Read Southern Kisi Kāle̍e̍sīāŋnda̍ 5 Bible Online

Kāle̍e̍sīāŋnda̍ 5 - Southern Kisi bible

Kāle̍e̍sīāŋnda̍ 5

¹Tīīnda᷄ŋ na̍a̍ ŋ̄ dūāū o̍ sāwāla̍ŋ chūa̍a̍ ni᷄ŋ le̍ sīmnɔ᷄ŋndo̍ wānāā sa̍kpō a̍ bānāā Mɛ̄lɛ̄ka̍ o̍ hɔ̄l lo̍, Ki̍li̍tī ba̍ŋa̍ na̍a̍ o̍ chɛ̄lē lēŋ ni᷄ŋ. Le̍la̍ŋ ā bāŋa᷄ŋnda̍ na̍a̍ ŋ̄ chō ni᷅ŋ ni̍. Ndu̍yɛ̍ bāŋā Chi̍i̍sū ba̍ŋa̍ nya̍ mbo̍ sōli̍ nya̍ o̍ tīīnda᷄ŋ lāsāwāa̍ ho̍ō ni᷄ŋ ndo̍, lā si᷄m o̍ bā kōŋ chōo̍ nyɛ̍ kɛ̄ndɛ̄ yi̍. Lā chɛ᷅l mī wānā o̍ wānā to̍sa̍ mī lā mīīŋgu̍ lɛ̄ o̍ chɛ̄lē lēŋ ni᷄ŋ, sa̍wāla̍ŋ tīīnda᷄ŋndo̍ le̍ sīmnɔ᷄ŋndo̍ wānāā sa̍kpō Mɛ̄lɛ̄ka̍ o̍ hɔ̄l te̍.

²Lā kɛ̄si̍ŋ nyɛ᷅ ya̍ I̍ cho̍ nya̍ ho̍ō dīmūllo̍ wo̍ o̍ kɔ̄l nyɛ̄ kɛ̄ndɛ̄ kɛ̍ndɛ̍ī. Ya̍ Pɔ̍ɔ̄ mī di̍mu̍l nya̍, tē lā chɛ᷄l pɛ̍ mā hīvi̍ nya̍ o̍ chīɛ̄ī kɔ̄ɔ̄lī, māā le̍ mī lā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l pɛ̍, mɛ̄ɛ̍ chɔ̄mndo̍ nya̍ chɔ᷄m ko̍ŋ ni̍ māā nyɛ̄ o̍ nyɛ̄ Ki̍li̍tī to̍sa̍l nya̍ ō sīmnu᷄ŋ nyɛ᷅ fo̍ndō fu̍u̍.

³I̍ chɔ̍ɔ̍lū wɔ̍ vɛ̄lɛ̄ nya̍ sīlā. Wāna̍ chɛ̍l pɛ̍ mā hīvi̍ ndu̍ o̍ chīɛ̄ī kɔ̄ɔ̄lī le̍ sīmnɔ᷄ŋndo̍ wānā sa̍kpō Mɛ̄lɛ̄ka̍ o̍ hɔ̄l pɛ̍, mɛ̄ɛ̍ wānā ko̍ŋ, ō nɔ̄ kūēē mbō chu̍a̍ ni̍ko̍ sa̍wāla̍ māChu̍ūla̍ŋ mɛ̄ɛ̍ la̍ cho̍ fa̍ū le̍ mbō sīmnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l.

⁴Nya̍ wānāa̍ nɔ̍ o̍ kɔ̄l māā le̍ mɛ̄ɛ̍ nya̍ chūā sa̍wāla̍ŋ yɛ̍ māā le̍la̍ŋ lā nɔ̄lā mī lā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l la̍, lā sīna̍ pɛ̍ŋgu̍ māā lā fāŋa̍ nya̍ pi̍la̍ Ki̍li̍tī o̍ ŋ̄dīāl. Lā tōsa̍ Mɛ̄lɛ̄ka̍ to̍sāl lɛ̍ nya̍ kɛ̄ndɛ̄i̍ le̍.

⁵Kɛ̍ na̍a̍ na̍a̍, Chi̍i̍sū Ki̍li̍ti̍ na̍a̍ ŋ̄ tīīnda̍ŋ ni̍. Le̍ he̍ī Nyi̍na̍ Mɛ̄lɛ̄ka̍a̍ ndu̍ ke᷅ na̍a̍ kpāāyāa̍ le̍ wāa̍ lēhɔ̄l o̍ nɛ̄ī le̍ mī Mɛ̄lɛ̄ka̍ pi̍la̍ si̍i̍ŋgu̍u̍ na̍a̍ wānāā sa̍kpō Mɛ̍lɛ̄ka̍ o̍ hɔ̄l ni̍.

⁶Ndu̍yɛ̍ tē ŋ̄ chō dīōm pīlɛ̍ a̍ Chi̍i̍sū Ki̍li̍tī pɛ̍, ŋ̄ wa̍ a̍ hi̍vīāā, ŋ̄ wa᷅ ā hīvīāā le̍, ko̍ŋ ndu̍ ve᷅ nyɛ᷅ o̍ nyɛ̄ le̍. Sūɛ̍i̍ le̍bo᷅lle̍ ndi̍ ko̍ni̍ cho̍ Ki̍li̍ti̍ tīīnda᷄ŋndo̍ ni̍. Ndu̍yɛ̍ kāālāa̍ chɔ᷅m ni̍ māā ŋ̄ tīīnda̍ŋ Ki̍li̍tī.

⁷Mi̍ nya̍ a̍a̍ ka̍ndū kɔ̄la̍ŋ nyɛ̄ kɛ̄ndɛ̄ kɛ̍ndɛ̍ī a̍ mɛ̄ɛ̍ nya̍ wa̍ Ki̍li̍ti̍ tīīnda᷄ŋ ndo̍ yɛ̍. Kɛ̍ mi̍ lā chɛ̄l mi̍ wānā pu̍m tōsā mi̍ lā māl dīōmndā tōnya̍la̍ cho̍ a̍ Mɛ̄lɛ̄ka̍ o̍kɔ̄ɔ̄ la̍ŋ. Nya̍ a̍a̍ nɔ̍ mī nya̍ a̍a̍ to̍sa̍ le̍nde̍ le̍.

⁸Ā chō nya̍ pɛ̄ɛ̄kōo̍ māā mɛ̄ɛ̍ mā hīvi̍ nya̍ o̍ chīɛ̄ī kɔ̄ɔ̄lī mālāŋ nya̍ sīmnūŋ wa̍nāā sa̍kpō Mɛ̄lɛ̄ka̍ o̍ hɔ̄l. Kɛ̍, wāna̍ ve̍e̍lu̍ nya̍ ho̍ō le̍ wāa̍ wānāā ndɔ̄ wo̍, ndu̍ yɔ̍nūŋ māā Mɛ̄lɛ̄ka̍ ni̍, ō cho̍ ndu̍ le̍ ve᷅m nda̍ māā ā pɛ̄ɛ̄ku̍ nya̍ pɛ̄ɛ̄kū wāā le̍nde̍ le̍.

⁹Ndu̍yɛ̍ pɛ̄ɛ̄kū lāchōōwā nda̍ hīŋ ho̍ō wo̍ chō kēlāa̍ nya̍ tɛ̄ɛ̄ŋ. Pɛ̄ɛ̄kōo̍ ho̍ō chō ko̍ mɛ̄ɛ̍ yi̍i̍sīi̍yo̍ ō chō nu̍a̍ā yɛ̍. Nyɛ̄ pɔ̄mbɔ̄ bɛ̍ɛ̍ wāŋndo̍ dɔ̄ū ndu̍ o̍ kōlo̍ nda̍ tōsā bēe̍dīi̍yo̍ wo̍ ni᷄ŋ pɛ̍, ō tīu̍ dɔ̍ɔ̍ lēni᷄ŋ kpo̍u̍. Le̍nde̍ ki̍nɛ̍i̍ pɛ̄ɛ̄kū lāchōōwāa̍ ho̍ō chō nya̍ tīūwo̍ tɛ̄ɛ̄ŋ ni̍.

¹⁰Kɛ̍ ō wa̍ dɔ̍ɔ̍ le̍nde̍ ni̍, I̍ nɔ̍ wɔ̄ lāāla᷄ŋndo̍ a̍ nya̍. Ha̍a̍a̍ mi̍ ŋ̄ wā ā mɔ̄ɔ̄sa᷅ŋ na̍a̍ pi᷅lɛ̍ na̍a̍ Māsānɔ̄ɔ̍ Mɛ̄lɛ̄ka̍ wa̍ā, he̍ī ī ke̍ ya̍ lāāla᷄ŋndo̍ kpe̍e̍kpe̍i̍ māā lā chu̍ē ni̍ŋ yi̍ya᷄ŋ che᷅le̍ŋ mbō wa̍ yɛ̍ a̍ yīya᷄ŋ ya̍ I̍ nɔ̍ wo̍ le̍. Ndu̍yɛ̍ I̍ si̍nā kpe̍e̍kpe̍i̍ māā wāna̍ cho̍ nya̍ pālāa̍ ho̍ō wo̍, ō wa̍ wa̍nā bɛ̍ndu̍, yɛ̄ɛ̄ le̍ nɛ̍, Mɛ̄lɛ̄ka̍ chō ndu̍ nyɛ̄ pālāa̍ tūsī chōo̍ le̍ ko̍ŋ.

¹¹Mī di̍mu̍l nya̍ chāāŋāā nīāā lāāla᷄ŋnda̍, ya̍ I̍ nɔ̍lā mī pɛ̍ɛ̍ku̍ nya̍ pɛ̄ɛ̄kū wāā le̍nde̍ kpo̍so̍ŋ te̍. Mī yɔ̍ŋ āā, mɛ̄ɛ̍ mā hīvi̍ nya̍, māā ko̍ŋ to̍sā ni̍ mī lā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l, ke̍ŋ yɔ̍nūŋ ya̍ fɛ̍ɛ̍ŋ a̍ fɛ̍ɛ̍ŋ te̍. Nāa̍ nya̍ kāndū si̍nā wa̍, tē ya̍ i̍i̍ wa̍ wāŋnda̍ pɛ̄ɛ̄kū wāā le̍nde̍ pɛ̍, mɛ̄ɛ̍ nda̍ a̍a̍ ve᷅ ya̍ nyɛ̄ pālāa̍ tūsīo̍o̍ chōo̍ le̍ wa᷅. Tē ya̍ i̍i̍ wa̍ wāŋnda̍ dīmūllo̍ pɛ̍ māā mɛ̄ɛ̍ mā hīvi̍ nda̍ o̍ chīɛ̄ī kɔ̄ɔ̄lī, mɛ̄ɛ̍ dīo̍m Mɛ̄lɛ̄ka̍ ya̍ I̍ cho̍ wāŋnda̍ dīmūllo̍ a̍ pīɔ̍m Chi̍i̍sū vi᷅ o̍ yɔ̄m sīŋgāfīlāa̍ chōo̍ wo̍, mɛ̄ɛ̍ ndu̍ o̍o̍ nɛ̍ī nda̍ le̍ wa᷅.

¹²Wānāa̍ cho̍ ka̍ŋ nya̍ pālāa̍ wa̍, mbɔ̄ māā ā mɛ̍ɛ̍lū o̍ hīvī nda̍ hīvi̍ nda̍ o̍ chīɛ̄ī kɔ̄ɔ̄lī wo̍ ko̍ni̍ le̍, ā hīo̍u̍ lāchi̍, ā tɛ̄nda̍ vɛ̍lɛ̄ nda̍ pi̍la̍ bōōsīla̍ŋ.

¹³Kɛ̍ ndu̍yɛ̍, nya̍ nya̍, Mɛ̄lɛ̄ka̍ vēēlu̍ nya̍ le̍ mī lā wa̍ chūāūwāā ndɔ̄. O̍ ko̍ŋ, lā ti̍i̍ndāŋ ndɛ̍ nya̍ pi̍la̍ māā sāwāla̍ nya̍ chūā la̍ŋ, māā ko̍ŋ te̍ to̍sā mī lā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l te̍. Le̍ he̍ī, lā chō ni᷅ŋ ā bāŋa᷄ŋnda̍. Kɛ̍ ō wa̍ bɛ̍ɛ̍ mī ī wa̍ le̍nde̍ ni̍, ko̍ŋ ve᷅ ka᷅fɛ̍īla̍ŋ ka᷅fɛ̍ī le̍ mī lā mīīŋgu̍ nyɛ̄ wāna̍ chi̍e̍e̍yɛ̍i̍ ī dīmūl nya̍ le̍ tōsāa̍ wo̍ tōsā le̍. Nyɛ̄ nya̍ nɔ̄ mī lā tōsa̍ o̍ pīŋī Mɛ̄lɛ̄ka̍ pīŋi̍ nya̍ wo̍ ni᷄ŋ ndo̍ ndu̍ cho̍ wāŋnda̍ kāālāa̍ ni̍, mī lā chɔ᷄m ka̍a̍lāa̍ ho̍ō a̍ māāli̍āŋndo̍ vēllāa̍ vēllē.

¹⁴Kāni̍ fo̍ndōle̍, nyɛ̄ o̍ nyɛ̄ sāwāla̍ Mɛ̄lɛ̄ka̍la̍ŋ lā dīmi̍, ō chɛ᷄ŋ o̍ sūɛ̍i̍ pi᷅lɛ̍i̍ he̍ī ni᷅ŋ kpe̍. Mbo̍ dīmī āā, “Ka̍a̍la̍ cha̍a̍ŋ nūm wa᷅na̍ chi̍o̍o̍ mɛ̄ɛ̍ ŋ̄ kāāla̍ nūm pi̍la̍ yɛ̍.”

¹⁵Lā mānda̍ŋ kāni̍ fo̍ndōle̍, lā mɛ̄i̍ he̍ī tōsāa̍ mi̍ lā sāā sɔ̄ɔ̍ŋ tōsāa̍ māā lāvīsī. Vīsīa̍a̍ nda̍ nda̍, kīsi̍ ki̍si̍āŋndo̍ mā bōōlu̍āŋ mā lūēīya᷅ŋ nyɛ̍ nɛ̄īyāa̍. Le̍nde̍ nya̍ chō yɔ̄ŋu̍la᷅ŋndo̍ a̍ nyɛ̄ nɛ̄īyāa̍ lūēīya᷅ŋndo̍ ni̍. Tē lā tōsa̍ le̍nde̍ pɛ̍, mɛ̄ɛ̍ tɛ̄ɛ̄mba᷅ŋndo̍ ko̍ni̍ nya̍ chō vēllāa̍ vēllē ni̍.

¹⁶Nyɛ̄ ya̍ I̍ di̍mi̍ ko̍ŋ ndo̍ cho̍ ni̍ māā, lā ke̍ Nyi̍na̍ Mɛ̄lɛ̄ka̍a̍ fo̍ndāa̍ le̍ mbō wa̍ nya̍ kɔ̄ɔ̄lī o̍ nyɛ̄ o̍ nyɛ̄ fe̍e̍ ni̍ŋ nya̍ nɔ̄ le̍ tōsāa̍. O̍ ko̍ŋ lā to̍sā lɛ̍ nyɛ̄ wāna̍ chi̍e̍e̍yɛ̍ī nyɛ̄i̍ ī hɛ̄nāŋ māā lā tōsa̍ wo̍ le̍.

¹⁷Kāni̍ fu̍u̍le̍, na̍a̍ ŋ̄wāŋndā chīe̍e̍ nyɛ̄ wāna̍ chi̍e̍e̍yɛ̍ī nɛ̄i̍ ī hɛ̄nāŋ māā ŋ̄ tōsa̍ ndu̍ wo̍ ō nīŋa᷅ŋ a̍ nyɛ̄ Nyi̍na̍ Mɛ̄lɛ̄ka̍a̍ ndu̍ hɛ̍nāŋ māā ŋ̄ tōsa̍ wo̍ le̍. Ndu̍yɛ̍ nyɛ̄ Nyi̍na̍ Mɛ̄lɛ̄ka̍a̍ hɛ̄nāŋ māā ŋ̄ tōsa̍ ndu̍ wo̍ ō nīŋa᷅ŋ a̍ nyɛ̄ wāna̍ chi̍e̍e̍yɛ̍ī nɛ̄i̍ ī hɛ̄nāŋ māā ŋ̄ tōsa̍ wo̍ le̍. Sɔ̄ɔ̍ŋ sa̍lā tīɔ̍ɔ̍ŋ mu᷅ŋ ŋ̄ nīŋa᷅ŋ pe̍sīŋ te̍. Le̍ sa̍bōo̍ ho̍ō lā nɔ̍lā mī lā tōsa̍ nyɛ̄ nya̍ hɛ̄na̍ŋ ndo̍ le̍.

¹⁸Kɛ̍ ndu̍yɛ̍ tē Nyi̍na̍ Mɛ̄lɛ̄ka̍a̍ wa̍ nya̍ kɔ̄ɔ̄lī pɛ̍ mbō chɔ̄m nya̍ nyɛ̄ o̍ nyɛ̄ nya̍ nɔ̄ le̍ tōsāa̍ pɛ̍, mɛ̄ɛ̍ lā cho̍ lɛ̍ sāwāla̍ŋ o̍ bā bɛ̄ŋgu̍ mī lā dɔ̄ū lɛ̄ tīīnda᷄ŋ o̍ la̍ŋ chūa̍a̍ ni᷄ŋ le̍ mī lā sīmnu᷄ŋ wa̍nāā sa̍kpō Mɛ̄lɛ̄ka̍ o̍ hɔ̄l te̍.

¹⁹Nyɛ̄m wāna̍ chi̍e̍e̍yɛ̍ī nɛ̄i̍ ī yēēmā na̍a̍ mī ŋ̄ tōsa̍ wo̍ŋ, ŋ̄ chō kpe̍nde̍ke̍le̍. Mu̍ŋ cho̍ mu᷅ŋ ni̍, sūūndāa̍ nya̍ wāna̍ nya̍ cho̍ o̍ nɔ̄ ni̍ŋ te̍ wo̍, a̍ nīīlū sūūndɛ̍i̍ wɔ̍ɔ̍ŋndo̍, a̍ nīīlūlā nɔ̄ɔ̄lɛ̍i̍la̍ŋ,

²⁰a̍ nyɛ̄m chēle̍ŋndo̍ŋ sōōlūūwo̍ yɔ̍ŋi̍ nda̍ sōōlu̍u̍ Mɛ̍lɛ̄ka̍, a̍ pīōndɔ᷄ŋnda̍ŋ, a̍ nɛ̄īyɔ᷄ŋnda̍ŋ nɔ̄na᷅ŋndo̍ o̍ lākɔ̄l, a̍ nīīlū lātānda̍a̍, a̍ pāŋa̍li̍āŋnda̍ŋ o̍ nyɔ̄ɔ̍ŋ chōo̍, a̍ kɔ̄l tūū bɛ̄ndōo̍, a̍ yēēmɛ̍i̍ le̍ wānā o̍ wānā hi̍o̍u̍wɔ̄ɔ̍, a̍ yɛ̍ yi̍ɔ̍ɔ̍ chɔ̄ma᷅ŋndo̍,

²¹a̍ hɔ̄lte̍ŋ lūɛ̄īyɔ̄ɔ̍ o̍ nyɛ̄ pi̍la̍a̍, a̍ mūɛ̄īya̍ŋ kōlɔ̄ɔ̄ mī mā bīī nda̍, a̍ sɔ̄ɔ̍ŋ lāsi̍ɔ̍mbo̍ŋ tōsāa̍, a̍ sɔ̄ɔ̍ŋ wa̍ā le̍nde̍ ŋ̍ che᷅le̍ŋ. I̍ chɔ̍ɔ̍lū wɔ̍ nya̍ sīlā māā pāāndū, wānā o̍ wāna̍ to̍sā sɔ̍ɔ̍ŋ wa̍ā nu̍a̍ā, ā cho̍ nda̍ hūnɔ̄ɔ̄ chɛ̄lɔ̄ɔ̄ le̍ lūɛ̄īyɔ̄ɔ̍ o̍ fo̍ndāŋ Mɛ̄lɛ̄ka̍ chō hūnɔ̄ɔ̄ wā māwāā wāŋnda̍ chōo̍ wo̍ le̍.

²²Kɛ̍ nyi̍na̍ Mɛ̄lɛ̄ka̍a̍ ndu̍ ndu̍, nyɛ̄m o̍ to̍sā mī wāŋnda̍ ā tōsa̍ wo̍ŋ mu̍ŋ cho̍ mu᷅ŋ ni̍, kāāli̍āŋndo̍, a̍ kɔ̄l kɛ̄ndɛ̄ kpe̍e̍kpe̍i̍yo̍ nɔ̄ɔ̍, a̍ wāa̍ nāa̍ pi᷅lɛ̍ sɛ̄ɛ̄ŋgi̍āŋ ve᷅ le̍, a̍ bīūwa᷅ŋndo̍ vēllāa̍ vēllē, a̍ māāli̍āŋndo̍, a̍ wāa̍ wānā kɛ̍ndɛ̄ o̍ chāa̍ŋ nūm ndo̍, a̍ wāa̍ wāna̍ wānā nɔ̍lā mā ti̍i̍nda̍ŋ,

²³a̍ wāa̍ wānā tu̍sīa̍ŋ, a̍ kɔ̄l nūmndo̍ bāa̍ tīūwo̍. Sāwā o̍ sāwā ku̍u̍nā wa̍nā mu᷅ŋ ndo̍ō tōsāa̍ le̍.

²⁴Le̍la̍ŋ, wānāa̍ Chi̍i̍sū Ki̍li̍tīa̍a̍ nda̍ nda̍, ā ma᷄l ni᷅ŋ kpāāya̍ nda̍ pi̍la̍a̍ tīīnda᷄ŋndo̍ le̍ sīmnɔ᷄ŋndo̍ wānāā sa̍kpō Mɛ̄lɛ̄ka̍ o̍ hɔ̄l. Ō wa̍ māā yɔ̄ŋɔ̄ɔ̄ pɛ̍, mɛ̄ɛ̍ nda̍ nda̍ dīī ni᷅ŋ mādīyāā wāna̍ chi̍e̍e̍yɛ̍ī ndɛ̄i̍ he̍ī kɔ̍sɔ̄ kɔ̍sɔ̄ ma̍ chīī a̍ ndi̍.

²⁵Le̍la̍ŋ, mɛ̄ɛ̍ Nyi̍na̍ Mɛ̄lɛ̄ka̍a̍ ke̍ na̍a̍ yōōmū kpe̍e̍kpe̍i̍yo̍ yɛ̍, ŋ̄ kēnu᷅ŋ ni̍ko̍ ndu̍ fo̍ndāa̍ mī ndu̍ wa̍ na̍a̍ chɔ̄mndo̍ nyɛ̄ o̍ nyɛ̄ na̍a̍ ŋ̄ nɔ̄ le̍ tōsāa̍.

²⁶Ŋ̄ tɛ̍ɛ̍mbūū wānā kɔ̍l te̍. Ndu̍yɛ̍ ŋ̄ pa̍ŋālā wānā le̍ nyɛ̄ ndɔ̄ le̍.