Read Southern Kisi Kāle̍e̍sīāŋnda̍ 1 Bible Online

Kāle̍e̍sīāŋnda̍ 1 - Southern Kisi bible

Kāle̍e̍sīāŋnda̍ 1

¹Ya̍ Pɔ̍ɔ̄, ya̍ cho̍ ho̍ō wāna̍ Chi̍i̍sū ve᷅m māā hɔ̄ltē ndɔ̄ wo̍, ya̍ cho̍ yāu̍wo̍ ho̍ō pōōnyīa̍a̍ ni̍. I̍ cho̍ ndu̍ pōōnyīa̍a̍ nāa̍ nya̍ ku̍ndālā wānāā lāāla᷄ŋnda̍ chūā nya̍ cho̍ o̍ būŋgɛ̄ī Kāle̍e̍sīāve̍ ni᷄ŋ nda̍. Ya̍ ni̍, na̍a̍ chāāŋāā nīāā wa̍nāā lāāla᷄ŋnda̍ ā na̍a̍ ŋ̄ chō na̍ŋ nda̍ kpo̍u̍, ŋ̄ yi᷄l nya̍ lāpi̍. Lā sīna̍ pɛ̍ŋgu̍ māā ō cho̍ wa᷅na̍ chi̍e̍e̍ le̍ hɛ̍li̍ ya̍ Pɔ̍ɔ̄ le̍ wāa̍ wāna̍ Chi̍i̍sū ve᷅m māā hɔ̄ltē ndɔ̄ wo̍ le̍. Ndu̍yɛ̍ ō cho̍ bɛ̍ɛ̍ wa᷅na̍ chi̍e̍e̍ le̍ nda̍ vēm le̍ ya̍ hɛ̄līo̍o̍ le̍ wāa̍ wāna̍ Chi̍i̍sū ve᷅m māā hɔ̄ltē ndɔ̄ wo̍ le̍. Chi̍i̍sū Ki̍li̍tī ni̍, a̍ Mɛ̄lɛ̄ka̍ Fi̍nyā nāa̍, o̍ mi̍ŋgi̍ Chi̍i̍su̍ yōōmū wo̍, nda̍ hɛ̍li̍ ya̍ le̍ wāa̍ wāna̍ Chi̍i̍sū ve᷅m māā hɔ̄ltē ndɔ̄ wo̍ ni̍.

³I̍ cho̍ pīɛ̄īle̍ŋ māā Mɛ̄lɛ̄ka̍ Fi̍nyā nāa̍ a̍ Māsānɔ̄ɔ̍ Chi̍i̍sū Ki̍li̍tī māā ā yīya̍ŋ nya̍ chōo̍, ndu̍yɛ̍ mā ke̍ nya̍ kɔ̄l nyūlōo̍ fɔ̍.

⁴Ndu̍ Ki̍li̍ti̍ chɛ̍l ni̍ mbo̍ wū le̍ mbō sōli̍ na̍a̍ o̍ yɔ̄ŋndā wɔ̄ɔ̍ŋndā na̍a̍ ŋ̄ tōsa̍ la̍ŋ ni᷄ŋ. Ō tōsa̍ he̍ī yɔ̄ŋi̍ na̍a̍ ŋ̄ hīo̍u̍ la̍chi̍ a̍ wāa̍ o̍ nīīlūlā yɔ̄ŋ wɔ̄ɔ̍ŋnda̍ŋ ni᷄ŋ mɛ̄ɛ̍ wāŋnda̍ te̍le̍ŋndo̍ ho̍ō a̍ cho̍ lēni᷄ŋ yɛ̍. Nyɛ̄ Mɛ̄lɛ̄ka̍ Fi̍nyā nāa̍ ndu̍ o̍o̍ hɛ̍na̍ŋ ndo̍, ndu̍ o̍ to̍sa̍ ko̍ŋ le̍ na̍a̍ ni̍.

⁵Sāŋgālāa̍ ō kēnu̍ŋ Mɛ̍lɛ̄ka̍ le̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.

⁶Nyɛ̄ nya̍ tōsa̍ wo̍ bīī ya̍ kɔ̄ndɔ̄fi̍li̍ bɔ̄ɔ̍. Mɛ̄lɛ̄ka̍ lāŋga̍ chu̍ā nya̍ le̍ mī lā wa̍ wānāā lāāla᷄ŋnda̍. Ō tōsa̍ he̍ī sa̍na̍a̍ o̍ kɛ̄ndɛ̄ī bɛ̍ndūī Ki̍li̍tī to̍sa̍l nya̍ ve̍ ni᷄ŋ. Mɛ̄lɛ̄ka̍ kōŋ ndu̍ nya̍ kāndu̍ ni᷅ŋ bɛ̍ɛ̍ ma̍lɔ̄ɔ̍ nu̍a̍ā le̍ yōōŋgū chēle̍ŋ ni̍?

⁷Kɛ̍ o̍ sa̍na̍a̍ īsɔ̄ɔ̍ ni᷄ŋ, ō fūla̍ o̍ Yōōŋgū Kɛ̄ndɛ̍ Mɛ̄lɛ̄ka̍ na̍a̍ ŋ̄ dīmu̍l nya̍ o̍ tāse̍la̍ ndɔ̄ɔ̍ wo̍ kɔ̄ɔ̄lī, yōōŋgū o̍ yōōŋgū kɛ̄ndɛ̍ Mɛ̄lɛ̄ka̍ chēle̍ŋ cho̍ le̍. Le̍ sa̍bū ya̍ I̍ cho̍ dīōmnda̍ŋ nda᷅ŋ dīmīo̍o̍ wo̍ cho̍ ni̍, māā wānāā pūm ā chō nya̍ bōlle̍ hīŋndo̍. Ndu̍yɛ̍, Yōōŋgū Kɛ̄ndɛ̍ Mɛ̄lɛ̄ka̍a̍ ho̍ō a̍ Ki̍li̍tī o̍kɔ̄ɔ̄, ndu̍ nda̍ hɛ̄na̍ŋ mā māŋga̍la̍ nyɛ̄ chēle̍ŋ ni̍.

⁸Kɛ̍ ndu̍yɛ̍, ō fūla̍ o̍ Yōōŋgū Kɛ̄ndɛ̍ Mɛ̄lɛ̄ka̍ na̍a̍ ŋ̄ chɔ᷄m nya̍ wo̍ kɔ̄ɔ̄lī, ā yɔ᷄ŋ bɛ̍ɛ̍ āā na̍a̍ pi̍la̍a̍ ha̍ā ni̍, ndu̍yɛ̍ ā yɔ᷄ŋ bɛ̍ɛ̍ āā ki̍i̍la̍nɔ̍ Mɛ̄lɛ̄ka̍ o̍ chɛ̍ŋ ɛ̄chɛ̍nɛ̄ wo̍ ni̍, tē wānā o̍ wānā chɔ̍m nya̍ yōōŋgū chēle̍ŋ pɛ̍, wānā ko̍ŋ nu̍a̍ā o̍ ku̍ā o̍ fo̍ndāŋ nyɛ̄ nɛ̄īyāā fɛ̍ɛ̍ŋ fɛ̍ɛ̍ŋndo̍ fɔ̍.

⁹I̍ mi̍ŋgī wɔ̍ sōndō o̍ nyɛ̄ na̍a̍ ŋ̄ chɔ᷄m ni᷅ŋ pāāndū wo̍ chōo̍. Ō fūla̍ o̍ Yōōŋgū Kɛ̄ndɛ̍ Mɛ̄lɛ̄ka̍ na̍a̍ ŋ̄ chɔ᷄m nya̍ o̍ tāse̍la̍ ndɔ̄ɔ̍ mi̍ lā chɛ̄l lo̍ kɔ̄ɔ̄lī, wānā o̍ wāna̍ chɔ̍m nya̍ yōōŋgū chēle̍ŋ te̍ŋge̍ŋ o̍ ko̍ŋ kɔ̍ɔ̍lī pɛ̍, nu̍a̍ā wānā ko̍ŋ kūā o̍ fo̍ndāŋ nyɛ̄ pālāa̍ nāa̍ Mɛ̄lɛ̄ka̍ dūāū wa̍nāā wɔ̄ɔ̍ŋnda̍ wa̍ fɔ̍.

¹⁰Dīōmndā ya̍ I̍ so̍ō la᷅ŋ nda̍ŋ, lā chɔ᷄m ma̍chɔ̍māā nu̍a̍ā māā kīndī le̍ ya̍ I̍ cho̍ le̍ mī wāna̍ chi̍e̍e̍ chu̍a̍ ya̍ māā I̍ cho̍ wānā kɛ̍ndɛ̄ le̍. Ō cho̍ ke̍ŋ kpo̍so̍ŋ te̍. Mɛ̄lɛ̄ka̍ ya̍ I̍ hɛ̍na̍ŋ ni̍ mī ndu̍ pi̍la̍ di̍mi̍ māā I̍ cho̍ wānā kɛ̍ndɛ̄. Ndu̍yɛ̍, ō cho̍ ki̍ndī le̍ ya̍ I̍ cho̍ le̍ mī fu̍la̍ tɔ̍ɔ̍ ŋ̍wa᷅ŋndā chīe̍e̍ tɛ̍ɛ̄ŋ te̍. Kāni̍ fo̍ndōle̍, tē ya̍ i̍i̍ wa̍ wɔ̄ kīndīo̍o̍ le̍ mī fu̍la̍ tɔ̍ɔ̍ ŋ̍wa᷅ŋndā chīe̍e̍ tɛ̍ɛ̄ŋ pɛ̍, ya̍ i̍i̍ ve᷅ bu̍ɛ̍i̍ Ki̍li̍tī le̍.

¹¹Chāāŋāā nīa̍a̍, I̍ hɛ̍na̍ŋ nya̍ mī lā sīna̍ pɛ̄ŋgu̍ māā Yōōŋgū Kɛ̄ndɛ̍ Mɛ̄lɛ̄ka̍ ya̍ I̍ cho̍ ho̍ō wāŋnda̍ chɔ̄mndo̍ wo̍ māā ō cho̍ kɛ̍ɛ̍sīāā wāna̍ chi̍e̍e̍ le̍.

¹²Ō cho̍ wa᷅na̍ chi̍e̍e̍ le̍ chɔ̍m ya̍ Yōōŋgū Kɛ̄ndɛ̍ Mɛ̄lɛ̄ka̍a̍ le̍, ndu̍yɛ̍ wāna̍ chi̍e̍e̍ pɛ̍ɛ̍ku̍ ya̍ ndu̍ le̍. Chi̍i̍sū Ki̍li̍tī pi̍la̍ kpe̍e̍kpe̍i̍ chɔ̍m ya̍ Yōōŋgū Kɛ̄ndɔ̄ɔ̍ ho̍ō ni̍.

¹³Ā dīmu̍l nya̍ ni᷅ŋ a̍ ya̍ Pɔ̍ɔ̄ o̍kɔ̄ɔ̄, a̍ mɛ̄ɛ̍ ya̍ i̍i̍ to̍sā pa̍a̍ndū a̍ ku̍ndā wānāā lāāla̍ŋa̍a̍ Mɛ̄lɛ̄ka̍a̍ yɛ̍. Bōōndi̍i̍ ke̍ŋ I̍ wa̍ wɔ̄ Mɛ̄lɛ̄ka̍ pīɛ̄īyo̍ o̍ ka̍ā nāa̍ māChu̍ūwo̍ ni᷄ŋ. Nyɛ̄ pālāā bɛ̄ndū bɛ̍ndōo̍ pi̍la̍ ya̍ i̍i̍ tu̍sī nda̍ chōo̍ ni̍. I̍ wa̍ hīōūwɔ̄ɔ̍ lāchī a̍ kīndī bɛ̄ndū bɛ̍ndōo̍ pi̍la̍ le̍ ku̍ndā wānāā lāāla᷄ŋnda̍ tɛ̄ɛ̄mbūūwo̍.

¹⁴Mi̍ I̍ ki̍ndī kpe̍e̍kpe̍i̍ le̍ ka̍ā fi̍nyāā nāā ma̍māa̍ pɛ̄ɛ̄ku̍ na̍a̍ wo̍ chūa̍a̍. Chāāŋāā nīāā Chu̍ūwa̍ ā na̍a̍ ŋ̍ si̍i̍ma᷅ŋ nda̍ ā ka̍ ka̍, I̍ wa̍ nda̍ lāchī a̍ Mɛ̄lɛ̄ka̍ pīɛ̄īyo̍ o̍ ka̍ā nāa̍ māChu̍ūwo̍ ni᷄ŋ.

¹⁵Kɛ̍ o̍ ko̍ŋ ni̍ŋ kpo̍u̍, mi̍ Mɛ̄lɛ̄ka̍ tōsāl la̍ kɛ̄ndɛ̄i̍ ndūɛ̍i̍. Mbo̍ vēēlū ya̍ le̍ mī I̍ to̍sa̍ wa̍llo̍ le̍ ndu̍. Nda̍ a̍a̍ vi̍lu̍ wɔ̍ ya̍ bɛ̍ɛ̍ le̍ mi̍ Mɛ̄lɛ̄ka̍ tōsā he̍ī. O̍ ko̍ŋ kɔ̍ɔ̍lī, mi̍ bōōnde̍i̍ fūūlūū le̍ mī Mɛ̄lɛ̄ka̍

¹⁶chɔ᷄m ya̍ Po̍ ndɔ̄ɔ̍ le̍ mī I̍ si̍na̍ ndu̍ kɛ̍sɛ̍ kɛ̍sɛ̍. Ō tōsa̍ he̍ī le̍ mī I̍ chɔ̍m wānāa̍ cho̍ a̍ Chu̍ū le̍ wa̍ Yōōŋgū Ndɔ̄ Kɛ̍ndɔ̄ɔ̍. Ndu̍yɛ̍ I̍ nyu̍na̍ wa̍nā o̍ wānā o̍ bo̍o̍ndi̍i̍ ke̍ŋ le̍ mbō ke̍ ya̍ sīlā a̍ ndi̍ o̍kɔ̄ɔ̄ le̍.

¹⁷Wānāa̍ wa̍ wānāā Chi̍i̍sū ve᷅m māā hɔ̄ltē ndɔ̄ ya̍ tāse̍ wa̍ bɛ̍ɛ̍, I̍ ku̍e̍ na̍a̍ nda̍ chūā Chūlu̍sɛ̄lɛ̄m le̍ mī ŋ̄ sūūki̍āŋ a̍ ndi̍ o̍kɔ̄ɔ̄ le̍. O̍ lɛ̄ŋndē Ālu̍e̍e̍bīāāle̍ŋ ni᷄ŋ ko̍ni̍ ya̍ I̍ ku̍ɛ̄ sa̍kpō ni̍. Chɔ̄nɔ᷄ŋndo̍ lo̍ŋ, mi̍ I̍ mi̍i̍ŋgū Dāma̍si̍kɔ̍ɔ̄ chi̍e̍e̍.

¹⁸O̍ ko̍ŋ kɔ̍ɔ̍lī, mɛ̄ɛ̍ wɔ̄sīla̍ŋ lā hīōū lā yāa̍ mi̍ ku̍ā Chūlu̍sɛ̄lɛ̄m le̍ sūūki̍āŋndo̍ a̍ Pītɛ̍. Mɛ̄ɛ̍ ya̍ I̍ ku̍ɛ̄, na̍a̍ ndu̍ mi̍ ŋ̄ chīī lo̍ŋ pa̍lɛ̍i̍ tɔ̍ a̍ ī ŋūɛ̍ɛ̍nu̍.

¹⁹Wā ya̍ I̍ wa̍ ko̍ŋ lo̍ŋ ndo̍, mɛ̄ɛ̍ na̍a̍ Chēmi̍si̍ mi̍ ŋ̄ chīīki̍āŋ, Māsānɔ̍ nāa̍ Chi̍i̍sū pɔ̄mbɔ̄ ndɔ̄. Ō fūla̍ o̍ ndu̍ kɔ̍ɔ̍lī, ŋ̄ chīīki̍āŋ ndɛ̍ na̍a̍ wānā che᷅le̍ŋ ō Chi̍i̍sū ve᷅m māā hɔ̄ltē ndɔ̄ wo̍ le̍.

²⁰Tōnya̍a̍ kɛ̍sɛ̍ kɛ̍sɛ̍ ya̍ I̍ cho̍ dīmīo̍o̍ ni̍. Le̍ Mɛ̄lɛ̄ka̍ kpe̍e̍kpe̍i̍ ya̍ cho̍ dīōmnda̍ŋ nda᷅ŋ dīmīo̍o̍ ni̍. Ō cho̍ la̍cho̍o̍ le̍.

²¹O̍ ko̍ŋ kɔ̍ɔ̍lī, mi̍ I̍ ku̍ā o̍ chi̍o̍o̍ŋ ŋ̄ pūm o̍ būŋgɛ̄ī Si̍i̍lūīāve̍ ni᷄ŋ a̍ būŋgɛ̄ī Sīli̍i̍sīāāve̍.

²²Bōōndi̍i̍ ya̍ I̍ ku̍ɛ̄ ke̍ŋ lo̍ŋ nde̍, wānāā lāāla᷄ŋnda̍ o̍ ku̍ndālā yɛ̍ yɛ̍la̍ŋ ni᷄ŋ o̍ lɛ̄ŋndē Chūdi̍a̍āle̍ŋ ni᷄ŋ nda̍ a̍a̍ chi̍ wɔ̍ ya̍ lē pīlɛ̍ le̍.

²³Tɔ̍ɔ̍ ko̍ni̍ nda̍ a̍a̍ tu̍ɛ̍ī a̍ ya̍ o̍kɔ̄ɔ̄ ni̍. Kāni̍ fo̍ndōle̍, wāŋnda̍ wa̍ nda̍ dīmūllo̍ āā, “Lāŋu̍nɔ̍ wa̍ pāāndū na̍a̍ nyɛ̄ pālāa̍ tūsīo̍o̍ chōo̍ wo̍, ndu̍ bɛ̍ɛ̍ ō chō ni᷅ŋ wāŋnda̍ chɔ̄mndo̍ a̍ Chi̍i̍sū tīīnda᷄ŋndo̍ o̍kɔ̄ɔ̄, sūɛ̍i̍ o̍ wa̍ kīndīo̍o̍ le̍ tɛ̄ɛ̄mbūūwo̍ ve̍.”

²⁴O̍ he̍ī ni᷄ŋ, mi̍ wāŋnda̍ sāŋgālā Mɛ̄lɛ̄ka̍ le̍ wa̍li̍ o̍ to̍sa̍ o̍ yōōmū nūu̍ ni᷄ŋ ndo̍.