Read Southern Kisi Kāle̍e̍sīāŋnda̍ 3 Bible Online

Kāle̍e̍sīāŋnda̍ 3 - Southern Kisi bible

Kāle̍e̍sīāŋnda̍ 3

¹Dīɔ̄mīī māāvɛ̄ɛ̄ nya̍ Kāle̍e̍sīāŋnda̍ lūɛ̄ī yɛ̄ he̍ī lēni᷄ŋ? Tē ō wa̍ lēkūēī pɛ̍ nda̍ tōsa̍l nya̍ ni̍ mɛ̄ɛ̍ lē tīu̍ nya̍ bā fɔ̍. Chɔ̄m nda̍ chɔ᷄m nya̍ ho̍ō a̍ Chi̍i̍sū Ki̍li̍tī o̍kɔ̄ɔ̄ ma̍ tɛ̄ɛ̄sīāl nya̍ wa̍kpā wa̍kpā a̍ mɛ̄ɛ̍ nda̍ dīī ndu̍ o̍ yɔ̄m sīŋgāfīlāa̍ chōo̍ yɛ̍, pɛ̄ɛ̄kū kōŋ nya̍ māl ni᷅ŋ bɛ̍ɛ̍ ni̍?

²I̍ nyu̍nā wɔ̍ nya̍ nyūnā pīlɛ̍ mī lā tīmbu̍l la̍. Bōōndi̍i̍ Nyi̍na̍ Mɛ̄lɛ̄ka̍a̍ tōl nya̍ Kāle̍e̍sīāŋnda̍ kɔ̄ɔ̄lī ve̍, bāā sāwāla̍ nāāla̍ māChu̍ūla̍ŋ nya̍ lo̍ chūa̍a̍ ni̍, bāā Yōōŋgū Kɛ̄ndɛ̍ Mɛ̄lɛ̄ka̍ nya̍ tūēī mi̍ lā lāāla᷄ŋ ndo̍ o̍ ko̍ŋ o̍ to᷅l nya̍ kɔ̄ɔ̄lī ni̍? Ō cho̍ Yo̍o̍ŋgū Kɛ̄ndɛ̍ Mɛ̄lɛ̄ka̍ nya̍ tūēī yo̍ le̍?

³Lā tōsa̍ dīɔ̄mīī bɛ̄ndū. Kāndɔ̄ɔ̄ tāse̍ nya̍ kāndu̍ kɔ̄la̍ŋ o̍ nɛ̄i̍ Mɛ̄lɛ̄ka̍ hɛ̄na̍ŋ ndo̍ chōo̍ wo̍, Nyi̍na̍ Mɛ̄lɛ̄ka̍a̍ ndu̍ nya̍ a̍a̍ ti̍i̍nda̍ŋ le̍ kɔ̄la̍ŋ a̍ nya̍ ni̍. Pɛ̄ŋgo̍o̍ ho̍ō yɛ̍? Bāā kpāāya̍ nya̍ pi̍la̍a̍ nya̍ hɛ̄na̍ŋ ni᷅ŋ le̍ sīōū fūūlūūwo̍ o̍ nɛ̄īyo̍ ho̍ō mɛ̄ɛ̄lu̍la̍ŋ ni̍?

⁴Chɔ̍ŋ a̍ bōōndi̍i̍ nya̍ tūēī Yōōŋgū Kɛ̄ndɛ̍ Mɛ̄lɛ̄ka̍a̍ ve̍, sɔ̄ɔ̍ŋ kɔ̄ndɔ̄fi̍li̍ŋ fāŋgā fa̍ŋgā ŋ̄ yɔ̄nu̍ŋ ni᷅ŋ mi̍ nya̍ pi̍la̍ sīnā. Bāā mu᷅ŋ fa̍ū mī ŋ̄ kūɛ̄nu᷄ŋ fo̍ndō fu̍u̍? Lā chɛ᷅l mī ŋ̄ kūɛ̄nu᷄ŋ fo̍ndō fu̍u̍ le̍.

⁵Le̍ mɛ̄ɛ̍ nya̍ tūēī Yōōŋgū Kɛ̄ndɛ̍ Mɛ̄lɛ̄ka̍a̍, ndu̍yɛ̍ mi̍ lā lāāla᷄ŋ yɛ̍, le̍la̍ŋ Mɛ̄lɛ̄ka̍ to̍sa̍ ni̍ mi̍ Nyi̍nā ndɔ̄ɔ̍ tūāl nya̍ kɔ̄ɔ̄lī, ndu̍yɛ̍ mbo̍ tōsā sɔ̄ɔ̍ŋ kɔ̄ndɔ̄fi̍llo̍ŋ nya̍ tɛ̄ɛ̄ŋ. Ō cho̍ le̍ lāsāwā chu̍ā kpo̍so̍ŋ te̍.

⁶Lā lōōnu̍ŋ ndɔ̍ a̍ nyɛ̄ Yāu̍ Mɛ̄lɛ̄ka̍a̍ dīmi̍ a̍ E̍bīlāha᷅m o̍kɔ̄ɔ̄ wo̍. Yāu̍ Mɛ̄lɛ̄ka̍a̍ dīmi̍ āā, “Mi̍ E̍bīlāha᷅m du̍a̍ū tīīnda᷄ŋ ndɔ̄ɔ̍ o̍ Mɛ̄lɛ̄ka̍ ni᷄ŋ. Le̍ he̍ī, mi̍ Mɛ̄lɛ̄ka̍ chūā ndu̍ māā ō chō wānā sa̍kpō Mɛ̍lɛ̄ka̍ o̍ hɔ̄l.”

⁷He̍ī chɔ᷄m na̍a̍ māā wānāa̍ du̍a̍ū ti̍i̍nda᷄ŋ ndāa̍ o̍ Mɛ̄lɛ̄ka̍ ni᷄ŋ nda̍, nda̍ cho̍ wānāā kpe̍e̍kpe̍i̍ya̍ a̍ fu̍la̍ o̍ pūlāle̍ E̍bīlāha᷅mnde̍ŋ chōo̍ wa̍ ni̍.

⁸Mi̍ Yāu̍ Mɛ̄lɛ̄ka̍a̍ dīmī sūɛ̍i̍ wa̍ā lāchī māā wānāa̍ cho̍ a̍ Chu̍ū le̍ wa̍ chō hūnɔ̄ɔ̄ tīīnda᷄ŋ ndāa̍ dɔ̄wɔ̄ɔ̄ o̍ Mɛ̄lɛ̄ka̍ ni᷄ŋ, ndu̍yɛ̍ mī Mɛ̄lɛ̄ka̍ sīīŋgu̍u̍ nda̍ wānāā sa̍kpō Mɛ̍lɛ̄ka̍ o̍ hɔ̄l. Ī chō ī pōōnyīāā lo̍ŋ a̍ mɛ̄ɛ̍ Mɛ̄lɛ̄ka̍ dīmu̍l E̍bīlāha᷅m Yōōŋgū Kɛ̄ndɔ̄ɔ̍ ho̍ō o̍ sūɛ̍i̍ wa̍ā lāchī ni̍ŋ yɛ̍. Ī chō ī dīmīa̍ŋ lo̍ŋ āā, “Mɛ̄lɛ̄ka̍ chō hūnɔ̄ɔ̄ wāŋnda̍ lɛ̄ŋndē kpo̍u̍ o̍ chi̍e̍ēŋndo̍ ni᷄ŋ sa̍lā dɔ̄wɔ̄ɔ̄ sa̍na̍a̍ o̍ nūm E̍bīlāha᷅m ni᷄ŋ.”

⁹Le̍la̍ŋ mī di̍mu̍l nya̍, mɛ̄ɛ̍ E̍bīlāha᷅m ti̍i̍nda̍ŋ Mɛ̍lɛ̄ka̍ mi̍ Mɛ̄lɛ̄ka̍ dūāū ndu̍ sa̍lā yɛ̍, le̍nde̍ ko̍ni̍ o̍ du̍a̍ū wa̍nāa̍ ti̍i̍nda̍ŋ o̍ ndu̍ ni̍ŋ nda̍ sa̍lā ni̍.

¹⁰Kɛ̍, wānāa̍ ti̍i̍nda̍ŋ ha̍ā nda̍ pi̍la̍ māā tē ā chu̍a̍ sāwāla̍ Mɛ̄lɛ̄ka̍la̍ŋ pɛ̍, ā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l la̍ nda̍ nda̍, Mɛ̄lɛ̄ka̍ chō nda̍ nyɛ̄ pālāa̍ tūsī chōo̍. Sa̍bū ko᷄ŋ cho̍ ni̍ māā ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Wānā o̍ wāna̍ chu̍e̍ sa̍wāla̍ cho̍ o̍ Yāu̍ Mɛ̄lɛ̄ka̍a̍ ni᷄ŋ nda̍ŋ fa̍ū le̍, Mɛ̄lɛ̄ka̍ chō ndu̍ nyɛ̄ pālāa̍ tūsī chōo̍.”

¹¹Ŋ̄ sīnā māā wānā o̍ wāna̍ dɔ̍ū tīīnda᷄ŋ ndɔ̄ɔ̍ o̍ sāwāla̍ŋ chūa̍a̍ ni᷄ŋ pɛ̍, Mɛ̄lɛ̄ka̍ si̍i̍ŋgūū wa̍nā wa̍ā le̍nde̍ wa̍nā sa̍kpō Mɛ̍lɛ̄ka̍ o̍ hɔ̄l te̍. Kāni̍ fo̍ndōle̍, ī chō ī pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Wāna̍ du̍a̍ū ti̍i̍nda᷄ŋ ndɔ̄ɔ̍ o̍ Mɛ̄lɛ̄ka̍ ni᷄ŋ ndo̍, ndu̍ Mɛ̄lɛ̄ka̍ sīīŋgūū wa̍nā sa̍kpō Mɛ̄lɛ̄ka̍ o̍ hɔ̄l ni̍, ndu̍yɛ̍ mbō wa̍ yōōmū kpe̍e̍kpe̍i̍.”

¹²Sāwāla̍ŋ chūa̍a̍ le̍ wāa̍ wānāā sa̍kpō Mɛ̍lɛ̄ka̍ o̍ hɔ̄l ō cho̍ nyɛ̍ pīlɛ̍ a̍ Mɛ̄lɛ̄ka̍ tīīnda᷄ŋndo̍ le̍. Kāni̍ fo̍ndōle̍, Yāu̍ Mɛ̄lɛ̄ka̍a̍ dīmi̍ āā, “Wānāa̍ chu̍ā sa̍wāla̍ŋ kpo̍u̍ wa̍, nda̍ cho̍ yōōmū kpe̍e̍kpe̍i̍yo̍ sɔ̄lā ni̍.”

¹³Mu᷅ŋ kpo̍u̍ tɛ̄ɛ̄sīāā ndɔ̄ɔ̍ cho̍ ni̍, māā Mɛ̄lɛ̄ka̍ chīi̍ na̍a̍ yāmɛ̍i̍ kīlūl, māā ō chō kūēē mbō tūsi̍ na̍a̍ nyɛ̄ pālāa̍ chōo̍ kāni̍ fo̍ndōle̍, māā ŋ̄ chu̍e̍ sa̍wāla̍ŋ fa̍ū le̍. Kɛ̍ Ki̍li̍tī, ndu̍ fa̍ŋa̍ na̍a̍ nyɛ̄ pālāā kōŋ kūēē ni̍. Ndu̍ chu̍a̍ nyɛ̄ pālāā kōŋ sɔ̍ŋgɔ̍ nāa̍ ni̍. Ŋ̄ sīnā māā le̍nde̍ i̍ cho̍ ni̍ kāni̍ fo̍ndōle̍, Yāu̍ Mɛ̄lɛ̄ka̍a̍ dīmi̍ āā, “Wānā o̍ wāna̍ nda̍ ba᷄ŋ o̍ yɔ̄mndo̍ chōo̍ pɛ̍, mɛ̄ɛ̍ wānā ko̍ŋ ndu̍ Mɛ̄lɛ̄ka̍ tūsi̍ nyɛ̄ pālāa̍ cho̍o̍ ni̍.”

¹⁴Ki̍li̍tī to̍sa̍ he̍ī le̍ hāli̍ kpe̍ŋ mī wānāa̍ cho̍ a̍ Chu̍ū le̍ wa̍, a̍ dɔ̍ū tīīnda᷄ŋ ndāa̍ o̍ ndu̍ ni̍ŋ nda̍, mī Mɛ̄lɛ̄ka̍ dɔ̄ū nda̍ sa̍lā sa̍na̍a̍ o̍ Chi̍i̍sū Ki̍li̍tī ni᷄ŋ mɛ̄ɛ̍ o̍ dɔ̍ū E̍bīlāha᷅m sa̍lā yɛ̍. Le̍la̍ŋ, Chu̍ūwa̍ ni̍ a̍ wānāa̍ cho̍ a̍ Chu̍ū le̍ wa̍, Mɛ̄lɛ̄ka̍ chō tōsā mī Nyi̍nā ndɔ̄ɔ̍ tōl nda̍ kɔ̄ɔ̄lī. Kāni̍ fo̍ndōle̍, le̍nde̍ ndu̍ Mɛ̍lɛ̄ka̍ chu̍a̍ būŋgɛ̄i̍ ni̍.

¹⁵Chāa̍ŋāā nīāā wa̍nāā lāāla᷄ŋnda̍, I̍ chɔ᷅m ndɔ̍ nya̍ a̍ būŋgɛ̄ī Mɛ̄lɛ̄ka̍ chu̍a̍ he̍ī ve̍ o̍kɔ̄ɔ̄, mɛ̄ɛ̍ nya̍ lōōkū ndi̍ pɛ̄ŋgu̍ si̍nā yɛ̍. Tē wāŋnda̍ nda̍ ŋi̍ɔ̍ɔ̍ŋ ā chɛ̄la᷅ŋ o̍ īsɔ̄ɔ̍ o̍ īsɔ̄ɔ̍ cho̍o̍ pɛ̍ mā yīi̍ kpe̍ma̍a̍ po᷅ŋ, wānāā ŋīɔ̍ɔ̍ŋāā kāŋ ō pīlɛ̍ che᷅ŋ ndɛ̍ ndu̍ pīlɛ̍ mbō hāndu̍ nyɛ̄ chēle̍ŋ lēchōo̍ le̍, kɛ̄lɛ̄ŋgāā ni᷅ŋ te̍, mbō tɛ̄ɛ̄mbu̍u̍ kpe̍ma̍ ka̍lāa̍.

¹⁶Le̍nde̍ ko̍ni̍ i̍ cho̍ a̍ kpe̍ma̍ Mɛ̄lɛ̄ka̍ yīi̍ nda̍ E̍bīlāha᷅m ndo̍ ni̍. Ndu̍yɛ̍ būŋgāŋ Mɛ̄lɛ̄ka̍ chu̍a̍ le̍ sɔ̄ɔ̍ŋ mu᷅ŋ tōsāa̍ wo̍ŋ, E̍bīlāha᷅m o̍ chu̍e̍l mu̍ŋ ni̍ a̍ wānā pi᷅lɛ̍ o̍ cho̍ fūlā o̍ pūlāle̍ E̍bīlāha᷅mnde̍ŋ chōo̍ wo̍. Yāu̍ Mɛ̄lɛ̄ka̍a̍ dīmi̍ nu̍a̍ā māā ō chūe̍l E̍bīlāha᷅m būŋga᷄ŋ a̍ wānāa̍ cho̍ fūlā o̍ pūlāle̍ E̍bīlāha᷅mnde̍ŋ chōo̍ wa̍ le̍. Ō dīmi̍ mādīmīāā māā Mɛ̄lɛ̄ka̍ chūe̍l E̍bīlāha᷅m būŋga᷄ŋ a̍ wāna̍ cho̍ hūnɔ̄ɔ̄ fūlā o̍ pūlāle̍ E̍bīlāha᷅mnde̍ŋ chōo̍ wo̍. Wānā ko̍ŋ, ndu̍ cho̍ yɛ̄ Ki̍li̍tī ni̍.

¹⁷I̍ tɛ̍ɛ̍sīāl lɔ̍ nya̍ a̍ kpe̍ma̍a̍ ho̍ō o̍kɔ̄ɔ̄. O̍ sīndɔ̄ɔ̍ ni᷄ŋ, mi̍ Mɛ̄lɛ̄ka̍ yīī kpe̍ma̍a̍ a̍ E̍bīlāha᷅m. O̍ ko̍ŋ kɔ̍ɔ̍lī, mi̍ wɔ̄sīla̍ŋ lā hīāū kɛ̄mɔ̄ɔ̍ lē hīɔ̍ɔ̍lu̍ a̍ be̍le̍ ya̍a̍. Mɛ̄ɛ̍ wɔ̄sīla̍ŋ lā hīōū le̍nde̍, mi̍ Mɛ̄lɛ̄ka̍ ke̍ Chu̍ūwa̍ sāwāla̍ŋ. Kɛ̍ sāwāla̍ la̍ŋ lā nɔ̍lā mī lā tɛ̄ɛ̄mbu̍u̍ kpe̍ma̍ Mɛ̄lɛ̄ka̍ yīi̍ nda̍ E̍bīlāha᷅m ndo̍ le̍, kɛ̄lɛ̄ŋgāā ni᷅ŋ te̍ mī lā tɛ̄ɛ̄mbu̍u̍ būŋgɛ̄ī Mɛ̄lɛ̄ka̍ chu̍a̍ ve̍.

¹⁸Nyɛ̄ Mɛ̄lɛ̄ka̍ kē wāŋndo̍ wo̍, ō cho̍ ma̍chu̍a̍ā le̍ sāwa̍ wānā ko̍ŋ ō chūā wo̍ le̍. Kāni̍ fo̍ndōle̍, tē ō wa̍ le̍ sāwāa̍ chūa̍a̍ pɛ̍, mɛ̄ɛ̍ ō cho̍ lɛ̍ le̍ mɛ̄ɛ̍ Mɛ̄lɛ̄ka̍ chu̍a̍ būŋgɛ̄i̍ māā ō chō ndu̍ kē yɛ̍ le̍ wānā ko̍ŋ ō sɔ̄lā nyɛ̍ kōŋ te̍. Kɛ̍, ŋ̄ sīnā wa̍la̍ŋ māā le̍ būŋgɛ̄ī Mɛ̄lɛ̄ka̍ chu̍a̍ māā ō chō E̍bīlāha᷅m sa̍lā dɔ̄wɔ̄ɔ̄ ve̍ Mɛ̄lɛ̄ka̍ ke̍ ndu̍ nyɛ̄ kōŋ ni̍.

¹⁹Tē ī wa̍ yɛ̄ le̍nde̍ pɛ̍, mɛ̄ɛ̍ le̍ yɛ̄ɛ̍nɛ̍ Mɛ̍lɛ̄ka̍ yɔ̄ŋgu̍ yɛ̄ na̍a̍ ni᷅ŋ sāwāla̍ ndɔ̄la̍ŋ? Le̍ sa̍bū Mɛ̄lɛ̄ka̍ yɔ̄ŋgu̍ sāwāla̍ŋ ndo̍ cho̍ ni̍ māā le̍ mī wāŋndā chīe̍e̍ya̍ sīna̍ pɛ̄ŋgu̍ nyɛ̍ cho̍ yɔ̄ŋ wɔ̄ɔ̍ŋndo̍ Mɛ̄lɛ̄ka̍ o̍ hɔ̄l lo̍. Mɛ̄lɛ̄ka̍ dɔ̄ū sāwāla̍ŋ, kɛ̍ le̍ mbō lo̍ o̍ ko̍ŋ mī wāna̍ nɔ̍ le̍ fūlāa̍ o̍ pūlāle̍ E̍bīlāha᷅mnde̍ŋ chōo̍ wo̍ ō hīŋ. Ndu̍yɛ̍ bōōndi̍i̍ Mɛ̄lɛ̄ka̍ chūe̍l E̍bīlāha᷅m būŋgɛ̄i̍ ye̍, a̍ wāŋndo̍ ho̍ō o̍kɔ̄ɔ̄ Mɛ̄lɛ̄ka̍ wa̍ sūɛ̍i̍ ni̍. Yɔ̄ŋgɔ̄ɔ̄ Mɛ̄lɛ̄ka̍ yɔ̄ŋgu̍ sīndɛ̄ sāwāla̍ ndɔ̄la̍ŋ ndo̍, ki̍i̍la̍a̍ ndūa̍a̍ o̍ so̍li̍ po̍ ni̍ le̍ mā hu᷄ŋ yɔ̍ŋgū wāna̍ chi̍o̍o̍ la̍ŋ. Tē ō wa̍ māā yɔ̄ŋɔ̄ɔ̄ pɛ̍ mɛ̄ɛ̍ wāna̍ nda̍ a̍a̍ yɔ̍ŋgu̍ la̍ŋ ndo̍ ō wa̍ māwāā ki̍i̍la̍le̍ŋ Mɛ̄lɛ̄ka̍ tɛ̄ɛ̄ŋ nda̍ chūāā ŋ̄wāŋndā chīe̍e̍.

²⁰Wāŋnda̍ ā ŋīɔ̍ɔ̍ŋ tɛ̄ɛ̄ŋ wāŋndo̍ tōsā ki̍i̍la̍le̍ŋ ni̍. Ki̍i̍la̍le̍ kūmbūī pīlɛ̍ lē cho̍ le̍. Ko̍ŋ cho̍ ni̍, le̍ mī Mɛ̄lɛ̄ka̍ ndu̍ o̍o̍ yɔ̍ŋgu̍ sāwa̍ ndɔ̄ɔ̍ o̍ ŋ̄wāŋndā chīe̍e̍ lo̍, mɛ̄ɛ̍ mī wāna̍ ndu̍ o̍o̍ to̍sā ki̍i̍la̍le̍ le̍ŋ nda̍ tɛ̄ɛ̄ŋ ndo̍ ndu̍ o̍o̍ wa̍. Kɛ̍, būŋgɛ̄ī Mɛ̄lɛ̄ka̍ chu̍a̍ ve̍, ndi̍ nɔ̍ le̍ki̍i̍la̍ le̍. Kāni̍ fo̍ndōle̍, Mɛ̄lɛ̄ka̍ ndu̍ pīlɛ̍ ko̍ni̍ cho̍ wāna̍ to̍sā nyɛ᷅ lēni᷄ŋ ndo̍ ni̍.

²¹Kɛ̍ o̍ ko̍ŋ ni̍ŋ kpo̍u̍, sāwāla̍ Mɛ̄lɛ̄ka̍la̍ŋ lā sɛ̄ɛ̄ŋgi̍a̍a̍ bu̍ŋgɛ̄ī Mɛ̄lɛ̄ka̍ chu̍a̍ ve̍ le̍. Ndu̍yɛ̍ būŋgɛ̄ī Mɛ̄lɛ̄ka̍ chu̍a̍ ve̍ ī sɛ̄ɛ̄ŋgi̍a̍a̍ sa̍wāla̍ Mɛ̄lɛ̄ka̍la̍ŋ te̍. Ō cho̍ ma̍chu̍a̍ā mī Mɛ̄lɛ̄ka̍ yɔ̄ŋgu̍ sa̍wāla̍ŋ māā tē wānā nɔ̍la̍ la̍ŋ chūā pɛ̍, mɛ̄ɛ̍ a̍ sɔ̍la̍ yo̍o̍mū kpe̍e̍kpe̍i̍yo̍ le̍. Kāni̍ fo̍ndōle̍, tē le̍nde̍ ndi̍ i̍i̍ wa̍ ni̍ mɛ̄ɛ̍ wāna̍ chi̍o̍o̍ ndu̍ o̍o̍ nɔ̍lā mbō wa̍ wānā sa̍kpō Mɛ̄lɛ̄ka̍ o̍ hɔ̄l le̍ sāwāla̍ o̍ chu̍ā la̍ŋ wā.

²²Kɛ̍, Yāu̍ Mɛ̄lɛ̄ka̍a̍ dīmu̍l na̍a̍ māā mɛ̄ɛ̍ wāŋndo̍ wā nu̍a̍ā o̍ chɛ̄le̍ŋ ni᷄ŋ yɛ̍, māā wāna̍ o̍ cho̍ o̍ bā bɛ̄ŋgu̍ wo̍ nyɛ̄ o̍ di̍mī wo̍ ndu̍ ko̍ni̍ o̍ to̍sā ni̍ yɛ̍, le̍nde̍ ko̍ni̍ wāŋnda̍ kpo̍u̍ a̍ cho̍ o̍ chɛ̄le̍ŋ ni᷄ŋ yɔ᷅ŋ wɔ̄ɔ̍ŋndo̍ o̍ bā bɛ̄ŋgu̍ ni̍. Kɛ̍ wānāa̍ ti̍i̍ndāŋ Chi̍i̍sū Ki̍li̍tī wa̍, nda̍ nda̍ Mɛ̄lɛ̄ka̍ chō nda̍ nyɛ̄ o̍ chu̍a̍ būŋgɛ̄i̍ yo̍ kē. Kāni̍ fo̍ndōle̍, mbo̍ chūā būŋgɛ̄ī māā ō chō wānāa̍ du̍a̍ū ti̍i̍nda᷄ŋndo̍ o̍ Chi̍i̍su̍ Ki̍li̍tī ni̍ŋ nda̍ nyɛ̄ kē.

²³Bōōndi̍i̍ nda̍ a̍a̍ di̍mu̍l lɔ̍ na̍a̍ a̍ Chi̍i̍sū Ki̍li̍ti̍ tīīnda᷄ŋndo̍ o̍kɔ̄ɔ̄ le̍ ve̍, ŋ̄ wa̍ māwāā o̍ sāwāa̍ bɛ̄ŋgu̍, mɛ̄ɛ̍ wāŋndo̍ wā nu̍a̍ā o̍ bīyɔ̄ɔ̍ ni᷄ŋ mā hāndu̍ wānā ka̍lā ka̍lāa̍ ndu̍ chōo̍, le̍ ndu̍ wāa̍ lēhɔ̄l lɛ̍.

²⁴Sāwāla̍ Mɛ̄lɛ̄ka̍la̍ŋ lā wa̍ māwāā na̍a̍ chōo̍, mɛ̄ɛ̍ wāŋndo̍ wā nu̍a̍ā o̍ māndāa̍ bɛ̄ŋgu̍ o̍ ka̍lā ka̍lā yɛ̍. Le̍nde̍ na̍a̍ ŋ̄ lo̍ o̍ sāwāa̍ bɛ̄ŋgu̍ ha̍a̍a̍ ni̍, mbo̍ lō o̍ ko̍ŋ mi̍ Ki̍li̍tī hu᷅ŋ. Mɛ̄ɛ̍ Ki̍li̍tī hi᷅ŋ ni᷅ŋ yɛ̍, mɛ̄ɛ̍ ndu̍ na̍a̍ ŋ̄ nɔ̄ ni᷅ŋ ni̍ mī ŋ̄ tīīnda̍ŋ, le̍ mī Mɛ̄lɛ̄ka̍ sīīŋgu̍u̍ na̍a̍ wānāā sa̍kpō Mɛ̍lɛ̄ka̍ o̍ hɔ̄l.

²⁵Le̍la̍ŋ, mɛ̄ɛ̍ bōōnde̍i̍ ī fūūlu̍u̍ ni᷅ŋ nu̍a̍ā le̍ mī ŋ̄ dɔ̄ū tīīnda᷄ŋ nāa̍ o̍ Chi̍i̍sū Ki̍li̍tī ni̍ŋ yɛ̍, ŋ̄ cho̍ lɛ̍ o̍ māndā kālā ka̍lā bɛ̄ŋgu̍ sa̍wāa̍ o̍ bā le̍.

²⁶Le̍la̍ŋ, nya̍ ku̍ndā wānāā lāāla᷄ŋnda̍ Kāle̍e̍sīā, chūāūwāa̍ Mɛ̄lɛ̄ka̍a̍ nya̍ chō ni᷅ŋ ni̍ kāni̍ fo̍ndōle̍, le̍ mɛ̄ɛ̍ nya̍ tīīnda̍ŋ Chi̍i̍sū Ki̍li̍tī yɛ̍.

²⁷Ndu̍yɛ̍ yīŋɔ̄ɔ̄ nda̍ nya̍ ni᷅ŋ ho̍ō wo̍, lā chō ni᷅ŋ o̍ dīōm pīlɔ̍ɔ̍ ni᷄ŋ nya̍ Ki̍li̍tī wa̍ā. Ndu̍yɛ̍ ka̍a̍ Ki̍li̍tīo̍o̍ ndu̍ nya̍ nɔ̄ ni᷅ŋ ni̍.

²⁸Le̍la̍ŋ, wānā wa̍ Chu̍ūnɔ̄, wa᷅ Chu̍ūnɔ̄ le̍, wa̍ chɛ᷅, wa᷅ chɛ̄ le̍, ndu̍yɛ̍ wānā pɔ̍nɔ̍ ni̍, wānā la̍nɔ̍ ni̍, yɛ̍ yɛ̍ o̍ yɛ̍ yɛ̍ cho̍ lɛ̍ nya̍ tɛ̄ɛ̄ŋ te̍. Ha̍a̍a̍ mi̍ lā wā o̍ dīōm pīlɔ̍ɔ̍ ni᷄ŋ nya̍ Chi̍i̍sū Ki̍li̍tī wa̍ā, wānāā pīlɛ̍ kpe̍ nya̍ chō ni᷅ŋ ni̍.

²⁹Ndu̍yɛ̍ wānāa̍ Ki̍li̍tīa̍a̍ nya̍ chō ni̍. Tē lā wa̍ yɛ̄ wānāa̍ Ki̍li̍tīa̍a̍ pɛ̍, mɛ̄ɛ̍ nya̍ bɛ̍ɛ̍ o̍ pūlāle̍ E̍bīlāha᷅mnde̍ŋ chōo̍ nya̍ fūla̍ ni̍. Le̍ sa̍bōo̍ ho̍ō, Mɛ̄lɛ̄ka̍ chō nya̍ nyɛ̄ o̍ chu̍e̍l E̍bīlāha᷅m būŋgɛ̄i̍ yo̍ kē.