Read Southern Kisi Kāle̍e̍sīāŋnda̍ 6 Bible Online

Kāle̍e̍sīāŋnda̍ 6 - Southern Kisi bible

Kāle̍e̍sīāŋnda̍ 6

¹Chāa̍ŋāā nīāā wa̍nāā lāāla᷄ŋnda̍, tē ō wa̍ pɛ̍ mī lā sāālu̍ŋ māā chāa̍ŋ nyā to̍sa̍ yɔ̄ŋ wɔ̄ɔ̍ŋndo̍, mɛ̄ɛ̍ wānāa̍ cho̍ nya̍ tɛ̄ɛ̄ŋ mi̍ Nyi̍na̍ Mɛ̄lɛ̄ka̍a̍ wā nda̍ kɔ̄ɔ̄lī wa̍, ā kɔ̍ mā kɔ̍ ma̍lā ndu̍ a̍ sīlāa̍ mbō sōli̍ lābā lēni᷄ŋ. Kɛ̍ ndu̍yɛ̍ tē lā wa̍ ndu̍ mālāa̍ ho̍ō pɛ̍, lā chāa̍ su̍ɛ̍i̍ nāa̍ ndu̍ chu̍a̍, ndu̍yɛ̍ mī lā mānda̍ŋ, yɔ̍ŋi̍ nya̍ lo̍ o̍ ndu̍ sīlāa̍ nya̍ pi̍la̍ bɛ̍ɛ̍ mī lā tōsa̍ yɔ̄ŋ wɔ̄ɔ̍ŋndo̍.

²Ndu̍yɛ̍ tē dɛ̍nɔ̍ɔ̍ wa̍ chāa̍ŋ nya̍ pālāa̍ pɛ̍, lā sɔ̄ɔ̄ŋgu̍u̍ lā māla̍ ndu̍. Tē lā tōsa̍ he̍ī pɛ̍, nyɛ̄ o̍ nyɛ̄ Ki̍li̍tī di̍mu̍l nya̍ le̍ tōsāa̍, mɛ̄ɛ̍ lā tīu̍ bā fɔ̍.

³Kāni̍ fo̍ndōle̍, wānā o̍ wāna̍ chu̍a̍nu̍ŋ pɛ̍ māā ō bɛ̄nda̍ mbo̍ hīāū chāāŋnda̍, kɛ̍ ndu̍yɛ̍ ō cho̍ yɛ̍ ō bɛ̄ndāā le̍, mɛ̄ɛ̍ ndu̍ pi̍la̍ ko̍ni̍ cho̍ hūīnɔ᷄ŋndo̍ ni̍.

⁴Le̍la̍ŋ, wānā o̍ wānā mɛ̍ɛ̍nda̍ŋ nu᷅m pi̍la̍, mā kēlū yāmɛ̍i̍. Tē wa̍li̍ ŋ̄ tōsa̍ wo̍ na᷄ŋ pɛ̍, a̍ to̍sa̍ kɔ̄l kɛ̄ndɔ̄ɔ̍ le̍ wa̍li̍ kɛ̍ndɛ̄ nūm pi̍la̍ to̍sa̍ wo̍. Kɛ̍ ō ve᷅ ma̍wa̍ā mā yi̍ya̍ŋ māā, “I̍ hi̍o̍ū fi̍nyɛ̄,” mbō wa̍ kɔ̄l kɛ̄ndɛ̄ wāā le̍nde̍ le̍.

⁵Kāni̍ fo̍ndōle̍, wānā o̍ wānā nyɛ̄ ŋ̄ tōsā wo̍ nūm pi̍la̍ mu̍lī nyu̍nāa̍ o̍ Mɛ̄lɛ̄ka̍ lo̍ a̍ ndu̍ o̍kɔ̄ɔ̄ ni̍.

⁶Wāna̍ nda̍ chō sūɛ̍i̍ Mɛ̄lɛ̄kɛ̍i̍ pɛ̄ɛ̄kōo̍ wo̍, ō māla̍ wa᷅na̍ cho̍ ndu̍ pɛ̄ɛ̄kōo̍ wo̍ a̍ nyɛ̄m o̍ nɔ̍ wo̍ŋ ŋ̄ ti᷄ŋ.

⁷Wānā o̍ wānā hu̍ī nūm pi̍la̍ mā ma̍m Mɛ̄lɛ̄ka̍ le̍. Mɛ̄lɛ̄ka̍ cho̍ wa᷅na̍ wānā pi̍su̍l te̍. Yɛ̄īyi̍i̍ wānā sa᷅ŋ o̍ chīɛ̄ī nūmnde̍ ni᷄ŋ nde̍, ndi̍ ko̍ni̍ ŋ̄ kūāū ni̍.

⁸Tē ō wa̍ pɛ̍ mī wāŋndo̍ ndu̍ di̍mi̍ māā nyɛ̄ wāna̍ chi̍e̍e̍yɛ̍i̍ ndūɛ̍i̍ ī dīmūl ndu̍ le̍ tōsāa̍ wo̍ māā nyɛ̄ kōŋ o̍ to̍sā ni̍, mɛ̄ɛ̍ tɔ̄nɔ̍ o̍ cho̍ hūnɔ̄ɔ̄ sɔ̄lā lēni᷄ŋ ndo̍, ndu̍ cho̍ pīɔ̍mndo̍ ni̍. Kɛ̍ ndu̍yɛ̍ tē ō wa̍ pɛ̍ māā sɔ̄ɔ̍ŋ Nyi̍na̍ Mɛ̄lɛ̄ka̍a̍ dīmūl nu̍m le̍ tōsāa̍ wo̍ŋ māā mu̍ŋ ŋ̄ tōsā ni̍, mɛ̄ɛ̍ yōōmū kpe̍e̍kpe̍i̍ nɔ̍ la̍mɛ̍ɛ̍lu̍ le̍ wo̍ ndu̍ Nyi̍na̍ Mɛ̄lɛ̄ka̍a̍ ō kē nu̍m ni̍.

⁹Le̍ sa̍bōo̍ ho̍ō, ŋ̄ sa̍ŋgā a̍ wāŋnda̍ tōnya̍a̍ tōsāllo̍ le̍. Kāni̍ fo̍ndōle̍ tē ŋ̄ sāŋga̍ mī ŋ̄ ma᷄l te̍, pāa̍le̍ wa᷅ ni̍ŋ mī ŋ̄ sɔ̄la̍ tɔ̄nɔ̄ɔ̍ lēni᷄ŋ.

¹⁰Le̍ he̍ī, bōōndi̍i̍ na̍a̍ ŋ̄ nɔ̄ he̍ī fo̍ndāa̍ ve̍, ŋ̄ tōsa᷅ŋ tōnya̍a̍ nāa̍ wāŋnda̍ chūā, tāāma̍ chāāŋāā nāā wa̍nāā lāāla᷄ŋnda̍.

¹¹Pōōnyīa̍a̍ o̍ ni̍ ya̍ pi̍la̍a̍ cho̍ ni᷅ŋ ho̍ō ni̍. Lā chē fa̍ū mɛ̄ɛ̍ o̍ cho̍ do̍kōlō dōkōlō yɛ̍.

¹²Wānāa̍ cho̍ ha̍ā dīmīo̍o̍ māā mɛ̄ɛ̍ mā hīvi̍ nya̍ wa̍, nda̍ nda̍, yōŋgāa̍ hɛ̍na̍ŋ nda̍ kīōlɔ̄ɔ̍ ni̍ le̍ mī wāŋnda̍ sīna̍ māā wa̍li̍ wa̍ā nu̍a̍ā kpɛ̍ nda̍ tōsa̍ ni̍. Le̍ sa̍bū nda̍ dīmi̍ māā ā hīvi̍ nya̍ wo̍ cho̍ ni̍ māā ā hɛ̄na̍ŋ mī wāŋnda̍ tūsi̍ nda̍ nyɛ̄ pālāa̍ chōo̍ le̍. Kāni̍ fo̍ndōle̍ tē ā dīmu̍l wāŋnda̍ yōōŋgū kɛ̄ndɔ̄ɔ̍ pɛ̍ māā pīɔ̍m Chi̍i̍sū Ki̍li̍tī sɔ̍la̍ wo̍ ndu̍ ko̍ni̍ na̍a̍ ŋ̄ tīīndāŋ ni̍, wāŋnda̍ tūsi̍ nda̍ nyɛ̄ pālāa̍ chōo̍.

¹³Kɛ̍ wānāā kālāa̍ cho̍ ā hīvīāā wa̍ bɛ̍ɛ̍ ā cho̍ sa̍wāla̍ Mɛ̄lɛ̄ka̍la̍ŋ chīī chūā le̍. Ō cho̍ le̍ nyɛ̄ chēle̍ŋ te̍ nda̍ chō nya̍ kɔ̄ɔ̄lī le̍ nya̍ hīvīo̍o̍ le̍. Le̍ yōŋgāa̍ kīōlɔ̄ɔ̍ māā wānāa̍ cho̍ a̍ Chu̍ū le̍ wa̍ bɛ̍ɛ̍ ā chō ni᷅ŋ ka̍ā māChu̍ūwo̍ chūa̍a̍.

¹⁴Kɛ̍, ya̍ Pɔ̍ɔ̄ ya̍ ya̍, yōŋga̍ nūu̍ kīōlɔ̄ɔ̍ mɛ̄ɛ̍ a̍ pīɔ̍m Māsānɔ̍ɔ̍ Chi̍i̍sū Ki̍li̍tī sɔ̍la̍ o̍ yɔ̄m sīŋgāfīlāa̍ chōo̍ wo̍ o̍kɔ̄ɔ̄. Kāni̍ fo̍ndōle̍, pīɔ̍m o̍ sɔ̍la̍ wo̍ ndu̍ to̍sa̍ ni̍ I̍ nɔ̍ lɛ̍ kpe̍ku̍ o̍ kpe̍ku̍ a̍ chi̍e̍ēŋndo̍ ho̍ō le̍, ko̍ŋ cho̍ ni̍, wānā pi̍la̍ kīndīo̍o̍ le̍ sīmnɔ᷄ŋndo̍ wānā sa̍kpō Mɛ̄lɛ̄ka̍ o̍ hɔ̄l. Bā nī cho̍ lɛ̍ o̍ sɔ̄ɔ̍ŋ wa̍ā le̍nde̍ ni̍ŋ te̍. Ya̍ I̍ ma̍l ni᷅ŋ kīndī kōŋ a̍ bā nī le̍ wāa̍ wānā sa̍kpō Mɛ̄lɛ̄ka̍ o̍ hɔ̄l.

¹⁵Le̍la̍ŋ, wānā wa̍ o̍ hi̍vīāā, wa᷅ ō hīvīāā le̍, ko̍ŋ cho̍ nyɛ᷅ o̍ nyɛ̄ le̍. Sūɛ̍i̍ cho̍ sūɛ̍i̍ le̍bo᷅lle̍ ve̍ ndi̍ cho̍ ni̍ māā Mɛ̄lɛ̄ka̍ mīŋgi̍ na̍a̍ tōōsīāā ā sɛ̄nɛ̄ī.

¹⁶Nya̍ wānā o̍ wāna̍ cho̍ kɔ̄la̍ŋ o̍ nɛ̄i̍ ya̍ I̍ cho̍ ho̍ō nya̍ dīmūllo̍ a̍ ndu̍ o̍kɔ̄ɔ̄ wo̍ chōo̍, a̍ chūāūwāa̍ Mɛ̄lɛ̄ka̍a̍ ā tūa̍a̍, mbɔ̄ Mɛ̄lɛ̄ka̍ ke̍ nya̍ kɔ̄l nyu̍lōo̍, ndu̍yɛ̍ mbō tūīīnu̍ŋ nya̍ īnyīɛ̍ɛ̍ fɔ̍.

¹⁷Dīōm ya̍ cho̍ nya̍ mɛ̄ɛ̄lū dīmūl lo̍ cho̍ ni̍ māā wānā o̍ wānā chu̍ū lɛ̄ ya̍ nyɛ̄ pālāā chēle̍ŋ te̍. Kāni̍ fo̍ndōle̍, tīndīla̍ŋ nda᷅ŋ ya̍ lēkɔ̄ɔ̍ lā chɔ᷄m māā Chi̍i̍sū Ki̍li̍tī chɛ̄ ndɔ̄ɔ̍ ya̍ I̍ cho̍ ni̍.

¹⁸Le̍la̍ŋ chāāŋāā nīāā wa̍nāā lāāla᷄ŋnda̍, mbɔ̄ Ma̍sānɔ̍ nāa̍ Chi̍i̍sū Ki̍li̍tī ō yīya̍ŋ nya̍ chōo̍ fɔ̍. I̍ yɔ̄nu̍ŋ le̍nde̍ fɔ̍.