Read Southern Kisi Fīli̍pīāŋnda̍ 2 Bible Online

Fīli̍pīāŋnda̍ 2 - Southern Kisi bible

Fīli̍pīāŋnda̍ 2

¹Le̍ chō nya̍ chō o̍ dīōm pīlɔ̍ɔ̍ ni᷄ŋ a̍ Ki̍li̍tī wo̍, ko̍ŋ to̍sa̍ ni̍ mi̍ lā wā a̍ dīāllūŋ kālā. Ndu̍yɛ̍, kāālā o̍ ka̍a̍la̍ nya̍ wo̍ ndu̍ dɛ̍ɛ̍nīāā nya̍ kɔ̄lta̍ŋ ni̍. Lā chō o̍ nāŋa᷅ŋndo̍ ni᷄ŋ a̍ Nyi̍na̍ Mɛ̄lɛ̄ka̍a̍. Ndu̍yɛ̍, lā chō kɛ̄ndɛ̄i̍ tōsa̍la᷅ŋndo̍ mī lā tūīīna᷅ŋ nyīɛ̍ɛ̍ye̍ vēllāa̍ vēllē.

²Le̍ he̍ī, lā nɔ̍ yi̍ya᷄ŋ pi᷅lɔ̍ɔ̍, ndu̍yɛ̍, mī lā kāāli̍āŋ ve᷅llāa̍ vēllē, mī kɔ̄ltā nyāla̍ŋ lā wa̍ nāa̍ pi᷅lɛ̍ kpe̍, ndu̍yɛ̍, mī lā nɔ̄ yēēmɛ̍i̍ pi᷅lɛ̍i̍. Tē lā tōsa̍ le̍nde̍ pɛ̍, mɛ̄ɛ̍ lā nɛ̄ŋi̍ ya̍ kɔ̄l cha̍po̍ cha̍po̍.

³Wānā o̍ wānā to̍sā īsɔ̄ɔ̍ o̍ īsɔ̄ɔ̍ le̍ nu᷄m pīlɛ̍ dɛ̍nɛ̍ nu̍m kɛ̄ndɔ̄ɔ̍ su̍e̍e̍ le̍. Ndu̍yɛ̍, lā to̍sā īsɔ̄ɔ̍ o̍ īsɔ̄ɔ̍ le̍ chɔ̄mnɔ᷄ŋ o̍ ŋ̄wāŋndā chīe̍e̍ lo̍ le̍. Lā wa̍ a̍ tu̍sīa̍ŋ ve̍llāa̍ vēllē o̍ chāāŋāā nyāa̍ lo̍. Wānā o̍ wānā mā chu̍a̍ bɛ̍ɛ̍ cha̍a̍ŋ nu᷄m māā ndu̍ hi̍o̍ū bɛ̄ndā a̍ nūm.

⁴Ndu̍yɛ̍, wānā o̍ wānā ō cho̍ ko̍ le̍ dɛ̍nɛ̍ nu̍m kɛ̄ndɔ̄ɔ̍ nu᷄m pīlɛ̍ su̍e̍e̍ le̍ ŋ̄ lāndūŋ kɔ̍l te̍. Nɔ̍ kɔ᷅l lānda᷄ŋndo̍ le̍ chāāŋnda̍ bɛ̍ɛ̍ dɛ̍nɛ̍ nda̍ kɛ̄ndɔ̄ɔ̍.

⁵Ka̍ā Chi̍i̍sū Ki̍li̍tī ndu̍ o̍o̍ nɔ̍ ni᷄ŋ ndo̍, lā nɔ̍ ka̍ā kōŋ.

⁶Kāni̍ fo̍ndōle̍, mɛ̄ɛ̍ Mɛ̄lɛ̄ka̍ chō yɛ̍, le̍nde̍ ko̍ni̍ Chi̍i̍sū Ki̍li̍tī cho̍ kāni̍ bɛ̍ɛ̍ ni̍. Kɛ̍ o̍ ko̍ŋ ni̍ŋ kpo̍u̍, ō yīya̍ŋ o̍ kɔ̄l ni᷄ŋ le̍ ndu̍ pi̍la̍ sīīma᷅ŋndo̍ a̍ Mɛ̄lɛ̄ka̍ a̍ ka̍ ka̍ le̍.

⁷O̍ ko̍ŋ kɔ̍ɔ̍lī, mi̍ ndu̍ pi̍la̍ chɛ᷅l mbo̍ māl nāa̍ ndūāā si̍māā bɛ̄ndūa̍a̍, mbo̍ sīīŋgūū ndu̍ pi̍la̍ bu̍ɛ̍ī. Mbo̍ lō o̍ ko̍ŋ, mbo̍ sīmnu᷄ŋ mɛ̄ɛ̍ na̍a̍ ŋ̄wāŋndā chīe̍e̍ ŋ̍ cho̍ yɛ̍. Mi̍ wāŋnda̍ chā ndu̍ māā wāna̍ chi̍e̍e̍.

⁸Mbo̍ tūsī ndu̍ pi̍la̍ tōōlō. Ndu̍yɛ̍, mbo̍ tūɛ̄ī Mɛ̄lɛ̄ka̍ dīōm. O̍ he̍ī ni᷄ŋ, mbo̍ chɛ̄l ma̍ dīī ndu̍, ndu̍ yɔ̍nūŋ ni̍ māā dīyɔ̄ɔ̄ nda̍ dīī ndu̍ o̍ yɔ̄m sīŋgāfīlāa̍ chōo̍ wo̍.

⁹Le̍ sa̍bōo̍ ho̍ō mi̍ Mɛ̄lɛ̄ka̍ kē ndu̍ nāa̍ si̍māa̍ hi̍o̍ū kpo̍u̍ ɛ̄chɛ̍nɛ̄ wa̍. Nāa̍ si̍māa̍ hi̍o̍ū kpo̍u̍ wa̍ lo̍ŋ Mɛ̄lɛ̄ka̍ sīmi̍ ndu̍ ni̍.

¹⁰Le̍la̍ŋ, nyɛ̄ o̍ nyɛ̍ yo̍o̍mu̍ ɛ̄chɛ̍nɛ̄ ni̍, o̍ chi̍e̍ēŋndo̍ chōo̍ ni̍, lēbɛ̄ŋgu̍ ni̍, kpo̍u̍, mɛ̄ɛ̍ mā ba᷄ŋ wūla̍ŋ Chi̍i̍su̍ o̍ lābɛ̄ŋgu̍ ni̍ŋ mā ke̍ ndu̍ bɛ̄ɛ̄le̍ŋ.

¹¹Ndu̍yɛ̍, wānā o̍ wānā cho̍ dīmī wāŋnda̍ o̍ hɔ̄l kpe̍nde̍ke̍le̍, māā Chi̍i̍sū Ki̍li̍ti̍ ndu̍ cho̍ Māsānɔ̄ɔ̍ Mɛ̄lɛ̄ka̍ ni̍. Tē ke̍ŋ yɔ̍nu̍ŋ pɛ̍, wāŋnda̍ sāŋga̍la̍ Mɛ̄lɛ̄ka̍ fi̍nyā nāa̍.

¹²Chāa̍ŋāā nīāā ka̍a̍lāa̍, bōōndi̍i̍ ya̍ I̍ wa̍ nya̍ tɛ̄ɛ̄ŋ nde̍, lā wa̍ wānāa̍ tu̍ɛ̍ī nyɛ᷅ ya̍ I̍ di̍mūl nya̍ wo̍. Le̍la̍ŋ, pɛ̄ŋgu̍ ya̍ I̍ cho̍ ho̍ō nya̍ tɛ̄ɛ̄ŋ te̍ wo̍ bɛ̍ɛ̍ kpɔ̍ nya̍ nɔ̄ ni̍ mī lā tūēī nyɛ̄ ya̍ I̍ di̍mūl nya̍ wo̍. Lā hīo̍u̍ la̍chi̍ a̍ fāfa̍la̍a̍, le̍ mī lā sīo̍u̍ pīŋīo̍o̍ sɔ̄lā. Lā tōsa̍ he̍ī o̍ sīōōŋīi̍ Mɛ̄lɛ̄kɛ̍i̍ ni᷄ŋ, a̍ tūsi᷄ŋndo̍ ndu̍ o̍ lābɛ̄ŋgu̍ ni̍ŋ.

¹³Kāni̍ fu̍u̍le̍, Mɛ̄lɛ̄ka̍ pi̍la̍ ndu̍ cho̍ wa̍llo̍ o̍ nya̍ ni̍ŋ ni̍ mi̍ lā nɔ̄ yēēmɛ̍i̍ le̍ nyɛ̄ o̍ hɛ̍na̍ŋ ndo̍ tōsāa̍. Ndu̍yɛ̍, ndu̍ to̍sā ni̍ mī lā nɔ̄la̍ nyɛ̄ o̍ hɛ̍na̍ŋ ko̍ŋ ndo̍ tōsā.

¹⁴Nyɛ̄ o̍ nyɛ̄ lā wa̍ ndu̍ tōsā pɛ̍, lā to̍sā ndu̍ a̍ ŋɔ̄ɔ̄chīa̍ŋ te̍, kɛ̄lɛ̄ŋgāā ni᷅ŋ te̍ mī lā hīŋa᷅ŋ la̍di̍o̍m a̍ chāāŋāā nyāa̍ a̍ ndu̍ o̍kɔ̄ɔ̄.

¹⁵Ko̍ŋ to̍sā īsɔ̄ɔ̍ o̍ īsɔ̄ɔ̍ bɛ̍ɛ̍ i̍ ve᷅ ī wānā bi̍ī nya̍ tɛ̄ɛ̄ le̍ ndi̍ le̍. Ndu̍yɛ̍, ō tōsā mī kɔ̄ltā nyāla̍ŋ lā wa̍ lā dīāndāā wa̍la̍ŋ. Ō tōsa̍ mi̍ lā wā chūāūwāa̍ Mɛ̄lɛ̄ka̍a̍ a̍ nɔ̍ sɔ᷅ŋ o̍ sɔ̄ŋ te̍ wa̍, kɛ̍ ma̍ wā wānāā wɔ̄ɔ̍ŋnda̍ ha̍ā tɛ̍ɛ̄ŋ nda̍, wānāā yɔ̄ŋ wɔ̄ɔ̍ŋnda̍ ha̍ā. Lā hīo̍u̍ la̍chi̍ a̍ fāfa̍la̍a̍ le̍ mī lā sīo̍u̍ pīŋīo̍o̍ sɔ̄lā. Lā tōsa̍ he̍ī o̍ sīōōŋīi̍ Mɛ̄lɛ̄kɛ̍i̍ ni᷄ŋ a̍ tūsi᷄ŋndo̍ ndu̍ o̍ lābɛ̄ŋgu̍ ni̍ŋ. Mɛ̄ɛ̍ lōo̍ŋ dīāndū nu̍a̍ā o̍ ha̍la̍a̍ ni᷄ŋ mī ŋ̄ yɔ̄ŋgū nyɛ᷅ wa̍wo̍ŋndo̍ yɛ̍, le̍nde̍ nya̍ chō dīōndɔ̄ɔ̍ wāŋnda̍ ha̍ā tɛ̄ɛ̄ŋ ni̍.

¹⁶Lā chō māchūāā he̍ī tōsāa̍ sa̍na̍a̍ a̍ nda̍ yōōŋgu̍ ke᷅ nda̍ yōōmōo̍ wo̍ kīo̍o̍. O̍ he̍ī ni᷄ŋ, tē pāa̍le̍ Ki̍li̍tī mi̍i̍ŋgū ni̍ŋ chi̍e̍ēŋ na̍ŋ nde̍ŋ lē fūūlu̍u̍ pɛ̍, I̍ nɔ̍lā mī ke̍lū yōŋgā māā fāfa̍la̍ o̍ fāfa̍la̍ ya̍ I̍ fa̍fa̍la̍, a̍ sāŋgā o̍ sāŋgā ya̍ I̍ sa̍ŋga̍, māā ō cho̍ fo̍ndō fu̍u̍ le̍.

¹⁷Wānā si̍nāŋ dɛ̍nɛ̍ le̍, mā dīī ya̍ dɔ̍ɔ̍. Tē ī yɔ̄nu̍ŋ yɛ̍ le̍nde̍ pɛ̍, mɛ̄ɛ̍ pīɔ̍m nūu̍ ō wā ni̍ŋ ma̍wa̍ā chɔ̄ɔ̄lu̍la̍ sa̍lā nya̍ chō yɔ̄ŋgōo̍ o̍ Mɛ̄lɛ̄ka̍ lo̍ wo̍, ndu̍ yɔ̍nūŋ ni̍ māā tīīnda᷄ŋ nya̍ nɔ̄ o̍ Mɛ̄lɛ̄ka̍ ni᷄ŋ ndo̍ a̍ fāfa̍la̍ nyāa̍. Kɛ̍, ā yɔ᷄ŋ bɛ̍ɛ̍ mā dīī ya̍ I̍ na᷅ŋ kɔ̍l, ndu̍yɛ̍, I̍ ye̍e̍ma̍ nya̍ kpo̍u̍ mī lā na᷄ŋ kɔ̄l o̍ he̍ī ni᷄ŋ a̍ ya̍ la̍tu̍lu̍.

¹⁸Le̍nde̍ ko̍ni̍ nya̍ bɛ̍ɛ̍ nya̍ nɔ̄ mī lā na᷄ŋ kɔ̄l ni̍. Nya̍ bɛ̍ɛ̍ lā nɔ̍ ye̍e̍mɛ̍i̍ le̍ mī ya̍ bɛ̍ɛ̍ mī na̍ŋ kɔ̄l a̍ nya̍ la̍tu̍lu̍.

¹⁹I̍ nɔ̍ o̍ kɔ̍l le̍ Ti̍mo̍tī yɔ̄ŋndo̍ su̍ŋ nāa̍ nya̍ chūā. Tē Māsānɔ̄ɔ̍ Chi̍i̍sū chɛ̍l pɛ̍, mɛ̄ɛ̍ ō chō hūnɔ̄ɔ̄ mbō hu᷄ŋ yi᷅l nya̍. Mɛ̄ɛ̍ ko̍ŋ to̍sā, tē I̍ si̍na̍ lāwāā a̍ nya̍ o̍kɔ̄ɔ̄ pɛ̍, I̍ hi̍ni̍ kɔ̄l.

²⁰Wānā o̍ wānā che᷅le̍ŋ I̍ nɔ̍ na̍nu᷄ŋ mbō nɔ̄ kɔ̄l lānda᷄ŋndo̍ kpe̍e̍kpe̍i̍ le̍ dɛ̍nɛ̍ nyā kɛ̍ndɔ̄ɔ̍ māā ndu̍ Ti̍mo̍tī le̍.

²¹Wāŋnda̍ ā pīli̍a̍ā kpo̍u̍ a̍ bālā hāvɛ̍i̍la̍ ndāla̍ nda̍ pi̍la̍la̍ŋ ko̍ni̍ nda̍ lāndu̍ŋ kɔ̍l ni̍. Ā lēndu̍ŋ kɔ̍l o̍ sɔ̄ɔ̍ŋ Chi̍i̍sū Ki̍li̍tīo̍ŋ te̍.

²²Nya̍ pi̍la̍ lā sīnā wa̍la̍ŋ mɛ̄ɛ̍ Ti̍mo̍tī lo̍ o̍ ko̍ŋ mbo̍ chɔ̄m wāna̍ su̍u̍ o̍ cho̍ wo̍ yɛ̍. Mɛ̄ɛ̍ fi̍nyāa̍ wā nu̍a̍ā nda̍ po̍ ndɔ̄ɔ̍ o̍ wa̍llo̍ ni᷄ŋ yɛ̍ le̍nde̍ Ti̍mo̍tī cho̍ ya̍ mālāa̍ a̍ wa̍llo̍ le̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmīo̍o̍ ni̍.

²³Le̍la̍ŋ I̍ nɔ̍ o̍ kɔ̄l le̍ ndu̍ yɔ̄ŋgōo̍ mbō kɔ̍ yi᷅l nya̍, tē I̍ si̍na̍ dɔ̍ɔ̍ mɛ̄ɛ̍ nda̍ chō bīyɔ̄ɔ̄ a̍ ya̍ yɛ̍ pɛ̍.

²⁴I̍ nɔ̍ tīīnda᷄ŋndo̍ o̍ Māsānɔ̄ɔ̍ Mɛ̄lɛ̄ka̍ ni᷄ŋ, māā ya̍ pi̍la̍ I̍ ko̍māl nya̍ ni̍ŋ su̍ŋ.

²⁵Ndu̍yɛ̍, I̍ yi̍ya̍ŋ ndi̍ māā ō bɛ̄ndā mī mi̍ŋgi̍ chāa̍ŋ nāā wa̍nā la̍a̍la᷄ŋndo̍ Ɛ̄pāfūlōda̍i̍tɔ̄ɔ̄ nāa̍ nya̍ chūā. Ndu̍ yɔ̍nūŋ ni̍ māā bu̍ɛ̍ī nya̍ vēm le̍ mbō hu᷄ŋ ma̍lā ya̍ o̍ bālā hāvɛ̍i̍la̍ŋ ni᷄ŋ ndo̍. Mbo̍ tōsā wa̍llo̍ a̍ ya̍ la̍tu̍lu̍ o̍ wa̍li̍ Ki̍li̍tīo̍o̍ ni᷄ŋ ndu̍yɛ̍, na̍a̍ ndu̍ mi̍ ŋ̄ chɔ̄ū lātūlu̍ o̍ chɔ̄u̍ Ki̍li̍tīo̍o̍ ho̍ō ni᷄ŋ.

²⁶Ndu̍yɛ̍, yēēmɛ̍i̍ chō ni᷅ŋ ndu̍ ta̍u̍ le̍ mbō chē nya̍ kpo̍u̍. Mɛ̄ɛ̍ o̍ sa̍a̍lu̍ŋ māā lā tūēī a̍ nāā o̍ na̍a̍ wo̍ o̍kɔ̄ɔ̄, mi̍ mɔ̍nɛ̍i̍ bīī ndu̍ ta̍u̍.

²⁷Nāā kālāa̍ chō tōnya̍. Ndu̍ o̍o̍ lo̍ ni᷅ŋ cho̍be̍ mī ndu̍ o̍o̍ vi᷅, kɛ̍ ndu̍yɛ̍, mi̍ Mɛ̄lɛ̄ka̍ tūīīnu᷄ŋ ndu̍ īnyīɛ̍ɛ̍. Kɛ̍ ō cho̍ ko̍ Ɛ̄pāfūlōda̍i̍tɔ̄ɔ̄ le̍ Mɛ̄lɛ̄ka̍ tūīīnu̍ŋ i̍nyi̍ɛ̍ɛ̍ o̍ dīālīī nɛ̄i̍ he̍ī ni᷄ŋ te̍. Ya̍ kpɔ̍ o̍ tūīīnu̍ŋ i̍nyi̍ɛ̍ɛ̍ ni̍. Kāni̍ fo̍ndōle̍, tē ndu̍ o̍o̍ vi᷅ pɛ̍, mɔ̍nɛ̍i̍ ndi̍ i̍i̍ wa᷅ ni̍ŋ bɔ̍ɔ̍ ya̍ chōo̍.

²⁸Le̍ sa̍bōo̍ ho̍ō ya̍ I̍ hɛ̍na̍ŋ ni̍ mī mi̍ŋgi̍ ndu̍ vɛ̄lɛ̄ nāa̍ nya̍ chūā le̍ mī lā chē ndu̍, mī lā na᷄ŋ kɔ̍l, ndu̍yɛ̍ mī I̍ fu̍la̍ o̍ kɔ̄l lānda᷄ŋndo̍ ni᷄ŋ.

²⁹Le̍la̍ŋ, lā bīi̍ ndu̍ ō kɛ̄ndɛ̄ kɛ̍ndɛ̍ī māā chāa̍ŋ nyā wa̍nā la̍a̍la᷄ŋndo̍ o̍ Māsānɔ̄ɔ̍ Mɛ̄lɛ̄ka̍ ni᷄ŋ. Lā ke̍ wa̍nāā wāā nu̍a̍ā bɛ̄ɛ̄le̍ŋ ta̍u̍, tāāma̍ mɛ̄ɛ̍ ndu̍ cho̍ nu̍a̍ā yɛ̍.

³⁰Kāni̍ fo̍ndōle̍, cho̍be̍ mī ndu̍ o̍o̍ vi᷅ le̍ wa̍li̍ Ki̍li̍tīo̍o̍. Mbo̍ nɔ̄lā mbo̍ pīsī yōōmū ndɔ̄ɔ̍ chi̍ le̍ hāli̍ kpe̍ŋ mbō yɔ̄ŋgu̍ ya̍ mālā nya̍ nya̍ nɔ̍lā mī lā yɔ̄ŋgu̍ ya̍ le̍ wo̍.