Read Southern Kisi Kōlo̍sīāŋnda̍ 3 Bible Online

Kōlo̍sīāŋnda̍ 3 - Southern Kisi bible

Kōlo̍sīāŋnda̍ 3

¹Tē ō wā māā yɔ̄ŋɔ̄ɔ̄ pɛ̍, mīŋgī Mɛ̄lɛ̄ka̍ mīŋgi̍ Ki̍li̍ti̍ yōōmū wo̍ nyā ndā o̍ mi̍ŋgi̍ mīŋgī kōŋ yōōmū ni̍. Mɛ̄ɛ̍ le̍ sābū kōŋ, lā lāndu̍ŋ kɔ̍l le̍ nyɛ̄m wāā ɛ̄chɛ̍nɛ̄. Lo̍ŋ Ki̍li̍tī cho̍ īchāli̍ o̍ kpe̍ŋgbe̍i̍ lēmāsāa̍ chōo̍ o̍ fo̍ndāŋ lēbɛ̄ɛ̄ bɛ̄ndōo̍ o̍ bā kɛ̄ndɛ̍ Mɛ̄lɛ̄ka̍a̍ chōo̍ ni̍.

²Nyɔ̄ɔ̍ŋ ɛ̄chɛ̍nɛ̄ ā mu̍ŋ nyā nɔ̄ ni̍ mī lā wā yīya᷄ŋndo̍, ō cho̍ ā nyɛ̄m wāā chi̍e̍ēŋ nāŋ te̍.

³Kāni̍ fu̍u̍le̍, tē ō wā māā yɔ̄ŋɔ̄ɔ̄ pɛ̍, nyā chō ni᷅ŋ māchūāā wānāā vi᷅ ni᷅ŋ. Yōōmūlā kpe̍e̍kpe̍i̍la̍ nyā nɔ̄ lāŋ wāŋndā ā nɔ̍lā wɔ̍ mā chē lāŋ te̍. Kāni̍ fo̍ndōle̍, yōōmūlā nyālāŋ lā chō wɔ̄ Ki̍li̍tī o̍ bā lā vīāŋāā nāā o̍ cho̍ o̍ māsāle̍ Mɛ̄lɛ̄ka̍le̍ŋ ni᷄ŋ ndā.

⁴Ki̍li̍ti̍ cho̍ yōōmū nyā kpe̍e̍kpe̍i̍yo̍ ni̍. Ndu̍yɛ̍, bōōndi̍i̍ Ki̍li̍tī cho̍ ndu̍ pi̍lā chɔ̄m mī wāŋndā chē ndu̍ ve̍, bōōndi̍i̍ ke̍ŋ nyā bɛ̍ɛ̍ nyā chō wā ā chɔ̄māā ā ndu̍ lātu̍lu̍ o̍ nāŋɔ̄ɔ̍ ni᷄ŋ ni̍.

⁵Le̍lāŋ, lā sōli̍ ni̍ko̍ ba᷅la̍ŋ po̍ o̍ yēēmāŋ wānāā cho̍ le̍ chi̍e̍ēŋndo̍ ho̍ō wā ā nɔ̄ wo̍ŋ ni᷄ŋ. Mu̍ŋ cho̍ ni̍, sūūndāa̍ nyā wānā nyā cho̍ o̍ nɔ̄ ni̍ŋ te̍ wo̍, nīīlū nɔ̄ɔ̄lɛ̍i̍yo̍, yēēmɛ̍i̍ su̍u̍ndɛ̍i̍ bɛ̍ndūe̍i̍ nɔ̄ɔ̍, yēēmɛ̍i̍ le̍ dɛ̍nɛ̍ wɔ̍ɔ̍ŋndo̍ tōsāā, ā hɔ̄lte̍ŋ lūɛ̄īyɔ̄ɔ̍ o̍ nyɔ̄ɔ̍ŋ. Hɔ̄lte̍ŋ lūɛ̄īyɔ̄ɔ̍ o̍ nyɔ̄ɔ̍ŋ, sōōlu̍u̍la̍ŋ nɔ̄ɔ̍ lā ti᷄ŋ lā cho̍ lāŋ ni̍.

⁶Le̍ sɔ̄ɔ̍ŋ wɔ̍ɔ̍ŋ wāā nu̍āā, Mɛ̄lɛ̄ka̍ chō ā tu̍mbo̍o̍ ā wāŋndā ndu̍yɛ̍, mbo̍ wā ndā hūnɔ̄ɔ̄ dɛ̍nɛ̍ pālāā tūsī chōo̍ ni̍.

⁷Nyā bɛ̍ɛ̍ sɔ̄ɔ̍ŋ wāā le̍nde̍ nyā wā tōsāā o̍ yōōmū pāāndū nyā wā ni᷄ŋ ndo̍ ni̍.

⁸Kɛ̍ ndu̍yɛ̍, pɛ̄ŋgo̍o̍ ho̍ō ni᷅ŋ lā nɔ̄ mī lā sōli̍ bālāŋ po̍ o̍ sɔ̄ɔ̍ŋ wāā nu̍āā ni᷄ŋ. Mu̍ŋ cho̍ ni̍, tu̍mbe̍la̍ŋ, kɔ̄l tūūwo̍, nīīlū yɛ̄lē tūlāā, wāŋndo̍ dīōlā wɔ̄ɔ̍ŋndāŋ kēēlāā, ā dīōmndā nɔ̄ɔ̄lɛ̍i̍la̍ŋ dīmīo̍o̍.

⁹Lā di᷅mu̍la᷅ŋ cho̍ōla̍ŋ te̍, kāni̍ fu̍u̍le̍, lā chīi̍ ni᷅ŋ fe̍u̍ ā wānā chi̍e̍e̍yɛ̍ī pāāndūe̍i̍, ā sɔ̄ɔ̍ŋ ndi̍ i̍i̍ to̍sā wo̍ŋ.

¹⁰Wānā chi̍e̍e̍yɛ̍ī sɛ̄nɛ̄īye̍ nyā nɔ̄ ni᷅ŋ ni̍. Ndu̍yɛ̍, Mɛ̄lɛ̄ka̍ to̍o̍si̍āā ndi̍ ni̍. Ō chō hīōūwɔ̄ɔ̍ lāchī ā tōsāā mī wānā chi̍e̍e̍yɛ̍ī sɛ̄nɛ̄īye̍ he̍ī ī chɔ̄ɔ̄lu̍ wā māā ndu̍ pi̍lā, le̍ mbō lo̍ o̍ ko̍ŋ mbō tōsā mī lā sīnā ndu̍ kɛ̍sɛ̍ kɛ̍sɛ̍.

¹¹Le̍ sūɛ̍i̍ Mɛ̄lɛ̄ka̍ tōsā he̍ī ye̍, yɛ̍ yɛ̍ bɛ̍ɛ̍ cho̍ lɛ̍ Chu̍ūwa̍ tɛ̄ɛ̄ŋ ndā wānāā cho̍ ā Chu̍ū le̍ wā le̍. Wānāā hi̍vī chu̍a̍u̍wāā ndāā o̍ chīɛ̄ī kɔ̄ɔ̄lī wā ni̍, wānāā hi̍vī bɛ̍ɛ̍ le̍ wā ni̍, wānāā kāālā che᷅le̍ŋnda̍ ni̍, kāālā cho̍ la̍nda̍ŋ ndāŋ ni̍, ō wā lāchɛ̍ ni̍, kāŋ kpo̍u̍, yɛ̍ yɛ̍ bɛ̍ɛ̍ cho̍ ndā tɛ̄ɛ̄ŋ te̍. O̍ he̍ī ni᷄ŋ, Ki̍li̍tī ko̍ cho̍ sūɛ̍i̍ le̍bo᷅lle̍ ni̍. Ndu̍yɛ̍, ndu̍ cho̍ o̍ yōōmūlā nyālāŋ ni᷄ŋ kpo̍u̍ ni̍.

¹²Nyā cho̍ wānāā Mɛ̄lɛ̄ka̍ hɛ̄li̍ le̍ wāā wānāā ndɔ̄ wā ni̍. Wānāā cho̍ le̍ Mɛ̄lɛ̄ka̍ wā nyā chō ni̍, ndu̍yɛ̍, ō kāālā nyā tāu̍. Le̍lāŋ, sɔ̄ɔ̍ŋ nyā nɔ̄ mī lā tōsā ni᷅ŋ ndo̍ŋ mu̍ŋ cho̍ mu᷅ŋ ni̍, nyīɛ̍ɛ̍ye̍ nɔ̄ɔ̍, ā kɛ̄ndɛ̄i̍, ā wāā wānā tu̍sīa̍ŋ, ā wāā wānā chāā ŋ̍wāŋ bīyɔ̄ɔ̍, ā wāā wānā bi̍u̍wa᷄ŋ.

¹³Lā bīūwa᷅ŋ ve᷅llāā vēllē. Ndu̍yɛ̍, tē ō wā pɛ̍ mī chāāŋ nūm yɔ̍ŋ nu̍m īsɔ̄ɔ̍, mɛ̄ɛ̍ māl ndu̍ le̍ sūɛ̍i̍ wɔ̍ɔ̍ŋ o̍ to̍sāl nu̍m ke̍ŋ nde̍. Lā nɔ̄ mī lā mālna᷅ŋ ve᷅llāā vēllē mɛ̄ɛ̍ Māsānɔ̄ɔ̍ Mɛ̄lɛ̄ka̍ ma᷄l nyā le̍ yɔ̄ŋndā nyāla̍ wɔ̍ɔ̍ŋndāŋ yɛ̍.

¹⁴O̍ ko̍ŋ kɔ̍ɔ̍lī, sūɛ̍i̍ le̍bo̍līī nyā nɔ̄ mī lā tōsā ve̍ cho̍ ni̍, lā nɔ̍ kāālāā nyā o̍ lākɔ̄l. Kāālā kɛ̄ndɛ̄la̍ŋ nda᷅ŋ ki̍nɛ̍i̍ kāālāā ndu̍ mɔ̍ɔ̍sā lāŋ ni̍ mī nyɛ̄ o̍ nyɛ̄ bɛ̄ndā nyɛ̄ kɛ̄ndɛ̍ī.

¹⁵Kɔ̄l nyūlū Ki̍li̍tī yɔ̍ŋgū wo̍ ndu̍ nɔ̍ ni̍ mbō chɔ᷄m nyā o̍ kɔ̄ltā nyālāŋ ni᷄ŋ nyɛ̍ bɛ̍ndā le̍ tōsāā wo̍. Mɛ̄lɛ̄ka̍ vēēlu̍ nyā ma̍ve̍e̍lāā le̍ mī lā sɔ̄lā kɔ̄l nyūlōo̍ ho̍ō māā wānāā cho̍ o̍ dīāllūŋ pīlɔ̍ŋ ni᷄ŋ ndā. Ndu̍yɛ̍ o̍ ko̍ŋ kɔ̍ɔ̍lī, lā nɔ̄ mī lā me᷄l Mɛ̄lɛ̄ka̍ bāli̍ka̍ le̍ nyɛ̄ o̍ to̍sā le̍ nyā wo̍.

¹⁶O̍ ko̍ŋ kɔ̍ɔ̍lī, yōōŋgōo̍ ā Ki̍li̍tī o̍kɔ̄ɔ̄ ō nɔ̄ mbō lūɛ̄ī o̍ kɔ̄ltā nyālāŋ ni᷄ŋ nyɛ̍ kɛ̄ndɛ̄ kpe̍e̍kpe̍i̍. Ndu̍yɛ̍, lā pɛ̄ɛ̄ka᷅ŋ ve᷅llāā vēllē mī lā sīīli̍āŋ o̍ nɛ̄ī o̍ nɛ̄i̍ kɔ̄l kālu̍ ni̍ŋ. O̍ ko̍ŋ kɔ̍ɔ̍lī, lā sōli̍ cho̍ndu̍ŋ cho̍ o̍ Yāu̍ Ŋ̄chōndu̍ Mɛ̄lɛ̄ka̍a̍ ni᷄ŋ ndo̍ŋ, ā chōndo̍ŋ ā Chi̍i̍sū o̍kɔ̄ɔ̄, ā chōndu̍ŋ Nyi̍nā Mɛ̄lɛ̄ka̍a̍ dūāū nyā o̍ lākɔ̄l lo̍ŋ. Lā me᷄l Mɛ̍lɛ̄kā bāli̍ka̍ o̍ chōndo̍ŋ ni᷄ŋ ā kɔ̄ltā nyālāŋ kpo̍u̍.

¹⁷Nyɛ̄ o̍ nyɛ̄ nyā wā dīmī kɛ̄lɛ̄ŋgāā mī lā wā ndu̍ tōsā pɛ̍, lā tōsā ndu̍ māā bu̍ɛ̍īyāā Māsānɔ̄ɔ̍ Chi̍i̍sū, ndu̍yɛ̍, mī lā me᷄l Mɛ̍lɛ̄kā fi̍nyā nāā bāli̍ka̍ sānāā o̍ Chi̍i̍sū ni̍ŋ.

¹⁸Nyā lāāndūāā, lā tūe̍i̍ pi̍a̍a̍ndāā nyāā dīōm. Kāni̍ fo̍ndōle̍, nyɛ̍ bɛ̍ndā nūm wānā lāāla᷄ŋndo̍ mā to̍sā wo̍ ndu̍ cho̍ ho̍ō ni̍.

¹⁹Nyā pīāāndūāā yɛ̄, lā kāālā lāāndāā nyāā. Ndu̍yɛ̍, lā wa᷅ ŋu̍āsū ŋūāsū ā ndā le̍.

²⁰Nyā chūāūwa̍, lā tūe̍i̍ wānāā ve̍lū nyā wā dīōm o̍ īsɔ̄ɔ̍ o̍ īsɔ̄ɔ̍ ni̍ŋ, kāni̍ fo̍ndōle̍, he̍ī ī nɛ̄ŋī Māsānɔ̄ɔ̍ Mɛ̄lɛ̄ka̍ kɔ̄l.

²¹Nyā fi̍nyāā yɛ̄, lā bi̍ī chūāūwāā nyāā bīyɔ̄ɔ̄ wɔ̄ɔ̍ŋ te̍, kāni̍ fo̍ndōle̍, ko̍ŋ to̍sā mā tāmbu̍ kɔ̄l.

²²Nyā cho̍ yɛ̄ chīāā wā, lā tūe̍i̍ wānāā nyā chō o̍ bā wā dīōm o̍ īsɔ̄ɔ̍ o̍ īsɔ̄ɔ̍ ni̍ŋ. Kɛ̍, ō wa᷅ ko̍ bo̍o̍ndi̍i̍ ndā wā o̍ hɔ̄lndɔ̄ ndu̍yɛ̍, mi̍ lā yēēmā le̍ mā chāndu̍ nyā ve̍ le̍. Le̍ te̍le̍ŋ o̍ te̍le̍ŋ lā tōsā wa̍llo̍ ā kɔ̄l kpo̍u̍. O̍ ko̍ŋ kɔ̍ɔ̍lī, lā tōsā ndu̍ le̍ bɛ̄ɛ̄le̍ nyā nɔ̄ le̍ Māsānɔ̄ɔ̍ Mɛ̄lɛ̄ka̍ le̍ŋ.

²³Wāli̍ o̍ wāli̍ nyā wā tōsā pɛ̍, lā tōsā ndu̍ ā kɔ̄l kpo̍u̍. Lā tōsā ndu̍ nu̍āā ŋ̄ chā āā le̍ Māsānɔ̄ɔ̍ Mɛ̄lɛ̄ka̍ nyā chō ndu̍ tōsāā ni̍. Lā to̍sā ndu̍ māā le̍ wānā chi̍e̍e̍ su̍e̍e̍ le̍.

²⁴Lā sīnā pɛ̍ŋgu̍ māā Māsānɔ̄ɔ̍ Mɛ̄lɛ̄ka̍ chō hūnɔ̄ɔ̄ nyā fāndā. Nyɛ̄ o̍ chu̍e̍l wānāā ndūāā būŋgɛ̄i̍ le̍ ndā kīo̍o̍ wo̍, lā chō ndu̍ sɔ̄lā. Ki̍li̍tī ndu̍ cho̍ Māsānɔ̍ nyā chō wa̍llo̍ le̍ ndu̍ kpe̍e̍kpe̍i̍ yo̍ ni̍.

²⁵Wānā o̍ wānā to̍sā ī wɔ̄ɔ̍ŋnde̍ pɛ̍, wānā ko̍ŋ chō hūnɔ̄ɔ̄ pāāwāā chūā le̍ sūɛ̍i̍ wɔ̍ɔ̍ŋ o̍ to̍sā ve̍. Mɛ̄lɛ̄ka̍ ndu̍ nɔ̍ hɛ̍lī le̍.