Read Southern Kisi Kōlo̍sīāŋnda̍ 1 Bible Online

Kōlo̍sīāŋnda̍ 1 - Southern Kisi bible

Kōlo̍sīāŋnda̍ 1

¹Yāu̍ Pɔ̍ɔ̄, yā cho̍ ho̍ō wānā Chi̍i̍sū Ki̍li̍tī ve᷅m māā hɔ̄ltē ndɔ̄ o̍ hɛ̄na᷄ŋ Mɛ̄lɛ̄ka̍a̍ ni᷄ŋ ndo̍, yā cho̍ yāu̍wo̍ ho̍ō pōōnyīāā ni̍, nāā chāāŋ nāā wānā lāāla᷄ŋndo̍ Ti̍mo̍tī.

²Ŋ̄ chō ndu̍ pōōnyīāā nāā nyā wānāā Mɛ̄lɛ̄ka̍a̍ chūā, nyā cho̍ Kōlo̍sīā chi̍e̍e̍ wā. Ko̍ŋ cho̍ ni̍, nyā chāāŋāā nāā wānāā lāāla᷄ŋndā, nyā cho̍ ha̍ā īsīsi̍ yi̍ o̍ tīīnda᷄ŋ nyā nɔ̄ o̍ Ki̍li̍tī ni̍ŋ ndo̍ wā. Yā Pɔ̍ɔ̄, I̍ cho̍ pīɛ̄īle̍ŋ māā Mɛ̄lɛ̄ka̍ Fi̍nyā nāā ō yīyāŋ nyā chōo̍ ndu̍yɛ̍, mbō ō ke̍ nyā kɔ̄l nyūlōo̍ fɔ̍.

³Pɛ̄ŋgu̍ o̍ pɛ̄ŋgu̍, tē ŋ̄ wā Mɛ̄lɛ̄ka̍ pīɛ̄īyo̍ le̍ nyā wānāā lāāla᷄ŋndā Kōlo̍sīā pɛ̍, ba̍li̍kāā ko̍ni̍ nāā ŋ̄ yīl Mɛ̍lɛ̄kā ni̍, Māsānɔ̍ nāā Chi̍i̍sū Ki̍li̍tī, Fi̍nyā ndɔ̄.

⁴Kāni̍ fu̍u̍le̍, ŋ̄ tūēī mɛ̄ɛ̍ kpɛ̍ nyā dɔ̄ū tīīnda᷄ŋ nyāā o̍ Chi̍i̍sū Ki̍li̍tī ni̍ŋ yɛ̍, ndu̍yɛ̍ vɛ̍lɛ̄, ā mɛ̄ɛ̍ nyā kāālā wānāā Mɛ̄lɛ̄ka̍a̍ kpo̍u̍ yɛ̍.

⁵Tīīnda᷄ŋ nyā nɔ̄ ko̍ŋ ndo̍ ā kāālā nyā nɔ̄ wo̍, sɔ̄ɔ̍ŋ mu̍ŋ ŋ̄ yɔ̄nu̍ŋ le̍ mɛ̄ɛ̍ nyā chō lēhɔ̄l o̍ nɛ̄ī le̍ nyɛ̄ Mɛ̄lɛ̄ka̍ kɛ̄su̍l nyā o̍ fo̍ndāŋ ndɔ̄ɔ̍ wo̍ yɛ̍. Lā tūēī ni᷅ŋ ā ndu̍ o̍kɔ̄ɔ̄ o̍ Mɛ̄lɛ̄ka̍ dīōm ndɔ̍ tōnyāā ni᷄ŋ, ndu̍ yɔ̍nūŋ ni̍ māā Yōōŋgū Kɛ̄ndɛ̍ Mɛ̄lɛ̄ka̍ wāŋndā dīmu̍l nyā wo̍.

⁶Yōōŋgū Kɛ̄ndɛ̍ Mɛ̄lɛ̄ka̍a̍ ho̍ō chō hūnɔ̄ɔ̍ ā tɔ̄nɔ̄ɔ̍ o̍ yōōmūlā wāŋndā chīe̍e̍ya̍ ni᷄ŋ. Ndu̍yɛ̍, ō chō hīōūwɔ̄ɔ̍ lāchī ā pɛ̄ŋgɛ̄la᷄ŋndo̍ bā o̍ bā fe̍e̍ o̍ chi̍e̍ēŋndo̍ chōo̍. Kāni̍ fo̍ndōle̍, chɔ̍ŋ bɛ̍ɛ̍ ā bōōndi̍i̍ nyā tūēī yōōŋgū kɛ̄ndɔ̄ɔ̍ ho̍ō, ndu̍yɛ̍ mi̍ lā sīnā kɛ̄ndɛ̄i̍ Mɛ̄lɛ̄kɛ̍i̍ pɛ̄ŋgu̍ ā tōnyā o̍ tōnyā cho̍ lēni᷄ŋ ndo̍, le̍nde̍ ko̍ni̍ yōōŋgōo̍ ho̍ō wā hīōūwɔ̄ɔ̍ lāchī ā pɛ̄ŋgɛ̄la᷄ŋndo̍ nyā tɛ̄ɛ̄ŋ ni̍.

⁷Chāāŋ nāā kāālāā, Ɛ̄pāfu̍lɔ̄ɔ̄ ō nāā ŋ̄ chō wa̍llo̍ le̍ Ki̍li̍tī nāā ndāā wo̍, ndu̍ pɛ̍ɛ̍ku̍ nyā ā kɛ̄ndɛ̄i̍ Mɛ̄lɛ̄kɛ̍i̍ o̍kɔ̄ɔ̄ ni̍. Wānā wa̍llo̍ o̍ cho̍ Ki̍li̍ti̍ sāāŋgīāllo̍ sākpō sɔ̍ŋgɔ̍ nāā wo̍ o̍ cho̍ ni̍.

⁸O̍ ko̍ŋ kɔ̍ɔ̍lī, ndu̍ di̍mu̍l nāā ā mɛ̄ɛ̍ Nyi̍nā Mɛ̄lɛ̄ka̍a̍ tōsā mi̍ lā nɔ̄ kāālāā o̍ kɔ̄ltā nyālāŋ ni᷄ŋ yɛ̍ ni̍.

⁹Le̍ sɔ̄ɔ̍ŋ yɔ̍nu̍ŋ mu᷅ŋ ndo̍ŋ, chɔ̍ŋ ā pāāle̍ tāse̍le̍ nāā ŋ̄ tūēī ā nyā o̍kɔ̄ɔ̄ le̍ŋ mbo̍ fūūla᷅ŋ ā te̍le̍ŋndo̍ ho̍ō, ŋ̄ chō Mɛ̄lɛ̄ka̍ pīɛ̄īyo̍ pɛ̄ŋgu̍ o̍ pɛ̄ŋgu̍ le̍ nyā. Ŋ̄ chō Mɛ̄lɛ̄ka̍ pīɛ̄īyo̍ māā ō tōsā mī lā sīnā nyɛ̄ o̍ nyɛ̄ o̍ ye̍e̍mā nyā le̍ mī lā tōsā. O̍ ko̍ŋ kɔ̍ɔ̍lī, mī lā sɔ̄lā kɔ̄l kālo̍o̍ ā sīnā pɛ̄ŋgo̍o̍, ō nyi̍nā Mɛ̄lɛ̄ka̍a̍ kē wa᷅ŋndā wo̍.

¹⁰Ŋ̄ chō pīɛ̄īle̍ŋ māā lā nɔ̍ ka̍āla̍ŋ māā wānāā Māsānɔ̄ɔ̍ Mɛ̄lɛ̄ka̍. Ndu̍yɛ̍, lā nɔ̄lā mī lā tōsā nyɛ̍ nɛ̍ŋī ndu̍ kɔ̄l lo̍ pɛ̄ŋgu̍ o̍ pɛ̄ŋgu̍. O̍ ko̍ŋ, yōōmūlā nyālāŋ lā nɔ̄lā mī lā hīŋ ā tɔ̄nɔ̄ɔ̍ sānāā ā wāli̍ o̍ wāli̍ kɛ̍ndɛ̄ nyā chō tōsāā, ndu̍yɛ̍ mī lā chɔ̄ɔ̄lu̍ hīōūwɔ̄ɔ̄ lāchī ā dɛ̍nɔ̍ɔ̍ sīnāā ā Mɛ̄lɛ̄ka̍ o̍kɔ̄ɔ̄.

¹¹Ŋ̄ chō pīɛ̄īle̍ŋ māā Mɛ̄lɛ̄ka̍ tōsā ā kpāāyā ndɔ̄ bɛ̍ndōo̍ mī lā nɔ̄ kpāāyāā tāu̍ o̍ nyi̍nāā nyāā ni᷄ŋ. Ko̍ŋ to̍sā ā yɔ᷄ŋ bɛ̍ɛ̍ mī dɛ̍nɛ̍la̍ pa̍lāāla̍ŋ lā kōmāl nyā lā nɔ̄lā mī lā si᷄m nyɛ̄ kɛ̄ndɛ̄ yi̍, mī lā hīōū lāchī ā bīūwɔ᷄ŋndo̍.

¹²Ndu̍yɛ̍, mī lā lo̍ o̍ ko̍ŋ mī lā me᷄l Mɛ̄lɛ̄ka̍ Fi̍nyā nāā bāli̍ka̍ ā kɔ̄l kɛ̄ndɛ̄. Ndu̍ Mɛ̍lɛ̄kā to̍sā ni̍ mi̍ lā wā ā bɛ̄ndāā le̍ nyā bɛ̍ɛ̍ mī lā sɔ̄lā nyɛ̄ o̍ chu̍ā būŋgɛ̄i̍ le̍ wānāā ndūāā kīo̍o̍ o̍ māsāle̍ ndɔ̄le̍ŋ ni᷄ŋ, nāā nyɛ̄ wāwo̍ŋndo̍ ō chō wā ni̍.

¹³Ndu̍ Mɛ̍lɛ̄kā ō bīī mbo̍ sōlī nāā po̍ o̍ fo̍ndāŋ mānyūmndo̍, nāa̍ na̍a̍ ŋ̄ wā kpāāyā mānyūmndo̍ o̍ bā bɛ̄ŋgu̍ wā. Mɛ̄ɛ̍ o̍ so̍li̍ nāā lo̍ŋ mbo̍ hūŋ ā nāā o̍ māsāle̍ Po̍ ndɔ̄ kāālāā bɛ̄ŋgu̍.

¹⁴Ndu̍yɛ̍, o̍ sābū Po̍ ndɔ̄ɔ̍ ho̍ō ni᷄ŋ sānāā nāā ŋ̄ sɔ̄lā bāŋa᷄ŋndo̍ ni̍, ko̍ŋ cho̍ ni̍, mi̍ Mɛ̄lɛ̄ka̍ māl nāā le̍ yɔ̄ŋndā wɔ̄ɔ̍ŋndā nāā ŋ̄ tōsā lāŋ.

¹⁵Mɛ̄lɛ̄ka̍ ō wānā chi̍e̍e̍ chi᷅ ho̍ō ā lēhɔ̄l te̍ wo̍ Po̍ ndɔ̄ɔ̍ ho̍ō, ndu̍ cho̍ vēla᷅ŋ ndɔ̄ɔ̍ ni̍. Po̍ ndɔ̄ɔ̍ ho̍ō ndu̍ hi̍o̍ū ā nyɛ̄ o̍ nyɛ̄ fe̍e̍ Mɛ̄lɛ̄ka̍ tōōsi̍āā.

¹⁶Kāni̍ fu̍u̍le̍ ndu̍ Mɛ̄lɛ̄ka̍ ō tōsā ā sābū ni̍ mbo̍ tōōsīāā nyɛ̄ o̍ nyɛ̄ fe̍e̍, nyɛ̄ o̍ nyɛ̍ cho̍ chōo̍ cho̍o̍ ā o̍ chi̍e̍ēŋndo̍ chōo̍, kɔ̍ bi̍ī ā nyɛ̄ o̍ nyɛ̄ wānā chi̍e̍e̍ cha᷅ ā lēhɔ̄l, ā ŋ̄ wānā chi̍e̍e̍ chi᷅ bɛ̍ɛ̍ le̍ wo̍ŋ, kɔ̍ bi̍ī ā nyi̍nāā yɛ̍ yi̍a̍a̍ cho̍ chōo̍ cho̍o̍ mā nɔ̄ kpāāyāā wā, ā nyi̍nāā nɔ̍ tɔ̍ɔ̍ wā, ā nyi̍nāā o̍ fo̍ndāŋndā yɛ̍ yɛ̍la̍ŋ o̍ ha̍la̍a̍ ni᷄ŋ, lā cho̍ o̍ bā bɛ̄ŋgu̍ wā. Ndu̍ Mɛ̄lɛ̄ka̍ tōsā ā sābū ni̍ mbo̍ tōōsīāā nyɛ̄ o̍ nyɛ̄ fe̍e̍, ndu̍yɛ̍ le̍ ndu̍ nyɛ̄ o̍ nyɛ̄ chō ni̍.

¹⁷Lɔ̍ɔ̍ pā bɛ̍ɛ̍ mī Mɛ̄lɛ̄ka̍ tōōsi̍āā nyɛ̄m mu᷅ŋ kpo̍u̍, Ki̍li̍tī ndu̍ wā ni᷅ŋ. Ndu̍yɛ̍, ndu̍ to̍sā ni̍ mi̍ nyɔ̄ɔ̍ŋ kpo̍u̍ ŋ̍ wa᷅ ŋ̄ chīīŋīāā nāā pi᷅lɛ̍.

¹⁸Ndu̍yɛ̍, ku̍ndā wānāā lāāla᷄ŋndā cho̍ dīāllūŋ ndɔ᷄ŋ ni̍. Ndu̍ pi̍lā cho̍ yɛ̄ bōlle̍ŋ le̍ dīāllo̍ŋ mu᷅ŋ ni̍. Ndu̍yɛ̍, yōōmū dīāllo̍ŋ mu᷅ŋ ŋ̄ nɔ̄ wo̍ ndu̍ yɔ̍ŋgū yo̍o̍mū kōŋ ni̍. Ō fūlā o̍ ko̍ŋ kɔ̍ɔ̍lī, ndu̍ cho̍ wānā tāso̍o̍ le̍ wūo̍o̍ mbo̍ mīīŋgū vɛ̄lɛ̄ yōōmū ni̍. Ndu̍yɛ̍, sūɛ̍i̍ he̍ī yɔ̄nu̍ŋ le̍ mī ndu̍ Ki̍li̍tī mbō wā nyɛ̄ o̍ nyɛ̄ fe̍e̍ bo᷅lle̍ŋ.

¹⁹Kāni̍ fo̍ndōle̍, Mɛ̄lɛ̄ka̍ pi̍lā ndu̍ kɛ̍ɛ̍si̍a̍a̍ ni̍ le̍ mī Po̍ ndɔ̄ɔ̍ bɛ̍ɛ̍ mī Mɛ̄lɛ̄ka̍yɛ̍ī ndūɛ̍i̍ kpo̍u̍ mī ī wā o̍ ndu̍ ni̍ŋ.

²⁰Ndu̍yɛ̍, Mɛ̄lɛ̄ka̍ pi̍lā ndu̍ kɛ̍ɛ̍si̍a̍a̍ ni̍ māā o̍ sābu̍ Po̍ ndɔ̄ɔ̍ ni᷄ŋ mbō tōsā mī nyɛ̄ o̍ nyɛ̄ fe̍e̍ mi̍i̍ŋgu̍ dīōm pīlɛ̍ ā ndu̍, nyɛ᷄m cho̍ o̍ chi̍e̍ēŋndo̍ chōo̍ wo̍ŋ ni̍, ā nyɛ᷄m cho̍ ɛ̄chɛ̍nɛ̄ wo̍ŋ. Pīɔ̍m Po̍ ndɔ̄ɔ̍ vī o̍ yɔ̄m sīŋgāfīlāā chōo̍ wo̍, ndu̍ to̍sā ā sābū ni̍ mi̍ Mɛ̄lɛ̄ka̍ mīŋgī vɛ̄lɛ̄ kɔ̄l nyūlōo̍ ŋ̄wāŋndā chīe̍e̍ tɛ̍ɛ̄ŋ ā Mɛ̄lɛ̄ka̍.

²¹O̍ tāse̍lā ndɔ̄ɔ̍ nyā wāŋndā Kōlo̍sīā lā wā māwāā la̍nda̍ŋ ā Mɛ̄lɛ̄ka̍. Pɛ̄ŋgu̍ ko̍ŋ wɔ̄wa᷅ŋndo̍ wā nyā tɛ̄ɛ̄ŋ nyā Mɛ̄lɛ̄ka̍ wāā, kāni̍ fu̍u̍le̍, le̍ sɔ̄ɔ̍ŋ wɔ̍ɔ̍ŋ nyā wā tōsāā wo̍ŋ, ā sɔ̄ɔ̍ŋ wɔ̍ɔ̍ŋ nyā āā yi̍yāŋ o̍ kɔ̄l ni᷄ŋ ndo̍ŋ.

²²Kɛ̍ ndu̍yɛ̍, pīɔ̍m Ki̍li̍tī vi᷅ o̍ īwāna̍ chi̍e̍e̍ya̍ wo̍, ndu̍ to̍sā ni̍ mi̍ Mɛ̄lɛ̄ka̍ mīŋgī nyā dīōm pīlɛ̍ ā ndu̍ pi̍lā. Mɛ̄lɛ̄ka̍ tōsā he̍ī, le̍ mbō hu᷄ŋ si̍mī nyā ndu̍ pi̍lā o̍ hɔ̄l māā wānāā cho̍ ā yɔ̄ŋga᷄ŋ le̍ ndu̍, mī lā wānu̍ŋ ā di̍a̍ndāā ndu̍ o̍ hɔ̄l nyɛ̄ kɛ̄ndɛ̄ wu̍le̍ŋ, nyɛ̄ o̍ nyɛ̄ wɔ̄ɔ̍ŋ ve᷅ o̍ nyā ni̍ŋ te̍.

²³Mɛ̄lɛ̄ka̍ chō he̍ī tōsā, tē ō wā pɛ̍ mī lā hīōū lāchī ā tīīnda᷄ŋ nyāā dɔ̄wɔ̄ɔ̍ o̍ ndu̍ ni̍ŋ, ndu̍yɛ̍, mī lā si᷄m nyɛ̄ kɛ̄ndɛ̄ yi̍, o̍ ko̍ŋ kɔ̍ɔ̍lī, mī lā fēŋa̍ dɔ̍ɔ̍ hɔ̄lte̍ŋ o̍ nɛ̄ī le̍ nyɛ̄ Yōōŋgū Kɛ̄ndɛ̍ Mɛ̄lɛ̄ka̍ nyā tūēī yo̍ dīmi̍ ā ndu̍ o̍kɔ̄ɔ̄ wo̍ le̍. Ndu̍ yɔ̍nūŋ ni̍ māā, yōōŋgū kɛ̄ndɔ̄ɔ̍ o̍ di̍mi̍ŋ ho̍ō o̍ ŋ̄wāŋndā chīe̍e̍ lo̍ kpo̍u̍ o̍ chi̍e̍ēŋndo̍ ni᷄ŋ ndo̍, ō yā Pɔ̍ɔ̄ si̍mnu᷄ŋ ho̍ō bu̍ɛ̍ī le̍ ndu̍ dīmīo̍o̍ wo̍.

²⁴Yā Pɔ̍ɔ̄ I̍ cho̍ mɔ̍nɛ̍i̍ bīyɔ̄ɔ̍ le̍ nyā. Kɛ̍ ndu̍yɛ̍, mɔ̍nɛ̍i̍ yā cho̍ he̍ī bīyɔ̄ɔ̍ ve̍, I̍ cho̍ ā kɔ̄l kɛ̄ndɛ̄ le̍ ndi̍. Mɔ̍nɛ̍i̍ yā cho̍ he̍ī bīyɔ̄ɔ̍ ve̍ mālāā yā cho̍ ni̍, le̍ hāli̍ kpe̍ŋ mɔ̍nɛ̍i̍ ndi̍ i̍i̍ lo̍ le̍ mī Ki̍li̍tī ndu̍ o̍o̍ bi̍ī le̍ dīāllūŋ ndɔ᷄ŋ nde̍, mu̍ŋ yɔ̍nūŋ ni̍ māā ku̍ndā wānāā lāāla᷄ŋndā, mī I̍ si̍o̍u̍ mɔ̍nɛ̍i̍ ke̍ŋ bīyɔ̄ɔ̄.

²⁵Ndu̍yɛ̍ o̍ ko̍ŋ kɔ̍ɔ̍lī, Mɛ̄lɛ̄ka̍ sīīŋgu̍u̍ yā bu̍ɛ̍īyo̍ le̍ ku̍ndā wānāā lāāla᷄ŋndā. Ndu̍ Mɛ̍lɛ̄kā ndu̍ ke̍ yā wa̍llo̍ ho̍ō ni̍, le̍ mī I̍ to̍sā ndu̍ le̍ dɛ̍nɛ̍ nyā kɛ̍ndɔ̄ɔ̍. Wāli̍ ko̍ŋ yɔ̍nūŋ ni̍ māā mī di̍mu̍l nyā sūɛ̍i̍ Mɛ̄lɛ̄kɛ̍i̍ mɛ̄ɛ̍ i̍ cho̍ fa̍ū.

²⁶Ndi̍ yɔ̍nūŋ ni̍ māā sūɛ̍i̍ Mɛ̄lɛ̄ka̍ ndu̍ o̍o̍ māndā he̍ī mbo̍ vīŋ ŋ̄wāŋndā chīe̍e̍ ndi̍ kāni̍ māsi̍ndɛ̄ ve̍. Kɛ̍ ndu̍yɛ̍, bōōnde̍i̍ he̍ī ni᷅ŋ ō bīī mbo̍ chɔ̄ɔ̄mūū ndi̍ nāā wānāā ndūāā chūā.

²⁷Ī wā o̍ kɛ̄ɛ̄sīāā Mɛ̄lɛ̄ka̍a̍ ni᷄ŋ, le̍ mbō hu᷄ŋ chɔ᷅m wānāā ndūāā sūɛ̍i̍ wā he̍ī ī vīāŋna᷄ŋ nde̍. Ndu̍yɛ̍, ī wā kɛ̄ɛ̄sīāā ndɔ̄ le̍ mbō chɔ᷄m wāŋndā ka̍āla̍ŋ kpo̍u̍, mɛ̄ɛ̍ sūɛ̍i̍ wā he̍ī ī vīāŋna᷄ŋ nde̍ ī chō sūɛ̍i̍ kɛ̍ndɛ̄ kɛ̍ndɛ̄ī bɛ̄ndū yɛ̍. Sūɛ̍i̍ ke̍ŋ ndi̍ yɔ̍nūŋ ni̍ māā Ki̍li̍tī cho̍ o̍ yōōmūlā nyālāŋ ni᷄ŋ. Ndu̍yɛ̍, ndu̍ to̍sā ni̍ mī lā wā hɔ̄lte̍ŋ o̍ nɛ̄ī le̍ nyɛ̄m kɔ̄ndɔ̄fi̍li̍ŋ bɛ̄ndūŋ nyā chō hūnɔ̄ɔ̄ sɔ̄lā wo̍ŋ.

²⁸Ŋ̄ dīmu̍l wānā o̍ wānā ā Ki̍li̍tī o̍kɔ̄ɔ̄. Ndu̍yɛ̍, ŋ̄ chō wānā o̍ wānā sīlāā, ndu̍yɛ̍ mi̍ ŋ̄ wā wānā o̍ wānā pɛ̍ɛ̍kōo̍ o̍ nɛ̄ī o̍ nɛ̄i̍ kɔ̄l kālu̍ ni̍ŋ. Ŋ̄ chō māchūāā he̍ī tōsāā le̍ mī ŋ̄ tōsā mī wāŋndā kpo̍u̍ ā hi᷅ŋ nāā Mɛ̄lɛ̄ka̍ chūā, ndu̍yɛ̍, mā sīmnu᷄ŋ lāka̍a̍so̍ŋ o̍ sūɛ̍i̍ Ki̍li̍tīe̍i̍ ni᷄ŋ.

²⁹Le̍ mī mu᷅ŋ kpo̍u̍ ŋ̍ yɔ̍nu̍ŋ, I̍ cho̍ wa̍llo̍ ō kālā kālā kpo᷅ke̍. I̍ cho̍ fāfa̍la̍a̍ kpe̍e̍kpe̍i̍ o̍ wa̍llo̍ ni᷄ŋ ā kpāāyā Mɛ̄lɛ̄ka̍ lūe̍i̍ yā wo̍.