Read Southern Kisi Fīli̍pīāŋnda̍ 4 Bible Online

Fīli̍pīāŋnda̍ 4 - Southern Kisi bible

Fīli̍pīāŋnda̍ 4

¹Le̍la̍ŋ chāa̍ŋāā nīāā wa̍nāā lāāla᷄ŋnda̍, I̍ ka̍a̍la̍ nya̍ ta̍u̍. Ndu̍yɛ̍ I̍ cho̍ ni᷅ŋ a̍ yēēmɛ̍i̍ nyɛ̍i̍ bɔ̄ɔ̍. Nya̍ cho̍ wānāa̍ nɛ̍ŋī ya̍ kɔ̄llo̍ wa̍ ni̍. Ndu̍yɛ̍, I̍ nɔ̍lā kpe̍e̍kpe̍i̍ mī ke̍lū yōŋgā a̍ nya̍ o̍kɔ̄ɔ̄. Chāāŋāā nīāā ka̍a̍lāa̍, o̍ sɔ̄ɔ̍ŋ mu᷅ŋ ni᷄ŋ fa̍ū, nu̍a̍ā nya̍ nɔ̄ mī lā si᷄m nyɛ̄ kɛ̄ndɛ̄ yi̍ o̍ sūɛ̍i̍ Māsānɔ̄ɔ̍ Mɛ̄lɛ̄kɛ̍i̍ ni᷄ŋ ni̍.

²Nūm Yūwo̍dīāā nya̍ Sīŋti̍kē, I̍ nyɔ̍ɔ̍lu̍ nya̍ a̍ yāndi̍i̍ lā mīīŋgu̍ o̍ dīōm pīlɛ̍ ni᷄ŋ māā wānāā lāāla᷄ŋ o̍ Māsānɔ̄ɔ̍ Mɛ̄lɛ̄ka̍ ni̍ŋ.

³Ndu̍yɛ̍, nūm chāa̍ŋ ni̍ na̍a̍ ŋ̄ tōsa̍ ho̍ō wa̍llo̍ ō kālā ka̍lā lātūlu̍ wo̍, I̍ hɛ̍na̍ŋ mā to̍sa̍ a̍ sa̍bū mī wāŋ lāāndūa̍a̍ ha̍ā mīīŋgu̍ dīōm pīlɛ̍. Kāni̍ fu̍u̍le̍, wāŋ lāāndūa̍a̍ ha̍ā ā tōsa̍ wa̍llo̍ a̍ ya̍ la̍tu̍lu̍ o̍ ka̍lā ka̍lā le̍ wāŋnda̍ Yōōŋgū Kɛ̄ndɛ̍ Mɛ̄lɛ̄ka̍a̍ dīmūllo̍, lātūlu̍ na̍a̍ Ki̍lɛ̍mɛ̄ŋ wa̍ā a̍ chāāŋāā nīa̍a̍ ā pīli̍a̍ā, ā ya̍ I̍ wa̍ wa̍llo̍ a̍ nda̍ la̍tu̍lu̍ wa̍. Ndu̍yɛ̍, dīōlā ndāla̍ŋ lā chō lā pōōnyīāā o̍ yāu̍ wānāa̍ nɔ̍ yōōmū kpe̍e̍kpe̍i̍yo̍ wa̍ ni᷄ŋ.

⁴Mbɔ̄ Māsānɔ̄ɔ̍ Mɛ̄lɛ̄ka̍ tōsa̍ mī lā wa̍ a̍ kɔ̄l kɛ̄ndɛ̄ pɛ̄ŋgu̍ o̍ pɛ̄ŋgu̍, le̍ mɛ̄ɛ̍ nya̍ chō dīōm pīlɛ̍ a̍ ndu̍ yɛ̍ fɔ̍. I̍ chɔ̍ɔ̍lū wɔ̍ ndi̍ dīmī. Mbɔ̄ Mɛ̄lɛ̄ka̍ tōsa̍ mī lā wa̍ a̍ kɔ̄l kɛ̄ndɛ̄ fɔ̍.

⁵Lā nɔ̍ kɔ᷅ltā bīūwa᷄ŋnda̍ŋ a̍ wānā o̍ wānā. Māsānɔ̄ɔ̍ Mɛ̄lɛ̄ka̍ chō hūnɔ̄ɔ̄ su̍ŋ su̍ŋ.

⁶Lā nɔ᷅ būūla᷄ŋ o̍ īsɔ̄ɔ̍ o̍ īsɔ̄ɔ̍ ni̍ŋ te̍. Ndu̍yɛ̍, īsɔ̄ɔ̍ o̍ īsɔ̄ɔ̍ nya̍ wa̍ Mɛ̄lɛ̄ka̍ pīɛ̄īyo̍ le̍ ndi̍ pɛ̍, lā chɔ᷄m ndu̍ nyɛ̄ nya̍ hāu̍ bā le̍ ndu̍ wo̍. Ndu̍yɛ̍, pɛ̄ŋgu̍ o̍ pɛ̄ŋgu̍ nya̍ wa̍ ndu̍ nyūnāa̍ le̍ nyɛ̄ o̍ nyɛ̄ pɛ̍, lā me᷄l ndu̍ ba̍li̍ka̍a̍.

⁷O̍ ko̍ŋ kɔ̍ɔ̍lī, kɔ̄l nyūlū Mɛ̄lɛ̄ka̍ yɔ̄ŋgū wo̍ ō wāna̍ chi̍e̍e̍ nɔ̍lā mbō sīna̍ bɛ̍ɛ̍ pɛ̍ŋgu̍ le̍ wo̍ nɔ̄lā mbō mānda̍ kɔ̄ltā nyāla̍ŋ, a̍ yīya᷄ŋnda̍ nya̍la̍ŋ, kāni̍ fu̍u̍le̍, le̍ mɛ̄ɛ̍ nya̍ chō o̍ dīōm pīlɔ̍ɔ̍ ni᷄ŋ a̍ Chi̍i̍sū Ki̍li̍tī yɛ̍.

⁸Chāāŋāā nīa̍a̍, nyɛ̄ ya̍ hɛ̍na̍ŋ mī di̍mu̍l nya̍ o̍ mɛ̄ɛ̄lu̍la̍ŋ ndo̍ ndu̍ cho̍ ni̍, nyɛ̄ o̍ nyɛ̍ cho̍ sūɛ̍i̍ sa̍ndāā, nyɛ̄ o̍ nyɛ̍ cho̍ sūɛ̍i̍ lēbɛ̄ɛ̄, nyɛ̄ o̍ nyɛ̍ cho̍ sūɛ̍i̍ sa̍kpō, nyɛ̄ o̍ nyɛ̍ cho̍ sūɛ̍i̍ di̍a̍ndāā, nyɛ̄ o̍ nyɛ̍ cho̍ sūɛ̍i̍ ka̍a̍lāā, nyɛ̄ o̍ nyɛ̍ cho̍ sūɛ̍i̍ bɛ̍nda̍, nyɛ̄ o̍ nyɛ̍ cho̍ sūɛ̍i̍ īkɛ̄ndɛ̄, nyɛ̄ o̍ nyɛ̍ cho̍ sūɛ̍i̍ cha̍ndāā, lā nɔ̍ mu̍ŋ o̍ kɔ̄ltā nyāla̍ŋ ni᷄ŋ.

⁹Īsɔ̄ɔ̍ o̍ īsɔ̄ɔ̍ ya̍ pɛ̍ɛ̍ku̍ nya̍, sɔ̄ɔ̍ŋ nya̍ tūēī mi̍ di̍mūl nya̍ wo̍ŋ ni̍, a̍ nyɛ̄ o̍ nyɛ̄ nya̍ chē ya̍ o̍ to̍sāa̍, lā wa̍ mu̍ŋ tōsāa̍. Tē lā tōsa̍ he̍ī pɛ̍, Mɛ̄lɛ̄ka̍ o̍ ke᷅ na̍a̍ kɔ̄l nyūlōo̍ wo̍ nɔ̄lā mbō wa̍ lātūlu̍ a̍ nya̍.

¹⁰I̍ na̍ŋ kɔ̄l ta̍u̍, ndu̍yɛ̍, mi̍ yi᷅l Māsānɔ̄ɔ̍ Mɛ̄lɛ̄ka̍ ba̍li̍ka̍ le̍ mɛ̄ɛ̍ nya̍ mīīŋgu̍ vɛ̄lɛ̄ ya̍ chɔ̄m māā lā lāndu̍ŋ kɔ̍l le̍ ya̍ yɛ̍, mi̍ chē bɛ̍ɛ̍ mi̍ te̍le̍ŋndo̍ bāndū ni̍. I̍ si̍nā māā lā lāndu̍ŋ kɔ̍l le̍ ya̍ te̍le̍ŋ o̍ te̍le̍ŋ. Fo̍ndāa̍ ko̍ni̍ nya̍ a̍a̍ sɔ̍la̍ wɔ̍ le̍ ni̍.

¹¹Ō cho̍ ma̍chu̍a̍ā vɛ̍lɛ̄ mī pɛ̄ŋndē wa̍ ya̍ le̍ nyɛ̄ o̍ nyɛ̄, mī wa̍ ŋɔ̄ɔ̄chīa̍ŋ ko̍ŋ te̍. Kāni̍ fo̍ndōle̍, I̍ pɛ̍ɛ̍ku̍ ni᷅ŋ le̍ wāa̍ a̍ kɔ̄l hīnīāā te̍le̍ŋ o̍ te̍le̍ŋ, I̍ nɔ̍ ta̍u̍, I̍ nɔ᷅ ta̍u̍ le̍.

¹²I̍ si̍nā nyɛ̍ cho̍ pɛ̄ŋnde̍ŋ ndo̍. Tē wāŋndo̍ nɔ̄ vɛ̄lɛ̄ ta̍u̍ mbō hīōū mɛ̄ɛ̍ o̍ ha̍u̍ bā yɛ̍ pɛ̍, I̍ si̍nā. I̍ wa̍ o̍ pu̍māā, kɛ̄lɛ̄ŋgāā I̍ wa̍ a̍ māyī, I̍ nɔ̍ ta̍u̍, kɛ̄lɛ̄ŋgāā I̍ wa̍ o̍ lēpɛ̄ŋ ni᷄ŋ, I̍ pɛ̍ɛ̍ku̍ ni᷅ŋ le̍ wāa̍ a̍ kɔ̄l hīnīāā bā o̍ bā ya̍ I̍ wa̍, a̍ te̍le̍ŋ o̍ te̍le̍ŋ.

¹³Ki̍li̍tī ke̍ ya̍ kpāāyāa̍ le̍ mī nɔ̍lā mī kēēkū o̍ īsɔ̄ɔ̍ o̍ īsɔ̄ɔ̍ ni̍ŋ.

¹⁴Kɛ̍ ndu̍yɛ̍, sūɛ̍i̍ tōnyɛ̄ī bɛ̄ndū nya̍ tōsa̍l la̍ ni̍, mi̍ lā mālā ya̍ o̍ te̍le̍ŋ nyɛ̄ pālāa̍ wa̍ ya̍ chōo̍ wo̍.

¹⁵Nya̍ wāŋnda̍ Fi̍li̍pāī, lā sīnā wa̍la̍ŋ māā sɔ̄lā tāse̍ nya̍ sɔ̄la̍ Yōōŋgū Kɛ̄ndɛ̍ Mɛ̄lɛ̄ka̍a̍, ndu̍yɛ̍, mi̍ wa᷅ chɔ̄nɔ᷄ŋndo̍ lɛ̄ŋndē Māsīdo̍o̍nīāāle̍ŋ ndo̍, nya̍ su̍e̍e̍ wa̍ ku̍ndā wānāā lāāla᷄ŋnda̍ o̍ ma̍la̍ ya̍ a̍ nyɛ̄ sɔ̄lāa̍ bōōndi̍i̍ ke̍ŋ ndo̍ ni̍. Ku̍ndā wānāā lāāla᷄ŋa̍a̍ che᷅le̍ŋ bɛ̍ɛ̍ ma̍la̍ ya̍ le̍.

¹⁶Bōōndi̍i̍ ya̍ I̍ wa̍ Tɛ̄sālōna̍i̍kā chi̍e̍e̍ ve̍ bɛ̍ɛ̍ mi̍ lā yɔ̄ŋ ya̍ nyɛ̄ sɔ̄lāa̍, ō hīōū bɛ̍ɛ̍ le̍ pi᷅lɛ̍, a̍ bōōndu̍ŋ ya̍ wa̍ o̍ bā hāvɛ̍i̍yo̍ ni᷄ŋ ndo̍ŋ.

¹⁷Ō cho̍ ma̍chu̍a̍ā nyɔ̄ɔ̍ŋ ko̍ni̍ le̍ ya̍ ye̍e̍ma̍ nya̍ o̍ bā le̍. I̍ ye̍e̍ma̍ māyēēmāā, māā sɔ̄ɔ̍ŋ kɛ̍ndɛ̄ŋ nya̍ tōsa̍ ni᷅ŋ ndo̍ŋ mī lā chɔ̄ɔ̄lu̍ ŋ̄ chēle̍ŋ tōsā, o̍ ko̍ŋ mī ŋ̄ wa̍ ŋ̄ pōōnyīāā a̍ dīōlā nyāla̍ŋ.

¹⁸Le̍la̍ŋ, nyɛ̄ o̍ nyɛ̄ ya̍ I̍ sɔ̍la̍ nya̍ o̍ bā, lā chē yāu̍wo̍ le̍ ndu̍, le̍ chɔ̄mndo̍ māā I̍ sɔ̍la̍. Nyɛ̄ o̍ nyɛ̄ nya̍ yɔ̄ŋgu̍ ō chō lētūu̍. Ō hīōū bɛ̍ɛ̍ mɛ̄ɛ̍ ya̍ I̍ ha̍u̍ bā yɛ̍. Nyɛ̄ o̍ nyɛ̄ ya̍ I̍ ha̍u̍ bā le̍ ndu̍ I̍ chi̍i̍ sɔ̄lā. Kāni̍, Ɛ̄pāfūlōda̍i̍tɔ̄ɔ̄ chu̍u̍ ya̍ nyɛ̄m nya̍ yɔ᷄ŋ ya̍ wo̍ŋ. Nyɛ̄ o̍ nyɛ̄ nya̍ ke̍ ya̍, ŋ̄ chō māchūāā māā sa̍lā chūŋ kɛ̄ndɔ̄ɔ̍ o̍ Mɛ̄lɛ̄ka̍ lo̍, sa̍lā Mɛ̄lɛ̄ka̍ bīīlu̍ ndu̍yɛ̍ mbo̍ hi̍ni̍ kɔ̄l a̍ ndu̍ wo̍.

¹⁹Nyɛ̄ o̍ nyɛ̄ nya̍ I̍ hāu̍ bā le̍ ndu̍, Mɛ̄lɛ̄ka̍ ya̍ I̍ cho̍ pīɛ̄īyo̍ wo̍ chō nya̍ kē. Ō chō bā wōū o̍ sūl ndɔ̄ bɛ̍ndōo̍ ni᷄ŋ mbō ke̍ nya̍, sa̍na̍a̍ o̍ Chi̍i̍sū Ki̍li̍tī ni̍ŋ.

²⁰Mbɔ̄ wāŋnda̍ ā ke̍ Mɛ̍lɛ̄ka̍ nāa̍ o̍ cho̍ Fi̍nyā nāa̍ wo̍ sāŋgālāa̍ le̍ fɛ̍ɛ̍ŋ a̍ fɛ̍ɛ̍ŋ. Āmi̍i̍nā.

²¹I̍ yi̍l wānāa̍ Mɛ̄lɛ̄ka̍a̍ kpo̍u̍ a̍ dɔ̍ū tīīnda᷄ŋndo̍ o̍ Chi̍i̍sū Ki̍li̍tī ni̍ŋ nda̍. Chāāŋāā nāā wa̍nāā lāāla᷄ŋnda̍ na̍nu᷄ŋ a̍ yi̍l nya̍ lāpi̍.

²²Wānāa̍ Mɛ̄lɛ̄ka̍a̍ kpo̍u̍ na̍nu᷄ŋ ā yi᷄l nya̍, tāāma̍ a̍ cho̍ wa̍llo̍ o̍ chīɛ̄ī māsā bɛ̍ndōo̍ ni᷄ŋ nda̍, ndu̍ yɔ̍nūŋ ni̍ māā māsā kpe̍de̍ bo᷅lle̍ŋ o̍ lɛ̄ŋīī Lu̍o̍ma᷅ŋnde̍ ni᷄ŋ.

²³Mbɔ̄ nya̍ kpo̍u̍ Māsānɔ̄ɔ̍ Chi̍i̍sū Ki̍li̍tī ō yīya̍ŋ nya̍ chōo̍ fɔ̍.