Read Southern Kisi Kɔ̄li̍ŋtīāŋ Di̍i̍ŋ Ndɔ̄ɔ̍ 9 Bible Online

Kɔ̄li̍ŋtīāŋ Di̍i̍ŋ Ndɔ̄ɔ̍ 9 - Southern Kisi bible

Kɔ̄li̍ŋtīāŋ Di̍i̍ŋ Ndɔ̄ɔ̍ 9

¹A̍ mālāa̍ yɔ̄ŋgōo̍ le̍ wānāa̍ Mɛ̄lɛ̄ka̍a̍ o̍kɔ̄ɔ̄ ndu̍ ndu̍, I̍ po̍o̍nyīāl nya̍ bɛ̍ɛ̍ ya̍u̍ le̍ ndi̍ le̍.

²Kāni̍ fu̍u̍le̍, I̍ si̍nā māā le̍ te̍le̍ŋ o̍ te̍le̍ŋ lā chō ā bɛ̄ɛ̄ndīa̍ŋ le̍ mālā wāā le̍nde̍ yɔ̄ŋgōo̍. I̍ ke̍lū ni᷅ŋ bɛ̍ɛ̍ ndi̍ a̍ yōŋgā wānāā lāāla᷄ŋnda̍ o̍ hɔ̄l o̍ lɛ̄ŋndē Māsīdo̍o̍nīāāle̍ŋ ni᷄ŋ. Mi̍ di̍mūl nda̍ māā nya̍ wānāā lāāla᷄ŋnda̍ o̍ lɛ̄ŋndē Āke̍yāle̍ŋ ni᷄ŋ, māā chɔ̍ŋ ni᷅ŋ a̍ wɔ̄sīo̍o̍ lāpɔ̄m mbo̍ fūūla᷅ŋ a̍ pɛ̄ŋgo̍o̍ ho̍ō, māā lā chō ā bɛ̄ɛ̄ndīa̍ŋnda̍ le̍ mālāa̍ o̍ nya̍a̍ yɔ̄ŋgōo̍ le̍ wānāa̍ Mɛ̄lɛ̄ka̍a̍, a̍ cho̍ ā tāmbɛ̍i̍ya̍. Ndu̍yɛ̍, le̍ yēēmɛ̍i̍ nya̍ chɔ᷄m ta̍u̍ le̍ mālāa̍ ho̍ō yɔ̄ŋgōo̍ ve̍, mi̍ wānāā fāŋgā fa̍ŋgā sɔ̄lā yēēmɛ̍i̍ le̍ mālāa̍ yɔ̄ŋgōo̍.

³Kɛ̍ ndu̍yɛ̍ o̍ ko̍ŋ ni̍ŋ kpo̍u̍, I̍ cho̍ chāāŋāā nāa̍ ha̍ā vīōmɔ̄ɔ̍ nāa̍ nya̍ chūā le̍ mī lā wa̍ pɔ̄ɔ̄ ā bɛ̄ɛ̄ndīa̍ŋ a̍ mālāa̍ o̍ nya̍a̍. Kāni̍ fo̍ndōle̍, I̍ di̍mi̍ māā lā chō wā ā bɛ̄ɛ̄ndīa̍ŋnda̍ a̍ ndu̍. I̍ ye̍e̍ma̍ kpo̍so̍ŋ yōŋga̍ na̍a̍ ŋ̄ kēlū ko̍ŋ nda̍ o̍ hɔ̄l lo̍ mbō sīmnu᷄ŋ su̍ɛ̍i̍ fo̍ndō le̍.

⁴Tē I̍ wa̍ hūnɔ̄ɔ̍ pɛ̍, I̍ cho̍ hūnɔ̄ɔ̄ a̍ chāāŋāā nāā wa̍nāā lāāla᷄ŋnda̍ a̍ ti᷄ŋ fūlāa̍ o̍ lɛ̄ŋndē Māsīdo̍o̍nīāāle̍ŋ ni᷄ŋ. Tē ō lo̍ o̍ ko̍ŋ pɛ̍, mī ŋ̄ hīŋ mā kōma̍l lā I̍ ve᷅ o̍ bɛ̍ɛ̍ndīa̍ŋ a̍ mālāa̍ o̍ nya̍a̍ le̍, ō wā su̍ɛ̍i̍ lāsi̍ɔ̍mbu̍ le̍ nya̍. Ndu̍yɛ̍, ō fāŋa̍ŋ ndɔ̍ bɛ̍ɛ̍ o̍ si̍ɔ̍mbu̍la̍ŋ la̍ nya̍la̍ŋ kɔ̄ɔ̄lī, na̍a̍ ŋ̍ di̍mi̍ bɛ̍ɛ̍ māā ŋ̄ lāāla̍ŋ a̍ nya̍ wa̍, bīyɔ̄ɔ̍ si̍ɔ̍mbu̍la̍ŋ lā bīī na̍a̍ ni̍.

⁵Le̍la̍ŋ ya̍ I̍ yi̍ya̍ŋ ni̍ māā ō bɛ̄ndā mī chāāŋāā nāa̍ ha̍ā hīōū pɔ̄ɔ̄ lāchī le̍ mī lā bɛ̄ɛ̄ndi̍a̍ŋ pɔ̍ɔ̍ a̍ nyɛ̄ nya̍ chu̍a̍ būŋgɛ̄i̍ le̍ yɔ̄ŋgōo̍ wo̍. O̍ ko̍ŋ, tē ŋ̄ hīŋ pɛ̍ mī ŋ̄ kōma̍l nya̍ ō bɛ̄ɛ̄ndīa̍ŋ a̍ ndu̍, ko̍ŋ chɔ᷅m māā nya̍ pi̍la̍ chɛ̍la᷅ŋ le̍ ndu̍ yɔ̄ŋgōo̍ ni̍, māā wānā o̍ wānā ki̍ndi̍la̍ nya̍ le̍ ndu̍ yɔ̄ŋgū le̍.

⁶Nyɛ̄ ya̍ I̍ hɛ̍na̍ŋ le̍ dīmīo̍o̍ wo̍ cho̍ ni̍ māā wāna̍ wa̍ā yɛ̍i̍ye̍ nyɛ̄ pɔ̄mbɔ̄ wo̍, nyɛ̄ pɔ̄mbɔ̄ ko̍ o̍ ku̍a̍ū ni̍. Ndu̍yɛ̍, wāna̍ wa̍ā yɛ̍i̍ye̍ ta̍u̍ wo̍, ndu̍ ku̍a̍ū ta̍u̍ ni̍.

⁷Le̍la̍ŋ, wānā o̍ wānā mɛ̄ɛ̍ ŋ̄ kɛ̄ɛ̄sīāā o̍ kɔ̄l nūmndo̍ ni᷄ŋ le̍ mālāa̍ yɛ̍, yɔ̍ŋgu̍ le̍nde̍. Wānā wa̍ yɔ̄ŋgōo̍ pɛ̍, yɔ̍ŋgū a̍ kɔ̄l kīīsa᷄ŋ te̍. Ndu̍yɛ̍, wānā o̍ wānā yɔ̍ŋgū ndu̍ mɛ̄ɛ̍ nda̍ yɔ̄ŋ ko̍ āā, kīndīlāa̍ nda̍ kīndi̍la̍ nu̍m ni̍ le̍. Kāni̍ fu̍u̍le̍, Mɛ̄lɛ̄ka̍ ō kāāla̍ wāna̍ yɔ̍ŋgū ho̍ō a̍ kɔ̄l chɛ̄lāa̍ wo̍.

⁸Ndu̍yɛ̍, Mɛ̄lɛ̄ka̍ nɔ̄lā mbō ke̍ nya̍ nyɔ̄ɔ̍ŋ ta̍u̍ mbō hīōū bɛ̍ɛ̍ mɛ̄ɛ̍ bā nyā ha̍vɛ̍i̍yo̍ chō yɛ̍. O̍ ko̍ŋ, nyɛ̄ o̍ nyɛ̄ nya̍ hāu̍ bā le̍ ndu̍ mī lā nɔ̄ ndu̍ te̍le̍ŋ o̍ te̍le̍ŋ. Ndu̍yɛ̍, lā nɔ̄lā mī lā yɔ̄ŋgu̍ ta̍u̍ le̍ sɔ̄ɔ̍ŋ kɛ̍ndɔ᷄ŋ kpo̍u̍ tōsāa̍.

⁹Kāni̍ fo̍ndōle̍, ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Wānā kɛ̍ndɔ̄ɔ̍ ndu̍ ndu̍, a̍ kɔ̄l chɛ̄lāa̍ o̍ ke᷅ wa̍nā ta̍mbɛ̍i̍yo̍ ni̍. Le̍ fɛ̍ɛ̍ŋ a̍ fɛ̍ɛ̍ŋ ā chō wā lōōnɔ᷄ŋndo̍ a̍ kɛ̄ndɛ̄i̍ o̍ to̍sa̍ ve̍.”

¹⁰Mɛ̄lɛ̄ka̍ o̍ yɔ̍ŋgū ho̍ō yɛ̄i̍ye̍ le̍ wānā to̍sāā īchīɔ̍ɔ̍ wo̍, ndu̍yɛ̍ mbō yɔ̄ŋgū nyɛ̄ dīa̍a̍ le̍ dīo̍o̍ wo̍, nya̍ bɛ̍ɛ̍ ō chō nya̍ yɛ̄īyi̍i̍ nya̍ hāu̍ bā le̍ ndi̍ ve̍ kē. Ndu̍yɛ̍, ō chō tōsā mī yɛ̄i̍ye̍ he̍ī ī na᷄ŋ, o̍ ko̍ŋ kɔ̍ɔ̍lī, mī lā sɔ̍la̍ tɔ̄nɔ̄ bɛ̍ndōo̍ o̍ kɛ̄ndɛ̄i̍ nya̍ tōsa̍l wāŋnda̍ ve̍ ni᷄ŋ.

¹¹Mɛ̄lɛ̄ka̍ chō tōsā mī lā nɔ̄ nyɔ̄ɔ̍ŋ ta̍u̍ ta̍u̍ le̍ mī lā nɔ̄la̍ mī lā tōsa̍l wāŋnda̍ kɛ̄ndɛ̄i̍ le̍ te̍le̍ŋ o̍ te̍le̍ŋ. O̍ he̍ī ni᷄ŋ, tē ŋ̄ ke̍ nda̍ mālā nya̍ yɔ̄ŋgu̍ wo̍ pɛ̍, wānāā fāŋgā fa̍ŋgā nɔ̄lā mā yi᷄l Mɛ̄lɛ̄ka̍ ba̍li̍ka̍ le̍ mālā kōŋ.

¹²Wa̍li̍ kɛ̍ndɛ̄ nya̍ chō ho̍ō tōsāa̍ wo̍, ō cho̍ ko̍ wa̍nāā bā hāvɛ̍i̍ya̍ a̍ cho̍ wānāa̍ Mɛ̄lɛ̄ka̍a̍ tɛ̄ɛ̄ŋ nda̍ le̍ o̍ cho̍ mālā le̍. Ō tōsā ni̍ŋ mī wāŋnda̍ ta̍u̍ ta̍u̍ ā me᷄l Mɛ̄lɛ̄ka̍ ba̍li̍ka̍a̍ cha̍po̍.

¹³Ndu̍yɛ̍ vɛ̍lɛ̄, wa̍li̍ kɛ̍ndɛ̄ nya̍ chō ho̍ō tōsāa̍ wo̍ chɔ᷄m māā lā lāāla̍ŋ a̍ Yōōŋgū Kɛ̄ndɛ̍ Ki̍li̍tīo̍o̍ a̍ tōnya̍. He̍ī tōsā mī wāŋnda̍ līsa̍ Mɛ̄lɛ̄ka̍. Kāni̍ fu̍u̍le̍, Yōōŋgū Kɛ̄ndɛ̍ Ki̍li̍tī nya̍ dīmi̍ māā lā lāāla̍ŋ ndo̍ le̍ mɛ̄ɛ̍ nya̍ chō nyɛ̄ o̍ di̍mi̍ wo̍ tōsāa̍ yɛ̍. Ndu̍yɛ̍ o̍ ko̍ŋ kɔ̍ɔ̍lī, wāŋnda̍ nɔ̄lā mā līsa̍ Mɛ̄lɛ̄ka̍ le̍ mɛ̄ɛ̍ nya̍ chɛ᷄l a̍ kɔ̄ltā nyāla̍ŋ fa̍ū le̍ mī lā yɔ̄ŋgu̍ nyɛ̄m nya᷄ŋ le̍ nda̍ a̍ wānā o̍ wānā yɛ̍.

¹⁴Kɔ̄ltā wāŋnda̍ ha̍ā lā mūli̍ŋ o̍ nya̍ lo̍ kpe̍e̍kpe̍i̍, ndu̍yɛ̍, ma̍ wā Mɛ̄lɛ̄ka̍ pīɛ̄īyo̍ le̍ nya̍, kāni̍ fu̍u̍le̍, le̍ kɛ̄ndɛ̄ī bɛ̍ndūī Mɛ̄lɛ̄ka̍ tōsa̍ he̍ī o̍ nya̍ ni᷄ŋ nde̍.

¹⁵La̍ ŋ̄ mēlnu᷅ŋ Mɛ̄lɛ̄ka̍ ba̍li̍ka̍ le̍ kɛ̄ndɛ̄i̍ ndūɛ̄ī bɛ̍ndūe̍i̍ he̍ī, ī wānā nɔ̍lā bɛ̍ɛ̍ he̍ī chɔ̄m te̍ ve̍.