Read Southern Kisi Fīli̍pīāŋnda̍ 3 Bible Online

Fīli̍pīāŋnda̍ 3 - Southern Kisi bible

Fīli̍pīāŋnda̍ 3

¹Chāa̍ŋāā nīāā wa̍nāā lāāla᷄ŋnda̍, nyɛ̄ ya̍ I̍ cho̍ nya̍ mɛ̄ɛ̄lū dīmūl lo̍ ndu̍ cho̍ ho̍ō ni̍. Mbɔ̄ Māsānɔ̄ɔ̍ Mɛ̄lɛ̄ka̍ ō tōsa̍ mī lā wa̍ a̍ kɔ̄l kɛ̄ndɛ̄ le̍ mɛ̄ɛ̍ nya̍ chō dīōm pīlɛ̍ a̍ ndu̍ yɛ̍ fɔ̍. I̍ di̍mu̍l nya̍ ni᷅ŋ pāāndū sūɛ̍i̍ he̍ī o̍ yāu̍wo̍ ni᷄ŋ. Kɛ̍ ndu̍yɛ̍ ō cho̍ su̍ɛ̍i̍ ka̍lā nāa̍ ya̍ chu̍a̍ le̍ nya̍ ndi̍ chɔ̄ɔ̄lū dīmūl te̍. Ndu̍yɛ̍ tē ō wa̍ pɛ̍ mī chɔ̍ɔ̍lu̍ nya̍ ndi̍ dīmūl, ō wā su̍ɛ̍i̍ ma̍nda̍ nya̍.

²Ndu̍ cho̍ ni̍ māā lā wa̍ a̍ ma̍nda᷄ŋ le̍ wānāā dɛ̍nɛ̍la̍ wɔ̍ɔ̍ŋnda̍, nda̍ yɔ̍nūŋ ni̍ māā tūŋāā wɔ̄ɔ̍ŋāa̍ ki̍lī di̍a̍llūŋ nda᷄ŋ nda̍ pi̍la̍ŋ nda̍. Ya̍ ya̍ I̍ ve̍e̍lū ko̍ŋ māā hīvī chīɛ̄ī kɔ̄ɔ̄lī le̍.

³Kāni̍ fo̍ndōle̍, na̍a̍ ŋ̍ sɔ̍la̍ hīvī chīɛ̄ī kɔ̄ɔ̄līo̍o̍ ō kpe̍e̍kpe̍i̍yo̍ ni̍ ko̍ŋ cho̍ ni̍, na̍a̍ ŋ̍ pi̍ɛ̍ī Mɛ̍lɛ̄ka̍ o̍ kpāāya̍ Nyi̍na̍ Mɛ̄lɛ̄ka̍a̍ ni᷄ŋ, ndu̍yɛ̍ mi̍ ŋ̄ wā a̍ kɔ̄l kɛ̄ndɛ̄ le̍ chō na̍a̍ ŋ̄ chō dīōm pīlɛ̍ a̍ Chi̍i̍sū Ki̍li̍tī wo̍ wa̍. Ndu̍yɛ̍, na̍a̍ ŋ̍ cho̍ wānāa̍ ma̍l ni᷅ŋ tīīnda᷄ŋndo̍ dɔ̄wɔ̄ɔ̍ o̍ nyɛ̄ wānā pi̍la̍ to̍sā wo̍ ni᷄ŋ ndo̍ ni̍.

⁴Ya̍ i̍i̍ nɔ̍lā kpe̍e̍kpe̍i̍ mī ya̍ i̍i̍ dɔ̍ū tīīnda᷄ŋndo̍ o̍ sɔ̄ɔ̍ŋ wa̍ā le̍ndo̍ŋ ni᷄ŋ. Nāa̍ wānāā kāŋ ā dɔ̄ū wɔ̄ tīīnda᷄ŋ ndāa̍ o̍ nyɛ̄ nda̍ pi̍la̍ tōsā wo̍ ni᷄ŋ, ya̍ yɛ̍?

⁵Kāni̍ fo̍ndōle̍, mɛ̄ɛ̍ nda̍ vēlū ya̍, I̍ chu̍a̍ pālɛ̍i̍ ī ŋɔ̄ma̍a̍ ma̍ hīvī ya̍ o̍ chīɛ̄ī kɔ̄ɔ̄lī. I̍sɔ̄lu̍ɛ̍i̍nɔ̍ kpe̍e̍kpe̍i̍yo̍ ya̍ I̍ cho̍ ni̍, fūlāa̍ o̍ pūlāle̍ Bɛ̍ŋnja̍mīŋnde̍ŋ chōo̍. Hi̍būlūi̍nɔ̍ Hi̍būlūi̍ya̍ vēlū wo̍ ya̍ I̍ cho̍ ni̍. Tē ō wa̍ pɛ̍ le̍ sāwāla̍ māChu̍ūla̍ŋ chūa̍a̍, na̍a̍ ŋ̍ fu̍la̍ o̍ ku̍nda̍ chu̍ā la̍ŋ kpe̍e̍kpe̍i̍ yo̍ chōo̍ ni̍, ku̍ndā Fālīsi̍īya̍.

⁶Kēīyo̍ ya̍ i̍i̍ ke̍ī ku̍ndā wānāā lāāla᷄ŋa̍a̍ Chi̍i̍sūa̍a̍ nyɛ̄ pālāa̍ tūsīo̍o̍ chōo̍ ni̍ kāni̍ fu̍u̍le̍, a̍ kɔ᷄l wa̍ ya̍ ni᷄ŋ le̍ Mɛ̄lɛ̄ka̍ sāāŋgīāllo̍ wo̍. A̍ nyɛ̄ sāwāla̍ŋ lā dīmi̍ wo̍ tōsāa̍ o̍kɔ̄ɔ̄ le̍ sīmnɔ᷄ŋndo̍ wānā sa̍kpō Mɛ̄lɛ̄ka̍ o̍ hɔ̄l, I̍ nɔ̍lā mī di̍mi̍ māā wānā o̍ wānā nɔ̍lā mbō dīmi̍ māā mi̍ bi̍a̍ndu᷄ŋ o̍ sāwāa̍ ō pīlɛ̍ bɛ̍ɛ̍ kpe̍ ni̍ŋ te̍.

⁷Kɛ̍ ndu̍yɛ̍, sɔ̄ɔ̍ŋ ya̍ i̍i̍ chu̍a̍ mu̍ŋ pa̍a̍ndū, māā sɔ̄ɔ̍ŋ tɔ̄nɔ̄ wo̍ŋ, pɛ̄ŋgo̍o̍ ho̍ō ni᷅ŋ mu̍ŋ kpo̍u̍ I̍ chu̍a̍ ni᷅ŋ mu̍ŋ māchūāā māā sɔ̄ɔ̍ŋ nɔ̍ tɔ̍nɔ̄ le̍ni̍ŋ kpo̍so̍ŋ te̍, kāni̍ fu̍u̍le̍, le̍ nyɛ̄ Chi̍i̍sū Ki̍li̍tī to̍sa̍ le̍ ya̍ wo̍.

⁸Ndu̍yɛ̍, ō cho̍ ko̍ni̍ mu̍ŋ te̍ ya̍ I̍ chu̍a̍ māā sɔ̄ɔ̍ŋ nɔ̍ tɔ̍nɔ̄ le̍ le̍. I̍ chu̍a̍ ni᷅ŋ sɔ̄ɔ̍ŋ chēle̍ŋndo̍ŋ kpo̍u̍ māā sɔ̄ɔ̍ŋ nɔ̍ tɔ̍nɔ̄ le̍, le̍ hāli̍ kpe̍ŋ mī I̍ sɔ̍la̍ tɔ̄nɔ̄ bɛ̍ndū bɛ̄ndōo̍ o̍ hi̍o̍ū kpo̍u̍ wo̍, ō ya̍ I̍ sɔ̍lā sa̍na̍a̍ o̍ dɛ̍nɔ̍ɔ̍ si̍nāa̍ ni᷄ŋ a̍ Māsānɔ̍ nūu̍ Chi̍i̍sū Ki̍li̍tī o̍kɔ̄ɔ̄ wo̍. I̍ ma̍l ni᷅ŋ nyɛ̄ o̍ nyɛ̄ fe̍e̍ le̍ ndu̍. Sɔ̄ɔ̍ŋ mu̍ŋ kpo̍u̍ ŋ̄ chō māchūāā ya̍ o̍ hɔ̄l māā bīl wāā o̍ sa᷄l cho̍o̍, le̍ hāli̍ kpe̍ŋ mī sɔ̍la̍ tɔ̄nɔ̄ɔ̍ le̍ wāa̍ dīōm pīlɛ̍ na̍a̍ Ki̍li̍tī,

⁹ndu̍yɛ̍ na̍a̍ ndu̍ mī ŋ̄ wa̍ ā mɔ̄ɔ̄sa᷅ŋ. I̍ cho̍ ki̍ndī le̍ ya̍ pi̍la̍ sīīŋgūū wānā sa̍kpō Mɛ̄lɛ̄ka̍ o̍ hɔ̄l o̍ sāwāla̍ŋ chūa̍a̍ ni᷄ŋ te̍. O̍ tīīnda᷄ŋndo̍ dɔ̄wɔ̄ɔ̍ o̍ Ki̍li̍tī ni̍ŋ sa̍na̍a̍ ya̍ si̍mnu᷄ŋ wa̍nā sa̍kpō Mɛ̄lɛ̄ka̍ o̍ hɔ̄l ni̍, ndu̍ yɔ̍nūŋ ni̍ māā sa̍kpōyɛ̍ī Mɛ̄lɛ̄ka̍ ke̍ ya̍ mi̍ sɔ̍lā ndi̍ sa̍na̍a̍ o̍ Ki̍li̍ti̍ tīīnda᷄ŋndo̍ ni᷄ŋ nde̍.

¹⁰Le̍ he̍ī, nyɛ̄ ya̍ I̍ la̍ndu̍ŋ kɔ̍l o̍ ndu̍ su̍e̍e̍ wo̍ cho̍ ni̍, māā mī sīna᷅ŋndo̍ ō wa̍ na̍a̍ tɛ̄ɛ̄ŋ na̍a̍ Ki̍li̍ti̍, ndu̍yɛ̍ Ki̍li̍tī o̍ mi̍i̍ŋgu̍ ho̍ō yōōmū wo̍ mī nɔ̍ kpāāya̍ ndɔ̄ɔ̍. I̍ hɛ̍na̍ŋ mī bi̍ī mɔ̍nɛ̍i̍ mɛ̄ɛ̍ o̍ bi̍ī mɔ̍nɛ̍i̍ yɛ̍, ndu̍yɛ̍, mī sɔ̍la̍ pīɔ̍mndo̍ mɛ̄ɛ̍ o̍ sɔ̍la̍ pīɔ̍mndo̍ yɛ̍,

¹¹le̍ hāli̍ kpe̍ŋ ya̍ bɛ̍ɛ̍ mī Mɛ̄lɛ̄ka̍ hu᷄ŋ so̍lī ya̍ o̍ pīɔ̍mndo̍ ni᷄ŋ, mbō mīŋgi̍ ya̍ yōōmū.

¹²Ō cho̍ ma̍chu̍a̍ā mī wa̍ dīmī māā I̍ chi̍i̍ ni᷅ŋ sūɛ̍i̍ he̍ī bā tīū le̍. Ndu̍yɛ̍, ō cho̍ mī di̍mi̍ māā I̍ chi̍i̍ ni᷅ŋ sīmnɔ᷄ŋ mɛ̄ɛ̍ ya̍ I̍ nɔ̍ le̍ wāa̍ yɛ̍ le̍. Kɛ̍, I̍ cho̍ wɔ̄ hīōūwɔ̄ɔ̍ lāchī a̍ kīndīo̍o̍ le̍ mī sɔ̍la̍ fāndāa̍ ho̍ō. Kāni̍ fo̍ndōle̍, le̍ sa̍bōo̍ ho̍ō Chi̍i̍sū Ki̍li̍tī mu̍li̍ ya̍ mi̍ si̍mnu᷄ŋ wa᷅na̍ ndɔ̄ ni̍.

¹³Chāāŋāā nīa̍a̍, ō cho̍ di̍mī le̍ ya̍ I̍ cho̍ kpo̍so̍ŋ māā I̍ chi̍i̍ ni᷅ŋ fāndā nūu̍ sɔ̄lā le̍. Nyɛ̄ ya̍ la̍ndu̍ŋ kɔ̍l le̍ tōsāa̍ wo̍ ndu̍ cho̍ ni̍ māā mī fa̍ŋa̍ kɔ̄llo̍ ba̍ū o̍ nyɛ̄ o̍ nyɛ̄ ya̍ i̍i̍ to̍sā pa̍a̍ndū, ndu̍yɛ̍ mī ki̍ndi̍ ki̍ndi̍ le̍ mī sɔ̍la̍ nyɛ̍ cho̍ ya̍ lāchī wo̍.

¹⁴I̍ cho̍ fāfa̍la̍a̍ le̍ mī I̍ lo̍ o̍ ko̍ŋ mī I̍ fu̍u̍lu̍u̍ o̍ mɛ̄ɛ̄lu̍la̍ŋ le̍ mī I̍ kɔ̍ sɔ̍lā fāndāa̍. Fāndā ko᷄ŋ yɔ̍nūŋ ni̍ māā vēēlū Mɛ̄lɛ̄ka̍ vēēlu̍ ya̍ o̍ sa̍bu̍ Chi̍i̍sū Ki̍li̍tīo̍o̍ ni᷄ŋ, le̍ yōōmū kpe̍e̍kpe̍i̍yo̍ chōo̍ cho̍o̍ sɔ̍lāa̍ wo̍.

¹⁵Na̍a̍ ŋ̍ cho̍ ha̍ā mi̍ ŋ̄ wā ni᷅ŋ ka̍a̍so̍ŋnda̍ o̍ sūɛ̍i̍ Mɛ̄lɛ̄kɛ̍i̍ ni᷄ŋ nda̍, na̍a̍ kpo̍u̍, yīya᷄ŋ pi᷅lɔ̍ɔ̄ ho̍ō kpe̍ na̍a̍ ŋ̄ nɔ̄ ni̍ mī ŋ̄ nɔ̄. Kɛ̍ ndu̍yɛ̍, tē ŋ̄wāŋ ā wa̍ yɛ̄ nya̍ tɛ̄ɛ̄ŋ pɛ̍ mā nɔ̄ yīya᷄ŋ che᷅le̍ŋ te̍ŋge̍ŋ o̍ ho̍ō kɔ̄ɔ̄lī pɛ̍, mɛ̄ɛ̍ Mɛ̄lɛ̄ka̍ chō tōsā mā sɔ̄la̍ sīnā pɛ̄ŋgo̍o̍ o̍ sūɛ̍i̍ ka̍lɛ̄i̍ ni᷄ŋ mɛ̄ɛ̍ nda̍ bɛ̄nda̍ le̍ ndi̍ sīnāa̍ yɛ̍.

¹⁶Kɛ̍ ndu̍yɛ̍ o̍ ko̍ŋ ni̍ŋ fa̍ū, nɛ̄i̍ na̍a̍ ŋ̄ lo̍ ho̍ō kɔ̄la̍ŋ lēchōo̍ ha̍a̍a̍ mbo̍ fūūla᷅ŋ a̍ bōōnde̍i̍ he̍ī yo̍, ŋ̄ hīōūnu᷅ŋ lāchī a̍ kɔ̄la̍ŋ o̍ nɛ̄ī ko̍ŋ chōo̍.

¹⁷Chāāŋāā nīa̍a̍, nya̍ kpo̍u̍ lā to᷄l la̍ kɔ̄ɔ̄lī o̍ ka̍a̍ ni᷄ŋ. Ndu̍yɛ̍ wānāa̍ cho̍ kɔ̄la̍ŋ o̍ nɛ̄i̍ na̍a̍ ŋ̄ chɔ᷄m nya̍ wo̍ chōo̍ wa̍, lā mɛ̄ɛ̄nda̍ŋ nda̍ mī lā chu̍a̍ nda̍ māā tāāmāsi̍ le̍ nya̍.

¹⁸O̍ ko̍ŋ kɔ̍ɔ̍lī, sūɛ̍i̍ ya̍ I̍ cho̍ he̍ī nya̍ dīmūllo̍ ve̍ I̍ di̍mu̍l nya̍ ni᷅ŋ ndi̍ pāāndū te̍le̍ŋnda̍ fa̍ŋgā. I̍ cho̍ wɔ̄ nya̍ ndi̍ chɔ̄ɔ̄lū dīmūl pɛ̄ŋgo̍o̍ ho̍ō bɛ̍ɛ̍. Ndu̍yɛ̍ ī chō ya̍ a̍ īmɔ̍nɛ̍ ha̍a̍a̍, cha᷄ŋ māmɛ̍mɔ̍ɔ̍ kpe̍e̍kpe̍i̍ ya̍ cho̍ le̍ ndi̍ ni̍. Ndu̍ yɔ̍nūŋ ni̍ māā sūɛ̍i̍ kpe̍e̍kpe̍i̍ cho̍ a̍ pīɔ̍m Ki̍li̍tī sɔ̍la̍ o̍ yɔ̄m sīŋgāfīlāa̍ chōo̍ wo̍ o̍kɔ̄ɔ̄ ve̍, wānāā ka̍ ka̍ a̍ cho̍ ndi̍ tɛ̄ɛ̄mbūūwo̍ a̍ ka̍ālā nda̍ chō tōsāa̍ la̍ŋ.

¹⁹Le̍ he̍ī, ā chō hūnɔ̄ɔ̄ mɛ̄ɛ̄lū lākɔ̄ o̍ fo̍ndāŋ nyɛ̄ pālāā fɛ̍ɛ̍ŋ fɛ̍ɛ̍ŋndo̍. Wāŋnda̍ ha̍ā nyɛ̄ nda̍ lāndu̍ŋ kɔ̍l su̍e̍e̍ wo̍ ko̍ni̍ cho̍ dēmbēla̍ ndāla̍ŋ ni̍. Sɔ̄ɔ̍ŋ nɔ̍ mī ŋ̄ bīī wānā la̍si̍ɔ̍mbu̍ wo̍ŋ, mu̍ŋ nda̍ kīālū yo̍ŋgāa̍ le̍ tōsāa̍ ni̍. Ndu̍yɛ̍ yīya᷄ŋnda̍ ndāla̍ŋ kpo̍u̍ a̍ sɔ̄ɔ̍ŋ chi̍e̍ēŋ na̍nu᷄ŋ o̍kɔ̄ɔ̄ ko̍ni̍ la̍ cho̍ ni̍.

²⁰Kɛ̍ ndu̍yɛ̍, na̍a̍ na̍a̍ pi̍la̍ chi̍e̍e̍ya̍ ɛ̄chɛ̍nɛ̄ na̍a̍ ŋ̄ chō ni̍. Ndu̍yɛ̍ ŋ̄ chō lēhɔ̄l o̍ nɛ̄ī le̍ pɛ̄ŋgu̍ o̍ pɛ̄ŋgu̍ le̍ chɔ̄nɔ᷄ŋ wāna̍ pi̍ŋi̍ na̍a̍ wo̍ ō chāŋ ni̍ŋ ɛ̄chɛ̍nɛ̄ mbō hīŋ ndo̍, ndu̍ yɔ̍nūŋ ni̍ māā Māsānɔ̄ɔ̍ Chi̍i̍sū Ki̍li̍tī.

²¹Ndu̍yɛ̍, dīāllūŋ na̍a̍ ŋ̄ nɔ̄ mu᷅ŋ ndo̍ŋ, ŋ̍ nɔ̍ mu᷅ŋ kpāāyā le̍ wo̍ŋ, ndu̍yɛ̍, ŋ̍ nɔ̍ mu᷅ŋ mī ŋ̄ vī wo̍ŋ, ō chō hūnɔ̄ɔ̄ mu̍ŋ māŋgālā mī ŋ̄ sīmnu᷄ŋ mɛ̄ɛ̍ dīāllūŋ ndɔ᷄ŋ ndu̍ pi̍la̍ŋ ŋ̄ chō yɛ̍, ko̍ŋ cho̍ ni̍, dīāllūŋ ndɔ̄ŋ kɛ̍ndɛ̄ŋ bɛ̄ndo᷄ŋ. Ō chō he̍ī tōsā sa̍na̍a̍ a̍ kpāāya̍ o̍ to̍sa̍ ho̍ō mi̍ nyɛ̄ o̍ nyɛ̄ fe̍e̍ wa᷅ ndu̍ o̍ bā bɛ̄ŋgu̍ wo̍.