Read Southern Kisi Kōlo̍sīāŋnda̍ 2 Bible Online

Kōlo̍sīāŋnda̍ 2 - Southern Kisi bible

Kōlo̍sīāŋnda̍ 2

¹I̍ hɛ̍nāŋ nyā wānāā lāāla᷄ŋndā Kōlo̍sīā mī lā sīnā mɛ̄ɛ̍ yā to̍sā wa̍llo̍ ō kālā kālā le̍ nyā ā ha̍ā Lāwo̍di̍sīā ā wānāā si̍nā yā le̍ wā fa̍ū yɛ̍.

²Le̍ sābū yā cho̍ fāfa̍la̍a̍ ho̍ō wo̍ cho̍ ni̍ māā I̍ hɛ̍nāŋ mī lā sɔ̄lā kɔ̄ltā sīmūlāā lāŋ. O̍ ko̍ŋ kɔ̍ɔ̍lī, I̍ hɛ̍nāŋ wa᷅ŋndā ha̍ā mā wā dīōmndo̍ ō pīlɛ̍ kpe̍ o̍ kāālāā ni᷄ŋ. Ndu̍yɛ̍, I̍ hɛ̍nāŋ ndā mā sɔ̄lā tɔ̄nɔ̄ bɛ̍ndōo̍, ō sīnā pɛ̄ŋgu̍ kpe̍e̍kpe̍i̍ yo̍ ō chūū wānā wo̍. Ndu̍yɛ̍ o̍ he̍ī ni᷄ŋ, wāŋndā nɔ̄lā mā sīnā sɔ̄ɔ̍ŋ Mɛ̄lɛ̄ka̍ ndu̍ o̍o̍ māndā mbo̍ vīŋ ŋ̄wāŋndā chīe̍e̍ mu̍ŋ ndo̍ŋ, mu̍ŋ yɔ̍nūŋ māā sɔ̄ɔ̍ŋ ā Ki̍li̍tī o̍kɔ̄ɔ̄ ni̍.

³Ndu̍yɛ̍, ndu̍ Ki̍li̍tī ndu̍ to̍sā ni̍ mī wāŋndā sɔ̄lā nyɛ̄m sūla᷄ŋ Mɛ̄lɛ̄ka̍ŋ kpo̍u̍ ŋ̍ wā ŋ̄ vīāŋna᷄ŋ ndo̍ŋ, mu̍ŋ yɔ̍nūŋ ni̍ māā kɔ̄l kālu̍ Mɛ̄lɛ̄ka̍a̍ ā dɛ̍nɛ̍ si̍nāā ndɔ̄ɔ̍.

⁴Le̍lāŋ, mī si̍lā nyā, lā chɛ᷅l mī wānā o̍ wānā hu̍i̍ nyā ā dīōmndā yēēlɛ̍i̍la̍ŋ te̍.

⁵Mi̍ chē bɛ̍ɛ̍ I̍ cho̍ nyā tɛ̄ɛ̄ŋ mī ŋ̄ wā chāna᷅ŋndo̍ hɔ̄lla̍ ā hɔ̄lla̍ le̍ ni̍, kɛ̍ ndu̍yɛ̍ nyi̍nā nūu̍ chō nyā tɛ̄ɛ̄ŋ. Ndu̍yɛ̍, I̍ cho̍ ā kɔ̄l kɛ̄ndɛ̄ bu̍tē le̍ mɛ̄ɛ̍ dīōmndā sīīmi̍āŋndāŋ lā chō nyā tɛ̄ɛ̄ŋ, ndu̍yɛ̍ mi̍ lā wā īsīsi̍ nyɛ̍ kɛ̄ndɛ̄ yi̍ ā tīīnda᷄ŋndo̍ nɔ̄ɔ̍ o̍ Ki̍li̍tī ni̍ŋ yɛ̍.

⁶Mɛ̄ɛ̍ nyā dɔ̄ū ni᷅ŋ tīīnda᷄ŋ nyāā o̍ Chi̍i̍sū Ki̍li̍tī ni̍ŋ māā Māsānɔ̄ Mɛ̄lɛ̄ka̍ nyā yɛ̍, mɛ̄ɛ̍ kēlālā nyālāŋ lā wā ni̍ko̍ māā wānāā cho̍ o̍ dīōm pīlɛ̍ ni᷄ŋ ā ndu̍.

⁷Mɛ̄ɛ̍ yɔ̄mndo̍ lūēī nu̍āā pūūndu᷅ŋ ndɔ᷄ŋ lɛ̄ŋ la̍nda̍ŋ yɛ̍, lā wā ā mɔ̍ɔ̄sa᷅ŋ ā ndu̍ le̍nde̍, ndu̍yɛ̍, lā hīo̍u̍ lāchi̍ ā kāālā ndɔ̄lāŋ chūāā le̍nde̍ kpe̍e̍kpe̍i̍. Lā hīo̍u̍ lāchi̍ ā wāā ā dīāllūŋ kālā o̍ tīīnda᷄ŋ nyā nɔ̄ o̍ ndu̍ ni̍ŋ ndo̍. Pɛ̄ɛ̄kū nyā sɔ̄lā wo̍ ndu̍ cho̍ ho̍ō ni̍. Lā wā Mɛ̍lɛ̄kā ba̍li̍kāā yīlɔ̄ɔ̍ ta̍u̍ ta̍u̍.

⁸Wāŋndā ā pūm ā chō kēī wāŋndā kɔ̄l kālu̍ īwāna̍ chi̍e̍e̍ya̍a̍ pɛ̄ɛ̄kōo̍, o̍ nɔ̍ tɔ̍nɔ̄ o̍ tɔ̄nɔ̄ le̍ni̍ŋ te̍ wo̍. Hūīyo̍ ko̍ni̍ pɛ̄ɛ̄kū kōŋ ndu̍ hu̍ī wānā ni̍. Le̍lāŋ, lā chɛ᷅l mī wānā o̍ wānā to̍sā mī lā sīmnu᷄ŋ wānāā wāā o̍ lākpɛ̍ɛ̍ o̍ pɛ̄ɛ̄kū wāā le̍nde̍ bɛ̍ŋgu̍ le̍. Ō cho̍ pɛ̍ɛ̄ku̍ fu̍lā o̍ Ki̍li̍tī lo̍ le̍. Pɛ̄ɛ̄kū ndā sɔ̄lā fi̍nyāā ndāā māmāā o̍ bā ā nyi̍nāā wɔ̄ɔ̍ŋāā cho̍ chōo̍ cho̍o̍ mā wā māsāā wā o̍ cho̍ ni̍.

⁹Kāni̍ fo̍ndōle̍, hūnɔ̄ɔ̄ Ki̍li̍tī hi᷅ŋ o̍ īwāna̍ chi̍e̍e̍ya̍ wo̍, Mɛ̄lɛ̄ka̍yɛ̍i̍ kpo̍u̍ ī wā o̍ ndu̍ ni̍ŋ.

¹⁰Ndu̍yɛ̍, le̍ chō nyā chō o̍ dīōm pīlɔ̍ɔ̍ ni᷄ŋ ā ndu̍ Ki̍li̍tī wo̍, le̍ sābū kōŋ Mɛ̄lɛ̄ka̍ tōsā ni̍ mi̍ lā sɔ̄lā yōōmū kpe̍e̍kpe̍i̍yo̍. Ndu̍yɛ̍, nyɛ̄ o̍ nyɛ̍ cho̍ nyi̍nā wɔ̄ɔ̍ŋ mā nɔ̄ kpāāyāā, ndu̍yɛ̍, mā wā māā lāmāsā ndā kpo̍u̍ Ki̍li̍tī o̍ bā bɛ̄ŋgu̍ ndā chō ni̍.

¹¹Bōōndi̍i̍ nyā sīmnu᷄ŋ di̍ōm pīlɛ̍ ā Ki̍li̍tī ve̍, ō wā māā yɔ̄ŋɔ̄ɔ̄ pɛ̍, hīvī chīɛ̄ī kɔ̄ɔ̄līo̍o̍ nyā sɔ̄lā ko̍ŋ ni̍. Kɛ̍ ndu̍yɛ̍, hīvī kōŋ ndu̍ ve̍ māā hīvī wāŋndā hīvī wa᷅ŋndā wo̍ le̍. Hīvī kōŋ ndu̍ ndu̍ Ki̍li̍tī pi̍lā hi̍vi̍ nyā ndu̍ ni̍, ndu̍ yɔ̍nūŋ ni̍ māā bāŋā o̍ bāŋā nyā mbo̍ sōlī nyā o̍ wānā chi̍e̍e̍yɛ̍ī yɔ̄ŋ wɔ̄ɔ̍ŋnde̍ ni̍ŋ ndo̍.

¹²Yīŋɔ̄ɔ̄ nyā sɔ̄lā wo̍, ō wā māā yɔ̄ŋɔ̄ɔ̄ pɛ̍, mɛ̄ɛ̍ chɔ̄ ndā chɔ̍ Ki̍li̍ti̍ wo̍, mɛ̄ɛ̍ nyā ndāā ndā chɔ̍ chɔ̄ kōŋ ni̍. Ndu̍yɛ̍, ō wā māā yɔ̄ŋɔ̄ɔ̄ pɛ̍, mɛ̄ɛ̍ mīŋgī Mɛ̄lɛ̄ka̍ mīŋgi̍ ndu̍ yōōmū wo̍, mɛ̄ɛ̍ nyā ndāā o̍ mi̍ŋgi̍ mīŋgī kōŋ yōōmū ni̍. He̍ī yɔ̄nu̍ŋ sānāā o̍ tīīnda᷄ŋ nyā dɔ̄ū o̍ kpāāyā Mɛ̄lɛ̄ka̍a̍ ni᷄ŋ ndo̍, ndu̍ yɔ̍nūŋ ni̍ māā Mɛ̄lɛ̄ka̍ o̍ mi̍ŋgi̍ Ki̍li̍ti̍ yōōmū wo̍.

¹³Ō wā māā yɔ̄ŋɔ̄ɔ̄ pɛ̍, lā wā māwāā o̍ tāse̍lā ndɔ̄ɔ̍ māā wānāā vīlɛ̍i̍. Kāni̍ fu̍u̍le̍, le̍ yɔ̄ŋndā nyāla̍ wɔ̍ɔ̍ŋndāŋ, ndu̍yɛ̍ vɛ̍lɛ̄ le̍ mɛ̄ɛ̍ nyā āā sɔ̍lā wɔ̍ hi̍vī chīɛ̄ī kɔ̄ɔ̄lī Ki̍li̍tī hi̍vī wa᷅ŋndā wo̍ le̍ yɛ̍. Ko̍ŋ cho̍ ni̍, nyā āā sɔ̍lā wɔ̍ bāŋa᷄ŋndo̍ o̍ wānā chi̍e̍e̍yɛ̍ī nyɛ̄i̍ yɔ̄ŋ wɔ̄ɔ̍ŋnde̍ ni᷄ŋ te̍. Kɛ̍ pɛ̄ŋgo̍o̍ ho̍ō ni᷅ŋ, ō wā māā yɔ̄ŋɔ̄ɔ̄ pɛ̍, mɛ̄ɛ̍ mīŋgī Mɛ̄lɛ̄ka̍ mīŋgi̍ Ki̍li̍ti̍ yōōmū wo̍ mɛ̄ɛ̍ nyā ndāā o̍ mi̍ŋgi̍ mīŋgī kōŋ yōōmū ni̍. Mɛ̄lɛ̄ka̍ bīī mbo̍ māl nāā le̍ yɔ̄ŋndā nāālā wɔ̍ɔ̍ŋndāŋ kpo̍u̍.

¹⁴Ō ma᷄l sɔ̄ɔ̍ŋ wā ŋ̄ chɔ̄māā nāā chōo̍ mi̍ mu̍ŋ wa᷅ nāā ŋ̄ bīyāā wo̍ŋ. Ndu̍yɛ̍ vɛ̍lɛ̄, sāwālā ndɔ̄lā di̍mi̍ māā tē wānā to̍sā sūɛ̍i̍ wāā nu̍āā, ā sūɛ̍i̍ wāā nu̍āā pɛ̍, mɛ̄ɛ̍ ā to̍sā yɔ̄ŋ wɔ̄ɔ̍ŋndo̍ lāŋ, mbo̍ fāŋā sāwālā lāŋ. Ō wā māā yɔ̄ŋɔ̄ɔ̄ pɛ̍, ō ba᷄ŋ mābāŋāā lāŋ o̍ yɔ̄m sīŋgāfīlāā chōo̍ mbo̍ chīī ā lāŋ.

¹⁵Mi̍ Mɛ̄lɛ̄ka̍ tōsā pīɔ̍m Chi̍i̍sū Ki̍li̍tī vi᷅ o̍ yɔ̄m sīŋgāfīlāā chōo̍ wo̍, mbo̍ pūū kpāāyā o̍ kpāāyā cho̍ nyi̍nāā wɔ̄ɔ̍ŋndā o̍ bā, nyi̍nāā nɔ̍ kpāāyāā wā ni̍ ā nyi̍nāā cho̍ māā lāmāsā wā. Mbo̍ sōlī ndā fāŋgāa̍ lāchī de᷅ŋ le̍ mī wānā o̍ wānā che᷅ ndā le̍ sīnāā māā Ki̍li̍tī so̍li̍ ndā ā chɔ̄ūwo̍.

¹⁶Le̍lāŋ, wānā o̍ wānā do̍ū lɛ̄ nyā sāwā mbō yɔ᷄ŋ māā lā di̍ā ho̍ō le̍, ɔ̄ɔ̄ lā ko᷅l ho̍ō ndo̍ō le̍, mī lā hāu̍ bālāŋ lēbɛ̄ŋgu̍ le̍. Sāwālā ndālā yɛ̍ yɛ̍la̍ lāŋ ā pālɛ̍i̍ ndā hɛ̄li̍ o̍ wɔ̄sīo̍o̍ ni᷄ŋ le̍ Mɛ̄lɛ̄ka̍ pīɛ̄īyo̍ ve̍ ni̍, ā sāwālāŋ ā chūūŋgi̍āŋndā ndā chūūŋgi̍āŋ ā pāŋgi̍i̍ sɛ̍nɛ̄ī ye̍ lāŋ, kɔ̍ bi̍ī ā sāwālāŋ ā pālɛ̍i̍ pɛ̍ŋgīɛ̍i̍ o̍kɔ̄ɔ̄, lāŋ kpo̍u̍, lā lu̍ɛ̍ī o̍ lāŋ bɛ̄ŋgu̍ le̍.

¹⁷Sāwālāŋ nda᷅ŋ kpo̍u̍, tē ō wā māā yɔ̄ŋɔ̄ɔ̄ pɛ̍, lā chō māchūāā sɔ̍ŋgɔ̍ nyɛ̄ kpe̍e̍kpe̍i̍ ndu̍ o̍o̍ nɔ̍ le̍ hūnɔ̄ɔ̄ yɔ̄nɔ᷄ŋndo̍ wo̍. Ki̍li̍tī ndu̍ cho̍ nyɛ̄ kpe̍e̍kpe̍i̍ yo̍ ni̍.

¹⁸Wānā o̍ wānā pɛ̍ɛ̍ku̍ nyā le̍ tūsi᷄ŋ kɔ̄l chōo̍ wo̍ ndu̍yɛ̍, mbō pɛ̄ɛ̄ku̍ nyā le̍ ki̍i̍la̍a̍ Mɛ̄lɛ̄ka̍a̍ sōōlūūwo̍ mī lā chɛ᷄l te̍, yɔ̄ŋi̍ ndā tōsā mī lā fūlā fāndā Mɛ̄lɛ̄ka̍ nɔ̄ le̍ nyā wo̍. Wāŋndā ha̍ā, ā bīī pɛ̍ ā dīmu̍l nyā māā ndā cho̍ o̍ nɛ̄ī ni̍, kāni̍ fu̍u̍le̍, le̍ mɛ̄ɛ̍ ndā chā sɔ̍ɔ̍ŋ o̍ yi̍lāŋndo̍ ni᷄ŋ yɛ̍, o̍ ko̍ŋ, mā tōl hēēlɔ᷄ŋ fo̍ndōo̍. O̍ wānā chi̍e̍e̍yɛ̍i̍ ni᷄ŋ ko̍ni̍ ndā yīyāŋ sɔ̍ɔ̍ŋ ni̍.

¹⁹Wānā wāā le̍nde̍ ō cho̍ wa᷅nā cho̍ ō mɔ̄ɔ̄sa᷅ŋ ā Ki̍li̍tī o̍ cho̍ bōlle̍ŋ ndo̍ le̍. O̍ ndu̍ Ki̍li̍tī ni̍ŋ dīāllo̍ŋ fa̍ū ŋ̍ sɔ̍lā nyɛ̍ dīāā ni̍. Ndu̍yɛ̍, o̍ ndu̍ ni̍ŋ bōōndo̍ŋ ā nyɛ̄su̍a̍ŋ o̍ dīāllo̍ŋ ŋ̄ chō ŋ̄ bɔ̄ɔ̄ŋīāā ni̍. Ndu̍yɛ̍, mī ŋ̄ hīndū mɛ̄ɛ̍ Mɛ̄lɛ̄ka̍ tōsā ā sābū mī ŋ̄ hīndū yɛ̍.

²⁰Tē ī wā pɛ̍ māā wu̍ Ki̍li̍tī vi᷅ wo̍, māā nyā ndā vi᷅ wu̍ ko̍ŋ ni̍, ndu̍yɛ̍ māā he̍ī tōsā lā cho̍ lɛ̍ nyi̍nāā wɔ̄ɔ̍ŋāā nɔ̍ kpāāyāā wā o̍ bā bɛ̄ŋgu̍ le̍ pɛ̍, mɛ̄ɛ̍ vɛ᷅ mi̍ lā wā wɔ̄ o̍ ka̍āla̍ŋ ni᷄ŋ māā wānāā cho̍ le̍ chi̍e̍ēŋndo̍ ho̍ō wā? Vɛ᷅ mī lā wōū bo᷅lle̍ŋ o̍ sāwālā ndālāŋ bɛ̄ŋgu̍?

²¹Ā bīī pɛ̍ ā dīmu̍l nyā āā, “Lā nɔ᷅ kpe̍ku̍ o̍ kpe̍ku̍ ā nyɛ̄ dīāā wāā nu̍āā le̍, lā di̍ā nyɛ̄ wāā nu̍āā le̍, lā pi̍la᷄ŋ nyɛ̍ dīāā wāā nu̍āā le̍.”

²²Sāwālāŋ nda᷅ŋ kpo̍u̍ lā chō māchūāā ā nyɛ̄ dīāā o̍kɔ̄ɔ̄, o̍ cho̍ ho̍ō tē wāŋndo̍ dē dɔ̍ɔ̍ ndu̍ pɛ̍ ō sīmnu᷄ŋ nyɛ᷅ fo̍ndō wo̍. Ndu̍yɛ̍, wāŋndā chīe̍e̍ya̍ pi̍lā kɛ̍ɛ̍si̍a̍a̍ sāwālāŋ nda᷅ŋ mā wā wāŋndā lāŋ pɛ̄ɛ̄kōo̍ ni̍.

²³Tē wānā wā o̍ sāwālā ndālāŋ nda᷅ŋ bɛ̄ŋgu̍ pɛ̍, mɛ̄ɛ̍ o̍ nɛ̄i̍ lā chɔ᷅m ndo̍ chōo̍ mā pi̍ɛ̍i̍ Mɛ̄lɛ̄ka̍. Ndu̍yɛ̍, sāwālāŋ nda᷅ŋ lā pɛ̄ɛ̄kū wānā tu̍si᷄ŋ kɔ̄l chōo̍ wo̍. O̍ ko̍ŋ kɔ̍ɔ̍lī, tē wāŋndo̍ chō o̍ lāŋ bɛ̍ŋgu̍ pɛ̍ mɛ̄ɛ̍ mbō lūe̍i̍ dīāllūŋ ndɔ᷄ŋ mɔ̍nɛ̍i̍. Wānā che᷅ sɔ̄ɔ̍ŋ mu᷅ŋ ki̍nɛ̍i̍ pɛ̍, nu̍āā ŋ̄ yɔ̄ŋ āā kɔ̄l kālu̍ bɛ̍ndōo̍ pi̍lā cho̍ o̍ sāwālāŋ nda᷅ŋ ni᷄ŋ ni̍. Kɛ̍ ndu̍yɛ̍, nyɛ̄ o̍ nyɛ̄ kɛ̄ndɛ̄ bɛ̍ɛ̍ cho̍ o̍ lāŋ ni̍ŋ o̍ to̍sā mī wāŋndo̍ nɔ̄lā mbō tīu̍ kɔ̄l ndɔ̄ɔ̍ bā ā yēēmāŋ dīāllūŋ ndɔ᷄ŋ o̍kɔ̄ɔ̄ le̍.