Read Southern Kisi Kɔ̄li̍ŋtīāŋ Tāso̍o̍ 8 Bible Online

Kɔ̄li̍ŋtīāŋ Tāso̍o̍ 8 - Southern Kisi bible

Kɔ̄li̍ŋtīāŋ Tāso̍o̍ 8

¹Mi̍ lā nyūnā ya̍ o̍ yāu̍wo̍ ni᷄ŋ a̍ nyɛ̄m wāŋnda̍ chu̍a̍ māā Mɛ̄lɛ̄ka̍ā ndā mā sōōlūū mu̍ŋ ndo̍ŋ, māā tē ō bɛ̄ndā mī lā dē nyɛ̄ dīāā nda̍ kē nyɛ᷅m mu᷅ŋ ndo̍ pɛ̍. Nyūnā kōŋ mūlī ndɔ̄ɔ̍ cho̍ ho̍ō ni̍. Ī chō tōnya̍ māā, “Na̍a̍ kpo̍u̍ ŋ̄ sīnā dɛ̍nɛ̍.” Kāni̍, tāle̍ ko᷄ŋ cho̍ wāŋnda̍ o̍ sōndō ni̍. Kɛ̍ ndu̍yɛ̍, nyɛ̄ sīnāā wāā le̍nde̍ ō tōsā mī wāŋndo̍ pɛ̄ a̍ yōŋgāa̍. Kɛ̍ kāālāa̍ ndu̍ ndu̍, si̍i̍ŋgūūwo̍ o̍ si̍i̍ŋgūū wāŋndo̍, wāna̍ ka̍ā kɛ̄ndɛ̄ ni̍.

²Wāna̍ nɔ᷅ ho̍ō o̍ kɔ̄l māā ō sīnā nyɛ᷅ wo̍, wānā wa̍ā le̍nde̍ nyɛ̄ kpe̍e̍kpe̍i̍ o̍ nɔ̍ bɛ̍ɛ̍ le̍ sīnāa̍ wo̍, ō si̍nā ndu̍ le̍.

³Kɛ̍ ndu̍yɛ̍, wānā o̍ wāna̍ ka̍a̍la̍ Mɛ̄lɛ̄ka̍, wānā ko̍ŋ Mɛ̄lɛ̄ka̍ sīnā ndu̍.

⁴I̍ chɔ᷅m ndɔ̍ ni̍ko̍ nya̍ a̍ nyūnā kālāa̍ o̍kɔ̄ɔ̄, māā, tē ō bɛ̄ndā pɛ̍ mī lā dē nyɛ̄ dīāā wāŋnda̍ kē nyɛ᷅m nda̍ sōōlūū wo̍ŋ ndo̍. Na̍a̍ na̍a̍ ŋ̄ sīnā māā nyɛ̄m wāŋnda̍ chu̍a̍ mu̍ŋ māā mɛ̄lɛ̄ka̍ā mā sōōlūū mu̍ŋ ndo̍ŋ, māā ŋ̄ cho̍ nyɛ᷅ o̍ nyɛ̄ o̍ chi̍e̍ēŋndo̍ ho̍ō chōo̍ le̍. Na̍a̍ ŋ̄ sīnā māā Mɛ̄lɛ̄ka̍ ō pīlɛ̍ kpe̍ o̍ cho̍ ni̍.

⁵Ā yɔ᷄ŋ bɛ̍ɛ̍ mā dīmi̍ māā nyɛ̄m wāā le̍nde̍ ŋ̍ cho̍ chōo̍ cho̍o̍ a̍ lɛ̄ŋ na̍nu᷄ŋ, ndu̍yɛ̍ mī wāŋnda̍ ā chu̍a̍ mu̍ŋ māā mɛ̄lɛ̄ka̍ā ndā, ndu̍yɛ̍ māā lēkɛ̍ndɛ̄, mɛ̄lɛ̄ka̍ā kāŋ ā chō ta̍u̍ mi̍ ma̍sāā kāŋ ā wā ta̍u̍.

⁶Kɛ̍ ndu̍yɛ̍, na̍a̍ na̍a̍ ŋ̄ sīnā māā Mɛ̄lɛ̄ka̍ ō pīlɛ̍ o̍ cho̍ ni̍. Ndu̍ yɔ̍nūŋ māā Mɛ̄lɛ̄ka̍ Fi̍nyāa̍ ni̍. Ndu̍ to̍o̍si̍a̍a̍ nyɛ̄ o̍ nyɛ̄ fe̍e̍ ni̍. Ndu̍yɛ̍, le̍ ndu̍ na̍a̍ ŋ̄ chō yōōmū ni̍. Ndu̍yɛ̍, Māsānɔ̄ɔ̍ ō pīlɛ̍ kpe̍ cho̍ ni̍, ndu̍ yɔ̍nūŋ māā Chi̍i̍sū Ki̍li̍tī ni̍, ō Mɛ̄lɛ̄ka̍ tōōsi̍a̍a̍ nyɛ̄ o̍ nyɛ̄ fe̍e̍ o̍ sa̍bū ndɔ̄ɔ̍ ni᷄ŋ, mi̍ ŋ̄ wā yōōmū o̍ sa̍bū ndɔ̄ɔ̍ ni᷄ŋ ndo̍.

⁷Kɛ̍ ndu̍yɛ̍, ō cho̍ wa᷅ŋnda̍ kpo̍u̍ le̍ a̍ si̍nā he̍ī pɛ̄ŋgu̍ le̍. Wāŋnda̍ ā pūm ā chō nya̍ tɛ̄ɛ̄ŋ nyɛ̄m chēle̍ŋndo̍ŋ nda̍ a̍a̍ so̍o̍lūū ni̍. Pɛ̄ŋgo̍o̍ ho̍ō bɛ̍ɛ̍, wānāā kāŋ ā nɔ̄ o̍ kɔ̄l māā, nyɛ̄ dīāā wāŋnda̍ kē nyɛ᷅m nda̍ sōōlūū wo̍ŋ ndo̍, māā le̍ nyɛ̄m mu᷅ŋ nyɛ̄ dīāā kōŋ ō chō ni̍. Wānāā kāŋ, ā nɔ̍ wɔ̍ kɔ᷅ltā sīmūlāā a̍ ndi̍ o̍kɔ̄ɔ̄ le̍. Le̍ he̍ī, ā nɔ̄ o̍ kɔ̄l māā tē ō wa̍ pɛ̍ mā dē nyɛ̄ dīāā wāā le̍nde̍, mɛ̄ɛ̍ ā sīmnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l.

⁸Nyɛ̄ dīa̍a̍ ndu̍ ndu̍ nɔ̍lā mbō sīīŋgu̍u̍ wāŋndo̍ ō kɛ̄ndɛ̄ Mɛ̄lɛ̄ka̍ o̍ hɔ̄l, mbō hīōū mɛ̄ɛ̍ o̍ wa̍ yɛ̍ le̍. Mī wānā di̍ bɛ̍ɛ̍ nyɛ̍ dīāā nda̍ kē nyɛ᷅m mu᷅ŋ ndo̍ le̍, ko̍ŋ tɛ̍ɛ̍mbūū nya̍ tɛ̄ɛ̄ŋ nya̍ Mɛ̄lɛ̄ka̍ le̍. Wānā di̍o̍ bɛ̍ɛ̍ vɛ̍lɛ̄, ko̍ŋ nɛ̍ŋī nya̍ nɛ̄ŋī chēle̍ŋ tɛ̄ɛ̄ŋ nya̍ Mɛ̄lɛ̄ka̍ le̍.

⁹Kɛ̍ ndu̍yɛ̍, lā mānda̍ŋ, kāni̍ fo̍ndōle̍, yɔ̄ŋi̍ di̍ nya̍ nya̍ nɔ̄ le̍ sɔ̄ɔ̍ŋ tōsāa̍ wo̍, ō tōsa̍ mī chāāŋāā nyāā wa̍nāā lāāla᷄ŋnda̍ a̍ nɔ̍ di̍a̍llūŋ kālā o̍ lāāla᷄ŋ ndāa̍ ni᷄ŋ te̍ wa̍, mā tōsa̍ yɔ̄ŋ wɔ̄ɔ̍ŋndo̍.

¹⁰Kāni̍ fo̍ndōle̍, tē ō wa̍ pɛ̍ mī wānā la̍a̍la᷄ŋndo̍ o̍ nɔ̍ kɔ᷅l sīmūlāā a̍ sūɛ̍i̍ nyɛ̄ dīāā wāā le̍ndo̍o̍ o̍kɔ̄ɔ̄ le̍ wo̍, mbō chē pɛ̍ māā nu᷄m nɔ̍ ho̍ō sīnā pɛ̄ŋgu̍ ko̍ŋ ndo̍ mā wa̍ nyɛ̄ dīa̍a̍ dīo̍o̍ o̍ chīɛ̄ī nda̍ sōōlūū nyɛ᷅m mu᷅ŋ ndo̍ ni᷄ŋ pɛ̍, nāa̍ pu̍m ndu̍ bɛ̍ɛ̍ ō chō kɔ̄l sīmūlāa̍ sɔ̄lā le̍ nyɛ̄ dīāā sa̍lā nda̍ kē ko̍ŋ nyɛ᷅m mu᷅ŋ ndo̍ dīo̍o̍.

¹¹Mɛ̄ɛ̍ o̍ ko̍ŋ, chāa̍ŋ nu᷄m nɔ̍ ko̍ŋ di̍a̍llūŋ kālā le̍ wo̍, ō Ki̍li̍tī vi᷅ ho̍ō le̍ ndu̍ wo̍, mɛ̄ɛ̍ sīnā nūm pɛ̍ŋgu̍ ko̍ŋ chō tōsā mbō wa̍ ō tɛ̄ɛ̄mbāā.

¹²Ndu̍yɛ̍, tē a̍ to̍sa̍ yɔ̄ŋ wɔ̄ɔ̍ŋ wāā nu̍a̍ā a̍ chāāŋāā nūm a̍ lāāla᷄ŋnda̍ a̍ nɔ̍ kpa̍a̍yā o̍ kɔ̄ltā ndāla̍ŋ ni᷄ŋ te̍ wa̍, mā yɔ̍ŋu̍l kɔ̄ltā ndāla̍ŋ le̍nde̍ pɛ̍, mɛ̄ɛ̍ Ki̍li̍tī ŋ̄ tōsa̍l yɔ̄ŋ wɔ̄ɔ̍ŋ kōŋ ni̍.

¹³Le̍ sa̍bū kōŋ, ya̍ Pɔ̍ɔ̄, tē I̍ che᷅ pɛ̍ māā nyɛ̄ dīāā ya̍ I̍ di̍ā wo̍ tōsā mī chāa̍ŋ nī wa̍nā la̍a̍la᷄ŋndo̍ tōsa̍ yɔ̄ŋ wɔ̄ɔ̍ŋndo̍, mɛ̄ɛ̍ I̍ di᷅ nyɛ̍ dīāā wāā le̍nde̍ le̍, yɔ̄ŋi̍ ya̍ I̍ to̍sa̍ mī chāa̍ŋ nī wa̍nā la̍a̍la᷄ŋndo̍ ō tōsa̍ yɔ̄ŋ wɔ̄ɔ̍ŋndo̍.