Read Southern Kisi Kāle̍e̍sīāŋnda̍ 4 Bible Online

Kāle̍e̍sīāŋnda̍ 4 - Southern Kisi bible

Kāle̍e̍sīāŋnda̍ 4

¹I̍ chɔ̍ɔ̍lū wɔ̍ nya̍ sūɛ̍i̍ ka̍lɛ̄i̍ chɔ̄m. Ī chō ko̍ mɛ̄ɛ̍ wāŋndo̍ vīālū nu̍a̍ā pōo̍ yɛ̍, ndu̍yɛ̍ māā po̍ ndɔ̄ ko̍ŋ ndu̍ cho̍ hūnɔ̄ɔ̄ nyɛ̄m ndɔ᷄ŋ lōō ni̍. Kɛ̍, ō wa̍ dɔ̍ɔ̍ le̍nde̍ māā ndu̍ kpe̍e̍kpe̍i̍ nɔ̍ nyɛ᷄m fi̍nyā ndɔ̄ŋ mu̍ŋ ni̍, kɛ̍ tē ō chō wɔ̄ pɛ̍ chu̍a̍a̍mbɔ̄, ā me᷅l ndu̍ mu̍ŋ o̍ bā le̍. Ndu̍yɛ̍ a̍ bōōndi̍i̍ ke̍ŋ, mɛ̄ɛ̍ chīɔ̍ɔ̍ wā nu̍a̍ā ō ve᷅ a̍ bā ndɔ̄ le̍ yɛ̍, le̍nde̍ ko̍ni̍ o̍ wa᷅ ni̍.

²Ndu̍yɛ̍ tē ō chō wɔ̄ pɛ̍ chu̍a̍a̍mbɔ̄, mɛ̄ɛ̍ mbō wa̍ ŋ̄wāŋ o̍ bā bɛ̄ŋgu̍ mā mānda̍ ndu̍. Ndu̍yɛ̍ nyɛ̄m mu᷅ŋ ŋ̄ wa̍ bɛ̍ɛ̍ hu̍nɔ̄ɔ̄ wā mīāl ndɔ̍, kɛ̍ bōōndi̍i̍ o̍ cho̍ wɔ̄ ke̍ŋ chu̍a̍a̍mbɔ̄ ve̍, mɛ̄ɛ̍ mī ŋ̄ wa̍ wɔ̄ ŋ̄wāŋ o̍ bā. Ŋ̄ lō nda̍ o̍ bā, ha̍a̍a̍ mī bōōndi̍i̍ fi̍nyā ndɔ̄ ye̍e̍ma̍ le̍ mī ŋ̄ wa̍ ni̍ko̍ mi̍āl ndɔ̄ ve̍ ī fūūlu̍u̍.

³Le̍nde̍ na̍a̍ ŋ̄ wa̍ ni̍. Bōōndi̍i̍ na̍a̍ ŋ̍ si̍na̍ wɔ̍ to᷅nya̍a̍ a̍ Mɛ̄lɛ̄ka̍ o̍kɔ̄ɔ̄ le̍ ve̍ ŋ̄ wa̍ māwāā o̍ chɛ̄le̍ŋ ni᷄ŋ nyi̍nāā wɔ̄ɔ̍ŋnda̍ o̍ bā bɛ̄ŋgu̍, nyi̍nāā wɔ̄ɔ̍ŋāā chi̍e̍ēŋndo̍ ho̍ō chō o̍ bā bɛ̄ŋgu̍ wa̍.

⁴Kɛ̍ mɛ̄ɛ̍ bōōndi̍i̍ Mɛ̄lɛ̄ka̍ pi̍la̍ bɛ̍ɛ̍ndi̍a̍a̍ ve̍ ī fūūlu̍u̍, mbo̍ yɔ̄ŋ Po̍ ndɔ̄ɔ̍. Mi̍ Po̍ ndɔ̄ɔ̍ ho̍ō kēēkū wānā la̍nɔ̍ɔ̍ o̍ īpūlu̍ mbo̍ vīālū ndu̍. Mɛ̄ɛ̍ nda̍ vēlū ndu̍, mbo̍ chūā sāwāla̍ māChu̍ūla̍ŋ kpe̍e̍kpe̍i̍. Le̍ sa̍bū Mɛ̄lɛ̄ka̍ yɔ᷄ŋ ndu̍ wo̍ cho̍ ni̍, māā le̍ mbō hu᷄ŋ ba̍ŋā wānāa̍ cho̍ ma̍ dūāū tīīnda᷄ŋ ndāa̍ o̍ sāwāla̍ŋ chūa̍a̍ ni᷄ŋ, le̍ mā wa̍ wānāā sa̍kpō Mɛ̄lɛ̄ka̍ o̍ hɔ̄l la̍. Ō hīŋ le̍ mbō bāŋa̍ nda̍, ndu̍yɛ̍ o̍ ko̍ŋ, mī Mɛ̄lɛ̄ka̍ sīīŋgu̍u̍ nda̍ chūāūwāā ndɔ̄.

⁵

⁶O̍ ko̍ŋ kɔ̍ɔ̍lī, mbo̍ tōsā mi̍ Nyi̍nā ndɔ̄ɔ̍ tūāl nya̍ kɔ̄ɔ̄lī, ndu̍ yɔ̍nūŋ māā Po̍ ndɔ̄ɔ̍ Chi̍i̍sū Nyi̍na̍ ndɔ̄ɔ̍ ni̍. Le̍ mɛ̄ɛ̍ nya̍ chō chūāūwāā ndūa̍a̍ yɛ̍, o̍ to̍sa̍ he̍ī ni̍. Ndu̍yɛ̍ Nyi̍nā ndɔ̄ ko̍ŋ to̍sā ni̍, mī ŋ̄ vēēlū Mɛ̍lɛ̄ka̍ āā, “Kɛ̄kɛ̍, Fi̍nyā nāa̍.”

⁷Le̍ sa̍bōo̍ ho̍ō, lā cho̍ lɛ̍ lāchɛ̄ nyi̍nāā wɔ̄ɔ̍ŋnda̍ o̍ bā bɛ̄ŋgu̍ le̍. Chūāūwāa̍ Mɛ̄lɛ̄ka̍a̍ nya̍ chō ni᷅ŋ ni̍. Tē lā wa̍ yɛ̄ chūāūwāā ndūa̍a̍ pɛ̍, mɛ̄ɛ̍ nyɛ̄ o̍ nyɛ̄ o̍ kɛ̍si̍ le̍ chūāūwāā ndūa̍a̍ nya̍ cho̍ hūnɔ̄ɔ̄ mu̍ŋ nɔ̄ ni̍.

⁸Bōōndi̍i̍ nya̍ a̍a̍ si̍na̍ wɔ̍ Mɛ̍lɛ̄ka̍ le̍ ve̍, lā wa̍ māwāā chīa̍a̍ nyi̍nāā wɔ̄ɔ̍ŋnda̍ o̍ bā bɛ̄ŋgu̍, mī lā vēēlū nda̍ mɛ̄lɛ̄ka̍ la̍ŋ.

⁹Kɛ̍, pɛ̄ŋgo̍o̍ ho̍ō ni᷅ŋ lā sīnā Mɛ̍lɛ̄ka̍ wa̍la̍ŋ, bɔ̄ɔ̍le̍ Mɛ̄lɛ̄ka̍ sīnā ni᷅ŋ nya̍. Le̍la̍ŋ, yēēmɛ̍i̍ yɛ̄ɛ̍nɛ̍ nya̍ chō yɛ̄ vɛ̄lɛ̄ le̍ mīīŋgōo̍ nyi̍nāā wɔ̄ɔ̍ŋāā kāŋ o̍ bā? Kpāāyā o̍ kpāāyā ā nɔ̍ le̍ mā tōsa̍l nya̍ nyɛ̄ o̍ nyɛ̄ kɛ̄ndɛ̄ le̍. Nyɛ̄ o̍ nyɛ̄ cho̍ mā ke̍ nya̍ ndu̍ le̍. Lā mi̍i̍ŋgū lɛ̄ sīmnɔ᷄ŋ nda̍ o̍ bā lāchɛ̄ le̍.

¹⁰Lā nɔ̄ pālɛ̍i̍ ī pūm, a̍ pāŋgo̍ŋ ŋ̄ pūm, a̍ te̍le̍ŋnda̍ŋ lā pūm o̍ wɔ̄sīo̍o̍ ni᷄ŋ kpɛ̍ kpɛ̍. Sɔ̄ɔ̍ŋ nya̍ tōsā bo̍o̍ndu̍ŋ mu̍ŋ ndo̍ŋ ŋ̄ chō. Ŋ̄ nya̍ to̍sā bo̍o̍ndu̍ŋ mu̍ŋ te̍ wo̍ŋ ŋ̄ chō.

¹¹Sɔ̄ɔ̍ŋ nya̍ chō mu᷅ŋ tōsāa̍ wo̍ŋ, I̍ bu̍u̍la̍ŋ a̍ nya̍ ta̍u̍ ta̍u̍. Lā to̍sā a̍ sa̍bū mī wa̍li̍ ya̍ I̍ to̍sa̍ nya̍ tɛ̄ɛ̄ŋ ndo̍ ō tāmbu̍ŋ fo̍ndō fu̍u̍ le̍.

¹²Chāāŋāā nīāā wa̍nāā lāāla᷄ŋnda̍, I̍ cho̍ nya̍ nyɔ̄ɔ̄lōo̍ a̍ yāndi̍i̍. I̍ ma̍l ka̍ā māChu̍ūwo̍, mi̍ wa᷅ ni᷅ŋ mɛ̄ɛ̍ nya̍ wānāa̍ cho̍ a̍ Chu̍ū le̍ wa̍ ā chō yɛ̍. Lā tōsa̍ mɛ̄ɛ̍ yā I̍ to̍sa̍ nu̍a̍ā yɛ̍. Īsɔ̄ɔ̍ o̍ īsɔ̄ɔ̍ wɔ̍ɔ̍ŋ lā tōsa̍ wɔ̍ a̍ ya̍ le̍ pi᷅lɛ̍ le̍.

¹³Nya̍ pi̍la̍ lā sīnā māā wā ya̍ I̍ wa̍ a̍ nāa̍ nya̍ tɛ̄ɛ̄ŋ ndo̍, nyɛ̄ ko᷄ŋ to̍sa̍ ni̍ mi̍ I̍ sɔ̍lā fo̍ndāa̍, mi̍ I̍ di̍mūl nya̍ Yōōŋgū Kɛ̄ndɛ̍ Mɛ̄lɛ̄ka̍a̍ o̍ tāse̍la̍ ndɔ̄ ko̍ŋ.

¹⁴Ndu̍yɛ̍ mi̍ nāā ya̍ I̍ na̍a̍ ko̍ŋ ndo̍ chūū nya̍ dɛ̍nɛ̍la̍ pa̍lāālā fāŋgā. Kɛ̍ o̍ ko̍ŋ ni̍ŋ kpo̍u̍, lā bīi̍ ya̍ bīyɔ̄ɔ̄ wɔ̄ɔ̍ŋ te̍, kɛ̄lɛ̄ŋgāā ni᷅ŋ te̍ mī lā ma᷄l la̍. Mi̍ lā bīī ya̍ kpe̍e̍kpe̍i̍ o̍ kɛ̍ndɛ̄ nu̍a̍ā ŋ̄ yɔ̄ŋ āā, ki̍i̍la̍nɔ̍ Mɛ̄lɛ̄ka̍a̍ ya̍ cho̍ ni̍. Mi̍ lā bīī ya̍ kpe̍e̍kpe̍i̍, mɛ̄ɛ̍ nya̍ bīī Chi̍i̍sū Ki̍li̍tī pi̍la̍ yɛ̍.

¹⁵Kɔ̄l kɛ̄ndɔ̄ɔ̍ ō wa̍ nya̍ ni᷄ŋ ta̍u̍ bo̍o̍ndi̍i̍ ke̍ŋ. Vɛ᷅ ni᷅ŋ lā cho̍ lɛ̍ a̍ kɔ̄l kɛ̄ndɛ̄ le̍nde̍ le̍? Lā wa̍ ā bɛ̄ɛ̄ndīa̍ŋ bo̍o̍ndi̍i̍ ke̍ŋ le̍ nyɛ̄ o̍ nyɛ̄ tōsā le̍ ya̍. Te̍ ndi̍ i̍i̍ yɔ̍nūŋ pɛ̍, ndu̍ o̍o̍ wa̍ bɛ̍ɛ̍ āā wāŋndo̍ hɔ̄ltē ndɔ̄le̍ ndu̍ pi̍la̍ le̍ŋ ni̍ ndu̍ o̍o̍ ka̍lā ma̍ka̍lāā le̍ŋ po̍ mī ndu̍ o̍o̍ ke̍ ya̍.

¹⁶Kɛ̍, pɛ̄ŋgo̍o̍ ho̍ō ni᷅ŋ lā chu̍a̍ ya̍ ni᷅ŋ māā ya̍a̍mɔ̍ɔ̍ nyā le̍ mɛ̄ɛ̍ ya̍ I̍ cho̍ nya̍ tōnya̍a̍ dīmūllo̍ yɛ̍.

¹⁷Ndu̍yɛ̍ wānāa̍ cho̍ ka̍ŋ ki̍ndīo̍o̍ le̍ mā māŋga̍la̍ Yōōŋgū Kɛ̄ndɛ̍ Mɛ̄lɛ̄ka̍a̍ a̍ Chi̍i̍sū Ki̍li̍tī o̍kɔ̄ɔ̄ wa̍, ā chō kīndīo̍o̍ kpe̍e̍kpe̍i̍ le̍ mā mūli̍ nya̍ kūmbū ndāa̍. Kɛ̍ ndu̍yɛ̍ yīya᷄ŋ nda̍ nɔ̄ ni᷄ŋ a̍ nya̍ o̍kɔ̄ɔ̄ wo̍ ō cho̍ yi̍ya᷄ŋ kɛ̍ndɛ̄ le̍. Yēēmɛ̍i̍ ko̍ nda̍ yēēma̍ le̍ mā fāŋa̍ nya̍ ya̍ o̍ ŋ̄dīāl ni̍, le̍ Hāli̍ kpe̍ŋ mī lā dɔ̄ū kɔ̄llo̍ o̍ nda̍ lo̍.

¹⁸Ō cho̍ su̍ɛ̍i̍ wɔ̍ɔ̍ŋ le̍ mī lā dɔ̄ū kɔ̄llo̍ o̍ wāŋndā chīe̍e̍ya̍ lo̍ le̍, tē ō chō pɛ̍ le̍ sa̍bū kɛ̄ndɛ̄. Kɛ̍ ō ve᷅ ma̍va̍ā māā lɔ̍ɔ̍ ya̍ I̍ wa᷅ nya̍ tɛ̄ɛ̄ŋ ndo̍ ko̍ni̍ le̍ nya̍ tōsā he̍ī le̍, kɛ̍ tē I̍ fa̍ŋa̍ŋ pɛ̍ lā ma᷄l te̍.

¹⁹I̍ di̍mūl lɔ̍ nya̍ he̍ī chāa̍ŋāā nīāā ka̍a̍lāa̍, mɛ̄ɛ̍ nyɛ̄ nɛ̄īyāa̍ ō wā wa̍nā la̍nɔ̍ɔ̍ chōo̍ nu̍a̍ā o̍ vīōlɔ̄ɔ̍, kɛ̍ mbō lo̍ bīūwɔ᷄ŋndo̍ ha̍a̍a̍ mbō lo̍ o̍ ko̍ŋ mbō vēlū chūā ndɔ̄ɔ̍ yɛ̍, le̍nde̍ nyɛ̄ nɛ̄īyāa̍ chō vɛ̄lɛ̄ ya̍ chōo̍ le̍ nya̍ ni̍. I̍ cho̍ lō ndu̍ bīūwɔ᷄ŋndo̍ ha̍a̍a̍ mbō lo̍ o̍ ko̍ŋ mī lā chu̍a̍ ka̍ālā Chi̍i̍sū Ki̍li̍tīla̍ŋ.

²⁰Māā I̍ wa̍ ko̍ nya̍ tɛ̄ɛ̄ŋ su̍ŋ su̍ŋ, le̍ mī ya̍ i̍i̍ cha̍a̍ nya̍ sūɛ̍i̍ ka̍lɛ̄i̍ chɔ̄m. Kɔ̄l nūu̍ chō ō lāāsīa̍ŋ ha̍a̍a̍ I̍ si̍nā mɛ̄ɛ̍ o̍ mɛ̄ɛ̍ ya̍ I̍ yɔ᷅ŋ te̍.

²¹Nya̍ yi̍ya̍ŋ ha̍ā māā lā nɔ̄lā mī lā chu̍a̍ sāwāla̍ Mɛ̄lɛ̄ka̍la̍ŋ o̍ kpāāya̍ nya̍ pi̍la̍a̍ ni᷄ŋ, le̍ mī lā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l la̍, I̍ nyu̍nā wɔ̍ nya̍. Nyɛ̍ cho̍ ō pōōnyīāā o̍ Yāu̍la̍ Sāwāla̍ Mɛ̄lɛ̄ka̍la̍ŋ ni᷄ŋ ndo̍ lā sīnā pa̍ ndu̍ pɛ̄ŋgu̍ wa̍la̍ŋ?

²²O̍ yāu̍la̍ la̍ŋ ni᷄ŋ i̍ cho̍ ī pōōnyīāā a̍ pūa̍a̍ ŋi̍ɔ̍ɔ̍ŋāa̍ E̍bīlāha᷅mnda̍ o̍kɔ̄ɔ̄ ni̍. Ō pīlɔ̍ɔ̄ nda̍ chūā chɛ̍ wa̍ ndu̍ o̍ bā wo̍ ve̍lū ndu̍ ni̍, mā vēēlū chu̍ā chɛ̄ kōŋ āā, Ha̍kāā. Pōo̍ ō pīlɔ̍ɔ̄ yɛ̄ nda̍ Se̍lūā. Ndu̍ ndu̍ ve̍ chɛ̍ le̍.

²³Po̍ o̍ ve̍lū nda̍ chūā chīɔ̍ɔ̍ wo̍ ndu̍ vi̍lu̍ŋ māā ō pīlɔ̍ɔ̄ le̍. Ndu̍ ndu̍, mɛ̄ɛ̍ nda̍ chūā yo᷄l yɔ̍ŋāa̍ nu̍a̍ā mā vēlū wāŋndo̍ yɛ̍, le̍nde̍ nda̍ vēlū ndu̍ ni̍. Kɛ̍, po̍ nda̍ vēlū nda̍ la̍a̍ ndɔ̄ ba̍ŋa᷄ŋndo̍ wo̍, ndu̍ ndu̍ ō wa̍ fɛ̍ɛ̍ŋ o̍ chu̍a̍na᷄ŋ i̍bu̍ŋgā. Mɛ̄lɛ̄ka̍ chūe̍l fɛ̍ɛ̍ŋ E̍bīlāha᷅m bu̍ŋgɛ̄i̍ le̍ vīōlɔ᷄ŋ ndɔ̄ɔ̍.

²⁴Nyɛ̍ yɔ̍nu̍ŋ a̍ wāŋ lāāndūāā ŋīɔ̍ɔ̍ŋnda̍ ha̍ā wo̍ ō yīŋgi̍la̍. Ndu̍yɛ̍ ō nɔ̄lā mbō pɛ̄ɛ̄ku̍ na̍a̍ a̍ kpe̍ma̍la̍ ti̍ɔ̍ɔ̍ŋ ndā Mɛ̄lɛ̄ka̍ yīi̍ sīndɛ̄ nda̍ ŋ̄wāŋndā chīe̍e̍ la̍ŋ o̍kɔ̄ɔ̄. Chūā chīɔ̍ɔ̍ ho̍ō, ndu̍ yɔ̍nūŋ māā Ha̍kāā ni̍, vēla᷅ŋ ndɔ̄ɔ̍ ndu̍ cho̍ māā kpe̍ma̍ Mɛ̄lɛ̄ka̍ yīi̍ nda̍ Chu̍ūwa̍, mbo̍ kē nda̍ sāwāla̍ ndɔ̄la̍ŋ o̍ Pēmbīī Sa̍a̍nāīve̍ chōo̍ wo̍ ni̍. Chūāūwāā chūa̍a̍ ho̍ō vēlū wa̍ bɛ̍ɛ̍, chīa̍a̍ ko̍ni̍ nda̍ wa̍ ni̍. Ko̍ŋ bɛ̍ɛ̍ vēla᷅ŋ ndɔ̄ɔ̍ cho̍ a̍ wānāa̍ chu̍ā sa̍wāla̍ Mɛ̄lɛ̄ka̍la̍ŋ nda̍ ni̍, a̍ dīmi̍ māā tē ā chu̍a̍ la̍ŋ pɛ̍ ā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l la̍. Nda̍ bɛ̍ɛ̍ chīa̍a̍ nda̍ chō ni̍.

²⁵Ndu̍yɛ̍ Ha̍kāā o̍ ve̍la᷅ŋ ho̍ō a̍ kpe̍ma̍ Mɛ̄lɛ̄ka̍ yīi̍ o̍ Pēmbīī Sa̍a̍nāīve̍ chōo̍ o̍ lɛ̄ŋndē Ālu̍e̍e̍bīāāle̍ŋ ni᷄ŋ ndo̍, vēla᷅ŋ ndɔ̄ɔ̍ ndu̍ cho̍ vɛ̄lɛ̄ a̍ Chūlu̍sɛ̄lɛ̄m na̍a̍ ŋ̄ nɔ̄ pɛ̄ŋgo̍o̍ ho̍ō wo̍ ni̍. Mɛ̄ɛ̍ Ha̍kāā nda̍ chūāūwāā ndūa̍a̍ wa̍ chīa̍a̍ yɛ̍ le̍nde̍ wāŋnda̍ Chūlu̍sɛ̄lɛ̄m a̍ cho̍ chīa̍a̍ ni̍.

²⁶Chu̍a̍ ve̍ ho̍ō chɛ̄ le̍ wo̍, ndu̍ yɔ̍nūŋ māā Se̍lūā ni̍, vēla᷅ŋ ndɔ̄ɔ̍ cho̍ chi̍e̍e̍ kpe̍e̍kpe̍i̍ Mɛ̄lɛ̄ka̍a̍ ni̍, ndu̍ yɔ̍nūŋ māā Chūlu̍sɛ̄lɛ̄m chōo̍ cho̍o̍ ni̍. Wāŋnda̍ chi̍e̍e̍ ko̍ŋ ni᷄ŋ nda̍ nda̍ cho̍ o̍ lēchɛ̄ ni᷄ŋ te̍, kāni̍ fu̍u̍le̍, nda̍ nda̍ o̍ Ki̍li̍tī ni̍ŋ nda̍ dɔ̄ū tīīnda᷄ŋ ndāa̍ ni̍. O̍ ko̍ŋ, mi̍ Mɛ̄lɛ̄ka̍ sīīŋgūū nda̍ wānāā sa̍kpō Mɛ̍lɛ̄ka̍ o̍ hɔ̄l. Chūlu̍sɛ̄lɛ̄m ndo̍ ho̍ō ndu̍ cho̍ māchūāā māā kālā na̍a̍.

²⁷Dīōmnda̍ŋ lā chō lā pōōnyīāā o̍ Yāu̍ Mɛ̄lɛ̄ka̍a̍ ni᷄ŋ a̍ Chūlu̍sɛ̄lɛ̄m ndo̍ ho̍ō o̍kɔ̄ɔ̄. Mi̍ Yāu̍ Mɛ̄lɛ̄ka̍a̍ dīmī dīōmnda̍ŋ nda᷅ŋ a̍ ndu̍ o̍kɔ̄ɔ̄ āā, “Nūm wānā la̍nɔ̍ vi̍lu̍ ho̍ō le̍ wo̍, wa̍ a̍ kɔ̄l kɛ̄ndɛ̄. A̍ chu̍e̍ yo᷄l mī pūli̍i̍ vi̍a̍lāā ī nɛ̄i̍ nu̍m te̍, kɛ̍ wa̍nu̍ŋ a̍ kɔ̄l kɛ̄ndɛ̄ bu̍tē. Ma̍m cho̍o̍ cho̍o̍ a̍ kɔ̄l kɛ̄ndɔ̄ɔ̍. Kāni̍ fo̍ndōle̍, nūm nda̍ kɛ̄ɛ̍ ho̍ō wo̍ ā chō hūnɔ̄ɔ̄ chūāūwa̍ nɔ̄ mbō hīōū chu̍a̍ cho̍nu᷄ŋ ho̍ō nda̍ pɔ̍nɔ̍ ndɔ̄, ā kɛ̄ɛ̍ ndu̍ le̍ wo̍.”

²⁸Mi̍ Mɛ̄lɛ̄ka̍ tōsā mɛ̄ɛ̍ o̍ chu̍e̍l E̍bīlāha᷅m būŋgɛ̄i̍ yɛ̍. Mbo̍ tōsā mi̍ E̍bīlāha᷅m vi̍a̍lū pōo̍ nda̍ Se̍lūā, ndu̍ yɔ̍nūŋ māā Āa̍se̍ ni̍. Mī di̍mu̍l nya̍ chāāŋāā nīāā wa̍nāā lāāla᷄ŋnda̍, le̍nde̍ nya̍ bɛ̍ɛ̍ nya̍ sīmnu᷄ŋ chu̍a̍u̍wāā Mɛ̄lɛ̄ka̍ ni̍. Kāni̍ fo̍ndōle̍, le̍nde̍ Mɛ̄lɛ̄ka̍ chu̍a̍ būŋgɛ̄i̍ ni̍ māā ī chō yɔ̄nɔ᷄ŋ.

²⁹Ndu̍yɛ̍ mi̍ ī yɔ̄nu᷄ŋ a̍ bōōndi̍i̍ ke̍ŋ, mi̍ po̍ E̍bīlāha᷅m ve̍lū nda̍ Ha̍kāā wo̍, ō tūsī nyɛ̄ pālāa̍ po̍ Nyi̍na̍ Mɛ̄lɛ̄ka̍a̍ tōsa̍ mi̍ E̍bīlāha᷅m nda̍ Se̍lūā a̍ vi̍a̍lū wo̍ chōo̍. Le̍nde̍ ko̍ i̍ cho̍ hāū yɔ̍nɔ᷄ŋndo̍ ni̍. Wānāa̍ dɔ̍ū tīīnda᷄ŋ ndāa̍ o̍ sāwāa̍ chūa̍a̍ ni᷄ŋ su̍e̍e̍, le̍ mī nda̍ pi̍la̍ sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l la̍, ā chō hāū wa̍nāa̍ dɔ̍ū tīīnda᷄ŋ ndāa̍ o̍ Chi̍i̍sū Ki̍li̍tī ni̍ŋ le̍ mī Mɛ̄lɛ̄ka̍ pi̍la̍ si̍i̍ŋgu̍u̍ nda̍ wānāā sa̍kpō wa̍, nyɛ̄ pālāa̍ tūsīo̍o̍ chōo̍ ni̍.

³⁰Mi̍ Yāu̍ Mɛ̄lɛ̄ka̍a̍ dīmī āā, “To̍u̍ chu̍ā chīɔ̍ɔ̍ nda̍ po̍ ndɔ̄ɔ̍ ā kɔ̍. Ā kɔ̍, kāni̍ fo̍ndōle̍, chūā chīɔ̍ɔ̍ po̍ ndɔ̄ɔ̍, ō nɔ̍ mbō lōo̍ nyɛ᷄m fi̍nyā ndɔ᷄ŋ te̍. La̍nɔ̍ cho̍ chɛ᷅ le̍ wo̍, po̍ ndɔ̄ɔ̍ ndu̍ nɔ̍ mbō lōo̍ nyɛ᷄m fi̍nyā ndɔ᷄ŋ ni̍.”

³¹Le̍la̍ŋ chāāŋāā nīāā, na̍a̍ na̍a̍ ŋ̄ cho̍ chu̍a̍u̍wāā wānā la̍nɔ̍ chi̍ɔ̍ɔ̍ ho̍ō le̍. Ŋ̄ nɔ̍ lɛ̍ mī ŋ̄ tīīnda̍ŋ sa̍wāla̍ŋ chūa̍a̍ le̍ wāa̍ wānāā sa̍kpō Mɛ̄lɛ̄ka̍ o̍ hɔ̄l te̍. Wānā la̍nɔ̍ cho̍ chɛ̍ le̍ wo̍ chūāūwāā ndūa̍a̍ na̍a̍ ŋ̄ chō ni̍. Mɛ̄lɛ̄ka̍ sīīŋgu̍u̍ na̍a̍ wānāā sa̍kpō ndu̍ pi̍la̍ o̍ hɔ̄l le̍ mɛ̄ɛ̍ na̍a̍ ŋ̄ tīīnda̍ŋ Chi̍i̍sū Ki̍li̍tī yɛ̍.