Read Southern Kisi Kɔ̄li̍ŋtīāŋ Di̍i̍ŋ Ndɔ̄ɔ̍ 13 Bible Online

Kɔ̄li̍ŋtīāŋ Di̍i̍ŋ Ndɔ̄ɔ̍ 13 - Southern Kisi bible

Kɔ̄li̍ŋtīāŋ Di̍i̍ŋ Ndɔ̄ɔ̍ 13

¹Ho̍ō pe̍ī ni᷅ŋ yāa̍ ndɔ̄ɔ̍, le̍ ya̍ Pɔ̍ɔ̄ hūnɔ̄ɔ̄ nūu̍ nya̍ yīlɔ̄ɔ̍ ni̍. Mɛ̄ɛ̍ Yāu̍ Mɛ̄lɛ̄ka̍a̍ dīmi̍ yɛ̍ āā, “Le̍ mī lā bīī ndi̍ tōnya̍ māā fi̍nyɛ̄ to̍sa̍ yɔ̄ŋ wɔ̄ɔ̍ŋndo̍, mɛ̄ɛ̍ mbō wa̍ mī se̍i̍yāā ŋīɔ̍ɔ̍ŋ kɛ̄lɛ̄ŋgāā ā yāa̍ a̍ fu̍la̍ mā chɔ᷄m māā le̍nde̍ i̍ cho̍ ni̍.”

²Wānāa̍ cho̍ ma̍ wā ni᷅ŋ pāāndū yɔ̄ŋ wɔ̄ɔ̍ŋndo̍ tōsāa̍ wa̍, a̍ nya̍ wāŋnda̍ ā tūa̍a̍ kpo̍u̍, sīlā nyāa̍ cho̍ ho̍ō ni̍. Sīlāa̍ ho̍ō I̍ si̍la̍ ni᷅ŋ ndu̍ pāāndū, bōōndi̍i̍ ya̍ I̍ hi᷅ŋ hūnɔ̄ɔ̄ dīi̍ŋ ndɔ̄ɔ̍ nya̍ yīlɔ̄ɔ̍ ve̍. Kɛ̍ ndu̍yɛ̍ bōōndi̍i̍ ya̍ I̍ hi̍ŋ ndɔ̍ nya̍ tɛ̄ɛ̄ŋ te̍ ve̍, I̍ cho̍ pɔ̄ɔ̄ nya̍ sīlā pīlɔ̍ɔ̍ ho̍ō kpe̍. Kāni̍ fu̍u̍le̍, tē I̍ hi᷅ŋ ni᷅ŋ pɛ̍ wānāa̍ cho̍ yɔ̄ŋndā wɔ̄ɔ̍ŋnda̍ŋ nda᷅ŋ tōsāa̍ wa̍, mɛ̄ɛ̍ mā sɔ̄la̍ nyɛ̄ pālāa̍.

³Lā chō yēēmɛ̍i̍ māā, ya̍ I̍ to̍sa̍ wɔ̍ su̍ɛ̍i̍ chɔ᷅m māā Ki̍li̍tī ndu̍ dɔ̍ū ya̍ dīōmnda̍ŋ nda᷅ŋ o̍ sōndo̍ ni̍ la̍ŋ. I̍ cho̍ hūnɔ̄ɔ̄ sɔ̄ɔ̍ŋ mu̍ŋ tōsā. Ki̍li̍tī o̍ cho̍ ho̍ō wa̍llo̍ nya̍ tɛ̄ɛ̄ŋ ndo̍, ō cho̍ wa᷅na̍ kɛ̍ɛ̍ kpāāyā nɔ᷅ le̍. Kāni̍ fo̍ndōle̍ kpāāya̍ ndɔ̄ɔ̍ chō ō chɔ̄mna᷄ŋ wa̍la̍ŋ o̍ wa̍li̍ o̍ cho̍ nya̍ tɛ̄ɛ̄ŋ ndo̍.

⁴Ī chō tōnya̍ māā bōōndi̍i̍ nda̍ ba᷄ŋ Ki̍li̍tī o̍ yɔ̄m sīŋgāfīlāa̍ chōo̍ ma̍ dīī ndu̍ ve̍, ndu̍ o̍o̍ nɔ̍ kpa̍a̍yā le̍. Kɛ̍ ndu̍yɛ̍ pɛ̄ŋgo̍o̍ ho̍ō ni᷅ŋ, kpāāya̍ Mɛ̄lɛ̄ka̍a̍ tōsa̍ mbo̍ wā yōōmū. Ndu̍yɛ̍ na̍a̍ bɛ̍ɛ̍ ha̍a̍a̍ mi̍ ŋ̄ wā o̍ dīōm pīlɔ̍ɔ̍ ni᷄ŋ na̍a̍ nda̍ā, na̍a̍ bɛ̍ɛ̍ ŋ̄ nɔ̍ kpa̍a̍yā le̍. Kɛ̍ ndu̍yɛ̍, tē ŋ̄ hu᷄ŋ wa᷅ wa̍llo̍ a̍ nya̍ la̍tu̍lu̍ pɛ̍, kpāāya̍ Mɛ̄lɛ̄ka̍a̍ o̍ to̍sa̍ mi̍ Ki̍li̍tī wa᷅ yōōmū wo̍, ŋ̄ chō kpāāyā ko̍ŋ nɔ̄.

⁵Le̍la̍ŋ, wānā o̍ wānā nya̍ pi̍la̍ lā mɛ̄ɛ̄ndi̍a̍ŋ o̍ kɔ̄ltā nyāla̍ŋ ni᷄ŋ, wānā o̍ wānā mī nūm pi̍la̍ ke̍lū yāmɛ̍i̍ tē ā chō pɛ̍ hi̍o̍u̍wɔ̄ɔ̍ lāchī a̍ tīīnda᷄ŋndo̍ nɔ̄ɔ̍ o̍ Ki̍li̍tī ni̍ŋ. Lā sīna̍ pɛ̍ŋgu̍ māā Chi̍i̍sū Ki̍li̍tī cho̍ dīōm pīlɛ̍ a̍ nya̍. Mɛ̄ɛ̍ ni᷅ŋ dɔ̍ɔ̍ wānā pi̍la̍ mī nūm ki̍lu̍lu̍ŋ ya᷅mɛ̍i̍ māā a̍ bu̍mba̍ Ki̍li̍ti̍ tīīnda᷄ŋndo̍.

⁶I̍ nɔ̍ o̍ kɔ̄l māā nya̍ pi̍la̍ lā nɔ̄lā mī lā sāālu̍ŋ māā na̍a̍ na̍a̍ ŋ̄ būmba̍ le̍. Wānāā Chi̍i̍sū ve᷅m māā hɔ̄ltē ndɔ̄ wa̍ na̍a̍ ŋ̄ chō kpe̍e̍kpe̍i̍ ni̍.

⁷Ŋ̄ chō Mɛ̄lɛ̄ka̍ pīɛ̄ī le̍ nya̍ māā lā to̍sā īsɔ̄ɔ̍ o̍ īsɔ̄ɔ̍ wɔ̍ɔ̍ŋ te̍. Kɛ̍ ndu̍yɛ̍, ō cho̍ ma̍chu̍a̍ā mī ŋ̄ wa̍ pīɛ̄īle̍ŋ nde᷅ŋ le̍ hāli̍ su̍e̍e̍ māā wāŋnda̍ ā chu̍a̍ na̍a̍ māā ŋ̄ chō wānāā Chi̍i̍sū ve᷅m māā hɔ̄ltē ndɔ̄ wa̍ le̍. Ŋ̄ chō māchūāā pīɛ̄īle̍ŋ le̍ hāli̍ kpe̍ŋ mī lā tōsa̍ o̍ cho̍ tōnya̍a̍ sa̍kpō le̍ tōsāa̍ wo̍, ā yɔ᷄ŋ bɛ̍ɛ̍ mī wāŋnda̍ yīya̍ŋ māā ŋ̄ būmba̍.

⁸Kāni̍ fo̍ndōle̍, ŋ̄ nɔ̍lā mī ŋ̄ tōsa̍ nyɛ̄ o̍ nyɛ̄ o̍ cho̍ o̍ nɛ̄i̍ tōnya̍ chōo̍ le̍ wo̍ le̍. Nyɛ̄ o̍ nyɛ̄ na̍a̍ ŋ̄ chō tōsā, ŋ̄ chō ndu̍ tōsā le̍ tōnya̍ Mɛ̄lɛ̄ka̍a̍.

⁹Mī na̍a̍ na̍a̍ ŋ̄ nɔ̍ bɛ̍ɛ̍ kpa̍a̍yā le̍, kɛ̍ tē nya̍ sɔ̄la̍ kpāāyāa̍ pɛ̍, ŋ̄ na᷄ŋ kɔ̄l. Ndu̍yɛ̍, ŋ̄ chō Mɛ̄lɛ̄ka̍ pīɛ̄īyo̍, māā mī lā lo̍ o̍ ko̍ŋ mī lā sīmnu᷄ŋ wa̍nāā sa̍kpō o̍ lāāla᷄ŋ nyāa̍ ni᷄ŋ.

¹⁰Le̍ sa̍bū ya̍ I̍ cho̍ nya̍ he̍ī dīmūllo̍ o̍ yāu̍wo̍ ni᷄ŋ pɛ̍ŋgu̍ ya̍ I̍ cho̍ wɔ̍ ho̍ō nya̍ tɛ̄ɛ̄ŋ te̍ wo̍ cho̍ ni̍, māā tē I̍ hi᷅ŋ pɛ̍, lā to̍sā mī I̍ bi̍ī nya̍ kpa̍u̍ kpa̍u̍ le̍. Kāni̍ fo̍ndōle̍, Māsānɔ̄ɔ̍ Mɛ̄lɛ̄ka̍ ō ke̍ ya̍ kpāāyā ko̍ŋ, ndu̍ yɔ̍nūŋ ni̍ māā kpāāyāa̍ le̍ nya̍ sīmīo̍o̍ o̍ lāāla᷄ŋndo̍ chōo̍ nyɛ̍ kɛ̄ndɛ̄ yi̍. Ō cho̍ kpa̍āya̍ fa̍ŋa̍ nya̍ o̍ lāāla᷄ŋ nya̍ nɔ̄ wo̍ chōo̍ le̍.

¹¹Dīōmndā mɛ̄ɛ̄lāāla̍ŋ la̍ cho̍ ni᷅ŋ la᷅ŋ le̍ nya̍ chōŋgɔ᷄ŋndo̍ ni̍, chāāŋāā nīa̍a̍. Mɛ̄ɛ̍ lā īdīi̍. Lā kīndi̍ ki̍ndi̍ le̍ wāa̍ sa̍kpō. Lā pu̍ɛ̍ɛ̍ŋ si̍lālā nīla̍ŋ te̍. O̍ ko̍ŋ kɔ̍ɔ̍lī, lā wa̍ di̍ōmndo̍ ō pīlɛ̍. Kɔ̄l nyūlōo̍ ō wa̍ nya̍ tɛ̄ɛ̄ŋ vēllāa̍ vēllē. Mbɔ̄ Mɛ̄lɛ̄ka̍ o̍ ka̍a̍la̍ na̍a̍ mbō kē na̍a̍ kɔ̄l nyūlōo̍ wo̍, ō wa̍ la̍tu̍lu̍ a̍ nya̍ fɔ̍.

¹²Lā wa̍ yi᷅la᷅ŋndo̍ o̍ kāālāa̍ ni᷄ŋ māā wānāā lāāla᷄ŋ o̍ Chi̍i̍sū ni̍ŋ.

¹³Wānāa̍ Mɛ̄lɛ̄ka̍a̍ a̍ cho̍ na̍ŋ nda̍ fa̍ū ā yi᷄l nya̍ kpo̍u̍.

¹⁴Mbɔ̄ Māsānɔ̄ɔ̍ Chi̍i̍sū Ki̍li̍tī ō yīya̍ŋ nya̍ chōo̍ fɔ̍. Ndu̍yɛ̍, kāāla̍ Mɛ̄lɛ̄ka̍a̍ a̍ chānjɛ̍ī Nyi̍na̍ Kāsīo̍o̍ ī wa̍ a̍ nya̍ la̍tu̍lu̍ kpo̍u̍.