Read Southern Kisi Kɔ̄li̍ŋtīāŋ Di̍i̍ŋ Ndɔ̄ɔ̍ 1 Bible Online

Kɔ̄li̍ŋtīāŋ Di̍i̍ŋ Ndɔ̄ɔ̍ 1 - Southern Kisi bible

Kɔ̄li̍ŋtīāŋ Di̍i̍ŋ Ndɔ̄ɔ̍ 1

¹Ya̍ Pɔ̍ɔ̄, ya̍ cho̍ ho̍ō wāna̍ Chi̍i̍sū Ki̍li̍tī ve᷅m māā hɔ̄ltē ndɔ̄ o̍ hɛ̄na᷄ŋ Mɛ̄lɛ̄ka̍a̍ ni᷄ŋ ndo̍, ya̍ cho̍ yāu̍wo̍ ho̍ō pōōnyīa̍a̍ ni̍, na̍a̍ chāa̍ŋ nāā wa̍nā la̍a̍la᷄ŋndo̍ Ti̍mo̍tī. Ŋ̄ chō yāu̍wo̍ ho̍ō pōōnyīa̍a̍ nāa̍ nya̍ ku̍ndā wānāā lāāla᷄ŋa̍a̍ Mɛ̄lɛ̄ka̍a̍ chūā Kɔ̍līŋ chi̍e̍e̍ a̍ wānāa̍ Mɛ̄lɛ̄ka̍a̍ kpo̍u̍ a̍ cho̍ bā o̍ bā fe̍e̍ o̍ lɛ̄ŋndē Āke̍yāle̍ŋ ni᷄ŋ nda̍.

²I̍ cho̍ pīɛ̄īle̍ŋ māā Mɛ̄lɛ̄ka̍ Fi̍nyā nāa̍ a̍ Ma̍sānɔ̄ɔ̍ Chi̍i̍sū Ki̍li̍tī māā ā yīya̍ŋ nya̍ chōo̍, ndu̍yɛ̍, mā ke̍ nya̍ kɔ̄l nyūlōo̍ fɔ̍.

³Lā ŋ̄ mēlnu᷅ŋ Mɛ̄lɛ̄ka̍ ba̍li̍ka̍, o̍ cho̍ fi̍nyāa̍ le̍ Māsānɔ̍ nāa̍ Chi̍i̍sū Ki̍li̍tī wo̍. Ndu̍ cho̍ fi̍nyā nāa̍ o̍ tu̍i̍i̍nūŋ na̍a̍ īnyīɛ̍ɛ̍ wo̍ ni̍. O̍ ko̍ŋ kɔ̍ɔ̍lī, ndu̍ cho̍ Mɛ̄lɛ̄ka̍ o̍ nyɔ̍ɔ̍lū na̍a̍ kɔ̄lta̍ŋ ni᷄ŋ ndo̍ ni̍.

⁴Ndu̍ nyɔ̍ɔ̍lū na̍a̍ kɔ̄lta̍ŋ ni᷄ŋ o̍ dɛ̍nɛ̍ o̍ dɛ̍nɛ̍ pa̍lāā ni᷄ŋ ni̍. Ō tōsa̍ he̍ī le̍ hāli̍ kpe̍ŋ na̍a̍ bɛ̍ɛ̍ mī ŋ̄ nɔ̄la̍ mī ŋ̄ nyɔ̄ɔ̄lu̍ wāŋnda̍ kɔ̄lta̍ŋ ni᷄ŋ o̍ dɛ̍nɛ̍ o̍ dɛ̍nɛ̍ pa̍lāā ni᷄ŋ. Dīōmndā Mɛ̄lɛ̄ka̍ nyɔ̄ɔ̄lu̍ na̍a̍ kɔ̄lta̍ŋ ni᷄ŋ a̍ la̍ŋ nda̍ŋ na̍a̍ bɛ̍ɛ̍ mī ŋ̄ nyɔ̄ɔ̄lu̍ nda̍ kɔ̄lta̍ŋ ni᷄ŋ a̍ la̍ŋ.

⁵Mɛ̄ɛ̍ sɔ̄ɔ̍ŋ nyɛ̄ pāla᷄ŋ ŋ̄ kēēku̍ Ki̍li̍ti̍ chōo̍ ta̍u̍ ta̍u̍ yɛ̍, le̍nde̍ na̍a̍ bɛ̍ɛ̍ sɔ̄ɔ̍ŋ nyɛ̄ pāla᷄ŋ ŋ̄ kēēkū na̍a̍ chōo̍ ta̍u̍ ta̍u̍ ni̍. Ndu̍yɛ̍, le̍nde̍ ko̍ni̍, mɛ̄ɛ̍ na̍a̍ ŋ̄ chō o̍ dīōm pīlɔ̍ɔ̍ ni᷄ŋ a̍ Ki̍li̍tī yɛ̍, Mɛ̄lɛ̄ka̍ chō na̍a̍ nyɔ̄ɔ̄lōo̍ kīo̍o̍ ta̍u̍ ta̍u̍ o̍ kɔ̄lta̍ŋ ni᷄ŋ.

⁶Ndu̍yɛ̍, nyɛ̄ o̍ nyɛ̄ pālāa̍ cho̍ na̍a̍ kēēkōo̍ chōo̍ te̍le̍ŋ o̍ te̍le̍ŋ, ō chō māchūāā le̍ hāli̍ kpe̍ŋ mī lā sɔ̄la̍ kɔ̄ltā nyɔ̄ɔ̄lāāla̍ŋ, ndu̍yɛ̍, o̍ ko̍ŋ kɔ̍ɔ̍lī, mī lā sɔ̄la̍ pīōŋɔ̄ɔ̍. Tē ŋ̄ sɔ̄la̍ kɔ̄ltā nyɔ̄ɔ̄lāāla̍ŋ pɛ̍, na̍a̍ bɛ̍ɛ̍ ŋ̄ lo̍ o̍ ko̍ŋ ŋ̄ tōsa̍ lā sɔ̄la̍ kɔ̄ltā nyɔ̄ɔ̄lāāla̍ŋ. Ndu̍yɛ̍, o̍ ko̍ŋ, nya̍ bɛ̍ɛ̍ mī lā sɔ̄la̍ kpāāyāa̍ le̍ mī lā bi̍u̍ŋ nyɛ̍ pālāā pīlɛ̍ kōŋ o̍ ke̍e̍ku̍ na̍a̍ chōo̍ wo̍.

⁷Le̍la̍ŋ, tīīnda᷄ŋ na̍a̍ ŋ̄ nɔ̄ o̍ nya̍ ni̍ŋ ndo̍, ō cho̍ ti̍i̍nda᷄ŋ fa̍ŋa̍ŋ te̍. Ndu̍yɛ̍, ŋ̄ sīnā ndi̍ wa̍la̍ŋ māā ha̍a̍a̍ mi̍ nyɛ̄ pālāa̍ ō kēēkū nya̍ chōo̍ mɛ̄ɛ̍ o̍ ke̍e̍ku̍ na̍a̍ chōo̍ yɛ̍, le̍nde̍ ko̍ni̍, Mɛ̄lɛ̄ka̍ chō nya̍ kɔ̄lta̍ŋ nyɔ̄ɔ̄lū ni᷄ŋ ni̍ mɛ̄ɛ̍ o̍ nyɔ̄ɔ̄lu̍ na̍a̍ kɔ̄lta̍ŋ ni᷄ŋ yɛ̍.

⁸O̍ ko̍ŋ kɔ̍ɔ̍lī, chāāŋāā nāa̍, ŋ̄ hɛ̄na̍ŋ mī lā sīna̍ a̍ dɛ̍nɛ̍ pa̍lāā na̍a̍ ŋ̄ sɔ̄la̍ o̍ būŋgɛ̄ī E̍e̍sīā ve̍ ni᷄ŋ ndo̍ o̍kɔ̄ɔ̄. Nyɛ̄ kīndīlāa̍ wa̍ na̍a̍ chōo̍ wo̍ ō wa̍ bɔ̄ɔ̍. Mɛ̄ɛ̍ nda̍ hāndu̍ na̍a̍ nyɛ̄ kīndīlāa̍ chōo̍ te̍i̍, mi̍ ŋ̄ fāŋā kɔ̄lta̍ŋ ba̍ū o̍ yōōmūlā nāāla̍ ka̍lāla̍ŋ.

⁹Mi̍ ŋ̄ sīna᷄ŋ wānā a̍a̍ cha᷅ ko̍ kpe̍e̍kpe̍i̍ āā pīɔ̍mndo̍ ndu̍ o̍o̍ hi᷅ŋ ni᷅ŋ le̍ na̍a̍ ni̍. Kɛ̍ ndu̍yɛ̍, nyɛ̄ pālāa̍ ho̍ō ō kēēku̍ mākēēkāā na̍a̍ chōo̍ le̍ mī ŋ̄ sīna̍ ndi̍ pɛ̄ŋgu̍ māā Mɛ̄lɛ̄ka̍, o̍ mi̍ŋgī ho̍ō wānāa̍ wu᷅ wa̍ yōōmū wo̍ māā ndu̍ na̍a̍ ŋ̄ nɔ̄ ni̍ mī ŋ̄ tīīnda̍ŋ, māā ō cho̍ na̍a̍ pi̍la̍ le̍ na̍a̍ ŋ̄ tīīndāŋ te̍.

¹⁰Ndu̍ Mɛ̍lɛ̄ka̍ mbo̍ lō o̍ ko̍ŋ mbo̍ chīīndīāā yōōmūlā nāāla̍ŋ, ŋ̄ vi̍ o̍ kpūndɛ̍ kōŋ ni᷄ŋ te̍. Ndu̍yɛ̍, o̍ sīɔ̄dīi̍ lāchīo̍o̍ ni᷄ŋ bɛ̍ɛ̍ ō nɔ̄lā mbō chīīndi̍a̍a̍ yōōmūlā nāāla̍ŋ. Ŋ̄ nɔ̄ tīīnda᷄ŋndo̍ o̍ ndu̍ ni̍ŋ māā o̍ lāchīo̍o̍ ni᷄ŋ bɛ̍ɛ̍ ō chīīndīāā ni̍ŋ vɛ̍lɛ̄ yōōmūlā nāāla̍ŋ.

¹¹Nya̍ bɛ̍ɛ̍ lā nɔ̄ mī lā wa̍ mālāa̍ a̍ Mɛ̄lɛ̄ka̍ pīɛ̄īyo̍ le̍ na̍a̍. Kāni̍ fo̍ndōle̍, tē wāŋnda̍ ā wa̍ fāŋgā mā wa̍ pīɛ̄īle̍ŋ le̍ na̍a̍ pɛ̍, tē Mɛ̄lɛ̄ka̍ mūli̍ pīɛ̄īlē ndāle̍ŋ, ndu̍yɛ̍, mbō māla̍ na̍a̍ o̍ wa̍li̍ na̍a̍ ŋ̄ chō tōsāa̍ wo̍ ni᷄ŋ pɛ̍, le̍nde̍ ko̍ni̍ wānāa̍ me᷅l ndu̍ Mɛ̍lɛ̄ka̍ ba̍li̍ka̍ wa̍ ā wā fa̍ŋgā ni̍.

¹²Nyɛ̄ na̍a̍ ŋ̄ nɔ̄lā mī ŋ̄ kēlū yōŋgā a̍ ndu̍ o̍kɔ̄ɔ̄ wo̍ cho̍ ho̍ō ni̍ māā kɔ̄ltā nāāla̍ŋ lā chō nyɛ̄ kɛ̄ndɛ̄ wa̍la̍ŋ o̍ nyɛ̄ o̍ nyɛ̄ ni᷄ŋ na̍a̍ ŋ̄ chō tōsāa̍ chi̍e̍ēŋ na̍ŋ, tāāma̍ a̍ mɛ̄ɛ̍ na̍a̍ ŋ̄ bīī nya̍ yɛ̍. Nyɛ̄ o̍ nyɛ̄ na̍a̍ ŋ̄ tōsa̍ ō chō kpe̍nde̍ke̍le̍, ndu̍yɛ̍, mbo̍ wā o̍ nɛ̄ī sa̍na̍a̍ mɛ̄ɛ̍ Mɛ̄lɛ̄ka̍ hɛ̄na̍ŋ yɛ̍. Ndu̍yɛ̍, ō cho̍ o̍ kɔ̄l kālu̍ īwāna̍ chi̍e̍e̍ya̍ ni᷄ŋ te̍ na̍a̍ ŋ̄ nɔ̄la̍ he̍ī tōsā le̍. Le̍ mɛ̄ɛ̍ Mɛ̄lɛ̄ka̍ tōsa̍l na̍a̍ kɛ̄ndɛ̄i̍ ndūɛ̍i̍ mbo̍ kē na̍a̍ kpāāya̍ ndɔ̄ɔ̍ yɛ̍ na̍a̍ ŋ̄ nɔ̄la̍ ni̍ mi̍ ŋ̄ tōsā he̍ī.

¹³Nyɛ̄ ō nyɛ̄ na̍a̍ ŋ̄ dīmi̍ o̍ yāu̍la̍ na̍a̍ ŋ̄ pōōnyi̍a̍l nya̍ la̍ŋ ni᷄ŋ, nya̍ pi̍la̍ lā nɔ̄lā mī lā tōfa̍ lēni᷄ŋ mī lā sīna̍ mu̍ŋ pɛ̄ŋgu̍. Ndu̍yɛ̍, mi̍ chē bɛ̍ɛ̍ pɛ̄ŋgo̍o̍ ho̍ō lā chi̍ī yɔ̍ nyɛ̄ na̍a̍ ŋ̄ chō nya̍ dīmūllo̍ wo̍ pɛ̄ŋgu̍ si̍nā wa̍la̍ŋ te̍ ni̍, kɛ̍ ŋ̄ nɔ̄ tīīnda᷄ŋndo̍ māā lā chō hūnɔ̄ɔ̄ sīnā. O̍ ko̍ŋ, mī lā sīna̍ wa̍la̍ŋ māā ŋ̄ chō wānāā nya̍ nɔ̄lā mī lā pɛ̄ɛ̄lu̍ŋ, mɛ̄ɛ̍ na̍a̍ bɛ̍ɛ̍ ŋ̍ pɛ̍ɛ̍lūŋ ni̍ŋ a̍ nya̍ o̍ pāa̍le̍ Ma̍sānɔ̄ɔ̍ Chi̍i̍sū mi̍i̍ŋgū ni̍ŋ nde̍ŋ chōo̍ yɛ̍.

¹⁴

¹⁵Ya̍ i̍i̍ nɔ̍ o̍ kɔ̄l kpe̍e̍kpe̍i̍ māā lā chō he̍ī pɛ̄ŋgu̍ si̍nā. Le̍ sa̍bū kōŋ ya̍ i̍i̍ kɛ̍ɛ̍si̍a̍a̍ o̍ tāse̍la̍ ndɔ̄ɔ̍ le̍ kɔ̄la̍ŋ nya̍ yīlɔ̄ɔ̍ ni̍. Ya̍ i̍i̍ hɛ̍na̍ŋ mī i̍i̍ hi᷅ŋ nya̍ yīlɔ̄ɔ̄ lē dīi̍ŋ le̍ mī nya̍ a̍a̍ sɔ̍la̍ tɔ̄nɔ̄ le̍ di̍i̍ŋndo̍.

¹⁶Tē ya̍ i̍i̍ wa̍ kɔ̄la̍ŋ o̍ būŋgɛ̄ī Māsīdo̍o̍nīāāve̍ ni᷄ŋ pɛ̍, i̍i̍ ke̍i̍ nya̍ yīlɔ̄ɔ̄, i̍i̍ chɛ̍ŋ vɛ̍lɛ̄ lo̍ŋ pɛ̍, i̍i̍ ke̍i̍ vɛ̄lɛ̄ nāa̍ nya̍ chūā. Mɛ̄ɛ̍ tē ya̍ i̍i̍ wa̍ ni᷅ŋ kɔ̄la̍ŋ lɛ̄ŋndē Chūdi̍a̍āle̍ŋ pɛ̍, nya̍ a̍a̍ ke̍ ya̍ mālāa̍ le̍ kɔ̄lā nīla̍ŋ.

¹⁷Kɛ̍ ndu̍yɛ̍, lā yi̍ya᷄ŋ māā le̍ mɛ̄ɛ̍ ya̍ I̍ hi̍ŋ mɛ̄ɛ̍ ya̍ I̍ kɛ̍ɛ̍si̍a̍a̍ yɛ̍ le̍ yɛ̍, māā wāna̍ sɔ̄ɔ̍ŋ le̍ di̍i̍ŋ dīi̍ŋ te̍ ya̍ I̍ cho̍ le̍. Mī lā dīmi̍ dɔ̍ɔ̍ māā sɔ̄ɔ̍ŋ ya̍ I̍ kɛ̍ɛ̍sīāā le̍ tōsāa̍ wo̍ŋ māā ya̍ pi̍la̍ le̍ dɛ̍nɛ̍ nī kɛ̍ndɔ̄ɔ̍ ko̍ni̍ ya̍ I̍ kɛ̍ɛ̍sīāā mu̍ŋ ni̍. Ndu̍yɛ̍, mī lā yīya̍ŋ dɔ̍ɔ̍ a̍ ya̍ o̍kɔ̄ɔ̄ māā mī I̍ chɛ̍l lē sūɛ̍i̍ tōsāa̍, kɛ̍ māā tē kɔ̄l nūu̍ mūli̍ŋ pɛ̍, I̍ to̍sā lɛ̍ sūɛ̍i̍ ke̍ŋ te̍.

¹⁸I̍ cho̍ wa̍nā wa̍ā le̍nde̍ kpo̍so̍ŋ te̍. Le̍ Mɛ̄lɛ̄ka̍, ō dīōm ndɔ̄ɔ̍ ō fe̍ēŋ le̍cho̍o̍ le̍ wo̍, ya̍ cho̍ nya̍ he̍ī dīmūllo̍ ni̍. I̍ chɛ̍l lɔ̍ su̍ɛ̍i̍ māā I̍ cho̍ he̍ī tōsā, kɛ̍, o̍ ko̍ŋ kɔ̍ɔ̍lī mī kɔ̄l nūu̍ mūli̍ŋ mī I̍ kɛ̍ɛ̍ ndi̍ tōsā le̍.

¹⁹Kāni̍ fu̍u̍le̍, Po̍ Mɛ̄lɛ̄ka̍a̍, Chi̍i̍sū Ki̍li̍tī, ō ya̍ Pɔ̍ɔ̄, a̍ Sīlva̍nɔ̄ɔ̄, a̍ Ti̍mo̍tī ŋ̍ di̍mu̍l nya̍ a̍ ndu̍ o̍kɔ̄ɔ̄ wo̍, ō cho̍ wa᷅na̍ di̍mī le̍ īsɔ̄ɔ̍ to̍sā kɛ̍ o̍ ko̍ŋ kɔ̍ɔ̍lī, mī kɔ̄l ndɔ̄ɔ̍ mūli̍ŋ ō to̍sā lɛ̍ ndi̍ le̍ le̍. Nyɛ̄ o̍ nyɛ̄ o̍ di̍mi̍ pɛ̍ le̍ tōsāa̍, ndu̍ ki̍nɛ̍i̍ ko̍ o̍ to̍sā ni̍.

²⁰Nyɛ̄ o̍ nyɛ̄ Mɛ̄lɛ̄ka̍ chu̍a̍ būŋgɛ̄i̍ le̍ tōsāa̍, a̍ Chi̍i̍sū sa̍na̍a̍ sɔ̄ɔ̍ŋ mu̍ŋ ŋ̄ tōsa̍ŋ kpo̍u̍ ni̍. O̍ sa̍bū ndɔ̄ɔ̍ ni᷄ŋ na̍a̍ ŋ̄ nɔ̄lā ni̍ mī ŋ̄ dīmi̍ āā, “Le̍nde̍ i̍ cho̍ ni̍.” O̍ ko̍ŋ, mī Mɛ̄lɛ̄ka̍ sɔ̄la̍ sāŋgālāa̍.

²¹Mɛ̄lɛ̄ka̍ pi̍la̍ ndu̍ to̍sa̍ ni̍, na̍a̍ ni̍ a̍ nya̍, mi̍ ŋ̄ wā o̍ lāāla᷄ŋ na̍a̍ ŋ̄ nɔ̄ o̍ Ki̍li̍tī ni̍ŋ ndo̍ chōo̍ nyɛ̍ kɛ̄ndɛ̄ yi̍. Ndu̍ Mɛ̍lɛ̄ka̍ pi̍la̍ ndu̍ hɛ̍li̍ na̍a̍ le̍ wa̍li̍ na̍a̍ ŋ̄ nɔ̄ ho̍ō le̍ tōsāa̍ wo̍ ni̍.

²²Ndu̍yɛ̍, mbo̍ hāndū na̍a̍ tāāmāsi̍ ndɔ̄ɔ̍ le̍ chɔ̄mndo̍ māā ndu̍ nɔ̍ na̍a̍ ni̍. Ndu̍yɛ̍, ndu̍ Mɛ̍lɛ̄ka̍ ō vēm nyi̍nā ndɔ̄ɔ̍ le̍ mbō wa̍ na̍a̍ kɔ̄ɔ̄lī le̍ wāa̍ tāāmāsi̍o̍o̍ le̍ nyɛ̄ o̍ nyɛ̄ o̍ kɛ̍si̍ le̍ na̍a̍.

²³I̍ me̍na̍ŋ o̍ Mɛ̄lɛ̄ka̍ po̍ māā le̍ sa̍bū ya̍ I̍ ku̍e̍ lɛ̍ nya̍ yīlɔ̄ɔ̄ Kɔ̍līŋ te̍ wo̍ cho̍ ni̍ māā ya̍ i̍i̍ hɛ̍na̍ŋ mī I̍ tɛ̍ɛ̍mbu̍u̍ nya̍ lākɔ̄l te̍.

²⁴Ndu̍yɛ̍, ō cho̍ ma̍chu̍a̍ā mī ŋ̄ wa̍ nya̍ dīmūl a̍ ka̍ka̍ a̍ mɛ̄ɛ̍ lāāla᷄ŋ nyāa̍ nɔ̄ le̍ wāa̍ yɛ̍ le̍. Kāni̍ fu̍u̍le̍, lā chō ni᷅ŋ wānāā dīāllūŋ kālā o̍ lāāla᷄ŋ nyāa̍ ni᷄ŋ. Ŋ̄ chō māchūāā wa̍llo̍ a̍ nya̍ la̍tu̍lu̍ le̍ mī lā wa̍ a̍ kɔ̄l kɛ̄ndɛ̄.