Read Southern Kisi Ɛ̄fi̍sīāŋnda̍ 5 Bible Online

Ɛ̄fi̍sīāŋnda̍ 5 - Southern Kisi bible

Ɛ̄fi̍sīāŋnda̍ 5

¹Mɛ̄ɛ̍ nya̍ chō ni᷅ŋ chūāūwāā Mɛ̄lɛ̄ka̍a̍, ndu̍yɛ̍ mbo̍ kāālā nya̍ ta̍u̍ yɛ̍, mɛ̄ɛ̍ lā kīndi̍ ni̍ko̍ mī lā chu̍a̍ ka̍ālā ndɔ̄la̍ŋ.

²Lā chɔ᷄m wa᷅ŋnda̍ kāālāa̍ o̍ nyɛ̄ o̍ nyɛ̄ ni᷄ŋ nya̍ tōsa̍, mɛ̄ɛ̍ Ki̍li̍tī ka̍a̍la̍ na̍a̍ mbo̍ chɛ̄l mbo̍ wū le̍ na̍a̍ yɛ̍. Mbo̍ yɔ̄ŋgū ndu̍ pi̍la̍ o̍ Mɛ̄lɛ̄ka̍ lo̍ māā sa̍lā chūŋ kɛ̄ndɛ̄. Mbo̍ yɔ̄ŋgū ndu̍ pi̍la̍ o̍ Mɛ̄lɛ̄ka̍ lo̍ māā sa̍lāa̍ o̍ hi̍nī Mɛ̍lɛ̄ka̍ kɔ̄l lo̍.

³Ha̍a̍a̍ mi̍ lā wā wānāa̍ Mɛ̄lɛ̄ka̍a̍, tɔ̍ɔ̍ ka̍lāa̍ bɛ̍ɛ̍ ō wa᷅ nya̍ chōo̍ a̍ sɔ̄ɔ̍ŋ wɔ̍ɔ̍ŋndo̍ŋ mu᷅ŋ o̍kɔ̄ɔ̄ kpo̍so̍ŋ te̍. Mu̍ŋ cho̍ ni̍, sūūndāa̍ a̍ wāna̍ nya̍ cho̍ o̍ nɔ̄ ni̍ŋ nya̍ ndu̍ le̍ wo̍, a̍ nīīlū o̍ nīīlū sūūndɛ̍i̍ wɔ̍ɔ̍ŋ, a̍ hɔ̄lte̍ŋ lūɛ̄īyɔ̄ɔ̍ o̍ nyɔ̄ɔ̍ŋ.

⁴Ndu̍yɛ̍, dīōm o̍ dīōm nɔ̄ɔ̄lɛ̍i̍ fu̍la̍ nya̍ o̍ sōndō le̍. Lā wa᷅ wānāa̍ so̍ō sɔ̄ɔ̍ŋ ŋ̄dīɔ̄m te̍. Lā wo̍ū sōndō o̍ ba̍ltā nɔ̄ɔ̄lɛ̍i̍ ni̍ŋ te̍. Mu᷅ŋ ki̍nɛ̍i̍ ŋ̄ cho̍ sɔ̍ɔ̍ŋ bɛ̍nda̍ a̍ nya̍ le̍. Nyɛ̄ nya̍ nɔ̄ le̍ tōsāa̍ wo̍ ndu̍ cho̍ Mɛ̄lɛ̄ka̍ ba̍li̍ka̍a̍ mēllo̍ ni̍.

⁵Kāni̍ fo̍ndōle̍, lā kɛ̄si̍ŋ o̍ kɔ̄l māā wānāa̍ su̍u̍ndā a̍ wānāā nda̍ cho̍ o̍ nɔ̄ ni̍ŋ nda̍ nda̍ā le̍ wa̍, a̍ wānā o̍ wāna̍ cho̍ o̍ nīīlū o̍ nīīlū sūūndɛ̍i̍ wɔ̍ɔ̍ŋndo̍ ni᷄ŋ, nda̍ ki̍nɛ̍i̍ ā ve᷅ ni̍ŋ wa̍nāā Ki̍li̍tī nda̍ Mɛ̄lɛ̄ka̍ ā wā ni̍ŋ cho̍o̍ la̍ma̍sā wa̍ tɛ̄ɛ̄ŋ te̍. Wānāa̍ lu̍ɛ̍ī hɔ᷅lte̍ŋ o̍ nyɔ̄ɔ̍ŋ nda̍ bɛ̍ɛ̍, ā ve᷅ ni̍ŋ nda̍ tɛ̄ɛ̄ŋ te̍, kāni̍ fo̍ndōle̍, wāna̍ lu̍ɛ̍ī hɔ᷅lte̍ŋ o̍ nyɔ̄ɔ̍ŋ ndo̍, ndu̍ chu̍a̍ māchūāā nyɛ̄m mu᷅ŋ māā mɛ̄lɛ̄ka̍ ndɔ̄.

⁶Lā chɛ᷅l mī wānā o̍ wānā to̍sa̍ mī lā lāāla̍ŋ su̍ɛ̍i̍ lāchōōwɛ̄i̍ le̍. Kāni̍ fo̍ndōle̍, le̍ sɔ̄ɔ̍ŋ wa̍ā nu̍a̍ā Mɛ̄lɛ̄ka̍ dūāūnūŋ ni̍ŋ tu̍mbe̍ a̍ wānāa̍ tu̍i̍ī ndu̍ dīōm te̍ wa̍ ni̍.

⁷Le̍la̍ŋ lā mu̍ūli̍āŋ a̍ wānāā wāā le̍nde̍ le̍.

⁸Nya̍ bɛ̍ɛ̍ le̍nde̍ nya̍ wa̍ o̍ nyūmnda̍ŋ ni᷄ŋ ni̍. Kɛ̍ ndu̍yɛ̍, ha̍a̍a̍ mi̍ lā wā ni᷅ŋ o̍ dīōm pīlɔ̍ɔ̍ ni᷄ŋ a̍ Māsānɔ̄ɔ̍ Mɛ̄lɛ̄ka̍, lā chō ni᷅ŋ māchūāā o̍ nyɛ̄ wa̍wo̍ŋndo̍ ni᷄ŋ. Ka̍ālā nya̍ nɔ̄ ni᷅ŋ mī lā tōsa̍ la̍ŋ lā nɔ̄ mī lā wa̍ māā wānāā wāā o̍ nyɛ̄ wa̍wo̍ŋ ni̍ŋ.

⁹Kāni̍ fu̍u̍le̍, nyɛ̄ wa̍wo̍ŋndo̍ ho̍ō, ndu̍ to̍sā ni̍ mī wāŋnda̍ tōsa̍ īsɔ̄ɔ̍ o̍ īsɔ̄ɔ̍ cho̍ sūɛ̍i̍ kɛ̍ndɛ̄, a̍ īsɔ̄ɔ̍ o̍ īsɔ̄ɔ̍ cho̍ sūɛ̍i̍ tōnya̍.

¹⁰Le̍la̍ŋ, lā kīndi̍ mī lā sīna̍ nyɛ̍ nɛ̍ŋī Ma̍sānɔ̄ɔ̍ Mɛ̄lɛ̄ka̍ kɔ̄l lo̍.

¹¹Lā tu̍āl wānāa̍ to̍sā sɔ̍ɔ̍ŋ nɔ̍lā mī ŋ̄ māla̍ wānā o̍ wānā le̍ wo̍ŋ nda̍ kɔ̄ɔ̄lī le̍, mu̍ŋ yɔ̍nūŋ ni̍ māā sɔ̄ɔ̍ŋ mānyūmndo̍ŋ. Sɔ̄ɔ̍ŋ wa̍ā le̍ndo̍ŋ lā nɔ̄ mī lā sōli̍ mu̍ŋ o̍ lu᷅ŋ de᷅ŋ.

¹²Ī chō sūɛ̍i̍ lāsi̍ɔ̍mbu̍i̍ bɛ̍ndū le̍ mī wānā so̍ō bɛ̍ɛ̍ a̍ sɔ̄ɔ̍ŋ nɔ̍ɔ̍lɛ̍i̍ nda̍ tōsā mu̍ŋ o̍ vīōŋnɔ᷄ŋndo̍ ni᷄ŋ ndo̍ŋ o̍kɔ̄ɔ̄.

¹³Ndu̍yɛ̍, tē nyɛ̄ wa̍wo̍ŋndo̍ ō dēndū pɛ̍, o̍ nyɛ̄ o̍ nyɛ̄ chōo̍, ō chɔ̄ɔ̄mu̍u̍ nyɛ̄ kōŋ mɛ̄ɛ̍ o̍ cho̍ kpe̍e̍kpe̍i̍ yɛ̍.

¹⁴Kāni̍ fo̍ndōle̍, nyɛ̄ o̍ nyɛ̄ tē nyɛ̄ wa̍wo̍ŋndo̍ dēndū lēchōo̍ mbō chɔ̄ɔ̄mu̍u̍ ndu̍ mɛ̄ɛ̍ o̍ cho̍ kpe̍e̍kpe̍i̍ yɛ̍ pɛ̍, ō sīmnu᷄ŋ nyɛ᷅ wa̍wo̍ŋ. Le̍ sa̍bū kōŋ wānāā pūm ā dīmi̍ ni̍ āā, “Nya̍ wānāa̍ cho̍ o̍ lūa̍a̍ŋ nda̍ lā tīōndu̍ ni̍ko̍, lā mīīŋgu̍ yo̍o̍mū, mī Ki̍li̍tī tōsa̍ mī nyɛ̄ wa̍wo̍ŋndo̍ dēndū nya̍ chōo̍.”

¹⁵Le̍la̍ŋ, lā mānda̍ŋ nyɛ̍ kɛ̄ndɛ̄ kɛ̄ndɛ̍ī a̍ ka̍ālā nya̍ chō tōsāa̍ la̍ŋ o̍kɔ̄ɔ̄. Lā nɔ᷅ ka̍āla̍ŋ māā wānāa̍ ki̍ndu̍ kɔ̍l te̍ le̍. Lā nɔ̍ ka̍āla̍ŋ māā wānāā kɔ̄l kālu̍.

¹⁶Pɛ̄ŋgu̍ o̍ pɛ̄ŋgu̍ tē lā sɔ̄la̍ fo̍ndāŋndo̍ le̍ sūɛ̍i̍ kɛ̍ndɛ̄i̍ tōsāa̍ pɛ̍, lā tōsa̍, kāni̍ fo̍ndōle̍, pālɛ̍i̍ na̍a̍ ŋ̄ chō ni᷅ŋ he̍ī lēni᷄ŋ nde̍, ī chō pālɛ̍i̍ wɔ̍ɔ̍ŋ.

¹⁷Le̍la̍ŋ, lā to̍sā sɔ̄ɔ̍ŋ māā lādīɔ̄m te̍. Lā kīndi̍ mī lā sīna̍ nyɛ̄ Māsānɔ̄ɔ̍ Mɛ̄lɛ̄ka̍ hɛ̍na̍ŋ nya̍ mī lā tōsa̍ wo̍.

¹⁸Lā wa᷅ wānāā kōlāā māmūɛ̄ī mī mā bīī nya̍ le̍. Mūɛ̄īya̍ŋ kōlɔ̄ɔ̄ kōŋ mī mā bīī nya̍, ō nɔ̄lā mbō tɛ̄ɛ̄mbu̍u̍ nya̍. Nyɛ̄ nya̍ nɔ̄ mī lā nɔ̄ wo̍, ndu̍ cho̍ Nyi̍na̍ Mɛ̄lɛ̄ka̍a̍ wāa̍ nya̍ kɔ̄ɔ̄lī ta̍u̍ ni̍.

¹⁹Tē lā wa̍ sūūki̍āŋndo̍ vēllāa̍ vēllē pɛ̍, lā sūūki̍āŋ a̍ dīōmndā kɛ̄ndɛ̄la̍ŋ dīmu̍la᷅ŋndo̍, dīōmnda̍ŋ o̍ Yāu̍la̍ ŋ̄chōndu̍la̍ cho̍ o̍ Yāu̍ Mɛ̄lɛ̄ka̍a̍ ni᷄ŋ nda̍ŋ, a̍ chōndo̍ŋ ŋ̄ pīlɔ᷅ŋ. Lā sōli̍ cho̍ndo̍ŋ ŋ̄ pīlɔ᷅ŋ a̍ chōndu̍ŋ cho̍ o̍ Yāu̍la̍ ŋ̄chōndu̍la̍ cho̍ o̍ Yāu̍ Mɛ̄lɛ̄ka̍a̍ ni᷄ŋ ndo̍ŋ. Lā sōli̍ mu̍ŋ a̍ kɔ̄l kɛ̄ndɛ̄ mī lā sāŋga̍la̍ Māsānɔ̄ɔ̍ Mɛ̄lɛ̄ka̍ lēni᷄ŋ kpe̍e̍kpe̍i̍.

²⁰Le̍ lēpāa̍ o̍ lēpāa̍ lā wa̍ Mɛ̍lɛ̄ka̍ fi̍nyā nāa̍ ba̍li̍ka̍a̍ mēllo̍ le̍ nyɛ̄ o̍ nyɛ̍ yɔ̍nu̍ŋ. Lā tōsa̍ he̍ī sa̍na̍a̍ o̍ Māsānɔ̍ nāa̍ Chi̍i̍sū Ki̍li̍tī sa̍bu̍ ndɔ̄ɔ̍ ni᷄ŋ.

²¹Dīōmndā tūɛ̄īya᷅ŋnda̍ŋ lā wa̍ nya̍ tɛ̄ɛ̄ŋ vēllāa̍ vēllē. Lā tōsa̍ le̍nde̍ le̍ bɛ̄ɛ̄le̍ Ki̍li̍tī le̍ŋ.

²²Nya̍ lāāndūa̍a̍ lā tūe̍i̍ pi̍a̍a̍ndūāā nyāa̍ dīōm mɛ̄ɛ̍ nya̍ tūɛ̄ī Ma̍sānɔ̄ɔ̍ Mɛ̄lɛ̄ka̍ dīōm yɛ̍.

²³Ki̍li̍tī ndu̍ cho̍ dīāllūŋ ndɔ᷄ŋ bōlle̍ŋ ni̍, ko̍ŋ cho̍ ni̍, ku̍ndā wānāā lāāla᷄ŋnda̍, ā o̍ pi̍ŋi̍ wa̍. Mɛ̄ɛ̍ le̍nde̍ ko̍ni̍ i̍ cho̍ ni̍, pɔ̍nɔ̍ɔ̍ cho̍ la̍nɔ̍ɔ̍ bōlle̍ŋ ni̍.

²⁴Le̍la̍ŋ, nya̍ lāāndūa̍a̍, lā tūe̍i̍ pi̍a̍a̍ndūāā nyāa̍ dīōm o̍ īsɔ̄ɔ̍ o̍ īsɔ̄ɔ̍ ni̍ŋ, mɛ̄ɛ̍ ku̍ndā wānāā lāāla᷄ŋnda̍ tūēī Ki̍li̍tī dīōm yɛ̍.

²⁵Nya̍ pīāāndūa̍a̍ yɛ̄, lā kāāla̍ la̍a̍ndāā nyāa̍ mɛ̄ɛ̍ Ki̍li̍tī ka̍a̍la̍ ku̍ndā wānāā lāāla᷄ŋnda̍, ndu̍yɛ̍ mbo̍ chɛ̄l mbo̍ wū le̍ nda̍ yɛ̍.

²⁶Sa̍bū o̍ to̍sa̍ he̍ī yo̍ cho̍ ni̍ māā le̍ mbō tōsa̍ mī ku̍ndā wānāā lāāla᷄ŋnda̍ ō wa̍ ō yɔ̄ŋga᷄ŋ o̍ Mɛ̄lɛ̄ka̍ lo̍. Ō tōsa̍ he̍ī sa̍na̍a̍ a̍ yīŋɔ̄ɔ̄ o̍ yi᷅ŋ nda̍ mbo̍ dīndī nda̍ fo̍ a̍ mɛ̄ŋnda̍ŋ ndo̍, vɛ̄lɛ̄ a̍ dīo̍m Mɛ̄lɛ̄ka̍ o̍ di̍mu̍l nda̍ wo̍.

²⁷Ki̍li̍tī to̍sa̍ vɛ̄lɛ̄ mātōsāā he̍ī le̍ mī ndu̍ pi̍la̍ chu̍a̍ ku̍ndā wānāā lāāla᷄ŋnda̍ mbō yɔ̄ŋgu̍ ndu̍ nāa̍ ndu̍ pi̍la̍ chu̍a̍ ō kɛ̄ndɛ̄ kɛ̍ndɛ̄ wu̍le̍ŋ, ō nɔ᷅ sɔ᷅ŋ te̍, ō ve᷅ o̍ nyi̍fi̍li̍ɛ̍i̍ le̍, nyɛ̄ o̍ nyɛ̄ wāā le̍nde̍ ō nɔ᷅ le̍. Ō wā ma̍wa̍ā ō yɔ̄ŋga᷄ŋ o̍ Mɛ̄lɛ̄ka̍ lo̍, īsɔ̄ɔ̍ o̍ īsɔ̄ɔ̍ wɔ̍ɔ̍ŋ ve᷅ a̍ ndu̍ o̍kɔ̄ɔ̄ le̍.

²⁸Le̍nde̍ ko̍ni̍, wāŋ pīāāndūa̍a̍ nɔ̄ mā kāāla̍ la̍a̍ndāā ndāa̍, mɛ̄ɛ̍ nda̍ kāāla̍ dīāllūŋ ndāa̍ŋ nda̍ pi̍la̍ŋ yɛ̍. Wānā o̍ wāna̍ ka̍a̍la̍ la̍a̍ ndɔ̍ pɛ̍, mɛ̄ɛ̍ ndu̍ pi̍la̍ o̍ ka̍a̍la̍ ko̍ŋ ni̍.

²⁹Kāni̍ fo̍ndōle̍, wānā o̍ wānā cho̍ mbō tu᷄l dīāllūŋ ndɔ᷄ŋ ndu̍ pi̍la̍ŋ lēyɛ̄ le̍. O̍ ko̍ŋ kɔ̍ɔ̍lī, nyɛ̄ o̍ to̍sāl di̍a̍llūŋ ndɔ᷄ŋ ndo̍ ndu̍ cho̍ ni̍, nyɛ̄ dīa̍a̍ mu̍ŋ kīo̍o̍, a̍ māndāa̍ mu̍ŋ nyɛ̄ kɛ̄ndɛ̄ kɛ̍ndɛ̍ī, mɛ̄ɛ̍ Ki̍li̍tī ma̍ndā ku̍ndā wānāā lāāla᷄ŋnda̍ yɛ̍.

³⁰Kāni̍ fo̍ndōle̍, tē ō wa̍ māā yɔ̄ŋɔ̄ɔ̄ pɛ̍, ŋ̄ chō māchūāā māā pɛ᷄lta̍ yɛ̍ yɛ̍la̍ŋ o̍ dīāllu᷄ŋ Ki̍li̍tīo̍ŋ ni᷄ŋ.

³¹Kāni̍ fo̍ndōle̍, dīōmndo̍ chō ō pōōnyīāā o̍ Yāu̍ Mɛ̄lɛ̄ka̍a̍ ni᷄ŋ āā, “Le̍ sa̍bōo̍ ho̍ō wānā pɔ̍nɔ̍ɔ̍ mɛ̄ī fi̍nyāa̍ a̍ kālāa̍ ni̍, mā chālnu̍ŋ nda̍ la̍a̍ ndɔ̄. O̍ ko̍ŋ, nda̍ ŋi̍ɔ̍ɔ̍ŋ mā sīmnu᷄ŋ māā wāŋndo̍ ō pīlɛ̍ kpe̍.”

³²Dīōmnda̍ so̍o̍nu᷄ŋ la᷅ŋ nda̍ŋ, sɔ̄ɔ̍ŋ kpe̍e̍kpe̍i̍yo̍ŋ ŋ̄ pūm chō lēni᷄ŋ mi̍ ŋ̄ wā ŋ̄ vīāŋna᷄ŋ. Dīōmndā lāŋ mɛ̄ɛ̍ ya̍ ya̍ I̍ si̍nā la̍ŋ pɛ̄ŋgu̍ yɛ̍ cho̍ ni̍, māā lā chō māchūāā sūɛ̍i̍ a̍ Ki̍li̍tī o̍kɔ̄ɔ̄ nda̍ ku̍ndā wānāā lāāla᷄ŋnda̍ mɛ̄ɛ̍ tɛ̍ɛ̄ŋ cho̍ nda̍ yɛ̍.

³³Kɛ̍ ndu̍yɛ̍, dīōmndā kālāla̍ŋ lā chō vɛ̄lɛ̄ le̍ nya̍. Wānā pɔ̍nɔ̍ o̍ wānā pɔ̍nɔ̍, ā nɔ̄ mā ka̍a̍la̍ la̍a̍ nu̍m mɛ̄ɛ̍ ŋ̄ kāāla̍ nūm pi̍la̍ yɛ̍. Ndu̍yɛ̍, wānā la̍nɔ̍ o̍ wānā la̍nɔ̍, ā nɔ̄ mā ke̍ pɔ̍nɔ̍ nu̍m bɛ̄ɛ̄le̍ŋ.