Read Southern Kisi Kɔ̄li̍ŋtīāŋ Tāso̍o̍ 9 Bible Online

Kɔ̄li̍ŋtīāŋ Tāso̍o̍ 9 - Southern Kisi bible

Kɔ̄li̍ŋtīāŋ Tāso̍o̍ 9

¹Ya̍ ya̍ Pɔ̍ɔ̄, I̍ cho̍ lɛ̍ chɛ̄ yɔ̄ŋ wɔ̄ɔ̍ŋndo̍ o̍ bā bɛ̄ŋgu̍ le̍. Wānā ba̍ŋa᷄ŋndo̍ ya̍ I̍ cho̍ ni̍. Ndu̍yɛ̍, ya̍ bɛ̍ɛ̍ wāna̍ Chi̍i̍sū ve᷅m māā hɔ̄ltē ndɔ̄ wo̍ ya̍ I̍ cho̍ ni̍. Nya̍ pi̍la̍ lā sīnā māā ya̍ bɛ̍ɛ̍ mi̍ cha᷅ Ma̍sānɔ̄ nāa̍ Chi̍i̍sū. Ndu̍yɛ̍, sīmnɔ᷄ŋ nya̍ sīmnu᷄ŋ wa̍nāā lāāla᷄ŋ ndo̍, ndu̍ cho̍ tɔ̄nɔ̍ fu̍la̍ o̍ wa̍li̍ ya̍ I̍ to̍sa̍ le̍ Māsānɔ̄ɔ̍ Mɛ̄lɛ̄ka̍ wo̍ ni᷄ŋ ndo̍ ni̍.

²Ndu̍yɛ̍, mī wāŋnda̍ ā pīli̍a̍ā a̍ chu̍e̍ ya̍ bɛ̍ɛ̍ māā I̍ cho̍ wāna̍ Chi̍i̍sū ve᷅m māā hɔ̄ltē ndɔ̄ le̍, kɛ̍ nya̍ nya̍ lā chu̍a̍ ya̍ māā wāna̍ wa̍ā le̍nde̍ kpe̍e̍kpe̍i̍ ya̍ I̍ cho̍ ni̍. Sīmnɔ᷄ŋ nya̍ sīmnu᷄ŋ wa̍nāā lāāla᷄ŋ o̍ Māsānɔ̄ɔ̍ Mɛ̄lɛ̄ka̍ ni᷄ŋ ndo̍, ko̍ŋ chɔ̍m ni̍ māā wāna̍ Chi̍i̍sū ve᷅m hɔ̄ltē ndɔ̄ wo̍ ya̍ I̍ cho̍ ni̍.

³Tē wāŋnda̍ ā pɛ̄ɛ̄sa̍ ya̍ pɛ̍ māā, I̍ cho̍ wa᷅na̍ Chi̍i̍sū ve᷅m māā hɔ̄ltē ndɔ̄ le̍, nyɛ̄ ya̍ I̍ nɔ̍ mī I̍ kɔ̍ɔ̍sa̍ wo̍, ndu̍ cho̍ ho̍ō ni̍.

⁴Na̍a̍ wānā o̍ wāna̍ Chi̍i̍sū ve᷅m hɔ̄ltē ndɔ̄, ŋ̄ nɔ̄ di̍ mī lā ke̍ na̍a̍ nyɛ̄ dīa̍a̍ le̍ wa̍li̍ na̍a̍ ŋ̄ chō tōsāa̍ wo̍.

⁵Ya̍ bɛ̍ɛ̍, I̍ nɔ̍ di̍ mī ya̍ i̍i̍ to̍sa̍ mɛ̄ɛ̍ wānāā Chi̍i̍sū ve᷅m hɔ̄ltē ndɔ̄ wa̍ ā pīli̍a̍ā, a̍ Ma̍sānɔ̄ɔ̍ pɔ̄mbūāā ndūa̍a̍, a̍ Pītɛ̍, mɛ̄ɛ̍ nda̍ tōsā yɛ̍. I̍ nɔ̍ di̍ mī ya̍ i̍i̍ chu̍a̍ la̍nɔ̍ wa̍nā la̍a̍la᷄ŋndo̍, bā ya̍ i̍i̍ wa᷅ ko̍ kɔ᷅la̍ŋ ya̍ i̍i̍ ku̍ā a̍ ndu̍ kɔ̍ɔ̍lī.

⁶Bāā wānāā Chi̍i̍sū ve᷅m hɔ̄ltē ndɔ̄ wa̍ ki̍nɛ̍i̍, ya̍ ni̍ a̍ Ba̍a̍na̍bāā, mɛ̄ɛ̍ na̍a̍ ko̍ni̍ ŋ̍ nɔ̍ mī ŋ̄ nūūvi̍a̍a̍ nyɛ̄ na̍a̍ ŋ̄ hāu̍ bā le̍ ndu̍ wo̍ ni̍?

⁷So̍vɛ̄i̍nɔ̍ kūɛ̍ɛ̍nɛ̍ wa᷅ yɛ̍ wa̍li̍ lēso̍vɛ̄i̍yo̍ tōsāa̍ mɛ̄ɛ̍ mbō pāāwa̍ le̍ nyɛ̄m o̍ ha̍ū ba̍ wo̍ŋ? Kɛ̄lɛ̄ŋgāā le̍, ɔ̍ɔ̄ wāna̍ cho̍ kpe̍e̍kpe̍i̍ mbō tɔ̄l kpe̍le̍ yɔ̄mīī kūāmāa̍, kɛ̍ ō di᷅ yɔ̍mīī kūāmɛ̄ī kēŋ ī ti᷄ŋ te̍ wo̍? Kɛ̄lɛ̄ŋgāā le̍, ɔ̍ɔ̄ wānā ma̍ndāā lāsāa̍ cho̍ ō nɔ᷅ di̍ mbō ko᷄l mɛ̄ɛ̄mā sāa̍ ndūa̍a̍ le̍ wa̍ŋ?

⁸I̍ cho̍ ko̍ mɛ̍ɛ̍lū o̍ nya̍ tāāmāsi̍la̍ cho̍ a̍ sɔ̄ɔ̍ŋ na̍a̍ ŋ̄ tōsā le̍pa̍a̍ o̍ lēpāa̍ wo̍ŋ chɔ̄mndo̍ le̍. Kāni̍ fo̍ndōle̍, sāwāla̍ Mɛ̄lɛ̄ka̍la̍ŋ bɛ̍ɛ̍ lā dīmi̍ nyɛ̄ pīlɛ̍ kōŋ kpe̍.

⁹Sāwāla̍ Mɛ̄lɛ̄ka̍ ke̍ Mūu̍sē la̍ŋ lā dīmi̍ āā, “Nāu̍ cho̍ nu̍m tɔ̄lɔ̄ɔ̍ nɛ̄īlūl lo̍ wo̍, yi̍ī ndu̍ sōndōo̍ māā yɔ̄ŋi̍ o̍ di̍o̍ tɔ̍lɔ̄ɔ̄ o̍ cho̍ nɛ̄īyo̍ wo̍ o̍ ti̍ŋ te̍.” Dīōm Mɛ̄lɛ̄ka̍ dīmi̍ ko̍ŋ ndo̍, bāā le̍ būūla᷄ŋ nāūwo̍ kpo̍so̍ŋ o̍ di̍mi̍ ndu̍ ni̍?

¹⁰Ō cho̍ a̍ nāū o̍kɔ̄ɔ̄ le̍ o̍ di̍mi̍ dīōm kōŋ te̍? A̍ na̍a̍ wāŋndā chīe̍e̍ya̍ o̍kɔ̄ɔ̄ kpe̍e̍kpe̍i̍ o̍ di̍mi̍ ndu̍ ni̍. Wānāa̍ to̍sā wa̍llo̍ o̍ chīɛ̍i̍ ni᷄ŋ nda̍, wāna̍ wa̍ā wo̍ ni̍, wāna̍ ku̍a̍ū wo̍ ni̍, ā wa̍ wa̍llo̍ pɛ̍, ā nɔ̄ ti̍i̍nda᷄ŋ ko̍ŋ māā nda̍ bɛ̍ɛ̍ ā chō hūnɔ̄ɔ̄ tɔ̄lɔ̄ɔ̄ kōŋ sɔ̄lā ō ti᷄ŋ.

¹¹Ndu̍yɛ̍, mɛ̄ɛ̍ wāŋndo̍ ō sāŋ nu̍a̍ā yɛ̍i̍ye̍ o̍ chīɛ̍i̍ ni᷄ŋ yɛ̍, le̍nde̍ na̍a̍ ŋ̄ sa᷄ŋ dīo̍m Mɛ̄lɛ̄ka̍a̍ nya̍ tɛ̄ɛ̄ŋ ni̍. Bāā na̍a̍ na̍a̍ yɛ̄? Bāā ō ve᷅ le̍tu̍u̍ mī ŋ̄ sɔ̄la̍ tɔ̄nɔ̄ɔ̍ o̍ nya̍ ni̍ŋ te̍?

¹²Nāa̍ wāŋnda̍ ā pīli̍a̍ā ā nɔ̄ wɔ̄ di̍o̍o̍ le̍ mī lā ke̍ nda̍ nyɛ̄m nda̍ hāū ba̍ le̍ mu̍ŋ ndo̍ŋ, bāā na̍a̍ yɛ̄? Na̍a̍ bɛ̍ɛ̍ ŋ̍ hi̍o̍ū di̍ ko̍ŋ nɔ̄. Mi̍ chē bɛ̍ɛ̍ mi̍ ŋ̄ nɔ̄ di̍ ko̍ŋ, kɛ̍ o̍ ko̍ŋ ni̍ŋ kpo̍u̍, ŋ̄ nyūna̍ nya̍ le̍ mu̍ŋ te̍. Mi̍ ŋ̄ lō o̍ ko̍ŋ mi̍ ŋ̄ bīūnu̍ŋ nyɛ᷅ o̍ nyɛ̄ pālāā. Kāni̍ fu̍u̍le̍, na̍a̍ ŋ̍ hɛ̍na̍ŋ mī ŋ̄ tōsa̍ īsɔ̄ɔ̍ mī yōōŋgū kɛ̄ndɔ̄ɔ̍ a̍ Ki̍li̍tī o̍kɔ̄ɔ̄ mbō dɔ̄ɔ̍ŋ ta̍ma̍la̍ a̍ hīōūwɔ̄ɔ̍ lāchī le̍.

¹³Nya̍ pi̍la̍ bɛ̍ɛ̍, lā sīnā māā wānāa̍ to̍sā wa̍llo̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍, o̍ chīɛ̍i̍ Mɛ̄lɛ̄ka̍a̍ ni᷄ŋ nda̍ sɔ̄lā nyɛ̍ dīa̍a̍ ni̍. Le̍nde̍ ko̍ni̍, wānāa̍ lu̍ām sa̍lāa̍ o̍ ma̍āŋ Mɛ̄lɛ̄ka̍a̍ chōo̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍ bɛ̍ɛ̍, o̍ nyɛ̄ dīāā sa̍lā kōŋ ni᷄ŋ nda̍ sɔ̄lā nyɛ̍ dīa̍a̍ ni̍.

¹⁴Le̍nde̍ ko̍ni̍ Māsānɔ̄ɔ̍ Mɛ̄lɛ̄ka̍ bɛ̍ɛ̍ o̍ pɛ̍ɛ̍ku̍ ni̍ māā, wānāa̍ di̍mūl wa᷅ŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ wa̍ māā, o̍ yōōŋgū kōŋ ni᷄ŋ nda̍ nɔ̄ ni̍ mā sɔ̄la̍ nyɛ̄ nda̍ hāu̍ bā le̍ ndu̍ wo̍.

¹⁵Ndu̍yɛ̍, mi̍ chē bɛ̍ɛ̍ mi̍ I̍ nɔ᷅ di̍o̍o̍ le̍ mī ya̍ i̍i̍ nyu̍na̍ le̍ nyɔ̄ɔ̍ŋ mu᷅ŋ, kɛ̍ ndu̍yɛ̍, lē pīlɛ̍ bɛ̍ɛ̍ I̍ nyu̍na̍ wa̍nā o̍ wānā le̍ mbō ke̍ ya̍ nyɛ̄ o̍ nyɛ̄ le̍. Ndu̍yɛ̍, ō cho̍ mī I̍ wa̍ nya̍ dīōmnda̍ŋ nda᷅ŋ pōōnyīāl le̍ hāli̍ kpe̍ŋ māā, lā ke̍ ya̍ nyɛ̄m ya̍ I̍ nɔ̍ mu̍ŋ di̍o̍o̍ le̍ mu̍ŋ sɔ̄lāa̍ nya̍ o̍ bā wo̍ŋ te̍. Yɔ̄ŋi̍ bɛ̍ɛ̍ ya̍ nyu̍na̍ le̍ mu̍ŋ yɛ̍, ō bɛ̄ndā bɛ̍ɛ̍ mī I̍ vi᷅. I̍ cho̍ chɛ̍lɔ̄ɔ̄ kpo̍so̍ŋ di̍ ya̍ I̍ nɔ̍ le̍ mī I̍ pɛ̍ɛ̍lu̍ŋ o̍ sūɛ̍i̍ he̍ī ni᷄ŋ ndo̍, mī wānā tɛ̍ɛ̍mbu̍u̍ ya̍ di̍ ko̍ŋ o̍ bā le̍.

¹⁶I̍ nɔ̍ di̍ kpo̍so̍ŋ mī I̍ pɛ̍ɛ̍lu̍ŋ le̍ mɛ̄ɛ̍ ya̍ I̍ cho̍ ni᷅ŋ Yōōŋgū Kɛ̄ndɛ̍ Mɛ̄lɛ̄ka̍a̍ dīmīo̍o̍ yɛ̍ le̍. Kāni̍ fo̍ndōle̍, wa̍li̍ cho̍ ya̍ kūēē le̍ tōsāa̍ wo̍ cho̍ ko̍ŋ ni̍. Tē ō lo̍ o̍ ko̍ŋ pɛ̍ mī I̍ di̍mu̍l wa᷅ŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ ho̍ō le̍, ō wā su̍ɛ̍i̍ nyɛ̄ nɛ̄īyāā le̍ ya̍.

¹⁷Tē ndu̍ o̍o̍ wa̍ pɛ̍ māā, wa̍li̍ ya̍ I̍ cho̍ ho̍ō tōsāa̍ wo̍ māā, ya̍ pi̍la̍ kɛ̍ɛ̍si̍a̍a̍ a̍ kɔ̄l le̍ mī I̍ to̍sa̍ ndu̍ ni̍, mɛ̄ɛ̍ ya̍ i̍i̍ nyu̍nā māā ā pāāwa̍ ya̍ le̍ ndu̍. Kɛ̍, I̍ cho̍ māchūāā ndu̍ tōsāa̍, kāni̍ fo̍ndōle̍ māā kūēē kpe̍e̍kpe̍i̍ i̍ cho̍ ya̍ le̍ ndu̍ tōsāa̍ ni̍. Kāni̍ fo̍ndōle̍, Mɛ̄lɛ̄ka̍ pi̍la̍ ndu̍ yɔ̍ŋgu̍ ya̍ wa̍llo̍ ho̍ō le̍ tōsāa̍ ni̍.

¹⁸Pāāwā ya̍ I̍ sɔ̍lā le̍ wa̍llo̍ ho̍ō tōsāa̍ wo̍, ndu̍ cho̍ ni̍ māā le̍ fo̍ndāa̍ sɔ̄lāa̍ mī di̍mu̍l wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍, I̍ bi̍ī pa̍a̍wā le̍. Māā di̍ ya̍ I̍ nɔ̍ le̍ mā ke̍ ya̍ nyɛ̄m ya̍ I̍ ha̍ū ba̍ wo̍ŋ, le̍ Yōōŋgū Kɛ̄ndɛ̍ Mɛ̄lɛ̄ka̍ ya̍ I̍ di̍mūl wa᷅ŋnda̍ wo̍, mī I̍ ma̍l di̍ ko̍ŋ. I̍ nyu̍nā le̍ mu̍ŋ te̍.

¹⁹Ya̍ Pɔ̍ɔ̄, ō bāŋa᷄ŋndo̍ ya̍ I̍ cho̍ ni̍. I̍ cho̍ o̍ lēchɛ̄ ni᷄ŋ wa̍nā o̍ bā bɛ̄ŋgu̍ le̍. Kɛ̍, ī chō bɛ̍ɛ̍ le̍nde̍ ni̍, kɛ̍ ya̍ pi̍la̍ I̍ si̍i̍ŋgu̍u̍ ya̍ pi̍la̍ chīɔ̍ɔ̍, le̍ wānā o̍ wānā fe̍e̍ le̍ hāli̍ kpe̍ŋ mī mu̍li̍ wāŋnda̍ ta̍u̍ mā lāāla̍ŋ a̍ Chi̍i̍sū.

²⁰Ndu̍yɛ̍, tē I̍ wa̍ wa̍llo̍ Chu̍ūwa̍ tɛ̄ɛ̄ŋ pɛ̍, I̍ si̍mnu᷄ŋ māā Chu̍ūnɔ̄ le̍ hāli̍ kpe̍ŋ mī I̍ mu̍li̍ Chu̍ūwa̍ mā lāāla̍ŋ a̍ Chi̍i̍sū. Mi̍ chē bɛ̍ɛ̍ I̍ cho̍ o̍ sāwāla̍ Mūu̍sēla̍ŋ bɛ̄ŋgu̍ le̍, kɛ̍ ndu̍yɛ̍, tē I̍ wa̍ wa̍llo̍ wānāa̍ cho̍ o̍ sāwāla̍ Mūu̍sēla̍ŋ bɛ̄ŋgu̍ wa̍ tɛ̄ɛ̄ŋ pɛ̍, I̍ si̍mnu᷄ŋ mɛ̄ɛ̍ wānāa̍ cho̍ o̍ sāwāla̍ la̍ŋ bɛ̄ŋgu̍ wa̍ ā chō yɛ̍, le̍ hāli̍ kpe̍ŋ mī I̍ mu̍li̍ nda̍ mā lāāla̍ŋ a̍ Chi̍i̍sū.

²¹Mi̍ chē bɛ̍ɛ̍ mī chu̍ā sa᷅wa̍ Mɛ̄lɛ̄ka̍a̍ le̍ mɛ̄ɛ̍ ya̍ I̍ cho̍ o̍ sāwa̍ Ki̍li̍tīo̍o̍ bɛ̄ŋgu̍ yɛ̍, kɛ̍ tē I̍ wa̍ wa̍llo̍ wānāa̍ chu̍ē sa̍wāla̍ Mūu̍sēla̍ŋ te̍ wa̍ tɛ̄ɛ̄ŋ pɛ̍, I̍ si̍mnu᷄ŋ māā wāna̍ chu̍ē sa̍wāla̍ Mūu̍sēla̍ŋ te̍ wo̍, hāli̍ kpe̍ŋ mī I̍ mu̍li̍ nda̍ mā lāāla̍ŋ a̍ Chi̍i̍sū.

²²Tē I̍ wa̍ wa̍llo̍ wānāa̍ nɔ̍ di̍a̍llūŋ kālā o̍ lāāla᷄ŋ ndāa̍ ni᷄ŋ te̍ wa̍ tɛ̄ɛ̄ŋ pɛ̍, I̍ si̍mnu᷄ŋ māā wāna̍ nɔ̍ di̍a̍llūŋ kālā o̍ lāāla᷄ŋ ndɔ̄ɔ̍ ni᷄ŋ te̍ wo̍, le̍ hāli̍ kpe̍ŋ mī I̍ mu̍li̍ nda̍ mā lāāla̍ŋ a̍ Chi̍i̍sū. Ndu̍ yɔ̍nūŋ ni̍ māā I̍ kɛ̍ɛ̍si̍a̍a̍ le̍ mī I̍ si̍mnu᷄ŋ mɛ̄ɛ̍ wānā o̍ wānā cho̍ yɛ̍, mɛ̄ɛ̍ o̍ mɛ̄ɛ̍ nda̍ wa̍, le̍ hāli̍ kpe̍ŋ mī I̍ ki̍ndi̍ o̍ nɛ̄ī o̍ nɛ̄ī ni̍ŋ, ā yɔ᷄ŋ bɛ̍ɛ̍ āā a̍ ti̍ŋ ni̍ mī I̍ pi̍ŋi̍ nda̍.

²³Mu᷅ŋ kpo̍u̍, I̍ cho̍ māchūāā mu̍ŋ tōsāa̍ le̍ Yōōŋgū Kɛ̄ndɛ̍ Mɛ̄lɛ̄ka̍a̍ hīvīo̍o̍ lāchī, le̍ hāli̍ kpe̍ŋ ya̍ bɛ̍ɛ̍ mī hu̍ŋ sɔ̍lā sa̍la̍ cho̍ o̍ yōōŋgū kālāa̍ ni᷄ŋ ndo̍.

²⁴Tē ō wa̍ pɛ̍ mā sīmi̍ wāŋnda̍ le̍ nyāānɔ᷄ŋ lābɛ̄ɛ̄la̍a̍, nya̍ kpo̍u̍ lā sīnā māā mī wāŋnda̍ sɔ̄ɔ̄ŋgu̍u̍ ta̍u̍ le̍ nyāānɔ᷄ŋ ka̍lāa̍. Kɛ̍ ndu̍yɛ̍, ā wa̍ bɛ̍ɛ̍ le̍nde̍ fa̍ŋgā wāna̍ fu̍u̍lūū ta̍se̍ wo̍, ndu̍ pīlɛ̍ kpe̍ sɔ̍lā fa̍ndā nda̍ kɛ̄sī ko̍ŋ le̍ wāna̍ tāso̍o̍ kīo̍o̍ wo̍ ni̍. Le̍la̍ŋ, lā nyāānu̍ŋ kpe̍e̍kpe̍i̍ le̍ mī lā hu᷄ŋ sɔ̍lā nyɛ̄ kɛ̄ndɛ̍ cho̍ ko̍ŋ o̍ kɛ̍sīāā wo̍.

²⁵Wānā o̍ wāna̍ cho̍ wānā nya̍a̍na᷄ŋ wa̍ā le̍nde̍, yɔ̄ŋgɔ᷄ŋndo̍ o̍ yɔ̍ŋgūŋ kpo̍u̍ o̍ pɛ̄ɛ̄kū kālā ka̍lāa̍ chūa̍a̍ ni᷄ŋ ni̍, le̍ hāli̍ kpe̍ŋ mbō sɔ̄la̍ fānda̍ cho̍ le̍ wāna̍ tāso̍o̍ wo̍. Mā chē nyɛ̄ nda̍ kē nda̍ ko̍ŋ ndo̍, ō cho̍ nyɛ̍ cho̍ le̍ fɛ̍ɛ̍ŋ a̍ fɛ̍ɛ̍ŋ te̍. Ndu̍ yɔ̍nūŋ māā īsɔ̄ɔ̍ ni̍. Kɛ̍, na̍a̍ na̍a̍, yɔ̄ŋgɔ᷄ŋ na̍a̍ ŋ̄ yɔ̄ŋgūŋ kpo̍u̍ o̍ pɛ̄ɛ̄kū kālā ka̍lāa̍ ni᷄ŋ ndo̍ chō māchūāā, le̍ mī ŋ̄ hu᷄ŋ sɔ̍lā nyɛ̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍.

²⁶Le̍ he̍ī, I̍ cho̍ nyāānɔ᷄ŋndo̍ ho̍ō a̍ hɔ̄lte̍ŋ ya̍ lāchī sa̍kpō o̍ nāa̍ na̍a̍ ŋ̄ nɔ̄ le̍ mɛ̄ɛ̄lōo̍ wa̍. Le̍nde̍ ko̍ni̍ wāna̍ sɔ̍ŋgā ho̍ō sɔ̍ŋgɔ̄ lābɔ̄ta̍a̍ le̍ bɛ̄ɛ̄la̍la̍ŋ ndo̍, ō chɛ᷅l mbō wūu̍ bɔ̄ta̍ fo̍ndōo̍ le̍. Mɛ̄ɛ̍ le̍nde̍ ya̍ I̍ cho̍ ni̍.

²⁷I̍ cho̍ dīāllūŋ nu᷄ŋ dɔ̄wɔ̄ɔ̄ o̍ pɛ̄ɛ̄kū kālā ka̍lāa̍ bɛ̄ŋgu̍, ndu̍yɛ̍ mī I̍ nɔ̍ mu̍ŋ kpāāyāa̍ chōo̍ le̍ yɔ̄ŋi̍ o̍ lo̍ o̍ ko̍ŋ, ya̍ cho̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ wo̍, mī ya̍ pi̍la̍ I̍ si̍mnu̍ŋ wa̍nā so̍līāā īkɛ̄i̍.