Read Southern Kisi Fīli̍pīāŋnda̍ 1 Bible Online

Fīli̍pīāŋnda̍ 1 - Southern Kisi bible

Fīli̍pīāŋnda̍ 1

¹Ya̍ Pɔ̍ɔ̍ cho̍ yāu̍wo̍ ho̍ō pōōnyīa̍a̍ ni̍, na̍a̍ Ti̍mo̍tī, na̍a̍ ŋ̍ cho̍ ha̍ā bu̍ɛ̍i̍yāa̍ Chi̍i̍sū Ki̍li̍tīa̍a̍ wa̍. Ŋ̄ chō ndu̍ pōōnyīa̍a̍ nāa̍ nya̍ wānāa̍ Mɛ̄lɛ̄ka̍a̍ kpo̍u̍ chu̍a̍ Fi̍li̍pāī chi̍e̍e̍, nya̍ cho̍ ha̍ā o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī wa̍, a̍ nya̍ wānāa̍ cho̍ ku̍ndālā wānāā lāāla᷄ŋnda̍ chīla̍ŋ nda̍, a̍ nya̍ wānāā mālāa̍ cho̍ nda̍ īkɛ̄i̍ ya̍.

²I̍ cho̍ pīɛ̄īle̍ŋ māā Mɛ̄lɛ̄ka̍ Fi̍nyā nāa̍ a̍ Māsānɔ̄ɔ̍ Chi̍i̍sū Ki̍li̍tī ā yīya̍ŋ nya̍ chōo̍ ndu̍yɛ̍, mā ke̍ nya̍ kɔ̄l nyūlōo̍ fɔ̍.

³Te̍le̍ŋ o̍ te̍le̍ŋ tē I̍ yi̍ya̍ŋ a̍ nya̍ pɛ̍, ba̍li̍ka̍a̍ ko̍ni̍ ya̍ I̍ me᷅l Mɛ̍lɛ̄ka̍ ni̍.

⁴Ndu̍yɛ̍ le̍ pɛ̄ŋgu̍ o̍ pɛ̄ŋgu̍ tē I̍ wa̍ Mɛ̄lɛ̄ka̍ pīɛ̄īyo̍ le̍ nya̍ kpo̍u̍ pɛ̍, a̍ kɔ̄l kɛ̄ndɛ̄ ya̍ pi̍ɛ̍ī ni̍.

⁵Kāni̍ fo̍ndōle̍, chɔ̍ŋ a̍ pāa̍le̍ tāse̍le̍ nya̍ lāāla̍ŋ a̍ Yōōŋgū Kɛ̄ndɛ̍ Mɛ̄lɛ̄ka̍a̍ le̍ŋ mbo̍ fūūla᷅ŋ a̍ pɛ̄ŋgo̍o̍ ho̍ō, lā māla̍ ya̍ ta̍u̍ o̍ wāŋnda̍ Yōōŋgū Kɛ̄ndɔ̄ɔ̍ ho̍ō dīmūllo̍ ni᷄ŋ.

⁶Ndu̍yɛ̍, I̍ si̍nā māā Mɛ̄lɛ̄ka̍ o̍ ka̍ndu̍ wa̍li̍ kɛ̍ndɔ̄ɔ̍ ho̍ō tōsāa̍ o̍ yōōmūlā nyāla̍ŋ ni᷄ŋ ndo̍ chō hīōūwɔ̄ɔ̄ lāchī a̍ ndu̍ tōsāa̍ ha̍a̍a̍ mbō sīo̍u̍ ndu̍ tōsā o̍ pāa̍le̍ Chi̍i̍sū Ki̍li̍tī cho̍ vɛ̄lɛ̄ hūnɔ̄ɔ̄ le̍ŋ chōo̍.

⁷Le̍ te̍le̍ŋ o̍ te̍le̍ŋ kɔ̄l nūu̍ chō o̍ nya̍ lo̍. Ndu̍yɛ̍, ō chō lētūu̍ mī kɔ̄l nūu̍ ō wa̍ o̍ nya̍ lo̍ le̍nde̍. Kāni̍ fu̍u̍le̍, bōōndi̍i̍ ya̍ cho̍ he̍ī o̍ bīyɔ̄ɔ̍ ni᷄ŋ nde̍ ni̍, a̍ bōōndi̍i̍ ya̍ wa̍nu̍ŋ bɛ̍ɛ̍ a̍ bā nī, mi̍ wa᷅ sūɛ̍i̍ le̍ Yōōŋgū Kɛ̄ndɛ̍ Mɛ̄lɛ̄ka̍a̍ ve̍, ndu̍yɛ̍ mi̍ wa᷅ tōsāa̍ le̍ mī yōōŋgōo̍ ho̍ō si᷄m ō kālā yi̍ wo̍, nya̍ kpo̍u̍ lā chō wa̍llo̍ ho̍ō tōsāa̍ a̍ ya̍ la̍tu̍lu̍. Ndu̍ yɔ̍nūŋ ni̍ māā wa̍li̍ Mɛ̄lɛ̄ka̍ tōsa̍l la̍ ho̍ō kɛ̄ndɛ̄i̍ mbo̍ kē ya̍ ndu̍ le̍ tōsāa̍ wo̍.

⁸Mɛ̄lɛ̄ka̍ sīnā māā dīōm ya̍ cho̍ ho̍ō dīmīo̍o̍ wo̍ chō tōnya̍ māā mɛ̄ɛ̍ Chi̍i̍sū Ki̍li̍tī ka̍a̍la̍ nya̍ yɛ̍ le̍nde̍ kpe̍ŋ kāālāa̍ chō o̍ kɔ̄l nūu̍ ni᷄ŋ di̍ le̍ nya̍ ni̍.

⁹I̍ cho̍ Mɛ̄lɛ̄ka̍ pīɛ̄īyo̍ māā kāāla̍ cho̍ o̍ kɔ̄ltā nyāla̍ŋ ni᷄ŋ ndo̍ mbō hīōū lāchī kɛ᷅ kɛ᷅. Mɛ̄ɛ̍ o̍ he̍ī ni᷄ŋ, mī lā chɔ̄ɔ̄lu̍ dɛ̍nɛ̍ si̍nāā kpe̍e̍kpe̍i̍yo̍ sɔ̄lā a̍ kɔ̄l kālu̍ kpe̍e̍kpe̍i̍yo̍.

¹⁰O̍ he̍ī ni᷄ŋ, lā nɔ̄lā mī lā hɛ̄li̍ sūɛ̍i̍ hi̍o̍ū bɛ̄ndā kpo̍u̍ le̍ tōsāa̍ ve̍, o̍ ko̍ŋ, lā chō wā ā dīāndāā wa̍la̍ŋ o̍ kɔ̄lta̍ŋ ni᷄ŋ, ndu̍yɛ̍, yɔ̄ŋ o̍ yɔ̄ŋ wɔ̄ɔ̍ŋ lā to̍sā mī tɛ̄ɛ̄ wa̍ nya̍ chōo̍ le̍ ndu̍ le̍, mbō lo̍ o̍ ko̍ŋ ha̍a̍a̍ mī pāa̍le̍ Ki̍li̍tī cho̍ hūnɔ̄ɔ̄ le̍ŋ lē fūūlu̍u̍.

¹¹Ndu̍yɛ̍, lā nɔ̄ ni̍ŋ ka̍ālā cho̍ lā kɛ̄ndɛ̄ sa̍kpō la̍ŋ. La̍ŋ la̍ yɔ̍nūŋ ni̍ māā ka̍ālā cho̍ la᷅ŋ mɛ̄ɛ̍ Chi̍i̍sū Ki̍li̍tī ndu̍ pi̍la̍ mbō tōsa̍ mī lā nɔ̍la̍ la̍ŋ tōsā la̍ŋ. Ndu̍yɛ̍, he̍ī tōsā mī wāŋnda̍ līsa̍ Mɛ̄lɛ̄ka̍, ndu̍yɛ̍, mā sāŋga̍la̍ ndu̍.

¹²Chāa̍ŋāā nīāā wa̍nāā lāāla᷄ŋnda̍, I̍ hɛ̍na̍ŋ mī lā sīna̍ pɛ̄ŋgu̍ māā nyɛ̍ yɔ̍nu̍ŋ ho̍ō a̍ ya̍ wo̍, ndu̍ kpe̍e̍kpe̍i̍ to̍sa̍ ni̍ mi̍ wānāā fāŋgā fa̍ŋgā a̍ tūɛ̄ī Yōōŋgū Kɛ̄ndɛ̍ Mɛ̄lɛ̄ka̍a̍.

¹³O̍ bīyɔ̄ɔ̄ nda̍ bīī ho̍ō ya̍ wo̍ ni᷄ŋ, so̍vɛ̄i̍ya̍ a̍ cho̍ chīɛ̄ī māsā bɛ̍ndōo̍ māndāa̍ wa̍ a̍ wānā o̍ wāna̍ cho̍ na̍ŋ ā sīna̍ ni᷅ŋ māā le̍ chō ya̍ I̍ cho̍ bu̍ɛ̍i̍ Ki̍li̍tīo̍o̍ wo̍ māā le̍la̍ŋ nda̍ dɔ̄ū ya̍ o̍ chīɛ̄ī mānyūmndo̍ ni᷄ŋ ni̍.

¹⁴Ndu̍yɛ̍ o̍ ko̍ŋ kɔ̍ɔ̍lī, bīyɔ̄ɔ̄ nda̍ bīī ya̍ ho̍ō wo̍ ō tōsa̍ mi̍ chāāŋāā nāā wa̍nāā lāāla᷄ŋnda̍ chɔ̄ɔ̄lū tīīnda᷄ŋndo̍ dɔ̄wɔ̄ɔ̄ vɛ̄lɛ̄ kpe̍e̍kpe̍i̍ o̍ Māsānɔ̄ɔ̍ Mɛ̄lɛ̄ka̍ ni᷄ŋ. Ndu̍yɛ̍ ō tōsa̍ mi̍ kɔ̄lta̍ŋ lā sīmūl nda̍ nyɛ̄ kɛ̄ndɛ̄ yi̍ le̍ sūɛ̍i̍ Mɛ̄lɛ̄kɛ̍i̍ dīmīo̍o̍ ā yɔ᷅ŋ i̍si̍o̍o̍ŋ te̍.

¹⁵Ī chō tōnya̍ kpe̍e̍kpe̍i̍ māā wāŋnda̍ ā pūm a̍ nɛ̄īyɔ᷄ŋ nūu̍ o̍ kɔ̄l nda̍ chō wāŋnda̍ dīmūllo̍ a̍ Ki̍li̍tī o̍kɔ̄ɔ̄ ni̍. Ndu̍yɛ̍, tānda̍a̍ ko̍ nda̍ chūū ya̍ ni̍. Kɛ̍ chāāŋnda̍ ā pūm nda̍ nda̍, a̍ yīya᷄ŋ kɛ̍ndɔ̄ɔ̍ o̍ kɔ̄l nda̍ dīmūl wa᷅ŋnda̍ a̍ Ki̍li̍tī o̍kɔ̄ɔ̄ ni̍.

¹⁶Le̍ kāālā nda̍ kāāla̍ ya̍ wo̍, nda̍ tōsā ndi̍ ni̍. Kāni̍ fu̍u̍le̍, ā sīnā māā le̍ mī so̍ō le̍ Yōōŋgū Kɛ̄ndɛ̍ Mɛ̄lɛ̄ka̍a̍ ho̍ō ya̍ I̍ cho̍ na̍nu᷄ŋ ni̍.

¹⁷Wāŋnda̍ ā pīli̍a̍ā nda̍ nda̍, ō cho̍ a̍ kɔ̄l kpe̍e̍kpe̍i̍ le̍ nda̍ chō dīmīo̍o̍ a̍ Ki̍li̍tī o̍kɔ̄ɔ̄ le̍. Le̍ nda̍ pi̍la̍ dɛ̍nɛ̍ ndā kɛ̍ndɔ̄ɔ̍, nda̍ chō ndi̍ dīmīo̍o̍ ni̍. Yīya᷄ŋ cho̍ nda̍ o̍ lākɔ̄l lo̍ cho̍ ni̍ māā le̍ mā tōsa̍ mī I̍ sɔ̍la̍ dɛ̍nɛ̍ pa̍lāa̍ bōōndi̍i̍ ya̍ cho̍ he̍ī o̍ chīɛ̄ī mānyūm ndo̍ ni᷄ŋ nde̍.

¹⁸Kɛ̍ ndu̍yɛ̍, nyɛ̄ o̍ nyɛ̄ nda̍ chō tōsāa̍ ō cho̍ ya̍ kpe̍ku̍ le̍. Nda̍ a̍a̍ di̍mi̍ bɛ̍ɛ̍ su̍ɛ̍i̍ he̍ī a̍ yīya᷄ŋ wɔ̍ɔ̍ŋ o̍ kɔ̄l, nda̍ a̍a̍ di̍mi̍ ndi̍ a̍ yīya᷄ŋ kɛ̍ndɛ̄, Hāli̍ māā wāŋnda̍ ā tūe̍i̍ a̍ Ki̍li̍tī o̍kɔ̄ɔ̄ o̍ nɛ̄ī o̍ nɛ̄ī ni̍ŋ. Le̍ he̍ī, I̍ cho̍ a̍ kɔ̄l kɛ̄ndɛ̄.

¹⁹Kāni̍ fu̍u̍le̍, I̍ si̍nā māā pīɛ̄īlē nya̍ chō Mɛ̄lɛ̄ka̍ le̍ ya̍ le̍ŋ a̍ mālā Nyi̍na̍ Chi̍i̍sū Ki̍li̍tīo̍o̍ chō ya̍ wo̍ chō tōsā mā ma᷄l la̍.

²⁰Nyɛ̄ ya̍ la̍ndu̍ŋ kɔ̍l o̍ ndu̍ ndu̍yɛ̍, mi̍ ye̍e̍mā le̍ tōsāa̍ wo̍ cho̍ ni̍ māā wa̍li̍ cho̍ ya̍ ho̍ō ō yɔ̄ŋga᷄ŋ le̍ tōsāa̍ wo̍, māā I̍ bu̍mbā ndu̍ le̍. Ndu̍yɛ̍, yēēmɛ̍i̍ chō ya̍ māā I̍ sɔ̍la̍ kɔ᷅l sīmūlāa̍ pɛ̄ŋgo̍o̍ ho̍ō māā pāāndū le̍ mī to̍sa̍ a̍ sa̍bū o̍ nyɛ̄ o̍ nyɛ̄ ni᷄ŋ ya̍ I̍ to̍sa̍ mī wāŋnda̍ chē mɛ̄ɛ̍ Ki̍li̍tī cho̍ ō bɛ̄ndū yɛ̍. He̍ī ya̍ hɛ̍na̍ŋ māā ī yɔ̄nu̍ŋ ni̍, I̍ wa̍ yo̍o̍mū, kɛ̄lɛ̄ŋgāā ā yɔ᷄ŋ bɛ̍ɛ̍ mā dīī ya̍.

²¹Kāni̍ fo̍ndōle̍ le̍ ya̍ ya̍, wa̍llo̍ tōsāa̍ le̍ Ki̍li̍tī ndu̍ cho̍ wāa̍ yōōmū ni̍. Yālāā ya̍ I̍ wu᷅ le̍ sūɛ̍i̍ tɔ̄nūɛ̍i̍ ko̍ni̍ i̍ wa᷅ le̍ ya̍ ni̍.

²²Kɛ̍ ndu̍yɛ̍, tē ō wa̍ pɛ̍ māā tē I̍ hi̍o̍ū lāchī a̍ wāa̍ yōōmū pɛ̍, māā I̍ nɔ̍lā mī to̍sa̍ wa̍li̍ kɛ̍ndɛ̄ le̍ Mɛ̄lɛ̄ka̍, mɛ̄ɛ̍ I̍ si̍nā kpe̍e̍kpe̍i̍ sūɛ̍i̍ ya̍ I̍ chu̍ā o̍ sɔ̄ɔ̍ŋ sa̍lā tīɔ̍ɔ̍ŋ ndo̍ŋ mu᷅ŋ ni᷄ŋ te̍.

²³O̍ yɔ̄m tɛ̄ndāa̍ tɛ̄ɛ̄ŋ ya̍ I̍ cho̍ ni̍. I̍ hɛ̍nāŋ mī fa̍ŋa̍ŋ chi̍e̍ēŋ na̍nu᷄ŋ le̍ mī I̍ ku̍ɛ̍nu᷄ŋ, mī ŋ̄ kɔ̍ wa᷅ lātūlu̍ na̍a̍ Ki̍li̍tī wa̍ā. Ko̍ŋ hi̍o̍ū nāŋɔ̄ɔ̄.

²⁴Kɛ̍ ndu̍yɛ̍, le̍ sa̍bū nyāa̍, sūɛ̍i̍ hi̍o̍ū bɛ̄ndā ve̍ cho̍ ni̍, māā mī hi̍o̍ū wɔ̄ lāchī a̍ wāa̍ yōōmū.

²⁵I̍ si̍nā le̍nde̍ wa̍la̍ŋ. Le̍ he̍ī, I̍ si̍nā māā I̍ cho̍ wɔ̄ wā yōōmū. Ndu̍yɛ̍, I̍ cho̍ hīōūwɔ̄ɔ̄ lāchī a̍ wāa̍ lātūlu̍ a̍ nya̍, le̍ mī ma̍la̍ nya̍ mī lā chɔ̄ɔ̄lu̍ tīīnda᷄ŋ nyāa̍ dɔ̄wɔ̄ɔ̄ o̍ Ki̍li̍tī ni̍ŋ, ndu̍yɛ̍, mī lā chɔ̄ɔ̄lu̍ kɔ̄l kɛ̄ndɔ̄ɔ̍ sɔ̄lā lēni᷄ŋ.

²⁶Le̍la̍ŋ, tē ō lo̍ o̍ ko̍ŋ pɛ̍ mī I̍ mi̍i̍ŋgu̍ vɛ̄lɛ̄ nya̍ tɛ̄ɛ̄ŋ, mɛ̄ɛ̍ ko̍ŋ to̍sā kɔ̄l kɛ̄ndɛ̄ nya̍ nɔ̄ le̍ chō nya̍ chō dīōm pīlɛ̍ a̍ Chi̍i̍sū Ki̍li̍tī wo̍, mbō chɔ̄ɔ̄lu᷄ŋ ta̍u̍ ta̍u̍, kāni̍ fu̍u̍le̍ le̍ wā nūu̍ nya̍ tɛ̄ɛ̄ŋ.

²⁷O̍ ko̍ŋ kɔ̍ɔ̍lī, sūɛ̍i̍ le̍bo᷅lle̍ ndi̍ cho̍ ni̍ māā ka̍ālā nyāla̍ŋ lā wa̍ mɛ̄ɛ̍ Yōōŋgū Kɛ̄ndɔ̄ɔ̍ a̍ Ki̍li̍tī o̍kɔ̄ɔ̄ o̍ di̍mi̍ māā ka̍ālā nyāla̍ŋ lā nɔ̄ le̍ wāa̍ yɛ̍. He̍ī tōsā I̍ sɔ̍la̍ fo̍ndāŋ le̍ nya̍ lākɔ̄ yīlɔ̄ɔ̍, I̍ sɔ̍lā fo̍ndā le̍, I̍ nɔ̍lā mī tu̍e̍ī tɔ̍ɔ̍ kɛ̍ndɛ̄ a̍ nya̍ o̍kɔ̄ɔ̄, māā lā chō īsīsi̍ nyɛ̍ kɛ̄ndɛ̄ yi̍, ndu̍yɛ̍, mī lā nɔ̄ yīya᷄ŋ pi᷅lɔ̍ɔ̍ kpe̍. Ndu̍yɛ̍, I̍ nɔ̍lā mī tu̍e̍ī māā lā chō dīōm pīlɛ̍ o̍ sɔ̍ŋgɔ̄ɔ̍ ho̍ō ni᷄ŋ le̍ tīīnda᷄ŋ wānāa̍ la̍a̍la̍ŋ a̍ Yōōŋgū Kɛ̄ndɛ̍ Mɛ̄lɛ̄ka̍a̍ wa̍ ā nɔ̄ wo̍ māndāa̍.

²⁸Ndu̍yɛ̍ māā īsīōōŋ o̍ īsīōōŋ ī cho̍ nya̍ le̍ wānāa̍ si̍mu̍l nya̍ a̍ sɔ̍ŋgɔ̄ɔ̍ wa̍ le̍. He̍ī cho̍ wā tāāmāsi̍o̍o̍ ni̍, māā nda̍ chō wā ā tɛ̄ɛ̄mbāā, kɛ̍, nya̍ nya̍ mī lā sɔ̄la̍ pīōŋɔ̄ɔ̍. Ndu̍yɛ̍, Mɛ̄lɛ̄ka̍ pi̍la̍ ndu̍ cho̍ he̍ī tōsā ni̍.

²⁹Kāni̍ fo̍ndōle̍, fo̍ndāŋ kɛ̄ndɛ̄ Mɛ̄lɛ̄ka̍ ke̍ ho̍ō nya̍ wo̍, ō cho̍ ko̍ le̍ lāāla᷄ŋndo̍ a̍ Ki̍li̍tī le̍, kɛ̍, ō kēnu̍ŋ nya̍ vɛ̄lɛ̄ le̍ mī lā sɔ̄la̍ nyɛ̄ pālāa̍ le̍ ndu̍.

³⁰Ndu̍yɛ̍, sɔ̍ŋgɔ̄ nya̍ chē ya̍ mi̍ wa᷅ ndu̍ wo̍, sɔ̍ŋgɔ̄ kōŋ ko̍ni̍ nya̍ bɛ̍ɛ̍ nya̍ chō ho̍ō ni̍, ndu̍ ko̍ni̍ nya̍ chō ho̍ō tūēīyɔ̄ɔ̍ māā I̍ cho̍ wɔ̄ kɛ᷅ ni̍.