Read Southern Kisi Kōlo̍sīāŋnda̍ 4 Bible Online

Kōlo̍sīāŋnda̍ 4 - Southern Kisi bible

Kōlo̍sīāŋnda̍ 4

¹Nyā nɔ̍ chīāā o̍ lābā wā, lā bīi̍ chi̍a̍ā nyāā ō kɛ̄ndɛ̄, ndu̍yɛ̍, mī lā tōsā o̍ cho̍ sākpō le̍ ndā wo̍. Lā kɛ̄si̍ŋ o̍ kɔ̄l māā nyā bɛ̍ɛ̍ wānā cho̍ ɛ̄chɛ̍nɛ̄ mi̍ lā wā ndu̍ o̍ bā bɛ̄ŋgu̍.

²Lā wā Mɛ̍lɛ̄kā pīɛ̄īyo̍ le̍ pɛ̄ŋgu̍ o̍ pɛ̄ŋgu̍. Tē lā wā Mɛ̄lɛ̄ka̍ pīɛ̄īyo̍ pɛ̍, kɔ̄llo̍ ō wā nyā nyɛ̄ kɛ̄ndɛ̄ kɛ̍ndɛ̍ī o̍ nyɛ̄ nyā chō ndu̍ dīmūllo̍ wo̍. Ndu̍yɛ̍, lā wā ndu̍ ba̍li̍kāā mēllo̍ o̍ pīɛ̄īlē nyāle̍ŋ ni᷄ŋ.

³Nāā bɛ̍ɛ̍ lā wā Mɛ̍lɛ̄kā pīɛ̄īyo̍ le̍ nāā. Lā pīɛ̍i̍ Mɛ̍lɛ̄kā māā mbō kūmbu̍l nāā nɛ̄īyo̍ le̍ mī ŋ̄ dīmu̍l wāŋndā yōōŋgū ndɔ̄ɔ̍. Lā pīɛ̍i̍ le̍ nāā le̍ mī ŋ̄ chɔ᷄m wāŋndā sɔ̄ɔ̍ŋ wā ŋ̄ vīāŋna᷄ŋ ā Ki̍li̍tī o̍kɔ̄ɔ̄ wo̍ŋ. Kāni̍ fo̍ndōle̍, le̍ yōōŋgōo̍ ho̍ō yā cho̍ o̍ bīyɔ̄ɔ̍ ni᷄ŋ ni̍.

⁴Lā pīɛ̍i̍ Mɛ̍lɛ̄kā le̍ yā le̍ mɛ̄ɛ̍ yā I̍ nɔ̍lā mī di̍mu̍l wāŋndā yōōŋgōo̍ ho̍ō wa̍la̍ŋ, mɛ̄ɛ̍ yā I̍ nɔ̍ kūēē mī di̍mu̍l ndā ndu̍ yɛ̍.

⁵Ndu̍yɛ̍ o̍ ko̍ŋ kɔ̍ɔ̍lī, lā nɔ̍ tāāsi̍o̍o̍ ā mɛ̄ɛ̍ nyā tōsā sɔ̍ɔ̍ŋ nāā wānāā cho̍ wānāā lāāla᷄ŋ te̍ wā chūā yɛ̍. Ībōōndu̍ o̍ ībōōndu̍ nyā sāālu̍ŋ fo̍ndāa̍ le̍ wānā cho̍ wānā lāāla᷄ŋ te̍ wo̍ īsɔ̄ɔ̍ chɔ᷅m ā yōōŋgu̍ Mɛ̄lɛ̄ka̍a̍ o̍kɔ̄ɔ̄ pɛ̍, lā chɔ᷄m ndu̍.

⁶Ndu̍yɛ̍, mɛ̄ɛ̍ wānā chɔ᷅m wa᷅ŋndo̍ sūɛ̍i̍ mbō hīni̍ kɔ̄l, o̍ ko̍ŋ kɔ̍ɔ̍lī, mī yēēmɛ̍i̍ ī bīī ndu̍ yɛ̍ le̍nde̍ nyā sōo̍ ni̍. Tē wānā o̍ wānā nyu̍nā nyā īsɔ̄ɔ̍ o̍ īsɔ̄ɔ̍ pɛ̍, lā sīnā mɛ̄ɛ̍ nyā mūlī ndu̍ dīōm mbō wā sākpō yɛ̍.

⁷I̍ cho̍ chāāŋ nāā Ti̍chi̍kɔ̄ɔ̍ vīōmɔ̄ɔ̄ nāā nyā chūā. Chāāŋ nāā wānā lāāla᷄ŋndo̍, ō nāā ŋ̄ kāālā mi̍ ŋ̄ wā wāli̍ Māsānɔ̄ɔ̍ Mɛ̄lɛ̄ka̍a̍ nāā ndāā wo̍ o̍ cho̍ ni̍. Ndu̍yɛ̍, ō chō wānā wāli̍ sākpō. Tē ō kūɛ̄ pɛ̍ ō chō lākɔ̄ nyā ko̍na̍ do̍o̍nɔ᷄ŋ ā yā o̍kɔ̄ɔ̄.

⁸Sābū nāā ŋ̄ chō ndu̍ vīōmɔ̄ɔ̄ wo̍ cho̍ ni̍ māā, tē ō kūɛ̄ pɛ̍, ō kɔ̍ do̍o̍nu᷄ŋ nyā ko̍na̍ ā nāā o̍kɔ̄ɔ̄, ndu̍yɛ̍, ō dɛ̄ɛ̄ni̍a̍a̍ nyā kɔ̄lta̍ŋ.

⁹Tɔ̄nɔ̄ɔ̍ chāāŋ nyā, ō nyā chō o̍ ku̍ndā pīlɔ̍ɔ̍ chōo̍ nyā ndāā wo̍, ndā Ti̍chi̍kɔ̄ɔ̍ cho̍ hūnɔ̄ɔ̍ ni̍. Chāāŋ nāā wānā lāāla᷄ŋndo̍ ō nāā ŋ̄ kāālā wo̍ o̍ cho̍ ni̍. Ndu̍yɛ̍ ō chō wānā sākpō. Tē pūāā ha̍ā ā kūɛ̄ pɛ̍, ā chō nyā lākɔ̄ ko̍na̍ do̍o̍nɔ᷄ŋ ā nyɛ̄ o̍ nyɛ̍ yɔ̍nu̍ŋ ā nānu᷄ŋ o̍kɔ̄ɔ̄.

¹⁰Ālu̍i̍ta̍kɔ̄ɔ̄, ō nāā ŋ̄ chō o̍ bīyɔ̄ɔ̍ ni᷄ŋ lātu̍lu̍ nāā ndu̍ wo̍, ō yi᷄l nyā. Ma̍kī bɛ̍ɛ̍ ō yi᷄l nyā, ndu̍ yɔ̍nūŋ ni̍ māā Ba̍a̍na̍bāā po̍ fi̍nyā ndɔ̄ pɔ̍mbɔ̄ɔ̍ wo̍. I̍ di̍mu̍l nyā ni᷅ŋ pāāndū ā Ma̍kī o̍kɔ̄ɔ̄, māā pɛ̄ŋgu̍ o̍ pɛ̄ŋgu̍ o̍ ko̍māl nyā pɛ̍, lā bīi̍ ndu̍ nyɛ̄ kɛ̄ndɛ̄ kɛ̍ndɛ̍ī.

¹¹Chɔ̄ɔ̍sūāā, ō ndā vēēlū vɛ̍lɛ̄ āā, Chɔ̍si̍tɔ̄ɔ̄ wo̍, ndu̍ bɛ̍ɛ̍ ō yi᷄l nyā. Pūāā ha̍ā ndā ko̍ni̍ cho̍ Chu̍ūwa̍, ā cho̍ wa̍llo̍ ā yā lātu̍lu̍ le̍ tōsāā mī Mɛ̄lɛ̄ka̍ ō wā māsāā ŋ̄wāŋndā chīe̍e̍ cho̍o̍ wā ni̍. Pūāā ha̍ā ā mālā yā bɔ̄ɔ̍ ta̍u̍ ta̍u̍.

¹²Ɛ̄pāfu̍lɔ̄ɔ̄, bu̍ɛ̍i̍ Chi̍i̍sū Ki̍li̍tīo̍o̍ ō nyā chō nyā ndāā o̍ ku̍ndā pīlɔ̍ɔ̍ chōo̍ wo̍, ndu̍ bɛ̍ɛ̍ ō yi᷄l nyā. Le̍ pɛ̄ŋgu̍ o̍ pɛ̄ŋgu̍ ō chō Mɛ̄lɛ̄ka̍ pīɛ̄īyo̍ le̍ nyā ā kɔ̄l kpo̍u̍. Ō chō Mɛ̄lɛ̄ka̍ pīɛ̄īyo̍ māā mī lā lo̍ o̍ ko̍ŋ, mī lā si᷄m yi̍ ā dīāllūŋ kālā mī lā sīmnu᷄ŋ lāka̍a̍so̍ŋ. Ndu̍yɛ̍, ō chō pīɛ̄īle̍ŋ māā kīīsa᷄ŋ o̍ kīīsa᷄ŋ o̍ wa᷅ nyā o̍ lākɔ̄l ā lāāla᷄ŋ nyāā o̍kɔ̄ɔ̄ le̍, ndu̍yɛ̍, māā mī lā tōsā nyɛ̄ o̍ nyɛ̄ fe̍e̍ Mɛ̄lɛ̄ka̍ hɛ̄nāŋ nyā le̍ tōsāā.

¹³Yā Pɔ̍ɔ̄ bɛ̍ɛ̍ I̍ nɔ̍lā mī tɛ̍ndā ndi̍ māā lēse̍ī, mɛ̄ɛ̍ kpɛ̍ Ɛ̄pāfu̍lɔ̄ɔ̄ to̍sā wa̍llo̍ ō kālā kālā le̍ nyā, ā le̍ wānāā lāāla᷄ŋndā Lāwo̍di̍sīā, ā ha̍ā Hīɛ̄lu̍a̍po̍līī chi̍e̍e̍ yɛ̍.

¹⁴Chāāŋ nāā kāālāā Lu̍kū, o̍ cho̍ wāna̍ chi̍ɔ̍ū wa᷅ŋnda̍ wo̍, ndā De̍ma̍sī, ā yi᷄l nyā.

¹⁵Lā yi᷄l nāā chāāŋāā nāā wānāā lāāla᷄ŋndā Lāwo̍di̍sīā chi̍e̍e̍. Lā yi᷄l ye̍mā nāā Ni̍mi̍fāā, ā wānāā lāāla᷄ŋndā ā chu̍ūŋgi̍āŋ o̍ ndu̍ lo̍ chi̍ɛ̍ī ni̍ŋ ndā.

¹⁶Tē lā chīi̍ lāwāā o̍ yāu̍wo̍ ho̍ō ni᷄ŋ to̍fā pɛ̍, mɛ̄ɛ̍ lā tōsā ā sābū mā to̍mbo̍la̍ ndu̍ vɛ̄lɛ̄ ku̍ndā wānāā lāāla᷄ŋndā Lāwo̍di̍sīā o̍ hɔ̄l. Ndu̍yɛ̍, yāu̍ nāā ŋ̄ yɔ᷄ŋ vɛ̄lɛ̄ o̍ wānāā lāāla᷄ŋndā lo̍ Lāwo̍di̍sīā mā wā nyā ndu̍ yɔ̄ŋ ndo̍, ndu̍ bɛ̍ɛ̍ lā to̍mbo̍la̍ ndu̍ wānāā lāāla᷄ŋndā o̍ hɔ̄l Kōlo̍sīā.

¹⁷Lā dīmu̍l A̍ki̍pɔ̄ɔ̄ māā ō sīo̍u̍ wāli̍ Māsānɔ̄ɔ̍ Mɛ̄lɛ̄ka̍a̍, ō ndā ke̍ ndu̍ le̍ tōsāā wo̍.

¹⁸Yā Pɔ̍ɔ̄ pi̍lā cho̍ ni᷅ŋ yīlɔ̄ɔ̍ ho̍ō pōōnyīāā ni̍. I̍ yi̍l nyā lāpi̍. Lā lōōnu̍ŋ māā I̍ cho̍ o̍ bīyɔ̄ɔ̍ ni᷄ŋ. Mbɔ̄ Mɛ̄lɛ̄ka̍ yīyāŋ nyā chōo̍ fɔ̍.