Read Southern Kisi Kɔ̄li̍ŋtīāŋ Di̍i̍ŋ Ndɔ̄ɔ̍ 11 Bible Online

Kɔ̄li̍ŋtīāŋ Di̍i̍ŋ Ndɔ̄ɔ̍ 11 - Southern Kisi bible

Kɔ̄li̍ŋtīāŋ Di̍i̍ŋ Ndɔ̄ɔ̍ 11

¹I̍ cho̍ nya̍ dīōmndo̍ nyūnāa̍ māā lā yāndi̍i̍ lā bīūnu̍ŋ ya̍, ā yɔ᷄ŋ bɛ̍ɛ̍ mī nyɛ̄ ya̍ cho̍ ho̍ō dīmīo̍o̍ wo̍ ō wa̍ sɔ̍ŋgɔ̍ sɔ̄ɔ̍ŋ ŋ̄dīɔ̄m. Lā bīūnu̍ŋ ya̍.

²Mɛ̄ɛ̍ Mɛ̄lɛ̄ka̍ pāŋālā wa᷅ŋndā chīe̍e̍ya̍ yɛ̍, le̍nde̍ ya̍ Pɔ̍ɔ̄ ya̍ cho̍ pāŋālāa̍ le̍ nya̍ ni̍. Kāni̍ fu̍u̍le̍, ŋ̄ chɛ̄la᷅ŋ na̍a̍ Ki̍li̍tī le̍ mī lā cha᷄l nya̍ nda̍ā mɛ̄ɛ̍ wānā la̍nɔ̍ɔ̍ chāl nu̍a̍ā wānā pɔ̍nɔ̍ɔ̍ o̍ bā yɛ̍. Ndu̍yɛ̍, I̍ hɛ̍na̍ŋ mī lā hīōū lāchī a̍ wāa̍ sa̍kpō mbō lo̍ o̍ ko̍ŋ mī pāa̍le̍ nya̍ nɔ̄ le̍ cha᷄lle̍ o̍ nɔ̄ɔ̍ ni᷄ŋ nya̍ nda̍ā le̍ŋ lē fūūlu̍u̍. O̍ pāa̍le̍ le̍ŋ chōo̍ ya̍ I̍ cho̍ nya̍ ndu̍ kē ni̍, mɛ̄ɛ̍ nda̍ chūā nu̍a̍ā yūfu̍a̍a̍nɔ̍ɔ̍ o̍ si̍nā su̍ɛ̍i̍ wānā pɔ̍nɔ̍ le̍ wo̍, mā yɔ̄ŋgu̍ ndu̍ pɔ̍nɔ̍ ndɔ̄ yɛ̍.

³Kɛ̍ ndu̍yɛ̍, I̍ cho̍ ō kīīsa᷄ŋ. Kāni̍ fu̍u̍le̍, ā cha᷄l le̍ nya̍ bōlle̍ŋ tɛ̄ɛ̄mbūū mī lā ma᷄l kɔ̄l lānda᷄ŋ nya̍ nɔ̄ le̍ Ki̍li̍tī tōlɔ̄ɔ̍ kɔ̄ɔ̄lī sa̍kpō wo̍. Ī cha᷄l le̍ nya̍ yɔ̄nɔ᷄ŋ mɛ̄ɛ̍ i̍ yɔ̍nu̍ŋ a̍ I̍fī yɛ̍, mɛ̄ɛ̍ kɛ̄ūwo̍ hūi̍ ndu̍ a̍ chōōlā ndɔ̄la̍ŋ yɛ̍.

⁴Kāni̍ fu̍u̍le̍, lā chō ā chɛ̄lāā le̍ pɛ̄ɛ̄kūlā chēle̍ŋndā nda̍ chō nya̍ la̍ŋ chūa̍a̍, la̍ cho̍ bɛ̍ɛ̍ nyɛ̍ pīlɛ̍ kpo̍so̍ŋ a̍ pɛ̄ɛ̄kūlā na̍a̍ ŋ̄ pɛ̄ɛ̄ku̍ nya̍ la̍ŋ te̍ la̍ŋ. Ndu̍yɛ̍, wāŋnda̍ ā pūm ā chō nya̍ yōōŋgū chēle̍ŋ pɛ̄ɛ̄kōo̍ a̍ Chi̍i̍sū o̍kɔ̄ɔ̄, o̍ cho̍ nyɛ̍ pīlɛ̍ a̍ yōōŋgū na̍a̍ ŋ̄ dīmu̍l nya̍ a̍ Chi̍i̍sū o̍kɔ̄ɔ̄ wo̍ le̍ wo̍. Ndu̍yɛ̍, mi̍ lā chɛ̄l yōōŋgū chēle̍ŋ kōŋ. O̍ ko̍ŋ kɔ̍ɔ̍lī, lā chɛ᷄l le̍ mī nyi̍nā chēle̍ŋ ō tōl nya̍ kɔ̄ɔ̄lī, o̍ cho̍ bɛ̍ɛ̍ nyɛ̍ pīlɛ̍ a̍ Nyi̍na̍ Mɛ̄lɛ̄ka̍ to᷅l nya̍ kɔ̄ɔ̄lī bōōndi̍i̍ na̍a̍ ŋ̄ wa̍ a̍ nya̍ la̍tu̍lu̍ ve̍ le̍ wo̍. Ndu̍yɛ̍, lā chō yōōŋgū chēle̍ŋ chɛ̄lɔ̄ɔ̍ o̍ cho̍ bɛ̍ɛ̍ nyɛ̍ pīlɛ̍ a̍ Yōōŋgū Kɛ̄ndɛ̍ Mɛ̄lɛ̄ka̍ na̍a̍ ŋ̄ dīmu̍l nya̍ wo̍ le̍ wo̍.

⁵Ndu̍yɛ̍, wānāā nyāa̍ nya̍ chu̍a̍ ka̍ŋ māā wānāā Chi̍i̍sū ve᷅m hɔ̄ltē ndɔ̄ mbo̍ hīāū wānā o̍ wānā wa̍, ō pīlɛ̍ bɛ̍ɛ̍ I̍ nɔ̍ o̍ kɔ̄l māā ō hīōū ya̍ le̍.

⁶Mī ve̍ bɛ̍ɛ̍ wa̍nā cha̍ā īsɔ̄ɔ̍ bɛ̍ndū le̍, kɛ̍ ndu̍yɛ̍, a̍ dɛ̍nɛ̍ si̍nāa̍ ndu̍ ndu̍ o̍kɔ̄ɔ̄ I̍ cho̍ lo̍ŋ. Mi̍ I̍ chɔ᷅m nya̍ wa̍la̍ŋ o̍ nɛ̄ī o̍ nɛ̄ī ni̍ŋ māā le̍nde̍ i̍ cho̍ ni̍.

⁷Ndu̍yɛ̍, dīmūl ya̍ I̍ di̍mu̍l nya̍ Yōōŋgū Kɛ̄ndɛ̍ Mɛ̄lɛ̄ka̍a̍ wo̍, I̍ nyu̍na̍ le̍ mī lā ke̍ ya̍ nyɛ̄ o̍ nyɛ̄ sɔ̍ŋgɔ̍ ko̍ŋ te̍. Mi̍ tu̍sī ya̍ pi̍la̍ tōōlō le̍ hāli̍ kpe̍ŋ mī lā sīmnu᷄ŋ ŋ̍wa᷅ŋ. Bāā sūɛ̍i̍ wɔ̍ɔ̍ŋ ya̍ to̍sa̍l nya̍ ke̍ŋ ni̍?

⁸Bōōndi̍i̍ ya̍ I̍ wa̍ wa̍llo̍ nya̍ tɛ̄ɛ̄ŋ nde̍ bɛ̍ɛ̍, ku̍ndālā wānāā lāāla᷄ŋnda̍ o̍ chi̍e̍e̍ŋ che᷅le̍ŋ ndo̍ŋ, nda̍ wa̍ ya̍ pāāwāa̍ ni̍. Mɛ̄ɛ̍ ō wa̍ māā yɔ̄ŋɔ̄ɔ̄ pɛ̍, chāāŋāā kāŋ lēvīī kpo̍so̍ŋ ko̍ni̍ ya̍ I̍ wa̍ nda̍ yɔ̄ŋndo̍ ni̍, le̍ hāli̍ kpe̍ŋ mī I̍ ma̍la̍ nya̍.

⁹Bōōndi̍i̍ ya̍ I̍ wa̍ ke̍ŋ nya̍ tɛ̄ɛ̄ŋ nde̍, bā hāvɛ̍i̍ nyɛ̄ sɔ̄lāā ndu̍ o̍o̍ bi̍i̍ ya̍ bɛ̍ɛ̍, i̍i̍ he̍ndu̍ nya̍ wōlɔ̄ɔ̄lā lāŋ chōo̍ le̍. Chāāŋāā nāā wa̍nāā lāāla᷄ŋnda̍ o̍ lɛ̄ŋndē Māsīdo̍o̍nīāāle̍ŋ ni᷄ŋ, nda̍ wa̍ ya̍ nyɛ̄ o̍ nyɛ̄ fe̍e̍ Chūūwo̍ ni̍. I̍ he̍ndu̍ nya̍ wōlɔ̄ɔ̄ o̍ wōlɔ̄ɔ̄ o̍ lēbōl le̍ ya̍ mālā le̍. Lē pīlɛ̍ bɛ̍ɛ̍ I̍ to̍sa̍ wɔ̍ le̍, ndu̍yɛ̍, Ī to̍sā lɛ̍ ni̍ŋ bɛ̍ɛ̍ kpo̍so̍ŋ te̍.

¹⁰I̍ cho̍ dīōmnda̍ŋ nda᷅ŋ dīmīo̍o̍ le̍ tōnya̍ Ki̍li̍tīo̍o̍ o̍ cho̍ ya̍ ni᷄ŋ ndo̍, māā I̍ chu̍a̍ būŋgɛ̄i̍ māā o̍ lɛ̄ŋndē Āke̍yāle̍ŋ ni᷄ŋ ki̍nɛ̍i̍ wānā o̍ wānā nɔ̍lā mbō kūūna̍ ya̍ sūɛ̍i̍ he̍ī kīōlɔ̄ɔ̄ a̍ yōŋgā le̍.

¹¹Mi̍ chē bɛ̍ɛ̍ mi̍ I̍ to̍sā le̍nde̍ ni̍, kɛ̍ ndu̍yɛ̍, ko̍ŋ chɔ̍m māā I̍ ka̍a̍la̍ nya̍ le̍ le̍. Mɛ̄lɛ̄ka̍ pi̍la̍ sīnā māā I̍ ka̍a̍la̍ nya̍.

¹²Ndu̍yɛ̍, I̍ cho̍ hīōūwɔ̄ɔ̄ lāchī a̍ he̍ī tōsāa̍. Nyɛ̄ sɔ̄lāā bɛ̍ɛ̍ I̍ chɛ᷅l mī lā ke̍ ya̍ le̍ wa̍li̍ ya̍ I̍ cho̍ tōsāa̍ nya̍ tɛ̄ɛ̄ŋ ndo̍ le̍. O̍ ko̍ŋ, wānāā nyāa̍ chu̍a̍nu̍ŋ ka̍ŋ māā wānāā Chi̍i̍sū ve᷅m hɔ̄ltē ndɔ̄ wa̍ nda̍ chō ni̍ wa̍, ā nɔ᷅ lɛ̍ mɛ̄ɛ̍ ki̍a̍lāā yōŋgā le̍. Ā nɔ̍lā lɛ̍ mā kēlū yōŋgā māā mɛ̄ɛ̍ na̍a̍ ŋ̄ chō wa̍llo̍ yɛ̍, le̍ nda̍ bɛ̍ɛ̍ nda̍ chō wa̍llo̍ le̍.

¹³Wāŋnda̍ ha̍ā ā cho̍ wa̍nāā Chi̍i̍sū ve᷅m hɔ̄ltē ndɔ̄ kpe̍e̍kpe̍i̍ le̍ nda̍ chō le̍. Wānāā kāŋgālāa̍ nda̍ chō ni̍ mā kēī cho̍ōla̍ŋ dīmīo̍o̍ māā wa̍li̍ Mɛ̄lɛ̄ka̍a̍ nda̍ chō tōsāa̍ ni̍. Chɔ̄mndo̍ nda̍ chɔ̄m o̍ lāhɔ̄l ni̍ māā wānāā Ki̍li̍tī ve᷅m hɔ̄ltē ndɔ̄ wa̍ nda̍ chō ni̍.

¹⁴Kɛ̍ ndu̍yɛ̍, ke̍ŋ bi̍ī wa̍nā kɔ̄ndɔ̄fi̍li̍ le̍. Kāni̍ fo̍ndōle̍, le̍nde̍ ko̍ni̍ Sēta̍nā o̍ cho̍ māsa̍ nyi̍nāā wɔ̄ɔ̍ŋnda̍ wo̍, mbō chɔ᷄m māā ki̍i̍la̍nɔ̍ Mɛ̄lɛ̄ka̍ cho̍ le̍ nyɛ̄ wa̍wo̍ŋndo̍ wo̍ o̍ cho̍ ni̍.

¹⁵Le̍la̍ŋ, ā yɔ᷄ŋ bɛ̍ɛ̍ mī bu̍ɛ̍i̍yāā ndūa̍a̍ ā chɔ᷄m o̍ lāhɔ̄l māā bu̍ɛ̍i̍yāā sa̍kpūa̍a̍ Mɛ̄lɛ̄ka̍a̍ nda̍ chō ni̍, ko̍ŋ cho̍ su̍ɛ̍i̍ bi̍ī wānā kɔ̄ndɔ̄fi̍li̍ le̍. Mɛ̄ɛ̍ kūɛ̍i̍la̍ ndāla̍ŋ lā chō yɛ̍, le̍nde̍ Mɛ̄lɛ̄ka̍ chō nda̍ hūnɔ̄ɔ̄ bīyɔ̄ɔ̄ o̍ mɛ̄ɛ̄lu̍la̍ŋ ni̍.

¹⁶Mī I̍ chɔ̍ɔ̍lu̍ dīmī, wānā o̍ wānā nɔ᷅ o̍ kɔ̄l māā dīɔ̄m te̍ ya̍ I̍ cho̍ le̍. Kɛ̍ ndu̍yɛ̍, tē ō wa̍ dɔ̍ɔ̍ pɛ̍ mī lā nɔ̄ yīya᷄ŋ wa̍ā le̍nde̍ a̍ ya̍ o̍kɔ̄ɔ̄ pɛ̍, mɛ̄ɛ̍ lā ma᷄l la̍ a̍ dīɔ̄mīī nīī ke̍ŋ, o̍ ko̍ŋ, mī sɔ̍la̍ fo̍ndāa̍ mī ke̍lū yōŋgāa̍ nyɛ̄ pɔ̄mbɔ̄.

¹⁷Ī ya̍ cho̍ he̍ī dīmī ve̍ ndi̍ ndi̍, ō cho̍ Ma̍sānɔ̄ɔ̍ Mɛ̄lɛ̄ka̍ le̍ ve᷅m ya̍ ndi̍ dīmī le̍, ndi̍ yɔ̍nūŋ ni̍ māā a̍ yōŋgāa̍ kīōlɔ̄ɔ̍ o̍kɔ̄ɔ̄. Sūɛ̍i̍ ya̍ cho̍ he̍ī a̍ yōŋgāa̍ kīōlɔ̄ɔ̍ o̍kɔ̄ɔ̄ ve̍, māā dīɔ̄m ko̍ni̍ ya̍ I̍ cho̍ sūɛ̍i̍ ni̍.

¹⁸Kɛ̍ ndu̍yɛ̍, mɛ̄ɛ̍ wāŋnda̍ ta̍u̍ a̍ cho̍ yōŋgāa̍ kīōlɔ̄ɔ̍ a̍ wa̍lta̍ nda̍ tōsa̍ o̍ chi̍e̍ēŋndo̍ ho̍ō ni᷄ŋ nda̍ŋ yɛ̍, mɛ̄ɛ̍ ya̍ bɛ̍ɛ̍ I̍ cho̍ yōŋgā wa̍ā le̍ndo̍o̍ kīōlɔ̄ɔ̄.

¹⁹Lā chūānu̍ŋ māā wānāā kɔ̄l kālu̍a̍a̍ pi̍la̍ nya̍ chō ni̍. Kɛ̍ ndu̍yɛ̍ mī lā chɛ᷄l dīɔ̄mnde̍.

²⁰Mī lā chɛ᷄l mī wānā o̍ wānā bi̍ī nya̍ māā chīāā ndā, mā su᷄l o̍ nyɛ̄m nya᷄ŋ ni᷄ŋ. Ā yɔ᷄ŋ bɛ̍ɛ̍ mā yē nya̍ o̍ lēbōl, mā chu̍a̍ nya̍ māā nda̍ hi̍o̍ū a̍ nya̍, mā kōŋ nya̍ kpa᷅ŋnde̍, mu̍ŋ kpo̍u̍ mī lā bi̍u̍ŋ.

²¹Si̍ɔ̍mbu̍la̍ŋ lā chō ya̍ le̍ he̍ī chɔ̄ɔ̄mūūwo̍, māā ō wa̍ māā īsīōōŋ pɛ̍, mɛ̄ɛ̍ I̍ to̍sa̍ ndi̍. Kāni̍ fo̍ndōle̍, na̍a̍ na̍a̍ ŋ̄ bīi̍ kɔ᷅llo̍ mī ŋ̄ tōsa̍ a̍ nya̍ le̍nde̍ le̍. Māā dīɔ̄m ko̍ni̍ ya̍ I̍ cho̍ sūɛ̍i̍ ni̍. Ndu̍ cho̍ ni̍ māā, tē wānā wa̍ dɔ̍ɔ̍ mbō nɔ̄ sūɛ̍i̍ o̍ ki̍a̍lū yo̍ŋgāa̍ a̍ ndi̍ pɛ̍, mɛ̄ɛ̍ ya̍ bɛ̍ɛ̍ I̍ cho̍ wāŋndo̍ ō pīlɛ̍ o̍ nɔ̍lā mbō kēlū yōŋgā a̍ sūɛ̍i̍ pi᷅lɛ̍i̍ kēŋ ndo̍.

²²Kāni̍ fo̍ndōle̍, tē wāŋnda̍ ha̍ā kēlū yōŋgā le̍ chō nda̍ chō Hi̍būlūi̍ya̍ wo̍ pɛ̍, mɛ̄ɛ̍ ya̍ bɛ̍ɛ̍ I̍ ki̍a̍lū yo̍ŋgā a̍ ke̍ŋ o̍kɔ̄ɔ̄, kāni̍ fo̍ndōle̍, ya̍ bɛ̍ɛ̍ Hi̍būlūi̍nɔ̍ɔ̍ ya̍ cho̍ ni̍. Tē ā kēlū yōŋgā le̍ mɛ̄ɛ̍ nda̍ chō I̍sɔ̄lūɛ̍i̍ya̍ yɛ̍ pɛ̍, mɛ̄ɛ̍ ya̍ bɛ̍ɛ̍ I̍ ki̍a̍lū yo̍ŋgā ko̍ŋ, kāni̍ fo̍ndōle̍ ya̍ bɛ̍ɛ̍ I̍sɔ̄lūɛ̍i̍nɔ̍ɔ̍ ya̍ cho̍ ni̍. Tē ā kēlū yōŋgā le̍ mɛ̄ɛ̍ nda̍ chō chūāūwāā māmāa̍ E̍bīlāha᷅mnda̍ yɛ̍ pɛ̍, mɛ̄ɛ̍ ya̍ bɛ̍ɛ̍ I̍ ki̍a̍lū yo̍ŋgā ko̍ŋ, kāni̍ fo̍ndōle̍ ya̍ bɛ̍ɛ̍ chūā māma̍ E̍bīlāha᷅m ndo̍ ya̍ cho̍ ni̍.

²³He̍ī ndi̍ māā wānā se̍e̍mɛ̍i̍ kpe̍e̍kpe̍i̍ ya̍ cho̍ ndi̍ dīmīo̍o̍ ni̍. Ndu̍ cho̍ ni̍ māā, tē ā kēlū yōŋgā pɛ̍ māā bu̍ɛ̍i̍yāa̍ Ki̍li̍tīa̍a̍ nda̍ chō ni̍, mɛ̄ɛ̍ ya̍ bɛ̍ɛ̍ I̍ ki̍a̍lū yo̍ŋgā ko̍ŋ, kāni̍ fo̍ndōle̍, ya̍ bɛ̍ɛ̍ hi̍o̍ū wā bu̍ɛ̍ī kɛ̄ndɛ̄ le̍ Ki̍li̍tī a̍ nda̍. Kāni̍ fu̍u̍le̍, wa̍li̍ ya̍ to̍sa̍ le̍ Ki̍li̍tī wo̍ ō hīōū ō nda̍ nda̍ tōsa̍ wo̍. Kāni̍ fo̍ndōle̍, ā dɔ̄ū ya̍ ni᷅ŋ chīɛ̄ī ni̍ŋ mbo̍ hīāū a̍ nda̍. Ā lɔ̄ɔ̄ ya̍ ni᷅ŋ mbo̍ hīāū nda̍. Le̍ te̍le̍ŋnda̍ fa̍ŋgā mbō lo̍ cho̍be̍ mī sɔ̍la̍ pīɔ̍mndo̍.

²⁴Lɔ̄ɔ̄ be̍le̍-ya̍a̍ a̍ lē ŋɔ̄ma̍hīɔ̍ɔ̍lu̍ wānāā bɛ̄ndūāā Chu̍ūwa̍ nɔ̄ wāŋnda̍ wo̍, lē ŋūɛ̍ɛ̍nu̍ kpu̍lu̍ku̍u̍ nda̍ lɔ̄ɔ̄ ya̍ ni᷅ŋ ndu̍ ni̍.

²⁵Lu̍o̍ma᷅ŋnda̍ lɔ̄ɔ̄ ya̍ ni᷅ŋ lē yāa̍. Ndu̍yɛ̍, ā vīī vi̍i̍ ya̍ ni᷅ŋ a̍ pōūta̍ŋ lē pīlɛ̍, le̍ mī nda̍ a̍a̍ di̍ī ya̍. Dɛ̄ndɔ̄ɔ̍ kɔ̄ɔ̄lu̍ ni᷅ŋ a̍ na̍a̍ le̍ ya̍a̍ o̍ mɛ̄ŋnda̍ŋ chōo̍. Bōōndi̍i̍ pi᷅lɛ̍, mi̍ dɛ̄ndɔ̄ɔ̍ kɔ̄ɔ̄lū a̍ na̍a̍ mi̍ I̍ chu̍ā pāa̍le̍ŋ kpɛ᷅ŋ a̍ nyūmnda̍ŋ o̍ mɛ̄ŋnda̍ŋ chōo̍.

²⁶O̍ bālɔ̄ɔ̄ nūu̍ ni᷄ŋ ki̍nɛ̍i̍, o̍ kpūndɛ̍ ni᷄ŋ ko̍ni̍ yōōmū nūu̍ wa̍ pɛ̄ŋgu̍ o̍ pɛ̄ŋgu̍ ni̍. Mɛ̄ŋma̍ hu᷅ŋ mī mā chūā chi̍o̍o̍ŋ nda̍ŋ ma̍ŋ ma̍ cho̍, vīīya̍ nda̍ chō. Chu̍ūwa̍ ni̍ a̍ wānāa̍ cho̍ a̍ Chu̍ū le̍ wa̍, nda̍ chō kīndīo̍o̍ le̍ ya̍ dīyɔ̄ɔ̍. Chi̍e̍e̍ ni̍, yōndō ni᷄ŋ ni̍, yōōmū nūu̍ chō o̍ kpūndɔ̍ɔ̍ ni᷄ŋ. Yālāā ya̍ wa᷅ pe̍e̍ mɛ᷅ŋmā īhɛ᷄llo̍ tāŋɔ̄ɔ̍ le̍, kpūndɔ̍ɔ̍. Wānāa̍ ve̍e̍lu̍ nda̍ pi̍la̍ āā wānāā lāāla᷄ŋnda̍ nda̍ nda̍ chō ni̍, kɛ̍ ndu̍yɛ̍ ā cho̍ wa̍nāā wāā le̍nde̍ le̍ wa̍, nda̍ chō.

²⁷O̍ kpūndɛ̍lā lāŋ kɔ̄ɔ̄lī, sāŋgāa̍ ndu̍ cho̍ ya̍ chōo̍ o̍ wa̍llo̍ ni᷄ŋ, yɔ̄kpāa̍ pi̍la̍. Te̍le̍ŋnda̍ ka̍ ka̍ fo̍ndāŋ bɛ̍ɛ̍ I̍ sɔ̍lā mī I̍ lɔ̍l o̍ wāla̍ cho̍o̍ le̍. Te̍le̍ŋnda̍ŋ lā pūm mī yīa̍a̍ŋ mā bīī ya̍, lā pūm mī bo̍lōla̍ŋ lā vēsa̍ ya̍ sɛ̍ɛ̍ŋ, lā pūm mī yīa̍a̍ŋ mā nɛ̄i̍ ya̍, lā pūm bālɔ̄ɔ̍ o̍ hūēīye̍ ni᷄ŋ, lā pūm mī fɛ̍li̍o̍o̍ bīī ya̍.

²⁸Sɔ̄ɔ̍ŋ che᷅le̍ŋ ŋ̄ chō mi̍ ŋ̄ yɔ̄nu᷄ŋ ya̍ I̍ chɔ̍m mu̍ŋ te̍. O̍ mu̍ŋ kɔ̍ɔ̍lī, le̍ lēpāa̍ o̍ lēpāa̍ būūla᷄ŋ ku̍ndālā wānāā lāāla᷄ŋnda̍ kpo̍u̍ ō chō o̍ kɔ̄l nūu̍ ni᷄ŋ, mɛ̄ɛ̍ wāŋndo̍ chūā nu̍a̍ā wōlɔ̄ɔ̄lā lūsu̍lɛ̍i̍ la̍ŋ yɛ̍.

²⁹Wāŋndo̍ ō pīlɛ̍ bɛ̍ɛ̍ wa̍ a̍ dīāllūŋ vīlɛ̍i̍ o̍ lāāla᷄ŋ ndɔ̄ɔ̍ ni᷄ŋ pɛ̍, mɛ̄ɛ̍ mī I̍ chu̍a̍ ndi̍ māā sūɛ̍i̍ nī. Wānā la̍a̍la᷄ŋndo̍ ō pīlɛ̍ bɛ̍ɛ̍ to̍sa̍ yɔ̄ŋ wɔ̄ɔ̍ŋndo̍ pɛ̍, mɔ̍nɛ̍i̍ pi̍la̍ I̍ wa᷅ ya̍ o̍ kɔ̄l nūu̍ ni᷄ŋ ni̍.

³⁰Le̍la̍ŋ, I̍ wa̍ bɛ̍ɛ̍ wa̍nā ki̍a̍lāā yōŋgā, mɛ̄ɛ̍ a̍ sɔ̄ɔ̍ŋ chɔ᷅m māā I̍ nɔ̍ kpa̍a̍yā le̍ wo̍ŋ, mī ke̍lū yōŋgā.

³¹Mɛ̄lɛ̄ka̍ o̍ cho̍ fi̍nyāa̍ le̍ Māsānɔ̄ɔ̍ Chi̍i̍sū wo̍, o̍ nɔ̍ mbō sɔ̄la̍ sāŋgālāa̍ le̍ fɛ̍ɛ̍ŋ a̍ fɛ̍ɛ̍ŋ ndo̍, ndu̍ si̍nā māā ō cho̍ la̍cho̍o̍ le̍ ya̍ I̍ cho̍ dīmī le̍.

³²Bōōndi̍i̍ ya̍ I̍ wa̍ ke̍ŋ Dāma̍si̍kɔ̍ɔ̄ chi̍e̍e̍ mi̍ māsāa̍ lo̍ŋ, nda̍ yɔ̍nūŋ ni̍ māā Māsā Bɛ̍ndōo̍ Ālu̍ɛ̍tās māsāa̍ ndūa̍a̍ cho̍ ndu̍ o̍ bā bɛ̄ŋgu̍ wa̍, mi̍ ō pīlɛ̍ dīmī māā ā bīi̍ ya̍. O̍ ko̍ŋ, ma̍ kɛ̄sī so̍vɛ̄i̍ya̍ o̍ kpāki̍ ba̍lu̍ chi̍o̍o̍ wo̍ dīōla̍ŋ kpɛ̍ kpɛ̍.

³³Kɛ̍ ndu̍yɛ̍, mi̍ chāāŋāā nīa̍a̍ dūāū ya̍ o̍ kāmbɛ̍i̍yo̍ ni᷄ŋ ma̍ sōlī ya̍ o̍ dīō pɔ̄mbɔ̄ɔ̍, ma̍ tūsī ya̍ o̍ kpākīo̍o̍ lēkɔ̍ɔ̍lī. Mi̍ hi̍a̍lu᷄ŋ ma̍sāa̍ ho̍ō, ō bīi̍ ya̍ le̍.