Read Southern Kisi Kɔ̄li̍ŋtīāŋ Di̍i̍ŋ Ndɔ̄ɔ̍ 3 Bible Online

Kɔ̄li̍ŋtīāŋ Di̍i̍ŋ Ndɔ̄ɔ̍ 3 - Southern Kisi bible

Kɔ̄li̍ŋtīāŋ Di̍i̍ŋ Ndɔ̄ɔ̍ 3

¹Bāā dīōmnda̍ŋ nda᷅ŋ lā chɔ᷄m māchɔ̄māā māā yōŋgāa̍ na̍a̍ ŋ̄ chō vɛ̄lɛ̄ kīōlɔ̄ɔ̍ a̍ na̍a̍ pi̍la̍ o̍kɔ̄ɔ̄ ni̍? Sāko̍, ō cho̍ yo̍ŋgā le̍ na̍a̍ ŋ̄ chō kīōlɔ̄ɔ̄ le̍. Ndu̍yɛ̍, na̍a̍ ŋ̄ cho̍ māā wānāā pūm tē, māā ŋ̄ wa̍ hūnɔ̄ɔ̍ nāa̍ nya̍ chūā pɛ̍, mɛ̄ɛ̍ mī ŋ̄ chɛ᷄ŋ a̍ yāu̍la̍ŋ ku̍ndā wānāā lāāla᷄ŋnda̍ o̍ bā le̍ na̍a̍ chɔ̄mndo̍ nāa̍ nya̍ chūā le̍. Ndu̍yɛ̍, nya̍ bɛ̍ɛ̍ ŋ̄ yēēma̍ la̍ya̍u̍ nya̍ o̍ bā le̍ wāŋnda̍ chɔ̄mndo̍ a̍ na̍a̍ o̍kɔ̄ɔ̄ le̍.

²Tē ō wa̍ māā yɔ̄ŋɔ̄ɔ̄ pɛ̍, nya̍ cho̍ yāu̍ na̍a̍ ni̍, o̍ chɔ᷅m wa᷅ŋnda̍ a̍ na̍a̍ o̍kɔ̄ɔ̄ wo̍. Mɛ̄ɛ̍ wāŋndo̍ pōōnyīāā nu̍a̍ā yāu̍wo̍ yɛ̍, le̍nde̍ nya̍ chō ā pōōnyīāā ō kɔ̄ltā nāāla̍ŋ ni᷄ŋ ni̍. Ndu̍yɛ̍, yāu̍wo̍ ho̍ō ndu̍ ndu̍ cho̍ ō kūmbīāā le̍ mī wānā o̍ wānā to̍fa̍ lēni᷄ŋ, mbō sīna̍ nyɛ̍ cho̍ lēni᷄ŋ ndo̍.

³Ndu̍yɛ̍, ī chō kpe̍nde̍ke̍le̍ māā yāu̍ nāa̍ ho̍ō ndu̍ ndu̍ Ki̍li̍ti̍ po̍o̍nyi̍a̍a̍ ndu̍ ni̍ mbo̍ vīām na̍a̍ a̍ ndu̍. Ndu̍yɛ̍, ndu̍ ndu̍ ā pōōnyi̍a̍a̍ ndu̍ a̍ mɛ̄ŋmā tīŋī mɛ̄ɛ̍ nda̍ pōōnyīāā yāu̍la̍ yɔ̍ŋāāla̍ŋ yɛ̍ le̍. Yāu̍wo̍ ho̍ō ndu̍ ndu̍, Mɛ̄lɛ̄ka̍ cho̍ yōōmū wo̍ a̍ Nyi̍nā ndɔ̄ɔ̍ sa̍na̍a̍ Mɛ̄lɛ̄ka̍ pōōnyi̍a̍a̍ ndu̍ ni̍. Ndu̍yɛ̍, o̍ kɔ̄ltā wāŋndā chīe̍e̍ya̍ ni᷄ŋ o̍ po̍o̍nyīāā ndu̍ ni̍, ō cho̍ o̍ pōūtā yɛ̍ndɛ̍ cho̍o̍ le̍.

⁴Le̍ tīīnda᷄ŋ Ki̍li̍tī to̍sa̍ mi̍ ŋ̄ tīīnda᷄ŋ Mɛ̍lɛ̄ka̍ wo̍ na̍a̍ ŋ̄ dīmi̍ dīōmnda̍ŋ nda᷅ŋ ni̍.

⁵Nyɛ̄ o̍ nyɛ̄ cho̍ a̍ na̍a̍ pi̍la̍ o̍kɔ̄ɔ̄ mī ŋ̄ kēlū yōŋgā a̍ ndu̍ māā ō nɔ̄lā mbō ke̍ na̍a̍ kpāāyāa̍ le̍ mī ŋ̄ nɔ̄la̍ wa̍llo̍ ho̍ō tōsā le̍. Kpāāya̍ na̍a̍ ŋ̄ sɔ̄lā le̍ wa̍llo̍ ho̍ō tōsāa̍ wo̍, Mɛ̄lɛ̄ka̍ pi̍la̍ ndu̍ yɔ̍ŋgū kpa̍a̍yā ko̍ŋ ni̍.

⁶Kpe̍ma̍ sɛ̍nɛ̄ī Mɛ̄lɛ̄ka̍ tōōsi̍a̍a̍ ho̍ō ndu̍ pi̍la̍ tɛ̄ɛ̄ŋ a̍ ŋ̄wāŋndā chīe̍e̍ wo̍, ndu̍ Mɛ̍lɛ̄ka̍ pi̍la̍ ndu̍ ke᷅ na̍a̍ kpāāyāa̍ ni̍ le̍ mī ŋ̄ nɔ̄la̍ wa̍llo̍ tōsāa̍ o̍ kpe̍ma̍ sɛ̍nɛ̄ī kōŋ bɛ̄ŋgu̍. Kpe̍ma̍a̍ ho̍ō ndu̍ ndu̍ cho̍ su̍ɛ̍i̍ wa̍ā o̍ sāwāla̍ po̍o̍nyīāā bɛ̄ŋgu̍ le̍. Kpe̍ma̍ cho̍ a̍ nyɛ̄ Nyi̍na̍ Mɛ̄lɛ̄ka̍a̍ dīmī wo̍ tōsāa̍ o̍kɔ̄ɔ̄ o̍ cho̍ ni̍. Kāni̍ fo̍ndōle̍, sāwāla̍ŋ la̍ hi᷅ŋ a̍ pīɔ̍mndo̍ ni̍. Kɛ̍ ndu̍yɛ̍, Nyi̍na̍ Mɛ̄lɛ̄ka̍a̍ ndu̍ ke᷅ wa᷅ŋnda̍ yōōmōo̍ ni̍.

⁷Sāwāla̍ Mɛ̄lɛ̄ka̍ ke̍ sīndɛ̄ Mūu̍sē le̍ na̍a̍ la̍ŋ, o̍ pōūtā yɛ̍ndɛ̍la̍ pu̍m chōo̍ Mɛ̄lɛ̄ka̍ pōōnyi̍a̍a̍ la̍ŋ sīndɛ̄ ni̍. Mɛ̄ɛ̍ o̍ po̍o̍nyi̍a̍a̍ la̍ŋ mbo̍ wā Mūu̍sē la̍ŋ yɔ̄ŋgōo̍, mi̍ nāŋɔ̄ɔ̍ Mɛ̄lɛ̄ka̍a̍ tāŋ o̍ hɔ̄lāa̍ Mūu̍sē wa̍. Mi̍ hɔ̄lla̍ yɔ̄nu᷄ŋ ndu̍ ŋɛ̍lɛ̄ŋgi̍ ŋɛ̍lɛ̄ŋgi̍ bɛ̍ndū. Ndu̍yɛ̍, mi̍ chē bɛ̍ɛ̍ mi̍ nāŋɔ̄ɔ̍ Mɛ̄lɛ̄ka̍ kōŋ ndu̍ o̍o̍ wa᷅ ni᷅ŋ fāŋa᷄ŋndo̍ lēchōo̍ Mūu̍sē o̍ hɔ̄l ni̍, kɛ̍ wāŋnda̍ I̍sɔ̄lūɛ̄ī nda̍ a̍a̍ nɔ̍lā mā nu̍a̍ Mūu̍sē hɔ̄lla̍ le̍, a̍ īŋɛ̄lɛ̄ŋgi̍ ŋɛ̍lɛ̄ŋgi̍e̍i̍. Nāa̍ nāŋɔ̄ɔ̍ Mɛ̄lɛ̄ka̍a̍ tōl lɔ̄ o̍ sāwāla̍ hi᷅ŋ a̍ pīɔ̍mndo̍ la̍ŋ yɔ̄ŋgōo̍ ni᷄ŋ,

⁸wa̍li̍ nyi̍na̍ Mɛ̄lɛ̄ka̍a̍ hīŋ tōsāa̍ wo̍ yɛ̄? Ndu̍ bɛ̍ɛ̍ nāŋɔ̄ɔ̍ Mɛ̄lɛ̄ka̍a̍ hīāū wa᷅ chōo̍ po̍lo̍ŋ.

⁹Tē nāŋɔ̄ɔ̍ Mɛ̄lɛ̄ka̍a̍ tōl le̍ sūɛ̍i̍ hi᷅ŋ a̍ nyɛ̄ pālāa̍ le̍ wāna̍ chi̍o̍o̍ ve̍ pɛ̍, ɔ̍ɔ̄ ni᷅ŋ sūɛ̍i̍ si̍i̍ŋgu̍u̍ ŋ̄wāŋndā chīe̍e̍ a̍ kɛ̍ndɛ̄ Mɛ̄lɛ̄ka̍ o̍ hɔ̄l le̍? Ndi̍ bɛ̍ɛ̍ nāŋɔ̄ɔ̍ Mɛ̄lɛ̄ka̍a̍ ō hīāū wa᷅ chōo̍ po̍lo̍ŋ.

¹⁰Sūɛ̍i̍ na̍a̍ ŋ̄ chu̍a̍ pāāndū māā ī na᷄ŋ ta̍u̍ ve̍, pɛ̄ŋgo̍o̍ ho̍ō ni᷅ŋ ŋ̄ chu̍e̍ lɛ̍ ndi̍ māā ī chō sūɛ̍i̍ na̍ŋ kpo̍so̍ŋ te̍. Kāni̍ fu̍u̍le̍, le̍ mɛ̄ɛ̍ sūɛ̍i̍ na̍ŋ mi̍ ī hīāū ke̍ŋ po̍lo̍ŋ nde̍ ī hīŋ yɛ̍.

¹¹Ndu̍yɛ̍, tē ō wa̍ pɛ̍ mī sūɛ̍i̍ nɔ̍ le̍ wāa̍ le̍ te̍le̍ŋ bīŋgi̍i̍ na̍a̍ ve̍ mī ŋ̄ chu̍a̍ ndi̍ pɛ̍ māā sūɛ̍i̍ na̍ŋ, ɔ̍ɔ̄ ni᷅ŋ sūɛ̍i̍ cho̍ le̍ fɛ̍ɛ̍ŋ a̍ fɛ̍ɛ̍ŋ nde̍? Ndi̍ hi̍a̍ū bɛ̍ɛ̍ na̍ŋɔ̄ɔ̄ po̍lo̍ŋ po̍lo̍ŋ.

¹²Tīīnda᷄ŋ na̍a̍ ŋ̄ nɔ̄ ho̍ō wo̍ ō tōsa̍ īsīōōŋ o̍ īsīōōŋ ī cho̍ na̍a̍ le̍.

¹³Na̍a̍ na̍a̍ ŋ̄ cho̍ māā Mūu̍sē le̍. Kāni̍ fo̍ndōle̍, ndu̍ ndu̍ mɛ̄ɛ̍ mī ndu̍ o̍o̍ la̍ndu̍ŋ ko̍lāa̍ o̍ hɔ̄l, yɔ̄ŋi̍ wāŋnda̍ I̍sɔ̄lūɛ̄ī nda̍ a̍a̍ chɔ̍ na̍ŋɔ̄ɔ̍ Mɛ̄lɛ̄ka̍a̍ o̍ chūwɔ̄ɔ̍ ndu̍ o̍ hɔ̄l.

¹⁴Kɛ̍ ndu̍yɛ̍, ō fāŋa̍ŋ o̍ Mūu̍sē kɔ̍ɔ̍lī, wāŋnda̍ ha̍ā bɛ̍ɛ̍ kɔ̄ltā ndāla̍ŋ lā chō lā kīndāā. Pāa̍le̍ hāūle᷅ŋ bɛ̍ɛ̍, kɔ̄ltā ndāla̍ŋ lā chō lā kīndāā, mɛ̄ɛ̍ nda̍ lāndū nu̍a̍ā kōlāa̍ wāŋndo̍ o̍ hɔ̄l lɛ̍. Le̍ he̍ī, ā tōfa̍ bɛ̍ɛ̍ o̍ Yāu̍ Kpe̍ma̍ Pa̍a̍ndōo̍ ni᷄ŋ ā si̍nā nyɛ᷅ o̍ di̍mī wo̍ pɛ̄ŋgu̍ le̍. Ndu̍yɛ̍, mɛ̄ɛ̍ mī wāŋndo̍ wa̍ o̍ dīōm pīlɛ̍ ni᷄ŋ nda̍ Ki̍li̍tī, mālāŋ kōlāa̍ ho̍ō fāŋāŋ.

¹⁵Pāa̍le̍ hāūle᷅ŋ bɛ̍ɛ̍, pɛ̄ŋgu̍ o̍ pɛ̄ŋgu̍ nda̍ tōfa̍ o̍ yāu̍la̍ Mūu̍sēla̍ŋ nda᷅ŋ ni᷄ŋ ā si̍nā nyɛ᷅ la̍ di̍mi̍ wo̍ pɛ̄ŋgu̍ le̍, kāni̍ fu̍u̍le̍, kōlāa̍ ho̍ō chō wɔ̄ ō lāndāā nda̍ o̍ lākɔ̄l.

¹⁶Kɛ̍ ndu̍yɛ̍, pɛ̄ŋgu̍ o̍ pɛ̄ŋgu̍ wāŋndo̍ ō mūli̍ŋ o̍ Māsānɔ̄ɔ̍ Mɛ̄lɛ̄ka̍ lo̍ pɛ̍, kōlāa̍ ho̍ō fāŋa̍ŋ.

¹⁷Ndu̍yɛ̍, Māsānɔ̄ɔ̍ Mɛ̄lɛ̄ka̍ na̍a̍ ŋ̄ chō ho̍ō dīmīo̍o̍ a̍ ndu̍ o̍kɔ̄ɔ̄ na̍ŋ ndo̍, ndu̍ cho̍ Nyi̍na̍ Mɛ̄lɛ̄ka̍a̍ ni̍. Bā o̍ bā Māsānɔ̄ɔ̍ Mɛ̄lɛ̄ka̍ Nyi̍nā ndɔ̄ɔ̍ wa̍ pɛ̍, ā bāŋa᷄ŋnda̍ wāŋnda̍ lo̍ŋ a̍ wa᷅ ni̍.

¹⁸Kɛ̍, na̍a̍ kpo̍u̍ kōlā cho̍ o̍ la̍ndāā na̍a̍ na̍a̍ o̍ hɔ̄l te̍. Le̍ he̍ī, hɔ̄lāā nāa̍ nda̍ chɔ᷅m na̍ŋɔ̄ɔ̍ Māsānɔ̄ɔ̍ Mɛ̄lɛ̄ka̍a̍ ni̍. Ŋ̄ chō hīōūwɔ̄ɔ̍ lāchī a̍ sīmnɔ᷄ŋndo̍ māā ndu̍. Te̍le̍ŋ o̍ te̍le̍ŋ ŋ̄ chō hīōūwɔ̄ɔ̍ lāchī a̍ nāŋɔ̄ɔ̄ sɛ̄nɛ̄ī. Ndu̍yɛ̍, Māsānɔ̄ɔ̍ Mɛ̄lɛ̄ka̍ pi̍la̍ ndu̍ cho̍ wa̍llo̍ ho̍ō ni̍, ndu̍ yɔ̍nūŋ ni̍ māā Nyi̍na̍ Mɛ̄lɛ̄ka̍a̍.