ bā wo̍, Mɛ̄lɛ̄ka̍ tōsa̍ mbo̍ wā ō yɔ̄ŋga᷄ŋ o̍ Mɛ̄lɛ̄ka̍ lo̍, o̍ sa̍bu̍ pɔ̍nɔ̍ wa̍nā la̍a̍la᷄ŋ ko̍ŋ ni᷄ŋ. Kɛ̍, tē ī yɔ̄nu̍ŋ le̍nde̍ le̍, mɛ̄ɛ̍ wānāā ŋīɔ̍ɔ̍ŋāā kāŋ, chūāūwāā ndāa̍ ā sīmnu᷄ŋ wa̍nāa̍ si̍nā Mɛ̍lɛ̄ka̍ le̍. Kɛ̍, tē ī yɔ̄nu̍ŋ le̍nde̍ pɛ̍, mɛ̄ɛ̍ chūāūwāā ndāa̍, wānāa̍ cho̍ le̍ Mɛ̄lɛ̄ka̍ wa̍ nda̍ wā ni̍.

¹⁵Kɛ̍ ndu̍yɛ̍, tē wāna̍ cho̍ wa̍nā la̍a̍la᷄ŋ te̍ wo̍ ō yēēma̍ le̍ pɔ̍nɔ̍ wa̍nā la̍a̍la᷄ŋndo̍ kɛ̄lɛ̄ŋgāā la̍nɔ̍ wa̍nā la̍a̍la᷄ŋndo̍ mālɔ̄ɔ̍ pɛ̍, mɛ̄ɛ̍ ō chāā ma̍lɔ̄ɔ̄. O̍ ko̍ŋ, wānā la̍a̍la᷄ŋ ko̍ŋ nɔ̄ di̍ mbō ma᷄l ndu̍. Mɛ̄lɛ̄ka̍ chu̍a̍ māchūāā nya̍ le̍ mī lā wa̍ o̍ kɔ̄ltā nyūlū ni᷄ŋ.

¹⁶Nūm wānā la̍nɔ̍ cho̍ ho̍ō wānā la̍a̍la᷄ŋndo̍ ma̍ wā pɔ̍nɔ̍ cho̍ wa̍nā la̍a̍la᷄ŋ te̍ wo̍ o̍ bā wo̍, ko̍ ā nɔ̄lā ni̍ŋ mā mu̍li̍ pɔ̍nɔ̍ nu̍m cho̍ ho̍ō wānā la̍a̍la᷄ŋ te̍ wo̍ mbō sīmnu᷄ŋ wa̍nā la̍a̍la᷄ŋ, a̍ si̍nā le̍. Ndu̍yɛ̍, nūm wānā pɔ̍nɔ̍ nɔ̍ ho̍ō la̍nɔ̍ cho̍ wa̍nā la̍a̍la᷄ŋ te̍ wo̍, ko̍ ā nɔ̄lā ni̍ŋ mā mu̍li̍ la̍a̍ nu̍m cho̍ ho̍ō wānā la̍a̍la᷄ŋ te̍ wo̍ mbō sīmnu᷄ŋ wa̍nā la̍a̍la᷄ŋ, a̍ si̍nā le̍.

¹⁷Wānā o̍ wānā nɛ̄i̍ Mɛ̄lɛ̄ka̍ chɔ᷄m nu̍m le̍ wāa̍ lēchōo̍ wo̍, hi̍o̍u̍ la̍chi̍ a̍ wāa̍ lēchōo̍. Ndu̍yɛ̍, mɛ̄ɛ̍ ŋ̄ wa̍ mi̍ Māsānɔ̄ɔ̍ Mɛ̄lɛ̄ka̍ vēēlū nu̍m le̍ wāa̍ wāna̍ ndɔ̄ yɛ̍, hi̍o̍u̍ la̍chi̍ a̍ wāa̍ le̍nde̍. Nyɛ̄ ya̍ I̍ cho̍ wāŋnda̍ pɛ̄ɛ̄kōo̍ o̍ ku̍ndā o̍ ku̍ndā wānāā lāāla᷄ŋ chōo̍ wo̍, ndu̍ cho̍ ho̍ō ni̍.

¹⁸Tē ō wa̍ pɛ̍, mī wāna̍ cho̍ ni᷅ŋ ō hīvīāā o̍ chīɛ̄ī kɔ̄ɔ̄lī wo̍, mbō hīŋ o̍ vēēlū Mɛ̄lɛ̄ka̍ vēēlu̍ ndu̍ le̍ wāa̍ wāna̍ ndɔ̄ wo̍ pɛ̍, mɛ̄ɛ̍ wānā ko̍ŋ, ō ki̍ndī le̍ sūɛ̍i̍ ka̍lɛ̄i̍ vīōŋɔ̄ɔ̄ le̍. Ndu̍yɛ̍, tē wāna̍ cho̍ o̍ hi̍vīāā o̍ chīɛ̄ī kɔ̄ɔ̄lī le̍ wo̍ ō hīŋ vēēlū Mɛ̄lɛ̄ka̍ vēēlu̍ ndu̍ le̍ wāa̍ wāna̍ ndɔ̄ wo̍ pɛ̍, mɛ̄ɛ̍ ō to̍sā mā hīvi̍ ndu̍ o̍ chīɛ̄ī kɔ̄ɔ̄lī le̍.

¹⁹Kāni̍ fo̍ndōle̍, ā hīvi̍ wa᷅ŋndo̍, ā hi̍vī ndu̍ le̍, ko̍ŋ cho̍ nyɛ᷅ o̍ nyɛ̄ le̍. Sūɛ̍i̍ cho̍ sūɛ̍i̍ le̍bo᷅lle̍ ve̍, ndi̍ cho̍ nyɛ̄ sāwāla̍ Mɛ̄lɛ̄ka̍la̍ŋ lā dīmi̍ wo̍ tōsāa̍ ni̍.

²⁰Wānā o̍ wānā, o̍ hi̍o̍u̍ la̍chi̍ a̍ wāa̍ mɛ̄ɛ̍ o̍ wa̍ mbo̍ hūŋ vēēlū Mɛ̄lɛ̄ka̍ vēēlu̍ ndu̍ le̍ wāa̍ wāna̍ ndɔ̄ wo̍ yɛ̍.

²¹Tē ō wa̍ pɛ̍ māā, lɔ̍ɔ̍pa̍ bɛ̍ɛ̍ ŋ̄ hūŋ ve̍e̍lū Mɛ̄lɛ̄ka̍ vēēlu̍ nu̍m ndo̍ māā chīɔ̍ɔ̍ ŋ̄ wa̍ wāŋndo̍ o̍ bā ni̍, mɛ̄ɛ̍ ta̍mbū kɔ̄l a̍ ke̍ŋ te̍. Kɛ̍ ndu̍yɛ̍, tē ō wa̍ pɛ̍ mā sɔ̍la̍ fo̍ndāa̍ le̍ mā ba̍ŋa̍ŋ o̍ chɛ̄le̍ŋ ni᷄ŋ, mɛ̄ɛ̍ to̍sa̍ mā sɔ̍la̍ bāŋa᷄ŋndo̍.

²²Kāni̍ fo̍ndōle̍, tē ō wa̍ pɛ̍ mī chīɔ̍ɔ̍ ō sɔ̄la̍ vēēlōo̍ le̍ wāa̍ wāna̍ Māsānɔ̄ɔ̍ Mɛ̄lɛ̄ka̍ pɛ̍, mɛ̄ɛ̍ wānā ba̍ŋa᷄ŋ Māsānɔ̄ɔ̍ wo̍ o̍ cho̍ ni̍. Kɛ̍ ndu̍yɛ̍, wāna̍ cho̍ chɛ᷅ le̍ wo̍, tē ō sɔ̄la̍ vēēlōo̍ le̍ wāa̍ Māsānɔ̄ɔ̍ wāna̍ ndɔ̄ pɛ̍, mɛ̄ɛ̍ chɛ̍ Ki̍li̍tīo̍o̍ o̍ cho̍ ni̍.

²³A̍ nyɛ̄ kpe̍e̍kpe̍i̍ Mɛ̄lɛ̄ka̍ pēndū nya̍ kpa̍li̍ ni̍. Le̍la̍ŋ, lā si̍mnu᷄ŋ la̍chɛ̍ ŋ̄wāŋndā chīe̍e̍ o̍ bā bɛ̄ŋgu̍ le̍.

²⁴Chāa̍ŋāā nīāā wa̍nāā lāāla᷄ŋnda̍, mɛ̄ɛ̍ nya̍ wa̍ mi̍ Mɛ̄lɛ̄ka̍ vēēlū nya̍ le̍ wāa̍ wānāā ndɔ̄ yɛ̍, lā hīo̍u̍ la̍chi̍ a̍ wāa̍ le̍nde̍ o̍ ba̍ Mɛ̄lɛ̄ka̍a̍ bɛ̄ŋgu̍.

²⁵Mūlīo̍o̍ cho̍ ho̍ō a̍ nyūnā nya̍ nyūna̍ a̍ yēmbūa̍a̍ o̍kɔ̄ɔ̄ wo̍ ni̍. Ō cho̍ mī Māsānɔ̄ɔ̍ Mɛ̄lɛ̄ka̍ ō ke̍ ya̍ sīlā le̍ nya̍ a̍ ndi̍ o̍kɔ̄ɔ̄ le̍. Kɛ̍, nyɛ̄ ya̍ ya̍ I̍ yi̍ya̍ŋ a̍ ndi̍ o̍kɔ̄ɔ̄ māā, wāna̍ Māsānɔ̄ɔ̍ Mɛ̄lɛ̄ka̍ tūīīnu̍ŋ i̍nyi̍ɛ̍ɛ̍, mbo̍ sīīŋgūū ndu̍ wāna̍ Mɛ̄lɛ̄ka̍ nɔ̄lā mbō tīīnda̍ŋ ndo̍, ndu̍ cho̍ ho̍ō ni̍.

²⁶Le̍ nyɛ̄ pālāa̍ cho̍ a̍ bo̍o̍nde̍i̍ he̍ī yo̍, I̍ nɔ̍ o̍ kɔ̄l māā ō wā bɛ̍ɛ̍ le̍tu̍u̍ mī wānā o̍ wānā hi̍o̍ū lāchī a̍ wāa̍ mɛ̄ɛ̍ o̍ cho̍ yɛ̍.

²⁷Le̍la̍ŋ, tē ō wa̍ pɛ̍, mā nɔ̄ ni᷅ŋ la̍nɔ̍ɔ̍ mɛ̄ɛ̍ ki̍ndī le̍ ndu̍ kɛ̄ɛ̄ le̍. Nu᷄m nɔ̍ yɛ̍ la̍nɔ̍ le̍, mɛ̄ɛ̍ ki̍ndī lɛ̄ le̍ la̍nɔ̍ chu̍ā le̍.

²⁸Kɛ̍ ndu̍yɛ̍, wāŋndo̍ chu̍a̍ bɛ̍ɛ̍ la̍nɔ̍ɔ̍ mɛ̄ɛ̍ ō tōsa̍ yɔ᷅ŋ wɔ̄ɔ̍ŋ te̍. Ndu̍yɛ̍, wānā la̍nɔ̍ ye̍mbōo̍ ō chu̍a̍ bɛ̍ɛ̍ pɔ̍nɔ̍ɔ̍, mɛ̄ɛ̍ ō tōsa̍ yɔ᷅ŋ wɔ̄ɔ̍ŋ te̍. Kɛ̍ ndu̍yɛ̍, I̍ hɛ̍na̍ŋ mī sɔ̄ɔ̍ŋ pa̍la᷄ŋ ko̍māl wa̍nāa̍ nɔ̍ lāāndūa̍a̍ kɛ̄lɛ̄ŋgāā pīāāndūa̍a̍ wa̍ wo̍ŋ, nya̍ nya̍ mī ŋ̄ fāŋa̍ŋ nya̍ kūēē.

²⁹Chāāŋāā nīāā wa̍nāā lāāla᷄ŋnda̍, nyɛ̄ ya̍ I̍ cho̍ ho̍ō nya̍ dīmūllo̍ wo̍, tɛ̄ɛ̄sīāā ndɔ̄ɔ̍ cho̍ ni̍ māā te̍le̍ŋndo̍ ō bēndu̍ lɛ̍ le̍. Ndu̍yɛ̍, chɔ̍ŋ ni᷅ŋ a̍ bōōnde̍i̍ he̍ī nya̍ pūa̍a̍ nɔ̍ lāāndūa̍a̍ wa̍, lā wa̍ ni̍ko̍ māā wānāa̍ nɔ̍ ŋ̍la̍a̍ndū le̍.

³⁰Wānāa̍ cho̍ cha᷄ŋndo̍ wa̍, ā wa̍ ni̍ko̍ māā ā cho̍ bɛ̍ɛ̍ a̍ kɔ̄l tāmbɛ̍i̍ le̍. Wānāa̍ cho̍ māmɔ̄ɔ̍ wa̍, ā wa̍ ni̍ko̍ māā ā cho̍ bɛ̍ɛ̍ a̍ kɔ̄l kɛ̄ndɛ̄ le̍. Wānāa̍ cho̍ nyɔ̄ɔ̍ŋ pīīndūūwo̍ wa̍, ā wa̍ ni̍ko̍ māā ō cho̍ bɛ̍ɛ̍ nda̍ le̍ nɔ̍ nyɛ̄m nda̍ chō pīōndɔ̄ɔ̍ wo̍ŋ te̍.

³¹Wānāa̍ cho̍ yākōle̍ŋ o̍ chi̍e̍ēŋndo̍ ho̍ō chōo̍ wa̍, lā wa̍ ni̍ko̍ māā lā cho̍ bɛ̍ɛ̍ a̍ tu̍a̍nda᷄ŋ a̍ la̍ŋ te̍. Kāni̍ fo̍ndōle̍, chi̍e̍ēŋndo̍ ho̍ō mɛ̄ɛ̍ nya̍ chā ndu̍ nu̍a̍ā yɛ̄, ō vi̍ū lɛ̍ ni̍ŋ ta̍u̍ le̍.

³²I̍ hɛ̍na̍ŋ mī lā nɔ̄ būūla᷄ŋ o̍ būūla᷄ŋ le̍ nyɛ̄ o̍ nyɛ̄ le̍. Mī di̍mu̍l nya̍, wāna̍ nɔ̍ ho̍ō la̍nɔ̍ le̍ wo̍, ndu̍ ndu̍ a̍ wa̍li̍ Māsānɔ̄ɔ̍ Mɛ̄lɛ̄ka̍a̍ o̍ bu̍u̍lāŋ ni̍. Kāni̍ fu̍u̍le̍, le̍ Māsānɔ̄ɔ̍ Mɛ̄lɛ̄ka̍ kɔ̄llo̍ nɛ̄ŋīo̍o̍ o̍ ki̍ndī ni̍.

³³Kɛ̍, wāna̍ nɔ᷅ ho̍ō la̍nɔ̍ɔ̍ wo̍, a̍ sɔ̄ɔ̍ŋ chi̍e̍ēŋndo̍ŋ o̍ bu̍u̍lāŋ ni̍. Kāni̍ fo̍ndōle̍, le̍ la̍a̍ ndɔ̍ kɔ̄llo̍ nɛ̄ŋīo̍o̍ o̍ ki̍ndī ni̍.

³⁴O̍ ko̍ŋ, ō tūānda᷄ŋndo̍ wāna̍ nɔ̍ la̍nɔ̍ɔ̍ wo̍ ō wā ni̍. Kɛ̍, wānā la̍nɔ̍ nɔ̍ pɔ̍nɔ̍ le̍ wo̍, kɛ̄lɛ̄ŋgāā yūfu̍a̍a̍nɔ̍ɔ̍, ndu̍ ndu̍, a̍ wa̍li̍ Māsānɔ̄ɔ̍ Mɛ̄lɛ̄ka̍a̍ o̍ bu̍u̍lāŋ ni̍. Kāni̍ fo̍ndōle̍, ō hɛ̄nāŋ nyi̍nā ndɔ̄ɔ̍ ni̍, dīāllūŋ ndɔ᷄ŋ ni̍, mī ŋ̄ wa̍ ŋ̄ yɔ̄ŋga᷄ŋ o̍ Mɛ̄lɛ̄ka̍ lo̍. Kɛ̍ wāna̍ nɔ̍ pɔ̍nɔ̍ɔ̍ wo̍ ndu̍ ndu̍, a̍ sɔ̄ɔ̍ŋ chi̍e̍ēŋndo̍ŋ o̍ bu̍u̍lāŋ ni̍. Kāni̍ fu̍u̍le̍, le̍ pɔ̍nɔ̍ ndɔ̍ kɔ̄llo̍ nɛ̄ŋīo̍o̍ o̍ ki̍ndī ni̍.

³⁵Le̍ sa̍bū ya̍ I̍ cho̍ nya̍ sɔ̄ɔ̍ŋ mu᷅ŋ dīmūllo̍ wo̍ cho̍ ni̍, māā, mālāa̍ ya̍ I̍ hɛ̍na̍ŋ mī I̍ ma̍la̍ nya̍ ni̍. Ō cho̍ mī I̍ wa̍ nya̍ lāsāwā do̍ū le̍. I̍ ye̍e̍ma̍ māyēēmāā nya̍ mī lā tōsa̍ nyɛ̍ cho̍ sa̍kpō ndu̍yɛ̍, mbo̍ bɛ̄ndā le̍ tōsāa̍ wo̍. Ndu̍yɛ̍, I̍ ye̍e̍ma̍ mī lā yɔ̄ŋgu̍ŋ kpo̍u̍ o̍ wa̍li̍ Māsānɔ̄ɔ̍ Mɛ̄lɛ̄ka̍a̍ ni᷄ŋ ndu̍ pīlɛ̍ kpe̍.

³⁶Wānā la̍a̍la᷄ŋndo̍ o̍ nɔ̍ wānā la̍nɔ̍ o̍ dɔ̍ū ni᷅ŋ fu̍lu̍ le̍ mā cha᷄l nda̍ ndu̍ wo̍, kɛ̍ ndu̍yɛ̍, ma̍ kɛ̄ɛ̄si̍a̍a̍ le̍ mā wānu̍ŋ le̍nde̍, dɛ̍nɛ̍ ke̍e̍kū nda̍ tɛ̄ɛ̄ŋ te̍ wo̍, sīlāa̍ o̍ ndɔ̍ɔ̍ cho̍ ho̍ō ni̍. Ndu̍ po̍ ko̍ŋ mbō nɔ̄ dɔ̍ɔ̍ o̍ kɔ̄l māā, kɛ̄sī kōŋ chūā kōŋ le̍nde̍ māā ō cho̍ su̍ɛ̍i̍ kɛ̍ndɛ̄ le̍ o̍ wa᷅ ke̍ŋ to̍sā a̍ chūa̍a̍ le̍. Tē ī wa̍ le̍nde̍ pɛ̍, ndu̍yɛ̍, mī yēēmɛ̍i̍ ke̍ŋ ī wa̍ nda̍ o̍ lākɔ̄l pɛ̍, mɛ̄ɛ̍ ī kɔ̍ o̍ bā kōŋ chōo̍. Mɛ̄ɛ̍ pōo̍ ō tōsa̍ nyɛ̍ cho̍ ndu̍ o̍ kɔ̄l lo̍. Ko̍ŋ ve᷅ yɔ᷅ŋ wɔ̄ɔ̍ŋ te̍. Mɛ̄ɛ̍ ā bɔ̄ŋa̍ nda̍ nɔ̄ɔ̍ tɛ̄ɛ̄ŋ māā pɔ̍nɔ̍ a̍ la̍nɔ̍.

³⁷Kɛ̍ ndu̍yɛ̍, tē ō wa̍ pɛ̍ mī wāŋndo̍ pi̍la̍ o̍ kɛ̍ɛ̍si̍a̍ŋ o̍ kɔ̄l nyɛ̄ kɛ̄ndɛ̍ī, ndu̍yɛ̍, mbō ve̍ yɛ̍ wānā le̍ ba̍ŋ ndu̍ le̍, mbō dīmi̍ māā ō cho̍ la̍nɔ̍ chu̍ā le̍ pɛ̍, o̍ ko̍ŋ kɔ̍ɔ̍lī, mbō tīu̍ kɔ̄l ndɔ̄ɔ̍ bā nyɛ̄ kɛ̄ndɛ̍ī, mbō dīmi̍ āā, “He̍ī ya̍ I̍ cho̍ to̍sā ni̍,” pɛ̍, mɛ̄ɛ̍ ō chāa̍ ta̍u̍ le̍ wānɔ᷄ŋndo̍ le̍nde̍ ō chu̍ē la̍nɔ̍ le̍.

³⁸Le̍la̍ŋ, wānā pɔ̍nɔ̍ bɔ̍ŋā ho̍ō nɔ̄ɔ̍ nda̍ wānā la̍nɔ̍ o̍ dɔ̍ū ko̍ŋ fu̍lo̍o̍ wo̍, ō chāa̍ ta̍u̍. Kɛ̍ ndu̍yɛ̍, wānā pɔ̍nɔ̍ wa̍nūŋ ho̍ō nda̍ wānā la̍nɔ̍ o̍ dɔ̍ū ko̍ŋ fu̍lo̍o̍, kɛ̍ dɛ̍nɛ̍ o̍ dɛ̍nɛ̍ ke̍e̍kū nda̍ tɛ̄ɛ̄ŋ te̍ wo̍, mɛ̄ɛ̍ ndu̍ hi̍o̍ū chāā.

³⁹Ndu̍yɛ̍, wānā la̍nɔ̍ cho̍ ho̍ō o̍ nɔ̄ɔ̍ wo̍, tē pɔ̍nɔ̍ ndɔ̄ cho̍ wɔ̄ īchāli̍ pɛ̍, ō cho̍ a̍ bā ndɔ̄ le̍. Kɛ̍, tē pɔ̍nɔ̍ɔ̍ vī pɛ̍, mɛ̄ɛ̍ ō chō ni᷅ŋ a̍ bā ndɔ̄. Ō nɔ̄lā mbō chu̍a̍ wānā pɔ̍nɔ̍ o̍ ye̍e̍mā le̍ chūa̍a̍ wo̍. Kɛ̍ ndu̍yɛ̍, mɛ̄ɛ̍ mī wānā pɔ̍nɔ̍ ko̍ŋ ō wa̍ wānā la̍a̍la᷄ŋndo̍.

⁴⁰Ndu̍yɛ̍, wānā la̍nɔ̍ pɔ̍nɔ̍ ndɔ̄ wu᷅ ko̍ŋ ndo̍, tē ō wānu̍ŋ le̍nde̍ pɛ̍ mbō chu̍e̍ lɛ̍ pɔ̍nɔ̍ che᷅le̍ŋ te̍, le̍nde̍ o̍ hi̍a̍ū wa᷅ a̍ kɔ̄l kɛ̄ndɛ̄. Nyɛ̄ ya̍ ya̍ I̍ yi̍ya̍ŋ ndo̍ ndu̍ cho̍ ho̍ō ni̍, ndu̍yɛ̍, I̍ nɔ̍ o̍ kɔ̄l māā ya̍ bɛ̍ɛ̍ Nyi̍na̍ Kāsi̍ Mɛ̄lɛ̄ka̍a̍ chō ya̍ kɔ̄ɔ̄lī.