Read Southern Kisi Kāle̍e̍sīāŋnda̍ 2 Bible Online

Kāle̍e̍sīāŋnda̍ 2 - Southern Kisi bible

Kāle̍e̍sīāŋnda̍ 2

¹Mɛ̄ɛ̍ wɔ̄sīla̍ŋ lā hīōū tɔ̍ a̍ lā hīɔ̍ɔ̍lu̍, mi̍ I̍ mi̍i̍ŋgū Chūlu̍sɛ̄lɛ̄m na̍a̍ Ba̍a̍na̍bāā. Wāa̍ kɔ̄la̍ŋ, mi̍ ŋ̄ kūā a̍ po̍ chu̍a̍ pīāāndōo̍ kɔ̄ɔ̄lī, dīōla̍ŋ āā, Ta̍i̍tɔ̄ɔ̄.

²Kāni̍ fo̍ndōle̍, Mɛ̄lɛ̄ka̍ chɔ̍m ya̍ ni̍ māā ya̍ I̍ kɔ̍. Mɛ̄ɛ̍ na̍a̍ ŋ̄ fūūlu̍u̍, mi̍ I̍ bi̍ī bɔ̄ŋa᷅ŋndo̍ a̍ lāŋgba̍ā kālla̍ o̍ ku̍ndā wānāā lāāla᷄ŋnda̍ chōo̍ na̍a̍ kpe̍e̍le̍. Mi̍ I̍ do̍u̍nu᷄ŋ nda̍ ko̍na̍ kpo̍lo̍to̍to̍ a̍ mɛ̄ɛ̍ ya̍ I̍ wa̍ wānāa̍ cho̍ a̍ Chu̍ū le̍ wa̍ Yōōŋgū Kɛ̄ndɛ̍ Mɛ̄lɛ̄ka̍ dīmūllo̍ yɛ̍. Kāni̍ fu̍u̍le̍ yɔ̄ŋi̍ wa̍li̍ o̍ wa̍li̍ ya̍ I̍ cho̍ tōsāa̍ kpo̍u̍, ndu̍ o̍o̍ si̍mnu᷄ŋ nyɛ᷅ fo̍ndō fu̍u̍.

³Mi̍ chē bɛ̍ɛ̍ chāa̍ŋ nūu̍ Ta̍i̍tɔ̄ɔ̄ ō na̍a̍ ŋ̄ kūɛ̄ wo̍ ndu̍ Kīli̍kīi̍nɔ̍ɔ̍ o̍ cho̍ ni̍, kɛ̍ lāŋgba̍ā kālla̍ ā be᷄ŋ ndu̍ chōo̍ māā mɛ̄ɛ̍ mbō sɔ̄la̍ hīvīo̍o̍ o̍ chīɛ̄ī kɔ̄ɔ̄lī ka̍ŋga̍la̍ŋ te̍.

⁴Kāni̍ fo̍ndōle̍, pūa̍a̍ ā pūm ā wa̍ o̍ ku̍ndā wānāā lāāla᷄ŋnda̍ tɛ̄ɛ̄ŋ nda̍ a̍a̍ hɛ̍na̍ŋ le̍ ndu̍ hīvīo̍o̍. Pūa̍a̍ ha̍ā ā ve̍ wa̍nāā lāāla᷄ŋ le̍kɛ̍ndɛ̍ī le̍, kɛ̍ ma̍ kɛ̄si᷄ŋ o̍ hɔ̄l māā ā chō wānāā lāāla᷄ŋ.

⁵Kɛ̍ fo̍ndāŋ o̍ fo̍ndāŋ ŋ̄ ke̍ nda̍ le̍. Kāni̍ fo̍ndōle̍, na̍a̍ ŋ̍ hɛ̍na̍ŋ mī ŋ̄ mānda̍ Yōōŋgū Kɛ̄ndɛ̍ Mɛ̄lɛ̄ka̍a̍ nyɛ̄ kɛ̄ndɛ̍ī le̍ nya̍, yɔ̄ŋi̍ nda̍ a̍a̍ mu̍u̍li̍āŋ ndu̍ a̍ chōōla̍ŋ.

⁶Mbo̍ lō o̍ ko̍ŋ le̍nde̍, wānāā kpe̍e̍kpe̍i̍ wāŋnda̍ yīya̍ŋ māā nda̍ cho̍ pāālē kɔ̄ɔ̄le̍ŋ le̍ ku̍ndā wānāā lāāla᷄ŋnda̍ wa̍, ō pīlɛ̍ bɛ̍ɛ̍ di̍mu̍l la̍ nu̍a̍ā āā, “Pɔ̍ɔ̄, nūm o̍o̍ nɔ̍ mā di̍mu̍l wāŋnda̍ he̍ī ndo̍ō, kɛ̍, a̍ di̍mi̍ le̍. Le̍la̍ŋ to̍sa̍ nu̍a̍ā le̍,” ō pīlɛ̍ bɛ̍ɛ̍ di̍mi̍ le̍nde̍ le̍. Ā wa̍ ā vēēlāā māā nda̍ wa̍ wānāa̍ wa̍ lātūlu̍ a̍ Chi̍i̍sū o̍ tāse̍la̍ ndɔ̄ɔ̍ wa̍ ni̍. Kɛ̍ ndu̍yɛ̍ ya̍ ya̍ I̍ chu̍e̍ ko̍ŋ nyɛ᷅ o̍ nyɛ̄ le̍. Ō ya̍ I̍ si̍nā wo̍ ko̍ni̍ cho̍ ni̍ māā Mɛ̄lɛ̄ka̍ ndu̍ nyɔ̄ɔ̍ ō pīlɛ̍ kpe̍ na̍a̍ ŋ̄ chō ndu̍ o̍ hɔ̄l ni̍.

⁷I̍ yɔ̍ŋ ndɔ̍ ha̍ndɔ̄ɔ̄ nda̍ hēndu̍ nyɛ᷅ o̍ nyɛ̄ o̍ Yōōŋgu̍ Kɛ̄ndɛ̍ Mɛ̄lɛ̄ka̍a̍ ya̍ I̍ pɛ̍ɛ̍ku̍ wāŋnda̍ wo̍ chōo̍ le̍ wo̍ le̍, kɛ̍ nda̍ pi̍la̍ ka̍lāa̍ kpe̍e̍kpe̍i̍, ma̍ sāālu᷄ŋ māā mɛ̄ɛ̍ Mɛ̄lɛ̄ka̍ dīmu̍l Pītɛ̍ le̍ mī Pītɛ̍ di̍mu̍l wāŋnda̍ Yōōŋgū Ndɔ̄ Kɛ̍ndɔ̄ɔ̍ yɛ̍, le̍nde̍ ko̍ni̍ o̍ di̍mu̍l la̍ le̍ mī di̍mu̍l wāŋnda̍ Yōōŋgū Ndɔ̄ Kɛ̍ndɔ̄ɔ̍ ni̍. Pītɛ̍ Mɛ̄lɛ̄ka̍ vēm le̍ mbō dīmu̍l Chu̍ūwa̍ Yōōŋgū Kɛ̄ndɛ̍ Mɛ̄lɛ̄ka̍a̍ ni̍. Ya̍ yɛ̍, mbo̍ vīām ya̍ le̍ mī I̍ di̍mu̍l wānāa̍ cho̍ a̍ Chu̍ū le̍ wa̍.

⁸Kāni̍ fo̍ndōle̍, ma̍ sāālu᷄ŋ māā Mɛ̄lɛ̄ka̍ wa̍ wa̍llo̍ a̍ Pītɛ̍ Chu̍ūwa̍ tɛ̄ɛ̄ŋ māā wāna̍ o̍ ve᷅m māā hɔ̄ltē ndɔ̄ wo̍, māā Mɛ̄lɛ̄ka̍ kōŋ ko̍ni̍ wa̍ wa̍llo̍ a̍ ya̍ wa̍nāa̍ cho̍ a̍ Chu̍ū le̍ wa̍ tɛ̄ɛ̄ŋ māā wāna̍ o̍ ve᷅m māā hɔ̄ltē ndɔ̄ wo̍ ni̍.

⁹Wānāā wāŋnda̍ yīya̍ŋ māā nda̍ kpe̍e̍kpe̍i̍ cho̍ pāālē kɔ̄ɔ̄le̍ŋ le̍ ku̍ndā wānāā lāāla᷄ŋnda̍ ni̍ wa̍, Chēmi̍si̍ ni̍, a̍ Pītɛ̍, a̍ Chɔ᷄ŋ, ma̍ sīnā ndi̍ pɛ̄ŋgu̍ māā Mɛ̄lɛ̄ka̍ ke̍ ya̍ wa̍llo̍ ho̍ō ni̍. Le̍ he̍ī, mi̍ ŋ̄ yīla᷅ŋ a̍ lābā na̍a̍ nda̍ā, le̍ chɔ̄mndo̍ māā dīōm nāā cho̍ ō pīlɛ̍. Mi̍ ŋ̄ chɛ̄la᷅ŋ na̍a̍ nda̍ā māā ya̍ ni̍ a̍ Ba̍a̍na̍bāā, māā na̍a̍ ŋ̍ nɔ̍ le̍ kɔ̄la̍ŋ wānāa̍ cho̍ a̍ Chu̍ū le̍ wa̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍ ni̍, ndu̍yɛ̍ māā mī nda̍ nda̍ kɔ̍ dīmūl Chu̍ūwa̍.

¹⁰Ō nda̍ a̍a̍ ye̍e̍ma̍ na̍a̍ le̍ tōsāa̍ wo̍ ko̍ni̍ cho̍ ni̍, māā na̍a̍ ŋ̄ wa̍ hi̍o̍u̍wɔ̄ɔ̍ lāchī a̍ lōōnɔ᷄ŋndo̍ le̍ mālāa̍ yɔ̄ŋgōo̍ le̍ wānāā tāmbɛ̍i̍ya̍, a̍ cho̍ nda̍ tɛ̄ɛ̄ŋ o̍ ku̍ndālā wānāā lāāla᷄ŋnda̍ tɛ̄ɛ̄ŋ nda̍. Ndu̍yɛ̍, māā ya̍ bɛ̍ɛ̍ wa̍li̍ ya̍ I̍ hɛ̍na̍ŋ to̍sāa̍ kpe̍e̍kpe̍i̍yo̍ cho̍ yɛ̄ ko̍ŋ ni̍.

¹¹Kɛ̍ o̍ ko̍ŋ kɔ̍ɔ̍lī, mɛ̄ɛ̍ Pītɛ̍ hi᷅ŋ A̍ŋti̍ɔ̍ɔ̄ chi̍e̍e̍ bo̍o̍ndi̍i̍ pi᷅lɛ̍, mbo̍ tōsā sūɛ̍i̍ pi᷅lɛ̍ ndi̍ i̍i̍ ni̍ŋ kpo̍so̍ŋ te̍. Mɛ̄ɛ̍ o̍ hi᷅ŋ A̍ŋti̍ɔ̍ɔ̄, ndu̍ pi̍la̍ chɛ̄lɔ̄ɔ̍ nda̍ wānāā lāāla᷄ŋnda̍ a̍ cho̍ a̍ Chu̍ū le̍ wa̍ mā dīā nyɛ̍ dīa̍a̍ nāa̍ pi᷅lɛ̍. Lɔ̍ɔ̍ lɔ̍ɔ̍ ni᷅ŋ nyɛ̄ dīa̍a̍ dīo̍o̍ nda̍ nda̍.

¹²Kɛ̍, mi̍ ī yɔ̄nu᷄ŋ a̍ bōōndi̍i̍ pi᷅lɛ̍, mi̍ pūa̍a̍ ā pūm ā cha᷄ŋ o̍ Chēmi̍si̍ lo̍ ma̍ hūŋ A̍ŋti̍ɔ̍ɔ̄. Mɛ̄ɛ̍ pūa̍a̍ ha̍ā fūūlu̍u̍ dɔ̍ɔ̍, mi̍ Pītɛ̍ pɛ̍ŋgi̍ bɛ̍ɛ̍ nyɛ̍ dīa̍a̍ dīo̍o̍ lātūlu̍ nda̍ wānāā lāāla᷄ŋnda̍ ha̍ā a̍ cho̍ a̍ Chu̍ū le̍ wa̍. Ndu̍ o̍o̍ chi̍ɛ̍ɛ̄li̍āŋ ndɛ̍ bɛ̍ɛ̍ a̍ nda̍ māā pāāndū le̍. Le̍ sa̍bū ndu̍ o̍o̍ to̍sa̍ le̍nde̍ wo̍ cho̍ ni̍ māā sīōōŋnde̍ wa̍ ndu̍. Ō wa̍ sīōōŋnde̍ le̍ Chu̍ūwa̍ a̍ si̍m lēni᷄ŋ o̍ kālā ka̍la̍ māā mɛ̄ɛ̍ mā hīvi̍ wānāā lāāla᷄ŋnda̍ a̍ cho̍ a̍ Chu̍ū le̍ wa̍ o̍ chīɛ̄ī kɔ̄ɔ̄lī mālāŋ nda̍ sīmnūŋ wa̍nāā lāāla᷄ŋ nda̍ le̍kɛ̍ndɛ̍ī ya̍.

¹³Mɛ̄ɛ̍ Pītɛ̍ kɛ̍ɛ̍ le̍ nyɛ̄ dīa̍a̍ dīo̍o̍ nda̍ wānāā lāāla᷄ŋnda̍ ha̍ā, mi̍ Chu̍ūwa̍ ā pīli̍a̍ā nda̍ bɛ̍ɛ̍ a̍ tu̍āl Pītɛ̍ kɔ̄ɔ̄lī a̍ ka̍ā kōŋ. Ndu̍yɛ̍ ā sīna̍ cha̍la̍ŋ māā nda̍ a̍a̍ nɔ̍ mā tōsā le̍nde̍ kpo̍so̍ŋ te̍. Ba̍a̍na̍bāā bɛ̍ɛ̍ le̍nde̍ ko̍ni̍.

¹⁴Mɛ̄ɛ̍ ya̍ I̍ sa̍a̍lu̍ŋ nda̍ o̍ he̍ī tōsāa̍ mi̍ di̍mūl Pītɛ̍ kpe̍nde̍ke̍le̍ māā sūɛ̍i̍ o̍ to̍sa̍ ve̍, ī ni᷄ŋ kpo̍so̍ŋ te̍. Kāni̍ fo̍ndōle̍, mi̍ I̍ si̍nā ndi̍ māā nyɛ̄ nda̍ tōsa̍ wo̍ bɛ̄nda̍ a̍ mɛ̄ɛ̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmi̍ yɛ̍ le̍. Mi̍ I̍ di̍mūl Pītɛ̍ wānāā lāāla᷄ŋnda̍ kpo̍u̍ o̍ hɔ̄l lo̍ŋ a̍a̍, “Pītɛ̍, Chu̍ūnɔ̄ɔ̍ ŋ̄ chō ni̍. Kɛ̍, bōōndi̍i̍ ŋ̄ wa̍ wānāa̍ cho̍ a̍ Chu̍ū le̍ wa̍ tɛ̄ɛ̄ŋ nde̍, ma̍ māl ka̍ā māChu̍ūwo̍ chūa̍a̍. Kɛ̍ o̍ su̍ŋ su̍ŋndo̍ ho̍ō ni᷄ŋ a̍ mu̍li̍ŋ vɛ̍lɛ̄. Mɛ̄ɛ̍ dīmīo̍o̍ ŋ̄ dīmi̍ ko̍ŋ ni̍ māā, mɛ̄ɛ̍ mī wānāa̍ cho̍ a̍ Chu̍ū le̍ wa̍ ā chu̍a̍ ka̍ā māChu̍ūwo̍ mālāŋ nda̍ sīmnūŋ wa̍nāā lāāla᷄ŋnda̍. Vɛ᷅ ma̍ wā he̍ī tōsāa̍?”

¹⁵Na̍a̍ na̍a̍ Chu̍ūwa̍ na̍a̍ ŋ̄ chō ni̍. Ŋ̄ cho̍ mɛ̄ɛ̍ wānāa̍ cho̍ a̍ Chu̍ū le̍ wa̍ chō yɛ̍ le̍. Nda̍ nda̍ ŋ̄ chu̍a̍ nda̍ māā wānāā yɔ̄ŋ wɔ̄ɔ̍ŋ.

¹⁶Kɛ̍ ndu̍yɛ̍, na̍a̍ Chu̍ūwa̍ na̍a̍ ŋ̍ la̍a̍la̍ŋ o̍ Chi̍i̍sū ni̍ŋ nda̍, ŋ̄ sīnā ndi̍ wa̍la̍ŋ māā ō cho̍ le̍ sāwāla̍ nāāla̍ŋ chūāā le̍ Mɛ̄lɛ̄ka̍ sīīŋgūū wa᷅ŋndo̍ wānā sa̍kpō ndu̍ o̍ hɔ̄l te̍. Māā le̍ tīīnda᷄ŋndo̍ dɔ̄wɔ̄ɔ̍ o̍ Chi̍i̍sū Ki̍li̍tī ni̍ŋ Mɛ̄lɛ̄ka̍ sīīŋgūū wa᷅ŋndo̍ wānā sa̍kpō ndu̍ o̍ hɔ̄l ni̍. Le̍ sa̍bōo̍ ho̍ō na̍a̍ bɛ̍ɛ̍ na̍a̍ ŋ̄ dɔ̄ū tīīnda᷄ŋ nāa̍ o̍ Chi̍i̍sū Ki̍li̍tī ni̍ŋ ni̍, le̍ mī Mɛ̄lɛ̄ka̍ sīīŋgu̍u̍ na̍a̍ wānāā sa̍kpō Mɛ̍lɛ̄ka̍ o̍ hɔ̄l. Ō cho̍ lɛ̍ sāwāla̍ nāāla̍ŋ chūāā le̍ na̍a̍ ŋ̄ tīīnda̍ŋ te̍. Kāni̍ fo̍ndōle̍, wānā o̍ wānā si̍mnūŋ wa̍nā sa̍kpō Mɛ̄lɛ̄ka̍ o̍ hɔ̄l o̍ sāwāla̍ nāāla̍ŋ chūa̍a̍ ni᷄ŋ te̍.

¹⁷Ndu̍yɛ̍, ŋ̄ lāāla̍ŋ māā le̍ mɛ̄ɛ̍ na̍a̍ ŋ̄ dɔ̄ū tīīnda᷄ŋ nāa̍ o̍ Ki̍li̍tī ni̍ŋ yɛ̍ Mɛ̄lɛ̄ka̍ chō na̍a̍ sīīŋgūū wānāā sa̍kpō ndu̍ o̍ hɔ̄l ni̍. Kɛ̍, ŋ̄ dīmi᷅ŋ ndɔ̍ nu̍a̍ā māā mi̍ chē bɛ̍ɛ̍ mi̍ ŋ̄ dūāū tīīnda᷄ŋ nāa̍ o̍ Ki̍li̍tī ni̍ŋ, kɛ̍ o̍ ko̍ŋ kɔ̍ɔ̍lī, mī Mɛ̄lɛ̄ka̍ kɛ̄ɛ̍ le̍ na̍a̍ sīīŋgūūwo̍ wānāā sa̍kpō ndu̍ o̍ hɔ̄l, o̍ ko̍ŋ kɔ̍ɔ̍lī, mī ŋ̄ sīmnu᷄ŋ wa̍nāā yɔ̄ŋ wɔ̄ɔ̍ŋ Mɛ̄lɛ̄ka̍ o̍ hɔ̄l lātūlu̍ na̍a̍ wānāa̍ cho̍ a̍ Chu̍ū le̍ wa̍ le̍ mɛ̄ɛ̍ na̍a̍ ŋ̄ kɛ̄ɛ̍ le̍ sāwāla̍ nāāla̍ŋ chūa̍a̍ yɛ̍. Tē ī yɔ̄nu̍ŋ le̍nde̍ pɛ̍, vɛ̄ɛ̄ na̍a̍ ŋ̄ yīyāŋ yɛ̍? Ŋ̄ yi̍yāŋ nu̍a̍ā māā Ki̍li̍tī to̍sa̍ mi̍ ŋ̄ tōsā yɔ̄ŋ wɔ̄ɔ̍ŋndo̍ le̍? Mbɔ̄ Mɛ̄lɛ̄ka̍ tu̍ɛ̍ī bɛ̍ɛ̍ kpo̍so̍ŋ te̍. Kāni̍ fo̍ndōle̍, ŋ̄ sīnā cha̍la̍ŋ māā Ki̍li̍tī pi̍la̍ to̍sā kpo̍so̍ŋ mī wāŋndo̍ tōsa̍ yɔ̄ŋ wɔ̄ɔ̍ŋndo̍ le̍.

¹⁸Le̍la̍ŋ, wāna̍ ma᷅l ho̍ō ti̍i̍nda᷄ŋndo̍ dɔ̄wɔ̄ɔ̍ o̍ sāwāla̍ nāāla̍ŋ chūa̍a̍ ni᷄ŋ ndo̍, o̍ ko̍ŋ kɔ̍ɔ̍lī, mbō dɔ̄ū tīīnda᷄ŋ ndɔ̄ɔ̍ o̍ Ki̍li̍tī ni̍ŋ le̍ mī Mɛ̄lɛ̄ka̍ sīīŋgu̍u̍ ndu̍ wānā sa̍kpō ndu̍ o̍ hɔ̄l lo̍, tē wānā ko̍ŋ chɛ᷄ŋ vɛ̍lɛ̄ pɛ̍ mbō mīīŋgu̍ tīīnda᷄ŋndo̍ dɔ̄wɔ̄ɔ̍ o̍ sāwāla̍ na̍a̍lā māChu̍ūla̍ŋ ni᷄ŋ pɛ̍, mɛ̄ɛ̍ ndu̍ kpe̍e̍kpe̍i̍ bɛ̍ɛ̍ cho̍ wāna̍ yɔ̄ŋ wɔ̄ɔ̍ŋndo̍ ni̍.

¹⁹I̍ chɔ᷅m ndɔ̍ nya̍ a̍ sāwāla̍ nāāla̍ŋ o̍kɔ̄ɔ̄. Sāwāla̍ la̍ŋ la̍ di̍mi̍ ni̍ māā le̍ mī wāŋndo̍ sīmnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l mɛ̄ɛ̍ mbō chu̍a̍ sāwāla̍ŋ mɛ̄ɛ̍ la̍ cho̍ kpo̍u̍ māā wāna̍ chu̍e̍ la̍ŋ te̍ ō sɔ̄la̍ pīɔ̍mndo̍ mɛ̄ɛ̍ sāwāla̍ŋ lā dīmi̍ yɛ̍. Ya̍ yɛ̍, I̍ nɔ̍lā la̍ŋ chūā le̍. Le̍ he̍ī, I̍ cho̍ ni᷅ŋ māchūāā māā wānā vi̍lɛ̍i̍. Ndu̍yɛ̍, sāwāla̍ŋ la̍ to̍sa̍ ke̍ŋ ni̍. Tē ō wa̍ yɛ̄ le̍nde̍ pɛ̍, mɛ̄ɛ̍ I̍ cho̍ lɛ̍ o̍ sāwāla̍ŋ nda᷅ŋ bɛ̄ŋgu̍ le̍, le̍ hāli̍ kpe̍ŋ mī I̍ ku̍ɛ̄ o̍ nɛ̄i̍ Mɛ̄lɛ̄ka̍ hɛ̄na̍ŋ ya̍ mī ku̍ɛ̄ wo̍ chōo̍.

²⁰Sāwā na̍a̍ dīmi̍ māā I̍ nɔ̍ mī sɔ̍la̍ pīɔ̍mndo̍ kāni̍ fo̍ndōle̍, māā I̍ tɛ̍ɛ̍mbu̍u̍ sāwāa̍. Kɛ̍ ndu̍yɛ̍, mi̍ wānā wu᷅ o̍ fo̍ndāŋ nūu̍, ndu̍ cho̍ māā Ki̍li̍tī ni̍. Tē ō wa̍ yɛ̄ le̍nde̍ pɛ̍, mɛ̄ɛ̍ ya̍ vi᷅ ko̍ŋ o̍ yɔ̄m sīŋgāfīlāa̍ chōo̍ ni̍. Le̍la̍ŋ, yōōmū ya̍ cho̍ ni᷅ŋ ho̍ō wo̍, I̍ cho̍ lɛ̍ ndu̍ o̍ kpāāya̍ nī ni̍ŋ te̍. O̍ kpāāya̍ Ki̍li̍tīo̍o̍ ni᷄ŋ ya̍ I̍ cho̍ ni᷅ŋ yōōmū ni̍. O̍ Po̍ Mɛ̄lɛ̄ka̍a̍ ni᷄ŋ ya̍ dɔ̍ū ni᷅ŋ tīīnda᷄ŋ nūu̍ le̍ wāa̍ yōōmū ni̍. Kāni̍ fo̍ndōle̍, ndu̍ chɛ̍l ni̍ mbo̍ wū le̍ ya̍ le̍ mɛ̄ɛ̍ o̍ ka̍a̍la̍ ya̍ yɛ̍.

²¹Le̍la̍ŋ, ō cho̍ sa̍wāa̍ chūa̍a̍ le̍ to̍sā mī wānā si̍mnu᷄ŋ wānā sa̍kpo̍ Mɛ̄lɛ̄ka̍ o̍ hɔ̄l te̍. Tē sāwāa̍ chūa̍a̍ ō sīīŋgūū pɛ̍ wa᷅ŋndo̍ wānā sa̍kpo̍ Mɛ̄lɛ̄ka̍ o̍ hɔ̄l, mɛ̄ɛ̍ Ki̍li̍tī vi̍nu᷄ŋ fo̍ndō fu̍u̍ wa᷅. Le̍la̍ŋ, ya̍ ya̍, Kɛ̄ndɛ̄i̍ Mɛ̄lɛ̄ka̍ tōsa̍l la̍ ve̍, I̍ tɛ̍ɛ̍mbūū ndi̍ kpo̍so̍ŋ te̍.